CHAPTER 15
Midang an haw hnu chuan u Sangpuia erawh ala ṭhu runa, biak hmasak ka tum loh avang chuan ka kûn ngur mai, “Duati i thil hmuh ang kha anilo ania" a rawn tih teh tlawng avang chuan ka en zawka, “Enge ka hmuha?" ka tihchuan za lo tak hian a ṭhen saka.
Chutah min rawn panin ka bul chetah chuan a rawn ṭhu a “Teremi nen kan thlalak i hmu tih ka hria, min ringhlel lo la ka duh, a rawn kal ve a ka phurh a ti tlat si a, midangin min lo nawr bawk nen ka phur ve mai mai a nih kha" a tihchuan ka nui haka. Mahse ka nuih a za tak tak lo, a ṭhiante vâng a ti a maw? A ex lehnghâl!
“A nihchuan ni leh rawh u an tihchuan i nihpui leh duh dâwn tihna a nimaw?" ka tihchuan min rawn melh vung vunga “Engmah a awm lo, ngai kawi suh, a ni chu ka bialnu hlui mai a nihkha" a tihleh chuan ka nui hak a “Ka bialpa hlui in phurh tîr ve ila tikhan ho lam takin sawi ila i awih duh bik ang maw? In inzui rei zia pawh ka hre vek, helaia ka rawn awm hma tê khan a ni lawm ni in inṭhen?" tiin ka mittui rawn tla tur chu duh lo in ka nuai pawk a.
Ṭah mai mai ka tum lo “Eng chiah nge i hriat chu ka hrelo, mahse tûnah hian kîr leh tumna ka neilo, nangmah bak duh ka nei lo" tiin min kuaha, engmah ka sawi tawh bik lo. “Min ring turin ka ti lui lovang che, mahse kha zan bâk kha kan in hmu leh tawh lo. Engkim a ṭha vek" tiin ka hmuiah chuan a rawn fawpa, ka ngai ve tawh bawk nen ka chhang let ve ta nge ngea.
A duh thawh takah leh ka kawr hial a zen tâkah chuan tâwp vat a ṭha tih hria in ka namsawna, thawk ka la ham ham bawk. “Duhtawk ang, a aia thui kal ka duh lo" tisapin a mitah chuan ka en kâra, a ni pawh chu a thaw hrawk mai “Insum a har ṭhin a nih hi maw?" a tihchuan ka nuih seih ringawt, titi zuiin rei pawh ṭhu tawh lo chuan a haw zuia.
Keipawh mu ve nghalin movie rei vak lo ka en hnuah mutthilh tum chuan ka mu ṭha sat sata, tûnah rih chuan engkim a ṭha leh phawt chu a nia. Min bum a nih erawh chuan ka kalsan vang vang ang, ka duhzia a hria a, min phatsan duhna a nei a nih ngai chuan ka inthiarfihlim san ve tawh ang chu.
Hun te pawh chu kal ve zelin u Sangpuia nen pawh a hma ai mahin kan inzui nasa a, mipa ta nafam chu a fala kan awm chang chuan kal thui chang lah a ngah, mahse ka la beng dai thei zel chu a nia.
Samuela Aizawl lama a chhuh dâwn avangin an inah ka lenga, kan pahnih bak kan awm lo. Chutia ka ṭhian ve ber a awm bo leh daih tur chu ka ngui ve ruih mai “Sam, tinge awm bo kher i tuma? I zuk interview anga ilo kîr leh nghal thei tho a lawm, chutiang chen chen awm angai em ni?" ka tihchuan nui hakin ka luah chuan a rawn chûl zauh va.
“November ah chuan ka rawn let leh hman ang, chuan sazu kua te kan lai dawna, i tel ve duh angem?" a tihchuan ka lu chu ka bu nghat nghata, “Mahse thlahnih lai i awm bo dawn ania, i tello chuan ka mal leh dawn lutuk" ka tihchuan min en vang vangin “Vawikhat chiah ka fawp thei che angem?" a rawn tih avang chuan phawk zetin ka en a.
“A tawp nan tak tak, i phallo a nih pawhin a pawilo, kan inhmuh loh chhûngin lo danglam lo la" tiin min enkara, enge ka ngaihtuah pawh ka hrelo. Mahse Samuel-a lakah hian eng emaw hi a awm riau zêlin ka hria, ka bu ta nghata. Chuveleh duhthawh zeta min fawpin ka tukkhum leh kâwngah chuan a kuaha, nidang anga ka awm loh avang chuan mak ka ti a, keimahah danglamna a rawn awm tlat chu eng thil nge ka hre thiamlo. U Sangpuia kha ka duh viau in ka hre si a.
Ka hmui hnuai chu a pet ner nera, ka lungphu chu a rang ngei mai. “Sam" min thlah hnu chuan mitmeng buai chuar zet chuan ka ena, nui sukin ka biangah chuan a chûl heuh heuha “Ka lawm e, chuan he thil avâng pawh hian, ṭha takin lo in enkawl la, midang ta i nih hunah pawh keichuan englai pawhin ka hmangaih reng ang che" a thusawi avâng chuan ka en chho ha a.
“Min hmangaih maw?" ka tihlai chuan a rawn nui hawka “Hmeichhe mâwl tak i ni, haw tawh rawh. Keipawh ka chhuak tawh ange" tiin a bag chu a khai nawlha, pawnlam chu a pan zui zat bawk, ka zui ve zêla. “Tluang deuhin kal rawh aw, chuan lo haw vat tum la" tiin ka nuih var vara, a tawp nan ti ni awm hrimin min en leh vung vung hnuah a bike ah chuan a lawn thurha, amah a palian bawk nen a bike pawh chu a hniam sut thei nia?
“Lo in enkawl ṭha ang che, enge ka lo hawn ang che?" tizui in a helmet fullface chu a khuma, a mitmeng chu a tilang fiah zual. “Ih....thil mawi tawk a nimai, a theih phei chuan ka chhûngte kha zu tlawh rawh aw, ka hrilh tawh kha fimkhur deuhin tlân la" tiin ka kut chu ka vai zauha, a lama min pawt hnai leh thutin ka mitah tak chuan a rawn melha, a helmet chhan mah nise a mitmeng hriam lam mah chu ka en rei ngam ṭhaklo, hepa lakah hian tinge ka zâm em em zêl ni.
“Min ngai dâwn chiang" a tihchuan ka nui haka “Ngai ve ang chu, hetah ka rawn kala nang khulamah awm i tum ve thunga, i sual emai kal vat rawh" tiin ka awmsawn deuha, a pi leh pu pawh a kal dâwn takah chuan rawn haw in an rawn thlaha, Valpuia te ho pawh an rawn lang phak phak mai.
“Tluang deuhin kal rawh aw, i ṭhiante ho i thlim dâwn erawh kan lawm lo" tiin an beng thuk thuka, a bike aṭanga rawn chhukin a ṭhiante ho a kuah hnuah min rawn kuah ve leha “Lo in enkawl ṭha viau ang che, min mamawh hunah chuan min lo call tawp la, i tân ka awm reng dâwn a nia. I chungah eng pawh thleng se min rawn hrilh hreh suh ang che" tiin min thlah zuia, a tlan chhuah tâkah chuan keipawh chu muangchangin in lam ka pana.
A awm lo tur chu ka nguai ve ruih mai, “In thlah fel ta a mi?" nu Chhingin a lo tihchuan ka bu nghata, “Samuela chu a fel a nia, a pi leh pu a hmangaihin an thu lah a ngaipawimawh a, police a nih leh phei chuan an nun pawh a nuam ve viau ang, an inkhawl theia. An sawhthing hralhna nen in pawh ṭha tak an din thuai ang, an in buatsaih mek an tih kha" a tihchuan ka bu nghat nghat ringawt.
Zânah u Sangpuia chu a rawn leng leha, tunlai chu mi a hlat riau hian ka hria, rawn len loh zeuh zeuh a ching bawk. Mahse engmah ka zawt duh ngailo, amah lah hi a cool sâwt bawk nen kan ṭawng tam ngai lo viau.
“Vei nei i ang ka ti" ka tihchuan min rawn ena, “Engmah a awm lo, Samuela chu a kal ta em ni?" a rawn tihchuan ka bu nghat a “A tlin theih chuan a lawmawm dâwn em a sin, tling ngei sela ka duhsak" ka tihchuan a nui haka. “A tling em em ang, he khuaah chuan miin an en ber a lawm, tlangval fel leh ruihhlo ti miah lo ania, nula ten an duh ang hu hian hmeichhe lamah hian a inhnamhnawih lo khawp mai" a ti ve sup supa.
A sawi dikin ka ring, nula ho in an duh zia leh star zia ka hre ve a, mahse Samuela erawhin bialnu neih a tum lo nge biak tak ngial pawh a be ngai lo, hetiang nisi a engvanga kei min duh mai nge a nih pawh ka hre bik lo e a, hmel leh pianah chhuan tur ka nei lo ve ropui sia.
“U Sangpui ih...i danglam riauin ka hria" ka tihleh chuan a nui suka, “Danglam em ni? Ka ngai reng a lawm, ka chau deuh mai mai ania" a tihchuan tho chhuakin a lu chu ka hmehsaka, a mit chu a chhing nghal duar duar mai.A hmel pa hrak mai chu enin thil ka ngaihtuah neuh neuha, a sawi ang tak takin a hnathawk a chau viau pawh a nimahna.
“Tikhan a zia deuh em?" ka tihchuan a rawn bu nghata, a kut chu ṭhutthleng bânah chuan phar duaiin a ke chu a thluang zurh bawka, a awmdan chu a hahdam hmêl bik ngawih ngawih. Ka hmeh kual lai chuan engmah sawilo in a mit a chhing chiala, tunlai tak hi kan in hmu khât bawk nen an danglam ang tlata ka hria pawh hi kan inhmuh khât vang ah ka puh ta ringawta.
A haw dawn chuan ka chalah fawp zauhin min mangṭha supa, a kal liam lai chu ka thlir ta reng ringawt, a danglam ta lutuk chuan keimah pawh min ti hamhaih takzet.
Engvanga khatianga awm ta daih nge maw a nih le? Mahsela chu thil fiahna chu thla a liam leh meuh chuan ka hre chiang ta khawp mai, mi zawng zawngin an sawia, an kurpui a ni ber mai. Engdang a nilo, u Sangpuia fa Teremin a pai tihchuan ka laka a lo danglam chhan chu a ti chiang ta viauin ka hria.
Ka hriat tirh chuan ka hamhaiha, ka na ut ut bawk. Nu Chhingin min hnem mawlh mawlh mahse eng thu nge a sawi pawh ka hre theilo, ka na a phatsan ka nihna chuan min tina vawng vawng mai. An inkawp mai nilo in a fa hial paitu an awm chuan min tina a ni.
Manuni chuan min hnem ve mawlh mawlha, mahse ka pangngai thei rih meuhlo. “Duati" u Sangpuia chu ka hmaah a rawn ṭhu thla a, ka en lo a, ka chhâng hek lo. Ka mittui erawh ka biangah a luang thla ngiai ngiai thung “Ih..ka ka duh dan a ni bik miahlo, ka rui lutuka" a tihchuan ka en renga, a hmel pa leh ṭha zet. Ka hmuh tirh aṭanga min hip bet tlat tu a mize cool ruih leh a aw dam dup te chu ala ngai vek, mahse engkim a danglam ta vek si.
“Min ngaidam rawh, dik tak chuan ka la theihnghilh thei lova, ka lo rui bawk nen hetiang thil a thleng hi a pawi ka ti takzet" a tihchuan ka en renga, “Tinge theihnghilh theih loh nei chunga bul min lo ṭanpui, a hma ka zawh lai che te khân engkim sawi la tun ai hian ka pawm thiam thei tur. Hmeichhe dang i mutpui chung pawhin min la kawp reng thei ania, u Sangpui mipa danglam tak ni turah ka lo ngai che a sin, hetiang mi i ni ang tih ka ring phalo" tiin ka en renga.
A hmêlah chuan in thiam lo hmel ka hmu bawk “Min rawn ngaihtuah suh, inthiamloh a ngai hek lo. Nei rawh, i fa paitu a ni a nei ngei ang che. Kei nen chuan kan la inkawp reilova, ka tuar thei em em ang, hlim takin awm rawh u, chu chu ka duhthusam a nih chu" tiin ka nui haka.
Mahse hetiang thu ka sawi chhuah na phênah hian ka na em em tho, ka chhûngril lamah chuan ka rum vawng vawnga. Engah mah ngailo ang taka awm hi a harsa takzet “I na tih ka hria, ka tihpalh. Ni e, ka fa a pai tawha, thlahthlam ka theilo, mahse ka duh tak tak che tih hria la ka duh, min ngaidam dawn ania" tiin min en reng a.
“Engmah sawi angailo, hlim takin awm rawh u. Keichu ka ṭha, haw tawh rawh" tiin hmun dang chu ka en daiha, min rawn kuah avang chuan ka la phu zawk zui, ka chhûngten an hriat tirh phei kha chuan min thinrim pui viaua, mahse keimahin ka ṭhat thu ka sawi tâkah kha chuan engmah an sawi tawh bik lem lo a nih kha.
A haw hnu chuan Samuela chu ka phone a, a lo chhâng vat mai “Sam" sawi tur dang ka hrelo, ka ṭah khum vaka. A ni erawhin min hnem mawlh mawlhin a rawn haw vat tur thu a sawia, engmah pawh ka sawi theilo, ka ṭah khum char char ringawt.
A tâwpah erawh in sangmar ka infuih sauh sauha “Lo haw vat rawh, ka mamawh che i awm rei tawh lutuk" tiin ka mittui chu ka tuai zauha, “Aw le, nangmah kha in ngaihtuah hah vak vak lo la, a thleng tur ang a thleng vek tawh a. Mipa tenawm pakhat avang maiin mahni in tih chhiat loh tur" a tihchuan ka thaw ham hama, ka ngaihdan chiah a ni.
Mahse kha chen kan lo inzui tawhnaah erawh ka na lo theilo, ka duh ve em maia. “Ka dah phawt aw, naktuk test tur in buatsaih ka duha" ka tihchuan a lo aw ve maia, hepa hi chu ka tân hian a hlu takzet. Buaina leh harsatna ka tawh apiangin ka tan a awm ziah a, min tlânsan ngai hek lo, tunah pawh hian amah bak ka harsatna min sutkian sak thei tu tur ka hre bik lo.
Thawk la ham hamin question set tur chu ka buaipui mawlh mawlha, zirlaite hmaah engmah ka ti lang ngailo va. U Sangpuia nen kan in zui ve nasa tawh nen a tam zâwk hian min khawngaih hle tih ka hria, u Sangpuia lah miin an dem nasa in a hma a a mizia nen min lo thinrim pui tâwk lah bo lo, a hma ai mahin a mualpho zâwkin ka hria.
Chutia ka kalsan thei tur chu keipawh in ngaihtuah lungngai lutuk duh tawh lovin Pathian remruatah ka dah ta tawpa, min kawp duhna rilru alo pu hrim hrim chu ka ten leh hnuhnawh viau, khatiang tur te chu a tir aṭang khan ṭha deuhin sawi mai se ka nih pui kher lo tur ania, tûnah erawh engkim a nih tur ang vek a ni tawh bawk si.
TIHIAN A STORY NEXT AṬANG A CHHUNGRIL LEH ZUALAH AW, TIN KAN IN PUANG HLUAI ANGA, HE STORY HI KA TRUE STORY NGEI A NIA, CHUTIH RUAL ERAWHIN A NIHNA ANG DIAK DIAKA ZIAK LOVIN A NGAIHNAWM NAN A ṬHEN ERAWH KA THLAKA, KA LO SAWI VE HLUAI A NIH CHU
