My Arrogant Husband BY Becca Lnz (Completed)

[Rebec Nunziri]

Chapter-16




Stacy Ramthansangi POV




"Tunah chuan nangni mahni hmasial tak tak te ti chhe vek tur cheu in ka rawn kir tawh a, kei leh ka pa chunga in thiltih man zawng zawng kha ka la pe let vek ang che u" ka ti chang fak a, inhnuai lama mipa leh hmeichhia thu dun chu ka melh reng, min hmu ve lemlo thung, zanin atang hian khu an nun dan nuam zet khu buai na in a khat tawh ang, kawngka in hawng ri ka hriat chuan ka hawi let vat a, "I in peih tawh em?" Jimmy-an a ti tak sup ah chuan ka bu nghat a.




Room atanga kan chhuah dawn chuan Jimmy-a banah chuan ka chelh nghal, in hnuai lamah chuan kan chhuk a, midangte chuan min lo en thap a, "Min lo hrethiam ula, Pu Jimmy-a leh a nupui hual Stacy kut beng in I lo lawm ang u" Jimmy-a secretary in a tihchuan chulai hmuna mipui lo kal khawm chuan kut an beng dar dar a, stage ah chuan kan chho a, ka nui sang bawk, chutah ka hmelma te thutna lam ka en chuan mak tih hmel zetin an pahnih chuan min en a, ka nuih sak.




"Kan sawm na te min ngaih pawimawh sak a, helai hmuna lo kal khawm zawng zawng te hnenah lawmthu ka sawi hmasa e, keihi Jimmy Lalhmingthaa ka ni a, ka bula hmeichhe chhelo tak ding hi nakin lawk a ka nupui tur, Stacy Ramthansangi a ni e" Jimmy-an a tihchuan kut an lo beng dar dar a, stage atanga kan chhuk lai te chuan min en reng tu an awm tih hriat takin ka taksa hi a mur deuh chem chem a, mahse chumi vang mai mai chuan ka awmdan thlak danglam ka tum phah hauh lo thung.




Jimmy-a chuan a thawhpui te chu min hmelhriat tirna te a nei a, an zavai mai chuan an fel hlawm takzet, midangte chu kalsan in thutna awl ah chuan kan thu dun a, kan titi pah melh melh bawk, ka pheikhawk bun hian ka ke a nawt deuhin ka hria, "Tinge, i ke a na em ni?" ka ke lam ka en thlak reng vang chuan Jimmy-an a rawn ti a, "Min nawt in ka hria" ka ti sep a, "Pheikhawk sang bun duh suh ka ti a, ka thusawi i awih duh lo a nihkha" a tih leh nghut chuan ka lo nuih tlawn ver ver ringawt.




"Hi.." ti ri ka hriat chuan ka hawi chhuak vat a, chutah ka hmelma te pahnih chu ka hmaah an lo ding ran tawh, "Pu Mza chu a takah kan in hmu thei ta chu a lawmawm khawp mai" Jimmy chuan a lo ti vat a, Mza chuan chhan tum hmel pawh a pu lo, keichu uluk fe mai hian min en a, a taksa si chet a ding Mary pawh chuan rum zetin min lo en ve bawk, "Min lo hrethiam la, ka nupui hual hi huat na I nei em ni?" Jimmy-a bawk chuan Mary en pah chuan a ti hluk a.




"Neilo e, engvanga chutiang ngaihdan nei nge maw i nih zawk le?" Mary chuan nui hak hak chungin a ti a, "I melh dan ah kha chuan huat na nasa tak pai ang mai alawm i nih le, ka nupui hual hi melh hlum i tum emaw ka ti zawk a, mahse ka hmu sual pawh a ni mahna" kiai suk chung chuan min rawn en a, ka lo nuih let ve seih bawk, "I nupui hual hi chu ka hrechiang alawm, amah pawh hian min hrechiang khawp ang chu, nilawm ni Stacy?" Mary bawk chuan a rawn ti leh a.




"In in hria tih chu ka hriat na a rei tawh khawp mai, ka nupui hual hian ka lakah engmah zep awm lovin min hrilh thin bawk a, i mizia awm ang tur pawh ka hre hneh ve viau a nia" Jimmy-a bawk, a ni hi chu a ngeiawm thiam ve mawle, mahse a thusawi kha dawt a ni miau lo, ka pa nen ṭanpui ngai ngawih ngawih a kan awm laia min pui tu a ni a, ka tan chuan vantirhkoh ang hial a ni, ka harsat na zawng zawng ka hrilh hnu khan min ngaihtuah zual em em a, a ni hi awmlo nise hetiang dinhmun hi ka thleng thei hauh lovang.




"Khawiah nge khang hun chhung zawng zawng khan i bik ruk?" a vawikhat na atan Mza chu a rawn tawng chhuak ve a, chhang lovin ka hawi sawn hmak a, ka khawsa zia chu a ngaithei lo tih hriat takin a rum deuh nghut a, a zawhna min zawh kha ka chhan kher a tul na ka hrelo, "Pawn ah in be lawk ang" a tih leh chuan amah chu chiang zetin ka en a, "In biak na chhan tur kan neih awm ka van hrelo ve" ngeiawm zet a nui pah chuan ka ti a.




"Min hriat chian kha, hetianga luhlul i chhuah tlat dawn a nih chuan tih luihna hman pawh ka hreh hauh lo a nia" a ti leh nghut a, chhan let ka tum lai tak chuan "Min lo hrethiam la, ka nupui hual hi a duh lo chung chu i hruai lui thei hauh lovang" Jimmy-a chuan a lo ti chhuak nghut a, Mza nen chuan an in melh no lo hle lehnghal, buaina a chhuak mai ang tih ka hlau ru et et a, Mza mizia ka hrechiang si.




Mi te tana en nawm siam chu ka duhdan a ni hauh lo, "Jimmy, kan kal tawh mai dawn em ni, in thlen vat ka ngai tih i hriat kha" ka ti sep a, "Awle" tiin a ding chhuak zui nghal vut bawk, "Ni mai lova" tih pahin Mza chuan kan kal pelh dawn lai takin ka banah a rawn man a, "Min thlah rawh" ka ti zawi fak, min thlah chu a tum hmel loh khawp mai, "Ka nupui hual hi thlah vat rawh" Jimmy-a pawh chuan lungawi lo tak chung chuan a lo ti chhuak nghut a.




"Nupui hual" tih pahin Mza chu a ner deuh sawk a, a khawsa zia chu a ngeiawm hluah hluah a ti tawp mai, "I nupui hual hi pasal nei lai a nih hi" ka kut chu ka thing zui nawk a, min thlah ve nghal mai bawk, "Ka pasal i ni phiangsen lo ve" ti that in kalsawn leh ka tum a, mahse a thusawi vang chuan ka pen lai chu ka tawp chawt, "Ka nupui i ni, kan la in then hauh lo tih i hriat ve reng ka ring" a tih chuan ka in her leh a, sawi fuh in tih hmel lutuk a a nui suk ka hmuh chuan a hmai ah sawn na lua awm lova ben pawp mai ka nap a.




"Hah.. i ngaih ngaih in ngai rawh, keichuan ka pasal angin ka en lo che" tiin ka kalsawn zui nghal hlawk hlawk a, pawn a kan chhuah takah chuan duhthawh zetin thawk ka la ham ham a, kum 4 hnuah hmaichhan ah kan han in hmachhawn leh a ni a, a dan a dang takzet, a hmel ka hmuh hma kha chuan ka in ring tawk hle kha a nia, mahse a hmel ka hmu chiah erawh a dan a dang takzet, ka zam chhe lo chauh a nihkha, ka bulah chuan Jimmy-a a rawn ding chawp chilh ve nghal a.




"I tha em?" a tih sup chuan ka that thu ka lo hrilh vat, "Ok.. ti rawh ka thlah ang che" tiin a motor lamah chuan min kalpui a, kan in lam pan a kan tlan lai te chuan ka ngawi reng a, ka mipa hmangaih em em mai ka hmu a, ka hmangaih em em rual a ka hmelma lian ber ni si kha, chuan khang hun hreawm tak ka tawh laia ka bula awm aia mal taka min kalsan na nu hmeichhia ngei kha a bulah a la awm ve bawk, tunah chuan khang hun laia ka natna tawh ang chiah kha an ni pahnih hi ka pe ve tawh ang.




Kan in kawt zawn ah chuan motor a ti ding a, "Naktuk chu hnaah rawn kal duh suh aw, Muangsanga bazar pui I ngai bawk si a" a tih chuan ka hnial buai lemlo, motor atang chuan ka chhuk a, "A nih mangtha aw, khalh fimkhur la, tlan chak lutuk suh ang che" ka sawi zawh rual rual chuan a nui ri suk a, "Ka hria e, lut tawh rawh, chuan harsatna in tawh chuan min rawn hrilh vat la aw, ka lo kal nghal vat dawn a nia" a tih leh chuan ka bu nghat nghat a, a tlan chhuak lai chu ka thlir liam hnuah gate chhungah chuan ka lut ve ta chauh.




Ka pa chu sitting room ah a lo la thu a, min lo nghak a ni ngei ang "Pa" ka tih sap chuan min rawn en nghal vut a, "I lo haw tawh a nimaw?" tiin a rawn ding chhuak a, "Aw.. naupangte an muhil tawh a mi?" ka tih leh chuan an mutthilh deuh chiah thu chu a sawi a, "Nangpawh mu nghal mai rawh aw, Bawihtei kha a nuar deuh a, a lam reng che a nia, va lut vat rawh" a tih leh chuan nui sak chungin room lam chu ka pan a, khum a tui ti taka lo mu ka fate ka hmuh chuan ka nui leh nghal seih.




In thlak zung zung in ka fate bulah chuan ka in thawlh ve nghal a, kan khum hi lian ve viau mahse pali ngawt kan mu bawk nen a chep ve hle a, khum thar kan mamawh vat dawn tih ka hria, ka fate pathum lah hian ka bul lova mut an tum bawk silo, mahse ka lawm zawk, min ngai em em mai te hi ka hlimna siam tu a ni. Ni e, keihian triplet ka nei a, a tirah chuan ka hre biklo, mahse khathil ka pa nen misual lak atanga kan tlan bo hnu thlahnih naah khan triplet ka pai tih ka in hre ve chiah a, ka lawm zia kha tun thleng hian ka la theihnghilh theilo.




Mipa pahnih leh hmeichhia pakhat niin mipa pahnih te hi an upa zawk a, a naupang hi hmeichhia a ni thung, la naupang hle mahse an in hmangaih ve hlawm hle a, pakhat ka hrem chuan a dang pahnih te pawh ka hrem ve tihna a nimai, in tan viau e tilo hian an in hau reng thung a, thu kan rem zing malh malh thin viau, an harh bawk nen thil keh thei ho phei hi chu an ban phak loh na turah kan dah thukru vek a, chuti chung chuan kan in veng seng meuh lo.




Ka fanu sam ah chuan ka chul a, a u te pahnih erawh in kuah chial in an mu a, an muttui hle bawk, Bawihte hi chu naupang ber a nih vang nge mawni a hrisel lo em em a, hritlang a kai hma bawk nen kan enkawl uluk bik viau a, a u te pawh hian an duat thiam bawk a, a pangchang thei viau bawk, a u te hian school kal an ngen tlat a, thlaleh ah kum 4 an pum ve dawn chiah bawk nen a la hma a ka hriat avang chuan ka la beng khawn duh lem lo.




An nau ve thung hi chuan school kal chu sawi loh ka hna kal tur te hi min la ngen ziah a, hnaah ka tlai phah lek lek ziah lehnghal, a buaithlak ve thin khawp mai, mahse ka hnathawh na nei tu hi Jimmy-a a ni hlauh a, ka vannei, min hrethiam em em a, a ni hi ka pa nen ṭanpui mamawh em em a kan awm laia min ṭanpui tu kha a ni a, chu mai pawh nilovin hna hial min pe bawk a, a chungah hian lawmthu sawi sen loh ka ba tak meuh meuh bawk.




A nupui hual ang khan min sawi ngei a, mahse a nupui hual tak tak erawh ka nilo thung, hmeichhe hmangaih tak a nei a, chunu chu a la nghak mek bawk, a chanchin te min hrilh thin a, a hmeichhe hmangaih chu hnam dang a nih avangin a chhungten an duh lova, chumi thup nan chuan a nupui hual lem chang mai ka ni, keiin phuba ka lak duh avangin pawi tihna em em ka lo nei hran lo bawk nen ti hian mi hmuh ah chuan in nei mai tawh tur angin kan awm a, kan in kar ah erawh in thian that na bak engmah dang a awm lo thung.




Mza hian fa mipa pahnih leh hmeichhia a nei tih hi hria se engtinge a awm ang, a fa a nih a ringhlel ngei a, mahse a fate hi hmai chhan ah hmu ngat se zawng a fate an nilo tih a ringhlel hauh lovang, a chhan chu a fate hian an pa hi an chhun fuh lutuk tlat a ni. Ka zep reng thei dawn hauh lo tih ka hria, fa a nei tih hi eng ang pawn lo hrechhuak mahse a bulah ka awm tir ngai lovang, ka pai lai zawng zawng khan amah leh a hmei nu vang khan nuam sa in ka awm lo a nihkha.




Ka naupai lai khan rilru hah reng reng a ka awm vang khan nau neih pangai pawh a nei thei lovin zai chhuah an ngai hial a, chutiang khawp a harsatna paltlang chunga ka hrin ka fate hi tuman ka lak atanga an lak sawn ka phal ngai lovang, ka ta keimah ta chiah an ni a, an ni reng bawk ang, chutiang ngaihtuah a kan men reng hnu chuan sana ka en a, dar 2 a lo ri tep tawh, naktuk lamah triplet zing a upa ber Muansanga hi bazar ah ka chhuah pui a ngaih vangin mutthilh chu ka tum ve ta a.




Ka hmai leh ka hnar vel za mer mer thin avang chuan ka meng chhuak riai riai a, chutah ka fanu Nanai lo nui var var ka hmuh chuan nui ve hak in ka kuah khawm nghal vek a, a te ve nasa mai, "Mommy, bazar ah chuan min hruai ve dawn tiraw?" min melh kiau chunga a tih chuan "Bawihte, vawin chu i u Muansanga nen kan chhuah a ngai dawn a, nidang ah nangchu ka bazar pui ang che aw, I dam lo leh mai ang" ka tih chuan tah a tum nghal mai a, ka thlem nghal vat.




"Le.. tap suh le, Anna ka lo hawn sak dawn che alawm" ka tih leh takah chuan a in siamtha leh vat a, "Promise" tiin a kut chu a rawn dah a, nui hak hak in a tih ang chuan ka lo ti ve mai, room atang chuan kan in zui chhuak a, naupang te hmuh mai ka in rin nen hmuh tur an lo awm hauh lo, "Pa.. khawiah nge Muansanga leh Muanawma te hi?" ka pa sitting room a chanchinbu lo chhiar mek bulah chuan ka ti a, "Tual ah an in fiam a nihkha" a tih tak sup ah chuan pawn lamah ka chhuak vat a, ball an lo pet chu niin.




"Tel ve duh" tih pahin ka fanu Lalmuanpuii chu a u te awmna lamah chuan a tlan phei ve vat a, an unau thum in fiam lai chu hmuhnawm ti zetin ka en reng a, an ni hi ka dam chhan te chu an ni, chak taka ka la awm theih chhan te chu, an ni hi awm lo se zawng ka keh chhe vek tawh hial ang, "Le.. lo lut tawh ula, chaw ei a hun viau tawh a nia" ka tih takah chuan ka lam pan chuan an rawn tlan ve tar tar hlawm a, an nau ber chu an nghak pawh ran bawk, Bawihtei chuan ka mal ah a rawn kuah chawt a, mipa pahnih te pawn.




Nui hak hak chungin inchhung lamah chuan kan lut a, "Ka tu te chu an va hlim awm ve" ka pa chuan a lo ti ve hluai a, "Apu, Mommy in Anna min lo hawn dawn a sin, tiraw Mommy?" tih pahin ka fanu chuan min en kar a, ka buk tak nghat ah chuan apu lam bawk chu in tih theih hmel fe hian a en a, "Keipawh badman ka duh ve" Muanawma'n a lo tih chuan ka lo nui ringawt, "Mommy badman min lo hawn ve rawh aw" a tih leh takah chuan "Awle, ka lo hawn dawn chiang che" ka ti nghal vat a, a zuang tar tar mai.




Muansanga nen kan chhuah dawn meuh chuan Nanai chu apu kuah ran chungin a men leh par tawh a, "Tap suh le, kan lo haw leh vat dawn alawm, Anna ka lo hawn dawn che kha" tiin a mittui chu ka hruk sak a, "Nana.. keimah nen kan in fiam char char dawn nia" a u Muanawma pawh chuan a lo ti ve vat a, ka nui hak, "Pa.. kan kal nghal mai ang, kan lo haw har lutuk lovang aw" ka ti a, in atang chuan Muansanga nen chuan kan chhuak zui ta a.




Muansanga pheikhawk te chu kan lei fel a, a riltam thu a sawi avang chuan restaurant ah kan chawl leh a, an pian a hnu lamah Mizoram kan vawikhat haw leh na a ni bawk nen zawhna a ngah khawp mai, tha takin ka hrilh ve mai zel bawk a, an zing ah ro ro pawh Muansanga hian a pa a chhun fi lawr lak a, a pa mizia zawng zawng a la vek a nimai, a nau te aiin zawhna pawh a nghah thin zawk, chuan a fing em em bawk.




Ka fapa nen kan eitur chah te a lo thlen takah chuan kan ei nghal mawlh mawlh a, "Stacy" tih ri ah chuan ka hnunglam chu ka hawi vat a, chutah Opi ka hmu nghal zat bawk, kan hamhaih dun bawk a, engmah pawh sawi nachang hrelo in kan in en ren rawn a, harh chhuak hmasa zawk ah tangin min rawn pan vat a, "Awii... i dam maw, kan in hmuh lohna a rei tawh bawk sia, ka ngai thei lutuk che" a ti nghal bawrh bawrh a, ka fapa chu en leh in "I fapa maw?" a ti sep a, ka bul tak nghat ah chuan ka fapa chu a be veleh nghal a.




A ni pawh chuan fanu kum 2 mi vel awm tur chu a lo paw ve bawk, "Enge thleng chiah min han hrilh teh" kan bula rawn thut thlak ve pah chuan a ti a, zep then deuh nei chungin Delhi lama kan awm thu te chu ka sawi a, triplet ka neih thu ka sawi phei kha chuan a phul hluai nghe nghe, "Keini pawh hei kan in neih atanga Kum 2 liam dawn hnuah fanu kan nei ve ta chiah a, kum 3 a pum ve tep tawh" a ti leh zung zung a.




Thil ei turin chawlh an lo tum ve sa tho avangin min rawn zawm a, kan tawng dun nasa khawp mai, kan in hmuh lohna a rei tawh bawk nen sawi tur kan ngah dun ngang bawk, a fanu lah chu a fel em em lehnghal, "Zun chhuak" a fanu te chuan a nu en pah chuan a ti a, "Mommy keipawh ka zun a chhuak ve" ka fapa chuan a lo ti ve nghal a, "Lo awm rawh, keiman ka lo buaipui mai ang" Opi chuan a ti a, ka fapa pawh chuan a lo zui ve duh nghal mai bawk.




Ka fapa te lo let hun ka lo nghah reng lai chuan khawi atanga rawn lang nge tih pawh hriat lovin Mza chu ka hmaah a rawn ding thim khup a, ka en chho hau ringawt, ka hmuh ka in rin loh em avangin tawng mai nachang pawh ka hrelo zawk, "In biak kan ngai" tih pahin ka kut ah a rawn chelh a, pawn lamah chuan min kai chhuak nghal dawr dawr a nihchu, building sir mi awm lohna ah chuan min din pui a, "Nanghi i a em ni?" ka ti hlak a, a rawn chet dan khan min ti lungawi lo em a ni.




"Kum 4 chhung khan khawiah nge i bik bo hrep?" a ti nghut a, "Chuzawng I lo hriat ve a ngailo e" ti hmak in kalsawn ka tum chu ka dar ah rawn man in bangah chuan min nawr bet nawk a, ka lo tal ve nghal nghek, "Min thlah vat rawh, a hmaa i hmeichhe hriat thin der dep tak kha ka ni tawh lo a nia" ka ti leh that a, "Ka hria, i inthak tih ka hria" a ti sup a, "Ni e, ka inthlak, chuan pasal ka nei vat dawn tih pawh i hriat kha, chuvang chuan min rawn ti buai tawh suh ang che" a nui chhuak hawk a.




"Pasal i nei dawn hauh lo, keihi i pasal ka la ni reng tih i theihnghilh a nih ka ring" nui suk chunga a tihchuan rum zetin ka melh a, "Ka pasal angah I la in chhal ngam amaw, khang hun chhung zawng khan ka pasal i nih na anga i tihtur i ti ngai em, ngailo tiraw, i bula ka awm chhung zawng khan hreawm na leh harsat na bak min thlen lo, ka damlo tih hre reng chung pawh in min ngaihsak a hneh in i hmeichhe hmangaih damna tur chauh a nilawm ni i buaipui, keichu hmanrua atan mai mai bak min tih loh kha" ka ti chhuak that a.




Ngawi rengin min en a, ka la duh tawk lo, "I hmaah thingthi in khawngaih ka dil mawlh mawlh chung che pawh khan ka thusawi pakhat mah i awih duh lo a nilawm ni, kha hmeichhe sual zet khan a bum hneh em che a, chuvang chuan tun thleng hian a thu hnuai ah i la kun char char chu a nihhi" tiin ka nui hak a, ka awmdan leh ka chezia vel chu ngaithei lo tih hriat takin a rum hrawk a, "Ngawi hmak rawh, khatiang thu kha vawikhat mah sawi tawh ngai suh" a ti chhuak hrawk a.




"A nihchuan min hmu tur in rawn kal tawh suh ang che, chuti a nih loh chuan khatiang thu kha i hriat ah ka sawi fo dawn tih hre bawk la" ngeiawm zet chuan ka ti leh kher a, "Engpawh sawi rawh, ka nupui I nihna hi a danglam phah dawn chuanglo, chuan pasal dang neih kha chu ngaihtuah pawh ngaihtuah suh, keihi i pasal ka ni reng anga, ka inah ka bulah ngei i rawn cheng leh bawk ang" ti nghet leh charh in a kalsawn zui ta daih a, thinrim lutuk in ka melh zui nghek ringawt, a bula let leh ai chuan thih pawh ka duh zawk.




Restaurant chhungah bawk chuan ka lut leh a, Opi te pawh an lo awm tawh, "Khawiah nge i lo kal daih a?" thutthleng a ka thut thlak rual chuan a lo ti a, "Pawn lamah ka chhuak lawk mawle" tiin eitur chu kan ei zawm leh a, Opi hnenah chuan sawi tur tamtak nei mahila tun hi sawi hun a nilo bawk nen phone no te kan in pek hnuah kan kal hrang ta a, "Mommy, Nu Opi kha a fel e" ka fapa te chuan a ti reuh a, ka nui hak, "Nia.. a fel lutuk, nakin ah an inah kan la leng dawn nia, i nau te nen" ka tih leh chuan a bu nghat nghat a.




Muanawma leh Muanpuii te ta tur thil kan lei bawk nen kan bawr viau mai, "Mommy" tih pahin ka fapa chuan ka kawr sir chu a rawn pawt dat dat a, "Enge ni Bawihte?" ka tih chuan "Saw sawlai mipa sawn min ko a nia" a tih leh chuan a kawh na lam chu ka en a, chutah Mza ka hmu nghal zat, a kal daih tawh ka rin nen, "Bawihte, hmelhriat loh bulah chuan kal loh tur ka tih kha aw" Ka fapa en pah chuan ka ti a, ka fapa pawh chu a bu nghauh nghauh a, helai hmun atang hian kan kalsawn vat a ngai.




Bawihpuia kai chunga kalsawn pui ka tum lai chuan min rawn nang ching hman a, engtik laiin nge kan lam a rawn pan hman ka hre miah lo, "Ka lo thlah ang che u" a tih chuan ka ner nak a, "Ngailo mai rawh se, keimah niin kan haw ve thei, tirawh le.. Bawiha" tih pahin ka fapa chu kalsawn pui lehnghal mai ka tum a, "Mama tunge i hming le?" thu hniam pahin Mza chuan a ti sup a, ka fapa chuan chiang zet a a en hnuah "Lalmuansanga" a ti a, Mza chu a nui nghal suk.




"I hming chu a nalh hle mai, chuan kum engzah nge i nih tawh?" a ti leh a, enge maw a hriat le, "Kum 3, thlaleh ah Mommy in ka nau te nen kum 4 in ni tawh dawn a ti tiraw Mommy?" tiin ka fapa chuan min rawn leh chho kiau a, ka bu zeuh a, Mza ka en chuan a hmel chu a buai deuh nak a, "Nau maw?" a ti sup chu ka fapa fing em em mai chuan lo hre hman in, "Aw.. nau pahnih ka nei alawm, Anu pum chhung ah a rual in kan awm ho a, mahse ka piang hmasa ber a ti Mommy in, nau mipa leh hmeichhia ka nei bawk" ka fate hnenah hian an lo pian dan te ka pum a an awm rual vek thu te ka sawi nasa thin a, an hre bel viau bawk.




Mza chuan min rawn en vut a, "Nang hian fa pakhat chiah nilovin a rual in pathum maw i neih a?" a thawng bawk a niang, a hmel pawh mak tihna in a khat a, "Ka fapa sawi ang kha a nimai, chuan kan hmanhmawh deuh a kan kal ange, kan in hmuh fo loh hram ka beisei bawk" ka ti zawi leh hlak a, ka fapa a awm bawk nen tawngkam vin hman loh hram hram chu ka tum nasa viau, Mza chuan min en reng a, a fapa ngei a ni ngei tih chiang takin a hria in ka ring, a fapa hmel a hmuh hian a hmel a hmu hial ang chu.




Kan kalsawn lai chu ngawi rengin min en a, taxi ruak ka hmuh rual chuan phar ding vatin ka fapa nen kan thu lut nghal, ka thin chu phu rang tak a ni, mahse engmah hlauh tur ka neilo, ka fate hi ka lak atangin a la hrang thei ngai chuang lovang. In kan thleng a, ka fate pahnih chuan kan thil hawn chu an lawm khawp mai, apu chu phur zetin an hmuh a, an ri chel chul bawk, inchhungah chuan an tlan kual a, ka fate in fiam lai chu en in thutthleng ah chuan hahdam takin ka thu a.



Lalmuanzova POV




Ka nupui leh ka fapa te tlan liam lai chu ka en reng a, chuan kei hian fa pakhat mai ni lovin pathum lai ka nei a nihchu, ka nui chhuak huk a, ka hlim em a ni, Kum 4 hnuah thinlung taka ka hlim lehna hmasa ber a ni hial ang, Bawihi khan eng ang pawn ka fa a nih loh thu sawi mahse ka awih hauh lovang, a chhan chu ka fapa hmel ah khan ka naupan lai hmel ka hmu tlat a ni, ni e, ka va han hlim tak em, ka fa te pahnih pawh chu hmuh hlan ka nghakhlel viau bawk.




Hlim zetin ka in khalh haw a, in ka theng a, room ah lut in khum mawng ah chuan ka thu ran a, Bawihi nen a kan thlalak chu ka en vang vang a, "Tunah chuan i lo let leh tawh bawk a, kan fate pathum nen hian ka kal tir tawh dawn hauh lo che u" ka ti a, bathroom ah chuan ka lut a, ka che reng reng chu a zang khai em em a, ka fate hmuh hlan mawlh chu a ni ka nghahhleh ni, in hnuai ah ka chhuk a, choka ka luh chuan Nu Kimtei chu a lo che mawlh mawlh a.




"Nu Kimte, i duh chuan i haw hma thei a nia aw, rawngbawl a la hun lo bawk a, haw daih rawh, ka pa te in lamah kal ka ngai dawn a, chaw pawh ka ei nghal mai ang" ka ti a, Nu Kimtei pawh chu a haw nghal mai bawk, room ah bawk chuan ka lut leh a, chhuak tura ka in siam hnuah motor chahbi la in ka chhuak zui nghal, ka pa hnenah tu pathum ngawt mai a nei tih hrilh hlan mawlh chu a ni ka nghahhlel ni, a dam loh nasat lai ber pawh a a sawi chu a mo leh a tu lo piang tur hmuh a duh thu a ni thin.




Ka pa te in chu ka thleng a, motor pawh hung tha lo chuan in lam pan chuan ka kal nghal vat a, ka nu leh pa te chu sitting room ah an lo thu dun a, chutia min hmu thut chu mak an tih hmel hle bawk, "Hnaah I kal lo em ni?" thutthleng a ka thut thlak rual chuan ka pa in a lo ti dut a, "Aw.. vawin chu ka off a" ka ti ve mai a, ka pa hian ka nupui chunga ka chet dan avang khan ka chungah a lungawi lo em em a, a hma ang khan ka chungah rin na pawh a nghat tawh lo bawk.




"Ka pa ka lo kal chhan chu thu pawimawh tak hrilh tur cheu ka neih vang a nia" ka ti nghal sup a, "Han sawi la" tih pah in a thu tha a, "Ka nupui a lo let tawh" ka ti nghal tawp a, thu han sawi kual vel kha ka thiam lo, "Engmaw?" ka nu chuan a lo ti fak a, "Ka nupui a lo let tawh ka ti a nihchu" ka ti nawn leh sup a, "Chuan nang hian neih leh te kha i lo tum ringawt ange, duh lova tlan bosan tu che a ni tih hre reng rawh" ka nu bawk chuan a lo ti leh hlak hlak a




"Lo ngawi rih rawh" ka pa chuan a lo ti nghut a, ka nu pawh chuan engmah a sawi zawm tawh nilo, mahse a hmel ah chuan a lungawi lo hle tih erawh a hmuh chian theih viau, "Ka nupui mai ni lovin ka fate pawh" ka ti leh a, "Fate a?" ka pa chuan a lo ti vat a, "Aw.. ni e, ka fate, Bawihi khan triplet nei in mipa pahnih leh hmeichhia pakhat an ni" ka tih leh chuan ka pa chu a nui chhuak hawk a, "A va han lawmawm em aw" a ti vawng vawng a.




"I fa an ni chiah em tih pawh i hriat chian loh kha, chuvang chuan hlim viau duh suh, a khawsa zia en khan mipa dang fa bak a ni lovang nge" ka nu in a lo tih leh mai chuan "Ka nu" ti hrawih in ka en nghal run a, ka pa pawh chuan ka nu chu lungawi loh hmel zetin a lo en ve bawk, "Lo ngawi thin rawh, an nupa in kar ah hian in rawlh ve phet tum thin suh ka ti fo che, i in rawlh loh na turah i in rawlh tam tawk tawh, ka en liam che a, tunah erawh chuan ka en liam mai mai tawh lovang che" ka pa chuan a ti bung ta nghut nghut a.




"Nu... ka fa a nih i ring lo viau pawh a ni thei, mahse ka fapa upa ber ka hmuh khan keimah ka in hmu thei a ni, ka fa ngei a ni tih ka chiang" ka ti nghet charh a, ka pa zawk chu a lo bu nghut nghut a, "Stacy chunga i thil lo tih tawh zo zai te kha i theihnghilh in ka ringlo, chuvang chuan Stacy hian awlsam taka a pawm leh che chu ring hauh suh ang che, hmeichhe rin na vawikhat tih chhiat a a awm tawh chuan mi rin leh mai hi an harsat thin a, nangpawh hian nasa taka i beih ngei a ngai ang" ka pa chuan a ti dap dap a, ka pa thusawi chu pawm pui zetin ka bu nghat a, eng ang pawn harsa mahse ka bei ang, chuan ka nupui leh ka fa te hi ka bulah an awm ngei bawk ang.


Cont...

Comment leh click kha aw, chuan tun thla chhungin zawh hman ka tum bawk a nia, ka story thar tur "Love In Bloom" chu prologue ka dah chhuak tawh a, in duhzawng te a nihchuan like leh comment kha min lo tih sak ve theuh dawn nia...