Thinlung BY Kimkimi tlau (Completed)

[ngaia]

Eirawng ka bawl laite chuan alo awm vezel a, lungawi anga awm leh nghal mai chu ka tum rihlo a, ka induh khum velo anih chuan ngaiah min nei anga, ka lung ti awilo mahse, awlsam tein min thlem lungawi leh nghal thei tih a in hre ru kar tawh dawna, min ngaihnep phah thei tlata, chuvang chuan tun ṭum chu hrem ve hlak ka duh ani. Mihring mihrinna ah hausa in chhuan tur neilo viau mahila ka inhlut ve a, miin an duh duha an tih kawi mai mai tur ka niin ka in hrelo, Achang chuan U Mafela hian engtin nge min duh ve mai theih le tih hi ka ngaihtuah ṭhin a, ka phulo erawh kati lo, Nunna pakhat nei ṭheuh ṭheuh ah phu loh bik hi an awm theiin ka hrelo ani.

" I lungawi lo viau emni? " Dawhkan kil in Alu ka vel a, ka bul setah lo ṭhu vein min en leh dauh dauh zela, ati anglo tak tak ani. " Amak emai ka sawi peih tawh rihlo " kati hlaka, ka melh rawm rawm bawk, In ngaihzawnna kal tluang purh chu ngaia inneih a awl a, in laichinna a nghet theilo anti fo a, In ngaihzawnna buaichuar deuh pawh hi a hahthlak a, mi pahnih kan inti hreawm tawn mai mai niin ka hria. Tunah tak hi chuan ngaihzawng neih nuam tihna ka neilo a, ka awmdan hi ka sawifiah thiam chiahlo, kan inkar a ṭhat loh deuh apianga Nurse nu lo tel ve zel leh sawitel angai vezel hi a buaithlak kati a, a hahthlak bakah a chauhthlak ngawih ngawih.


" Hetiang chuan ka awm anuam theilo alawm " Ka kut lo vawn atum chuan ka kut chu ka dahsawn a, aphun hluk mai. Alu vel laklawh lai laia kut in vawnsak te chu awih awm loh lutuk, " Ka hul lutuk U Mafel, in ngaihtuah ṭhat ka mamawh in kahria " amah pawh en lovin kati sep a, hun thawl ka mamawh rih ni berin kahria. " Zinga i last seen ka hmuh khan ka lungawi lo a, i msg hmuh tur a awm miahlo te khan ka thin ati rim a, biak pawh kalo be duh biklo che anihkha, min kawp dawnlo tih chu ring mahila aaaa..ka sawifiah thiamlo Bawihi, ka hlauthawng em a chan che ka hlau ani " ati sehchilh naka, a thusawi chu sawichhuah harsa atih hmel viau a, mipa tan chuan thil sawi nuam tak anilo ve reng reng ani.

" Kan inkar buaina chu thuhran nise, kan inkar abuai deuh apianga Nurse nu lo tel vezel hi ka hrethiamlo a, 'Kan inkarah engmah a awmlo' awlsam takin ti mahla, i bialnu ka nihna ah ngaihṭhat lohna ka neilo thei biklo a. Ani nen khan Ka in khaikhin lo theilo a, i nu in a duhpui zia che ka hre ve bawka, hetianga i awm chang hian ka na ve ngawih ngawih asin " kati a, ka mittui lo hnai kuar chu duh lovin ka mit ka khap sak saka, ka hrawk chu ana thip hlur tawhin kahria.

" Ka be tawh lovang " atih chuan ka chhang lo a, thawsanin thildang ka tihsan a, U Mafela pawh chechang lovin a ṭhu ngawi kar mai. ka melh zeuh zeuh a, chutia a awmreng takah chuan ka khawngah leh tawh viau a, ṭha deuha biak ka chak leh et et tawh; Mahse, insum hram hramin eng ah mah ngailo ang chuan ka awm lui zela, Kan mipa duh takte hrilhhai taka an awmlai hmuh reng chu thil nuam ani hauhlo.

Choka boruak nawm loh em em lai chuan Bawihtei alo lut ve hlauh a, ka thaw huai mai, U Mafela chuan alo be vat a, Bawihtei lah zakzum viau siin U Mafela chu a be ve siam siam reuh a, amah anglo deuhin a ṭawng duh ve khawp mai; Kei erawh ka ngaituahna a kal ding leh lek lek zela, ka thilsiam pawh chuan rilru an la peng theilo ani, Mite hian kan ṭhatna duh vang ni silo hian kan hmakhua ngai deuh angin thil hi min hrilh ve ṭhin a, an thusawi zawng zawng awihlo mahila ' Zothani hi chuan Lindai hi abe ṭha lutuk, ka monu hual te ati ṭhin a ' ti a an sawi erawh hi chu karing a, achhan pawh kan inhmuh changa Pi Zothani'n min ngainat lohzia a tihlan fo ṭhin vang ani.


" Ka haw dawn asin " gas bulah dinga youtube short ho deuh deuh ka en lai chuan alo ti sup a, khawnge maw Bawihtei pawh chu a awm hman ni, choka ah chuan kan pahnih chauh in kan awm leh tawh a, " Ummm, fimkhur la" tiin ka melh zawk a, " Zanah kal itum em? " atih leh chuan " Kallo maithei " kati a, mitmeng tak ngala min en reng avangin ka zam leh lek lek tawh. " Min ngaidam rawh aw Bawihi, i rilru tur kalo ngaihtuah tel ngailo a, Lindai nen kan inkarah engmah a awmlo tih ka chian em avangin ka kuta a chelh pawn kalo ngai serious ngailo a, i rilru tur kalo hrethiamlo ani, kan inkar tih tawp lam chu ngaihtuah tawh suh, ka duh in ka hmangaih em em che a, ka mitah chuan nang tluk tu hmeichhe dang tumah an awmlo, ka thinlungin a thlan hmeichhia ini a, ka lung i dum hluah hluah asin " ti thuk ruih in akut phah hlai deuh chuan ka biangah adawm a, lo kun hniamin ka chala a fawh vang vang lai chuan nghet zetin ka mit kalo chhing ve bawk a. Ka chala a fawh chang hian ka hahdam huai huai a, hlu bik riaua in ngaihna ka nei ṭhin a, tunah pawh chutiang chiah chuan ka awm leh tawh.


A in lakhran deuh hnuah chuan " Ka laka thikthu i neih hian katan chuan alawmawm a, minta neih hliah hliah chang hian nuam kati ṭhin, i thikthu chhiat ang tho khan keipawh ka thikthu a chhe ve a, Inhnaih taka kan awmdun velo chung pawhin vawiin ah pawh Rochhara i thik em kha" katih chuan a phun hluk a, " Khapa tehhrep kha, ka bialnu a chhaih kual leh anih chuan ka hnek khawp ang " ati khar khar a, a insawi thinrim chawp leh dawn takngiala hriain ka nuih tawp a, dingdihlip ar ar in a khabe kual ah chuan ka fawh saka, a in ringlo nge a phu zawkin kahria.

" Engtin nge kei nula satliah vemai, chhuan tur em em pawh neilo hi min duh theih le kati ṭhin " Dak deuh vahin ka en a, ka haw dawn atihna pawh arei leh tawh a, duh aiin thil kan sawi tam leh tawh. " I thinlung min pe a, chu mi hen pha tur khawpa thil hlu dang katan khawvelah hian a awm theiin ka ring tawhlo " Atih chuan ka laih deuh avangin ka hmui hnuai ka seh zeuh a. " Mite chuan engpawh sawi se ding nghet tlat ila, ka chhungte emaw i chhungte pawn kan inkar hi pawmlo mahse, kan pahniha kan in pawm a, kan in hmangaih tlat chuan engtin mah minti theilo tih hria la, min ring in ka kut hi nghet takin vuan tlat ang che " Nghet charhin ati a, a hmel thutak run leh mitmeng dam thlup ah chuan athusawi chu a tih takzet zia ahriat theih a, he mipa hmangaihna dawng tu ka ni hi ka vannei ka inti ani.

A chetphung hi achang chuan alawmawm lo ṭhin a, a naupangchhia lek lek zel bawka, alakah rei tak lungawi loh tum ve mahila min thlem seuh seuh tawh chuan ahar kati tlat a. Nep min titu an awm pawn pawi ka tilo, an duh leh hmangaih tak kiangah chuan tumah hi reitak an thinrim reng theiin ka ringlo a. Ka in sangmar viau na chungin keipawh ka thinrim rei thei biklo a, a hrilhhai hmelte, a hreawm ti hmelte ka hmuh khan ka tawt ve ṭun tho a, atawp thlen hial duhna rilru pu tawh si kha min ti danglam zo leh vek tawh.


" Engpawh thleng se ka lak aṭanga i hriatchian thil anih loh chuan lungawi lo tawh miah suh ang che, min zawt chiangla, ka thusawi ngei i hriat hunah chauh ngaihdan i siam ṭhin tawh ang i hria em? " ka tih chuan abu nghat nghata, "Ka lungawi leh mai avang hian min kalpah miah suh ang che, a dawt leh athleng anih ngai chuan ka thinlung nem lam nilo ka thinlung sak lam i hmachhawn ve tawh ang, eng emaw hleka hmeichhe dang i phur kual emaw an khawih fo theih che a i awm leh anih chuan, 'Inṭhen maiang' i tih naah ka ngai anga, chance ka pe tawh lovang che, ka thusawi avanga zalen lo riaua i inhria anih chuan tun hi sawi hun lai tak ani " Ka ti hmak hmaka, ngaidam tawh mahila ka lungawi lohna te kha an reh vek thei biklo a, tuna hetiang thil ka sawi chhuah loh chuan ka ngawi ral leh maiang tih ka hlau ani.

Ngaihzawngte thuhnuai chi ka nilo a, duhdan erawh ka nei ve ṭhin a, ka duhdan leh ngaihdan ngaipawimawh lo bialpa neih chu ka duh bik hauhlo. " i thilsawi hi Hnialna ka neilo, i sal nih pawh ka hnial hleinem " Atih chuan ka ner nawka, U Mafela erawh anui vur vur thung. " kanti khat tawh emai " Ti sup in ka hmuiah afawp a, asawi ang tak takin tun hnaite hi hun thawl kan nei khat a, inhmu fo mahila hetianga in duatna hun hi kan nei ngai manglo a, kan awmna in zir teh chiam lo mahse, ka hnar phal biklo, a duhthawh ve viau a, in kiss hi chu azei ve thlawt ani.

.
.
.

" Mate, naute a harh a " U Hlua'n atih chuan kaner nanga, ani lahin min nuih tlawn vur vur lehnghala, " ava harh hma ve " ti nang nangin pawnah chhuakin in hnuaiah ka chhuk thla chhat chhata, kar hnih tluan ṭhak zanah kan mu thei tawhlo a, ka zawi nguai tawh mai.

Thla liamta khan ka u ten fanu annei ve a, kan lawm in kan hlimpui tehlul nen apian aṭangin zan ṭah avei nghal a, ti hian kar hnih chuang chu kan mu thei tawhlo a, U Nguri lah a che ṭha thei silo a, ka hah leh ber mai ani. U Faki nise tunlai chu insawiselna angah riau a, U Mama te in lamah a tamtal tam zawk rih bawk nen ama tawkah atalbuai ve a, Naute khawih velah hi chuan ka phut hranlo. U Hlua lah a zeilo khat tlata; Mahse, naute a harh chuan ameng ve reng zela, zeilo deuhin min pawm chhawk ve ṭhin a, naute amut hma chu a mu tawh ngai biklo, lehlamah chuan a fakawm kati a, ahma zawng aiin a nupui angaihsak a, ka u mah nise ka chhuang takzet ani.

U Hlua ten fa anneih avangin U Mama te pawh ka awmpui talo a, rilru ah erawh an awm vereng tho a, U Faki'n buaipui lo sela chuan ka ngaihtuah zual viau ang. Engkima ahmasa ber leh abuai ber tur ka ngaih kanu erawh a in dahṭha hmaka, zana a tunu a ṭah rawih rawih pawn 'Enga tinge? ' tih ṭawngkam hi kanu hnen aṭangin kan hre ngailo a, amak kati ve thlawt. Mi nu te chuan an tute an atchilh a, kanu hian atchih vese ka tihna lam anilo, an pua a, zan ah sual se an menpui a, engkimah an buaipui em em zel anih laia ngaihsakna chhete mah atihlan duh ngailoh avang hian U Hlua hi ka tha nat pui ve ṭhin. Ahma deuh aṭang khan phone hi a khawih tam zuala, kapa pawn a khak zeuh zeuh tawha, asim lem chuanglo thung, kan chhungkaw boruak chu a ipik hle a, kehdarh thei mai dinhmunah kan ding nimai hian kahria.


" I chau tawh ngawt ang, duh tawkin che ve thei tawh ila aw " U Nguri'n min hmuh veleh alo ti vara, a in thlahrun hmel khawp mai, " Hetiang reng hi ani bik nang, kan dam anga kei aiin ila hah daih zawk dawn alawm " tiin ka nuih var vara, chau ve viau mahila a inthlahrun hmel lutuka chau deuh anga lan chu ka duhlo. Kan khua ah a chhungte an awmlo a, keiin ka ngaihsak loh chuan kanu lah beisei bo ani si a, miin 'hmeichhia hi chu nau kan neih hlimah hian kan rilru a no zuala, duat kan mamawh zual bik, nu te thlakhlel te hi ana zuala, chhungte kianga awmte hi a chakawm ngawih ngawih zel ' anti ṭhin a. U Nguri pawh Hetah anu te an awm lo bawk nen, rilru hreawm deuha a awm ka hlau a, chuvang chu ania atheih ang anga ka duat ve hram hram ṭhin ni.

" I awm lovang tih hi ka hlau ngawt mai " Ati leh a, a lawm hmel tak tak a, " Aaaa...min fak ar ek zo mai dawn " ka tih chuan anui a, anuih zawng chuan na anei aniang aṭhen sak sak a, " Nuih pawh kan harsat rih chu ani sia, ka nun hi ava chep tak " ati a, ka nuih vur vur mai. Ka vahnu sual em em Lalṭhazuali chu ka pawm a, inla fing deuhin a meng veleh kur tawh hi, thil a hmuthiam ve tawh emaw tih mai tur hian thiamlo zetin amit mu hi ati che ve ruai zela, a chezia engkim chu keini amah hmangaihtute hi chuan kan hlimpui a, kan en ning thei mawlh lo chu ani.

Duati(Ṭhazuali) pian aṭang hian ka ngaihtuahna ka hmangkual nasa a, fa neih hial te ka ngaihtuah veta a, chak erawh kala chak chuanglo. Ka vahte pawh sawifiahthiam phak loh khawpa nasa in ka hmangaih a, keima fa ngei nei ve ta ila engtianga nasa in nge ka hmangaih ang le tih ka ngaihtuah a, Nu leh Fa inkara hmangaihna hi aril anti a, U Nguri pawn ' Ka fanu ṭap ri ka hriat hma zawng kha chu ka na vel vek a, kha aia na kha khawvelah hian a awm leh thei tawh pawn ka ringlo; mahse, ka fanu ṭap ri ka hriat rual khan ka na tawrh zawng zawngte kha a reh nghal vek mai a, ka fanu hmel ka hmuh a, kut ke kim anei tih ka hriat phei kha chuan hlim vangin ka taksa chhung hi a ṭek chhawk chhawkin kahria ' ati a.


Kanu nen kan inkar ka ngaihtuah kai lo theilo a, min hmangaih lo chu ka ti ngam biklo a mahse, heti taka min thlahthlam thei hi chu amak kati. Natna vawrtawp paltlang chunga min nei anih chuan min hmangaih viau turah ka ngai ania, nu ṭheuh ṭheuh an in anglo hlawm takzet ani. kanu ang mai ka nih hi ka hlau a, naute ka hmuh te hian duhawm tiin ngaina viau ṭhin mahila keimahah hian kanu zia tamtak a bet lo theilo a, mahni fa hrin ngei enkawl tur chuan kala inzuam loh mai bakah ka ngamlo ani, kanu anga fate tana nu chenfakawmlo nih chu duhlo mahila kanu chhunna lai ka neih ve avangin kanu ang mai maia ka fate ka enkawl ve ka hlau a, ka hlauhna hi a sir aṭanga thlir tutan chuan 'A ho ' maithei a, a tawngtu leh a leilunga ding mek tan hi chuan Thil ho tak ani chuanglo a, Nu dinhmun hi a ropui a, zuam ngawt chi aniin ka hrelo.


Bawihtei chu ka awrh a, alai chu atla tawh tho na a, puak pangngai hian kanla paw duhlo a, awrh mai hi a samkhai a, anuam pawh kati. Rin aiin naute khawih hi kalo zei a, kanu'n vawi2 abual ve tawha, abakah chuan keiman ka bual ve maizel tawh a, thil harsa em em ani hranlo. U Hlua hian min fiam fo a " Nangchu fa pawh neila i ngaihtuahawm loh " ati ṭhin a, ka ner khum nang nang zel. " In chungah ka chhoh pui dawn ania, nangpawh i intifai duh ang in pa kalo ko dawn nia " ka tih chuan " Aw le, Hnute a hne puar bawka atlei rei ang " ati nui sang a, "Duati chu zanah bak asual hleinem " ti vein ka vahnu chu ka en dauh dauh a, a hmel hi achhia nge aṭha pawh ka hrethiamlo e a.


Pawn a kan chhuah chuan Duati chu a chhing ve sawk reuh a, kawtlai chu a eng ati ve deuh aniang, Hmanhmawh deuhin in chhungah luhpui ka tum laiin, ka hnunglamah min ko ri ang deuh ka hria a, ka inher chuan Rin loh deuhin U Mafela ka hmu a, tun ang zingah lehnghal helam daih daiha ka hmu chu mak kati angreng a, a hnungah chuan A nau leh nurse nu kha anlo kal ve bawk.

Ka bulah lo dingin Naute chu alo en duk duk a, " Sual reuh lutuk mai " ati hluk lehnghal, zanah naute vangin ka mu ṭha theilo tih hi ahre ve a, Duati hi a haw ve em em mai ani. " A eng lutuka a meng ṭha ngamlo " ka tih chuan akutphah hlai zet in Duati hmai chu a hup thuk a, " Hey " ka tih vak rual chuan rang zetin a kut chu ala sawn a, ka nuih tawp. Tunge maw naute hmai hup thuk thuk ngai reng reng ni, zeilo lutuk mai, " Doctor vesi naute chhaih pawh han thiam loh " Ka ti chu ala na khawpa " Naute chungchang ka zir reng renglo e a, Engtin nge Naute awm ka thiam ang " ati hmuka, ka nuih hak hak mai.

" U, i rei e " Anlo tih chuan midang an awm ve tih ka hrechhuak chiah a, " Va kal mai ula, tinge inlo din vezel a " Ngaihsam zet hian U Mafela chuan ati a, ka khap buai duh biklo a, Nurse nu awm ve vang hrim hrim pawn ka khap lovang. " I mak kati, khawlaia khatia awmte kha azahthlak ania aw " Viviani'n ati hlara, a pawi ka sawi pawh ani silo a henau pawh hian min millo nghal em em mai ani.

" Kal teh u " ti hmukin ka sam achul thuak a, tlangval phanchang ani tawh na a, naupangchhia deuh deuha awm hi ala ching a, a chang hi chuan Mipa naupang inti pa ve deuh hi a ang ṭhin. " U Linda kal ang, hmeichhia ṭheuh ṭheuh kan in anglo e, zah hrelo deuh deuh hi kan awm a" Viviani chuan min melh ram ram pahin ati kher a, U Mafela'n phun hluka an lam hawi atum chuan kalo dang vat a, " A ho emai, i hauh let zel chuan ka tan thil i ti khirh mai mai " katih avang chuan ka mita min melh kalhin thawpui ala haka, keiin a chal a thlan bawl ṭek ṭek chu ka kut a tuai fai sakin ka nuih ver ver a, min nuih let ve sukin ka hnar alo khawih zeuh a " Innei tawh maiang " Atih chuan ka nui tawp hmaka ka melh vak ringawt.

" Eng nge intih reng reng " In sawi hliau hliau chung chuan kati a, " Exer kala a, minlo zui ve anihkha " ati hmuka, an zui ve chu a lawm hmel loh khawp mai; Ahma deuha ka thinrim chiam aṭang khan engkimah min vengthawng tawh a, Nurse nu pawh a phur leh tawh ngailo hrim hrim, achang chuan ka khap mah mah em aw ti a in ngaihtuah rauh rauh chang ka ngah a, vawikhat phei chu ka sawichhuak hial a ' Zalen lo riauin i in ngai em? Ka khap burlo che ania ' ka tih khan U Mafela'n ' Chutiangin ka ngailo, ka bialnu i nihna chauh hria in, keimah hian ka dang chep zawk che a, i ngaihdan lam kalo ngaihtuah tel ngailo a, mipa i biak hlek pawha ka lungawi loh tehlul nen hmeichhia ka phur vel ṭhinte kha itan a lungawi loh thlak dawn lutuk tih kalo ngaihtuah tel ngailo a, tunah chuan ka hrethiam tawh, i bialpa ka ni ve tho a, ka bialnu i nih avanga i laka ka huatthu a chhe em em ang in i bialpa ka nih avangin ka lakah huatthu i pe chhe ve tho dawn tih ka hre tawh alawm, kalo mawl em ani ' tiin min chhang a, ka huattur leh tih tauh khum ngai tur khawpin a awm tawh ngailo a, a thikthu erawh a chhe mah mah a, Mipa naupang nui sanga ka biak te, an biangah te ka fawh chang hian a thik tlat zela, a buaithlak tak tak ani.


In chhungah kan inzui lut a, Zing kar karah U Mafela nen kan inzui lut chu ka chhungten mak anlo ti viau a, "I va zing ve Mafel " U Hlua'n alo ti a, a fanu chu alo ngaihven leh nghal chung mai. " Nia, exer kala a " Couch a ṭhut pahin U Mafela'n atih chuan " Khawi kalo pawm ang e" U Hlua chuan U Mafela pawh be zawm lo in A fanu chu alo ban du du a, a atchilh ve chiang asin. " Ṭhu la, kalo pawmtir ang che " kati a, rem deuha aṭhut fel hnuah Duati chu ka pawmtir a, a lu ka siamrem sak leh thlap hnuah U Mafela bulah chuan ka ṭhu ve a, alo leng zing ve tawh a, ka chhungte lahin kan inkawp tih an hre vek bawk nen abula ṭhut hi chu ka zak tawh biklo a.

" Ava hmuhnawm awm ve " U Hlua naute pawm lai ngawt chu athlir a, U Hlua azei loh tehlul nen hmuhnawm ati em mawni, " Naute ka awt ve " Midang hriat loh tura ti supin min melh nghal ngur a, minti lai leh viau tawh a, ka biang te hi asa leh hat hat tawhin kahria. " I mawl emai, awh vang ngawtin naute aneih theih loh " Midangin an hriat ka hlau si a, keipawh chu ka ṭawng ring ngam biklo a, " Innei tawh maiang, kei aia naupang zawk pawn fanu anei tawh ania " Naupang chhia zet hian ati leh a, U Hlua ṭhutna lam chu ava hawi leh ṭhin a, hepa pui hi Naute chu a awt ve tak tak amile.

" I a emai a, Zanah pawh a mu duhlo a Naute saw asual lutuk tih i hriat kha, awt duh miah suh " Kati ta ngawta, hnem vak ngaihna ka hrelo em ani. " Mahni fa ngei buaipuia zana men te chu anuam dawn asin " ati thum chhak a, U Mafela chu en in thawpui kala vak ringawt, keiin fa neih ka hlau titih anih laiin ka bialpa thung chuan a awt em em chu ani si a, kan va han in anglo tak em!


" Thisen pekna ah kal ve itum em? I hman dawn em? " Kan thusawi thlak tum takin kati a, " Ka hrelo le, hnaah kal phawt ka ngai dawn a, kal ve erawh ka tum ang, nang kal i tum em? " Tiin Min thlek pah vut a, thisen ka pek theih aring chiahlo nge achal ati chuar tap a, ka ngei tawk atling viau thung. " Tum e, vawikhat mah kala pe ngailo a, pek ve ka duh " Phur deuhin kati a, ka phur tak tak bawk. Midangte tana kan luanchhuah ve theihna hun ani a, sum leh pai ang zawngin midangte ka ṭanpui ve theilo tih ka in hrechianga chuvang chuan blood donation hi chu tih ve ngei ngei ka duh.

" I fit tawklo maithei ani, tunlai i mu ṭha silo a; Mahse, kalve chhin tho la, i theih leh theih loh chu an check hmasa dawn tho a, i lo pe thei mial maithei asin " ka kut khalh neuh neuh pahin ati a, a sawi takah chuan ka in ringhlel leh vek tawh. Ka taksa hi a ṭhalo ve a, bp hniam tih te hi kanei fo a, tunalai phei chu Duati avangin ka tlaivar fo bawk nen ka pek theih pawh ka in ringlo leh tulh tulh a, ka phurlo leh vek tawh. " Thil ni thei kasawi mai mai alawm, i pek theih loh na chhan tur a awm biklo " min hnem tum taka U Mafela'n alo tih leh chuan kabu ve nghat nghat a, " Pek theih loh leh ngai awh animai " lei chhuah zeuhin kati a, ka chetphung ho zet chu anuihpui ve hawk mai.

Hna kal tur ani si a U Mafela chu aleng reilo a, zingkar aṭangin kan inhmuh chu thuhran nise kan boruak aṭha bawka, zanah mu ṭha vaklo mahila ka hlim tho a, mut ṭhat loh avanga mood ṭawih zet kha ka neilo a, ka che reng reng chu ka phur sarh a, Mampuia lo tho pawn "Zingah khan U Mafela aw ka hrereng ani " hre fuh inti zetin ati a, ka hnial peihlo ka nuihpui a, An unau a Duati an buaipui laiin kanu eirawngbawl kapui thung a. In hnuai aṭanga U Nguri'n anpa alo koh chuan " Awi! Ka theihnghilh chiang lutuk' " kati hluai a, awmzia erawh a awm tawhlo khawp mai, U Nguri hnenah khan 'inpa kalo ko ang' kati vel a, U Mafela alo len thut avang leh thil dang dang kan sawi avangin kalo theihnghilh daiha azialo tak tak ani.

Chhunah chuan Naute atlei tho a, Blood donation an tihna lamah chuan ka kal ve dawna, Kan ṭhian ho in kan in thurual ve a, pe thei hlawm tak ang maw. " Nu, Thisen pek naah kan kal ve dawna, ka awm loh chhungin U Nguri lo awmpui vela " Sitting room a phone abih ngur ngur lai chuan kati a, " Chaw chhum angai " tih chauhin min chhang a, a phone bawk chu en leh in anui vur vura, ka chhanlet loh nan ka insum hram hram ani, chhanglet ngat ila chuan kan in hau pherh khawp ang.


Vanneihthlak takin U Faki alo haw hlauh a, Thisen pek na lamah akal peih loh avangin U Nguri alo awmpui dawna, "Khawnge Matthewa " U Hlua'n atih chuan " A-pa hnathawk tur a ngen tlat a, U Mama'n a hnathawhna ah ahruai dawn " U Faki'n ati a, "A hreawm ang a " Kalo tih chuan min ner khum nangin "Nep viau zel suh, nuam ati viau zawk ang chu " Ati hlaka, chhan pawh ka chhanglet tawhlo. Motor chuan nuam ati a, ka vahpa chuan Hreawm chu ati hauh lovang; mahse, ka lainat a, ka khawngaih tlat tho a, U Faki sawi ang tak takin keihi ka nep leh tlat zel.

Blood donation hi ṬKP hmingin ani a, bial huap anih avangin mihring pawh kan tam deuh karing a, ka phur hranlo. Vawikhat pian ve manah midangte tana malsawmna nih ve ka duha, chuvang ania buai chung chunga kal ka tum ve hram hram ni.


Angaihi A-pi te in lamah a awm daih avangin ahmun a inhmuh mai kanti a, Angaihi a awm loh chuan kalpui tur pawh ka neilo a, Thianga te lah mipa anni si a, Whatsapp group lamah in thurual hlawm viau mahila, atakah hi chuan thurualpui theih tak tak pawh annilo. Amosa nen phei chuan kanla ṭha lutuk lo a, in be zeuh zeuh mahila ahma ang khan ka pawh thei tawhlo a, ka thiam loh vek pawh ani biklo. U Mafela nise ka duty hmasa dawn atih avangin kalpuia sawm chi ani silo a, mahni tlawnga kal chu ka huphurh ani, chutia rilru buai zeta ka awm lai chuan Thianga te anlo lang hlawl a, " I inpeih tawh em? " Ti phawr phawrin fridge a hawng leh nghal pawp a, U Faki a ṭeu ṭha leh khawp mai.


" Ramthianghlim engvangin nge fridge hi i hawn pawp zel" ati hlara, Thianga lah in angai pawimawh lo nasa si, "U Faki thinchhe lutuk hi chu aw, i kaw chhung hi hai ila thin mumal pawh i neih ka ring tawhlo e a " Tiin anui vur vur a, tui a in pah khawlh khawlh bawk. kan awmrei chuan an in hau nasa leh tulh tulh dawn tih hria in ka chhuahpui vat a, "Thisen te hi pe ve tala, i thisen dawngtu chuan i zia akai anga a rapthlak ngawt ang " Tlanchhuah pahin Thianga'n ala ti hrama, U Faki lahin a chapal in ala vawmzui hram bawka, a vawm fuh hman chuanglo. Thianga chu zui chhuak in kan khi ṭha hlawma, pawnah Thianga pawh a pum dawm meuhin alo la nui a, ati lui tih hria in a hnungah ka beng pawp a, 'Ana' ti vakin a ding ngil nghal awt a, min melh rum viau lehnghal.

Zah ngaihna nei reng reng lovin ni chu a sa a, men pawh kan meng ṭha thei hlawmlo a, kan ner nung hlawmin kahria, "Amos i ner nasa bik lutuk " Thianga'n atih chuan "I hnar kua anih chu a, nang bak baka ner nasa " Amosa'n ati hluka, inhnial reng si hi an in kawm ngeih hlawm em em a, an hmeichhe ṭhiante lah hi min dim ngai silo a, kawm an nawm em em rual hian an bula awm hi chu in fit angaiin rilru zau put angai mah mah zela ahahthlak lek lek ṭhin.


" U Fal, thisen pe ila " Erica'n ati a, a be ding kher chu ṭullo kavan ti tak, U Fala hi rui nawi ve thei deuh ania, aruih tawh chuan a polite thei lutuk. Zurui te hi ka ngaina lo a, zu an in loh laia kami ngainat deuhte pawh zu an ruih chuan ka ṭih tlat zela, kapa pawh zu a in chuan ka hnaih ṭha ngam ngailo hrim hrima, kawtlai leh hmundangah zurui ka hmuh pawn ka hel ṭang ṭang zela, zu rui hi chu ka ngaina theilo reng reng.

" Min duhlo " Awlsam zet hian U Fala chuan ati a, " Tu in maw " Thianga'n atih chuan " Zu ka in nasa lutuka ka thisenah hian zu rim anam vek tawha, Doctor ten an duhlo, bakah vein ka nei tawhlo " ati bual buala, amah a nui heu bawk si a, ka insum theilo ka nui hawk hawk a, Erica leh Thianga nui over fal leh bik chuan ka nuih za chu anti reh nghal vekin kahria. "Ni asa si kal ang u " ka tih chuan min hnial biklo a, U Fala chu kal pahin anla fiam zui hrama anva han nghal ve tak.


" Thisen pek chu maw " Ngawi renga kan kal laiin Vena'n alo ti hluai a, " Eng nge a, nang lah hi " Erica'n ati hmuka, "Thisen pek laia hmeh tur min pek ang kha in hria tiraw? Kha khan ka thisen a ti chhuak ṭha theilo zawkin kahria, Hmeichhe hnute ngei han hmet pah zawk ila ka thisen a chhuah ṭhat zawk karing " alo ti ve khauh a, an ri leh hlut mai, " Hnute sawi ve suh I bialnu hnute tet tet nen, laikhuma suangtuah tham pawh aneih veloh kha " Thianga'n ati zeka, ava han sualthiam vetak. " Hnute ni na na na lian vak tura han ngaih " kalo tih ve chuan "Ngawi rawh, Mipa tana ngaihzawng neih nawmna ani ve asin, in hrethiamlo mai mai anih hi " Ati reuh anihchu! Ka ngawi hmaka an pawt ho leh tulh tulh dawna hria in ka kalchak sawt a, Amosa'n minlo zui ve vat bawk.


A hmun kan thlen chuan anlo ri nak nak tawh a, hruaituten min lo be thuai thuaiin " In hb va check tir ve ru, In buk bawk ula " anlo ti a, Ding chunga ka hawikual hrek hrek lai chuan " Lut ila " Ka dara lo kuahin Amosa'n ati a, ka inla hrang rang lutuk ringawt, Amosa pawh chu a hrilhhai ve deuhin kahria a, apawi ka tilo. Mi tam na laia inkuah kha amawi loh bakah bialpa neilai kani lehnghal a, aman min hmu kherlo mahse, anuam ka tilo hrim hrim. Angaihi zawnga ka hawi deuh ruai lai chuan " Kim, hetah kan awm " Angaihi'n a chhung aṭangin alo ti a, thaw deuh huaiin " Kal ila " tiin Amosa chu ka bia a, " Zu lut rawh " atih chuan ka chhang zui tawhlo a, A chhunga ka luh rualin Angaihi ṭhutna lam ka pan ding nghala, Angaihi bula U Mafela lo ṭhuve kur ka hmuh chuan mak kati a, hetah a awm ka ringlo hrim hrim, hepa pui pawh hian min ṭhawng dawt dawt reng mai anih hi maw, zingah nise min lo ṭhawng thut tawh bawka, heta akal dawn te chuan msg tal pawn min lo hrilh ve tur ania, mawl leh lutuk mai.


Cont..
Show post links
Top