STORYFB.COM

DARK DESIRES


CHAPTER 13




“Lilia alfero” Dominic-a thinrim taka min enna chu ka en lêt ngam lo, ka hmaa ka mi ṭanpui pa leh a hote khi sawng chu ka melh ringawta, ka unaupa a dam tih ka hriat hma khân Dominic-a company seal ka pe a nih kha, tûnah Dominic-a an rawn ti buai ta chiah reng bawka.




“Hetiang hi maw i lo niha? I chunga ṭhat chhuah tum pawhin min la phatsan tho a maw?” a rawn tileha, a aw ah chuan thinrimna leh rilru natna a lang thei. “Frederick tûnah” ti tuarin silai a puak zuia, ka ṭanpui pa tlu tawp ka hmuh rual chuan hlauhthâwnna in ka khat nghal bawk.




Thâwm reh duk mai leh Dominic-a thinrim thaw ri leh hrawk ṭhin te chuan ka thauah min mana, ka che ngam tawh lo. Ka mit ka chhing renga, en pawh ka en ngamlo, ka lakah a theihna zawng zawngin min duatna a ti langa, hetiang hian ka thungrûl thung si a nih hi.




“Dom ka tihpalh, ka u i that anga ka hriat avâng khân ka thawhpui mai a nih kha, mahse hetiang hi chu ka tum dân a ni lâwk bik miah lo a nia” tiin ka phun sap sapa, ka hma a ruang tlu zozai te chu ka hmuh hmaih heklo, ka ṭah a chhuak ut ut a Dominic-a chuan ka khabeah rawn dawmin min kuai dâk sawka.




Thinrimna a khat tih hriat tak hian min melh rûn bawk “I laka ka theih tâwp ka chhuah chung pawha engvanga min ring theilo leh min duh ve thei miahlo nge i nih le Lilia” thinrim leh beidawng aw zet chuan a ti a.



Chutah a silai chuan min rawn tin ta ran mai “Frederick ruang ho kha dah bo rawh u, chuan keimah chiaha Lilia hi hmachhawn ka duh” a tihchuan ka hlauthâwng zual.



“Ka thah lohna tur che sawi teh, engvanga kha seal kha pe nge i nih?” a rawn ti hriam leh hrawk a, ka mitah chuan a melh reng bawk. “Ka sawi tawh kha ka unaupa i that emaw ka tih avâng khân i lakah phuba lâk ka duha, mahse seal ka pêk bâk kha chu ka pui miahlo Dom min ring rawh” tiin ka hnaih dâwn a, min lo namsawn nghal dawrh mai.




“Hmeichhe le lo zet ilo nih hi Lilia alfero, hmangaih che hi i phu hlawl lo” a tihchuan ka mittui a tla nghal fapa, ka insut ri a hriat avâng chuan rum nghutin “Ṭap hauh suh, ka chhiatna tur chiah maw ilo zawn ni. I unaupa chu tûnah ngei hian i chân ang” a tihchuan ka meng kâwk a, a phone phawrha mi biak a tum chu ka va man bet nghal vat mai.





“Dom, tisuh ka tihpalh ka tihpalh takzet, khawngaihin min ngaidam rawh. Ka hmangaih che, khawngaihin khatiang ti suh, ka u chu min hmuh tir rawh, Dom ka phatsan tawh miah lo ang che khawngaih takin ka insawifiahna ngaithla rawh” tiin a kut chu ka vuan beta.



Min lo namsawn nghâl lâwp mai, ka chal chu bangah chuan ka tauh dawta, a na lutuk chu ka ṭhen nghal sawk bawk. A inthiamlo deuh nge min melh rûn rûn in a phone chu a en leh zawka, chutah in ngaihtuah harh tih hriat tak hian tu emaw a call nghal zat bawk.





Nilo hetiang thil hi ka tih tir theilo, pâwnlam pan chuan ka tlân hlawk hlawka, kan awmna ramhnuai reh ruihah hian tu dang mah an awm lo, pâwnah chuan ruang seng hawi ho an awm a chu zawng chu.



“Lilia ding rawh” Dominic-a rawn ti tuar ri chu hre mah ila ka tlân zel tho, silai puak ṭhuaiin ka châwn puar ah tak chuan a rawn verh tlang sawka, leiah chuan ka tlu lek lek, ka pum chu dawm vatin ka in ti chak hram hrâma. Ka tlân lui zêl bawk, ka hmalam a lui luang awmna chu panin ka tlân zela, ka mittui te chuan ka khaw hmuh a ti phe ruai tawh bawk.




“Lilia ding rawh” Dominic-a aw chu a chang ṭha viau, mahsela kham hmawrah ka ding tawh tlat, Ka hnuaiah chuan tui chu a luang ri hum hum renga, mahse hlauhna chhe te mah ka neilo.




“Ilo hnaih leh chuan ka zuangthla ang, Dominic tumah kha rawn kal hnai suh u” tiin ka tawlh belh leh sauha, Dominic-a hmêl buai nak chu mittui nên ka en renga.



“Ka hmangaih che ka tih kha dâwt a nilo a sin Dom, chuan ka tihpalh takzet” tiin ka ṭap chhuak leh hlawp hlawpa, “Lilia lo phei rawh, ka that lovang hlim takin kan awm dâwn a nia, lo phei rawh le” ka lu ka thing nawk nawka.


“Ka thih i duh a ni lo'm ni Dom? I duh ang ngei chuan i unaupa phuba chu lâk in a awm tawh ang, ka thlarau tal chuan hahchawlhna a hmuh ve tawh ka beisei, nang leh kei hi pakhat zawk zawk kan thih loh chuan he phuba hi a tâwp ngai dâwn lo, ka u tal chu khawngaihin tina suh aw” ka hnuaia tuifawn bulh bulh chu thlirin ka phun sapa.



“Tisuh Lilia” a tihchuan ka nui saka “Ka hmangaih che Dominic” tiin tuiah chuan ka zuangthla nghâl zata, ka nui sak mai. Tûnah chuan ka nun hian hahchawlhna a hmuh ve tawh ka beisei.



Thil ri bawrh leh ka hriatna hla nghâl duk avâng chuan ka thih loh rêng ka ring tawh lo.


DOMINIC-A POV...


“Boss ti suh” Frederick-a leh Fresher min rawn dawm hma chuan ka zuang thla ve nghâla, nilo ka chân theilo, tui in a len mêk chu um zuiin ka hleuh thla buan buana, a chânga a pil leh ṭhin chuan min ti hmanhmawh zual, kan hnuaiah chuan lengkir sâng zet a awm tih ka hria, chu mi thlen hma a ka chhan hman lo a nih chuan!



Hmanhmawh zet chuan ka hleuh thla zela, ka au pah bawk. A tâwpah a bânah manin ka lamah ka pawt hnaia, vau kam lam pana ka hleuh pui lai chuan ka hote pawh an rawn thleng ve nghal bawk nên min rawn pui vata.




Vâukam kan thlen rual chuan Lilia chu ka buaipui vata, engmah a hrelo tih ka hriat chuan min ti hlauthâwng zual “Hmanhmawh rawh u, damdawiin a rang thei ang bera thlen pui angai” tiin ka vin hrawk hlawma, Lilia chu pawmin an ni chuan min rawn zui ve bawk.




Engmah hrelo a a mit a chhing reng chuan min ti hlauthâwng zual. “Lilia min kalsan theilo, i hria maw min kalsan theilo, nang leh kei hi inṭhen hrang tur kan nilo” tiin ka phun pah mawlh mawlh bawk. Car bul kan thlen rualin a chhûngah chuan ka luhpui zui vata, hmanhmawh turin ka hote chu ka vin tuar tuar bawk.




“Lilia ka hmangaih che, hey min kalsan miah suh aw. Ka tihpalh ka tihpalh” tisupin a taksa vawt vek tawh chu ka pawm beta, a ke ka kahsakna aṭanga thi chhuak reng ka hmuh chuan ka thawmhnaw chu phelh sawk sawkin ka tuam zuia, lui lam a pan avâng khân a tlân theih tawh loh nân ka kap a nih kha, mahse rinai he hmeichhia hi a lo tuarchhel zek mai.




A kut chu hûm sakin ka fâwp vang vanga “Min kalsan theilo” tiin ka phun leh sup ṭhin, ka dam chhung zawngin hetiang anga hlauhthâwn hi ka la neilova, ka chân mai ang tih ka hlau bawk. A seal pêk kha ka hrelo a ni rêng rêng lo, chuvanga helai hmunah pawh hruai ka ni, mahse kei min tih chhiat vek a duhna khân min ti naa, ka chân phalloh zia erawh ka hre chiang ta hle thung.



“Boss kan thleng e” tih rik rualin motor chhûng aṭang chuan ka zuan chhuah pui a ni ber mai, damdawiin lam ka pan rualin a thawkte chuan min lo pan vata, Lilia chu ka kut aṭangin an la sawn ta bawk. An hnungah chuan ûm zuiin ka ai pah tuar tuara “A thi tur a nilo, a dam leh ngei tur a ni. Hre reng rawh u, a thi thiang lo” ti leh hrawk in emergency room-a an luhpui tâkah chuan ka ding zuia.



Ka sam chu ka tuai nghâl pawk bawk, tûn ang bâka hlauthâwng leh mi chân ka hlauh hi an la awm ngailo, nurse rawn chhuak chu lo pawt in “A ṭha em?” ka ti deuh hrawka, hlauh hmêl taka min en hian “Thisen a hloh hnem lutuka, nau a pai bawk si a a dinhmun a ṭha chiahlo, Mr Johnson lo inbeng fai hrâm teh, kan chêt vat a ngai a nia” a tihchuan Frederick-a chuan min rawn pawt sawn vata.




“Boss chêt tir phawt rawh, madam tân vek a nih hi” a tih tâkah chuan ka inthlah dul ta hrâm bawk. Bang nghêng chuan ka ṭhu thla a, a aw ri a natna tel khân tûnah pawh min vit ngulh ngulh a ni ber.



Thaw leh hawk ṭhin in chunglam chu ka melha, tûnah chuan mi pakhat chiah auh tur ka nei. Ka tum ngai miahloh leh mamawh ka in tih ngailoh chu ka aua“I awm takzet a nihchuan ka fa leh ka hmangaih saw min chhan sak hrâm ang che, i awm ngei a ni tih ka hriat theih nân an pahnih nunna saw min chhan sak hrâm rawh, misual tak nimahila an ni saw ka chân phallo” keima hriat tur tâwk chuan ka sawi chhuak mawlh mawlha.



Darkar chuang hnua Doctor rawn chhuak chu panin “Enge an an?” ti a ka zawhna avâng chuan ka dârah rawn bêng in “Mr Johnson naute leh a nu chu an ṭha rih e, mahse a nu hian thisen a hloh hnem êm avângin thisen pêk char char an ngai rih dawna, ICU ah dah an ngai rih ang. Pakhat bâk in a hmuh theih rihloh” a tihchuan ka thaw huai mai.




“Tunah ka hmu duh” ka tihrual chuan “Nakin deuh ah kan han sawn phawt ange” an tih tâkah chuan ka hnial duh bik lova, ṭhutthlengah chuan ṭhu in ka in ngaihtuah vang vanga. Ka fa leh a nu ka la chân lo tih ka hriatna chuan min ti thaw huai bawk, amah nên chhûngkua din ka châk zia chu tûnah ngei hian ka chiang bawk.



A hmuh theih tawh thu an sawi tâkah chuan nurse chu ka zui vata, ka thawmhnaw hâk tur an rawn lâk rual chuan in bel mawlh mawlhin khuma ka hmeichhe mu bam lam pan chuan ka phei chhet chheta, alakah ka inthiam lo hle bawk. Ka fa ngei a paia, keichuan ka la hliam tak chu ani si a.



Oxygen vuaha a mit a chhing tlat chu enin alamah ka kûn hniama, a chalah chuan ka fawh sak vang vang bawk. “Ka tihpalh, mahse i thih ka duh ngailo, ka hmangaih che” tisupin a kut chu ka hum sak vang vanga, a mittui rawn luang ka hmuh chuan ka lung a che dawt mai.



“Rawn harh vat rawh aw, i rawn harh veleh i unaupa leh i ṭhiannu pawh i kiangah an awm tawh anga, khawvêla mokawr nalh ber leh mo nu vânnei ber i nih theih nân kei hian engkim ka tihsak tawh ang che” tilehin a bulah chuan ka ṭhu thla a.



Min chhâng lo mahse ka ṭawng a hre thei tih ka hria, a mit a chhing nâng in ka thusawi engkim chu a hriat hmaih dâwn lo tih ka hre bawk.


“Mr Johnson hun a tâwp tawha, a ṭhat vak hma chu ICU ah hian a awm reng a ngai dawna, a ṭhat veleh ward pângngaiah chuan kan in sawn thei chauh ang” nurse chu ka melh zawka, min lo en kar lehnghâl.



A mitmeng chu ka duh hauh lo, hmeichhe tam tak hian min ngaizawng tih ka hai biklo, he nurse pawh hi chutiang chiah chu a ni. “Enkawlna ṭha ber ber a dawng tur a ni, a chungah thil pawi a thleng a nih chuan ka chhuah mai mai lovang che u” tinghutin Lilia chu ka ena.



“Ka lo kal leh vat ang, pâwnah ka awm anga. Ka vêng tlat dâwn che a nia aw” tiin a chalah bawk chuan ka fawhsak leh vang vanga. Phûr lo zet chuan thawh sanin ka chhuak zuia, “Veng reng ang che u, khawiah mah rei tak kalsawn hauh suh ang che u, a him lo a nih chuan in tuar ang” tiin ka kalsawn zuia.




Thil ka ei ve phawt a nih loh chuan ka kul chau thuai dâwn tih ka hailo, damdawiin piah restaurant ah chuan chawlin a thil ei duh deuh ṭhin chu ka chaha, vawikhat mah ka eisak duh ngai lova, a awm loh lai hian ei ve chhin chu a ngai a ni.



Min rawn chhawp rual chuan ka ei vata, a tui viau mai. A thak tih mai loh chu, hetiang hi engtin nge maw a ei reng peih ni, hei vâng a nih hi a thinchhiat a a luhlul em em ni, thak a ngam vâng a nih chiah hi.




Rei awm lovin ka haw zuia, damdawiina riah pawh a mah ber a hmuh theih chuan loh avângin a ṭangkai viau lo. Naktûkah ka kal zâwk mai ang chu, thâwk la ham hamin ka phone chu ka phawrha “Fresher naktûkah Lilia ute kha lo va hruai chhuak ang che, ka inah an chêng tawh ang. Tlân chhuah tum lo sela, engkim hrilhfiah ang che” tiin phone chu ka dah zuia.




Ni e a tirah kha chuan thah kha ka tum ngeia, Lilia kha tihnat ka tum vâng a ni pakhat, mahse ngaihdan dang neiin an nun ka zuaha, tûnah chuan ka tisual lo viau in ka hria. Ka hmeichhe hmangaih chhûngkaw neih chhun an ni tawh tlata, keia tân pawh ka chhûngkua ang an ni bawk.



Lilia heti taka ka hmangaih thei hi kei ngei pawhin mak ka intia, ka nau bialnu ka vei tlat erawh ka inthiam bik lo, mahse tûnah chuan ka nau a thi tawha. Ka duh chu tih a thiang tawh tlat, in ka thlen rualin ka room lam ka pan tlanga, in tifai leh tê tê in ka mu zuia, Lilia ka ngaihtuah bawk nên rei erawh in lamah awm ka tum hauh lo.




Thâwk la ham hamin khumah chuan ka in let kuala, a tello a mutthilh har ka tih tawh zia chu ka hre chiang ta hle bawk. Vawiin khân chân ka hlaua, kumkhua a hmu tawh lo tur phei chuan ka in dah ngam lo, ka nunah a vawikhat nân chân hloh em em leh a tello-a awm ka zuam lohna awm chhun a ni.



Zinglam dar thum vêlah tho chhuak leh in damdawi in lam ka pana, ka company pawh tûnah chuan rilru ah a awm thei rihlo, ka Assistant ka ring tâwk a, a ni in engkim a lo buaipui thei turah ka ngai.




“A rawn harh tawh em?” ka mi vên tir te pahnih hmaah chuan dingin ka sana chu ka bih zawka “Harh lo boss, Doctor in a check zo leh chiah a ni e, naktûk lamah an en chhin anga chumi a zirin an sawn chhuak ang” an tihchuan ka bu nghata.



Ṭhutthlengah chuan ṭhu in ka mit ka chhinga, ka thu hnial lo leh min do reng tum lo hian awm ve sela chuan hetiang dinhmuna kan din reng a ngai lo tur. A luhlul lutuk leh min huatna hian tum loh tawpin min awm tir leh ṭhin chu a nih hi.



Khaw var hnuah a harh thu nurse in a rawn sawi avângin ka lût zui vata, an sawi ang ngeiin min lo en kar mai. “I ṭha em Lilia? Min hre thei em?” ka tihrual chuan a mittui chu a luang leh ngiai ngiaia, hruk sak vatin duat zet chuan ka chûl a.



“Ka tihpalh, ka tina leh tawh lovang che. Ka ngaidam che a, nangpawhin min ngaihdam ngei ka beisei, tûn aṭang chuan inbumna a awm tawh tur a nilo, hlim takin kan awm thei tawh ang” tiin ka nuih saka.




A mitmengah chuan sawi duh tam tak a nei tih ka hria, oxygen ala vuah miau avângin min chhâng theilo thung.


“Dam vat vat la, mo kawr mâwi tak nên a i awm hun hmuh ka duh a nia, ka duat ngawt ang che. I u leh i ṭhiannu pawh naktûkah ka lo hruai ang” ka tihchuan a mittui bawk chu a rawn tla leh a, hetiang khawpa a lungchhe hmêl hi ka la hmulo.



A hlim hmêl chiah hmuh ka duh tawha, ka tina leh tawh ngai lovang, kumkhua in ka kiangah a awm reng tawh bawk ang.



“Ka hmangaih che” ti lehin Doctor in biak rei a phal loh avâng chuan ka ngawi zuia “Zaninah ward pângngaiah kan sawn thei tawh ang, rin ai a ṭha chak riau mai. Chutih rual erawhin mut tam a mamawh a, biak harh loh hrâm hrâm in tum dawn a nia” a tihchuan ka bu nghata.




Keipawhin a dam hma aia duh ka neilo, dam vat sela hlim taka siam ka duh tawh. Ka tina in ka kalsan leh tawh ngai lovang, a tello a ka awm theih loh zia ka hre chiang tawh bawk nên ka hlatah a awm tawh loh nâna nupuia ka neih vat a ngai a ni.




“Enkawlna ṭha tak a hmu ngei tur a ni, engkimah a ṭha ber vek, a chawi ngai chu ka chawi vek mai ang. Ka nupui hual hian enkawlna ṭha ber ber dawng rawh se” ti nawn leh ngatin ka chhuahsan zuia.




Frederick-a te pawh a ute rawn hruai tura hrilh sa an ngai a ni. Pâwna ka chhuah leh chuan rin loh lutukin Daisy ka hmu a, min hmuh rual chuan min rawn pan nghâl vat mai, min kuah mai a tum chu ka namsawn rawka.



“Baby min kalsan chhan hi ka hre miah lo ania aw, min rawn hmuh i tum tawh bawk silo. Ka lo nghâk reng zêl che a, hetah hian min rawn zui em ni?” a ti chu ka rûm nghata.


“Awmsawn rawh Daisy nang hi ka ûmzui hauh lo che, he damdawi inah hian ka hmeichhe hmangaih a awm vâng zâwk ani e. Kalsawn vat teh” tihlukin ka nam sawka, rin ang ngeiin reporter an lo awm leh nuaih nuaih tawh mai, hêng ho hian engkim an ti buai leh zo a nih chuan an châk lovang chu.




“Kalsawn rawh u, in zawhna engmah ka chhâng dâwn lo” tihmukin ka car ah chuan ka ṭhu lût zuia, company lamah va kal lawk ka duh. Lilia bulah awm châk viau mah ila pâwn a nghah reng a ngai bawk nên a hmuh theih tak tak loh avângin ka tân damdawi ina awm reng a ṭûlna a awm heklo.




“Boss seal chu kan la lêt tawh e, tin phatsantu ho pawh bân vek an niin an hna an chhunzawm thei tawh lovang, an hna dil lam thlengin an harsat tawh ang” ka Assistant chu enin ka bu nghata, ka chairah chuan ka ṭhu thla nghâl bawk.



“Pi Helen inneihna tur lo buatsaih ta che, ka nupui hual dam ve leha neih ka duh. Lo buatsaih sa vek la ka duh, suprises ka duh bawk a engkim i hriatthiam ka beisei” tiin ka melh ngara, hmeichhia mah nise a rintlâk a, amah a in vêng theiin ka tân a rinawm hle bawk.



Hei vanga ka PA ah pawh ṭang thei a ni bawk, engkimah a rintlâk vek avânga duh em em pawh ka ni.


“Wow chu kan sakawlha chuan nupui neihna chângte i hre ve tawh dâwn a nimaw? A hma a mi kha em ni? In thlalak ka lo hmu a, sam dum hlap hmêlṭha zet kha” a tihchuan ka nui suk ringawt, Lilia hi chu a hmêlṭha chiang a lawm.



Hei vâng te pawh animahna ka vei em em ni “Ka sawi dik chiang mai, ka lo buaipui dâwn ania engkim famkim taka tih i duh leh ngeiin ka ringa, tuipui kam lamah em ni ni ang?” a rawn tihchuan ka bu nghata, Lilia khân tuipuikam a ngaina tih ka hre tlata, a duh ngeiin ka ring bawk.




Tûnah chuan nupui neih tum ngai rêng rêng lo khân neih ve ka tum chu a nia, keimah pawh hi ka in hai lek lek ṭhin, Lilia vâng vek a ni.



Engkimah a ni hian min thlâk danglam ti ila a dik ang.



LILIA POV.



“Ka nau” chu aw ka hriat rual chuan kawngkhâr lam chu ka ena, ka u hmêl ka hmuh rual chuan lâwm avângin ka mittui a luang zawih zawiha, ka ṭhiannu hmêl ka hmu tel te chuan min ti lungchhe zual.



Tûnah chuan ward pângngaiah ka awm tawha, ka ṭha chak viau mai lehnghâl. Ka u leh ka ṭhiannu an thi tawh emaw ka tihchu enkawl ṭhat tih hriat tak hian an taksa te chu a hrisêl ṭha tih a hriat, ka lâwm zia chu sawi chhuah ka châk a, mahsela ka ṭawng thei rih der silo.



Dominic-a chu kan piahah ṭhu in phone a hmang mawlh mawlh renga, tu tak chu bia ang maw. Ka u leh ka ṭhiannu a that emaw ti a ka huat em em laite chu ka ngaihtuah chhuaka, ka lo rinsual zia leh ka rin ang a nihloh zia chu ka hre chiang ta viau bawk.



“I lo damlo renga, i pasal tur pawh i ti hlauthâwng a lawm, mâkpa ṭha tak tur a niin ka hria. Ka lo ngaihtuah ai daihin a fel lehnghâl” ka u chuan a rawn ti a, ka chhâng lo chhûngril lamah erawh ka nui ver ver thung.



Ka u in a pawm chuan ka tân pawh chu aia lâwmawm chu a awm lo, saw mipa saw ka tina in ka bum leh tawh ngai lovang. “I vânnei bik ngawt mai, mipa hausa leh hmêlṭha em em mai kha i ta a ni thei bik dâwn a nia ka thik lutuk che” ka ṭhiannu chu enin oxygen chhanah chuan ka nui saka.




Ṭawng theih vat ka châk, mahse ka Oxygen vuah hi la lakthlak an phal siloa, ka vuah reng a ngai a nih hi.



“Ka nupui hual kha lo sawi hmuh vak vak lo ula ka surprise thei nâng, kha zungbun pawh ka bun tir thlap tawh kha, a dam ve in kan innei ang” Dominic-a chuan kan lama rawn phei pah chuan a ti a, ka bulah rawn ṭhu in ka kutah chuan a fâwp zauha, ka mitmeng aṭang chuan engkim a hrethiam tih ka hria.




He mipa hi ka hmangaih, ka hmangaih lutuk tlat. “Dam zung zung rawh aw, i tello chuan ka ruak veka, nangmah chiah ka neih chhun i ni tih i hriat kha, tûnah chuan i chhûngkua an kim tawha, ka chhungkua tur a i awm ve a ngai thung tih hre reng ang che” a tihchuan dam vata a nupui nih ka châk a ni.



Ka kut a hmer na chu ka hmer lêt salha, tûnah hian ṭawng theiha ka hmangaih thu hrilh hi ka châk lutuk tlat, mahse ka thei rih miau siloa, ka u leh ka ṭhiannu chu an lo nui dûn hak haka, chu chuan min ti hlim viau bawk.



Tûnah chuan Dominic-a sawi ang ngeiin ka chhûngkua chu an kim tawh a lawm, ka tân chuan chu tluka hlimawm a awm dâwn em ni.


Doctor te pawhin min ngaihsak in a khât tawkin min rawn check renga, Dominic-a vâng tih ka hria. A ni hi chu khawiah pawh ngaih pawimawh a hlawha, kei ang lo takin mi tinin an zah bawk. Amah avângin mi biak ṭhat ka hlawha, a mah hi awm lo se chuan tûnah hian hetiang a mi zah hi ka ni thei kher lovang.



He mipa hi ka hmangaiha, tihnat leh pawh ka tum tawh lo, misual tak emaw ka tihkha ka tân venghimtu a lo ni a, nunrawng leh hmangaih phu lo ti a ka lo sawi ṭhin kha a hmangaihna ka phu loh zâwk zia lah ka hailo, tûnah te hian a duh chuan min kalsan nal nal thei, amah ka bum miaua.



Min kalsan pawh nise a âwm lo hauhlo, mahsela min vuan lui ṭang ṭang zâwk si a.

NEXT AH LAST ANG AW