AUTHOR : OLIVER STRANGE (1930)
Chapter 15
Rozami Pachuau
A tuk zingah chuan a tho a, Green-a chuan chaw puar takin a ei a. Hotel atang chuan YZ kawng lam chu a lo thlir reng a. Larry-a khan a thuchah kha thlen tak ang maw tiin a ngaihtuah vang vang a. Chutihlai chuan Noreen-i pawh chu a bulah chuan a sakawr ata a chhuk a. An insualna hnuhma te chu a hmelah chuan a la lang neng nung a. Mahse, hlim awm takin Green-a chuan, "Kei zawng, buaina siam ka hrat em a ni tiraw" a lo ti ngawt a. "Min hmu duh niawm in Larry-a khan a sawi a" Noreen-i chuan a lo ti nghal tawng a. "Englai pawhin chu chu sawi se, thudik a ni fovang" nui chung hian Green-a chuan a han ti phawt a (Hmmm ler reuh
). Thutak hmel tak hian, "Thil min tihsak turin ka duh che a ni. Blue-a hi tihngaihna ka hre lo a ni. Ka hna thawh tur han thawhpui atan chuan a tha lutuk in ka hre si a. Lo nei leh mai langin, tichuan, mi tha tak kutah a awm a ni tih ka hria anga, ka ngaih a tha thei ang" a han ti leh a.Noreen-i hmel chu a lo danglam deuh a, a thil sawi chu kimchangin hre mah suh se, chutia a sakawr duh em em nei tur a a han duhsakna chu a tilawm hle a. "Chu, i dinhmun hlauhawm deuhin i hria m ni?" a han ti a. Green-a chuan, "Mai mai a, ka lo ti hlau dawn tak che a! Cowboy hna te chu englai pawha hlauhawm han tih theih phei chu a ni a. Heta han hnutchhiah ngawt chu ka duh si lova, han kalpuina leh han thawn bona lah ka hre si lo a ni" a ti mai a. "Chuti chu Ranch-ah ka kawl sak ang che, mahse, nangman i rawn thlen lohvin" Noreen chuan a ti ta a. Green-a chuan a lu a thing a, "Ni lo ve, Blue-a hi i la hrechiang lo anih chu. Lo kal rawh, ka hmelhriattir ang che" a ti a. Hotel sakawr huangah chuan an va kal dun ta a.
Blue-a chu sakawr dang te nen chuan an lo awm ho a, an va kal veleh chuan a kal hla lamah chuan an tlan khawm a. Green-a chu a han faifuk raih a, mahse, Blue-a chuan a beng a tun hru hru duh chauh a. A aia ring leh vin zawka a han faifuk leh erawh chuan zawi muangin a lo phei ta a. "Lo kal ta che. Ram sakawr emaw ka nih te han tih thar leh vel tur em ni?" tiin a pu chuan a lo hau a. Hreh awm tak chuan a lo hnai a, Noreen-i chu haw awm tak hian a han melh a. Green-a chuan a nghawngah a lo beng thak thak a, Noreen-i hnenah chuan, "A hmui vel kha han chul teh, engtin mah a ti lovang che" a han ti a. Ngam leh ngam lovin Noreen-i chuan a han chul a, a ţhen zawng a lo ţhen tak na a, seh chu a tum hlek lo mai a.
"Hei hi han pe teh le" tiin chithlum tlang te tak te te hi Green-a chuan a pe a. Noreen-i chuan a han pe a. Blue-a chuan a lo ei mai a, seh reng a lo tum lova. Mak ti tak hian, "Aw, sakawr te pawh hi an pu te ang zel an lo ni maw? 'Mi kawlhsen chu hrai tlai phawt rawh' tih ang deuh a ni maw?" a ti ta hial a, a nui ta vak vak a. Green-a chu a nui ve mai a. "Ni lo ve, nula ang an ni zawk. Chiang kuang taka inhmelhriattir tur an ni zawk a ni. Tunah chuan a hre tawh che a, a chungah i chuang thei tawh ang" a lo ti a. "Tak tak maw?" Noreen-i chuan a lo ti hau a, "Teh reng mai. Mahse a zin ilo vel pawh nangman i bel tur a ni ang." tiin Green-a chuan a zin ilo vel chu a rawn pe a. Noreen-i chuan a'n bel a, a chuang ta a. Kar lova a vawr thlak leh mai inringa chuang kai a ni a, a lo vawr thla mai hlek lo mai a. "A va mak em! Mahse, i kalbo hnuah... " a la ti talh a.
"Engmah a ti tawh lovang. Mahse, midang chu chuan tir suh ang che. Tikhan, YZ ah i haw pui thei a ni mai. I sakawr la tur hi chuan tuemaw i rawn tir mai dawn nia. I rawn la hlauh a, ka lawm tak meuh a ni" Green-a chuan a ti a. "I rawn lam hun nghakin a lo awm reng ang. Enge maw i tih dawn le? I tana hlauhawm tih hre reng siin engatinge helaia awm chu i tum tlat a" Noreen-i chuan a han ti leh a. Green-a chuan, "Hna ka nei a ni. Tin, keimah chauh hi hlauh nei ka ni bik hleinem. Dam takin le. Blue-a, tha takin lo awm la, ka la rawn hmu leh mai thei che ania" a ti a. Blue-a hmui te chu a han chul a, Blue-a chuan seh a lo tum fiam a. Noreen-i, sakawr ngaina mi ve bawk chuan chutia an inţhen tur in lainat dan te chu a lo hrethiam a, "I lo kal leh anga, kan pahnihin min la rawn hmu leh ang chu. Tin, i sakawr a la ni reng tih hre reng ang che" a lo ti ve a, a kal ta a. Green-a chuan a lan theih chhung zawng chu a thlir zui reng a.
Chutihlai chuan West-a chuan a rawn fin ta a. Tukţhuan ei an chak loh thu te chu sawi dunin, ei lo chuan an thawhna Ranch lam panin an chhuak dun ta a. Thui fe chu ţawng lovin an kal dun a. West-a chuan a ţhianpa chu a melh zak zak ţhin a. A tawp a tawpah chuan a ţawng chhuak ta nge nge a. "A khai, ka ti thei lo ve. Ngawi teh, Green, i thianpa thurawn hi pawm la, helai ram ata hi chhuak mai teh" a ti ta hlawl mai a. Fiamthu deuh hian Green-a chuan a sakawr hnenah chuan, "Chu, Bullet, ngaithla teh. Kan lar loh zia hi mak i ti ve lo maw? A tu a te pawhin min tirh bo tum ta ţheuh mai" a lo ti a. "I awm reng zawngin rang zetin ania an nuaibo ang che ni. Hrilh tur che niin ka in hre tlat mai a. Mahse, Pathian hmingin tuma hnenah ka hrilh che tih hi sawi suh aw. Nizana i sawisak kha tunge a nih i hria em?" West-a chuan a han ti leh a.
"Tarman-a in ti a ni lawm ni?" Green-a chuan a lo ti vat a. "A hming dik tak pawh a ni maithei a, ka hre lo. Ka lo hriat dan ber zawk chu "Spider" tiin a ni. A ranch a lo la haw leh fo chu i la tum em ni?" West-a chuan a ti a. "Tum teh reng mai" Green-a chuan a lo ti mai a. West-a chu a beidawng titih hle mai a. "Ka hrilh lo thei lo che a, chutia i tum luih tlat chuan le. Nangmahin i vuina turah i kal dawn tihna a ni mai alawm." a ti ta hmak a. Green-a chuan, "Chutiang tih tir lo tur chuan ka bei vak anga. Engpawh nise, thil a nih tur ang a ni thui lutuk tawh reng reng a, I chungah ka lawm khawp mai. Tin, sawi leh thu-ah chuan ka sawi leh awzawng lovang" a ti a. West-a chuan, "A tha alawm. Engmah hre lova thanga awh tir ngawt che chu ka ti thei lo a ni" a ti leh a.
Tichuan, ngawi rengin an kal dun ta zel a. Green-a chuan a thil hriat thar chu a ngaihtuah neuh neuh a. Tarman-a lo lan aţanga reilote a Poker Pete-a chekawi dangte nena an inkawm danah chuan, lo in hmelhriat hian eng chiah nge maw a tum ang chu aw? Hetiang mi zawng bawngrual tlem a zawng han ruk zeuh zeuh a lungawi chi a ni si lova. Hatchett khua a a lo kal hian chhan ruk leh rapthlak thei tak a nei a ni phawt ang. Eng tak ni ang maw tiin a ngaihtuah a. Chutihlaiin ţum hnih lai a lo ti mualpho tawh-a kut leh a thuneihna hnuaia intulut tur chuan a pen sauh sauh lawi si.
Joe Tarman-a pawh chuan West-a ang deuhin tukţhuan han ei pawh chu a chak lo hle mai a. Folly Saloon-ah chuan an va kal a. An hmaah chuan putar pakhat, a hma ni tlaia thleng thar, sakawr tar lam, rangkachak zawnna thuam vel rawn phurhtir ţeuh chu a lo awm tawh a. Chupa chuan Tarman-a leh Laban-a chu a lo melh hrek hrek a. A va hnaih deuh a, Laban-a hnenah chuan, "Ka pu, i ţhianpa hian nizana a sual kha tunge a nih a hria em? Zawh chhan riau nei a zawt ka nia" a rawn ti se se a. "Helaia cowboy awm ve pakhat, Green-a a nih kha" Laban-a chuan a lo ti a. "E khai! Chutiang hming kher kher han invuah chu ani tih awm reng a nih chu mawle! Anih, i ţhianpa hi phuba lak theihna tur hrilh ta ila, dollar sawmhnih min pe duh ang emaw chu le?" Putar chuan Tarman-a hriat ngei tur chuan a han ti leh a.
Tarman-a chuan a lo hre ngei reng a. Dollar sawmhnih chu a rawn phawrh a. "Han sawi teh. Lei tlak a nih chuan pawisa hi chu i ta a ni mai" a lo ti a. "Lei tlak i tih hmel a ni. Green-a inti Cowboy hi chu Sudden-a a lo nih hi" Putara chuan a ti ta a. Tarman-a hmai chu a lo dur khup khup a, "Chungte chu keipawhin ka lo hriat daih tawh asin. Chuti te a ei min tum mai mai chu le. Zawnga!" tiin ben tumin a han inlek ta uaih mai a. Putara chu a lo tawlh harh a, "Ei che chu ka tum awzawng lo ve. 'Chu pa chu Sudden-a, Outlaw kha a ni e' ka ti mai a ni. Texas leh Mexico lamah.. Ka hrechiang a ni" a lo ti a. Tarman-a chuan, "A ni dawn tak e Seth, ka hmu tawh ka tih reng kha. A lo rei tawh a, ani pawh naupang tak a la ni reng a, ka lo theihnghilh deuh tawh a lo ni" a ti leh lawi a. Putara chu pawisa chu a pe a, kal turin a han zaizir a. Amah chuan a han ngaihtuah vung vung a.
Nakin deuhah chuan, "A ni tak, ka hre ta mai. Seth, ngawi tak rawh. Ka'n tih tak tak hunah chuan mitdel pawisa chhuhsak ang maiin a awlsam dawn a nih chu. Ngawi teh, han hrilh phal tur chi che pawh a ni lo, min lo ngaichang mai rawh. Amaherawhchu, kan thu hriat tak kha tuma hnenah sawi reng reng suh. Vantlangin khaihlum te an lo tum khanglang anga, ka duh lo ania. Keima ruahman dan ang te in kal mai rawh se." a ti a. Tarman-a chuan putar chu a va hnaih leh a, dollar sawmhnih dang a va pe leh a. "Kha pa chanchin kha tumah dang hrilh reng reng suh. Min lo chhin te hi i tum ngawt ange, i tisual hle ang" tiin a han vau zui a. Ani putar chuan "Tunah hian ka chhuak nghal dawn asin" a ti a, pawisa chu a ak ţha sawk sawk a.
Chumi ni tlaiah chuan Tarman-a chu a hmelhem chung chung chuan amahin YZ ah a han leng leh hram a. Noreen-i chu sakawr chung chuangin a lo leng chhuak a. Simon Putara chuan Bathlarah chuan a lo kawm a, Noreen-i len thu chu a lo hrilh a. "Kha pa, Green-a khan tukinah a sakawr kha a lo pe a ni awm a, a lo tihmin zan tawh mai leh nghal a. Pa mak tak chu a niin ka hria a, ka hriatthiam theih chi pawh a ni lo ka ti" a lo ti a. Tarman-a chuan "A sakawr kha Noreen-i a pe amaw? Engatinge?" mak ti deuh hian a ti hu mai a. Simon-a chuan "Hmanna ka nei lo ve', a ti a nih awm chu maw. Engtinnge, nang i ngaih?" a han ti a.
Tarman-a chuan "Engemaw riau a ni pek ang. Kha pa chanchin chu thu thar hrilh tur che ka nei nual asin. Henglaiah Green-a a inti mai mai a, hmundangah chuan Sudden-a ti hlirin alawm maw an lo hriat zawk le, SUDDEN-A, OUTLAW kha" a ti ta a. Simon-a mak ti hmel han thlir chuan nuam ti fe hian a lo ţhu a.
"I hrechiang a maw?"
"Teh reng e. Keipawhin hre tur ka ni a, mahse ka hmuhna a lo rei deuh tawh alawm maw le"
Simon-a chu a tho thut a. "Ka mi te ka ko anga, hruizen nen thawk chhuak ila, kan khaihlum nghal anga a ni mai alawm." a ti ta mai a. Tarman-a chu chet pawh a che duh lo. "Thu teh khai, a hmanhmawh thlak hlei nem. Kan hria tih pawh a la hre lo reng reng a, ka enthlak tir zel alawm. Henglai atanga kalbo pawh a la tum lo a ni ang, tum se, a sakawr chak tak chu engahnge a tih riral ang? Chhan nei riauin helaiah hian a awm a nih ka ring a, chu a awm chhan pawh chu rin ka nei a ni." Tarman-a chuan a lo ti a. "Ka bawng ruk tum a ni lo thei nang, teh chai a!" Simon-a chuan a ti a.
Tarman-a chuan lungawi zet hian Simon-a chu a en a, a thil ruahman ang zelin a kal dawn niin a hria a. "Chu mai chu a duh a ni lovang. I bawng, i Ranch, i fanu leh a dang pawh a la duh cheu a ni" a han ti a. Simon-a bawk chuan, "Ka fanuin tualthah hmang leh bawng rukhmang bawk si a nei ang maw? Silai ka hmeh per theih chhung chu ni lo ve" a han ti leh a. "Khaih, khaih, khaih, chutiang tur a ni ngai lo. Kap rang hle pawh ni la, ani kher nen chuan i din chan loh tur zia chu hremhmun vurtlang ang hlauh a ni ang. Chubakah a kutah i intulut mai mai tihna a ni bawk ang" Tarman-a chuan a ti zel a. "Chu, keimah hi min tum anih i ring amaw?" tiin Simon-a chuan a han zawt a. Tarman-a chuan chhang nghal mai lo chuan, "Ngawi rawh, he pa, Sudden-a chanchin hi ka han hrilh ang che a, tichuan, ngaihdan te pawh nangmahin i siam thei mai thei a ni" a ti a.
"Tun hma deuh kum sawmhnih pawh la tling lovah khan Texas ramah Crawling Greek an tih atanga chawhma kal awm velah hian mi pahnih an awm a. Bawng an vulh ve ve a. An Ranch pawh in ri rial hi a ni a, mel sawmhnih vel leka inhlat hi a ni nghe nghe a. An eizawn dan lo in ang vei nen, in thenawm an lo ni bawk a, an in kawmngeih em em ţhin a ni awm e. An pahnih chuan nupui an nei ve ve a, fa pawh pakhat ve ve an nei. Petterson-a zawk chuan fapa a nei a, Eavesham-a chuan fanu, Petterson-a fapa aia naupang deuh hi a nei a. Tichuan, anni pahnih tan chuan chung naupang pahnih bak chu khawvelah an lo awm lo emaw tih hial tur hi a ni a."
Tarman-a chu a'n ngawi rih a. A mit rawng tak mai chuan a hma a pa, ngui zet a ţhu a, hming a han sawi rik vela, hmel dang sawp sawp thin chu nuam ti takin a en a, a sawi ta zel a.. "Amaherawhchu, tui inchuh vangin an lo in ţhe ţhu ta a. Kum khat ngawt mai chu inbiak a hnekin inhmuh apianga silaia inkah nghal mai huamin an awm ta a. Ni khat chu Petterson-a fapa chu a bo ta daih mai a, Eavesham-a rukah a puh a, mahse a ru ngei tih a fiah thei si lova. Thlaruk lai a zawn hnu chuan a fapa chanchin a hre thei ta si lo, a beidawngin a Ranch chu a hralh a, a kalna lam tur sawi lovin a bo ta a. He mite pahnih hian nupui an lo sun ve ve tawh a. Chumi hnu thla khat lekah chuan Eavesham-a fanu chu a bo ve ta daih mai a. A mak hle mai ti raw?" a han ti leh a.
Simon-a chuan a chhang lo. Mahse, Tarman-a chuan nuam ti leh diriam tak chuan a sawi zel a. "Eavesham-a chu a â lo chauh hi a ni a. Reife chu a hmuhna apianga kah mai tumin Petterson-a chu a zawng a zawng ta mai a. Mahse a thenawm pa hlui chu a fanu ang mai chuan a khuangcher bo ve ta vang vang mai si. A tawpah chuan a bei a ti dawng ta a. Ama Ranch-ah chuan awmhmun a bengbel leh ta a. Chumi hnu deuh chuan Eavesham-a khuaa a lo awm lai hian Red Indian nupa, sakawr zuar hian mingo naupang hi an rawn hruai a. Eavesham-a chuan, chu naupang chu a lo ngaina ta deuh a ni ang, a lei ta a, a Ranch-ah chuan a awmpui ta a. Chu naupang chu tuna nangin Green-a i tih, keiin Sudden-a ka tih chu a ni" a ti ta a.
Simon-a chu a lo dak chhuak a, "A nih leh, Bill Eavesham-a chu engtinnge a awm?" a han ti a. Tarman-a chuan nui chungin, "A hming 'Bill' a ni tih ka sawi reng reng em maw ni le? Nih phei zawng a ni meuh mai. Tunhma kum thum velah khan a thi ta a. A fa chhar chuan a ro han khawm tur pawh chu a lo nei hlek lo mai a, a chhan chu amah Eavesham-a khan pawisa khelh te a hrat a, zu a in nasa bawk a ni ber e. Tichuan, chu naupang chu a lo tlangval ve tawh a, a vak vel ta a. Vah pawh a vak zau khawpin, puakruk kah pawh a rangin a thiam a. Mi tam takin a ran leh ran loh an lo chhin tawh a, mahse, an thil hriat tum ber sawi leh theia ram an awm hek lo. A hming chu a thang ta em em mai a. Chuvang te chuan a vakvel nasa pawh a ni ang. Mahse, chumi chu a vah vel chhan hi niin a rinawm lo a ni. Nang, engtinnge i ngaih, Petterson?!" a ti ta a.
Simon-a chu Electrict man ang mai hian a zuang tho zawr mai a. Mahse, a hmaa ţhu a hmel a han en chuan phat sawtin a ring lo. Kum kha leh chen, lo inthup tawh nak alaia, tun ataka hmuh chhuah a han ni leh kher kher chu, a rawn hmuchhuaktu chu kah hlum der mai hi a rilruk hial a. Tarman-a chuan a hmel aţang chuan a thil tum chu a lo hria a ni ang, "Thil engmah hmanhmawhin ti suh, Petterson. Inţhian kan ni alawm. Thil lo thleng ang ang chu kan pahnihin kan bei dun zel ang chu" a lo ti a.
"Chuti anih chuan, 'Petterson' ti kher kher chuan min ko tawh suh. Ka hming chu Simon Peter ringawt a ni. I hre dik ang reng hle zawng a nih chu. Mahse, pawi ka ti emaw te i lo ti palh ange, ka pawiti miah lo ania. Bill Eavesham-a chuan min bum a, tunah pawh hian ka tih ang chu tih nawn leh ngai se, ka ti nawn hreh miah lo ania. Mi, han ngaidam mai mai chi a ni lo reng a, a fa chhar pawh chu kei min rawn zawng tur pawh chuan tirh pawh a tir hlel lovang. Green-a ngei hian a lo kal hlim te khan Norry hnenah chutiang deuh chuan a lo hrilh a, mahse, an pahnih hnihin a mi zawna chu ka ni tih phei zawng an hre hlei lova. Engtinnge kan tih tak ang le?" Simon-a chuan a ti ta a.
Tunah chuan a han phut zawkna leh a rilru hamhaihna pawh a lo reh leh tawh a. Tarman-a pawh chuan chu pa chu kum kha leh chen a fanu anga a lo neih tawh tan chuan engpawh a huam ang tih chu a ring a. "Green-a chu ka kutah dah mai rawh. Heti hian amahin han tal tir deuh ila, amah leh mah a la inhek chhawm zel anga, khaihlum a la ni mai ang. A thu hrimah a mi zawn chu nangmah i ni tih la hre reng reng hek lo. Chuvangin, chumi kawngah chuan a hlauhawm lovang. I fanu pawh a nihna tak chu hrilh la, mahse, a kimchang chuan i hrilh duh kher dawn em ni?" a lo ti a. "Duh lovang. Hei leh chen hi ka fanu angin ka lo nei tawh a" Simon-a chuan a ti a. "I tidik khawp mai. Hmeichhia hi zawng mak tak an nia, a ni lo zawng te hian a ngai anga, hming mai mai te chu tihah chuan enge ni lem? A hming chu a thlak ţep reng reng dawn tawh lawm ni?" Tarman-a chuan a ti ta a.
Putara chu a lo dak chhuak vat a, Tarman-a nui sung chu a han hmu a, "Chu, eng i tihna nge?" a han ti a. Tarman-a chuan "Ka duh e, ka tihna a nih chu. Rethei zawk zawk lah ka ni lova. Peter, nupui thei lo lah ka ni bawk lova, remtih lohna i nei emaw chu?" a ti ta a. Simon-a chu a ngawi vang vang mai a. He pa lianpui hian amah rawn kawm tum ngawt chuan heti teh fo chuan a Ranch-ah hian a lo leng lovang tih chu a hria a, mahse, thupui tak tak han sawi dawn meuh chuan sawi tur a hre ta mang hlek lo mai a. "Amah Norry i'n rem a tih chuan remti lo bik lo ve, ama thu thu a ni ang chu" a ti ve ta a.
"A ţha anih chu. Mr Green-a chungchangah chuan i ngaih lo tiţha lo reng reng suh. A hriat loh laiin ania a sam tawi laiah kan keh khai vaw vaw mai ang ni" Tarman-a chuan a ti leh a. Simon-a chuan,"I man hunah engtia tih nge i rilruk? Khaihlum em ni?" a lo ti a. Tarman-a chu a nui kuk kuk a, a lu a thing a. "Chu chu Governor kan tih tir ang chu. Mr. Sudden-a mân man hi dollar singkhat an phal tawh asin. Chung pawisa te chu hmanna ka hre nil nial ang. Entirnan, inneihna tura inbiak rem nan pawh a ţha ve mai mai ang chu. Chu, rem kan siam fel e tiraw? Miss Noreen-i lo haw hma in ka haw teh ang, han hmuh tlak em em pawh ka ni lo ve" a ti ta a.
A inleng pa haw hnu daih pawh chuan Simon-a chu a ţhutna ngaia ţhu in mei a zu a, hmanlai chanchin te a ngaihtuah a, 'Eavesham-a chuan a hnu rawn chhui tur leh phuba la tur chuan a naupang lei chu a zirtir sauh sauh a ni ang maw' ti te in a ngaihtuah a. Norry hian engtin tak ngai ang maw? Chutia a pa leh amah ngei pawh chuti taka lo ti hreawmtu chu a ngaidam thei tawh angem aw? A lo ngaihdam theih loh takin hrilh zawng a ngam mawlh lo. Tarman-a chu a ngaihtuah leh a. Engatinge maw ni chu pa chu a ngaina lo riau mai a, a chhan phei zawng a hre si lo. Engpawhnise, a kutah a awm ta ang chu a lo ni ta phawt mai. Tunhma te a Simon-a, mahni thu duh lo nih ve nak alaiin tunah zawng ama thu thu in thiltih theih loh hun a nei dawn ta a ni phawt mai.
Chutia a lo ngaihtuah lai chuan Noreen-i pawh a lo haw ve ta a, biang tai tik tek chuan, hlim hmel nui seng hian a lo kal a. Simon-a chuan, "I va kal tluang maw?" a lo ti a. Noreen-i chuan, "Teh reng mai. Blue-a pawh a fel zia mai chu. Mr Green-a hi engemaw tak zawng a ni ta ve ang" a ti a. Simon-a chuan, "Nih pawh a ni ta ve ang. Mahse Mr Green-a ti zawngin a hming lam tawh suh. Khawtlang lamah chuan Sudden-a, Outlaw tiin an ko ber zawk ania" a lo ti a. Chu chuan Noreen-i biang tai zawng zawng pawh chu a ti reh zo vek mai a. "Chu, thudik nge ti ti mai mai?" a han ti a. Simon-a chuan, "Dik e, mahse tuman an hre ve meuh lova, hria se pawh ka ti hek lo. Engtinnge ka tih dawn ka la hre lo a ni." a ti a. Noreen-i chuan, "Mahse, enge hetah a rawn tih a? A sakawr pawh hi engtizia a min pe nge a nih?" a han ti leh a.
"Bawng a ru thin chu a ni phawt mai a. Sakawr thu chu kan Ranch a rawn beih hunah a la kir leh thei tho alawm, a duh chuan" Simon-a chuan a lo ti a. "Mister Tarman-a rawn sawi a ni phawt ang maw?" Noreen in a han tih chuan a chhan nan a lu a lo bu a. "Outlaw a nih chu ka ring thei lo. A nih pawhin YZ kher chu a rawn bei lovang. Thil pakhat erawh chu ka hrechiang, nizanah khan Green-a kha chak lo zawk ta se, hetiangin Tarman-a a sawichhiatna a thehdarh ve hlek lovang, tih hi" Noreen chuan a ti ta a. A pa chuan, "Ngawi teh, Noreen, midang a lo hmu tawh sawi a hria a, fimkhur tura min rawn hrilh turin a lo kal nal nal zawk asin. Ngun deuhin ngaihtuah teh" a ti a. "Ngun deuhin an pahnih hniha thu chu ka ngaihtuah dawn. Ti ti mai mai ka awih dawn lo, ka pa. Chutiang mi hmel a pu lo a ni" Noreen chuan a la ti ta ţalh a.