KA HMANGAIH THINGTLANGPA BY MAWITEI BAWITLUNG (Completed)

[mawitei bawihtlung]

KA HMANGAIH THINGTLANGPA






CHAPTER 13




School kal tura ka lo insiam mawlh mawlh lai chuan nu Chhingi chu hmanhmawh zet hian a rawn lût a, pa Sena chuan a chhan a lo zâwt vat mai “Pu Rûma kha a thi a nih chu, Nunu nang pawh school i kal duh dâwn em ni? Vawiin chu in chawlh ka ring, i thawhpui Zuala pu kha a nia, in châwl in ka ring, kal tlang duh lo mai rawh" a tihchuan ka hnial tawh bîk lo.








Ka kawr chu thlâk vatin mitthi in kal tur chuan ka insiam leh sawk sawka, nu Chhingi puan dum chu bihin ka chhuak zuia “Nu ka kal aw.." tiin pâwnlam chu ka pan zuia, u Zuala chu ka lainat viau school ah pawh a pu damlo leh a ngaihtuah zia a sawi nasa ṭhina, a thawhpuite zawng zawngin a pu a ngainat zia kan hai hek lo.






U Sangpuia te inah chuan lûtin chanchin ka zawta, a ni pawhin a lo hre tawh a nih hmel. Chutia an ina ka awm lai chuan YMA information aṭang chuan an rawn puang ve chiah bawk a, u Sangpuia erawh thlân laihna lama a kal a ngaih dâwn avangin chhunlam chu kan kal rual thei dâwn lo a nih hmel.








“Zanah ka lo sâwm ang che, lo zu kal phawt mai rawh" a tihchuan lo aw vatin ka chhuah san zuia, veng mawng lama awm an ni bawk nen hmanhmawh zet chuan ka chhuk thla hlawk hlawka “Nunu min lo nghâk" Rengpuia bialnu Manuni chuan min rawn aua, ka lo nghâk ve mai. Chutia kalpui tur ka nei chu ka lawm ru viau bawk.










“Kal ila i va che rang bik ve,a zia lo hle mai. Nizânah khân a zual an ti renga, tirawh kal vat ang, in lam tihfel angai dâwn nen kan tlai bik lutuk ange" tiin mitthi in lam chu kan pan lehnghala, amah a ṭawng duh bawk nen keipawhin ka nel nghal viau. Bâkah ka kawm ṭhinte ngaihzawng a ni bawk nen ka tan chuan ka ṭhian ve tho a ni miaua.









A hmun kan thlen chuan nula chu an lo la kal vak lova, a awm chhun chuan inchhung bungrua chu an lo thiar chhuak mawlh mawlha. Manuni nen chuan pui vatin chhuatte chu kan phiat faia, mitthi chhûngte lo ṭap bawk nen thaw a ipik ṭun mai, mi ṭap ri ngaihthlak hi a hrehawm ka ti ṭhin. Keimah hi ka lungchhe ve zel bawk nên mi kâra awm a nuam lo ka tih phah ṭhin.









Chutia inchhung kan tih fel takah chuan mipa awm ve thlan laihna a kal lo ho chuan ṭhutthlêng an rawn rem zung zunga, kan lo pui ve bawk. Mipui lam pawh chaw eikham lam a ni tawh bawka an rawn pung chak viau, thingtlangah chuan a khawpum in mitthi an neih pawhin an in ṭawiawm a, khawhar in lêng pawh an ṭha thei hle tih ka hria, keini lamah kha chuan vêng khat ringawt pawh kha kal lo tâwk kan awm ṭhin kha a nia.









Inchhûng an khah tâkah chuan thingpui lum tûrin kan kal zuia, ṭhenkhat fiamthu lo thawh zauha nui leh dar dar ṭhin an lo awm ve bawka, keini pawh Manuni leh nula pahnih awm ve nen chuan thingpui lum phahin kan titi a, chutia an zinga awm a han kawm ve takah chuan kawm nuam ka ti ta phian hlawm mai. A hma kha chuan mi biak hmasak ka hreh bawk nen ka vâk chhuak meuh lo kha a nia.









Nileng chuan thingpui semin kan buai ngar ngara, khual khua aṭanga rawn kal an awm ve reng bawk nen kan chawl hman meuhlo, reilote chawlh chu han nei ve bawk mah ila tih neuh neuh tur a tam bawk nen ka kâwng pawh a kham ve ṭhum mai.







Hunserhte an neih zawh chuan zirtirtu ho thlalakpui an ti bawk nen ka tel ve a, u Zuala chu a tuarna hle tih a hriat, a lainatawm viau mai, thlalak zawh rual chuan kalsawnin mi awm lohna laiah ka kal vata, mi an ṭah luai luai hi chuan ka awm thiam ṭhin lo, an ṭap ri hian min ti lungchhe zel bawk nen.








Thlanmual lam pana an inzui chhoh diah diah tâkah chuan an hnungah ka zui ve a, Manuni pawh ka bulah a rawn kal nghal vat mai. Mi a ngaina phiana, keipawhin chutia hmeichhia ngei kawm tur ka neih avang chuan nuam pawh ka ti viau mai, thlanmual kan thlen chuan u Sangpuiate ho pawh an lo awm ṭhapa, thlan lai tlangval chu an ṭhahnem hle, tlawmngaihna an la chhawm nung ṭha hle mai.









Pastor chuan thlahna chu siam leh te te in kuang chu lei hnuaiah an thlak thla a, “A hrehawm ka ti ṭhin. A thi tawh a te chu kan ngaihtuah tawh lova, mahse an kalsan tak te ber hi an lainatawm ka ti ṭhin, mitthi te chuan a damlaite an rawn hre tawh lova, a la dam te hi ni ngaihtuahawm ber ṭhin chu," Manunin a rawn tihchuan dik ka ti viau mai.








Ni e hunpui leh eng emaw nikhûaah hian kalta te chu ngaih an thar fo va. Han ko ṭhin mah ila chhâng tur an awm tawh hek lo, an reh vawng vawnga, an ni chuan hlim takin pialral an pana, a damlai te hian kan thlah hleithei lo chu a nih si hi.





Chutia in vui liam a nih tâkah chuan in lam panin Manuni nen bawk chuan kan inzui haw a, u Sangpuia te erawh thlân chhilh ala ngaih dâwn avangin an la awm thung.







”U Sangpuia nên in ni hi in inhmeh tawp, bakah in nih aṭang hian a mizia a thlak nasa teh ania, nangmah avanga a in thlâk nasat zia hi kan hailo. In zui zêl rawh u, taka zanin chu kal tlang hlawm ila kan ṭhu ho dâwn a nia" a tihchuan ka lo pawmpui vata. Mahni a ṭhut tlawng ai chuan a nuam deuh ang.







A pen hnu chuan inlam ka pan hnak hnaka.

ZAWMNA


Zânah chuan u Sangpuia chuan min rawn sawmin Samuela te ho chu kan sâwm ve leha, Manuni pawh Rengpuia nen chuan an rawn kal tlâng ve bawk. Kan pasarih chuan in zui ṭham ṭhamin khawhar in lam chu kan pana, kan thlen chuan an lo tam tawh viau mai.







“Naktuk zân chu YMA lam in an ral zân a nisia ralna ka dawh dâwna, ka ṭhutna tur min lo hauhsak sa ru aw" Manunin a tihchuan kan lo aw vata, inchhung kan luh chuan tlar hnung lam bak ṭhutna tur a awm tawh loh avangin ṭhutthleng an dawh zawmah chuan kan ṭhu ṭhapa; miin min en duh bawk nen a nuam lo lek lek mai.









“Sam, khawimaw i elaichi kha ka lo ei ve" Samuela beng bulah chuan ka phun sar sara, min rawn pe ve mai bawk. Lo hmawm vatin ka zai ve leha, u Sangpuia erawh a ṭhu ngawi run thunga. Zai pawh a tum hmel chuang loh, Rengpuia zaithiamlo lutuk erawh Valpuia te chuan zai zawi deuh turin an ti leh ṭhina, a ruk chuan an in sik sawk sawk mai. An va han buaithlâk ṭhin tak.








“Awm mai mai rawh u, zailoh ai chuan a ṭha zawk, a zai peih a hnu miin an en cheu a nia" ka lo tih tâkah chuan an ngawi zui mai bawka. Innei tu lam aṭanga thusawite chuan hnuk an ti ulh ve thei hial mai. U Zuala erawh ala ngawi renga, mi karah chuan hmalam melh ngurin a ṭhu thung, a pu a chân chu tumahin a tuar nat zia chu an hmuh hmaihin ka ringlo.







“U Zuala chu ka khawngaih hle mai" tiin ka phun sapa “Kan la hmachhawn vek tur a nih hi" u Sangpuian a lo tihsup avang chuan a mah chu ka melh ha a, hmalam a lo la en run mai.






“Mi tin hi kan la thi dâwna, a kal hmasa sa hi an vannei. He khawvel hrehawm leh bawlhhlawh telh telh an hmu a an tuar tawh lo tur hi nuam an ti daih zâwk ang" a tih leh avang chuan engmah ka sawi tawh bik lo, ni e khawvêl chu a chhe telh telh a. Borual a thianghlim tawk tawh loh avangin eng hri emaw a leng reng chu a nih hi.






Bâkah sualna lah a punga, tualthah mai pawh pawisa lo Mizo ah pawh kan tam tawh bawk nen keini ngei pawh hian kan hmahun kan hrelo va, kan thih hun tur kan hre hek lo.






Dar 9 vêlah chuan lenkhawm programme chu titawpin ṭawngṭaina nen chuan kan ṭîn zuia, “Naktuk zan pawh kal rual leh ang u aw, khawiah mah pen bik awih loh" tiin kan in chah hlawma, Rengpuia, Valpuia leh Kima te chu Manuni te in lamah lên an tum avangin an pêng hlawma, kei leh u Sangpuia, Samuela te chu kan in a inhnaih hlawm bawk nen kan haw tlâng thung.







“U Sangpui in thleng min lo thlah" dik tak chuan mitthi an awm hi chuan ka hmelhriat pawh nilo mahse ka dawih êm avang hian ka hlau ziah, hlauh loh tum ve ṭhin mahila ka thei lo, ka nu leh pa pawhin min hauhna a ni fo mai. Bâkah an khua hi an la tam over lova, in a inhlat ve deuh bakah ramhnuai kal tlang ngai ang te a nih ṭhin avang hian thui pawh nilo mahse ka thla a muang thei miah lo.







“I hlau em ni?" a rawn tisupa, ka lo aw nghal vat. Samuela chu a rawn nui huka “Nula ve pui si i va dawih ve. Piangthar rawh, pianthar i ngai a nih kha" a rawn tihchuan rum zetin ka ena, a ni erawhin thimkar a ni nen min hmu kher lovang “Hlauh zâwng a inang hleinem; pianthar leh thar loh a nilo, kan hlauh zâwng a inang lo. Ṭawng thei lutuk mai" ka lo tih hlak lai chuan a rawn nui leh haka.








“In in thlen hma thingkungah khan a lo uai var zuah mai thei a ni, a hrâng ṭhin ania. Fimkhur hle rawh, mitmu pawng keu kuauin a rawn melh kur ang che nga. A hmai a dâng luap bawk anga" ka va han ngei tak, hlauh sa mahnak laiin chutia min lo tih leh kher kher ni. U Sangpuia chu ka kuah ṭung mai.






“Samuel khatiangin lo tih ṭhaih loh teh, engmah hlauh tur a awm lo. Thla hi an awm tak tak a nih pawhin hlauh tur an awm lo, mi an tina thei hleinem. Zu in ṭhin bakin an hmuh ngai loh hi, engmah hlauh tur a awm lo zu rui ho thu khaw châng mai mai a lawm" u Sangpuia chuan a rawn ti a, ka thaw deuh huai tak nângin ka hlauhna erawh ala reh chuang lo.








“Ka pêng phawt ange, muttui u" tiin Samuela chu an in lam panin a kal zuia “Sual thei lutuk, ka thil hlauh zâwng tih hriat avanga khatianga sawi kher" ti hlakin u Sangpuia chu ka kuah bet tlata.







“Min thlah ang tiraw? Ka hlau" tiin ka ṭawng khur dar dara, nui sukin a awmah chuan min kuah beta “Engmah hlauh tur a awm lo, khawvelah mihring hi kan hlauhawm ber tih hi hre reng zawk rawh, thla te chuan min tina thei tawh lova, engmah hlau suh. Tirawh le ka thlah ang che, inchhunga i luh veleh ka haw mai dawn a nia" a tihchuan ka en ha a.









“Lên i tum lovem ni?" ka tihchuan a lu a thing nur nur mai “Khawhar inah khân riahluh a ngai dâwna, mutbu dah luh a ngai alâwm. Naktuk zanah ka rawn leng zawk dâwn a nia, kal ang le" tiin a kut lian leh lum vung vung chuan min kaia, keipawh chuan ka zui ve mai bawk.





Kan in bula ramhnuai deuh reuh kan thlen lai chuan Samuela thusawi chu ka ngaihtuah chhuaka; mahse u Sangpuia ka bulah a awm avang chuan in thing harh in ka kal ngai chuan ka kala, ka hlauhna chu tihreh ka tum tlat bawk.






Sumhmunah chuan ding dun vang vangin ka kutah chelh chuan min en reng a “I hmelṭha lutuk tlat" tiin min nuih suk pah chuan ka hmuiah chuan a rawn fawp zauha, “Tui deuhin mu rawh aw, thil ngaihtuah vak vak lo la. I duh chuan kan in text pah thei ang, i mut hma chu kan in be dâwn a nia" a tihchuan ka hnial bik lo.







Dingdihlip in a biangah chuan ka fawp zauha “Muttui aw, ka lût phawt ange. Riak tur in tam chuan in call a chi awm silo va, midang in mut an duh awm si a, ka lo text ang che" tiin inchhung lamah chuan ka luhsana, ka room lam pan chuan nui ver verin ka luta.







U Sangpuia nen kan nih chinah hian a mizia ka hre chianga, ka duh tulh tulh mai. Amah hi a ṭawng ve zung zung lova, mahse chu chuan a tih nelawm loh phah chuang lo, min ngaihsakna kâ in a tilang vak vak lova. Mahse a chêtzia in a tilang mai ṭhin thung, Aizawl a ka bialpa te nen chuan in ang lo tak an ni.








College-ka kal lai pawh khân bialpa chu ka nei ve nuala, mahse tuna ka hlimna ang leh thlamuanna ang hi ka la nei miah lo. U Sangpuia chu a danglam bik a ni, a ngo lova, a hâng hek lo. Tin, khulama ka bialpa hlui te angin a no ve lo va, a kut pawh hlo thlo mi kut tih hriat takin a thapin a char hrup bawk, mahse chu kut ka khawih ngei chuan keimahah thlamuanna a siam thei thung si a nih hi.








Inthlakin khumah chuan ka mu zuia, light erawh ka off duh lo, Samuela vang vek kha a ni. Mi a tidawih zual vek mai, u Sangpuia chu ka text a, a insiam vêl mek a nih ka ring. A la seen hauh lo, darkar chanve tlin hma deuhah min rawn chhang hrama. Mutna an phah fel chiah thu chu a rawn sawia, riak an tam viau a nih hmel.







Tlangvalte hi chhiat ṭhatah hian an lo ṭangkaiin an lo tlawmngaihzia he khua ka awm aṭang hian ka hre chiang leh zual, chhûnah hah em em in thlân an laia, zanah heti hian khawhar inah an riak leh ziah bawka. An chau ve thei ngawt in ka ring, u Sangpuia nen chuan kan in text char char hnuah mu tura in thlahin keipawh thawnthu chu ka play paha, ka hlauhna pawh a zia ta deuh.







Pasalṭha thawnthu chu ngaithla in mangramah chuan ka lut zui ta riai riaia.

KAN ZAWM LEH ANG AW, MUT A CHHUAK TAWH EMAI