STORYFB.COM

LET's LOVE AGAIN



By Ziki nu



Chapter-17




"Lo thu la, ka han inthlak ve lawk ang aw" tia kal mai a tum chu a banah ka lo vuan tang a, min rawn en leh lai chuan mak ti hmel a pu deuhin ka hria.



"Inthlak rih lo mai rawh" ngenngawl zetin ka lo ti a, ka awm dan chu a hrethiam aniang a bu ve nghut a, sofa ah chuan min thut thlak pui nghal bawk.



Reilo te ah pindan atangin Nu Nutei leh an naute chu an rawn inpawm chhuak leh a, Famkima chu rawn pe in "I pa a lo haw tep ang, chaw kan ei hma dawn nia" a ti a, choka lamah a kal leh nghal nal nal bawk.



Rinfeli te naute chuan min en duh ngang mai a, a mitmeng a fiah kal a, naute hmeltha lutuk han tih tur chu a nilo na in a duhawm ve hle chuan ka hria, a biang a rahin a chum tur a, min en reng avangin ka han chhaih ve zuk zuk a, mahse a nuu duh miahlo.



"In naute hi tunge a hming?" ka tih chuan "Liansanga a nih hi" tiin Famkima chuan min lo chhang vat a, a phone a rik avangin naute chu ka malchungah a rawn dah chawt a, "Ka'n chhang lawk ang" tih leh chhuah a rual nghal mai bawk.



Rintea'n a lo chhaih ve zuk zuk lai pawh chuan min en kal reng a, ka awm a tinuam lo dawn dawn mai.



"Hmeltha a ti che anih dawn hi" ka bul ami lah chuan a ti sam mai a, a tah bik loh vangin keipawh chuan ka pawm tha ve sauh sauh bawk.



Rei vak lo hnuah kailawn atang chuan Rinfeli a rawn pen thla tharh tharh a, a lam ka hawi rualin ka naute pawm chu a tap ta vak mai a, engtin ka ti pawh ni siloa chutia a nu a hmuh rual a tap vak ringawt chu nuam lo duh tak a ni.



"Engtinnge in tih a?" tih hlak hlak pahin kan bul a rawn thlen rual chuan a pawm kang nghal lawp a, "A hmu che a, a ngen ve che anih kha" Rintea'n a ti chu a melhrum hle ringawt.



Min be lovin pindan lamah an inpawm lut a, nuamlo ka tih na a zual tulh tulh mai. He in chhunga mi tute mai pawh hian hmelma en in min en vek tawh ni maiin ka hria, thawh lawka tlan chhuah nal nal mai te ka duh.




"Hrehawm ti duh suh, pasal a neih atang hian a thinchhe zual a" ti supin ka sam a rawn tuai zauh a, ka zah zel ah "Eirawng chu bawpui an ngailo em mawni le?" ka ti ta daih a, awmdan tur hre lovin ka ring ka fan ka fan ringawt.




"Ngailo e, engmah tih a ngai lo, ka han inthlak ve lawk.. " a sawi zawh hma chuan "Kal daih bik suh" ka lo ti hlar a, a tel lo a awm chu hreh takte in ka hreh a ni.





A bana ka vawn tung lai chuan a nu kha choka atangin a rawn chhuak ve chiah a, kan awmdan chu mak a ti deuh nge min en vung vung hnuah "I pa chu a rawn tlai leh si dawn anih kha, I u te kha an awm chuan chaw ei ka peih tawh ania, va ko rawh" tiin ka bul ami chu a hrilh a, keichu min melh leh tawh chuanglo.



Tunah dar 5 a ri dawn chauh a, chaw ei an peih hma khawp mai. Eirawng ka bawlpui loh bakah chaw ei tak ngial pawh ka siampui si lo a, a che vel thawm engmah ka hrelo bawk nen, inthlahrun a na duh kher mai.



Famkima zawk chu a thutna atanga tho nulhin a nupui te luhna pindan lamah khan a lut ve nghal a, a ko dawn ni hmiang ka ti mai.



"Lo kal rawh le, chaw kan ei hma anga nangma tan pawh a hahdamthlak zawk ang" tiin ka bul ami chu a ding ve nghal vut a, hreh ru deuh chungin ka zui ve hna hna ringawt.





Nu Nutei chu dawhkan kilin a lo thu fel der tawh a, kut ka sil laia Rintea'n a pa awmna a zawh chuan an hna thilah a lo haw tlai tur thu in a chhang a, ka lo thaw ve huai ringawt.


Nu Nutei ka nel tluk zetin Pa Zama pawh ka nel thin a, a ni phei kha chu pa fiamthu duh tih takah a fapa nen pawh hian innei mai tawh turin min chhaih fiam fo thin. Mahse engkim mai kha hun kal tawh ami a ni a, thil tam tak a thlen leh tak hnu hi chuan an hmel hmuh ringawt pawh ka hreh ngawih ngawih a ni ber.




Kan pathuma dawhkan kan kil hnu lawkah Famkima te chhung pawh an rawn lang ve nghal a, Rinfeli chu a la lawm vaklo a ni ang tum bar chung hian "Khati vak vaka tah kha a la nei ngailo hrim hrim" a ti leh thin a, awm nawm loh sa nak alai chuan.




Ngawi rengin chaw kan bar mawlh mawlh hlawm a, nu ber a ngawih tlat chuan titi han vawrh luamna chi ni heklo, ka bul ami chuan chawhmeh min suahsak deuh reng a, ka thlenga awm sa ringawt pawh hi ka ei zo thei ngût tawhlo ang.




"A tawk tawh rih" ka tih pawh chuan "Ei teuh rawh" tih pahin min suahsak leh thin a, chu tih laia ka ep chiaha thu Rinfeli lo ner sak pawh chu ka hmu hman.



A fapa a pawm pah a, nuamlo ti deuha chaw ka ei lai chuan beisei loh deuhin "Zirtirtu hna maw I thawh tak Sawmi?" Nu Nutei chuan a lo ti ve khauh a, ka chhang rang ngang mai.



Ka thawhna school te ka sawi chuan "Kan nau pawh a lut ve alawm" a lo ti ve leh a, hmanni khan Rinfeli'n a lo lam tak kha maw le.



Chhan let ngaihna ka hriat vak loh avangin ka nui ringawt a, min nuih let ve leh si lo chu nuam ka ti leh chiah lo.
Rintea zawk chuan a lo sawipui luam a, ka thawh ngheh thu leh kan school zirtirna that thu te pawh a thiam ang angin a nu chu a hrilh ve a, kan hmaa Rinfeli te nupa erawh chuan ngawi rengin an chaw an bar mawlh mawlh thung.





Chaw ei kham chuan thlengte ka seng pui ve a, thleng sil ka tum chuan Rintea zawkin lo phallo mah se ka chuh lui ve tlat a, eirawng ka bawlpui mang si lo a, thleng tal ka sil loh chuan ka awm a nuam thei lo ang.




Ka lo chet tlat fo tawhna in a nih vangin an thil dahna te pawh ka hre bel ve tawh viau a, tlem te tak tak bak danglam a la awm lo.



Midang zawng sitting rom lama an thut phei tawh laiin Rinfeli chuan dawhkan a la hru ve mek a, min biak loh chuan ka be hmasa hreh ve deuh tlat.




Ngawi rengin thleng chu ka sil a, a dawhkan hrukna puanchhia chu suk tura rawn dah pahin "I sil zawhah khan inbe lawk ang, pawnah lo chhuak ang che" a rawn ti a, ka chhan let hma in a kal nghal daih bawk.




Engnge a sawi tum tih chu rin dan ka nei thiam a, zaktheilo min tih thu leh Rintea bansan tura min duh thu vel bak a nih ka ring vak lo.



Sil tur a tam lutuk loh vangin keipawh chuan ka sil zo thuai a, sitting room lama ka phei chu ka lam an lo hawi deuh thap a, Rinfeli pawh a pasal bulah a lo la thu ve reng.



Min en reng vang chuan awmdan tur ka hre mai lo va, mitmenga min rawn signal zauh hnuah "Kan chhuak lawk" tia Rintea melh zawk pah chuan pawn lamah ka chhuak zui a, rei lo te ah Rinfeli a rawn chhuak ve nghal bawk.




"Janisi-i i hria em?" a tih chuan ka en phawk deuh a, "Janis Lallawmawmi, a pasal chu Lalremsiama" a ti nawn leh a, ka ngaihtuah ngial hnuah hre chhuakin "Aw.. " ka ti fan raih a, Janis-i a tih kha chuan ngaihtuah dan ka thiam mai lo a, mahse Remsiama nupui anih chuan Nunpuia Thiante kha an nih ka ring, chaw te pawh kan ei ho kha..



"Janis-i kha Famkima cousin ania, i chanchin sawi tur a hre teuh" a ti leh nghat a, a aw ri chu a nem viau lo khawp mai.



"Min hre viau tur pawhin vawi khat chiah kan la inhmu sia" ka ti chu a awih chiahlo nge ni za lo hmel deuh hian a lo nui hak a, "I chanchin tam zawk hi chu ama hnen atanga ka hriat a ni, mimal ang zawnga huatna che ka neilo ka tih kha, mahse Rinsangzuala hi I tihnat nawn leh atan chuan ka phal tawhlo, engkim I hriat kha, a nunna kan chhan hman lo tep" a tih lai chuan lo pawt chatin,
"Janis-i chuan engtinnge min sawi a?" ka lo ti a, thaw chhuak halhin "Sawi chhuah leh tum pawh ka ni chiahlo" a ti a, mahse ka en reng vang chuan "Nunpuia nena in chanchin min hrilh vek, chaw te pawh in ei ho a, inngaizawng lo ula couple ho zinga chaw ei ve tur khan I zui miah lo ang" a ti nghat nghat a, thinrima sawi chu a ni bik chiah tawhlo in ka hria.




"Hriatsual I nei anih ka ring reng a" a mah pawh be em em lo chuan ka ti sap a, "Engmaw?" a lo tih vang chuan "Nunpuia chu ka zui ngei alawm, mahse kan inngaizawng lo, Rintea hnu ah hian midang an la awm leh miahlo" ngenngawl deuhin ka ti ta thlawt a, min ring se ka duh tak zet.
Midang nena innghirnghoa buaina neih hi ka duh ngailo, tunah pawh thil hriat sual vang mai maiin heti khawp hian min hua a, ka awmdan ni lo puia midangin min sawi hi ka duhlo.



Min en vang vang a, a mitmengah chuan min ring zanlo tih ka hre thei.
"Rinfel, min hriat kha, kum 4 liam taa thil thleng kha chu ka ât vang liau liau a ni tih ka awm thlap a, mahse midang sawi ringawt chu awih suh, thudik a ni lo" tiin a banah chuan ka vuan a, min chhan tuma a âng zuau chu kawngkhar rawn inhawng ri rak vang chuan a chip rang leh viau thung.





Rintea chuan mak tih hmel deuh hian min entawn zak zak a, "Eng nge in tih?" a tih chuan ka chhan hma in "I hriat ve a tullo" ti hmakin Rinfeli chuan min luhsan a, ka bula ding chuan zawhna mitmengin min la en reng.



"Engmah a nilo" ka tih chu a awih loh hmel viau naa min zawt zui lo a, a sana bun lai chu bih zawkin "Ka thlah hma che in ka inbual ve lawk ang aw, duh leh ka pindan ah I lo awm mai dawn nia" min râwn deuh chung hian a ti a, a nu awm ve reng laia a pindana han zui luh chu thil tih chu pawh ni nghallo chuan, hreh ru deuh chungin sitting room ah chuan ka lo nghak a, Rinfeli te kha pindan lamah an thawm leh hak thin a, Nu Nutei nen chauh kan awm tak vangin boruak chu rit zual riau hian ka hre bawk.




A phone a en ngar a, min be lo a, min melh lo bawk, kan thu ngawi dun ran ran a, ka bialpa chu inbual rei ka ti takzet.



Minute 15 dawn ka nghah hnu chuan a rawn chhuak ve thei hram a, chhuah inpeih sa thlapin a rawn in chei bawk.



A nu hnenah chuan min thlah tur thu sawiin kan inzui chhuak nghal a, pawn kan chhuak chiah chu duhthawh lutukin boruak ka hîp lut nghal kawk kawk mai.




Kan in lamah kan inphur phei nghal a, in kan thlen rualin U Mama ka bia a, hmanhmawh lo tura min tih avangin keipawh chu inbual leh hmasa te te ila a tha ang.




Tui ka lum chhungin thutthlengah kan thu dun a, ka kut chu vuanin a khalh neuh neuh a, sawi tur nei sawi hreh deuh si hi a ang tlat.



"Rinfeli nen khan engnge in sawi?" rei deuh tak kan ngawih dun hnu chuan a rawn ti ta chiah a, ka rin dan sa tho mah ni se ka hamhaih deuh.



"Eng vak mah kan sawilo" ka tih chuan a hmelah a awihlo tih a lang reng a, mahse hmeichhe titi a bula han sawi ve leh vek pawh chu tul ka ti hran lo.



"Hriatsual a nei a nih kha ka ring hrim hrim a, Nunpuia kha i hria tiraw?" kka tih chuan a lo bu nghut a, "Khapa nen khan ka kawp cheu emaw a lo tia" tiin ka nui hak a, a ni erawh a meng nur deuh nang mai.



"Chung vel thuartham vang chuan maw le, mahse kan sawi fel vek tawh" ngaihsam hmel taka ka tih chuan min zawt zui ta bik lo a, ka kut chu hum nghet lehzualin a lamah min pawt hnai sauh a, a tih tum ka hriat chiam em avangin ka tang tung duh bik lo.




Ka kut a vawn lohna lam chuan ka kawngah a rawn chelh a, duhthawh leh uar zetin min fawp a, a mi fawhna chu dam raih siin a duhthawh viau lawi a, lungchim takin a ni min fawh ni.




Rei ngial hnuah inla hrangin a hnar chuan ka hnar a rawn nul leh thuak a, "Ka ngai reng thin che" zawi supa a tih chuan ka mur sung sung thei hialin ka hria, ka lungphu chu a hma aiin a rawn rang a, min en dan sexy lutuk chuan ka awm a tinuamlo zo.



"Min ngaih chuan min lo biak tur ania" zah vangin ka hmai te chu a sa hat hat a, hetiang tak hian Rinsangzuala hmaah ka la zam ngailo.



"Min kalsan a" a tih lai chuan a mitah tak ka melh zawk a, mahse rei ka en ngam chuanglo. Hnuai lam bihin "Nia" ka ti zawi sap a, hun kal tawha ka tihsual kha siam that theih ka châk fo reng dawn anih hi.




"Min en rawh Malsawm" ti leh nghutin amah en tur chuan min kuai dak a, "Ka kaltir mai mai tawh dawnlo che" a tih laia a aw chu a ring hauhlo, mahse a nghetin a tak hle a, a thilsawi ti nghet tur chuan ka mitah tak min en ran bawk.



"Keipawn ka kalsan tawh dawn lo che" ka ti ve sap a, chutih lai chuan ka hmuiah bawk min rawn fawp leh a, ka chhan let rual chuan min chawi kang lawpin a malchungah min thut tir fel der tawh!



Duhthawh takin kan infawp a, ka biang a dawmna kut chuan ka mawngbawr rawn dawmin a lamah min pawt hnai salh bawk a, kan boruak hip mek chu a inang hle tih kan hailo ve ve ang, thaw chham lek leka kan hmui kan nawr sik reng hnu chuan inla hrang hlekin ka nghawng chu a fawp kual leh dan dan a, kan rilru leh ngaihtuahna chu a thuhmun hle tawh tih ka hria.



"Rinte.. "
Min chhang lo va, a che lai chu a tawp heklo, thawk ka la leh sek sek thin a, kan awmdan hian ngaihtuahna a ti nu but tawh a, ka titawp vat anih loh chuan thil diklo tak kan ti thei mai ang!!



"Rinte.. " ka nawm sawn deuh a, beisei nei zeta min enna mitmeng chu rei pawh ka en ngam lo. Keipawhin insum harsa ka ti ve tho a, a ni tan phei chuan a harsa lehzual ang tih ka hria, ka inthunun loh chuan Pathian duhloh zawng kan ti palh mai ang tih a hlauhawm.




Engmah sawi lovin a malchung atang chuan ka chhuk a, a sawi buai lo naa min en dan vang chuan num ka ti chiah biklo bawk nen ka tui chhuan en turin ka kalsan zui ta daih a, ka lungphu pawh a la pangngai thei lo.




Ka inbualsan a, Damdawi in lam pan tura kan inpeih meuh chuan dar 8 a pel thui leh tawh.



"Naktukah i lo haw dawn em?" tia min zawh chuan Inrinni leh Pathianni chu ka awmpui tur thu ka hrilh a, U Mama leh U Mazari an chau thin si a, school kalloh ni chuan keiman awmpui ve ka duh a ni.




**



"Engtinnge a awm a Sawmi? NGatinge I rawn sawi vat loh?" U Mama tawng ri leh zawhna chu ka hria a, mahse ka chhang lo thung.


Ngaihtuahna a bing mup a, ka chheh vela mihring in sulpel thuak thuak te pawh chu ka hmu phe riai vek a ni mai. Ka mit ka chhin rualin ka nu mitmeng phi ruai leh mangan hmel lutuk kha ka hmu zel a, a tawng chhuak theilo chung khan a taksa a na hle tih chu a hmelah a lang reng.




"Engtin chiah nge a awm a Sawmi?" Tia U Mama'n min rawn sawi leh nawk takah chuan harh chhuak zawkin a hmel chu ka en vat a, a ni pawh a rilru a buai hle tih a lang reng.
A bul chiaha ding U Mazari chuan ka chhan hun ngaichang ni awm takin min lo en ve reng bawk a, "Ka.. Thisenin a luak thut a" ka tawng chu a zawi kher mai.



"Lo kal teh" tia ka bana min chelhin U Mama chuan kan dinna piaha thutthleng inhungah chuan min thutpui a, "Thil awm dan chu han sawi teh" dam deuh zawka a tih leh takah chuan chawp chilh lutukin ka tah a rawn chhuak nghal a, "Thi in a luak vak a, ka biakin min chhang thei tawh si lo a, a lung zawn hi a kutin a dawm ngar ngar a, na a tih hmel lutuk" ka ti a, ka mittui a luang nghal zung zung bawk.




U Mama chuan engmah min zawt tawhlo a, ka darah beng thak thakin a tho sawn thuai a, U Mazari'n min lo thuthnaih ve nghal vat bawk.



"A tha leh mai ang Mate, hlauthawng lutuk suh" tiin min rawn kuah a, ka insum thei chuanglo.

Khatianga a talbuai lai kha ka la hmu ngai lo a, puitu mamawh ngawih ngawih hmel pu in min en a, tihsak theih engmah ka neilo kha hrehawm ka ti a ni.




U Mama chu kan piah lawkah dingin phone a hmang a, chhungte dang a be kual niin ka hria. Ngawi rengin ka nu an rawn nawr chhuah hun chu kan ngaichang reng a,darkar 1 vel hnuah doctor chu a rawn chhuak a, kan lo dinhnaih rang ngang mai.



A hmel atang chuan engthu nge min hrilh dawn tih rindan ka nei thiam a, mahse ka ring phal hauhlo thung.



"Ka nu chu a tha em?" tiin ka zawt a, a lu chu thingin min chhan hreh hmel deuh hian "Kan chhan hman ta lo a ni" a ti sup a, ka nghilh dup mai.












Cont...
Kan chawl rei vang vang bawka zanin atang kan han dah leh tan a, ads click leh comment ah khan khawngaihin tan min lo lakpui leh rawh u aw, in ngaihchhan a chhia a tha in lo sawi ve hian kan lo hlimpui ve thin sia
Show post links
Top