LET's LOVE AGAIN BY Ziki_nu (Completed)

[ngaia]

A tlan liam lai chu ka thlir zui vawng vawng a, vawi eng emaw zat titi dunna hun kan nei tawh chung hian vawi khat mah kan inkar thu a la sawi chhuak lo va, a laka ka beisei hi a hre miah lo nge a hai der zawk ni ang le..


A lo len chang hi chuan eng eng emaw sawiin kan titi ve reng thin a, mahse phone ah erawh kan in be tlem khawp mai.

Keimahni hna ve ve ah kan buai a, keipawhin ka lehkhabu duhzawngte lakhawmin chu lamah chuan ka insawrbing a, love story leh novel tuipui ngang ka ni bawk a lehkhabu ka inchhawp tawh hi chuan rilru ah thildang a leng meuh tawh thin lo va, hun awl hnawh khah nan chuan a tha khawp mai.


Rintea chu a pa hnathawhna lamah karkhat chhung thang turin a zin ve a, a zin dawn zanah a lo leng a, chubak chu phone ah pawh kan inbiak zawm lem lo.



Min biak loh chuan han biak hmasak hi ka hreh riau zel a, keima lam dikloh tak pawh a ni ang, ka tlawmngaih theihna zawng a ni tlat lo a ni.



U Mazari hnen atanga ka hriat leh danin Nunpuia chu Odisha-ah a lo kal leh daih tawh a ni âwm a, a reh thei vang vang ka ti reng a ni.
A inhliamna avangin a la inkhel thei dawnlo a, mahse eng eng emaw buaipui tur neuh neuh a neih vanga chhuk a nih hmel.



U Aldrina te pawhin kan khaw lamah palai an tur fel der tawh a, rem lohna awm dawn hauhlo mah se a zan leha kal nawn leh turin an lo ti a ni âwm a, U Mazari phur lutuk, phur anga lan hreh ve deuh si chuan zawhna mawl te te min zawt reng a, a zawhna te lah chu'h..



"Inneih ni hian mokawr ka ha ve âwm si a, khawiah nge ka phone ka dah ve ang le" tih mai mai te, "Lawithat tuka zing thawh ka huphurh e" tih mai mai te buaipuiin a za cheng a ni ber a, a kum ngaihtuahin a buaina chu ho ka lo ti khawp mai.



Thawhtan tuk chu a ngai te in thawh ka hai leh pek a, Jacoba'n ka kawngkhar a rawn chum ri dat dat ah chuan harh hlawlin khum atang ka thu chhuak nghal hluai a, U Dintei min lo ri ka hre zui zat bawk.



Kawngkhar ka va hawn rualin U Dintei chuan "Kaihthawh i va han har thin em em ve.. Eirawngbawl lovin lo ei chho mai rawh, i tlai mai dawn alawm" a lo ti nghal zat a, sana ka en chuan dar 8 a lo pel tawh chu niin..


Nizan khan inkhawm banah hla ka zir ve ngei a, ka haw hnuah lah lehkhabu chhiarin ka meng leh hrep a, zingah ka buai phah leh anih hi.




Insiam zung zungin in chungah chaw ka ei chho a, ka rilru in vawiin ah Rintea a lo haw dawn tih ka hre ru ve reng bawk nen a rukin ka phur ve surh ringawt a, inbe hauhlo mah ila karkhat chauh a cham tur thu a sawi avangin vawiina a lo haw chu ka beisei ve em em ringawt mai a ni.



School ka thlen chuan Riny leh Aruata an lo la thleng ve lo va, Ramdina nena an inthen atang hian Aruata nen an rawn inthurual chawt thin a, a ziaawm zawk mah in ka hria.


First period ka neih laiin ka nu hnen atangin call ka dawng a, tun ang huna min lo biak ngailoh avangin a pawimawh a nih ringin ka chhang a, mahse u Mama aw zawk ka hre thung.

"Ka nu hi nimin atanga a khawsik kha a reh theilo a, a luak reng bawk nen kan mangangin damdawiim kan pan pui a, doctor in hmunpui lama kal turin thu min lo râwn nghal a" a rawn ti ta mai a, ka thil hriat zet chu ka beiseilo kher mai.



"Chuan.. Engtin?" ban charh hian ka lo ti thei tawk a, ka dang a ro nghal huam huam mai bawk a, ka lungphu te lah chu aw...



"I u Mahriata leh Tetei ten min lo kalpui thei dawn a, an insiamzawh ah kan motor in kan lo tlan thla nghal mai ang" a lo ti leh zung zung a, a hma khan damdawiin pangngai ah kan in entir loh avangin an lo kalna lam atanga hnai ber ZMC chu pan tawp turin ka lo ti ve ngawt a, keipawh ka kal nghal theih tur thu ka sawi bawk.



An buai deuh nak nak avangin kan inbe reilo a, ngaihtuahna a buaiin rilru a chawmawlh zo ta vek bawk nen class pawh chu lak chhunzawm thei lovin ka chhuahsan nghal a, ka awmdan diklo chu ka thiannu in a lo hre rang khawp mai.



Thlanglam bathlara ka chhuak tlang chu min lo zui ve nghal vat a, "Ngatinge a Sawm.. Diklo a awm em ni?" tiin ka darah a rawn dawm a, ka âwm chu a tawt tlat a, ka tah lah chu a chhuak pawh a ni silo.



Thawk ka la hluai a, ka nu dinhmun te chu hrilh in keipawh haw har thei ka nih loh tur thu te pawh ka sawi a, "A van zialo tak e aw.. Nu Lawmi chu, a dam tha tawh dawn emaw tih laiin" a ti ve nuah nuah a, min hnem vak dan a hre bik lo aniang ka dar chu a tuai leh hauh hauh thin a, Aruata rawn chhuak ve chiah chu chanchin a lo hrilh ve nghal thuai bawk.




Kan thawhpui dangte pawh chuan chanchin an hriat velah haw mai turin min lo ti ve sap sap a, mahse tunah kan khua atanga an lo chhuah dawn chauh chuan lo haw hma ve ringawt pawh ni ila tih theih vak a la awm dawn chuanglo a, school lamah rilru chu bet viau lo mah se chawhma tal chu awm ka rilruk ta tho a, rilru erawh a nuam mawlhlo a ni.




A khat tawkin U Mama nen kan inbe reng a, u Mahriata'n motor a khalh theih bakah ka nutei fanu Tetei a lo tel thei bawk a, tlem chuan ngaih a tha ve deuh.



Damlo phur an nih avangin duh angin an rawn tlan chak thei lova, lo va call buai sek pawh chu ka inthlahrung letling tawh zawk a ni.



Chhun chawlh hun a lo nih takah chuan keipawh haw turin ka insiam zui a, Riny chuan min kalpui theih a duh viau tih hre mah ila chawhnu lamah class a la neih dawn avangin ka pawt peng duh lo va, U Mazari chanchin ka hrilh ve tawh tho bawka a ni'n damdawi in lamah chuan min kalpui thei tho in ka ring.


Chawhnu dar 1 velah in ka thleng a, U Mazari te inah lut hmasa in chanchin min lo zawt leh vat a, hmanhmawh tut tut ngai a ni lemlo bawka tiin keipawh ka inbual hmasa leh te te a, rilru fim put hram hram ka tum a, ka tawngtai mawlh mawlh reng bawk.



Ka nu hmel ka mitthla a, na tak tuara a awm tur hmel chu rei pawh ka mitthla ngam lo, khawsik leh luaka a awm reng anih chuan a taksa pawh a chau tawh hle anga, min thlakhlelha min ngaih ve dawn tehlul nen kei lah chu a bulah ka awm thei bawk si lo. Midang lakah a inthlahrung dawn tih lah chu ka hrechiang nasa mai si a, a fanu bulah pawh a zep tlat thin kha midang bulah phei chuan a sawi chhuak hauhlo ang, ngaihtuahna kal ding lutuk chuan mahni indemna min neih tir a, a dam tha vaklo chung khan lo haw tir kherlo ila chuan hetiang dinhmun pawh hi ka thleng kherlo ang tih te ka ngaihtuah a, rilru a buaiin a hrehawm zual tulh tulh mai bawk si.



Tlai dar 4 dawnah U Mama chuan min lo be leh a, Falkawn an thlen tawh thu leh ka nu pawh doctor leh nurse ten an buaipui nghal thu te a rawn sawi a, an admit dawn tih a chian tawh sa avangin puanthuah leh mamawh eng eng emaw keng turin min chah nghal bawk a, rei pawh kan inbe lo.



U Mazari'n engkim min buaipui sak a, kan pahniha damdawiin kan pan chu kan inbe meuhlo a tih theih. Mahni ngaihtuahma ve ve kawmin kan ngawi ran ringawt a, tum dang zawng aiin ka tlan chak bawk.



Damdawiin kawtah Tetei'n min lo nghak a, kan inhmuh rual chuan min lo pan vatin ka ban a rawn vuat chat a, kei aia a naupan deuh avang hian min û en ve hliah hliah a, a motor chuanna a la in tifelfai lo tih hriat zet hian a pawr fap a, a chauh hmel viau bawk.



"U Mama chuan doctor a hmu a, U Mahriata chu zial zu turin a chhuak lawkin ka hria" ka nu awmna ward lam kan pan lai chuan a lo ti var a, "Engnge a an?" tia ka zawh chuan result a la chhuah loh thu sawiin ka nu chu luak danna leh nachhawk naa an jection hnuah a mutthilh thu min hrilh a, an awmna warda kan luh chuan damlo dang pawh an lo thahnem ngang mai.


Khum kil berah ka nu chu puanthuah mumal sin tur pawh nei lovin a lo muhil ve bam a, a hmel ka hmuh rual chuan ka insum zo lo teuh kher mai. A hmel dawldang leh chauh hmel zet piah lamah buaipuitu mumal neilo ang maia a khum lo ruak hiang bikte chuan ka hnuk a tino riau a, keimah ka inthiamlo hle ringawt mai a ni.




Kan puanthuah ken chuan a muhil chu tihharh hlau deuhin ka sin tir a, U Mazari leh Tetei an titi mawlh mawlh laiin keichu ka nu mutna khum bula yma thutthleng ah chuan thu in a kut venflon an vuah lohna lam chu ka chelh a, min hmuh loh lamah ka mittui chu ka hru leh zauh thin.



Rei vak lo hnuah U Mama chu doctor lehkha kengin a rawn lut a, lehkah chu lo lak mai ka tum chuan a phal tlat lo.
"Result a la chianglo a, nakinah i en dawn nia" tiin a bag ah chuan a khung hmiah a, han hnial zui ngaihna vak pawh ka hre lo.

U Mahriata lo thlen ve tak hnu chuan ro te rel tha in kan awm zel dan tur te kan sawiho a, "Zanin chu ka riahpui hrim hrim ang aw, in lo kalna lamah in chau dawn si" ka tih chuan min hnial lova, U Mama leh Tetei chu kan in lama thlen an tum laiin U Mahriata erawh an chhungte in lamah a thleng ve thung dawn a, a ni tak phei chu naktukah a haw leh nghal ang.



Kan motor in an vai chuan an inzui haw ta rih a, U Mazari a awm bawka ka ngaihtuah lem lo.


Ngawi rengin ka nu lo harh hun chu ka nghak ngawt ngawt a, minute khat lek pawh rei ka ti kher mai.


Nurse in a rawn endik lai pawh chuan tui deuhin a la muhil a, a damdawi ei hun tur leh ei dan turte min hrilh mawlh mawlh hnuah min kalsan leh thuai a, Pathian zarah damdawiin ka rap khat vei bawk nen, an tihdan engkim mai chu ka vawi khatna vek a ni a, ka khawr deuh tut mai bawk.




Tlai lamah U Mama leh U Mazari ten chaw min lo ken sak a, U Mama chhuah hlana U Mazari rawn thu hnai sawt sawt chuan "Enteh mate, tlaia kan haw khan step ah Rintea kha a lo thu reng a, a lo be lo che em ni?" a rawn ti sar sar a, ka phone ka la en miahloh thu sawiin ka ipte atang chuan ka phawrh zui nghal sawk sawk bawk.



Rintea missed call chu vawi 2 lai lo awmin message pawh a lo thawn nual a, vawiin chuan a lo haw ngei anih hi.


"I bulah sawi a nei em?" tia ka zawh leh chuan "I awmna min zawt a, I nu damloh thu leh kan buai thu vel te chu ka hrilh a, mahse I u te kha an awm ve bawk sia, rei pawh kan inbe hman lo" a lo ti leh mai a, engahnge maw a ni pawh chu min biak theih loh te chuan lo kal loh mai tur ania..



Call let lovin message ah chuan ka awmna chu ka va hrilh ve leh tho a, min lo chhang vatin "Zanah ka lo kal ang" a rawn ti a, hmu chak ve viau mah ila ka hnial thung.



"I zin chau awm si a, zanin ah thawt thawt a ngai chuanglo, a dinhmun kan la hrechaing thei lova, engtia rei nge damdawiin ah kan awm dawn pawh a la hriat loh" ka ti duah a, a sawi buai lem lo.
Riny min ráwn angin principal hnenah tunkar chung chawlh chu ka dil ta ringawt a, damlohna thil te a lo ni vei bawk nen min hrethiam khawp mai.



Ka nu chu a tawng peih meuh lova, a mitmeng te pawh a â deuh ruai a, ka lainat takzet.

Min hmuh chuan hlim hmel a pu a, tawng a han tum ve ngial pawhin a ri chhuak theih meuhlo a ni. Thil a ei thei lova, thisen chaw an khai chu a ring a ni deuh ber.


Dar 8 velah ka u te chuan min haw San leh ta rih a, naktuk ka scooty tlan loh ni anih avangin zingkarah min rawn thlak a ngai dawn bawk nen, chutiang tur chuan ruahmanna kan siam a, chumi zan chu rei ka ti takzet.



A khât tawkin a luak reng a, thil a ei thei bawk silo chu a chauhpui hle tawh a, zan kan mu meuhlo a ni.




Zing lamah chuan a damdawi eiin a chhhawk ve deuh nge a mutui ve ta viau a, U Mama leh Tetei'n min rawn thlak lai pawh chuan a la harh lo.



Ka inkhalh haw ve nghal a, damlo buaipuia men chu ka tithang lo bawk nen ka zo vaklo ani ang chaw pawh ei lovin ka mu nghal a, lo intih hah ve viau chu zia lo ka ti tak tak.



Chawhma chhung chu ka mu a,ka phone ri in min tihharh chuan Rintea hming ka hmuh avangin ka chhang vat a, "Kawngkhar hi lo hawng lawk rawh" a rawn tih chuan ka meng chhuak chiang khawp mai.



"Engmaw?" ka ti let hu a, a thaw chhuak hawk ri chu chiang deuhin ka hre bawk.


"Kawngkhar hi" a tih leh rualin ka kawngkhar chu a rawn beng zui dat dat a, ka tho chhuak rang viau a ni.



Ka va hawn chuan tawi te hian min lo nuih a, inchhungah inzui lutin keichu pindanah ka lut tlang leh nghal a, ka landan mawlh mai chu aw...



Ka thuamhnaw tenghneng deuh leh ka sam thur zet bakah ka hmel mawlh chu, ka mit hnuai a val kalh a, a chhia a ni tawp mai.



Ka inhuimam thuak thuak hnuah ka chhuak leh chauh a, "I kal leh dawn em?" a lo tih chuan bu nghatin a bulah ka thu thla ve a, "I tlan loh ni tiraw? Ka va thlah ang che" a lo ti leh var a, engtinnge maw ka tlan loh ni te chu a lo hriat ve zawk le...



Chutia min thlah inhuam ta nafam chu keipawhin ka hnial duh bik lova, thingpui te ka lumsak gnuah ka inbual San leh lawp lawp a, min nghah reng danah a buai lemlo aniang chu ka ti mai, ka insiam zawha kal mai ka tum chu min lo pawt let dawrh a, a âwm si chet tak takin ania min pawh hnaih.




"In enkawl tha rawh aw Malsawm" zawi tea ti supin min en run a, chhang lova ka bu nghut ringawt chu a duhkhawp vaklo nge mawni,kan indin hnaih tawh sa tehlul nen min rawn hnaih leh zual a,
"I nat ve ka phallo ania" ti leh supin ka biangah dim te hian a rawn fawp zui a, a chetdan chuan min ti bangbo hle ringawt.









Cont...
Show post links
Top