CHAPTER 14
NUNUI PIC
“Barakhaih" kawng peng ka thleng tur chu thim kar aṭanga Samuela rawn au thut avang chuan a mah aia ring chuan ka au tuar a, ka lung lah chu a chhuak dawn emaw tih turin a rawn phu pawng zawt zawt hian ka hria.
“I â lutuk Malsawmzual, lungphu châwla min thih tîr i tum em ni?" tiin ka lung zawna ka kut dah chuan thawk chu ka la kâwk kâwka, a la nui vur vur chu rum zetin ka melh bawk. Mawl lutuk mai, dawihzep sa nen min tih ṭhaih reng ringawt mai.
“Hlauh hi chu i ngah ve chiang a lawm. Duh viau lo che ila chu ka tlansan nal nal ang che mawle" a tihleh sup avang chuan ka ner nanga “Sawi ve ziah suh, u Sangpuia beng te a lo thleng leh ange, ngawi hle hle rawh. Bialnu nei ve vat la a nih chu" tiin ka kut chu ka kuangkuaha, engvanga kei hi min duh tlat nge maw a nih le.
“Ka duh lo nimai rawh se. Ka nghâk dâwn che ka tih kha, a tihnat hunah che i tân awm reng ka duh avangin bialnu ka nei ngai lovang. Ka nei a nihchuan nang ka hnaih thei tawh dawn silo che a; chu thil chu thleng turin ka duh hauh lo, i hlimna ka duh avang chauhin ṭhian nih thlang ka nih hi hre reng rawh. I tan chiah ka mipa ngeih miah loh bula i awm ka phala, nangma tan vek tih hre reng rawh" tiin a ngawi zui vung vunga.
Chhan dân tûr mai pawh ka hrelo “I hlim a nih chuan a ṭha a lawm tiin na chungin ka thlir che a, hlim luih a har zia hi i hrethiam kher lovang. Keimah vang nilova mipa dang vanga i nui ka hmuh hian ka na a sin" za lo tak hian a ṭhen suka, “Keiin theihtawp chhuaha tihhlim ka tum chung pawha hlim thei miah lo kha mipa pakhat chuan ṭawng leh chezia a lan tîr kher lo pawhin a nuih tir thei tih ka hmuh hian ka na thara, mahse a thinlung tinatu nih ka duh loh avângin a hlimna chu na chungin ka ṭawm angai si" a tihchuan hrehawm tizet hian ka ena.
“Sam, tinge kei kher, ka tina mai mai ang che. Khawngaihin min duhna kha paih bo tum rawh, ka tan chuan ka ṭhianṭha ber leh min tihlim tu lawm i nih? I kiangah hian ka hlim lo miah lo a nia, mahse ka thinlung hian duh a thlang tawh si a ni, min theihnghilh tum rawh. Hetiang hi sawi tawh lovang" tiin ka kun chala, dik tak chuan a rilru tihnatsak hi ka duh lo takzet.
Mahse engtin nge ka tih ang tih ka hrethiam bik silo a ni, ka rilru hi a buaia. Eng nge ka tih ber ang ka hrethiam ṭhin lo “Ngaihtuah suh, mahse i nat hun apiangah i tan ka awm a ni tih hi hre reng ang che" tiin a kalsawn zuia, eng nge a sawi awmzia ni ang. Nat maw?
Engmah sawi zawm tawh lo chuan muangchangin school lam pan chuan ka kal chhet chheta, exam zawh chawlh tlem pek kan tum avângin vawiin bak kan kal tawh rih dawn lova, keipawh chawlh chhung chu Aizawl lamah haw ve zawk ka duh nen ka thawmhnaw vel pawh ka in siam sa veka. U Sangpuia pawh ka hrilh tawh bawk.
Haw lo turin min duh viau mahse ka chhûngte lahin school chawlh chhûng tal tiin min ngai ve bawk nen kar khat vel tal ka awm a ngai ngei ang.
School chawlh a ni bawk nen naupang ho pawh chawlh chhûnga an awm mai mai loh nen in lama tih tur ka pe veka, ti ngei tur leh an tih loh chuan ka hrem ngei tur thu ka hrilha. An ner nâng hlawm mai, lehkha an zir ṭha ngailo tih ka hriat ruk vang a ni pakhat. Phone a awm tawh bawk nen an phone khawih hma lutuk hian zirna lamah a tlakchhiat tir a ni ber mai.
Haw lamah chuan u Sangpuia te in lamah ka penga, a nu chuan huan a lo thlo mawlh mawlh a. Kan in nel tawh bawk nen min lo be nghal bawrh bawrh mai, u Sangpuia erawh lo lamah a feh leh thung, helam chu awl tak tak hi an nei meuhloa. Nitin hian an feh a, chau hmel an pu ngai chuang silo thingtlang mite hi ka ngaisang ru viau.
Chhûnah lo lamah hah takin an thawka, haw veleh in lam tih tur nen hmeichhia phei chu an chau zual ngawtin ka ring. Ei rawngbawl leh inchhung tih fai nen, fate nei thluah mahse ṭhenkhat chet pui tu nei lo an awm ve bawk nen chau hmel pu miah lo a an che sawk sawk zel ka hmuh hian ka tluk loh zia ka hre thar ṭhin.
Aizawl lamah chuan ka haw thla ta ngeia, a hma anga nuam tihna em em pawh ka nei tawhlo. Ka ṭhiante an rawn lêng ve tak nangin u Sangpuia te ho ka ngai takzet, chubakah in tuala meichhem chunga zai leh te kha ka châk tawh bawk.
Ka nute chu Christmas chu nu Chhingi te bula hman ka dila, a chhan pawh Christmas hi chu thingtlangah a nawm zawk thu an sawi ka hriat fo tawh vang a ni a. Hman ve chhin ka chak bâkah helamah hmang pawh ni ila nuam ka ti tak tak dâwn lo tih ka hria, ka pa in “Helamah a hmang char chara, thingtlâng lama an hman dan hmuhte pawh a tan pawh a ṭha zâwk ang chu, bakah a nuam a ti zâwk ang. An ni lamah chuan an hmandan a famkim zual ania" a lo tih avâng chuan ka pa chu nui var varin ka ena.
“A bialpa neih vang bâk a nilo ang" ka nu chuan a lo tinghal hlak mai. Ka pa nen chuan kan nuiha, ka naute ho lahin u Sangpuia hmelṭha an tih thu chu an lo sawi ve bawk “I nu Chhingin min hrilha, zu in mi neih hi a fuh ngailo ania, nghei tir tum rawh. Bâkah fimkhur hle ang che, Christmas i hman pawhin kan ngaihzawngte lakah hian nupa kan nih hma chu in phalloh tur. Kan pasal an nih hma chuan an thusawi zawng zawng rin hek loh tur" ka nu chuan a ti charh charha, ka lo bu nghat mai.
Zânah chuan Manuni hnen aṭangin pic ka dawng nawlha, ka en nak chuan thikna ka nei nghal. U Sangpuia leh hmeichhe pakhat chhelo ve tak thlalak a ni, race naah an in phur tih a hriat hle bawk. Tunge ni ang? Khuaa ka awm lai khan ka hmu ngai hauh lo “Tunge min hrilh teh, henu hi tunge" ka tihchuan “Aaa ih...ka tan sawi a nuam chiahlo, u Rengpuian min hau palh ang. I hriat loh chuan ka awm a nuam thei bawk siloa, u Teremi a nih hi" tih zawng chu a sawia.
Kei erawhin ka hre châk deuh deuh, u Sangpuia chu ka call a, a la la theilo zui. Hrep hian! Engvanga ka call la theilo nge anih, khanu kha tunge? In hre ṭhang lutuk ang maiin an nui dûn vel a nih kha, a tawpah chuan Samuela chu ka va bia a, a ni erawh chuan ka message a hmu har lo, min rawn chhâng vat mai.
“Sam henu hi tunge, u Sangpuia nên hian an in hre ṭha em ni?" tiin pic chu ka thawna, a seen a, min rawn chhâng mailo. Chûngte chuan ka ngaih a ti ṭha lo deuh deuh,ka lungte chu a phu dup dupa “Khawi aṭanga i neih nge?" a rawn ti ringawt a, ka duhtawk mai hauh lo. U Sangpuia bike hnunga a chuang ringawt pawh chu ka ngaimawh tawh a nia.
“Chûng a pawimawh lo, min hrilh teh. Dâwt ka duhlo. Sam tunge he nu hi" tiin ka zâwt leha, min hrilh ṭha duh miahlo chu ka thinrim hlur tawh mai. “I natna tur sawi ka duhlo, tin hei chu an in phur mai mai pawh a ni thei. Ngai pawimawh suh, a phatsan che ka ringlo" a thusawi dang chu ka ngai pawimawh lo, natna tih lai chu a ni.
“Pehhel lovin sawi rawh, ka ṭhian i nih takzet chuan he nu hi tunge?" tih chu ka thawn leha, “Aw le, min dem suh ang che. I bialpa ex a nih hi, khua a i rawn thawh hma tê khan an inṭhen, an inzui nasat zia chu kan khuaah chuan kan hre vek ang. Mahse tûnah erawh in ni tawha, an in phur ve mai mai ania'ng, i ngaih ti ṭha lo suh, a phatsan che ka ringlo" engvanga u Sangpuia pawh chu ṭan leh em em si nge a nih ang.
Chhâng tawh lo chuan phone chu ka dah zuia, a bialnu hlui tih ka hriatna ringawt pawh chuan min tina. Chumai nilo in ka awm loh ruala hmeichhe dang a zui chuan min ti thinrimin min ti tlâwm ngawih ngawih hian ka hria, ka hua a ka haw takzet. Engtin nge hetiang thil hi ka chungah a tih theih zawk, Samuelan ring hlel suh ti mahsela ka ring hlel lo theilo.
Chu chen lo in zui tawh chu u Sangpuia hian min kawp zâwk nge ni ang? An lo inzui rei tawh phei chuan awlsam taka a theihnghilh theih ka ring lo. Thawk la ham hamin khumah chuan ka mu a, ka thik lutuk chu ka mittui a tla thei hial mai. Ka phone chu a rawn ri a, u Sangpuia a ni, la duh lo chuan ka ring ral tîr ṭhaka. A vawihnihnaah pawh ka la la chuang lo, message a rawn thawna.
Ka phone chu melh zawkin ka mu tawh em ni? tihte chu min rawn zawta, chhân châkna pawh ka neilo. Phone chu off in ka mit ka chhinga, mut thilh lah chu khawi lamah. Ka in let tawn sek mai, ka haw chiaha a bialnu hlui rawn haw ve thungin a lo lênpui nghal thei a nia, an la in ngaizawng reng lovang tih tunge sawi thei ang.
Ka leh kual sek hnuah zing lamah chuan ka muhil ve thei ta hrama, a tuk lamah pawh ka belo va. Message min rawn thawnin call lah a rawn call ngun “Thil thleng a awm em ni Duati, tinge min chhân duh miah loh? Khawngaihin min chhâng teh" tih te chu a ni nuk mai, ka la chhâng chuang lo. Ni e, keimah zâwkin ka duh em avângin bul ka ṭan puia, mahse min duh tak tak lo a nihte chuan min duh anga awm loh mai tur a nia.
Dik tak chuan a thinlung takin min la pawh theilo tih ka hria, ka hai bik lo. A thuruk tak ngial pawh min la hrilh duh lo a nia, chutah a bialnu hlui rawn lêt nen ka awm loh lai châng ni awm hrimin an la in phur zui bawka, dik tak chuan hmeichhe induhtawk ve tak ka ni a, miin min buma ka hriat chuan tih let ve vak aiin ngawi renga awm duh mi ka ni, va biak emaw, va hauh chiam kher ka tumlo.
Chu ai chuan ngawi renga inthiarfihlim ka duh zawk, ka thu ka duhna hi ka chhungte min hauhna a ni fo. Mahse ka dikna nilo ah chuan ka thu ka duh ngai bik lo.
Kar a liam leha keipawh chu phur lo zetin ka hnathawhna lam pan chuan ka kal leha, khua ka thlen hunah chuan ka peh hel thei tawh pawhin ka ring lo. Motor chhûng aṭang chuan pawnlam chu ka thlir veng venga, romei zâm paw chiai in a tlâng hrang hrang a bawh chuk chuan lung a tilêng phian lehnghâl.
Tlai dar 3 vêlah khua kan thlenga, nu Chhingi bâkah Samuela te ho an lo awm ṭhapa, ka haw dawn tih an hriat avângin min lo hmuak tih ka hre mai. “In lo dam maw?" ka tichu an rawn nui ṭha a, “Dam mah mah, dam lai lu i sûn mai dawn a va ang ve" an tihchuan ka melh ngheka, Samuela erawhin engmah sawilo in thutak zetin min en thung.
Inchhung lamah chuan ka bungrua nen kan luta, an vai chuan tshirt ka hawn ka pe chu an lâwm thiam ve ngei mai. Min anpui chei lawp lawp mai, min la kuah ang thuak thuak zuia, an nuihzatthlak ṭhin a nia.
“In pa a phili buai teh a nia, a ex mawng er tâwk leh in sawi thei lutuk a rawn haw a, khawpui awmberi kan tih ṭhin a nia. Veng ṭha hle rawh, i chân leh hlauh ange, zah a hre silo, an vua leh vâng zawng zawng chu an ni vek a nia. Midang sawisel nuam ti, mi inla tak eng ni silo" Valpuia chuan a rawn ti duah mai, ka chhâng lo. U Sangpuia chuan ka haw tih a hre ve ngei chuanin ka ring, Aizawl ka awm chhûng zawng ka be lova, a lungawi vakin ka ringlo.
A pawilo, keipawh ka lungawi bik hleinem. “A ho emai, nupa pawh kan niloa a thil tih zawng zawng khap ka tum lo, a duh chu a thlang mai anga. Chumi a zirin kan insiam rem ve mai ang chu, keiin thuneihna ka nei hleinem" tiin ka ngawi zui daiha.
An ni pawh rei awm lovin an haw thuaia, zân lama an rawn len leh tur thu sawiin an chhuak phak phaka, Samuela erawh ala awm reng thung.
“I ṭha em? An thusawi kha ngaipawimawh suh, u Sangpuia chuan a phatsan lovang che. Kha mi zân bak kha an inzui lo a nia" a tihchuan ka chhâng lo nangin a ruk chuan ka thaw huai mai “Ka hua a ni, tinge a ex kher" tiin ka phun sapa, nu Chhingite nupa pâwn lamah an awm bawk nen ka in thlahrung lutuk duh lo.
Ka ṭah te chu a chhuak ṭun mai, hmangaihna hi hetiang em em hian a nimaw a thikthu a lo chhiat theih ni. Samuela chuan a âwmah min kuah beta, “Ṭap rawh i duh chuan, nakinah chuan hnem tur che in ka awm tawh miah dâwn lo ania" a tihchuan zawhna nen ka ena.
A lo nui suk mai “Eng nge i sawi awmzia? Ka awm dâwn lo a?" tiin chiang zet chuan ka ena, ka lu ah chûl zauhin min en renga “Police lama luh ka tum deuha, ka piten min tur nasa bawk nen September thla hian ka chhuk anga, November ah emaw ka rawn lêt chauh ang" a tihchuan ka bu nghata, chutia a awm lo tur chu ka lo huphurh lâwk ngei mai.
“A nih chuan i tlin chuan helamah i awm tawh dâwn lo a nimaw?" tisapin ka kûna, a rawn nui leh hak mai “Lungngai suh phone a awm hi, min mamawh hunah ka tlânsan ngai lovang che. I tân ka awm reng dâwn a lawm, tûn ang hian ka khawih thei dâwn lo che tih mai chauh a nia, chak takin awm ang che. Chutih rualin mi thusawi nazawng awih lo la, zawh fiah hmasak phawt a ṭha a nia, i duh em kha. Kei min hnawl phahna a ni a, awlsam taka ṭhen leh hnihne tum suh; ka haw ve phawt ange" tiin a kal chhuak zuia.
A thusawi chu dik ka ti viau mai, u Sangpuia nen chuan in biak ngei chu kan ngai a ni. Mahse engtia bul ṭan tur nge tih hre erawh ka hre hauh lo thung, amah a rawn lan phawt angai ang.
Zanlam hma takah chuan Valpuia te ho chu an rawn lêng ta ngei a, u Sangpuia pawh a rawn tel bawk. A hranpa in ka be lova, a ni erawhin ka che vel reng reng chu hmuh hmaih neih tum lo tih hriat tak hian min en ngur reng mai.
Ka thei thur hawn ṭhenkhat chu eitura siam in kan ri leh le lu a, thak ṭha tek tawka kan siam chu kan si pui hlarh hlarh mai. Rengpuia te phei chu an ha a ṭim bawk nen an ei rei thei meuh lo.
TIHI NI RIH MAI AW. MUTTUI ULE