STORYFB.COM

Chapter-14



Stacy Ramthansangi POV




Bathroom atang ka chhuah leh rual chuan Mza chu rawn che vut in bangah min nawr bet nghal nawk a, "Tu fa nge?" a ti chang hrawk a, ka ner sawk, "Tu fa pawh nise i lo buaina tur a awm lo, lungngai suh, ka fa hian engah mah buaina a siam ngai lovang che, i nun atang hian ka chhuak vat dawn" a mit a melh kar chunga ka tih chuan ka dar a tham na chu a ti na zual sauh a, "Tu mipa phiangsen nge nang hian i mut pui, Lalrinkima lo mipa dang mut pui I nei em ni?" a tawng duh dan avang chuan ka tal nghal nghek a.




"Min thlah rawh tenawm pa" ka ti tuar a, "Ngawi hmak rawh" a rawn ti ve thawt bawk, "Ka fa a nilo ang tih tunge sawi thei, i hriat kha, nang nen hian.." tiin a ngawi leh daih a, "I fa a nih i ring chiah amaw?" ka aw chhuak vang chuan a in seh tih nghal tawlh tawlh thei, "Ka la finfiah ngei ang" a ti chhuak nghut a, "I thu thu le, mahse i tawng dan hmangah kha chuan i fa a nih i rin loh na a lian zawk a nih hmel" ka nui hak a, a fa a nih thu hi sawi ka tum lo, min ring lova, min ring tura ngen lawm lawm lah ka tum tawh hek lo bawk.




"Thudik engkim chu ka la hrechhuak thuai ang, ka fa a lo ni a nih chuan ka hnenah ngei hian a awm bawk ang" ti nghut in min thlah a, room atang chuan a chhuak nal nal, a fa a ni tih a hrechhuak a nih pawn a bulah hian ka awm tir ngailo ang, a ni hian pa nih a phu lo, ka fa hi chu keimah pawn ka enkawl thei em em ang, ka pa in min la dam pui bawk a, hmani lawk a ka nun a rawn lang ve mai mipa pakhat avangin ka nun hi tih chhiat tum na ka neilo.




Mza awmdan hi ka hrethiam lo, min ngaihsak anga lang duh silo hian ka eitur eng eng emaw hi a rawn hawn thin a, mahse hetianga a chet vang erawh in ka ngaidam hauh lova, ngaihdam tumna chhete mah ka neilo bawk, Mary nen an la in zui reng a, kan inah pawh hian a rawn hruai lut fo bawk, engmah ka sawi ngai lova, sawi buai tumna ka neilo bawk a, an duh anga awm turin zalen na an nei alawm ka ti mai.




Hun a kal ve leh deuh a kan chhungte pawn ka rai tih an hre ta vek, Mza chuan a fa angin a sawi mai a, mahse a chhungril erawh hi a fa a nih a ring chiah lo tih ka hrechiang hle thung, U Thatei chu a rawn phur em em a, a rai laia a awmdan te min rawn hrilh in naupai tana eitur tha doctor in a tih ang te chu min rawn hrilh nasa thin, ka lawm takzet bawk, kan nupa inkar pawh a tha viau turah an ngai a, an ngaih ang ngawt a ni silo, tun atanga reilo teah hian Mza chhuah san ka tum a, chutih huna an hlimna te bo vek tur ka ngaihtuah hian mahni in thiam lohna lian tak ka nei thin.




Tlai lamah khan ka ril a tam loh em avangin chaw ka ei lo kha na a nia, zan dar 7 a pelh meuh chuan riltam tawh tak ka ni, ka pum ah hian sazu an tlan kual emaw tih mai tur a ni tawh zawk, inhnuai ah chuan ka chhuk a, Teremi pawh a haw tawh ngei anga, Mza a la rawn haw lo tih chiang takin ka hre bawk a, mahni a ka awm lai hian duhtawk in han in hnawh puar phawt mai teh ang, choka ah lut in fridge chu ka hawng a, artui chhum ka ei chak em avangin pum li ka chhum nghal.




Bai tui hmel zet leh alu kan tih vel neuh neuh a awm bawk a, artui chhum a hmin awm vel ah chuan suan in ka eitur chu ka siam nghal, dawhkan kil in ka ei nghal mial mial a, a hma te kha chuan mahni a ei ka peih ngai mang lo kha a nia, tunah thung chuan mahni a ka ei loh hi chuan ka ei tui thei tak tak tawh lo, keimah chiah a ka ei than vang te pawh a ni mahna, Teremi bai siam chu a tui em em a, mahse Opi bai siam a la tluk lo deuh thung.




Ka kham dawn tep tih ah chuan Mary a rawn lang hlawl a, thawm engmah ka hre bawk silo a, ngaihsak zawm lovin ka la ei zawh loh tlen te chu ka ei zawm mawlh mawlh, "Naupai lai hi chuan ei a tui duh an ti reng a sin" a aw chhuak chu a ngeiawm a ni tawp, mahse ka chhang let peih lo, "Mipa dang fa pai chungin he inchhung ah hian nuam takin i la awm ngam ania, hmeichhe pakhat ve tak chu i ni" a tih leh chuan ka ei zo ve chiah a, tui deh na lamah chuan ka kal nghal.




"Nang chu ni ila, he in atang hian ka chhuah na a rei tawh ang mawle" a va han kham awm tak e aw, "Vanneih thlak takin kei I ni lo hlauh alawm tiraw?" in her in ka ti hmak a, a mitmeng ah chuan min huat na nasa lutuk chu ka hmu reng, "Engtinge zak miah lova I la awm theih zawk ni?" ner nak chunga a tih leh chuan ka nui hak a, "Kan in ang tawk viau lo maw, nangpawh nupui nei lai reng mipa i um zui reng chu sawi loh, a nupui awm ve reng laiin a inah i kal chilh ngam a nia, oh.. nang ai chuan ka la tha zawk, a chhan i hre duh em?" tiin a hmaah tak chuan ka va ding a.




"A chhan chu maw, kei chuan kawp lai nei te in kar ah tlak zeh ka tum ve lo tal alawm, i nihna diktak ka hrilh tawh bawk che a, i tawngkam hman pawh i lo uluk tawh dawn nia, mite hian kan nun ngei ah pawh kan nih na a kan ngaih loh hi min hmuh sak thin tih hria la, fimkhur rawh, zahna chang i hre bawk silo, hetiang renga i nung dawn a nih chuan midang tawngkam na tak tak pawh I la dawng ang, i tuar thei dawn bawk silo, i hma ka ngaih vanga sawi ka nihchu" nui sangin ka ti a, a tan chuan a huat awm thawkhat viau ang.




"I va zaklo ve, khatianga min ṭawngkhum tur khan tu angah nge i in ngaih a?" a ti that a, chhan let ka tum lai tak chuan Mza a rawn lang hlawl a, Mary hmel chu a in thlak nghal vek, "Engthil nge thleng?" a rawn ti nghut a, "Mz, i nupui hian helai hmuna rawn kal tawh lo turin min ti a, buaina siam tum a rawn kal ka ni miah lo a sin" inthlahrun hmel taka a tih te chuan ka nuih a ti za zawk, lemchan a thiam ang hian thiam ve ila chu Mza hian ka thusawi te kha a awih ngei ang.




"Chuchu enge a pawi na, tawngkam hriat nuam lo tak tak a min ṭawngkhum fo tu inah i rawn hruai lut zel dawn a nih chuan ka chhuak mai ang, chuan he in hi ka in ve tho a ni a, i hmei nu hi han zawt teh, engvanga zah avanga helai hmun atanga chhuak tur ka nih thu sawi fo nge a nih, enge ni a in in ngaih, in in kar in ka hrelo a ni bik hleinem, chuti chung chuan engmah ka sawi buai lo, he in atanga chhuak tur ka nih thu a sawi fo dawn a nih chuan ka chhuak mai ang, ka hreh hauh hleinem, kal na tur neilo ka ni bik hauh lo a nia, chuan he in a chen reng pawh hi ka phur zawk zawk lo bawk tih i hriat kha" ka ti hmak a.




Mza chuan Mary chu a melh nghal run a, Mary thung chu a meng kual zek zek tawh mai, lemchan aiin thudik hi a chung nung fo zawk thin, "Chutiang thu chu i sawi amaw?" Mza chuan a ti chang hrawk a, "Oh.. Mz, khachu" a ti bah deuh nawk nawk a, "Engmah sawi a ngai tawh hleinem, theng tur ang chu a thleng vek tawh a, hun kal tawh a siamthat theih tawh loh tih kan hre vek, Mary thusawi te pawh kha ka hre vek tawh a, a lak let leh theih tawh chuang loh" ka ti a, Mza chu ka melh kar a, ka thusawi awmzia chu a hrechiang dawn lutuk tih pawh ka hria.




Hun a kal anga thudik engkim hi a la hrechhuak ve ngei ang, chutih hunah chuan eng ang pawn ngaihdam min dil in ka chunga a chet dan zawng zawng te kha siamthat leh in tiam mahse a siamtha thei tawh dawn lo, hreawm taka ka nun min hman tir tawh dan zawng zawng te pawh hi ka theihnghilh tawh ngai lovang, ka lo ngaidam ta a nih pawh in ka damchhung zawng chuan ka hre reng dawn, chuchu A ni baka hrechiang tur an awm lo.




"Mary haw tawh rawh" Mza chuan a ti nghut a, "Mahse.. ka chhungte an awm lo ka tihkha" a lo ti sep a, "Puitling i ni tawh, i chhungte awm lo pawh nise in inah chuan nangmah in i awm thei" Mza bawk chuan a ti leh hmuk a, Mary chuan keimah chu min rawn en a, a thinrim hmel hle bawk, dar ka lo kan ak a, ka nuih lui sak bawk, a bag ak tha in mawng sawi lawh lawh chungin a chhuah tak kha, keipawh chu choka atang ka chhuak a, inchung lamah chuan ka chho nghal.




Room a ka luh rual rual chuan ka thawmhnaw bawm lam chu ka pan a, ka thawmhnaw thleh that ho chu ka la thla nghal mawlh mawlh bawk, kawngka in hawng ri ka hriat rual chuan Mza a rawn lut tih pawh ka hre zawm zat , ka thiltih lai chu ka thulh phah chuanglo, "Engthil nge i tih?" ka hnung lawk ah a rawn ding tih a taksa lum ham ham mai in min rawn ur rual chuan ka hre nghal, chhang lovin ka thiltih lai chu ka la tih zawm zel.




Vawi leh khat ah min rawn kuai her nawk a, "Engthil nge I tih ka tih chu?" ka ti chhuak hrawk a, "I hmuh ang hian ka thawmhnaw te ka la chhuak a nihhi" ka ti hmak, "Ka sawi tawh kha, he in hi i chhuah san dawn hauhlo" a ti nghet leh charh a, "Ka chhuah san i phal lo pawh a ni mahna, mahse he room hi chu ka chhuah san tho ang, eng ang pawn min dan tum mahla i thei lo" ka ti nghat a, "Engthil nge maw i hriat teh hrep ni?" a tih chhuah hmuk chuan ka nui a.




"Ka thil hriat maw, nang nen a room khat a awm ka duh lo tih leh ka ten hle che tih ka hria" ka ti a, a hmel chu a rawn lang dur nghal khup khup a, hlauhna chhete mah ka nei love, "Eng ang pawn min ten a ni mahna mahse i pasal ka nihna a bo chuang lo" ka kut chu ka hum ruh nghek a, "Ka hria, a hming mai a nupa kan nih tawh zia pawh ka hria, i hmei nu i rawn hruai lut reng tho a, kei te chu min mamawh na i nei tawh hleinem tiraw, chuvang chuan ka room ngai ah ka in sawn leh dawn" tiin ka in her a.




"Min dan han tum na teh, he in hi ka chhuah san nghal ang, ka chhuah san thei lo a nih pawh in nang nen a room khat a awm ai chuan ka in that zawk mai ang" ka kut a rawn man rual rual chuan ka ti tuar a, min en run run hnuah phun hluk chungin min thlah a, ka thawmhnaw te chu bah ah ka khung khawm tawp tawp a, ka zawh hnu chuan room atang chuan ka chhuak nghal, a vaiin ka la la lo a, naktuk lamah ka lak bang ho chu ka la mai ang.




Mza nen kan in neih tirh a ka room ni thin in hnuai lamah bawk chuan ka lut a, bathroom ah lutin ka in tifai nghal, ka chhuah leh hnu chuan khum a lawn kai mai ka tum a, thil hriat chhuah ka neih avang chuan room atangin ka chhuak leh a, chahbi spare kan dah na drawer chu ka hawng a, ka room chahbi spare chu ka la nghal hmak, ka la lo a nih chuan Mza hi a duh hun hun ah a rawn lut leh mai dawn tih ka hre miau.




Mza nen room hran a kan awm hnu chuan kan in hmu khat in kan in be ngailo a tih theih hial ang, ka in la hrang tlat a, hetia keimah chauh a ka awm hian nuam ka ti zawk, a hma kha chuan Mza bula ka awm loh hlek khan hreawm ka tiin ka ngai em em thin a nihkha, tunah erawh a bula awm hi nuam ka tilo a, kan inkar that laia a hnenah hahdam taka ka awm lai te khan engtin chiah nge ka lo awm thin tih pawh a chang chuan ka ngaihtuah chhuak theilo hial thin.




Vawin hi ka in check up ni a ni a, ka in siam zawh hnuah room atang ka chhuak a, chaw ei pawh ka tum lem lo, ka chhuah hunah ka ei mai ang ka ti rilru a, sitting room lam ka pan chuan Mza ka hmu nghal zat, min hmuh ve rual rual chuan a rawn ding chhuak a, "I hman tawh chuan kan kal rual dawn nia, i in check up ni a ni tih ka hria alawm" a ti hluk a, engtinge maw a lo hriat ni, oh.. ka doctor hmuh thin kha a thianpa a ni miau alawm, "I kalpui ka ngailo, keimah in ka kal thei" ka ti hmak a, ka thusawi chu hria ang pawhin a awm duh leh tawh lo.




Choka ah lut in tui ka in hmasa te te a, "Stacy, chaw ei ka lo siam ang che aw" Teremi chuan a lo ti vat a, "A ngailo, chaw ei lovin ka kal dawn" ka tih chuan "In ei puar hmasa rawh, i ril a tam lutuk ang" ka hnunglam atang chuan Mza'n a rawn ti nghut a, min ngaihtuah anga lem a chang te hi ka ning, in her in a mitah chuan ka melh kar a, ngeiawm zetin ka ner nang bawk, "I mi ngaihtuah na avang chuan ka lawm e, mahse i mi ngaihtuah na der kha ka mamawh hauh lo a nia" tiin choka atang chuan ka chhuak a, ka kal pelh dawn a a thaw hawk pawh kha ka hriat hmaih lo.




Pawn lamah ka chhuak a, gate lam ka pan tur chu Mza'n ka ban rek a a rawn vuan nghal chawt a, engmah pawh ka sawi hman hma in garrage lamah chuan min kai nghal dawr dawr a nihchu, "Enge maw i tih le, min thlah vat teh" ka ti hlak a, min chhang lovin min la kai kal dawr dawr tho, lo tang ve sateh mah ila awmzia a awmlo, a bolero zawn ah chuan min din pui a, rum zetin ka melh chho nghek a, "Engthil nge i hriat hrep a?" ka ti vin nghal that bawk.




"Ka kalpui ang che ka tihkha" a tih hluk chuan ka ner nasa mai, vawikhat mah min la kalpui angai lova, min kalpui lah a tulna ka hre hek lo, "Ka sawi chian tawh kha, i tello in ka kal thei" ka ti leh ngat a, "Keipawn ka sawi chian tawh kha, ka kalpui dawn che" a sawi zawh rual rual chuan motor kawngkhar chu hawngin min nawr lut rawk rawk a ni ber, lo tan eih na hman pawh ka neilo, a rawn thut luh ve hnu chuan a tlan chhuak zui a, hmm.. aa peih phawt a hnu min kalpui rawh se, a thil tih avang hian ka nem phah mai mai dawn chuang lo.



Zawmna



Damdawi in kan thleng a, Doctor Ramtea cabin lam chu kan pan vat, ka be lawk miah silo a, mahse kan luh theih nghal mai dan ah hian Mza'n a lo be lawk a ni ngei ang, nghah ngai lovin kan lut tlang nghal mai a, doctor in min en zawh hnu chuan ka naute a that thu leh keipawh ka hrisel na a that sawt thu te chu a sawi a, damdawi in atang kan chhuah hnu chuan kal hran tum in gate lam ka pan nghal zat chu ka kutah a rawn man leh hman hram.




"Min thlah teh, i rual a let ka tum tawh reng reng lo a nia" ka ti hlak a, midang an tam ve bawk nen ka aw rawl ka ti ring hran biklo, min thlah tum loh hmel zetin min en ngur a, "Ka sawi chu, min thlah rawh, midang hriat laia in hnial i duh te a nih loh chuan" ka ti leh nghat a, rum nghut chungin motor park na lamah chuan min kai phei leh a, ka ning lutuk he mihring hi, midang an awm vang chauh a la in sum hram hram ka ni, a motor dahna sir a a din rual chuan min vawn na kut chu ka phih thla nghal sawk a.




"I duh duh dan a min tih i tum hi bansan rawh, ka hne lutuk che" ka ti that a, midang an awm tawh lo bawk nen in sum buai chu tum tawh lo nasa tak ka ni, "Lut rawh" a motor lock a hawn hnu chuan a ti zawi sup a, ka thusawi engah mah a ngailo te chuan min ti thinrim tun thei, "Ka sawi tawh kha, i duh leh nangmah in I let thei ang, zanin chu ka pa inah ka riak dawn, min dan tum buai duh suh ang che" tiin ka kalsawn zui a, min rawn la um zui hram nia.




Ka hmaah tak chuan a rawn ding a, "Ka sawi kha, kalsawn vat rawh, ka hne lutuk che, ka hne ngawih ngawih che" ka ti khek tuar a, "Ka hria, mahse nau pai lai i nih kha, inah awm mai mai zawk rawh" a ti nghut, tawngkam vin a la hmang miah lo chu mak ka ti, nidang chu nise ka hnial let avang hian kut min thlak chak hmel takin min melh leh khui emaw kha a nianga, mahse ka pum chhung a naute hi a fa a ni em tih a hriat chian loh vanga zawl dawn lui hram hram pawh a ni mahna.




"Kalsawn vat mai teh, khatia min ngaituah ber awm anga i awm thin kha ka ten hluah hluah che tih hre rawh, chuvang chuan ka hmuh phak lovah awm vat rawh" ka ti leh that a, ka kalsawn zui nghal nal nal bawk, taxi ka hmuh chuan ka phar ding vat a, ka kal duh na te sawiin a tlan chhuak nghal, tumah passenger dang a phur lo bawk nen hman man a to leh khawp ang, ka pa in zawn ah chuan ding turin ka ti a, chuan man te ka pek hnuah lawmthu sawi sap in ka chhuak zui nghal bawk.





Inchhung ah ka lut a, ka pa ka hmu mai lo, room ah emaw bathroom ah a awm ka ring a, thutthleng ah chuan ka thu thla hnawk a, ka pheikhawk bun lai chu phelh sawk sawk in thutthleng ah chuan ka ke ka hlang kai a, ka hmet nghal neuh neuh a, ka ke kham zia chu, nau ka pai vang nge mawni ka ke hi a kham hma riau zel a, a hma te kha chuan ke kham tih vel hi ka nei vak ngailo a sin mawle, ka dar leh kawng te pawh hi a kham thum mai.




Ka ke ka hmeh melh melh lai chuan bathroom kawngka a rawn in hawng a, ka pa a rawn chhuak nghal, "Bawihte, i lo kal a nimaw?" ti supin ka bulah chuan a rawn thu a, a chak vak tawh silo nen a tan chuan min rawn tlawh a harsa tawh a, keimah hi ka kal mai thin, nau ka pai tih a hriat hnua ka vawikhat tlawh na a ni a, a lawm hmel viau nghe nghe, "Thla engzah nge ni ve tawh a?" a ti leh sup a, "Thla thum a pum ve tep" ka tih chuan a hmel a eng nghal sawr sawr a.




"Ka boral hma ngeiin ka tu ka hmu ve hman dawn a ang, ka hlim takzet Bawihte, ka hlauh ber chu i fa, ka tu tur ka hmu hman lovang tih hi ka hlau ber a, mahse hei hun te han kal deuh se nau i nei vat dawn bawk a, thlamuang takin ka chawl hahdam thei tawh ngei ang" a tih leh chuan, "Pa.. chutiang sawi suh, min dam pui reng dawn alawm, khatiang thil i sawi leh dawn ai chuan ka lo tlawh tawh ngai miah lovang che" lungawi lo deuh chuan ka ti a, ka pa chu a lo nui mai.




"Bawihte, i hriat kha, ka hrisel na a chhiat tawh zia chu, pasal tha tak i nei a, lo kalsan che pawh ni ila hahdam takin ka chawl thei ang" a tih leh chuan ka thaw halh a, ka pasal nen buaina thuk tak kan nei tih hi hrilh ka duh lo, a rilru tih hah ka duh loh vang a ni, zan ka riah ve nghal dawn thu ka sawi chuan Mza'n a rem ti em tih min zawt a, Mza chu hrilh nawn leh pawh ka tum chuanglo, ka sawi chiang viau tawh in ka hria, riak pawh ni ila pawi a ti tawp nang, a hmei nu nen khan duhtawk in an awm thei zawk dawn miau alawm.




Chaw kan ei kham hnu deuh lawk ah kawngka kik thawm kan hria a, ka pa thawh tum chu ka lo thawh khalh vat, kawngka ka hawng a ka mi hmuh avang chuan ka sa nghal phat a, enge hetah rawn tih a tum ni?.. "Enge i rawn tih dawn?" in chhung a luh tir pawh tum lovin ka ti a, "Min luh tir ve phawt dawn lo em ni?" a va han zaklo mai mai tak, "Luh tir na chhan tur che ka nei a mi, hetah ka riak dawn ka tihkha, let leh rawh" ti hmak in kawngka chu khar mai ka tum a, a pheikhawk in kawngka ka khar tur chu a rawn dang a.




"Bawihte, tunge ni a?" ka pa chuan a rawn ti deuh lung lung a, chhan tum a ka ang zuai hman tih chuan Mza chu rawn che phut in kawngka chu a rawn hawng zau nghal hrawk a nihchu, ka melh nghal rawm rawm a, "Ka pu keimah ka ni e, I dam tha maw?" engmah thleng lo ang mai chuan in chhung ah rawn pen lut in ka pa chu a be nghal a, "Ee.. lo thu rawh, ka that lai tak a ni e, i rawn lang khat riau a, I hna lamah I buai viau a nih ka ring a" ka pa chuan hawih hawm takin a makpa chu a lo bia a.




Ka pa sir ah chuan ngawi rengin ka thu ve a, "Bawihte, in pa leh keima tan thingpui va lum ta che, thingpui in pawh a chakawm alawm" ka pa in a tih leh chuan phur lo deuhin ka tho chhuak a, thingpui a chini ka telh dawn chuan Mza no tur ah hian chini aiah chi thlak ka chak et et a, mahse a naupang chhia viau a ka hriat avangin ka ti leh duh ta lo, thingpui ka pek hnuah ngawi reng in ka thu ve ta reng a, an titi tui phian mai, engmah thleng lo ang maia ka pa a bia te chuan min ti thinrim takzet.




"Hetah riak ve nghal mai te che, naktuk lamah hna kal i ngaih pawn in haw hma mai anga, vawikhat mah in nupa hian in rawn la riak bawk silo a" ka pa in a tih chuan ka en vat, "Pa.. a buai lutuk, a lo riak ve hman lo, a haw leh vat dawn" ka lo ti nghal zung zung a, rawn riah ve mai a tum ang tih chu ka hlau ru et et bawk, Mza chu mit mei in ka pa sawm na chu hnar turin ka ti a, a hrelo der nge min rawn en duh thak lo a nih chu.




"Naktuk lam chu hna kal hma em em ka ngai lo bawk a, ka rawn riak ve dawn nia, I sawi ang tak tak in kan rawn la riak miah silo a, a remchang phian ang chu" ka thut na atanga thawh a Mza chu haw tur a tih vak mai chu ka nap a, mahse ka pa vangin ka la in sum hram hram mai chauh a ni, ka pa lah chu a phur in kan mut bu tur la turin room ah chuan a lut a, ka pa awm tawh loh hnu chuan Mza chu rum zetin ka melh nghal kal a.




"Engthil nge I tih kha?" zawi si chang tak si chuan ka ti a, "I hriat ang kha a nimai" a lo ti awlsam then thung, "Hetah rawn riak ve turin eng dikna mah I neilo, ka pa hnenah chuan hna lamah hmanhmawh thlak a awm thu sawi la, haw ang che" ka ti leh hmak a, "Chutiang chuan ka ti dawn hauh lo a nia, i hriat angin ka puzawn a ni a, heta ka riah chu a pawi viau na ka hre hran lo, eng ang pawn min hnar haw tum mahla i thei dawn chuanglo" tawng leh tum a ka ka ka an lai mek chuan ka pa a rawn chhuak a, ka ka chu ka chip leh hmak.




"Chhuat ah hian in mu mai dawn nia aw, Bawihte han phah la, hlai deuh khan phah rawh" ka pa chuan a ti zung zung a, "Pa a la hma emai, nakin ah a nimai, chuan Mza chu a rawn riak leh hman dawn lo a nia aw, hna lamah pawimawh a awm a, a kal nghal mai a ngai dawn a" ka sawi zawh rual rual chuan Mza rum ri nghut chu ka hre zawm a, engah mah ka ngailo e, a ni nen a riah dun ai chuan ka pa dawt hrilh pawh pawi ka ti lo.




"A va pawi ve aw" ka pa chuan a ti vawng vawng a, "Ka pu ka riak dawn alawm, hna lam chu pawimawh viau mahse naktuk lamah ka ti thei tho bawk a, engmah buai na tur a awm lo, Bawihi hian a ngai thutak lutuk a nihhi" ka va han ngei mai mai tak, ka pa pawh chu a bu nghat a, "A nih chuan ka mu tawh mai ange, tunlai zan men ka thei lutuk lova, nangni pawh mu har lo ula, naktuk lamah in haw hma a ngaih hmel bawk si a" tiin ka pa chu room ah a lut a.




"Ka sawi chian tawh kha, haw rawh" ka ti hlak a, ka thusawi chu hrelo ang hmak in thutthleng sei ah chuan hahdam hmel zetin a thu awn duai a, a che zia te hi ka ngei hluah hluah, "Haw rawh ka tih chu" au vak theih a ni silo chu a hreawm hial zawk, he mihring lah hian min tih thinrim dan a hre ropui si, "Mutna tur chu siam vat rawh, ka chau riau, mutthilh hma ka duh" thatchhe aw zet hian a rawn ti nghut a, "I duh chuan nangmah in in siam rawh, i bulah hian ka mu dawn hlek lo" tiin puan sin tur chu ka la a, a thut loh na zawk thutthleng ah chuan ka dah nghal zat bawk.




"I pa a rawn chhuak thut thei tih i hriat kha, chuvang chuan ka bulah mu ang che" a va han zam lo tak em, "Lungngai suh, ka pa chuan a mut dawn ah damdawi ei thin a nei a, a muthilh tawh hnuah phei chuan a rawn tho chhuak dawn lo, riah ve talh i tum a nih leh i thut naah khan i mu dawn nia" nui sak chungin ka ti a, lukham chu la leh in thutthleng sei ah chuan ka mu zui nghal hlan bawk, a nuam zawk zawk dawn lo tih hre mah ila, he mihring bul a mut ai chuan zankhua a hreawm deuh a mut pawh ka thlang zawk.




ka mu tui dawn tan chiah tih chuan ka kang delh delh hian ka hria a, ka men chhuah chuan Mza ka hmu nghal zat, min lo pawm kang chu niin, chhuat ah chuan min nghat a, ka tho tur chu rang zet a rawn mu thla ve in min rawn khan nghal hmak a nihchu, engtik laiin nge mutna tur a lo phah pawh ka hrelo, ka tal nasa mai a, zan a rei tawh bawk si ka pa kan tih harh ang tih ka hlauh vangin engmah ka la sawi ngam lo, ka kut a awm a ka nam tang tang na chu rawn dah sawn in nghet zetin min kuah a, ka tuar thei tawh thlawt lo.




"Min thlah vat rawh" seh chilh nawk chungin ka ti chhuak fak a, engah mah zui ngai lova, a mit a chhing hmak bawk si, "Min thlah teh, i bulah ka mu duh lo ka tihkha" ka ti leh hlak a, "Mu mai mai rawh ka chau ka tih kha" a rawn ti hmuk, "I chauh chuan hetiang hian chelo mai ta che, nangmah in mu rawh, i bulah ka mu peih lo" ka ti zawi leh that a, "Bawihi" min koh dan avang chuan ka ner nasa hle, a ni Bawihi hi ka nilo e.




"Min koh dan kha thlak ang che, i hmei nu khan khatiang a min koh tih a hriat chuan a thinrim viau in ka ring, thlem lungawi dan tur I hre leh silo ange" ngeiawm zetin ka ti a, "Hmei ka nei hrep love" a rawn ti chhuak deuh hluk a, "Ohh.. a nih chuan i farnu anga i en a mi?" ka nui hak a, "In hnial chu duhtawk hrilh teh ang, tunah chuan muthilh a hun tawh viau a nia" a tih leh chuan ka ngei lutuk chu a awm ah ka sik sawk a, a phun nghal hluk bawk.




"I kuttin hleh a ngai a nihkha" a ti leh mai a, "Min thlah rawh, tinge hetiang hian i awm tlat a?" min thlah duh silo chu beidawng zetin ka ti ta ringawt a, "Ka nupui bulah mut ka duh mai a ni, chutah chuan buaina tur a awm vak em ni, Bawihi mutthilh tum rawh, a tlai tawh viau a nia, naktuk lamah thawh hma kan ngai si a" hepa hi enge a hriat le, zanin hi a awmdan a danglam riau, thil ei sual te hi a nei a ni zawk lo maw, nge a rui zawk ni, rui hmel lah chu a pu der bawk silo a.




"Enge hetah i rawn tih?, ka hmuh peih loh vang che in ka pa inah ka kal a, tinge keimah a hun thawl min pek i tum miah lo, ka hmuh che hian thawk ngaih na ka hre ngailo a sin, i hmel ka hmuh hian ka na te hi a zual thin, chuvang chuan keimah in min awm tir la, min ti buai tawh suh, hun thawl ka mamawh, nangpawn bialnu I nei a, ka bula awm lo hian a bulah awm zawk ta che, in duh duh dan in awm rawh u, pawi tihna ka nei lo, kan pahnih hian awm duh tur kan nilo tih ka hrechiang tawh" ka ti chhuak leh hap a.




Ngawi rengin ka thusawi te chu a lo ngaithla a, min kuah beh tlat na chu a thlah thawl ruai ruai a, "A tirah kha chuan beisei na chhete i lakah hian ka la nei ve a, tunah erawh eng beisei na mah i lak atang hian ka nei tawh lova, neih pawh ka duh tawh hek lo, ti hian i tello a awmdan ka zir chho ve zel a, ka la thiam vat bawk ang, ka fa pawh hi i fa a nih i ring lo tih ka hria, engmah sawi buai ka tum lova, ka fa, keima ta chauh a ni anga, a nu leh pa ka ni kawp bawk ang, tu dang mah ngailo turin ka siam ang, chuvang chuan kei min ngaituah awm ang taka awm hi bansan la, i hmei nu chu ngaihtuah zawk rawh, keichu keimah in ka in enkawl thei a, tu thlazar na hnuai ah mah awm ka tum tawh lo bawk" tiin min kuah na a thlah thawl tawh deuh bawk nen a mutna phah atang chuan tho in ka mut na ngai ah bawk chuan a mah hnungchhawn zawng chuan ka mu a, ka hnungzang za mer mer atang chuan min en zui reng tih pawh ka hria.


Cont...


Naktuk zan hi ka hman tak leh ka rawn dah ang aw, mahse ka la sawi chiang theilo..


My Arrogant Husband Awm hun tur...

Monday, Wednesday & Friday (Ka hman changin Saturday ah ka dah thin bawk ang)