Thinlung BY Kimkimi tlau (Completed)

[ngaia]

Chanchin an hriat veleh ka chhungte pawh anlo kal nghala, U Faki leh U Nguri tih loh chu an lo kim ṭhap a, Kan hrilhhai tlang hlawm aniang kapa te lo thleng pawh chuan engmah sawi tur an hrelo a, U Mama chu an en tlawk tlawk ringawt. Ka chhungte lo thlen hnuah U Mafela a haw a, U Hlua'n lawmthu a hrilh luam hnuah pawn thleng ka zui chhuaka, a bike bula kan din hnuah ka kut chelh in a hmer vang vanga" I rilru ti hreawm lo la, kan duhdan vekin kan chungah thil athleng theilo a, chuvang chuan pawmthiam kan zir a, hriatthiam kan tum luih vete hi angai ania" ti supin ka kut chu la kangin ahmui ah anawr si vang vanga, a chetdan dam leh muk ruih chuan min ti hahdam hle ani.

A tlan chhuak chu a lan theih loh thleng ka thlir a, a lan theih tawh loh chinah leh athawm a reh thlenga ka din hnuah chuan In chhungah kalut a, kanu phun hlak hlak thawm ka hre hmasa ber. " Hmeichhe lepchiah lutuk mai, heti khawpa nuamsa hian i siama, lawmna chang reng reng hrelo, in fate lah a ngaihthah ropui si. A bul berah chuan kan thu i awih lo a, 'A nu leh pa aṭangin mi ṭha tur anilo, hmeichhia chuan nu te zia kan phawk chhuak ber ṭhin a, a pa lah in a nu ahnial ngamlo a, an chhungkua saw mipa rorelna anilo, nangpawh hi ala hruai kual ang che' kati mawlh mawlh a, i awih duh lova i nei lui a, kan in aṭangin a hruai chhuak bawk che a " Ati hlaih hlaih a, a thilsawi hun chu a fuhlo kati takzet. U Mama hi dimdawi taka kan kaihhruai hun tur ani a, hetia amah dem zawnga thil kan sawi hi a fuh berlo, mipa ni mahse, a thiltawn avanga arilru no lai tak ani ve a, kan fuih ve hram hram angaih hunlai tak ani, Anih loh chuan kan ti khawlo vek ang tih ahlauhawm.


Kapa chuan kanu chu kaisawn dawr dawrin Choka ah a pawt lut rawk rawka, " Lokal ve suh ka tih che kha, hetiang hunah hmeichhia lo ṭawng vesek suh, Mama dem hun anilo. Nu i ni a, i fapa na tuar leh beidawng natna in a tuam vel mek saw i hnem tur ani asin, i ṭawngtam poh leh thu lawi lo i sawi tam hi ani ber a, engmah sawi ve tawhlo tawp la, i ngawi thei dawnlo anih chuan haw mairawh " Kapa chuan ati a, kapa chu ka thlawp khawp mai. Mipa ani a, kei ai mahin U Mama tawrhna hi a hriatthiam ka ringa, kapa berin U Mama ahethiam chu lawmawm kati a, U Mama hi reitak inti hreawm lo se tih hi ka duhthusam ani.


U Hlua'n U Mama chu a ṭhutchilh a, kan hriat ve theih si loh in eng eng emaw a sawipui a, U Mama pawh a khat tawkin abu nghat nghat a, A hmel pawh nichin ai khan hmuh anuam tawh zawk. Kanu leh kapa pawh anlo inzui chhuak a, kanu chu ahmel aṭang reng reng pawn a lawmlo tih chu a hriat theih a, thinrim ṭun hmel hi a pu a, angawih mai mai ka ringlo bawk, rei pawh anilo rin ang ngeiin Kanu chuan "Chhungkaw thil ah chuan pawnlam mi inrawlh tir ve te hi aṭhalo a, Kimi nangpawh I u leh nau an awm laiin I bialpa i hruaia, ching tawh suh ang che, kan chhungkua min ngaihniam lutuk dawn asin, I pasal ala nilo a chhungkaw thila inrawlh ve tur pawh anilo" Min en kar chungin ati a, Kapa laka a thinrimna ka chungah hrik thlak atum ni berin kahria. kapa chek hlak ri chu ka hria a, Kapa alo ṭawng veleh chuan kan buai belh leh zawk ang tih hlau in " U Hlua'n keyboard atum a, thil thlendan hrechianglo a, buangbar deuha in hrilh kha midang kan ti phawklek ang tih ka hlau alawm" Fiah fak hian kati a.

" Mampuia pawh a awm alawm " chang fak hian ati leh a, hetah hi chuan ka inthiam bik hauhlo, Kanu sawi ang hian Mampuia pawh a awm ang; Mahse, nizanah khan ka hmu hauhlo a, hmu pawh ni ila ka ko kher angem? Ka rilru ah U Mafela kha alang tlat a, Ka duhdan in kalo kal lutuk pawh aniang. " Kan kal tlai alawm, kan kal te chuan ka u leh U Mafela an awm tawhlo " Mampuia'n alo ti ve khauh a, kanu chu ngawi tawh hram se kati ani. buaina pakhatin min chenchilh mek laia buaina dang lo zawn vesek pawh hi a ninawm, tuna kan buaina hi buaina atlinglo a, kanu hian buaina a zawng chawp niin kahria.

" I ngawi dawnlo anih chuan haw rawh ka tihkha, buaina zawng reng suh " Kapa'n alo ti a, kanu pawh chu a ngawi veta hrama, ka hahdam huai huai mai. Kanu chu amak kati a, a fapa in harsatna leh natna namen loh a tawrh laiin hnem chu sawi loh vawikhat pawh a belo a, A nep zia thu sawi khum bak atan engmah atilo. Hnem dan thiamlo mahse, ṭhutchilh in fuih ve keuh keuh se chu chu U Mama pawh hian a mamawh ani, Nu te hi tupawn kan ngaihlu a, kan hreawm ber laia min hnem tura kan duh leh beisei chu Nu te anni, U Mama pawh patling niin fa pahnih lai nei tawh mahse, tuna a mamawh ber tur chu kanu hi ani a, kanu hnem na leh fuihna hi a mamawh dawn a, kanu awm a bei a ṭah hawm hawm te pawh a chak ve ang. Ka u chunga thil thleng hi midang chungah thleng veta sela chuan mi nu te chuan kanu tih loh ang vek hi an fapa te tan an tih ka ring. ka u in hun harsa tak a tawn mek laiin kanu erawh ṭhutthleng ah awn duaiin aṭhu a, phone khawihin a nui leh vur vur zel a, kanu hi amak ani, chutiang bak chuan ka sawifiah thiamlo.


Ka u chu riahpui hniallo viau mahila In lamah Naupang pahnih an awm si a, Mathewa lah a nu tello a ariah chhuah hmasak ber na tur ani si a, " Faki'n nau khawih athiamlo, zanin chu Mampuia'n riahpui rawh se " kapa'n ati a, U Mama chuan " Riahpui ka ngailo, Min naupangchhe cheibawl lo teh u, hei hi chu athleng dawn tih ka hre sa a, ka in puahchah lawk vek tawh. A taka han tawn meuh chuan insum ahar deuh a, tunah chuan kaṭha tawh" ati thung a, riahpui kan tum chu a duhlo khawp mai.
" Zanin chu ka riahpui ang che " Mampuia'n atih ve tlat avangin min hnial zuilo a, rei pawh awmpui tawh lovin keini pawn kan hawsan a, rilru ah erawh a awm veng veng mai.


In kan thleng a, Bawihtei alo la men laiin Mathewa erawh U Faki'n alo pua a, " A sual lutuk " min hmuh rualin alo ti nghal a, ka nuih ringawt, hetia alo puak vel hi ka ringlo hrim hrim. " Kalo mutpui ang, Bawihte ka bulah i mu ve duh em? " Ka tih chuan Min melh kiau in min chhang mailo a, " Tinge? I duh lo emni? " Ka ti nawn leh a, alu chu thing nar nar in " Khum a te e " ati reuh a, a sawi zawngin a hmui ati sawi ve nang nang bawk nen duhawm tak ani. Kapa pawn a tunu awmdan vel chu nuihpui hakin "Chhuatah mutna a phah theih alawm " A tunu sama chulsak pah chuan ati dam thlup a, Bawihtei mitmeng pawh a danglam ve thuai a, amah te in a rilru alo hah ve reuh anih hmel.

" Bawihte, ka bulah pawh i muthei ania " U Faki'n a tih chuan " Aih A-ni Kimi bulah ka mu duh " ati ve tlat a, U Faki'n "Min ngailo bik si " tiin a tum der vela, Bawihtei a fiam tih hria in room ah ka luhsan a, Ka vahte nena kan mutna tur chu U Faki nen kan khum inkarah ka phah a, kala talbuai ve bawk nen U Mafela pawh chanchin kala hrilh leh lo hrim hrim, a tlai tawh si a, a mut daih tawh ka ring, engpawh nise mut hmunah ka be maiang.

Mutna ka phahfel hnuah Bawihtei te chu ka ko lut a, U Faki'n 'Ka mut thiam vaklo ania ' ti chungin Mathewa alo mut a, a sawi ang tak takin nau mut chu thiamlo tak ani. Dimte in a nghat ve dawn emaw katih laiin a nghat deuh chawrh a, atal nghal ṭalh ṭalh mai. a harh dawn emaw ka tih laiin Mathewa chu a in let thaka amuhil veleh maia, "Kava thiam ve " U Faki chuan ati nui vur vura, nuihpui loh chi pawh anilo. Bawihtei chu a muhil harlo a, U Faki pawh a muhil ve nghal daihin kahria; tunlai tak chu ani pawh hian mut aduh riau, ahma te chuan ṭhanharh apiangin alo la meng kuau zel a, tunah erawh min mut khalh fo a, zingah lah thawh a hre chuanglo a, kaihthawh ahar si, achang chuan kei aiin a tho hma veleh khauh a, hriatthiam ahar tawh naklaiin tunlai chu hriatthiam ahar zual a, azia athlak nasa viau bawk.


U Mafela chu ka be ta tho a, a mut daih tawh ka rin laiin ka msg chu a seen nghala, min reply mai dawn emaw ka tih laiin call alo lut a, ka chhang rang khawp mai. Naupang pahnih in min karcheh miau avangin ka ṭawng ring ngamlo a, ani pawh a hrethiam aniang, 'Naktukah hna ka ngah si a, mu tawh maiang hmiang, lo mutsan daih che ka duhlo a, kalo nghak che anihhi ' ati a, ka u avanga rilru ti hreawm lo tura min fuih leh zet hnuah call a dah a. Ka phone dah ṭha in ka mutdan ka siamrem a, mutthilh tuma ka mit ka chhing ṭan chiah tih ah chuan Mathewa'n minlo dap rak raka ka phu chiang teh asin.

" Anu" ti ṭiakin ka hnute lo khawih atum a, ka in hup chawih chawih mai, kan inti harh ngei dawn anih hi ka tih rilruk mek laiin Mathewa chu fiah zet hian alo meng a, ṭah tuma a men pui pui chu tih ngaihna hrelo zetin a lu ah ka chulsak a, "Bawihte, mu mu ti rawh le, zing ala nilo ania " ka tih pawh chuan ala men pui pui renga, " A-nu bulah ka kal duh " a tih chuan thawk kala halh a. Ka mittui alo hnai kuar bawk, Nu ngai rual lek ani a, Mathewa hi a demawm miahlo, engtin nge ka han thlem tak ang le, ka hnute han khawih tir ve ngawt lah ka duh bik silo a, kanu bulah ka muttir mai dawn mawni. " A-pi bulah i mu duh em? A-pi tete i khawih dawn nia aw " ti sep in ka thawhpui a, Mathewa pawh aṭap em biklo e, Hnute chu a ngheina arei tawh tih ka hria a, zana hnute khawih erawh a zawngchhang anih hmel.


Kanu te room kawngka ka kik tur chu an in hau ri ka hriat avangin ka kik ngamlo a, thawpui kala vak ringawt. Tinge maw abuaithlak bik em em maile, tunang dingmunah chuan Nu tam zawk hi chuan an tute an ngaihsak ṭhin ani ngaia, Nu tlem zawk tute ngaihsak lo zinga kanu atel hi awih harsa kati ani. Mathewa chu choka ah ka luhpui a, "Ka naute hmelṭhate, ka pua che anga muhil leh mairawh aw " ka tih chuan abu ve nghata, aṭap lo chu alawmawm hrim hrim, puak tlaivar pawh ngai se tuna tan chuan phunnawi thei ka nilo.

Mathewa chu ka pua a, ka hnunga ben thlap chungin alo ṭawng zet zeta, mut chu kanla hlat asin, phone ah hla play in, char lamah ka chhuahpui ta daih a, hnunglam aṭangin 'A-ni chu chu ka duh ' tiin hla play turte minlo hrilh vela, ka play sak loh chuan a leng deuh bat bata, nui hak hak chungin a hla duh chu ka play sak leh nge nge ṭhin. Chutiang chuan darkar1 dawn chu kan awm a, ka ke pawh kham tawh tak ani, hla play a insawi pui ve tak rengah chuan Mathewa pawh aṭawng zuai tial tiala, a taksa azawi ve hnak takah chuan amuhil tih pawh kahria. Ka mut nghal mai chuan aharh khaw loh leh ka hlauh avangin kala din pui reng a, kawmthlang thim zet thlir reng aiah tiin phone chu ka khawiha, mi status ho chu ka en kual mai maia, status en hi ka taima lo bawk nen entur alo tam angreng a, aṭhen ho deuh deuh anih laiin ṭhenkhat erawh an luangliam viau a, nuihpui tur pawh atam ngang mai, abik in U Marcusa status chu a nuihzatthlak zuala, mahni te in ka dir leh tlak tlak zel.

Min10 vel ka ngaihchan hnuah in chhungah ka lut a, kawngka ka khar fel lai chuan an room aṭangin kapa alo chhuak a, min hmu thut chu mak ati tih ahmel awmdan aṭangin ahriattheih, " Mate, in mu thei nange " ati a, "Aw, A-nu bulah amu emaw a inti a, hnute lo khawih atum a " ka tih chuan anui hawka, " I khawih tir vemai lo nia " "Awih awm loh " asawi zawh rualin kati hlaka, kapa chu ala nui vur vur reng a, min fiam tih ka hriat chuan keipawh kanui vetho. " I dawhtheih hram hram angai rih dawn ania aw, i nu leh i u an laktlak siloh a, Nguri lah a puar lian tawh si a, i hah deuh dawn anihhi, Bawihtei erawh afel tawha, chumi anih avang chuan ngaihthah tur anilo ania " ati zui duah a, " ka hrethiam alawm, nangpawh iva mu har ve " kati a, kanu nen an inhauh vel kha chu ka hrelo der ani, " Nia, rilru a kalthui deuh ani " ati sup a, U Mama vang ani tih kahria.

" U Mama pawn a pawmthiam em kha, a rinhlelna arei tawh a, atak a man ngei aduh avangin a nghak mai alawm, mit ngeia a hmuh khan a in thunun theilo deuh mai ani. Hmangaih taka a enkawl ṭhin leh a fate nu ani a, a insum theilo pawh kha ademawm bik loh, tuar hunlai ani a, tunah chuan tuar mahse, nakinah hun in ala liampui dawn alawm " Kati ve luam a, kapa pawh abu nghat nghat; Tunlai tak hi zu a in khat a, nghei atum vedeuh pawh ani maithei, kapa zu in khat hi kan lawm a, sawi chhuak kherlo mahila kan hahdam ru veng veng hlawmin ka ring. U Mama avanga a rilru hah hi zu ah aṭuan leh mai erawh ka hlau a, a rilru a sen vak loh nan tiin hetiang hian ka sawikual ve duah anihhi, dawt erawh ka sawilo.


Ka mut veleh theih meuh chuan dar2 apel thui viau tawh a, ka mit akham ve urh mai, phone pawh en peih tawh lovin ka mit ka chhing a, ka mut achhuak ve tawh bawk nen ka muhil nghal chu animai e.

Zingah chuan ka harh heitheilo a, Mathewa rak chul te leh thawm ri leh rak rak ṭhinte pawh ka hria a; Mahse, ka mit hi ka meng thei thlawtlo ani, ka mu nghet pawh ani tawh chuanglo. Thawm avangin ka harh leh ṭhin a, intih harh tum viau mahila ka thei thlawt silo, hetiang em em hian zing thawh ka harsat ngailo reng reng, ka zawi ngawih ngawiha ka awmdan chu anuam hlawl lo.

" Kimi, tho teh eirawng ka bawl thiamlo ania " Min sawi dat dat paha U Faki'n atih chuan ka meng ve ta hram a, parda anlo hawng tawh bawk nen kan room chu eng tak ani. "Min va kaitho har ve " Ka ti ṭiak a, ka dang ala ro em em zui, ka chil ka lem dawna chil lah chu ka nei lo lek lek lehngghal " Apa'n 'zanah Bawiha a mu theiloa a buaipui rei lutuk kaitho rih suh u' ati alawm " tiin Bawihtei te puan sin chu a thlep a, a vin miahlo te chu amak kati, Min vin bawrh bawrh se awm anuam zawkin karing.


" Nizanah Mathewa a harh leh emni? " Ka puansin ka thleh lai chuan ati leh a, bu nghatin " Hnute a zawng " ka tih chuan anui hawka, keipawh ka nui ve tho. " Khawih tir mai tur ania " hmui petsawi zeuhin ati a, ner nangin " Zanin chu mutpui ve tawhla aṭha ang, i hnute i khawih tir dawn nia, keichu alian sa a, nang chu khawih len ngai chi ania " ka tih chuan " Hmeli " ati vaka, a thinrim lo tih erawh kahria. Hetiang taka boruak nuam hi kan unau inkar ah a awm ngailo tluk ani a, tukin erawh boruak zangkhai leh nuam tak kannei ani.


Room aṭanga U Faki nen kan inzui chhuah chuan " Ka ṭangkai nep tawh sia " U Nguri'n alo ti var a, " Awihawm loh e, ila ṭangkai lutuk alawm " ti letin ka nuih ver ver a; Tunkarah thla aral ang a, kar leh lamah te chuan nau nei thei maitur ani tawh tihna ania, chuti chung pawn atheih na apiangah minla chetpui vezel a, U Faki ai pawn minla chhawk daih zawk.

" Lo ṭhu mai mairawh kati thei alawm, Raipuar hi chu ka chetpui peih vaklo " ka tih chuan anui har hara, " I zaklo e a " ati a, " Raipuar ho nalh loh zia hi " U Faki pawn ama dul chul pahin ati a, U nguri afiam tih kahria, " In ninawm unau lutuk " U Nguri'n ati hlara, kan nui zui hak hak mai. U Faki'n chaw alo chhum tawh a, chaw hmeh ṭhing a awm nual avangin siam belh tur em em a awm chuanglo. Chaw hmeh vang thei lutuk hi chu abuaithlak asin aw, hming hnih thum ringawtte hi kan lungawipui lo a, Mampuia hi a duhtui si chawhmeh kan neih loh deuh hi chuan aner nang nang zela, kanu nen an inhau leh nge nge ṭhin. Nikhatah vawi hnih lai chaw ei angai si a, chaw hmeh hi buaithlak ve deuh mai asin, eirawngbawltu nih phei chuan beng hi adawng ngawih ngawih zel, a eitu ten an sawisel phei chuan bensawk hi an chakawm ṭhin.


Bawihtei te unau in thawmhnaw hak thlak anlo ken loh avangin Mampuia ka chah a, Bawihtei phei chu school kallai ani a, kan in aṭangin an school ahla si a, Mampuia emaw U Hlua'n thlah mai rawh se.

Chaw ei kan siam mawlh mawlh laiin Mampuia alo haw a, beisei loh deuhin U Mama pawh alo tel ve a, Anpa an hmu chu Bawihtei te unau an rak chel chul a, an hmuhnawm takzet ani. " Lokal rawh u chaw ei ang u " Ka tih chuan an pafa thum in choka ah an lo inzui lut a, Mathewa chu U Mama'n ka bulah alo hlang a, Bawihtei erawh U Faki bulah aṭhu thung. " Helamah lo awm rih ta che u, I nau ten i fate an buaipui thei anga, nangmah chauha in a i awm chuan ngaihtuah i na " Kapa'n atih chuan U Mama chu anui a, "Min ngaihtuah tih ka hria alawm kapa, mahse ngaihtuah ka ngai miahlo ania " Tiin an tui a hawp ri hrawih a, Kalo ner nang nang mai. Antui hawp rik hruih hruih hi kati thei vaklo a, Ka u te ho lah hian an hrat sia, ka sawi zin tawh tehlul nen an sim theilo reng reng.

" Ipa thusawi chu zawmla, hetah lo awm rih rawh u, Saii lah hmeichhe nasa ania, alo hel leh thuai ang che. a chhungte lah mi rapthlak anni a, in chhung bungrua pawh anlo chuh leh duh ang che, ui re ani a inchhung bungrua engmah ala theilo " Kanu'n ati hlak hlaka, U Mama leh U Hlua chu an nui dun haka, " Kanu ṭhin hi a " U Hlua'n nui ṭha chungin ati a, Kanu'n a melh no loh teh asin. " Kan in ah ilo awm duh loh leh i nau lo awm phei rih se, Hetah chuan Faki leh Nguri an awm a, i nu a awm bawka kan ngaihtuahawm lovang, Kan in aṭang chuan Bawihtei school kalna abuaithlak emai " Kapa'n ati a, " Nguri'n nau aneih ṭep tawh hi Kapa, Matei chu helamah aṭangkai zawk daih dawn alawm, Kan Faki hi zawng a zeilo emai " U Mama'n U Faki en zeuh pahin ati a, U Faki pawn a melh rum viau a, " I Zaklo emai a, Nausen khawih vel chu Kimi aiin ka thiam zawk " Ati pang panga, kan nui dar dar mai.

U Faki'n thleng min sil chhawk avangin ka awl hma a, couch a ṭhu chungin ka phone chu ka khawih a, zing aṭangin U Mafela msg ala awm miahlo a, ala tho lo aniang ti dawn ila thawh loh hun ani tawh silo a, abuai anih ka ring deuh. Chat ah lut in 'I va reh ve Duatpui, i buai deuh emni? ' tih chu ka thawn a, ka lai ru veng veng thei mawle. Ahma deuh khan Angaihi'n 'Mipa hi hma la tura kan ngaih anni a, an tihtur ani vereng bawk; Mahse, mipa pawh hian duat te hi an duh ve a, kan biak hmasak te kan ngaihsakna kan tihlan hmasak te hi an phut ve ṭhin, chu chu in ngaihzawnna ah hian apawimawh lutuk, kan hming nilo a min koh duatna kan hlimpui ang chiahin an hming nilo a koh duat te hi an hlimpui ve ṭhin ania. Hmala tura i beiseia a reh apianga i reh ve ringawt chuan a beidawng maiang ' tiin min hrilh a. Ka ngaihtuah chian hian adik kati, mipa te hi zaklo tak anni biklo a, achang chuan zak chung chung te hian minlo be hmasa ve ṭhin tho a, chuvangin hmeichhia te pawh hian zak chung chungin kan ngaihsakna te hi kan tilang ve ngam tur niin ka hria.


" Mate, hnatlan i tum em? " U Mama'n atih chuan " Ka hrelo le, Hnatlan chu aṭha a " kati nawi niai a, Mathewa hi school akal ve dawn silo a, ka ngaihtuah deuh ani; Vawiin hi thlan nghah ni ani a, YMA te'n hnatlangin khawhar chhungte aṭul ṭulah kan pui dawn ani, ka damṭhat chuan ka ṭhulh ngailo a, tunah pawh atheih hram chuan kal kaduh. " Hnatlang rawh, Bawiha chu in ah ka hruai phei rih ang a, tlaiah kalo dah leh mai dawnnia " Ati dam thlup a, "Aw, i hman tho chuan apawilo hnatlan ka duh ve deuh a " kati a. " Mama nangpawh i hman te chuan hnatlang la, i peih vak loh leh a pawi chuanglo. Ka tupa chu kalo awm ang e, Khawharin lamah pawh ka kalpui ve maiang, mite pawn an tute an hruai fo alawm " Kanu'n alo ti hlauh a, "Ka kal peih rih lovang, Bawiha chu duh leh hruai vela " U Mama'n ati a.

Thlan nghah ni hian Nu ho leh Pa upa lam deuhte hian khawhar chhungte anlo zaipui ṭhin a, Pa la ṭhalai deuhte erawh YMA hnatlanna lamah anlo tel thung a, Mipa lam tan chuan hahthlak ve deuh mahse, hmeichhia erawh kan hah lutuk ngailo a, mipa te hian hmeichhiate hi min duat a, thingpui lum leh a khat tawka tui intur lo sem bak hi chu tihtur vak kan nei ngailo.

Bawihtei school kaltur ka siam peih hnuah Hnatlang turin ka insiam a, U Mafela la reh vung vung vang nge ka tha a za tehchiam lo a, ka msg chu seen lo se tunang em em hian ka awm kher lovang; Mahse, ka msg a seen a, tun thlengin minla reply lo a, chu chuan ka awm ati nuam theilo ani, biak leh erawh ka tum rihlo.

U Faki chu a ṭhiante'n anlo sawm a, ka inpeih ve tawh tho avangin an rual chuan ka kal ve a, Midang chanchin sawi tur an hre phian a, milar chanchin phei chu ahmun a awm ve ang maiin leh ataka hmu tawh ang maiin an sawi a, ṭawng an in chuh nak nak mai. An milar duhzawng a in an loh deuh avangin an inhnial leh lek leka, an kum phu loh in an buaipui ala ho a, an bulah kal in ka nui leh vur vur ṭhin.

" Kimi, Kan doctora hi veng ṭha rawh aw, Nurse nu hian a thlem kual peih riau, a zuikual reng maia kan in ṭhenawma ka hria ania " Zuitei'n ati a, U Mafela te ṭhenawm lawk anni tak e. "Zalen rawh se " tih chauhin ka chhang a, engmah sawizui ka chaklo. Anni lah in Nurse nu chu an rel zawm a, Apuii pawh sawichhe hnehsawh tak anni, in hauh nikhuaah lamṭang atan an itawm mange.

Angaihi te in ah ka peng a, anlo ri leh le lu tawh mai, Angaihi nu Nu Hlimi'n min hmuh chuan " Lokal rawh, Ngaihi pawh a in peih ṭep tawh ang " alo ti a, puan a bih ṭup danah khawharin lamah kal atum aniang. eng nge atih ber pawh hriat lohvin Nu Hlimi chu a veikual thuak thuaka, " Eng nge ila tih em em " Pa Dika'n ati leh hluk zela, pawr zetin Nu Hlimi'n alo chhangleta, Pa Dika pawh a nui leh tawp ṭhin.

U Mawii thlengsil chu a ri leh bur bur zel a, Pa Dika chuan thlek leh zeuh ṭhin in engmah sawi lem lovin a hawisawn leh mai a, Nu Hlimi a in peih hnuah an inzui chhuak a, "Kimi, thingpui lo siam la " U Jeromea'n atih chuan ka ner nanga, thingpui a hehzia hi amak zawk. "Chaw i eilo ami? " Kati a, ka tho pah ṭaih ṭaih a, U Mawii mood a fuh loh hmel sia an choka ah chuan ka che peih vaklo. " Chaw leh Thingpui luhna a in ang hleinem " ti awlsam et in anui vur vura, ka beng hrep dawn mawni.

Thingpui heh chhungkua anni bawka Flask lian deuhah thingpui annei reng a, in leng hi an nei zut ṭhin bawka, an inleng te hi thingpui in lo hian an haw tir ngai manglo, thingpui neih loh lai hi annei ngailo tih theih ani a. In leng te chu sawi loh an mahni hrim hrim hian thingpui hi an heh a, an in ah hi chuan rawlthar leh pitar putar thleng hian an leng lut nasa a, a chang chuan an hautak lutuk hi Nu Hlimi hi aphun ve ṭhina, ka dem miahlo.

Thingpui ka siam lai chuan Room aṭangin Sarahi alo ṭap chhuak a, U Jeromea chu lo pan in aṭap uar viau a, "Tunge hau che " U Jeromea'n ati a, Sarahi lah ṭap satliah anilo a, a au pah bawk nen in chhung chu a khat mup in kahria. "Apa" Ṭap chung chuan ati a, " Engtin nge a tih che " U Jeromea bawkin ati leh a, Sarahi chu chawi kang nawlhin a malah a ṭhuttir a, " Min vawhlum " Rilru na deuha Sarahi'n atih chuan ka nui chhuak hawka, U Jeromea pawh anui ve hawk hawk tho, "E e e, A-pa chu kan beng ang aw, engvangin nge Rara chalko-i hi alo vuakhlum mai mai chu le " ati a, Sarahi chu a ngaih angam ta deuh nge uar deuha aṭap lai kha abang nghal hmaka, U Jeromea'n a dek fiam chuan anui leh nghal thei a. Naupang rilru lo thianghlimzia hi kati, eng emaw hlekah an ṭap a, thil ho te avangin an bang a, an ṭah zawh chiah pawn an nui leh nghal maithei a, engmah vei annei bawk lo a, an awh awm ngawt mai.

Thingpui chu ka siam zo a, U Jeromea chu pe in, Silhmunah U Mawii ala awm si a, Fiante chu dawhkanah dahin U Mawii kalsawn hunah ka silang kati deuh ani. Kalsawn pawh kalsawn lovin Dawhkan bulah chuan kading a, Sarahi te unau chetla chu ka en a, Ka vahte ngaihtuah chhuakin ka rilru a tawt leh tet tet tawh. Chutia rilru ka kawm leh dawn lai chuan U Mawii chuan Dawhkana ka fiante dah chu alo la a, " thleng sil lai pawh hian sil tur dang hi a awm belh zela " ati hlak hlaka, anuamlo kati takzet.


" I inpeih hunah ka sil ang kati a, chuvang alawm hetah kala dinreng " Katih chuan min chhang lovin thleng chu ala sil tau sawk sawka, a puitling lo kati ve thlawt. " Phun reng suh aw, zingkar aṭangin i titau bur bur renga, i buaithlak emai " U Jeromea'n alo ti hluka, keimah hian nuamlo kati zawk. " Enga tinge " U Zosanga alo lang ve thuaia, khawi aṭangin nge alo chhuah ve nawlh pawh ka hrelo e a.


" Innu hi hrilh ṭha rawh, a titau bur bur reng dawn anih chuan engmah hi tive tawh lo law law rawh se" U Jeromea'n ati leh hluka, Dawhkanah thingpui no nghat chawrhin a chhuak nghala, Angaihi pawh lo chhuak ve tawhin ka thaw deuh huai mai. U Zosanga te hi an in hauh leh ka hlau a, an in hauh laia lo awm ve chu thih hrehin ka hreh bawk.

" Kal ila " Angaihi'n atih chuan kabu nghat a, kan inzui chhuah rual chuan U Zoasanga'n khauh fakin a nupui a khak nghala, ka awmlaia an inhau lo chu ka lawm kher asin. " Hreawm iti em? " Angaihi'n atih chuan ka bu nghat a, ka zep ṭit ṭet peihlo, " Thleng min sil tir leh phet atum a, kei lah hnatlang tura kal ka duh si a, ei hmun ka tihfel hnuah room ah kan lut daiha " Atih hnuah " A buaithlak lutuk, Kapa pawh hian sawisel pawh a peih tawhlo, kapa takngial pawh batzatin a chhanga, kan enliam tawp tawh anih hi. In hrang chang se ti mahila hreawm tur chu U Zosanga leh a fate bawk hi anni si a, kan ngaingam silo anihhi " Beidawng zet hian atih zawma, " Nizan vang kha ala ni angem? " ka tih ve chuan " Ni deuh tho e, U Zosanga hi a nep ve deuh a, hmani deuha a chhuah khan a awm theilo zawkah aṭang si a, khavang khan U Zosanga hi a ngainep deuh tlata, 'Ka chhuahsan leh maing che ' tih te hi ahrat a" Ati bawrh bawrh a, ka bu nghat nghat ringawt. Sawi belh ve vak tur ka hrelo ani.

U Mama chanchinte alo hre thawi ve a, min zawt chiangin keipawn ṭha deuhin ka hrilh ve a, U Mama chu a khawngaih ve khawp mai. Titi paha kal kanni bawka Pi Zopuii te in pawh chu kan thleng harlo a, In chhung lamah an zai a, pawn lamah YMA lam pawh anlo che suau suau tawha, Hruaitute'n tih tur lo sawiin Nula lamin thingpui anlo lum a, " Angaihi te kha lokal ru le, thing eh tur atam teh ania " Pa Zuia'n ati lang langa, " Min va duat lo ve " Angaihi'n atih chuan " Duat vak in ngai tawhlo " alo ti let leh a, nuih vur vurin kan chhanglet tawhlo, thingpui lum na lamah kal lovin thing an lo eh na lamah chuan kan kal zawka, hnatlang chhuak kan ṭha leh khawp mai.

Cont..

MṬKP inkhawmpui kan zo ta.. readers te zingah kal in awm ve em aw? Anuam in a hlimawm takzet ani. Inkhawmpui vuakvet vangin thawnthu ka awl ngar ngar a, a inthlahrunawm viau mai a, in mi ngaihdamna ka dil bawk e, Khawmpui chhungin thawnthu ka type theilo a, tihian achawp te te in kanti chho leh anga, Pathian zarah kan zo ve maiang.
Show post links
Top