STORYFB.COM

DARK DESIRES



CHAPTER 12



“Lilia tho tawh rawh le” ka chhûn mu chu ka lo mu tlang leh tawh aniang Dominic-a chuan min rawn sawi nak naka, tûnah rih chuan kan inkar a ṭha rih viau a, kan hmalam hunah erawh enge kan tawn ang tih ka hre tawh bik lova, ngaihtuah lah ka duh heklo.



Tûn hun hi a pawimawh tawh ber in ka hria, peih lo zet chuan ka meng chhuaka, ka mut ala chhuak viau bawk nên ka ham pah buai buai bawka, Dominic-a chuan min rawn pawm tho nawlha, pâwn lam min pan pui nghâl zat bawk.



Nau ka pai bawk nên a theih ang ang chuan min duat ve a, a hmeichhe zui ziah pawh kha a thlah fel hmak bawk. Mipui hmuhah a nupui hual ka nih thu a puang zâr bawk nên ka vah chhuahna apiangah mi duhsak hlawhin dâwrah lut ila biak ṭhat ka hlawm em em bawk nên a lehlamah chuan a nuam ka tiin pawi ka ti ta vak lo bawk.





“Frederick car kha lo va buatsaih ula, i mâm nên hian vah chhuah kan duh ang” tiin maid ho chu chaw ei siam tur chuan a ti zuia, maid ho pawhin min hlau leh ta viaua. Keilahin a hma a ka laka an awm dân avâng khân ka ti rethei lui ve ngata, tirhna tur ka zawng reng ti ila a sual lovang.



Dominic-a lahin engkimah ka lam a ṭang ta bawk nên maid ho chu ka tih ai zawng zawng chu a tih tir leh veka, khawngaih ka tum tawh lêm lo. Dominic-a nêna kan inkar a chhiat lai khân an mi hmuhsitna leh rêl na ka hre bawk nên a hma anga biak ṭhat leh duat kha ka tum tawh lo a ni ber mai.





An chungah ka ṭhat avângin ka mamawh hunah an ṭha lêt ve chuang lova, an chunga ṭhat reng ka duh tawh bik lo.



“Dom, rai kawr hi min lei sa rawh aw, nakinah chuan ka dul a lian tawh anga, ka thawmhnaw ho hi ka ha tâwk lo thuai dawn a nia” tiin thil chu ka ei pah mawlh mawlha, a ni pawh a lo bu nghat nghat mai.



Chawhmeh ka tâna ban har tur deuh chu ka lamah a rawn dah zung zunga, ka chaw ei a tui ta bawk nên thil ei vêl pawh a nuam ta viau mai. “A hma a kan kalna restaurant ah khân kal leh ang aw, ei châk ka ngah lutuk, ttaebokki pawh kha ka ei leh châk, chuan cottage ah khân kan kal leh thei angem? Ka riak leh châk ania, helai chu ka ning” ka ti leh nghal zung zunga.




Min chhâng hman meuh lo, ka sawi tûr hre lutuk chu mak ti zet hian min en ringawta, ka nuih a ti za viau mai. Ka ṭawng tam hman êm bawk ani, a ni erawh an ṭawng chhuak mai mai ngai lova, kan pahnih chauha kan awm lai erawh chuan thu a sawi ve nasa ṭhin hle bawk.




“I ei châk viau chuan kan kal dâwn a nia, chuan cottage ah chuan riah i duh chuan i thawmhnaw siam la, kâr khat vêl kan hahchawl thei ang” a tihchuan phur zet hian ka au hliaia, ka nuih ver ver bawk, ka hlim lutuk tlat. Helai chu thâwm bengchheng a tam bawk si, cottage nuam leh reh raih, ramsa te hmuh theiha awm kha ka châk a ni ber mai.




“Ka lâwm e, ka hmangaih che” tiin phûr zet chuan ka chaw ei lai thawhsanin ka room lam ka pana, inah ka in khung tam bawk nên pâwnlam boruak hip ka châk a ni ber mai. Thawmhnaw hak nuam tur deuh chu thlangin ka nui leh var var ṭhin, a chângin ka chungah han sual ṭhin viau mahsela a chânga min duat leh em em ṭhinna hian ka awm ati nuam leh em em zel.




Bag ah chuan in khung khawmin inhnuai lamah chuan ka hnûk thla a, Fresher zâwk chuan min lo lâksak nghal vat mai. Ka chêt hi an phal vak lova, ka chetsual an hlau a ni ber mai, ka nau pai a lian ve ṭan tawha, ka dulah pawh a lang ve ât tawh bawk nên Dominic-a hian min dimdawi hle ringawt.




“I hman em ni?” Dominic-an a lo tihchuan en chho in ka bu nghata, suitcase chu ka kâwk zauh bawk. “Engtikah nge kan chhuah ang, kal vat ang aw. Pâwn boruak hip ka châk tawh lutuk, khawpui chhûng hi ka ning tawh” tiin a bula ṭhu tura min tih avang chuan ka pan pheia, a bulah chuan ka ṭhu ve mai bawk.



A dârah min lo kuai beiin a nui suk suka, “I phûr tawh viau chuan kan chhuak nghâl mai dawn a nia, i restaurant sawi kha chu tlaiah dinner ei nân kan hmang dâwn a nia aw, chumi hma chu i insûm rih angai ang” tiin ka chalah chuan a rawn fâwp zauha, ka nui hak hak mai.




“Um tûnah kal nghal pawh ni ila a pawilo, chuan Dom, uite duhawm tâwk ka duh e. Inah keimah in ka awm ṭhin sia, awmpui tur ka duha, min lei rawh aw” ka ti lehnghâl zata, ui neih ka châkna a rei tawha. Ka u nên kha chuan ka ui duh ang kha an to theih êm avângin kan lei thei lova, tûnah erawh Dominic-a chu in lei tir ka duh.




A rem ti ngei bawk dâwn tih ka hria “Eng ui nge i duha?” a rawn ti ta reng bawka, phûr zet chuan ka en nghal kiau mai. “Golden retriever hi ka duha, an duhawm ka tia, ka vulh ve châk thei lutuk. Mahse sum kan khâwl angai sia, kan lei thei ngai lova” ka ti sapa, ka u khân min lei kha châk viau ṭhin mahse kan zirna man tur nên khân kan buai hle ṭhin a nih kha.



“Kan lei dâwn a nia, pahnih nge i duh pakhat” a tihchuan chhân mai dân tur ka hrelova, ka ngawi rauh rauh mai. Chutih lai chuan pâwn lamah thâwm rawn awmin Frederick-a chu a rawn lang zuia, engthil nge thleng dâwn ni. Dominic-a nên chuan lo en ran in kan bul a rawn thlen rual chuan ka pa a rawn kal thu a sawi ta mai.



Engthil nge a rawn tih dâwn, Dominic-a nên kan ṭhat leh hnu hian min rawn biak a tum fo a, Dominic-a hnenah an company nêna in thlunzawm tura ngen turin min rawn la ti ziah zuia, a zak lo hi ka ti tak tak.



Kei leh ka u min ngaihtuah hauh lovin sum duh avângin a chhuaka, tûnah ka bialpa hetiang a nih tâkah min rawn hre thar leh te hi ka haw bawk. A hming ka hriat rual chuan ka ner nghal saka, Dominic-a pawh chuan ka pa laka ka rilru put hmang chu a hre chiang viau ang chu.



“Enge Patrick Ray chuan rawn tih a tum?” a lo ti bul nghuta, kei erawh ka la ngawi kar reng. Ka pa zak theilo lutuk hi keimah ka lo zak zâwk ṭhin, inthlahrunna nei miah lova thu min rawn pe ngam te kha a huaisen ka ti zâwk.



“Mam nên hian hmuh cheu a duh a nih hmêl” Frederick-an a rawn tih leh tâkah chuan Dominic-a chuan min rawn ni âwm tak hian min rawn en vuta, kei erawh ka lo ner sawk thung.



“Zahna hi a kawl ve hlawl lo a nih hi, hetiang mi hi engtin nge an awm theih zâwk? Engmah lo sawi pui hauh suh, thawhpui che a tum tih hriat reng. Ka u leh kei, kan chhûngkaw nun tichhe vek tu hi ka tân eng tihna mah a nilo a nia” ka lo ti tawi taka, ka ngaihdân dik tak a ni bawk.





A hrin ngei te nimah ila min hmangaihna a neilo, ka u damlai pawh khân min rawn hmuh emaw sum lam pawh in min rawn thawn a nei ngai hek lo. Tûnah ka lo biak ṭhat na tur a awm hek lo, ka tân chuan ka nu leh ka u chiah kha ka chhûngkaw neih chhun an ni.




“Rawn luh tir rawh“ Dominic-a chuan a ti nghuta, Frederick-a pawh chu a chhuak vat bawk, ka pa chu a rawn lang har lo. A rawn luh rual chuan inchhûng chu a enkual ruaia, hmu ngai lo te pawh a ang dâwn a lawm, tûnah chuan min rawn hmu ve ta nge a ding zui chata.




Kei erawhin Dominic-a phên aṭangin rum zet hian ka lo en thung. Ka nu thihchhan kha a mah avâng hi ka tilo theilo, ka nu nun kha hrehawm na hlir hian a siamsaka, hlim taka nuih kha a nei khât khawp mai. Ka u leh kei min en a ka nu thi tur mittui tla zawih zawih te kha nimin ang mai khân ka la hria a, ka mitthla ah a châm tlat bawk.




In seh ruh nghekin Dominic-a bân chu ka hmer ngawt ngawta, a ni erawhin thlamuang turin min lo ti thung. Ka pa chu a rawn hnai zêla, kan hma ah a rawn din rual chuan Dominic-a chuan a en ta chauh bawk.




“Enge i rawn tih dâwn?" nelawm vak loh hian Dominic-a chuan a lo ti nghuta, keipawh ka pa lakah kher kher hi chuan nêm taka awm ka tum lo, ka nun min tihchhiat sak tu ka tilo theiloa, ka la haw reng bawk.



“In biak ka duha, ka fanu nên hian in innei hnai tih pawh ka hria a, keini lam pawh kan lo in ring tawh viau a nia. Chutih rual erawhin kan fanu hi i nei duh a nihchuan kan thawh hi ve a ngaiin ka hria” a rawn ti chu zak lo ti zet hian ka lo nui chhuaka, ka nuih a za tak tak bawk..




A va han zak lo em em ve le, engtin nge khatiang thu kha a la rawn sawi ngam zâwk ni. Khawvel hi a ngam bik riau hian ka hria, ka pa min rawn en chu lo nuih sawng in “A zah te hi zak ve rawh, nanga fa kha ka nilo a, ka ni ngai hek lovang. Ka nu dam laite ka u awm laia baih vai taka kan awm lai khân min ṭanpui tur in kan ngên che a nih kha, mahse nang chuan min hawisan in i fate kan nih loh thu kha i sawi a nilom ni? Engvanga tûna i fa ka nih thu rawn sawi nge i nih? I tello pawh hian pasal chu ka nei thei lutuk ania” ka lo ti hmaka.



Dominic-a ṭawng hun pawh ka nghâk zo tawh lo a ni ber mai, ka pa chu ka haw hluah hluaha. Ka ngaihdam theih lah ka ring hek lo, kha chen min ngaihthah tawha, tûnah Dominic-a vâng ringawta min rawn ngaihven chu ka haw hluah hluah bawk.




“Ka nupui tur chungchângah chuan thuneihna neiin i in hre deuh nge?” tiin Dominic-a chu a nui ro haka, a ni pawhin ka pa hi min huat pui hle tih ka hria. Ka ngaihdam chuan a ngai dam thei mai anga, mahsela ka ngaidam thei tlat lo.



“A pa ka nihna angin keimah ngeiin inneihna a ka hruai angai tih i hria ang chu” a rawn ti leh chu ka lo nui leh vaka, zak lo hi ka ti ngawih ngawih mai. Ka inhum ruh fan fan bawka, Dominic-a pawh a nui suk mai, ka pa chu rum deuh tak hian ka ena



“I inrawlhna tur a awm hauh lo, nang kher hi chu maichâm hma a min hruai turin ka beisei lo che. I duh leh i fanu kha i hruai zâwk dawn a nia, Dom chhuah tir rawh, a ni hian eng mah a phulo” ka ti hmaka, ka haw lutuk tlat.




Zak lo ka ti hluah hluah bawk, theih se chuan ka that duh hial mai thei. Mahsela ka pa a nihna avângin ka zah ve mai a ni, ka nu tawrhna ka ngaihtuah chhuah châng phei chuan amah huatna hlirin ka khat bawk a, ka ngaidam theilo a ni ber mai.



“Mr Ray nang nêna thawh dun ka duh hauhlo, ka nupui hual sawi ang khân a hmu duh lo che a nih hmêl, a niin a pa ah a pawm miau lo che a, maichâm hmaah pawh i hruai kher ngai lovin a rawn kal thei lutuk ang” tiin a nui suk suk mai.



Ka pa chu a ngai nêp hle tih pawh ka hria, ka pa chuan min rawn enin “Min pui teh, i pa hian Company hi ka chân zel a nia, min puih chuan a hma ang khân hlim takin kan awm leh thei ang” a rawn ti leha, chu chuan ka thin a tirim zual.



“Chhuak rawh, ka hmu duh tawh lo che. I company a tlachhia emaw ka ngai pawimawh lo, ka nu chunga i chêt dân tenawm tak avângin hremna tawrh kha i phu hluah hluah” ti tuarin kawngka lam chu ka kâwk a, ka kalsawn nghal daih bawk. A hmêl hmuh pawh hi ka tui tawh heklo.

ZAWMNA



Dominic-a min rawn pan lai te chuan thinrim zet hian ka lo la awma, ka pa zak theilo lutuk leh Dominic-a nên kan inkâr avânga remchâng rawn lâk a tum kha ka zak takzet bawk. Engtiang pawhin hua in hmu duh lo mah ila ka pa a nihna a bo miau siloa, Dominic-a lakah pawh ka inthlahrung zâwk.




“I ṭha em?“ min rawn kuah paha a tihchuan ka bu nghata, a âwmah chuan ka bei nghâl than bawk. A rim chu hip vang vangin ka thaw chhuak zui suai suaia, “Ka pa kha engmah tihsak a ngai lo ania aw” tiin za lo tak chuan ka ṭhen saka.




“In chanchin hi min hrilh teh, Lilia engtiang chiaha nasa in nge i tawrh hi hriat ka duh” a tihchuan ka nui leh maia, a âwm ah chuan ka hmai chu ka nawr vang vang bawk. “Ka tuar vak lo, ka nu kha nu fel tak a nia, ka pa nên khân a hma chuan an hlim thei lutuk, keini unau pawh ka nu dam ṭhat lai kha chuan kan hlim ve ṭhin, mahse ka nu a han na chho a, ka pa chu a dang tial tiala, ka nu leh keini tak ngial pawh min ngaihsak tawhlo, a hnuah ngaihzâwng neiin fa hial an neih tawh thu kan hre zuia” tiin thawk ka la haka.




Ka ngaihtuah lêt ringawt pawh hian ka la thinrim ṭûn a, ka na ngawih ngawih bawk. “Ka rualpui deuh thaw fa a lo nei tihna a nihchu, a awmzia chu a tir tê aṭangin ka nu kha a lo kawp tawha, chu pawh rosum vângin. Ka nuhrawn timai ila an ni khân tûn ang hian Company an neia, unau pianpui dang a neih loh avângin an company chu a enkawl tur a ni a, ka pa in a neih chhan pawh ani. Ka nu nên chuan an inṭhen a, chunu chu a zui ta bawka, a duh ang ngeiin keini rethei taka kan awm laiin nun nuam tak a neia” Dominic-a chu ka en chhoa.




Mitmeng dam dup hian min lo en ve renga, chu chuan min ti thlamuang viau bawk. “Vawikhat chu ka nu dam loh avângin pawisa va dil tumin ka u nên kan va kala, ka nu kha a cancer a ka pa in a phatsan avâng pawh khân a rilru a na zuala, a natna nên khân a chhe chak lutuka, ka u nên khân kan hlauthâwng bawk nên ka pa chu min pui turin kan va ngên a” ka nui leh haka.




Ka inhum ruh ṭalh ṭalh bawk, khatih laia ka pa min lo tihdân ka ngaihtuah leta, huatna leh thinrimna chuan min rawn tuam leh mup mup mai. “Sawi zel rawh” a lo tih dam dup avâng chuan thâwk ka han la leh hluaia.




“Chutah chuan keini unau leh ka nu pawh kha hmangaihna leh khawngaihna chhete pawh a lo neilo tih kan hre chhuak ta a ni, pawisa kan va dil chuan engtin nge min tih i hre duh em? A ni enkawl nân sum ka neilo, a duh leh a mahin thawk chhuak mai rawh se, min rawn hmu tawh hlek suh u, ka fate pawh in nilo” a ti a nih chu!




Ka ngawi data, sawi mai tur ka hrelo. Ka nu hmêl te, ka u nên kan lêt leh a ka pa min tih dân avânga a rilru na lutuk leh kan hmuha na lo ang taka lan a tum lui hmêl te chu mitthla ah a rawn lang nawn awn awn maia, ka pa chu ka haw thar leh viau bawk. A ni hi ka nu khân tawng lo se chuan a thih ka la ring lo.




Dominic-a chuan nghet deuhin min kuaha “Ka hua a ni, ka haw lutuk. Ka nu thih dâwn a kan unau min ngaihtuah lutuk tih hriat taka mittui nên min en ṭawk ṭawk laite kha ka ngaihtuah lêt châng apiang hian ka pa huatna in ka khat leh zual ṭhin, ka nu khân min kalsan kha a hreh a sin. Kha tih lai khân ka u kha kum 15 chauh a la nia, kei kum 12, kan rethei a sin, kan ṭhenawm te puihna zârah kan in hralhin keini chu ka nu ṭhiannu in min enkawl zuia, ka u kha a theih ang angin a inhlawh ve ṭhin a, ka mamawh min lei kha a tum ve tlat zela” tiin ka mittui chu ka hru leh zauha.




Ka u ka ngai takzet a, ka bulah awm se ka ti hle bawk. “Ka nu ṭhiannu inah pawh awm reilo in a faten min ngeih theilo bawk nên ka u khân engpawh huamin min chhuahpuia, in luah tur tlâwm deuh kan zawnga, vânneihthlâk takin kan hmu hlauha, mahse chu pawh keini unau tân chuan a tam lam mah a ni, hmun zimte mai mi pakhat tân pawha chênna atân tê mah tur kha kan luah ve a, nitin khân a ṭul ang angah inhlawhin mi pheikhawk hru leh motor sil te khân kan inhlawh ṭhin a, kan hah viau nâng in kan thawh chhuah kan hmuh kha chuan kan hlim ve thei lutuk” ka ti leh sapa.




Nunhlui chu mitthla ah a rawn lang uar uar bawk nên hnuk a ulh lo theilo, “Ka u anga min hmangaihtu kha an awm leh tawh hauh lovang, ka ngai a ni Dominic” tiin ka ṭap zui leh dar dara, nghet zetin min kuah bâk chu min tihdân tur vak a hre bik lo aniang a ngawi reng ringawt.




“Ka chanchin i hre ve duh em?” a rawn tihsup chuan ka en chho ha a, ngun thlûk zet hian min lo en ve reng bawk “Aw min hrilh rawh” ka lo ti ve maia, a nui nghal suk mai.




“I chanchin deuh kha a ni, nu leh pa ṭha vak lo hnuai aṭangin kan seiliana, a tîrah chuan hetiang dinhmunah hian ka din ka ring ngailo. Mahsela pâwl pakhat zawmin an ni a zârah tûnah chuan hetiang dinhmun hi ka thleng ta a ni, ka nu leh pa khân ka nau nên khan min ngaihsak ngai hauh lova, kan awm awm khân min ngaihthah a ni ber mai, chuvâng ania ka nau pawh hi theih tâwpa ka hum chhan, keimahin hna ka thawka. Ka theih tâwp khân ka châwm ve ṭhin, ka nu leh pa kha a rualin kan chân a, ka tuar lo ka tih chuan dâwt a ni ngei ang, ka nu leh pa an awm tâk lohah chuan ka nau kha ka kutah a tla tih ka hria a, hetiang mi thah te ka chin chhoh phahna a ni bawk, mahse ka in chhir reng rêng lo, ka pawi sawilo tute ka khawih hmasa ngai lova, ka pawi sawite erawh ka chhuah ngailo, mahse nang chu i dang lam a ni” a tihchuan ka ngaithla kar reng ringawt.




“Ka nau nên in nih lai reng pawh khân ka mit i la tawha, mahsela ka nau ngaihzâwng i nih avâng khân chhuh sak kha ka duh bik lova, hmeichhia ka kawp nasat phaha” a tihchuan ka âng phiauin ka en ringawta, a hma aṭang daih tawhin min lo duh thu a sawi chuan min ti ham haih lek lek mai.





Alfred nên kan in ngaihzâwn lai khân ka hmu khât hle ania, mahse a ni chuan min lo duh daih tawh zawk tihna a nihchu! Mak ti a ka en chu min nuihin ka hmuiah chuan a rawn fâwp vang vanga “Mahni nau kawppuite lo duh tlat kha ka inthiam lo a, keimah pawh ka in khap ṭhin rêng a sin, mahse Alfred nên in inṭhen khân ka lâwm riaua, mahsela ka nau khân a lo la thutak ta si a, a in sehhlum chhanah khân ka puh lo theilo che a, midang chu nila ka that nghâl ang che, mahse chutiang thlang lovin ka hmangaih zui ta zâwk che a nih hi” a tihchuan ka chhâng mailo.




Ka ngawi rauh rauh renga, a thusawi chu dâwt a ni dâwn lo tih erawh ka hre chiang viau thung, ka thaw ham hama. “Alfred khân min kawp ka tih tawh kha, min kawp avânga ṭhen ka ni bawk, khatiangin a inthat duh ang tih kha ka ring bik lo, mahsela ka rin loh zâwngin a che khân mak min tih tir ve tho a sin, ka u leh ka ṭhianṭha ber in an tawrh phah bawka” tiin ka inpet ruh leh ṭeuh a.




Ka u that tu ngei ka hmangaih tih ka hriatna hian mahni min inhuat tir zual bawk, a rûka ka thil tih erawh chuan ka awm a ti nuam miah lo thung. Dominic-a hian a hriat chhuah hunah chuan min hmangaihna pawh hi a reh vek thei tih ka hria, ka tisual angem ka hrelo.




“Lilia hrilh tur che ka neia” a tihchuan ka en leh vata, a mitah chuan eng emaw ngaihtuah a nei tih ka hre thei. Enge tih hriat nân ka en ha bawk.



“Enge min hrilh i duh? Thil pawi lam anilo ang tiraw?” ka tihlai chuan a nui leh maia, ka biangah rawn dawmin “Min kalsan dâwn lo a ni tih sawi phawt la“ a ti leh riha, eng tak chu ni ang maw hetianga a awm tlat chhan hi ka hrelo, eng thil nge min hrilh a duh ni ang.




Rin dân ka nei thiamloa, a i lah a thutak nasa mai bawk si nên ka en reng ringawt “Sawi phawt la, khawiah mah ka kal dawn lo, kalna tur pawh ka neih loh hi ka tân chuan ka neih chhun i ni tawh a lawm” ka tileha, ka ti tak tak bawk. Khawiah mah kalna tur ka nei hauhlo, chu chu amah Dominic-a ngei pawh hian a hre chiang ang.



“I unaupa kha a la thilo, i ṭhiannu pawh” a tihchuan ka taksa chu a nghing dawt mai. Tûna ka thu hriat hi enge a awmzia? Ka mumang nge ni anga ka suangtuahna mai mai zâwk, Dominic-a ka en chu mumang mai ni tur atân chuan a rinawm bawk siloh, ka lung a phu dawt dawta.





Âwihlohna hian ka khat a ni ber mai “Eng....eng..maw..i sawi?” ka ti bah naka, ka aw te chu a khûr thei hial mai. Tûna ka thu hriat hian min ti danglam hneh lutuk tlat.



“I u leh i ṭhiannu chu an la dam, ka thukru mai mai a lawm, i hmuh duh chuan ka hmuh tir ang che. Mahsela tûnah nilo, tûnah chuan tumah in him rihlo” a tih leh tâkah chuan ka mumang mai mai chu a nilo tih ka hre chiang.




Dominic-a chu ka ena, ka ṭap chhuak nghal hak mai. Ka u a thilo tih ka hriat chhuahna chuan min ti hlimin hlimna a vâng zâwk chuan ka mittui a luang zung zunga, Dominic-a chu ka kuah vat bawk.




“I ti fiam lo tiraw? An la dam tak tak em? Ka hmu thei ang tiraw” ka tinghal sek seka, ka za chung a ni ber tawh. Chutiang thu chu hriat ka lo beisei loh lam a ni, an thi tawh emaw ka tihchu an lo la dam reng a maw? Ka âwih theilo, Dominic-a chu ka en leh ṭhin, dâwt mai mai chu min hrilh lo tih ka hria.




“Ka fiamthu lo, mahse tûnah rihchuan i hmu theilo ang ka tih tawh kha, thah tuma veh reng tu cheu in nei tawh, i pa tih tir kha a ni bawk ang. I pa khân engkim a hre sa vek, i unaupa la dam thu pawh hi a hre bawk ang” a tihchuan ka mak tihna a zual, ka pa chuan hetiang thilah hian enge inrawlhna a neih ang?




Ka bo map mai “Engvanga min thah duh nge a nih? Nichin te kha chuan” ka tihlai chuan ka hmuiah chuan a kut a rawn dah data “Kei min do a duh a lawm, i laka ka rilru put hmang pawh a hria, chu chu kei min tihnatnan hman ngei a tum bawk, chuvang chuan fimkhur taka kan awm a ṭul rih. Ka hlatah ka awm tir rih dawn lo che a, nangpawhin dawhthei takin min nghâk turin ka duh che, i u chu nakinah keimah ngeiin ka hmuhpui ang che” a tihleh chuan ka ṭah nuih haka, ka hlim em a sin




Tûnah chuan an thi emaw ka tih te kha an la dam tih ka hriatna chuan min ti lâwm tâwk a, Dominic-a thu chu zawm ngei a ngai tih pawh ka hria.




READER TE IN NGÊN LAWK ULA, DUHLAI ZORINPUIA TIHCHU NOONA CHANNEL AH CHHIAR ṬAN A NI A, KHAWNGAIHIN LIKE LEH COMMENT TE PE IN, MIN LO VA VIEW SAK VE ṬHEUH TURIN KAN IN NGÊN A, MIN LO PUI HRAM HRAM DAWN ANIA AW