THE SICILIAN (Book I &II) By Mario Puzo (Completed)

[Loma hmar]

Chapter 5b

Guilianno-a paten an rawn koh avangin, a tuk zing lamah chuan Hector Adonis chuan Montelepre chu a thleng a. Montelepre-a a inah hian a awm khatin a pian leh murna ni mahse he khua hi a ngaina fahran lo. A bikin Festa phei chu a pumpelh hram thin. An cheimawina te chuan a tihrehawm fo va, light eng chuaih-te chu khawchhung retheihna atana sual hmaithinghawng vuahah a chan thin. Festa lai chuan tihnawmnah a tuar fo va – zu rui hovin a dung tawi avangin an diriamin an nuihsawh a, hmeichhe ho lahin tham lo takin an nuihzat fo bawk. Anmahni aia zir sang leh hre tam a nihna chuan a pui lo thin kher mai.

Via Bella chu Carabinieri a kawp te tea kal hian kil tinah an hual hi a ni hawt a, hmel rum takin, rifle leh Machine Pistol kah inpeih atin an vei vel reng a ni. Festa ni hnihna chu a intan mek mah se khawlai chu a reh ruih a, naupang tual chhuak takngial pawh hmuh tur an awm lo. Adonis chuan a Car chu Guilianno-te in kawtah chuan a park a, Car atanga a chhuah hma chuan carabinieri pahnih hian rinhlelh hmel zetin an lo en reng a, mahse a mah an han hmuh chian chuan a tawi bik avanga nuihzat tih hriat takin an lo nui a.

Kawngka lo hawng a, in chhunga luh puitu chu Pisciotta a ni teh tlat a. Guilianno-a nu leh pa chuan chokaah an lo nghak a, dawhkanah chuan tukthuan atan sa thithun, chhang leh coffee a lo inhung bawk a. Maria Lombardo chu pangngai takin, Pisciotta-an a fapa chu a dam chhuak le hang tia a thlamuan avangin a awm a. Hlauhthawnna aiin thinrim hmel a pu zawk. Guilianno-a pa chu lungai hmel aiin chapo hmel a pu zawk a, a fapa chuan mipa a nihzia lantirin, a mah chu a dam a, a hmelma a thi miau a ni.

Pisciotta chuan thil awm dan sawi nawn lehin, tun tumah chuan fiamthu te zep telin Guilianno-a hliam chu a nat vak loh thu leh ama tih ve chu a tlem thei ang berin a sawi a. Mahse Hectora chuan Pisciotta te ang tana hliam lehnghal mel thum zet kal pui a harsat leh hrehawm tur zia a hre mai. Guilianno-a hliam nat dan pawh chu a lap thei ang berin a sawi a ring, Chu aia nat chu a ring bawk.
“Engtin nge carabinieri ten heta lo kal nachang an hriat?” tiin a zawt a, Pisciotta chuan Guilianno-an ID a pek thu kha a hrilh a.
Guilianno-a nu chu lungchhe takin a rawn puak chhuak phut a, “Engvangin nge Turi chuan cheese chu a lak tir mai loh? Eng vanga bei ve nge a nih?”
“Engtin nge a tih chuan ang? Loneitu hming a hrilh anga maw? Chhungkaw hming a tichhe kumkhua dawn asin,” tiin Guilianno-a pa chuan a ti hrawk a.

Hector-a chuan chung thilah chuan thil inhmeh lo tak a hmu tlat. Guilianno-a nu chu a pa aia chak zawk leh thunei zawk a ni a, chuti chungin tualdawih zawkah a tang a, a pa chu luhlul zawk a ni teh hlauh a. Aspanu pawh chu, chutianga thiante chhanchhuaka hmun hima dah ngam khawpa huaisen ni si chu a nu leh pate bulah an fapa nat dan leh tawrh dan chungchang thudik a hrilh ngam lo leh bawk a.

“ID kha lo pe lo hlauh ni se chuan, kan thiante hian helaiah a awm ve ngei an ring ve ngei ang,” Guliannno-a pa chuan a ti a.

Guilianno-a nu chuan, “Chutiang pawh ni se an man tho ang,” a tap a, “Tunah chuan tlangah a chen a ngai ta dawn nih hi.”

Hector Adonis chuan, “Abbot chuan Police hnenah a hlan loang tih kan chian a ngai a ni.” a ti a.

Pisciotta chuan, “A ngam lo vang, chutianga a tih chuan a kawrfual hak lai ngeiin ka khaihlum ang tih a hre tlat.”

Adonis chuan Pisciotta chu a en vang vang a. He naupangah hian hlauhawmna riau a awm a ni. a chhia leh tha hriatna tihchhiat chu a finthlak vak lo vang, tiin a ngaihtuah a.

Midang zawng chuan Hector-a, a hma pawha an fapa lo tanpui tawh thin chu an en thap a, Adonis chuan, “Police-in a awmna an hriat chuan, Abbot tan duhthlan tur dang a awm chuang lo vang. Chutianga amah intawrh tir duh tur chi a ni lo. In phalnain, ka thian pa Don Croce Malo hnenah Abbot nena inbe tura ngen a tha berin ka ngai.” A ti a.

Pisciotta tih loh midang zawng chuan Don Croce nen an inhria tih an hriatin mak an ti hle. Ani chuan a hria tih hriat takin a lo nui a. Chutah Hectora chuan Pisciotta hnenah hriam hrakin, “Eng nge he tah I tih reng, an hre chhuak che ang a, man I ni mai tur asin. I pianzia leh hmelhmang an hriat kha.”

Pisciotta chuan ngaipawimawh lo zetin, “Khang Guard ho ve kha a, an hlauhlawpin anmahni nu hmel pawh an hre thei lo hial ang, bakah niminah Montelepre-ah ka awm tih hriatpuitu mi dawrzawn khat lai ka nei,” a lo ti mai a.

Hector Adonis chuan mizir sang a nih zia tilangin, Gulianno-a nu leh pa hnenah chuan, “In fapa chu tlawh in tum tur a ni lo, bakah in thian tha bera in ngaih pawh a awmna in hrilh tur a ni lo bawk. Police te hian hektu leh enthlatu hmuntinah an dah a nia. Aspanu hian zanah Turi chu a tlawh ang a, a chet sawn theih veleh boruak a daih hma zawnga khaw danga a khawsak theih dan ruahmanna ka lo siam ang. Tichuan pawisa tlemte nen, thil kan tifel thei ang a, Turi chu a lo haw mai ang. Maria, ngaihtuah lutuk duh suh, nangmah kha inenkawl tha la, chuan nangpawh Aspanu, chanchin min hrilh zel ang che.” A ti a.

Guilianno nu leh pa chu inthlah nan a kuah ve ve a, a chhuahsan lai pawh chuan Maria chu a la tap kerh kerh a ni. Thil tam tak tih tur a nei a ni, Pawimawh hmasaah chuan, Don Croce hnena thu thawn vat a ngai a, bakah Guilianno awm mekna chu a la him em tih hriat a tul bawk. Rome-a sorkarin Police thattu awmna hrilh thei tu hnenah lawmman an la tiam lo chu lawmawm a ti hle, chuti ni lo se Abbot chuan hmanlai thil hlu a hralh anga rangin Turi chua hralh duh mai dawn si a.

Turi Guilianno chu khumah chuan che miah lovin a mu a, doctorin a hliam thihpui tham a nih thu a sawi te kha a hria, mahse a thi mek niin a inngai thei lo. A taksa chu na leh hlauhna awm lovin boruakah a kang delh delh niin a hria a, a thi thei ngai lovang. Thisen hloh tam lutukin engthawlna riau a neih tir thin tih hre hek lo le.

Chhun lamah chuan puithiam pakhatin a enkawl a, bawnghnute a in tir a. Tlai lamah chuan Abbot chu doctor nen an lo kal thung a. Zan lamah Pisciotta-an rawn tlawhin a kut a vuan a, chu zan thim lungngaihthlak takah chuan a enkawl zankhua thin. Kar hnih a liam a, Doctor chuan thilmak a thleng tih a puang ta a ni.

Turi chuan a taksa chu dam a, a thisen hloh te insiam thar leh a, a taksa peng pawimawh silaimu tihchhiat te thuikhawm leh tur chuan a tum ruh hrim a. Thisen hloh nasat avanga Engthawlna riau a neih lai chuan boruakah in sang a sa nasa thei hle. Zalenna thar, tuna a thiltihin a tihbuai phak lohna te a tem lawk a, vantlang dan te, Sicilian chhungkaw dan khirh tak te chuan a chungah thu an nei tawh ngai lo. Dan bawhchhiatna lak atangin a zalen a, a hliam natak chuan pawisawi lovah a chhuah vel thul. Heng zawng zawng thlenna chhan hi Carabiniere mi a takin Cheese tlemte vang mai maia a kah vang a ni.

A hliam atanga a dam khaw chhuak a nih chuan, rorelna dik chu hlenchhuah ngei a tum a. A chanpual renga ngaia naupang engmah tithei lo nih a tum tawh lo. Taksa leh thlarauah a inpeih at ang. Thil pakhat chiang em em chu, Police pain a kah ang mai mai leh Guido Quintana hmaa a awm ang khan khawvel hmaah hian mangangin a awm tawh lo vang. Naupang, Turi Guilianno ni thin kha chu a thi tawh.

Thlakhat a liam meuh chuan, Doctor chuan kar li chhung chawl hahdam leh a, exercise la zauh zauh turin thurawn a pe a. Tichuan Guilianno chuan Puithiam ho tih dan dungthulin Monastery tual velah chuan a vei vel ve ta thin a ni. Abbot chuan a ngaina chho ta viau a, an inzui kual fovin, A naupan lai chanchin, ram hla taka a zin dan chanchin te a hrilh thin. Abbot-in a ngainatna chu Hector Adonis-an rethei te tana a tawngtai man tia pawisa tih tham tak a rawn thawn thin pawh chuan a tikiam chuang lo. Don Croce pawhin chu naupang chu a ngaihven ve a ni tih a rawn hriattir ve bawk.

Guilianno lamah ve thung chuan, chutianga puithiam ho an khawsa thei chu mak a ti hle. Thingtlangah te chuan mipuite riltamin an thi tep a ni a, hnathawktu te lahin thlan tui far zawih zawihin ni khatah cent sawmnga an hlawh tawk a. Saint Francis-a puithiamte erawh lal ang maiin an khawsa a ni. Chu Monastery chawlh hahdamna hmun zau leh hausa tak a ni ringawt.

Ser huan zau pui an nei a, chhura rual Olive thing a ding ngir khup bawk a. Mau chi kui tiahna hmun te, sazawrhna dawr, beram rual, vuak rualin a chawm reng te thlengin a awm a. Ar leh Saiarte phei chu an vei suau suau a ni ber. Puithiam ho chuan nitin sa leh spaghetti an ei thei reng a, anmahni siam wine tui tak inin, a then black marketah vaihlo nen an thleng a, ngawivei ang maia uarin an zu thin.

Mahse an thawkrim a ni. Kelawng leh puithiam kawrfual nen, thlantui far zawih zawihin chhun lamah chuan hna an thawk a, an lu ziahkawlh nisa laka hliahkhuh nan American sipai lukhum dum leh buang te an hmang a, chu chu Abbotin sipai supply tu hnen atanga wine barrel-a a thleng a ni. A thenin Style hrang hranga an khum thin avangin Abbot chuan hna an thawh lai chiaha an khum a phal sak a ni.

Hemi kar li chhung hian, Guilianno chu Puithiam chiah a ni mai. Abbot mak tih tur tak maiin lovah a thawk nasain puithiam dangte puiin thei leh olive bawm rit tak takte chu a dahthatna hmuna dahin a phur fo a ni. A that chhoh zel takah chuan, Guilianno chuan hnathawh chu nuam a ti ta hle, a chakna han lan tir vel chu nuam a ti a ni. A basket an chhun vum thur pawhin a khup a sai chhin eih ngai lo. Abbot chuan a chhuang hle a, a duh chen chen a cham theih tur thu te, Pathian siam mipa dik tak a nih thu te a hrilh thin.

He mi kar li chhung hian Guilianno chu hlim takzet a ni. Thih hlauhawm atangin a tha chhuak a, khang a suangtuahna te khan amahah hmun an luah thuk viau bawk. Abbot putaran ring pumpuhlum thak chung a, Monastery thuruk tam tak a hrilh te chuan a tihlim viau. Putara chuan an thil thar chhuahte wine tiam lovin sorkar kudama lut lo va, Black Marketa an thawn tlang nghal chu a uan pui hle. Wine erawh chu puithiam hovin an lem zo zel thung. Zanah chuan zuruih leh pawisa khelh pui tham tak a awm ziah a, hmeichhia an chaw lut hial thin bawk. Mahse heng zawng zawng hi Abbot chuan a maimitchhin san mai a, “Hun khirh tak a ni.” tia Guilianno hrilhin, “Vana lawmman kan tana tiam hi a la hla lutuk a, mihring chuan tuna hlimna kan tem ve hi a ngai a ni, Pathianin a ngaidam hlawm ang chu.” A ti mai thin.

Tlai khat chu ruah a sur cherh cherh a, Abbot chuan Monastery hmun dang, thil dahkhawmna hmuna an hmanna hmunah a hruai a. Hmanlai thil hlui hlu tak tak, puithiam kutthem thiam ten an siam chhuaha khat vek hmunah Guilianno chu a hruai a. Abbot chuan, Dawrkaiin a inhralh theih loh laia a tih ang maiin, “Indo hma kha chuan sumdawnna tha tak kan nei a ni, he thil dahkhawmna hmunah hian a chanve pawh a awm hman ngai lo, sakhaw rohlu kan ngah zia hi en teh, Isuan sangha a tih pun ruh te, Mosian ram tiam lam a panna kawnga a tiang ken te hi.” Guilianno mak ti hmel nuihzat taka enin a chawl hlek a, chutah a hmel cher tak chu sual hmel takin a ner nawng a. Thinga siam tiang phuar khawm chu chhuih zawt pahin, “Heng te hi kan thil neih that ber berte an nih hi, Isua an khenbehna kraws them, chuan he bawmah hian mithianghlim hming I hriat theih apiangte ruh a awm vek bawk. Sicily-a chhungkaw tumah hian mithianghlimte ruh chu han duh lo va mawle. Tin, Room dangah hian Zirtir Andria ban sawmpathum, Baptistu Johana lu pathum leh Joan of Arc thirkawr suit pasarih kan nei bawk. Thlasik a nih hunah puithiamte hian hmun hla takah an hralh thin.”

Turi chu a nui ta hawk hawk a, abbot pawh chuan a lo nuih ve bawk a. Guilianno-a rilruah chuan mipuite chu bumin an awm leh thin, Chhandamna kawng kawhhmuhtu berte pawh a bumtuah chuan an bang chuang lo.

Ni khat chu khuma a lo chawlh hahdam laiin, Guilianno chuan kantu danglam tak mai a nei a, Abbot chuan Father Beniamino Malo, thian tha tak a nih thu a hrilh a, a chhuahsan ta nghal a.