Thinlung BY Kimkimi tlau (Completed)

[ngaia]

" U Mafela'n a nghak tho che sia, kan kalsan mai che anihkha " Apuii chuan ati a, " Hetah hian lo ṭhu rawh u " a tih zawm lar lar bawk, " Mafel, hetah hian lo ṭhu rawh " ti a an sawm chuan " Kimi te bulah hian kalo ṭhu ang " ati dut a, ṭullo ka va ti ber tak. 'Lo ṭhu suh ' tih chi ni heklo le, ka bulah chuan alo ṭhu khup a, Angaihi lama ka tawlhphei hret rualin minlo hnaih vezel lehnghal a, deh loh hram ka duh tehlul nen, kan ṭhutna ah hian pali lai kan ṭhut avangin a chep ve tho si a, thinrim viau mahila kan in hnim hnai khawp mai.

" Maruat, kan kim tawh reng asin ṭan tawh maila " An tih chuan U Maruata chu alo ding vat a, kan thawm pawh a dai veta e. bible chhiar a ṭawngṭaina aneih hnuah, lilam tur kan kenkhawm te chu a titu tur ruatin an lilam leh rih a, thawm kan ngah leh tawh hlawm khawp mai.

" Thingpui saw sem pui ve ila " Angaihi'n atih chuan kabu nghat a, thawh mai ka tum chu U Mafela'n ka bana a chelh avangin ka tho thei mailo a, " Min thlah teh " midang hriat hlau taka katih chuan " Khawnge i kal dawn" ati sup a, hepa hi ben hrep ka chak lutuk. " Thingpui ka sempui dawn, khaw maw " ti hlakin ka kut chu ka pawt sawka, minla thlah duh ṭhaklo, " Hmun dangah ṭhut i tum vel ange, kan mualpho animai " athusawi awih lo lutuka ka melh ngawt ngawt laiin ani erawh akiai suk a, ka kut pawh chu a thlah tawh.

Angaihi nen chuan in neitunu chu thingpui kan sempui a, "Kimi te ṭhian dun hi chuan nachang hi an hria ania, an hmelṭha dun si " ti a minlo fak tawk an awm a, ka nuih vur vur ringawt, Hmaichhana in fak chiam te hi an ṭawngkam ṭha mai mai ani tih hre mahila ka dawngsawng thiam ṭhinlo a, nuam kati ngailo, fakna thu chu dawnsawn anuam viau na in min faklo tawp mahse, pawi kati chuanglo.

Apuii te ṭhutna lam ka sem chuan min hmulo der nge pawh ka hrelo Nurse nu nen chuan phone bih in anlo kun dun ngar ngara, " Apui, thingpui " ka tih chuan lo hawi chhuak in min nuih sawnga. Henu hi chu mi pakhat hi ava ni ve chiang tak. " In van fel ve " Ti a akut alo lek chhuak chuan ka tray ken lai chu a vai fuh a, ka kut thip zawk leh sa nghal huam avang chuan insum hman lovin " A sa " ka ti ṭhat a, Tray chu ka paih teuh lutuk ringawt, thingpui chu chhuatah a far tluk tluk a, ka zah leh thinrimna chu a in zat viau ang. 'Awi! Avan pawi tak, Kim i ṭha em? ' Apuii'n ati chula chhan pawh ka chhanglo, " Kim, hetah lokal rawh" Angaihi'n atih lai chuan, Ka tray kenlai chu U Mafela'n min laksak in "Hetah lokal teh " tih leh min kaihsawn arual a, ka lawm lutuk a U Mafela chu kuah chuk chuk mai ka duh.

" Kimkim, in thiamlo suh aw, i kut kha ana em? " U Hriati (In neitunu) chuan alo ti a, U Mafela'n tui vawtin ka kut min sil sak mek ani, " A zialo e, ka ti baw ta vek sia " kalo ti ve sep a, nuamlo kati tak tak, No te kha ti keh ta ila awi! Ka tlan haw daih duh ang. " Apawilo ka tihchu, chet sual chang te chu a awm tur alawm, i kut kha ana zawk viau ang a " ati barh barha, tlem chuan ka awm anuam ta deuh.

" Na lo ve, ka vun hian thil sa hi a haw vaklo" ka tih chuan hahdam huai hmel hi a pu a, Angaihi pawh chhuat nawhna nen choka ah chuan alo lut ve mek bawka, "Kurtai hi kava chhawp lawk ang e " tiin U Hriati chu a kalsawn a. "A tawk tawh ang " ka kut tih chet zeuh paha ka tih chuan "Awm ṭha mai maiteh " U Mafela chuan ati hluka, ka ner nang mai. " Vanhlupuii saw kala rek ang mawle, a tilui anih loh pawn, pawi ati chuang miah lovang " Angaihi chuan ati hlak hlaka, ' Dik chiah ' tih chak viau mahila U Mafela a awm ve kur si a, ka chhang talo ringawt.

Ka kut chu a sen ṭan a, thingpui kha a so hlim chiah ani bawk nen a awm vereng, " Alowvera kan nei asin " U Hriati'n atih chuan ka chhan hma in " Hnawih ila apawi lovang " U Mafela'n alo ti a, U Hriat kalsawn hnuah "In ah ka hnawih ve thei reng alawm, tihbuai angailo " kati hlara, min buaipui chiam chu ka duh miahlo, mite hmuh atan amawi loh bakah alakah hian kala lungawilo hrim hrim.


Alowvera kan hnawih hnuah chuan kan ṭhutna lam kan pan veleh ta a, U Mafela'n hliampui tuar ang maia min sawngbawl vang nge 'A na viau em?' ' a hreawm viau ang a' anlo ti sap sap hlawm a. Chuti lutuka na ani silo a, awm anti niamlo zawk daih. A nat loh thu leh Alowvera ka hnawih thu chu ka sawia, Apuii te lam chu ka hawi hram bawk.

An pahnih chuan min lo en ve kara, Angaihi sawi ang tak takin inthiamlo hmel a pu eih lo a, chungte chuan atihluih anih min rin tir tulh tulh a, ka rinhlelna erawh ka thinrim lutuk vang pawh ani maithei. Ka kut chuan minti hreawm lemlo a, ka vannei a thil sa hi ka vun hian a ngam ve hrim hrim ka tih kha. Thingpui kan in lai chuan beisei loh deuhin VC Information mike aṭang chuan chhiat tawh thu anlo puanga, thawm chu reh nghal dukin kan phawk hra hlawm a.

" Ava zialo ve aw, in laklawh viau mahila Maruat tawpna siam ta mai che, ṭawngṭai zawh ah kan in chhunzawm leh anga, mitthi in lam kan pan dawn nia, muanchan chi ani lovang " Kan ṬKP president U Ruala chuan ati a, kan pawmpui hlawm khawp mai.


Mitthi chu Putar kum78 vel niin Angaihi te nen an in hlat lova, a hrisel loh sa bakah thaw hah nei ani bawk nen tunlai khaw awmdan nuam bawk silo chu atuar viau ani awm e. Chhum a zin chiai chiai te, khua adur khup khup te hian Thaw hah nei ho hi an buai ve ṭhin a, tunlai boruak lah ruahsur tur in ṭham kual reng ani bawk nen abuai thut a, Damdawiin pawh an kalpui hmanlo anih hmel.


Mitthi in lamah chuan kan inzui dam dam a, kan thlen ve chuan anlo awm nual tawh, mi khua te chu ka hrelo a; Mahse, kan khua ah erawh Chhiat ni hian kan la in ṭawiawm ṭha a, ṭhatni ai mahin chhiat ni hian khawtlang kan in lungrual zual bik ṭhin. Tumah sawm leh 'Kal ve ila' tih ṭawng ṭawng ngai kan awm velo a, kan tih tur ṭheuh anih hria in Mitthi in lam hi kan pan zung zung zela, tumah in phut bik kan awm ngailo bawk.

Kan YMA hruaitute lah a che buai buaiah an ṭanga, ṭhu chunga kawk kual mai lovin an mahni ngei an che ve zung zunga, chutianga hruaitute an chet buai kara members te zawk lo ṭhut chu tuman kan duh biklo a, tih tur hi a zawnin kan zawng ti ila a suallo ber ang. hetiang hunah hian intirh luih ngaiin tumah kan khawsa ngailo a; khaw dang aṭanga mitthi ral a lokal ṭhinte pawh hian min fak ve ṭhin a, ' In khua chu ṭhalai in in lungrual emai, ahunah in che sap sap hlawm a, hmuh in nuam' anti fo a, a hu ho a fakna dawn chu nuam kati ve ṭhin.

Hmeichhe tan hi chuan tih tur em em hi a awmlo a, an bungrua thiar pui lah mipa lamin anti thei a, hmun phiah lah nise an tei suau suau avangin arem chiah bawk silo a, lai deuhin ka ding mawl leh tawp zel. Rilru na hma leh no deuh kani a, ṭap ri hriatreng te chu hreawm kati ṭhin lutuk a, ka khawngaih thei bawk si ka mittui atla ve ziah zel.

YMA bench anlo thiar luh chuan hmeichhe lamin kanlo hrufai zung zung a, aṭhenin inchhunga arem lai lai chu anlo phiat ve bawk a, Nu Leh Pa lam pawh lo pung khawm vezel in, In chu a lian vaklo bawka an khat titih der tawh. Mitthi Pu Hranga nupui Pi Zopuii chu a khawngaihthlak reuh khawpa, a pasal ruang chu bawh in a ṭap kerh lerh reng a, a tar ve tawh si a, a aw rawl chu a chhuah ṭha vak thei tawhlo aniang akhawngaihthlak tak tak ani. Ṭhutphah hruk fai pah chuan ka en zeuh zeuh a, ka mittui a hnai veleh kuar tawh.


An Zai ṭan dawnah chuan kan inzui chhuak hlawm a, nakinah Tlaivar turin kan kal leh hlawm ang, pawna kan chhuah chuan ruah alo hmi seng seng a, anuamlo tak tak ani. Street light bulah chuan mipa ho chu anlo ding khawm laih a, U Mafela pawh alangsar leh bik khawp mai; Ka mitah hian a langsar bik nge alangsar ve hrim hrim tih erawh Angaihi'n min chhang thei ang chu.


" Khaw nawm lohzia chu aw, Ruahsur hun pawh ani tawh pawn ka hre silo a " kan zinga senior ber Ute-i chuan ati nang nanga, midang pawn kanlo thlawp khawp mai. " U Te, kal hma vaklo ang u aw " Angaihi'n atih chuan "Tlai deuha kal te chu a mawi hleinem, in ah engmah kan ti tak tak chuanglo a, keichu tlai deuha kal hi amawi vaklo kati " U Tei'n a chhan hma hmain Apuii chuan alo ti zung zung a, " Tlaivar dawn chuan kal hma vak angai hleinem, dar10 hnulamah daih te kal ila kantan pawh tlaivar azia ve deuh dawna, dar10 vel te chu Nu ho pawh an meng ve thei lutuk, kan kal hma chuan nuamlo anti a an hawng daih zela. Dar9 vel aṭanga ṭhut nghal chawrh chawrh chu ahreawm ve alawm " U Tei chuan ati a, Apuii pawn engmah asawi zawm tawhlo, U Tei chu ni kherlo se a chhanglet leh tho ang, Ka hriat tham leka ring in 'Vanhlupuii Chawh zia saw ' Angaihi'n alo ti sur sur a, kan ṭhiandun chuan kan nui dun vur vur mai.

" In haw rih dawn maw " an din khawm laihna kan kal pelh dawnah mipa ho chuan anlo ti a, minlo betu chu tu ber nge ka hrelo. Kan ṭhiante an din avangin kan ding ve a, U Mafela lam kava hawi chuan kan lam alo pan mek tih kahmu a, ka in sangmar nghal ṭeuh mai "Changtupa" Angaihi'n alo ti hman hrama aṭawng ring deuh bawk nen abanah beng datin " I ṭawng ring " kati hlar a, anui mai mai lehnghal.

" Kal ila " U Mafela'n ka dara lo chelh pahin ati a, minti phu lek lek ani. kan lamah alo kal tih kha hmu tho mahila min ṭhawng tho, " Kan ṭhiante " kati sep a, "An lokal mai dawn alawm " Atih chuan ka zui duh biklo, keimah chauhin ka kal lova, chutia ngaihzawngte awm tak avanga ṭhiante kalsan daih chu ka duhlo hrim hrim.

Kan ding reilo a, kan kal leh hnuah chuan hmeichhia deuh vek kanni bawk nen kan thawm aring a, kan thusawi duhzawng lah a ho si, ṭawng kan in chuh nak nak a, kan nuih rin deuh chang chuan U Tei'n min khap vat ṭhin a. U Mafela kal ve chu an hmulo nge an thilsawi chu mipa awm laia sawi chi ani pawn ka hrelo a, kalo ip leh chawih chawih zel. U Mafela chu ka en leh zeuh zela ngawi ngulin hmalam en chuan akal a, kan bula awm chu nuamlo ati viau maithei ani.


Mitthi in aṭangin Angaihi te in hi ahla lo a, kan thleng harlo reng bawka, " ding rih ang " atih tlat avangin kan ṭhiandangte chu " Minva kalsan rawh u " kati a, Angaihi te varanda light chuan min chhun chiang ta aniang "Ehe, Mafela chu ilo kal vereng alaw " U Ruati'n ati hlut a, a awm ve tih an hriat ka ringlo kha ania ka ring suallo khawp mai. "Anih hi " Tih te chauhin a chhanga, Nghawk zeuh mahila adar min kan khum zeuha aduhtawk der, "I awm ve tih kan hre reng reng hleinem " anti hluta anthil sawi kha a ho in kan nawi si a bakah, U Mafela chhelo an tih thu kha pakhatin asawi tel zeuh a, tu sawi ber nge hrelo mahila asawitu chuan a inhre chiang dawna, alo sawi phur pui tute nen khan an zak ve viau maithei ani.


" In hnungah alawm kalo kal, in thusawi ka hre theilo " U Mafela chuan ati nghuta, ka nghawk leh zeuh tawh. Ṭawngkam dam deuhte pawh ahmang ve theilo em mawni, " Anih kan kalsan ang che u " Tiin min kalsan a, Ahnunglama tleirawl panga te chu an in sik phei nawk nawk mai.

" Ṭawng bul hmuk hmuk ṭhin mahta che " Kan ṭawng an hre pha tawhlo ang tih awm ah U Mafela chu ka hau leh ta nge nge a, ka melh rum viau bawk. " Ka ṭawng bullo, ka ṭawngdan ve hrim hrim " inla pawisawi lo fe a atih bul bul chuan " Midang tan dawnsawn anuam lo alawm, khatin an ṭawng hmuk hmuk ngailo " ka ti leh hlara, ani erawh anui suk duh chauh a, hepa hi ka be peih tawhlo e a.

" Khata din reng kha intum emni? In chhungah lo inhau rawh u " Angaihi'n a tih chuan " Kan kal zawk ang " Ati leh lawi a, hepa hian eng nge ahriat le? " I duh duh danin minti kawi suh aw " Ka tih chuan " Kal ila " ati a, sual chhuahin ṭan ka khawh tlat dawn mawni. " Nia, in kaldawn chuan kal tawh rawh u, tlaivar tur chuan Dar9;30 velah kal ang u aw, Dar10 kha chu atlai mah mah maitheia, keichuan pawi kati pawh ani chuanglo " Angaihi'n ati leh zat zata, " Aw le, msg in kan sawiṭha dawn nia " Tiin ka ban kavai zeuh hnuah U Mafela pawh nghak lovin ka inher a, ka kalsan nal nal a, Angaihi leh Remruatfela nui ri pawh chu kahre reng.


A ngal a sei ṭha thlerh thlawrh bawka keia kal chak lui ve mai maite chu minlo um pha rang lutuk, tlan pawh ni ila kal mai mai chung hian minlo umpha thei tho ang. Khawlai anih vang nge engmah asawi biklo a, ngawi renga kal mawp mawp in minlo kal hnaih lutuk erawh ka nam leh zeuh zel. Thui pawh kan kal hma in Apuii te ṭhian ho leh Nurse nu kha anlo lang ve hlawl a, khawi hmunah pawh hmuh tur an awm nimaiin kahria, Apuii ṭawng barh barh te chu ka ninga, darkar tam pawh ral hmaa thil thlengte kha hre awm pawn a awm tawhlo.


" Mafel, in khua chu anuam tawp, cham hlen dan ngaihtuah mai kaduh " Nurse nu in atih chuan Apuii te ṭhian ho chu an nui a, a zat em em vanga nui pawh an anglo, an nui lui ani zawkin ka hria. " U Mafela hi nei mairawh " Fiamthu ang taka lang si, min ti el ru zeta Apuii'n atih chuan U Mafela chu arum nghata, "Ṭawng phawng phawng ṭhin suh " ti hmukin ka kut chu alo chelh a, khawlaiah kan awm vang nge a chelh reilo thung.


" Ka fiamthu anihkha, Kimi i lo ngai thutak ang e " Ati leh lar lar a, henu hi ka insualpui chak. Ani ang reng renga over hi kala hre ngailo reng reng, ahma pawh in ka mil lova, tunah phei chuan ka millo lehzual, a zia hi ka mil chi anih loh chu thuhran, mi inkar tihbuai dan leh ṭawngkam ngeiawm deuh deuh a hmang peih lutuk hi insualpui bawrh bawrh achakawm, insual pui chak khawpa mil loh hi kanei ngai manglo a, Apuii erawh a hneawm chikim lutuk ti ila adik ber ang.


" Taka, Mawitea pawh a nupui nen an inṭhen tak asin " ka chhan loh vang nge ati leh a, ngawi mai mai tawh se kati lutuk, a ṭawng tam poh leh ka thin atirim zualin ka hria. "An inṭhen tak tak maw? " An ṭhian zinga pakhatin atih chuan " Aw ṭhen e..." tiin asawi belh chiama, Film leh thawnthu vela misualnu hi a ang kati ngawih ngawih. Changtunu leh changtupa te tibuai tura abik taka an duan hi a ang kati a, a character chu a hnehsawh hle bawkin kahria.

" Kimi, Mawitea nen khan in in ngaizawng rei ve riau in kahria, in inneih mai kha kan ring tawh hlawma, i duh hneh ve viauin kahria " Atih leh zat zat takah chuan ka kal lai chu ka ding data, ka din vang nge U Mafela pawh a ding ve chawt a, ka kawchhung so burh chu tih ziaawm tuma thawk kalak leh tete hnuah " Vanhlupui " kati hriam hraka ahming puma ka koh vang nge ani pawh ading ve chawta.


" I ka akua tih leh mi pawisawi i hrat tih chu kahria, hetia i sawi chang hian i hausak phah thur thur ṭhin em? " Ka tih chuan " Engmaw!" Ati vaka, zanin hian ngawih mai mai katum lo, ngawi mai mai ila min zuam sawt dawn tih kahria, henu hian ka zaidamna hi ati chhe ziaha, ṭawngkam mei nei deuh deuha min ṭawngkhum chang lah angah, ka ngawi a, kan dinhmun a chhiat em avangin ka khin phakah ka dah ngailo a; Mahse, zanin chu ati ve mah mah ani, U Mafela a awmve bakah an ṭhian ho an awm ve nuala hetiang thil hi chu asawi duh pawh ka ringlo ania, a rui anih te ka ring hial zawk, U Mafela vang hrim hrim pawn ka ṭawngchhuah angaiin kahria.


" Mawitea i sawichhuah takah chuan nangmah zawk khan ṭan la nasa hle rawh aw, kei aiin i duh daih zawk tih kan hriat kha, keichuan ka duhlo a ka ṭhen a, i sawi hma kha chuan ka hrechhuak leh tawhlo bawk. A first choice i nilo a, second choice loh ini leh lo a, third choice chu i ni ve tawh maithei asin " Ka ti ve salh salh a, ani pawn aṭawngkam adim duai hleinnem, keite chuan ka ṭawngkam kala uluk emai, "Kal teh ang buaina atam " Ti hlukin U Mafela chuan ka kutah achelh a, Apuii chu angawi kara, azak ve deuh nge sawitur a hre mailo zawk tih pawh ka hrelo e.

U Mafela chuan min kalpui dawr dawr a, a pen zau si ka pai leh khat khat zela min vuan nghet viau lo sela chuan ka tlu bawk thlawp tawh ang.

Ka chhungte mitthi in lamah an kal vek avangin kawngka chu alo in kalh a, " An awmlo vek anih hi " U Mafela'n atih chuan chhang lovin pot ho chu ka chawi kang diat diat a, nidangah chuan an dah ziah ania zanin ah erawh a awm miahlo. " Ka ngaihtuahawm loh i duh leh kal tawh rawh " U Mafela chu ka melh zeuha, ka thusawi chuan ati lawmlo viau aniang achal chuar tap in athaw hawka, a lungawi loh hmel viau lehnghal.

" Hawng thuai maiteh " Ti hlukin a kekawr ipte zen ṭat chung chuan ka sir ah ading khawng lah a, " I mak e a " ti hlakin U Nguri te room lam chu ka pansan a, kawngka chu kik dat datin " Eng nge ni " Kawngka lo hawn pahin U Nguri'n ati a, " Kawngka khi a in kalh a, chahbi i kawl mial em? pot hnuaiah ka hmu mailo a " ka tih chuan " Kapa chhuak tur khan minlo pe ngeia mahse, Mampuia kha alo hawnga, a chhuah leh lai pawh kalo hre hleinem" Ati a. "Aw le, amah chu kan bia ang e, i hlau em? " kati zui daiha U Nguri chu lo nui hakin " Hlau teh nang, Mampuia i biak chhung chu lo lut rih la " ati vara, " Ngawirawh, U Mafela'n min nghaka " ka tih chuan nghal zetin a aw athian kharha, amithmul min san khum zeuh zeuh lehnghal, nghal ve thei asin.

Step a chhoh pahin Mampuia chu ka call a, call achhan rual chuan " A sang ah khan ka dah " Alo ti nghal tawnga, " I mawl ami? Tinge asangah i dah ve ziaha, ka ban phak ṭhalo tih i hre vereng sia " kati hlara, tute lakah pawh ka thinrim ṭun vek tawh. " Hlir hler a che, ka kun peihlo alawm, in hampuar la thlawk mairawh" tiin anuih hawk hnuah call chu a off daiha, ka ke ka per dat dat mai.

" Hmela hi " ti hlakin kawngka lam chu kapan a; kawngka lu chunga kapa hming intarna phenah hian a dah ṭhina, dah tawh suh ka tih pawn 'Ka kun peihlo' tiin a dah lui leh tlat zel. Dingdihlip chuan Ban hi chu ka ban phak vemai a, a dah thuk ṭhin avang hian ka dap fuh theilo ṭhin zawk ani. Tunah pawh ka dap fuh theilo a, ka ban pawh kham tawh tak ani, " Hleitlingnu keiman kalo laksak ang che " Ti sup in ka hnunglam aṭang chuan minlo din thuah a, ṭullo zetin ka kawngah a chelh kher a, ben thlak ka tum lahin ala hmer nghet sauh zui a, ka nghawk sawk zawk dawn mawni.


Chahbi chu awlsam te in ala maia, keiin ka ke leh kut kham em em chung pawn kala theilo ania, atirah khan lo laktir daih ila ka hah thlawnlo nimai tur; Mahse, alakah hian kala lungawi lo tlata, a puihna dil vel chu ka tumlo lutuk.

Kawngka chu hawng rak rakin ka lut nghal nal nala, lut tur pawn ka sawm chuanglo, alo lut dawn tih ka hrechianga sawm kher pawh angailo. " Lo ṭhu rawh " Ti a room ah luhsan ka tum chuan ka darah chelhin alamah min pawt a, tha angah si a, ka petek nawk nawk mai. " I a ami? " ti hluaiin a awm chu ka melh rum nghek a, ani erawh chuan hahdam zetin thawk ala huai huai thung, " Kan buaina chingfel phawt ang " Ngenngawl zet hian ati a, keipawn chu chu aṭha berin ka ring, thaw hakin ka tha ka thlaha, min kuah beh reng avangin ka tha ka thlah chu alo hre rang viaua min kuahna ati nghet salh.

" In kuah chunga sawi chu ka peihlo " ka tih chuan anui hawka, nui ri ve kherlo mahila ka nui ve tho a, Remruatfela lel lul hi chuan ahre lovang. Min kuahna chu thlahin Couch ah chuan min ṭhutpui a, ṭhut hran ka tum chuan aphallo a, ka tal lui biklo. A lo luh pahin kawngka lah chu a kalh hmaka, kan awmdun laia midang anlo kal chuan rilru kawi deuhte an pu leh emaw kha ani anga, abuaithlak mai mai zawk dawna ka hriat avangin kawngka akalh pawh chu ka sawisel lemlo.

Ka kut chu a khawih neuh neuh a, a taksa in min khuap hneh bawka ka hahdam leh riau tawh. " Ahmasa berah chuan dawt ka hrilh ngailo che tih hre phawt la, nizan khan kanu'n min tira, ka rei dawn loh avang leh kanu ahmanhmawh deuh avangin kalo hrilh lo che anihkha.." "Ilo sawi duhlo zawk ani lo maw? " Aṭawng lai pawt chata kalo tih chuan arum hawka, ka chalah a kutzungchal a nem zeuhin " Ka sawi zawh hun lo nghak rawh " Ati hmuka melh ram ramin engmah chu ka sawi tawh bik chuanglo.

" Room aṭanga ka chhuah khan Lindai nen kan kal dawn tih ka hre ve chauh a, kanu lahin min tur sek bawk nen apawi viau ka ringlo a, ka kalpui tamai ani, i thinrim dawn tih leh min be duh dawnlo tih hria ila chuan ka kalpui hauh lovang " ati nghet charh a, a thusawi chu ka ringhlel hauhlo. U Mafela hi mipa insawithiam zut zut chi anilo a, zawt nawn leh pawh ni ila angai ang vek hian min chhang leh thovang, " Vawiin kha chu ka sawi tawhkha a scooty achianglo a, kalo kalpui ani. Msg kalo thawn che a i seen thei silo a, ka call lah i la duh silo a, engmah kalo sawi theilo ani " ka kut chu la kangin a fawp vang vanga, chu chuan ka taksa chhunga ka thisen zam kal lai chu ati normal lo a, ahmui lum veng veng chuan minti mur chiai chiai bawk.

" Ka archived daih che alawm " ka tih chuan min melh nghal run a, " Ka tello pawn i lo tlei khawp kha " ti hlukin a ner sawka, ka kut erawh ala thlah chuanglo. " I hria emni?" ti sep in ka nuih var vara, U Mafela chuan min en ṭha duh tawh miahlo anihchu! A in sawifiah tete a, a titau ve daih em mawni? Ka awih theilo zawk e a, puitling ṭhankin tawh tlangval mai pawh nilo tlangval senior tih atan chuan a awmlo vedeuh chu ani.

" Hria hria hria, mipa dang i inphurh tira i lo hlim em kha, keiin ka phurh ve dawn che in sawm ṭawng ṭawng i ngai bika, vo pah ila ngai zui " ati hluk hluka, a tum ve bar bawk nen tuna a awm dan hi ka dahṭha chak lutuk ringawt, ka screent shot chak. " Ka duh vang rengin ka kal bik hleinem, U Marcusa'n mintir a, lo hnial ṭung ṭung kha U Bawihpuia khan nuamlo ati ve dawna hreawm kati ve alawm " ka tih chuan " Alo nih tak chu, mipa dang i care em em laiin i bialpa chu min hlamchhiah hmak thei a " ti leh hmakin ngeiawm zet hian anui khera, " Ninawm ngaikawi zel suh, ka inkar ṭhat hi i duh tak tak lo anih hi " Kati ve hlara ka dawhthei tawh thlawtlo ani. Ka kut a vawn chu ka phih sawka a chelh nghet lutuk chu a in vuahna ana vawng vawng mai, rum theih tawpa ka melh laiin ani pawn lungawilo zet hian min en ve run a.

Ka tukhumah nghet zeta lo chelhin, tal tuma ka ka che tur chu ka chetsawn theih loh nan min delh bet titih a, tha angah si, a tha chhuah lo in min delh tawp mahse, ka chet theih dawn loh sa nen atha a chhuah phei chu ka che theilo chiang lutuk ringawt. Min fawp a, nidanga min fawh dan anglo takin aduhthawha ana lek lek thei, ka feel lo a nuam tihna lah ka nei heklo a, namsawn dawnin ka kut a che thei silo, ka ke lam lah nise a bawp in a delh bet tlat si a, tih ngaihna ka hrelo lutuk chuan ahmui chu ka seh sak ta ngawt a. phun hluka inla hrangin a hmui chu aliak zeuha, ka hmui chu asa ham ham thei mawle, a awm hrang mai dawn emaw tih laiin alo kun hniam leh vuta amitmeng chimawm lutuk chuan minti mangang lek lek tawh ani.

Min fawp leh dawn emaw ka tih lai chuan ka beisei loh lutukin ka hmui ah alo liak anihchu! ip zawkin ka meng nghal kawk kawk a, ani erawh anui suk a, a landan chu a ngeiawm ti ila ka sawisual lo chiang khawp ang. hawisawn ka tum lahin ka tukhumah aṭham tlat a, ka thawk asa phat phat tawh mai. Thawk la vang vangin atha chu athlah deuha, ka hmuiah chuan dam zetin a fawp a, chhan let tumlo zetin ka hmui chu chip lui tlat mahila luhlul zetin minla fawp lui ngar ngar tho, min fawh luih reng takah chuan Ka bialpa anih bakah ka mipa duh ngawih ngawih ani a, ngenngawl taka min fawh reng takah chuan azei bawk nen ka hmui chu chet in ka chhang veleh ta nge nge a, hepa lakah hi chuan luhlul chhuah reng theih pawh hi ani ṭhinlo.


Min10 dawn aral leh takah chuan insi riala ṭhu dunin, akut phah kan inhmuh tirh te a nalh ka tih em em mai chu khawih neuh neuhin kan boruak chu a nuam leh hle tawh a, ka thil sawi ho deuh deuh te chu ngaithla in 'Umm' ati khat tawk leh reng a, ka zawhna zawh te chu 'Aho' ti a min chhan duhlo neih miahlo in min chhang veka, a ṭawng zawi si, a aw athum si a, achang chuan hriat ahar lek lek zel.

.
.

Ka mutui lai chu thawm ri leh nawk nawk ṭhin avang chuan ka harh leh lek lek zela; Mahse, ka mit chu ka meng theilo reng reng, thawh chu ka duha ka rilru a harhfim viau laiin ka taksa a che thei miahlo thung a, hneh zeta min nem bettu an awm nimai hian kahria, ka chunglam aṭanga thil dum chhah tup lo hnai tial tial chu ka hmua, ka mit ka mengin ka hre bawk silo a, thil dum erawh kahmu chiang em em tho. min lo hnaih zela hlauhna mak takin min zawh kuala, tal ka tumin ka tal chhuak thei silo a, keihi maimizialin ka awm tihna emni? Hetiangah chuan ke zungpui tih chet aṭha an tih ṭhin te chu ka hrechhuaka; mahse, ka ti che thei chuanglo a, min lo kaitho tu awmse kati ngawih ngawih, au ka tuma ka aw achhuak thei silo kava mangang tak.

Thil dum lo hnai tual tualin ka taksa a deh hma chuan eng emaw hi a ri ṭhuai a, ka meng nghal kawk thei, ka thaw halh halh a, ka mutthilh leh mai hlau in ka ṭhu chhuak nghal hlawl a, room kawngka bula ka vahpa lo ding ka hmuh pawn ka hlauhna leh manganna khan minlo kiansan chiah silo a, ka nuih lui thei nganglo ani.

Ka kut chu chet in ka hui zeuh a, ka landan tur chu ka mitthla thiamlo, Mathewa kimki deuh chu ka landan vang anih ka ringa, a ngaihṭhat nan a nuih luih pawh chu ahar kati rih lutuk. Mathewa chuan minlo pan chhat chhat a, tawite, tawite tak taka ka nuih chuan a mitmeng adanglam nghal zawka aphur hmel leh ta deuh tawh, "Anite i mutei tawh lutuk a " ati ve nang nanga, khuma alo lawn fel rualin kapa alo lang ve hlawl a. " I ni chu i ti harh ta animaw? Mate, i harh deuh em? " Kapa chuan ati var a, a tupa chu en in anui var var mai.

" Minlo ti harh lovang tih ka hlau zawk " ti halhin thawk kala la sek seka, " I mang aṭha vak nange " Min ngaihtuah hmel zeta kapa'n atih chuan " Umm, maimizialin ka awm leh a " kati a, kapa chu a chek tlaka " Nizan i tlaivar si a, zingah lah thingpui lum in i buai leh nghal bawk nen i chauh lutuk vang aniang" atih chuan ka pawmpui khawp mai. Mathewa'n ka bula awm athlan miau avangin kapa chuan min kalsan a, ka thlan bawl ṭak ṭak chu ka kut hnunga hru zeuhin " Baby, khawnge i u, tunge kan in ah lo hruai che u " Nui pah sangin kati a, ka awmdan pawh ka thunun thei ta deuh e, "Apa khan au nen apu te inah hian min suai(Hruai) alawm" ati ve a, a thilsawi zawnga ahmui che kual vel chu a hmuhnawm takzet.

Nizanah ka tlaivar a, zingah min chhawktu tur anlo kal mai silo a, hmeichhia tlaivar dang an haw vek hnuah Angaihi nen Thlan lai ho thingpui tur kan siamsak leh rih a, thlan ah te pe leh thlapin dar10 velah kan haw veleh chauh a, ka haw hnuah ka mu nghal char char a, tihian ka harh veleh chiah anih hi tlai lam dar3 ari va tawh bawk. ka mit kham lutuk leh ka lu rit bur pawh hi ka tlaivar effect aniang, Phone khawihte hi chuan kan tlaivar lek lek fo a, zing lamah chuanlam kan nei ngai chuanglo a, mitthi lumen angaih a, zan khat lek kan tlaivar pawn zing lamah neuh neuh hi kan ngah leh em em si a, hei hi chu amak kati deuh, Mitthi lumen a kan chau bik tlat hi chu kan ṭhut tlaivar vang te pawh hi ani maithei.


Cont..

Tihian ka ziahkhawlsa a zo a, ahma aiin ka reh maithei aw..tunlai chu thawnthu type na hun ka nei lo reng reng..keimah hi ka ṭah achhuak zawk,, zanin ah ka pck ala thi dawn zuia, ka awmdan tur hi sawi lawk ngaihna ka hre rihlo, kan huan lamah kan ṭul rih lutuk a, hunawl a awmlo takzet.
Show post links
Top