OBEDA BY Natasha Hrahsel (Completed)

[ngaia]

CH-16






U Obeda a rawn thlen ve meuh chuan Judy pawh a inbual fai diam tawh a,keipawh hospital a zui ve theih beisei ru deuhin ka lo in thlak ve bawk.




"Cabin buaipui chhung a rei leh deuh a"tiin a tum aia tlai a a rawn thlen leh chhan te chu a sawi nghal zung zung a,Judy chuan Judithi chanchin alo zawt ve nghal char char bawk.






"Ngaihtuahawm ani tawh lo e,dam tha pangai leh var tur erawhin hun a duh rei deuh ang" tiin tawifel takin anau chu achhang a,Judy chuan a zui ve tur thu a hrilh nghal zat bawk.

"Bawihi,minlo inthlakpui ve lawk ta che" tiin inchung lam a mitmei zeuh a,bu nghauhin kan inzui chho ve mai bawk.






Room chhung kan luh rualin ka hnung lam atang min kuah thut a,ahnu ah min kuaiher in hmalam zawngin min kuah leh vang vang a,ka sam a chul pah hliau hliau bawk.
"I hlau em?" Min ti chu ka hrethiam lo kher mai!

"I hlau em?"ti nawn lehin "a ti hrilhhai viau ang che,khatiang khan Judithi hian chet ala dawn tih ka ring phak bik hauh lo" a ti tel ta hluai a! Anau chet duh dan chuan athawng ve hle ni tur ani.





"Apawi emai a" ka ti tawi tap a,abak han sawi vak tur ka hre thlawt lo ani.




"Ka nau mah nise demawm ka ti hle mai,mihring nunna hlutzia hre tur ania sin mawle.A pum chhunga naute vang tal pawh a infuih kal tur anih laiin a tihdikloh vangin a naute in nunna achân phah a" a awri chu a diklo riau a ka hriat ni!
"I tha em?" Ka ti sep a,nui nghawr dawtin "ka inthiamlo" a ti ta sup.


Thaw chhuak hluai in "a fa paina pa chungchang ka sawilan vanga hetianga che ta mai ni in ka hria a,ka nu leh pa te laka zep reng kha thil tihchi niin ka ngai lo thung a.Ka hriatchhuah tirh atang zep pui tumna ka neilo a,ka sawichhuah hun erawh a fuh ber em tih zawhna ka la inzawt nawn fo dawn niin alang" a tih chuan ka khawngaih lutuk chu ka mittui alo hnâm tiam tiam a,anau thil tih ah hian amah a indem ni berin ka hria a,a dik ngei pawh ka ring.





A intleuh thuak hnu ah muangchang lo takin a inthlak a,damdawiin a zui ve ka duh thu ka sawi chuan alo remti hlauh.
Keini'n bungrua kan phur a,Judy erawhin a û scooty akhalh chhuak thung.Engemaw thut ah two wheeler hi chu lek zung zung a awlsam a,ka pa in rawn keng turin a rawn chah ni awm tak ani.






Damdawiin kan pan lai chuan ka ngaihtuah na ah thil pakhat a rawn lut a, ahma zawnga min ring ngai silo ngatinge tuna tak a min rin tâk tlat tih hi ani?





"U Obed,ka thusawi te engtik atang khan nge i rin?" Ka ti sep a,min rawn melh zawk in "eng thu maw?" A ti ve sup.

"Judithi chetdan te,U Jeneti chungchang te..ahma khan min ring miah silo a" ka tih chuan athaw ri deuh hrawih a, "ka ât vang ah kan ngai mai thei angem?" A tih chuan ka hrethiam lo hle.





Chutah amah vek chuan "min zui haw duh lo khawpa i haw hreh tih ka hmuh khan ka mit a ti vâr ti teh ang.Ka hrechiang ve thawkhat viau tawh che in ka inhria a,i tawrhchhel zia leh i tihloh na lam a tihluih theih i nih loh zia pawh ka chiang viau.Kan inneih hlim kha ila hria em? In in lama lenthlak pui che ka tum trum kha" a tih chuan ka lo bu nghut a, kiai sukin "kha zân a i thusawi kha ka theihnghilh thei tawh hleinem,in in lama kan lengthla anih chuan 'ka zui haw tawh kher lo ang che' min ti anih kha" ka lo ip chawih a,luhlul min ti ngawt ang khatih lai khan.





"Ka thiamloh anih ka hria a,kha zan atang khan i tawrhchhel zia ka hrethar bawk.Nizan ka haw lam khan leitan ah reife dingin ka inngaihtuah a,min zui haw duhlo khawpa rawn haw ahreh anih chuan chhan tha tak a awm ngei ang' ti rilru in ka haw a,Jeneti room ah kalchilh in engkim ka zawt,chuan thudik in min chhang bawk a,abak chu i hriat tawh ang tho khan kan inhnial buai" a then sak a,a mipa hna lo viau a ti pawh ani maithei ani.

"U Jeneti'n angaihzawn thu che a hrilh mai che maw?"hmeichhe â anilo a,chuti mai a nau anga en tu bula a inpuan mai chu ka awihlo dawn dawn mai.





"Ka dawp alawm" a tih chuan ka ang pam mai ,"engtin?" Ka tih rualin ka kâ ka hup chawih a "i lem kual vel ani maw?"ka ti pawr ta hlar.





"Thudik ka hriat duh vang chauh ani" a lo ti bul tup a,ka ngaihdan ani tawh der lo thung.





"Ka awmloh lai remchang ah chuhin ilo lerh kual vel anih ber chu " ka tih chhuah hlak rualin "what!??" A rawn ti chhuak ve hluk a,kawngsir ah motor chu apark nghal zat bawk.

"Bawihi,ka kut hmawr pawhin ka tawk lo i ngaih ang engthil mah ka ti lo tih ka intiam ngam" a ti nghal ruai.





"Ka..ka tihpalh,khatiang a vin vak che kha ka tum lo" ka thil sawi ngaihtuah letin ka ti ta chul a,uire puhin anih kha ka puh ber ni!





"Umm,ngaih atha duh hle mai" ti a akiai suk chu ka en leh haw tawh,"lerh lo tura min duh vangin ka lawm e ka nupui" ka ner nang nang mai,tunge mahni pasal te lerh se ti ang le?

Kan huntawn theihnghilh thakin kan in leh damdawiin kawng ah kan awm a,Damdawiin kawt kan thleng chiah erawh boruak a rit leh churh tawh.Akhalh muang bawk a,Judy'n minlo thlen khalh daih tawh a,cabin chhung kan luh ve meuh chuan alo thu fel diam tawh zawk.





Ka pa,Judy leh U Jeneti te sofa ah anlo thu a,ka nu erawh Judithi kiangah a lo insut feih feih mai.





"Matei chu i rawn kal ve duh kher anih kha mawle"ka nu chuan alo ti var a,a aw te chu alawi deuh rut lehnghal,atap nasa tawh viau anih ka ring.
"Doctor a rawn kal zo chiah a,adinhmun atha e,ngaihtuahawm ani tawhlo"kan thutthlak ve rualin ka pa'n alo ti nghal thuai.





"Tinge tianga achet le? Alo harh hunah a tuar thiamlo ngawt ang"Judy chuan a ti sep a,"A thilsual tih rah chu a seng ve angai alawm"Ka pa erawhin alo ti chang run thung.A rilru ala hmin zân lo ani ngei ang le.





A damdawi ei kha a sân piah lamah a lo ei hnem em a,chutah nau ala chhiat zui lehzel bawk nen a dinhmun ngaihchan rih deuh ala ngai dawn a.U Obeda sawi ang tak takin damdawiin ah ala awm deuh rih a rinawm.

"Ka awmpui mai ang,ka awmpui pawh a duh ber ka ring"U Jeneti'n a rawn tih chuan ka pan alo hnial thuai a, "a lawmawm rualin anu leh Judy an awm a,awmpui zawk rawh se.I pa te lam an rawn haw chho dawn tawh a,sawilawk angin nang chu insawn turin lo inpuan chah phawt zawk rawh Jenet.Judithi pawh ngaihtuahawm anih loh hi.Kan mamawh tak che leh inpun mai aharsa chuang lo ang" ka pan a tih charh charh chuan U Jeneti pawh angawi ve ta hmak.







Tlai rawngbawl hun awm velah kan nupa leh ka pa te nen kan haw a,U jeneti erawh a haw hma ah tangin kan let hma daihin insiam turin ahaw tawh.U Obeda hian engkim ka pa hnenah a hrilh vek tih achiang ta kuarh bawk a,nuamlo ka tih rilruk laiin ka lawm viau bawk.Ka nu leh pa ten ka pasala nu leh pa te an lo fak khu chûk pawh kha a awmlo la ti tawh miahlo.An lo dik em tak anih hi,an mo leh fanu karah an ding a,an fanu tan ngawt lo in thudik lamah an tang a,an fakawm takzet.Tunlai ah nu leh pa tamtak an fate tihsual thup pui a enliam ching an tam tawh nen aw..






In kan thlen chuan U Jeneti alo awm tawhlo a,inthlak hmasa lo in rawng ka bawl nghal mawp mawp.Ka nu hian hotel a chaw vel hi ei harsa a ti riau thin a,chaw châk viau dawn lo mahse in lam atanga ken sak kha tha ka ti ani.

Rawng ka bawl zawh ah zanriah pe turin U Obeda damdawiin lam ah akal leh phawt a,a rawn let leh rualin kan ei ve zui nghal mai bawk.






Judithi pawh alo harh tawh a,ala chau bawk nen a la tawngchhuak tam viau lo ani awm e.A thil tih kha diklo ti viau mah ilang ka khawngaih tel lo thei lo a,a fa achân miau a tin ni.Mipa te hian a zawng zawngin an hrethiam kher lo maithei a,mahse nû tan chuan thlakhat chauh pawh kan pum chhungah naute la awm pawh nise chân ta ni ilang naute piangtawh chân nen anatdan a inthlau lo viau ang.Kan pum chhunga awm,kan thisen a insiam an ni miau a.Chutiang chiah chuan Judithi pawhin na a ti ve dawn lutuk ringawt.





Tul ti lo viau mah ilang kan ei inna vel chu ka pasal in min sengfel pui vek a,thleng em erawh ka sil lui thei hrâm.Zanriah kîl laiin awmpui lak chungchang ka pa hnenah a sawi ri zeuh a,ka pa pawhin a hnial hranlo.Judithi tundinhmun ah phut chi ani dawn lo a,Judy lah zirlai ani bawk nen,kei ka theilo chho dawn bawk a.Thla hnih thum chhung vel chu awmpui lak mai pawh keipawhin ka hnial hran tawhlo.Ka nu kutah engkim dah vek tur chuan a kum in zo tawh lo em ani.





Dar sawm thleng ka pa kan thutpui a,mutur a mit pindan lam apan hnu ah chauh keini pawh kan room lamah kan chho ve.




.......



Kar khat dawn Judithi pawh damdawiin a a awm hnu ah a rawn chhuak ve leh tawh a,room lamah a tawm chawt chawt thung.
Kan ni hman thin dan chu a danglam lo viau a,ngai kan awh tlang leh thei tep tawh ang chu maw.





U Obeda luggage ah chuan athawmhnaw ka khung lut mawlh mawlh a,an student thenkhat ni thum châm in Mizoram pawn lamah an zinchhuah pui dawn a,amah tak phei chuan a huphurh viau nghe nghe.Kal tur dang a han dap kual ngial pawhin a hmu zo thlawt si lo a,an department ah H.O.D alo ni kher bawk nen loh theihloh in a hruai angai ani.





Thawmhnaw ka pack sak tam vaklo a,amamawh tur ang ang ka khungfel hnu ah inbual turin bathroom ka lut ve ta chauh.U Oneda erawh a office lamah Group video call in professor dang te nen an University a engemaw an tih tur chungchang ah an inrawn khawm lawk ani.


Ka inbual zo chu bathroom atang chhuakin ka inthlak a,ka sam chu chhemro tir tumin plug ah ka fit nghal zat bawk a,ka chhem tir tak tak hma a hruk hul thuak tum a ka ding chiah chu ka kap a rawn lum thla puat a,ka pum arawn na nghal vawng vawng mai!





Ka nau neih ala hun silo! Mahse hnuailam ka en a,thisen chhuak awm ka hmu mai bawk silo chuan rilru a ti nuam deuh a,mahse ka chawn a tui rawn luangthla emaw tia ka zuk khawih rualin ka kut a sen ta vat mai le!
"U Obed" thei leh theilo in ka au nghal chul.Ka pum a rawn na zual a,chhuatah thingthi thla rawpin chair ban chu ka hmer ngawt ngawt.Lalpa! Kei hian nau ka chhiat em ni? Nilo
..chu kher chu ni lul suh se.Tunah hian thlariat na a tling tep tawh a,nau chhiat hun ani tawh lo.





"U.." ka au leh dawn a,ka pum anat em vang chuan ka au thei tawh hauhlo.





U obeda a rawn luh mai loh dan atang chuan ka au thawm a hrelo tih a chiang tawh reng si,midang lah inhnuai lamah an awm vek dawn a.Inchung a mu ve Jidithi lah apiah ber ah daih a awm bawk.

Ka mangang lutuk tawh chuan ka hair dryer chu ban tawk tawk in bang lam ah chuan ka vawm pawp a,room lehlam chiah hi U Obeda lehkha chhiarna pindan ani.Lalpa,khawngaihin hre hram rawh se.






Kawngkhar a rawn inhawng ri rawp a,"Bawihi" ti hluk in min rawn pan nghal thuai.




"Enge thleng? I che sual em ni?" Ka lu ka thing nawk nawk a,hair dryer ka vawm lam chu melh zawkin amah ka kohna zawk vanga khatiang thawm kha hria ani tih a inhriat rualin min pawm tho nghal lawp.





Inhnuai lama min chhukpui pahin ka nu a au nghal lawm lawm a,damdawiin lam min panpui chhung te chuan ka vai ruai tawh.Ka nu in kan in lam aphone te chu ka hrie ruai ruai a,damdawiin kan thlen lai leh min pawmchhuah lai bak chu engmah ka hriat zawm tawhlo.



......


Vai deuh chhalhin ka mit ka meng a,a ên em vang chuan ka chhing leh sawk mai.




"Aharh in ka hria"

"Nia tun ah khan a rawn mengin ka hria"



Ka bul velah chuan thawm a awm nak nak a,ka men chhuah leh chuan ka chhungte lo awm thapin ka bul chetah ka kut chelhin ka pasal alo thu kûn lap bawk.




"Mate,na i nei em? Nurse kha kan ko ange"ka nu min hringtunu zawk chuan a ti thuai a, ka pum lam ka dawm nghal thuai.





"Bawihi, na ila nei em?" U Obeda pawhin ka harh tih ahriat rualin a rawn ti ve nghal hlut.




Mangang zetin ka pasal chu ka melh a,ka pum lo thep ta daih chu dawm ngawt ngawt in ka inhnit chhuak nghal hlap hlap mai.

"Hey..hey shh engkim atha,atha vek ania" a rawn ti chûl a, "U Obed,kan naute" ka ti tiau chu ngainatawm zeta nui sukin "ahim..kan naute pawh ahim aw" a ti chu thaw huai in ka lawm em vangin ka tah nuih ta hak mai.





"Thlakim lo a piang anih vangin an up hrih a,up rei erawh angai lo ang.Thlasarih chauh la ni mahse a lian tha viau ania aw Mate" ti tu chu U Sawma ani.Ka lo hmu tel miah lo a.


"Fapa..fapa kan nei e"U Obeda pawhin ka chal a hmui rawn nawr zeuhin a ti ve sup a,a inlakhran rualin "a hmel tha takzet bawk" a ti tel ruih.




Ka naute chu anlo zaichhuak hi ani a,a sang tur in nikhua ka hre tawh miau silo a,zai tawp loh kha chu tihngaihna a awmlo ve bawk ani.
Ka chetsawn anla phal loh vangin ka fapa chu hmu chäk viau mah ilang ka la hmu ve theilo a,mahse Judy in thla alo la hman hlauha ,ka fapa hmel chu Judy phone atang ka en hmasa ta hlauh zawk.Thla kimlo a piang anih vang nge ka hre chiah lo a,a ngo in a hmui asen chawk chawk lutuk ringawt! Ka fapa anih vang nimiahlo in ahmeltha ka ti takzet bawk! Midang fa pawh nise hmeltha ka ti tho ang.





Ka pasal a chhungten ka pa chu kan fapa hming sa turin ti viau mahse ka pa chuan "in tu hmasa ber ani a,apu Hruaia'n hma han hruai se,keini lam chu kan hmanhmawh lo e.Rochana pawhin ala siam belh zel ang chu" tiin alo hnial thung a.Ka pasala pa pawh alawm khawp mai.

Kan fapa hmingah chuan "Vanlalvenhima" tih asa a,harsa taka ka pai chhoh leh Pathian venhimna vang liau liau a dam a hring chhuak thei chauh ka ni tih kan inhria a,ahming chu a inhmeh kan ti hliah hliah tlâng khawp mai.




Ka fapa pawh thlalak atang mai niloin atak ngei ah pawmin ka kuah ve thei ta a,awihawmloh khawpin thlakimlo a piangah chuan alian a,up rei pawh angai talo reng bawk a.





Lalnunthari phei chuan "thlakua i pai tling ang tih ahlauhawm zawk anih kha,alen belh dawn chiang sa sia,i sangchhuak zo dawn chuanglo"min ti khum zek a,kan nuihliam pui tawp ringawt.

U Obeda'n zankhat pawh in lamah min riahbo san duhlo a,a zin pawh thulh ta hmakin hna kal chu sawi loh hospital ah min awmpui ve ta ngar ngar.Kei ai mahin Bawihpuia pawh aharh lai chuan achang tam zawk a tih theih ang.A atchilh hlawm tawp ani ber.






Buaithlak ta ber chu hnute tui ka nei lo lutuk hi ani.Bawihpuia kham khawp ka pe thei lo a,hnute lem nen kan tangkawp deuh ngar ngar tawp.Hnute tui siam thei tur tiin ka chhungten an hriat ang ang eitur tha min hlui a,sawhthing bawl tih te pawh ka ei phah nasa viau.





"Bawihi,a vun rawng leh hmui ah chiah achhûn che anih hi"Ka va ning tak! Kan fapa hi pianghlim mah nise apa hmel a rawn chhunfu nghal lutuk a,ka chhungte leh min rawn kan tu reng reng in "apa chiah chiah" an ti fai vek ringawt.U Obeda lah hian intihtheih nan tak ala hmang zui leh ta nghal a! Huat ah pawh alak theih eih loh reng reng.


"A mitmeng te hi keimah chiah chiah" a tih leh chuan ka nuihpui tawp tawh, "kan thenawmpa ava ang ve" tih ai thlawt chuan angaihthatthlak deuh alawm.





Bawihpuia chu beisei ai takin a tlei duh leh nghal a,mut aduh in a tap khat viau bawk.Naute chu an sen lai chuan an men lai ai an mut chhung an tam zawk thin a,apa erawh in a duh aiin amu duh a ti deuh nge ni tih harh tum deuh hian abiang te hi a khawih akhawih leh thin.A hrethiam chiahlo deuh niin ka hre ber.





"Ka Dudu te a chu amuhil leh tawh ami a"Judy rawn lut chuan a rawn ti lut a,heipawh hian a atchilh ngang mai.




"Judy,class i bunk leh ringawt em ni?"a û in alo ti deuh nghut.




"Teuhlo,vawin chu kan professor chawimawina dawn lawm ni ania,ka rawn haw hma daih a" tiin alo in sawi thiam ve nghal thuai a "Û khawmaw ka lo pawm" Bawihpuia aban zawm zat bawk.
An in pe ve mai bawk a.





Karkhat leh ni thum dawn damdawiin a kan awm hnu ah kan chhuak ve ta hrâm a,in lamah rawn leng lut neuh neuh kan nei nghal nual mai.Ka chhungte lam an rawn lawr chho zing viau a,ka nau pawh hostel atang rawn chhuah hlân anghakhlel tawh viau ani awm e.Board exam hmabak ani si a,hostel ah an in dah lut a,engtin nge maw an in thlem thlum mai theih ni?






"U Obed,Bawihpuia hian hnute a hne duh miah lo" hnute pek hun ani tawh si a,ahne tha duh derlo!



"Ala tam lo aniang" ka melh nghek ringawt,a fapa ngawt alo melh thung a!




"A hnêk a hun tawh alawm" ti sap in pek luih leh ka tum pawh chuan a la hne duh chuanglo a, "formula zawk kha minlo ban" ka tih chuan min ban ve mai bawk.
Hnute lem zawk ka barh chuan ahne ta dawk dawk a,ka hnual nghal rawih thei.Nû nih tlinglo ta riau ah ka in ngai bawk.


"Bawihi, ahnek ngun zawk vangin ahne thiam zawk hrih anih kha.Hnute tui i neih that hunah chuan bottle ai khan ala thlang mai ang" tiin ka pasal in min han hnêm ve bawk mahse hrehawm ka tih na ala reh thei derlo.





Tinge maw nau neih tawh hnu ah pawh hnute tui ka la neihloh em em le? Eitur tha an tih ang apiang eilo ka ni miah silo.Midang tam chuan a ho viau angin alang pawh ani maithei.Kei a tan pawh avawikhat na mah nise ka ngaihdan ah chuan nu hnute tui ngei ringa seilian naute te hi naute leh nu inkar ti nghet tu an ni ka ti ve tlat a,chuvang a hrehawm ti em em pawh ka ni.





"Ka fapa in duhlo mahse keimah ka duh tho alawm"




"Rochanpui" ka ti nghek a,Bawihpuia alo phu leh zawk si chu ka awi nghal hlu hlu."i va mawl tak" ka ti zawi tel sap tho.
Chimawm zetin U Obeda erawh akiai suk suk thung.






"Tak tak a,ala nau bawk a ahnêk thang vang mai mai anih kha.Rei a duh lo tawp ang"dam thlup hian a rawn ti leh a,rilru pawh anuam ve ta deuh.







#ala tawp mak dawn lo ania aw...inlo ngai tawp ringawt ange.
Show post links
Top