STORYFB.COM

Chapter-19



Mike Lalruattluanga POV



Nurse in Tluangi damdawi ei tur lei tura min rawn hrilh chuan ka tho chhuak vat a, "U I lo harh tawh maw, engmah I la ei silo a, hei buh hawp hi ei rawh aw, Nu Mapuii'n a siam sak che a nih hi" Duati chuan a u harh a hmuh rual chuan a ti nghal sawk sawk a, "Tikhan lo awm ula damdawi chu ka zuk lei lawk ange" ti a chhuah mai ka tum chu Tluangi chuan "Mate nangmah zawk in zu lei ta che, Mike-a hi biak lawk ka duh" a tih avang chuan ka tawp leh chawt a.




"U a hma pawn ka sawi tawh kha aw, Mike-a hian thiam loh na a neilo a nia" Duati chuan a ti a, a u nen chauh a min chhuah san chu a hreh hmel hle bawk, "Ka hria alawm, chutiang lam engmah sawi ka tum lo, ngaihtha deuh khan min rawn damdawi chu zu lei phawt la, i rawn let hunah buh hawp chu ka ei dawn a nia" a tih leh takah chuan Duati chu a chhuak vat a, "Duati nen kan chanchin I hre tawh tih ka hria, i laka ka zep avang khan min hrethiam dawn nia" ka ti sup a.




"Hun kal tawh a ni a, engmah sawi buai ka tum lo, in in hmangaih na ka hmuh fiah sak zual cheu a sin, mahse ka nau in keimah vanga khatiang thil a ti kha ka rilru a na a, u laktlak lo ber ka nih zia ka hrechiang a, hreawm ka ti em a ni" a tih chuan ka thaw hawk a, "Duati tan hian i hlut zia i hria tiraw, nanghi awm lo ni la chuan Duati hi hetiang dinhmun ah hian a ding kher lovang, fahrah in atang la chhuak in i theihtawp in i enkawl a, i tan a nih phawt chuan engpawh a ti hreh lo" ka ti a.




"Ni e, ka nau a nih vanga fak ka nilo a, mahse Matei hi chu khawvel a ka hmeichhe hriat tawh zawng zawng ah rilru tha leh thianghlim ber a ni, ka hun tawp lam ka hnaih chho tial tial tih ka hai lova, ka kalsan hunah ka nau hi lo dawm ang che aw, mal tak anga a in hriat ka duh lo, theih nise kumkhua in ka kalsan hauh lovang, mahse thih na hi chu kan duhthlan na a ni silo a" tiin a mittui chu a luangthla ngiai ngiai a.




Mipa mah ni ila a natna tawh te leh a rilru put hmang tur ka ngaihtuah a na ka tihpui ve takzet, ka farnu ang chiah in ka en la tih tawh kha, hetiang a awm tur hian ka duh lo a, hmuh pawh harsa ka ti, mahse mipa ka ni a, chak taka ka awm a ngai, Duati te unau chuan in nghah na tur nu leh pa an neilo a, Duati tan mai nilo Tluangi tan pawh hian ka awm reng a ngai a ni, ka ngaihtuah fo thin, an unau in hmangaih na hi a va han chak tak em.




"Tluangi doctor tha ber ber nangmah enkawl tu tur che ka zawng mek a nia, ka hmu vat bawk ang, lungngai reng reng suh, i dam tha leh vat ang, chak takin awm la, beidawng hauh suh" ka tih chuan a nui a, "Nangni chhungkua nen hian kan in hre lovang tih hi ka va han hlau em, Nu Mapuii te chhungkua awm mahse Matei hian a hmangaih em em che a, i nu leh pa te lah mi sual an nilo bawk nen ka thih hunah chuan matei hi in thlah thlam ngai dawn lo tih ka hria a, ka thla a muang" a ti leh.




"A hmaa ka sawi kha i la hria tiraw, ka nau hian nu a nei a, kei lah heti mai hi ka ni tawh a, thisen zawm pui a la nei tih hi i lo hrilh dawn nia, a nu chu eng ang mi pawh nise hriat a phu bawk, khawngaihin a nu chu i lo zawn hmuh sak ngei dawn a nia, keichu cancer hrik hian a ni tel in min en chhe telh telh a, hun rei ka daih tawh dawn lo, a chang chuan engvangin nge hetiang hi ka chungah a thlen bik ka ti thin, thih hi ka hlau lo, mahse ka nau hi kalsan ka hreh em a ni" tiin a mittui bawk chu a tla leh a.




"U..." Duati aw ka hriat rual chuan room ah a rawn lut a, "U min kalsan ngai dawn loh thu i sawi tawh kha, ngatinge khatiang thu te i sawi, ka u neih chhun i ni a, i thi theilo, nilo i thi dawn lo" tiin a u chu a rawn kuah a, an unau chuan in kuah in an tap a, hun thawl an mamawh ting in ka chhuak ta daih, thawk harsa ti zetin ka thaw chhuak hawk hawk a, diktak chuan Tluangi hian dam leh theih na chance a nei tawh lo tih ka hrechiang hle, doctor tha ber pawh in a ti dam thei tawh lo.



Grace Lalthazuali POV




Karhnih chiang chu damdawi in ah kan awm tawh a, ka u chuan that ni reng a nei theilo, in neih na lam pawh kan rilru ah kan pe thei hlawm lo, ka u hetiang hi a ni si a, in neih na lam chu ngaihtuah na chi ah ka ngailo, doctor te chuan min ngaihsak em em a, ka lawm takzet bawk, "Duati meeting kan nei zi chiah a ka lo kal nghal dawn aw, damdawi lei tur te emaw ei chak in neih chuan min lo hrilh la aw" Mike-a chuan phone call hmang in a rawn ti a.




"U, Mike-a a lo kal mek a, ei chak i nei em, kan chah dawn nia" ka u bulah chuan ka ti a, chemo a khai mek a, a sam pawh a tla nasa tawh hle, tunah hian cancer hospital ah kan awm mek bawk, "Ka nei lem lo, lo kal rawh se, in pahnih in biak cheu ka duh hrim hrim" a ti a, eng lam nge min sawi pui a duh ang ka hrethiam lo, ka zawt lawk duh lem lo bawk, Mike-a lo thleng phawt se, kan hre mai ang chu.




Mike-a a lo thleng a, "Lo thu rawh, thil sawi ho lawk ang u" ka u chuan a lo ti vat a, Mike-a chu ka bulah a rawn thu thla nghal, "In in neih na lam hi a nia sawi pui cheu ka duh, karleh leh mai hi a ni tawh a, chuvang chuan in buatsaih a hun viau tawh lo maw?" a ti sep a, "U in neih na lam chu ngaihtuah rih lo phawt ang, han damtha phawt la, kan rel tha leh zawk dawn a nia" ka tih chuan "Chutiang tur a ni ngailo, in in neih tur thu pawh puan chhuah vek a ni tawh a, a ni kan ruat sa ah khan in nei ula ka duh" a ti leh a.




"Duati sawi ang khan in neih na lam chu hmanhmawh lutuk lo zawk ila pawh kan tilo a nia keini lam pawn, han chak tha phawt la, hun a la tam alawm" Mike-an a lo tih ve chuan ka lo pawm pui hle, "Nilo e, keichuan a hmaa in in neih hin tur kan ruat sa ah khan in nei ula ka duh, hma hun hriat a nilo a, tunah pawh ka chak tha alawm, namin kan nghak zel a nih chuan enge thleng dawn kan hre silo a" ka u in a tih leh tual chuan "U, khatiang thu kha sawi ziah suh ka tihkha" lawm lo zet chuan ka lo ti a.




Min kalsan mai tur anga a in sawi hian hreawm ka ti takzet thin, "Ka tihpalh a ni e, mahse in nei vat ula ka duh, Mike ka thusawi chu min pawm pui ngei pawh ka beisei" a tih leh chuan Mike-a chu a bu ta nghut a, Nu Mapuii te nupa an lo kal chuan ka u in in neih na tur vel chu a lo sawi pui leh a, an ni pawh chuan tha an lo ti khawp mai, ka u in neih na a hun taka hman a duh miau avangin kan in buatsaih ta chuk chuk hlawm.a.




"Huiham ka chau lutuk, keichu hetiang a nih chuan pasal neih pawh ka peih lo, in buatsaih naah ringawt pawh ka chau chhe der mai ang" Asangi chuan a ti a, karleh nilai ni mai hi kan in neih ni a ni tawh bawk nen vawin chu kan thian dun leh Mike-a leh thian a a hman tur Malsawmhlua(Msa) te nen kan chhuak hi a, Asangi chu a phun a phun tawh mai, kan chhuah na a la reilo ropui sia, tunah chhun thil kan ei dawn chauh a, chhuah na tur kan la nei nual bawk nen vawin chu a phun nileng leh dawn a nih hi.




"I va han phun peih tak, pasal neih te i lo tum ve hrim hrim a nimaw, mahse i thin a chhe hlik hlek reuh si a, pasal tur i hmuh zawh pawh ka ring lo" Msa chuan a lo ti a, an in melh no lo dun a sin aw, "I chhe ve e, pasal tur ka hmuh zawh loh chuan nupui tur i hmuh zawh bik ka ring lo e, i tawngthei ropui mai si, mipa tawngthei deuh hi hmeichhia te hian kan duh lo tih te hre ve rawh" Asangi lah chuan a lo ti hlak a, Msa chuan engah a ngaih hmel vak loh.




Eitur kan chah lai te chuan an in hnial lova, waiter a kalsawn hnuah an in hnial zawm lehnghal, naupang ang mai, "A ninawm in hnial reng suh u, nupui pasal in hmuh zawh loh chuan tikhan in pahnih in in in nei mai dawn alawm, in in kawp rem phian ang, in tawngthei dun si" ka sawi zawh rual chuan Asangi chuan ka ban ah a rawn beng nghal pawp, "Sawi pawh sawi suh, hetiang mipa hi ka type a nilo, pasal atan maw, awi rapthlak lutuk" uar zetin a tih zawm a.




"I chiang amaw, tunah pawh ka bula awm te chu nuam i tih em kha, min duh lo ang deuh in i awm a, a ruk tak chuan min star tih pawh ka hria" Msa'n nui chunga a lo tih chuan a mer masa ngang mai, "Zam lo maw, ka star aw kawng lo che, khatia i sawi dan ah nangmah zawk hian mino star tu reng zawk a nilo maw?" Asangi chuan a lo ti leh, an in hnial zawm lehnghal a, Mike-a nen in en in kan nui ringawt, an ni pahnih hi in ngaizawng tak tak se ka ti.




In kan thlen chuan ka chau hnap tawh, khua pawh a thik deuh ti tih tawh bawk, Nu Mapuii'n ka u a riah pui dawn avangin damdawi in lamah kal a ngai tawh lo, naktuk ah damdawi in atang ka u pawh a rawn chhuak dawn a, a chhuak dawn han tih ah naktuk tuk leh hi man hlan a nih tawh avangin a rawn chhuak dawn a, a chak that tawh loh vang hian damdawi in kan la chhuah san mai theilo, man hlan zawh hnuah damdawi in lamah kan kal leh dawn, riah erawh kan riak tawh dawn rih lo.




Man hlan ni a rawn thleng a, zing atang kan buai tan, chaw te kan ei kham ah kan in siam nghal vat a, chhun lamah daih man hlan ti mahse hman hma kha pawi ka tilo, kan in siam peih meuh an rawn kal ve nual tawh mai, then leh rual kan kawm tam loh tehlul nen pasal ka nei dawn tih midang in an hriat khan man ei ve loh an hmaih thu te na rawn sawi ve sap sap a, thian tia sawi tur ka neih tam loh nen thian man pawh mi 50 chuang laiin ka man pawh an ei dawn.




Man ei tu te hnenah lehkha te an han sem a, Mike-a te an rawn thlen hnu ah phei chuan min fiam sap sap a, Pa Nuna'n thu a sawi a, kan unau a kan khawsak chhoh dan te a sawi chuan mitthla ah a lang lei uar uar mai, ka u nen a nun kan sual chhoh dan te chu ka mitthla ah a rawn lang let uar uar a, khatih hunlai khan chaw chhum tur no khat lek kan neih loh te kan hlau thin em em a nihkha, kan nun kha awlsam lo mahse kan hlim ve em em thin.




Ka u chu ka en a, a chau hle dawn tih ka hria mahse chau hmel a pu eih lo thung, a nui sang reng a, nalh takin an chei a, damlo pawh a ang lo, man hlan na hun te kan neih zawh vek hnuah kan in kawm khawm mai mai a, kan hlim tiang dar dar viau, chutih rual in ka u chu ka en leh zeuh thin a, a chau lutuk ang tih ka hlau ber, Mike-a chu ka thiante hnenah ka in hmelhriat tir a, an lo hre hlawm khawp mai, ka thiante tia ka sawi hi ka school kalpui te vek an ni a, school ka kal lai khan fahrah ka nih vangin chhaih nawm nah ka tawk nasa thin hle.




An ni ho hian min chhaih ve ngailo, ka thlavang an hauh em em thin zawk, mahse zirna te na han chhunzawm a, kei ka chhunzawm ve theih tak siloh ah kha chuan in kawm reng a harsa ta kha a nia, an vai maiin an hlawhtling hlawm em em a , an phu ka ti, an fel ngai reng in an la fel bawk, thian nei vak lo anga ka lo in ngaih na zawng zawng kha an ni hian min tih reh sak vek, an ni hi ka thian mai nilo ka thian tha te tia ka sawi theih te an ni.




Chaw ei nan a la hma avangin kan in kawm ho a, kan in hmuh loh na a rei tawh hlawm nen sawi tur pawh kan ngah viau, school kan kal lai te chu an sawi chhuak a, "U Mike, Grace-i ah hian a englai ber nge i duh chhan?" Sawmi chuan a rawn ti chhuak hlawl a, "Ka duh chhan ber sawi tur ka hrelo, amah a nih vang hian ka duh ti ila ka sawi sual lo ber ang" Mike-an a lo tih chuan an lo ehh dual a, thawm pawh a tha ham ham viau.




"Grace-i hi school kan kal lai chuan a luck thei teh mai a nia aw, hei kan thianpa pawh hian a star thei lutuk mahse a zei vak lo nge ni a chhai thlu thei hlawl lova" tiin Hriatzela chu an en a, "Naupang rilru put hun lai a nihkha, khatiang hun kal tawh a nia, sawi chhuah chi pawh a ni tawh lo, hei a pasal tur a awm ve reng a, chumai nilo keipawn bialnu ka nei a, hei ka bialnu te hi ka lakah a lungawi lo ang tih ka hlau a nia, ka ngam loh zia in hriatchian kha" Hriatzela'n a tih chuan kan nui hak hlawm a, Mike-a pawh a bang bik lo.




"Ruata hi a rawn kal ve hman silo a, in in neih naah chuan rawn kal ve a tum ruh viau kha aw" Hriatzela bawk chuan a ti leh a, ka lo bu zeuh, a hma khan min rawn hrilh tawh, a ni nen pawh kan in hmuh loh na a rei ve leh tawh khawp mai, chaw ei a hun chuan upa lam in an ei hmasa a, keini chu a hnung kan dawl, chaw ei lai pawh chuan kan la bengchheng chhunzawm zel a, an bula ka awm loh na a rei tawh bawk nen kan han in kawm ho leh chiah chu nuam ka ti takzet.




Chaw ie khan hnuah chuan an haw ta hlawm a, kan thlah thlap, "Ka lawmpui lutuk che, school kan kal laia i harsatna tawh zawng zawng te ka ngaihtuah let a, ka lawmpui lo theilo che, Mike-a lah sawn a hmangaih hmel che sia, nupa hlim tak ni turin ka duhsak cheu, chutih rual in i u chanchin kha pawi ka ti takzet, engpawh chu nise hlim takin awm zet tur che in ka duh che a nia, tunah chuan i thiante i bul hnaiah kan awm reng tih hria la, harsatna ni tawh chuan tumah hi min rawn pun hreh suh aw" school ka kal laia ka kawm ber thin Puipuii chuan a ti a.




"Ka lawm e, in bulah ka awm a, ka thawveng huai mai, in neih ni ah mawi deuh in in lo kal dawn a nia aw, kan heti teh nuai bawk sia, ka nulat lai pawh ka thlah dawn lo, engpawh chu nise pasal i neih ve hunah kan lawm mai dawn nia" ka tih chuan "Tehreng mai" nui hak chungin a rawn ti a, a ni hi chuan mipa lam hi a ngaihsak vak lova, tun thleng in bialpa tia sawk tur a la neilo, pasal chu a la nei har ve ngawt in ka ring.




"I thiante chu an fel kha, thiantha tak an nih ngei ka ring" ka thiante an haw fel hnu chuan Mike-an a rawn ti sup a, "Ni e, an fel a sin, kan in hmuh loh na a rei tawh sia, kan han in hmu chiah chu ka tan an hlut zia ka hriat chian phah" ka ti a, "Duati naktuk zanah party kan siam dawn em ni, Msa khan a sawi ri deuh a, Asangi nen an lo ruahman deuh a ni awm e, an in ngeih loh nen party a awm dawn chuan an in lungrual khawp mai" tiin a nui hawk a.




"Pawi cu ka ti hran lova, mahse a tuk mai in neih a ni tawh sia, kan chau lutuk ang tih te a hlauhawm loh maw, bakah ka u hi" ka ti sep a, "Ni e, a nih chuan party chu cancel phawt mai ang aw, kan in neih hnuah party lian tham deuh kan la buatsaih zawk dawn a nia" a tih takah chuan ka hnial ta hran lo, inchhung ah kan lut a, Pa Tluanga te pawh nichin mai khan an haw tawh bawk, "U i chau viau em?" ka u bula va thut pah chuan ka ti a.




"Chau lo e, nuam ka ti lutuk" a lo ti sap a, "I duh chuan lo va mu hahdam daih rawh aw, tu vak mah an awm tawh chuang lova" ka tih chuan "Ni e, lo va hahdam rawh, naktuk ah damdawi in lamah te kan kal a la ngai dawn sia, i chau lutuk palh ang" Nu Mapuii'n a rawn tih takah chuan ka u chu room lamah ka phei pui a, a in thlak hnuah darthlalang hmaah chuan a thu a, a taksa te chu lang khawp in a cher tawh hle, a sam bu nalh zet pawh hmuh tur a awm tawh lo.




"Ka sam hi min han khuih sak la, a pheng ngawt in ka ring" a tih chuan samkhuih chu ka la vat a, dim takin ka u sam chu ka khuih sak a, "Ka va han hlim em vawin chu, naupang te emaw ka tih lai che in pasal i nei ve mai dawn chu a ni sia, ka mumal a ang rum rum alawm, engpawh chu nise hlim reng la ka duh a nia" a ti sap sap a, "Awle, ka bulah awm reng la, ka hlim a nimai" ka ti sep, ka u sam ka khuih na lai ka en chu a sam hlawm liam lutuk chu ka khuih tla a.




Ka en reng, ka hnual nghal rawih, a natna hi ka mumang mai mai a nilo tih ka hriat fiah leh zual phah, mumang mai nise ka va han ti tak em, "Mate enge ni a, ngatinge i tawp daih?" ka u in a rawn tih rual chuan ka in siam tha vat a, a sam tla chu a hmuh hlau zetin ka hum bo nghal, "Engmah a nilo, thil dang daih ka lo ngaihtuah a" ka ti buh nuai a, chutah ka u chu rawn in her in ka kut chu a rawn en a, "Enge i hum kha, ka lo en ange" tiin ka kut chu a rawn la a.




A sam tam tham zet a tla tih a hmuh chuan a en reng a, ka u awmdan chu ka lo en ve reng bawk, a sam hi a enkawl uluk thin si a, ka tan pawh hmuh a hreawm a nia, a tan phei chuan hmuh a hreawm zual dawn tih ka hria, "Hetiang te chu a thleng dawn tih ka hria alawm, i zep kher a ngailo, Mate i bulah sawi ka duh hrim hrim a, Mike-a nen han in nei zo phawt ula, ka sam hi ziah mawlh ka duh a ni" a tih chuan "Mahse" ka lo ti vat.




"Nakin lawk ah a la tla vek dawn tho a, diktak chuan hetiang hmuh hi hreawm ka ti, chuvang chuan ziah kawlh law law ka duh a ni" a tih leh chuan ka ngawi ta reng, ka awmdan chu hrethiam in "Hreawm tih phah nan hmang suh, nakin ah tuna ka sam ai tha hian a rawn to leh dawn alawm, ka sam te chu a thang duh zia i hriat kha, reilote ah hei ai sei hi a ni leh mai ang" tiin a nui sang a, ka mittui tla tur chu ka dang hram hram.




"Ka khuih zo tawh a, lo mu hahdam rawh aw, in leng an la awm ve nual sia, ka va chhuak ange, Mike-a pawh a la haw lo" tiin rang zetin room atang chuan ka chhuak a, "E.. kha i lo chhuak ta maw, I u chu a muhil nghal a mi?" Nu Mapuii'n a rawn tih chuan "La muhil lo e, a muhil vat mai ang" ka ti sep, ka awmdan chu a hriatthiam loh hram ka beisei, Mike-a chu ka zawng kual a, sitting room ah Nu Mapuii unaunu te nen an lo thu ho ka hmuh chuan ka va pan vat.




"Kha i lo chhuak ta maw, Mike-a hian a lo zawng che a" an lo ti a, Mike-a chuan chik zetin min en tih ka hria, a bulah chuan ka thu thla a, "Asangi hi khawiah nge a awm a?" ka tih chuan "Msa nen dawr ah an kal a nihkha, an lo let hunah haw mai ka rilruk a" a tih chuan ka bu zeuh a, Asangi te pawh an rawn let har lo, "Kan va haw phawt ange, in neih ni ah kan in hmu theuh dawn nia" upa ho bulah chuan Mike-an a ti a.




Pawn ah chuan kan chhuak a, Msa chu motor dah na lamah a kal nghal, "I awmdan a va diklo ve, engkim a tha vek maw?" Mike-an a tih chuan ka kuah a, a awm ah hmai phum in ka thaw hak a, "Ka u in a sam ziah kawlh a duh thu a sawi a, a sam hi a enkawl uluk thin em em a, tunah hetiang dinhmun ah hian a ding leh si a, hreawm tilo angin awm mahse a mit ah khan natn ka hmuh sak thei, chu chuan hreawm min tih tir hle bawk" ka ti sep.




"Duati, I u tan chak taka i awm a ngai a nia, nakin ah a sam chu a hma ai tha in a rawn to leh dawn alawm" a tih chuan ka nui sak a, "Ka u sawi ang chiah in i sawi, eng emaw laiah hi chuan in in ang thin ka ti" ka tih chuan a nui nghawr dawt a, "Ka u hian min kalsan lovang tiraw,, keichu ka hlauthawng a ni, ka u hian min kalsan mai ang tih ka hlau, a ni tel in a natna hian a taksa a khawih chhe zel tih lah ka hriat hmaih silo" ka ti leh hap a.




"A kalsan ngai lovang che" tiin ka chal ah a rawn fawp zeuh a, "Ka lawm e, nanghi ka tawng lovang che tih ka hlau takzet a ni, a tir ah kha chuan kan in tawng hi ka in chhir em em a, mahse tunah chuan ka hrethiam tawh, ka tan chuan vantirhkoh ang i ni, ka chak lo lai ber pawh in ka bulah i awm tlat a, ka nihna leh ka dinhmun hre reng chunga min dawn kan na hi ka theihnghilh tawh ngai lovang" ka ti leh a, ka chhinhril taka sawi ka ni bawk.




"Nang ka tawng che hi khawvel a ka thil tawn that ber i ni, Pathian hnenah pawh lawmthu ka sawi fo thin, ka damchhung zawng a i bula nun hman ka duh bawk, kan pahnih in hlim takin, kan hma hun ah enge lo thleng dawn chu hrelo mahila kan pahnih a kan tan dun tlat chuan kan paltlang thei zel ang tih ka hria, hreawm na te rilru natna leh harsatna ten kan damchhung chuan min hual reng dawn, chuthil lo thlen hunah pawh chuan i bulah ka awm tlat ang" a ti nghet leh charh a.




...


Nu Mapuii te nupa nen ka u chu damdawi in lamah kan kal pui a, thisen pek a ngaih vang a ni, naktuk in neih a ni tawh a, chau taka a awm kan hlau ber, Pa Nuna'n naktuk ah ka u tan bik liau liau nurse a lo be fel vek tawh bawk a, a chungah pawh ka lawm takzet, ka u thisen an khai sak lai chuan a bulah kan awm ve reng a, unit thum an pe dawn a, vanneih thlak zetin awlsam takin kan hmu a, Mike-a hmelhriat ten an rawn donate a ni.




"Duati damdawi in ah ka rawn kal a, khawiah tak nge in awm?" Mike-an a rawn tih chuan kan awmna chu ka hrilh vat a, rawn kal a ngaih loh thu ka sawi sa vek sia, "Damdawi in luh dawn naah khan ka lo nghak ang che" tiin ka u awmna atang chuan ka chhuak a, Nu Mapuii leh Pa Nuna te pawh an hmelhriat damlo an awm ve tho avangin an kalsawn a, ka u chu ka chhuahsan rei dawn loh avangin ngaihthat loh na em em pawh nei lem lovin ka kalsan.




Nurse pakhat nen kan in tawk a, "Sawtah sawn ka u a awm a, ka kalsan lawk dawn a, mino ngaihven sak rawh aw khawngaih in, ka rei dawn lo" ka ti a, mask a vuah avangin a hmel ka hmu chiang theilo, aw ka a min chhang lovin a bu zeuh a, ka kalsawn lehnghal, Mike-a nen kan in hmuh rual chuan "I lo chhuak kher duh a nihkha, tunge i u awmpui?" A tih sup chuan tuman an awm pui loh thu in ka chhang a.




"Parking lot ah khan Lalhriatzuali scooty ka hmu a" a tih chuan "Aw... Mi a kan ve dawn aniang chu" ngaihthat loh na em em pawh neilo chuan ka ti liam puat a, "Duati, a mizia chu i hriatchian kha" a tih tak sup ah chuan ka ngaihtuah let a, nichin a nurse ka tawh hnu kha a awmdan a danglam riau in ka hria leh hnuhnawh, "Nichin khan nurse pakhat nen kan in tawk a, mahse a hmel ka hmu chiang lo" ka ti sap.




"Nurse maw?" A tih chuan ka bu nghauh nghauh a, ka ngaihtuah let a, Lalhriatzuali nen an in mah lutuk tlat, nichin khan ka lo en liam puat a, mahse ka ngaihtuah let hian amah a ni tlat in ka hria, "Hriatzuali a ni tlat in ka hria" ka tih rual chuan hmanhmawh lutuk in ka u awmna lam chu kan pan a, thisen pe tur mai mai mah nise midang nen an awm ho vak hian a chauh thin avangin cabin ah kan awm kha a nia, ka u chungah thil ṭhalo a thleng a nih chuan ka in thiam thei tawh ngai lovang, ka u room chu Mike-an a hawng a, ka thil hmuh avang chuan ka au chhuak nghal that.

Cont....


Click leh comment a that chuan naktuk zanah a awm lehnghal ang aw...