My Arrogant Husband BY Becca Lnz (Completed)

[Rebec Nunziri]

Chapter-15



Stacy Ramthansangi POV




Ka pa in atang chuan kan haw a, Mza nen chuan vawikhat mah kan in be lo, nizan lama ka thusawi te kha a hrethiam tawh a ni ngei ang, in kan thleng a, ka room ah chuan ka lut tlang nghal, khum ah chuan ka mu leh ta mai mai a, nileng a inah awm hi chuan tih tur a awm thlawt lo, Opi kha chu la awm nise kawm tur ka la nei tal dawn a, Teremi hi chu Mza'n min en thla tura a dah tih ka hriat vang hian nge ka kawm theilo, a bul hnai a awm vak pawh hi ka duh lo bawk.




Chhun ah chuan ka riltam deuh avangin room atang ka chhuak a, Teremi ka hmu miah lo, mahse pawi ka tilo zawk, choka ah lut in eitur ka in siam chawp a, noodles ka ei chak avangin bawm hnih ka chhum a, a hmin hma chuan fridge a thei awm ho chu ka en lawr dan dan a, apple ka hmuh chuan la in ka sil sawk sawk a, a kawr pawh vel lem lo chuan ka ei nghal a, ka ei zawh hma chuan ka thil chhum pawh a lo hnim ve hman mai bawk.




A thak lutuk lo bawk a, ka ei rang ngei mai, spicy ei chak viau mahila naute ka ngaihtuah avangin ka ei ngam lo, ka ei zawh dawn hnaih ah chuan Tetemi chu choka ah a rawn lut a, a kut te chu a bal hle bawk, "Khawiah nge i kal a?" ka lo ti sep a, nel viau lo mahila ka tan awm hreawm tur in a awm ngailo a, min ngaituah ve em em bawk nen ka tan tak pawh biak chhiat chu a har viau, "In hnunglam huan saw ka tifai e ka tia" a lo ti ve vat a.




"Khawi khakha chu ka lo sil a, i ril a tam te chuan min hrilh mai tur a nia" tiin ka ei na plate bal vel sil ka tum chu min lo laksak vat a, a sil nghal sawk sawk a, "A bal tawh viau lo maw, ka tihfai loh na a rei tawh lutuk a" chair ah thut pah chuan ka ti a, room ah ka awm reng bawk nen ka hne ve deuh tawh, "Bal lutuk lo e, ka tifai vek tawh a, thlai ho te kha an lo thi vek tawh bawk a" a tih chuan ka bu nghat nghat a, engmah ching tawh lo mahila pawi ka tilo.




Tlai a nih hnu thleng chuan Teremi nen kan in kawm a, rin ai takin biak a nuam phian bawk, an chhungkaw chanchin te min hrilh siam siam a, Opi ang em kha chuan nel lo mahila ka nel ve viau mai, mahse ka harsatna tawh te sawi pui tur em chuan ka la ring tawk lo, Mza chhawr lai a ni tih ka hriat ve tlat vang pawh a ni mahna. Rawng a bawl dawn takah chuan ka lo pui ve vat a, eitur kan han siam te chu kan hlim phian mai, bai tui ka tih dan ber a siam dan te chu ka hrilh a, ka chawhmeh duhzawng te min zawh chuan tha takin ka chhang ve mai zel bawk.




Rawng kan bawl zo a, ka ril a ka tam loh avangin room ah ka lut a, ka in bualfai nghal zat bawk, ka chhuah leh chuan Mza pawh a lo haw tawh a, a thawmhnaw te pawh a lo thlak vek tawh, "Chaw ei nghal mai ang, zanah chhuah na tur ka la nei" a ti nghut a, a hma ang te kha chu nise a kalna tur ka zawt ngei ang, mahse tunah chuan engkim a danglam tawh a, a kalna tur hriat diak diak kha ka tum tawh lem lo, a hmei nu te inah bak a kal ka ring chuanglo bawk.




Chaw kan ei kham hnu chuan Teremi chu ka tihfel pui a, Mza erawh a room ah in siam turin a chho a nih ka ring, Teremi haw hnu deuh lawk ah a rawn chhuk ve leh a, "Ka kal a nia" ti hmuk in a chhuak zui nghal, ka thaw hak a, a thiltih engmah ngaihtuah tawh loh ka duh tehlul nen a kal na awm ang tur chu ka ngaihtuah kual ruai a, ngaihtuah tawh loh ka tum poh leh ka hlawhchham, ni e, ka mipa hmangaih kha a la ni miau si a ni.




Dar 9 dawn ah chuan mut tumin room lamah chuan ka lut a, khumah ka lawn deuh chiah tih chuan Opi'n min rawn call ve hlawl a nihchu, ka biak hmasak loh hi chuan min rawn biak khat tehlul nen, "Hello" phur zetin ka ti a, "Stacy i dam maw?" zang vah a a rawn tih chuan ka that thu in ka chhang a, "Mak i ti viau mathei a nia" a rawn tih leh chuan a sawi awmzia ka hrelo hle, "Engmaw mak tih tur chu?" ka ti haw a, sawi tha duh lawk lo chuan a nui kur kur a.




"Sawi mai mai teh" a tawp ah chuan dawhthei lo zetin ka ti hlak a, "Pasal ka nei dawn" ka nui nghal vak vak a, ka awih hlawl lo, "Awii.. dawt min hrilh chu tum buai lo mai teh aw, nang hian pasal i nei dawn amaw?, ka awih i ring a mi?" ka la nui reng tho, "Ka ti tak tak a nia aw, pasal ka nei dawn, naktuk zanah palai an lo kal dawn" a thutak hmel em avang chuan ka nui lai chu ka tawp riai riai a, mahse mak ka la ti tho, bialpa a neih awm ka hre bawk silo a.




"Tunge i pasal tur chu, a va mak teh thut ve, bialpa i neih awm ka hre silo a" ka ti ta nge nge a, "Ih.. ka bialpa hlui a nia, kan in then chhan pawh ram dang a lehkha zir a a awm vang a nia, engmah in hauh na pawh kan nei chuanglo, chuan thla thum liam ta khan a rawn haw a, kan in be leh tan a, kha i bulah pawh ka sawi kha" a tih chuan ka hre chhuak leh uar uar mai, "Min la duh thu te kha a sawi reng thin a, keipawn ka hnar em em lo, a fel a, Pathian a tih bawk si a, in neih pui ah min sawm a" a tih leh chuan ka lo lawmpui khawp mai.




"Chu.. a va phurawm tawh ve, nang meuh in pasal neih I tum a nia" ka tih leh chuan a ni pawh a nui ve tawp a, "Nia.. mahse kan dinhmun hi a in ang lo lutuk a, an ni chu an khawsa thei a, keilah heti ve mai mai hi ka ni bawk si, ka nu leh pa te pawh enkawl a in tiam a, chuan a chhungte pawh an fel bawk a, chuti nilo se chu ka chhungte hi pasal ka la neih san teuh lo mai" a rawn ti leh bawrh bawrh a, chhungkaw hlim tak an din ngei theih ka beisei.




Opi nen chuan rei fe kan in biak hnuah kan ti tawp ve thei ta hram, a chhungte a la enkawl chhunzawm zel theih dawn chuan pasal chu nei mahse pawi ka tih pui hauh lo, a pasal tur pawh a sawi dan hmangah ka mi rin zawng tak a ni a, an in neih hma a vawikhat tal hmuh ve ka duh thu ka sawi nghe nghe a nihkha, mutthilh tum chuan ka mu tha sat sat a, khua hi a vawt riau in ka hria, puan chuan ka in khuh hlun bawk a, reilote ah ka muhil zawm nghal mai bawk.




Zanlai dar 1 pelh deuh hret ah chuan ka riltam lutuk vangin ka harh zawk a, ka pum chu ka chul nghal vat, room atang chhuak in choka ah ka lut a, eitur awm ang te chu ka la chhuak a, mahse inchung lama thawm ka hriat avang chuan ka thiltih lai pawh chu ka tawp chawt a, ka ngaithla chiang a, thil eng emaw tak hian ka chhungril ah hian min rawn tham ka ti mai, choka atang chhuak in inchung lamah chuan ka chho a, thawm ka dim hle bawk.




Thawm chu Mza room atang a ni tih ka hriat avang chuan chulam pan chuan ka kal a, kawngka tlem in hawng deuh atanga ka bih thlak chuan ka thawk a tawp dawn in ka hria, ka thil hmuh chu ka hmu sual emaw ka ti zawk hial, ka awm chhung hi a tawt nghal up up thei, thawk ka la tha theilo chu thu hran ka hrawk hi a in hnawh tup tup a, ka thil hmuh chu a tak a ni ngei si amaw, hetianga an awm hi ring fo tawh mahila a tak ngei a ka hmuh takah chuan sawifiah theih loh khawp in ka chhungril hi a na vawng vawng mai.




Mary chu Mza chunga a thu ran a, Mza pawh chuan mu chungin Mary chu a en chho ve ran bawk, enge thil thleng zel tur chu ka hrechiang lutuk tlat, en rei duh tawh lovin in hnuai lamah chuan ka chhuk thla vat a, ka riltam tih pawh ka hre chang tawh lo, room ah lut in khumah chuan ka thu hnawk a, ka mitthla ah lah chuan a la cham reng zui, na tur ka ni maih lo asin, mahse ka na em em tho si, ka thin zawn na ngut ngut chu ka chhum a, mahse awmzia a awm chuanglo.




Chhin khat te mah ka chhing ta lo, zingah chuan ka rilru tawt lutuk tih zia awm nan tiin in atang chuan ka tei chhuak a, darkar chanve vel ke a ka kal hnu chuan ka zia viau mai, ka let leh lamah chuan thingpui dawr kan veng kawn a mi chu a lo in hawng tawh a, ka riltam avangin thingpui leh chhang ka ei kawi a, ka ei tui phian bawk, paratha chu in a ei leh turin ka pack tir nghe nghe a, a hmunah ringawt pawh pali ka ei tawh bawk a, chaw ka ei peih pawh ka ring tawh lo.




Inchhung a ka luh chuan sitting room a Mza leh Mary lo thu chu ka hmu nghal zat a, ngaihsak lem lovin ka room ah chuan ka luh san nghal daih, ka thlan a tla nasa bawk nen hmanhmawh lem lovin ka in bual a, room atang ka chhuah leh hnu chuan choka ah ka lut nghal, "Terem, heihi paratha a nia, ei ve chhin rawh a tui lutuk" ka tih chuan a lo la ve mai a, a la lum bawk nen a ni pawn tui a tih hmel viau, Teremi nen kan titi mawlh mawlh lai chuan kan mi tenawm pahnih te chu an rawn lut a, en pawh ka en peih lo.




"Chaw ei siam la, ei nghal mai ang u, hna kal ka la ngai bawk nen" Mza chuan Teremi bulah a rawn ti nghut a, ka thutna atanga tho chhuak pah chuan "Terem keichu min siam kep duh suh aw, ka ei dawn lo" ti a choka atang chhuah ka tum chuan "Rawn ei rawh, chaw ei lova awm a tha lo" Mza chuan a rawn ti hluk a, in her in ngeiawm zet chuan ka nui khum sak a, "Lo buai lo mai teh, ka duh hun hun ah ka ei ang" tiin choka atang chuan chhuak in pawn lamah chuan ka chhuak tlang nghal a.




Hna kal tura an rawn in zui chhuah chuan swing chair ah ka lo thu reng a, ka hmalam chu ding takin ka melh char char a, engmah ka ngaihtuah chuang lo, "Ka kal dawn a nia, ka lo haw tlai lovang" ka sir a rawn ding pah chuan a ti sup a, engah mah ka ngailo, a duh leh rawn haw hma se a duh leh riak chhuak se pawi tihna ka neilo ve ve, ka chhan loh avang nge a thaw chhuak hak a, "Lungawi lohna I nei em ni?" engtinge chutiang te chu min la zawh ngam zawk ni?..




"I rawn haw hma leh haw hma loh ah chuan ka buai i ring em ni, min hrilh kher pawh a ngailo" melh chho kar chung chuan ka ti hlak a, a lungawi loh hmel hle, engah mah ka ngai love, a ni tih lungawi tum hi ka hna a nilo, "Ka rawn haw hunah in biak kan ngai tih hria la, i duh emaw duh lo emaw kan in be ngei bawk ang" ti sup in a kalsawn nghal a, "Ka be peih reng reng lo che, i hmel hmuh pawh peih loh nak laia biak maw teuhlo lutuk" ka hriat tham lek chuan ka ti chhuak sap a.




Teremi nen chuan nileng in kan awm leh ta a, hetia han awmdun tam tak ah chuan a lo sual zawk zawk lo tih ka hria, ka awmdan zawng zawng Mza a hrilh na chhan pawh a tir atanga Mza'n hrilh tur a a tih vang a ni a, an chhungkua an harsa ve bawk nen a hna a thawk mai chauh a ni, kei atan tak pawh lo huat viau na chhan tur ka neilo, ka rai tih hria in ka ei duh zawng min zawt reng bawk nen min ngaihtuah em em tih ka hriat hian ka lawm tawk hle tawp.




Mza pawh chu a sawi lawk ang ngeiin a rawn haw hma a, sitting room ah thu in tv ka en lai a ni bawk nen ka bul a thut na ruak ah chuan a rawn thu ve nghal zat chu a hlat thei ang ber turin ka lo tawlh sawn vat a, "Naupang chhia taka chet hi bansan teh" a ti hmuk a, ka lo ner nang ringawt, a thu lo ve bawk em a ni, "Khawiah nge Teremi?" a tih leh chuan ka la chhang chuanglo, tv lam chu ka la en lui ngar ngar tho a.




"Ka biakna che chu chhang rawh, i hria tih ka hria" a ti leh hluk a, a dawhthei na a pan leh tawh viau a nih hmel, ning zetin ka en a, min be reng te hi ka kham, "Mamawh na I nei a nih chuan zawng ve mai rawh, min be reng lo hian, i hriat ang in ka be peih vak lo che tih ka awmdan ah hian i hmu chiang hle ang" ka ti hmak a, "Lungawi lohna I neih chuan sawi rawh, hetiang a naupang chhia zet a che lo hian" a ti leh nghut a.




"Engkim ah ka lungawi lo, ka pasal i nih vang hian ka lungawi lo a, i hmel leh I aw ka hre reng te hi ka lungawi lo, chuan he in a ka awm reng pawh hi ka lungawi lo bawk" ka ti hlak a, a hmel chu a dur nghal khup khup a, dawt ka sawi miau hek lo, "Eng ang pawn min hmu hne viau mahla ka nupui i ni a, ka hlat ah chuan i awm hauh lovang" a ti nghet churh a, "Ka hria, i sawi nawn chhen a ngailo, mahse thudik engkim ka hai lan hunah erawh eng ang pawn min dan tum mahla he in hi ka chhuah san tho ang" mahni in ring tawk tak chung chuan ka ti chhuak nghat a.




"I tum dawn nia, ka hlat atang hian i kalsawn hrep lovang" tiin a tho chhuak a, inchung lam chu a pan nal nal, "Kan en dawn nia, i hlat takah hian ka la awm ngei ang" a chhoh na lam en chung chuan ka ti a, he inah hian awm reng ka tumlo, natna min pek ang zawng zawng te ka pek let hunah he in hi ka la chhuahsan ang, Teremi chu a rawn lut a, "Hei chauh hi an lo nei a, kan siam sak nghal ang che aw" nimbu ka ei chak tih ka sawi rual rual in lei turin a chhuak nghal kha a nia.




"A ngailo, keiman ka lo siam ang, i hah awm ropui si" tiin ka tho chhuak a, "A ho lutuk, ka hah hleinem, lo thu mai mai rawh, i in zai palh ang" tiin nimin chu a vel nghal mawlh mawlh a, a vel lai ka hmuh te chuan ka chil a put thei hial, ka hmaah chuan a rawn chhawp a, hmarcha te nen ei chak viau mahila ka ei ngam rih lo, "Lo ei ve rawh, i siam tam si, ka ei zo seng dawn lo a nia aw, a khak hma hian lo ei vat rawh" ka tih chuan a rawn ei ve mai a




Pum li ngawt a bawl a, kan ei zo vek, ka ha a tim nasa em em mai lehnghal, "Rawngbawl a hun leh tawh a nihhi kan bawl nghal mai ang aw, haw hma ka ngai a, rawng ka bawl zawh ah ka haw mai thei angem?" a tih leh chuan "Keimah pawn rawng chu ka bawl thei tho a, i hmanhmawh chuan haw daih rawh" ka ti a, "A ngailo, rawng chu kan bawl phawt ang" a tih tlat pawh chuan haw turin ka ti lui a, a hmanhmawh thlak loh ti mahse a hmel landan ah khan a hmanhmawh hle tih erawh ka hmu thiam ve vek.




Rawng chu keimah chuan ka bawl a, Mza a rawn chhuk a, "Tinge nangman rawng i bawl, khawiah nge Teremi a awm?" choka a rawn luh pah chuan a rawn ti a, "Haw turin ka ti" tih ringawt in ka chhang a, ka thiltih lai chu ka tih zawm mawlh mawlh, choka atang chuan chhuak mai lo chuan chair ah a thu a, ka che vel chu min en reng, "Choka a i chet lohna pawh a rei ve tawh hle mai, hetia rawng i bawl lai hmuh hi a nuam takzet" a ti sup a.




"A nihchu" ka ti ringawt, rawng ka bawl zo a, a riltam em tih pawh zawt lovin chaw ei ka siam nghal, kan pahnih chauh chuan chaw kan ei a, nau ka pai vang hian ei ka thei a, rai no vanga ei theih loh tih vel ka neilo bawk nen nen ei ka thei pap pap hle, "I puar viau ang maw?" ka ei tam a ti ngang aniang Mza chuan a rawn ti sup a, "Puar e, puar turin alawm ka ei" tiin dawhkan chu ka thawh san a, a kham ve nghal mai bawk, hmun te ka tih fel hnuah choka atang chuan ka chhuak a, Mza chu sitting room ah a lo thu reng tawh.




Ka film en duh em em mai hi a lo chhuak a, en ve chak viau mahila ka mihring huat ber bulah hian ka en tui theih pawh ka in ring love, room lam ka pan lai chu hmu in "I flim en duh ber a nilawm ni, rawn en rawh" a ti sup a, "Ka en peih lo" ka sawi zawh rual rual chuan a nui huk a, "I chiang maw?" dawt ka sawi tih a hrechiang bawk a ni, kan in kar that lai khan kan en duh fo a, ka hmaih phal ngailo a nihkha, "Aw.. ka en peih lo, bakah ka mi huat deuh bula film ka en hian ka en tui ngailo" tiin room ah chuan ka lut ta daih.




Vawin chu keimah te in Aizawl kawchhung ka fang a, a nuam takzet, zing atang khan ka pa biak ka tum a, mahse ka call a chhang theilo, chuvang chuan ka pa tlawh kawi ka tum rilru a, a tirah kha chuan hlauhthawnna em em ka neilo kha a nia, mahse hetiang ang hian a awm ngailo, nichin pawh khan ka call a, a la chhang thei chuanglo, tunah chhun a ni daih tawh a nia, ka pa in lam chu ka pan a, kawngka a lo in kalh thiap mai, khawiah nge maw a kal ang le... Ka pa in atang chuan ka kalsawn a.




Bazar ah bawk chuan kal leh in chawhmeh te ka lei kawi a, haw tum a taxi ka chan lai chuan Mary ang deuh mai restaurant a lut chu ka hmu a, eng ka hria nge mawni zui chu ka chak tlat a nihchu, ka zui ta nge nge a, chutah Rinkima nen chuan in hmachhawn in an thu dun lai ka hmuh chuan mak ka ti hle, Rinkima hi Mary hian engtin emaw a tham kha chu ka ring sa hrim hrim a, mahse finfiah na ka la neih loh avangin ka la sawi chhuak lo mai mai kha a nia.




Min hmu ve lo bawk a, ka phone chu phawrh chhuak in thla ka laksak a, enge an sawi hre chak viau mahla ka kal hnaih chuan min hmu mai dawn bawk si nen ka kalsawn leh ta zawk a, taxi pawh a haw lo chuan ke in ka kal a, Mary leh Rinkima te in hmuh chhan tur awm ang ringawt chu ka ngaihtuah a, engpawh nise thlalak ka nei a, an ni pahnih hian in hmuh na chhan tur an neilo, in hre ngai pawh an nilo a, an in hmuh chuan chhan pakhat chiah a nei thei bawk, chuchu kei leh Mza in kar vang a ni ang.




Kan veng ka thleng tep tawh a, midang hmuh tur an awm lo, kan veng hi veng hmawr a nih vang hian mi an tam lutuk lo hrim hrim, ka ngaihtuah na ka kawm melh melh lai chuan ka sir ah hian motor a rawn ding a, ka en chuan mipa pahnih hi hmai tuam in an rawn chhuak a, ka in rin hman hma chuan motor chhung ah min pawt lut deuh nawk a nihchu, au chhuah ka tum lai tak chuan ka ka leh hnar chu puan hian an rawn hup a, thil rimchhe deuh ka hriat rual in ka zawi nghal tial tial bawk.




Ka harh leh chuan hmun thim deuh ruih ah hian ka lo awm tawh a, ka hawi kual chuan ka pa thutthleng chhe lam tawh a an lo phuar beh chu ka hmu nghal zat bawk, ka pan hnai a, "Pa.." tiin ka ko a, a kam sir chu a thi a, a chauh hmel hle bawk, "Pa i tha em?" ka kut an phuar miau avang chuan ka khawih theilo, ka pa chu chauh hmel zetin a rawn meng chhuak diar dair a, "Bawihte" engdang mah a sawi theilo, ka hlauthawng takzet, hetiang a che tu hi tunge a nih ang.




Nihnih zet a liam leh tawh, tunge hetianga min man tu te hi ka la hrelo, mipa lianpui pui pathum in pawn lamah min veng reng a, kan awmna hmun tak ngial pawh ka hrelo, eitur tlem te tak tak hi zing leh tlai ah an rawn dah a, tui pawh no chanve bak an rawn dah ngailo, riltam viau mahila ka pa chu a chauh em avangin ka ei tir thin a, nikhua a hre mang tawh lo, Mza'n min ngaihtuah ve angem le, nge ni a min hre chang tawh lo zawk ang, tlan chhuah ngaihna na ka hre bawk silo.




Pawn lamah chuan thawm ri deuh rak ka hria a, ka kut leh ke an phuar na chu chaw ei tur an rawn dah avang chuan an phelh a, bang awng atang chuan pawn lam chu ka melh a, tumah ka hmu lo, tun hi hun remchang tak chu a ni, kan bawh pelh a nih chuan helai hmun atang hian tlan chhuah na hun tha kan nei tawh dawn lo tih pawh ka hrechiang hle, ka pa an phuar na chu ka phelh a, "Pa tang rawh aw, kan tlan chhuah angai" tiin kawngka chu thawm dim zetin ka hawng a, ka pa chu kuah chungin ka tlan chhuah pui a, kan tlan chak thei bawk silo rilru hmanhmawh tawh nen ka rilru chu a hah takzet.




"Pa.. khawngaih takin han tang leh deuh teh, helai hmun atang hian kan chhuah vat a ngai a nia" ka pa chau tawh lutuk na tuar bawk si chu ka buaipui mawlh mawlh a, "Bawihte, ka thei tawh lo, min kalsan zawk rawh" a rawn tih sup chuan lu ka thing nawk nawk a, "Pa.. han tang leh hram teh, i tello chuan helai hmun atang hian ka kalsawn dawn biklo" tap deuh pur chungin ka ti leh a, ka pa chu ka kaitho a, a taksa khur deuh dar dar chu a chauh tawh em vang a ni tih ka hrechiang hle, mahse muangchang hman kan ni bawk silo.




Chulai hmun tih bai awm zet mai chu kan kalsan ta a, khawiah nge ka pa hi ka kalpui dawn ka hrelo, mahse helai hmun atang hian kan kalbo vat a ngai a ni, khang misual rual ho khan min rawn hmuh hma ngeiin. Motor rawn tlan ka hmuh chuan ka pa chu kawng sir ah ka thut tir a, motor chu phar din tumin ka kut ka lo phar vak vak a, min tlan pelh tak daih ah chuan ka mangang hle, ka pa lam chu ka pan leh a, engmah a lo hre tawh lo.




"Pa.. harh rawh, helai hmun atang hian kan kalsawn vat a ngai a nia" tiin ka pa chu ka sawi nawk nawk a, engmah a hre thei bawk silo, chutah ka hnunglam ah chuan motor ding ri hrawk ri ka hriat avang chuan ka hlauthawng hle, "Puih in ngai em?" mipa aw thum lam in a rawn tihchuan ka hawi let vat a, motor ka hmuh chuan nichin maia min tlan pel tu kha a ni tih ka hria, "Aw.. khawngaihin min pui rawh, ka pa hi" tiin ka tap chhuak hawk a, min pui tu tur ka hmuh takah chuan ka thawveng huai thei.



Lalmuanzova POV




"Engvanga la zawng hmu theilo nge in nih?" ka nupui zawng tura ka mi rawih te chu ka vin thawt a, nithum lai a liam leh tawh, ka pu inah a kal emaw tiin ka kal a, mahse a lo in kalh thap, tun thleng in ka pu pawh a la let leh lo, hetia an bo hmak thei hi mak ka ti takzet, "Mz.. zawng duh tawh suh, i bula awm duh lovin a pa nen khan an tlan bo san che tih a lang reng alawm" ka rum nghut a, "Mary haw rawh, hetiang thu lawi lo pui pui sawi tur hian ka mamawh hrep lo che" ka ti chhuak leh hrawk a.




"Thudik a ni si alawm, tlan bo san lo che se hetiang hian an bo hmak thei dawn em ni, engkim a chiang reng alawm, chuvang chuan zawng duh tawh suh, keimah ka awm a, i mamawh engkim ka tih sak ang che" tiin ka dar chu a rawn hmet a, min thlem tum takin ka beng vel chu a rawn nul kual dan dan bawk, "Mary tun bak hi ka sawi rawn lovang, ka in atang hian chhuak rawh, keimah a awm ka duh" ka ti leh nghut a, ka thaw chhuak ham ham bawk.




"Ti teh, i ngaihtuah na i seng nasa lutuk a nihkha, khatiang hmeichhia vang mai mai lehnghal in, nuam takin ka siam ang che" aw hur zet chuan a rawn tawng a, ka thut na atanga tho thut in Mary chu ka rek bet nghal chawt a, "Ka sawi kha, ka in atang hian chhuak rawh, chuan thu lawi lo zet zet i sawi leh dawn a nih chuan vawikhat mah rawn kal leh tawh ngai suh ang che" ka ti ṭhawt a, mittui tling pam a min en na chu ka hmu chiang hle, mahse engah mah ka ngai hran lo.




A la chet sawn mai loh avang chuan dawhkan chunga zu um chu la in bang vawm nan chuan ka hmang leh a, a te chhuak nghal that bawk, "Chhuak rawh" ka ti leh tuar a, min hlauh hmel lutuk in a tlan chhuak nghal dawr dawr, a ni kha ka mamawh hrep love, zu bur dang chu la chhuakin no ah pawh thli lovin ka in pawp pawp a, ka nupui leh ka puzawn te kha khawiah nge an awm ang, mi zawng zawng in an kalbo an ring a, mahse keichuan ka ring ve thei der lo, harsatna lian tak an tawk angin ka chhungril hian a ngai tlat a ni.




"Mz.. min pui rawh" ka nupui aw chu chiang takin ka hria a, mahse hmuh tur a awm silo, ka tlan kual a, a aw chuan min la ko reng mahse ka hmu theilo, "Bawihi khawiah nge i awm?" ka ti a, mahse a thusawi ngai "Mz.. min pui rawh" chuthil bak chu a sawi lo, a aw chu a hla tial tial a, hriat tur a awm tawh lo, ka hawi kual ruai a, ka hmu silo, ka harh chhuak hlawl a, ka lo chat thla chu niin, Bawihi nen a kan thlalak banga in tar chu ka en a, "Khawiah nge maw i awm le, ka hmuh hma che chu ka zawng zel ang che, ka beidawng dawn hauh lo" ka ti sup a.


4 Years Later



"Ka nu ka sawi chiang tawh, tun bak hi min sawi nawn tir tawh suh, nupui ka nei tawh a, a dang neih ka tum lo" ka ti hmuk a, ka chhan na avang chuan ka nu chu a lawm loh hmel hle, "I nupui chuan a tlan bo san che a nih hi, kum 4 zet a liam hnuah pawh a hmel hmuh tur a la awmlo, engvanga mawl em em nge i nih, tu hmel hmuh ve te pawh kan duh tawh, i pa dinhmun hi i hriat chian kha" ka nu chuan a ti hlak hlak a, ka nupui tlan bo atang khan ka pa hrisel na a tla hniam sawt em em a, damdawi in lamah kan lut khat tawk reng mai.




"I hriat kha, ka nupui khan ka fa a pai mek a, tu chu in nei tawh tihna a nihchu" ka ti leh hluk, "I fa a ni em tih pawh hriat loh" a sawi zawh rual rual chuan "Ka nu" ka ti ṭhawt a, ka au ring bawk a a phu zawk nghe nghe, "Khatiang thil kha sawi tawh lo ang che, ka nu pawh nila, ka nupui pum chhung a naute kha mipa dang fa anga I sawi zel dawn a nih chuan hmu tur cheu in ka rawn kal tawh ngai lovang" tiin ka pa te in atang chuan ka chhuak ta a.




Kum 4 lai a liam tawh hnuah pawh ka nupui chu ka la zawng hmu theilo a, ka chhungte chuan a rawn let pawh an ring tawh lo hial, mahse a la rawn let leh ngei dawn tih ka chhungril hian a hria, kei hi min kalbo san reng theilo ang, nilo ka zawn hmuh hma chu ka zawng zel dawn a ni tawp, ka lak atang hla takah awm mahse engtik ni ah emaw chuan ka hnenah a la awm leh em em ang, a tello a ka awm theih loh ang chiah hian a ni pawh ka tello in a awm thei lo tih ka hria.




Chuan kan fa kha, ni e, a tirah kha chuan ka fa a ni em tih ka ringhlel a nihkha, khatih hunlai khan ka rilru a buai em em a, ngaihtuah na fim hmang lovin ka thil hriat chin te kha thudik emaw tiin Bawihi thusawi pawh ka ngaihthlak sak duh lo a nihkha, ka thusawi ngaithla rawh ti a min ngen lawm lawm lai khan ka hawi san a, tunah chuan mal takin ka awm phah ta a nih hi, engkim kha ka thiam loh vek a ni, ka nupui thusawi ka lo ngaithla duh lo kha ka in chhir a, engmah tih theih ka nei tawh silo.




"Engtik thleng nge min bik ruk san i tum, ka hmuh theih ah rawn in lan tawh ta che, ka ngai che ka ngai lutuk che, i thusawi ka ngaihthlak duh loh vang khan ka tihpalh, i pasal hi ngaihdam tlak ka nilo tih ka hria, mahse min ngaidam rawh" tiin ka phun chhuak sup a, kan naute pawh kha tunah chuan kum 4 a pum ve tep tawh awm sia, engtinge ka fa ka thisen zawm ngei kha mipa dang fa anga ka rinhlelh theih, ka nupui mizia ka ngaihtuah a, mipa dang in khawih tir duh tur hmeichhia a nilo tih kei aia hrechiang tur an awm lo asin, a thusawi ka ngaihthlak sak duh loh vanga beidawn na leh natna mitmeng a min melh tlawk tlawk lai te chu ka mitthla let a, tawt zet in ka thaw chhuak leh hawk thin bawk.


Cont...

Tun thla chhungin zawh ka tum aw.. chuan click leh comment ah te tan min han lakpui leh sap sap ula aw..