THE SICILIAN (BOOK III-V) By Mario Puzo

[Loma hmar]

CHAPTER 26B

Chuta zan hnih a hman chhung chuan Guilianno chu a mu tha lo hle, tunge mu tha bik chuan ang? tiin a ngaihtuah a. Kum zabi thum emaw li emaw Sicily-ah hian mipa leh hmeichhia miropui tak tak an awm tawh a, heng thil tenawm tak tak, mihausate chapona leh inchhuanna te chu tlan chhiatsan theih niin an ngai thin. Mahse La Venera pasal thih dan anga thih mai kha a thlanawm rum rum mai.

Guilianno-a timuhil thei lo tu ber erawh chu a buaina ruk a neih vang a ni. Chumi kar tir lama Don Croce thah tuma an beihna ah khan engtin nge a tlan chhuah theih? Guilianno chuan a ruahmanna kha a fuh thlap tih a hria. Portella della Ginnestra hmuna inpawng thahna chungchang thudik a hriat khan a tihdan tur uluk takin a ngaihtuah lawk vek a ni. Don chu ngun taka ven a niin mahse a venhimnaah chuan pawp a awm ngei ang. Palermo-a Hotel Umberto hmuna him nia a inhriat lai taka beih chu Guilianno chuan a thlang ta a ni. An pawl chuan hotel chhunga mi waiter pakhat spy an nei a. Don Croce chet vel dan leh vengtute inremdan vel a rawn pe a. He a thil hriat avang hian Guilianno chuan a ruahmanna chu a hlawhtling ngei ang tih a chiang a ni. Palermo-ah inhmuhna tur hmunah mi sawmthum a ko khawm a. Michael Corleone-an Don Croce chu tlawhin chawchhun a ei pui tih a hria a, chuvangin chawhnu lam hun, Michaela a kal tawh a ni tih report a dawn thleng chu a nghak ta a.

Chutah huan atanga vengtute hruai kawi nan gate hma lamah mi sawmhnih velin an bei a, a hnu lawkah midang sawm chuan huan hungnaah puak thei kamin an luhna tur kua an siam a. Chu mi kua atang chuan Guilianno chuan hma hruaiin an lut ta a, vengtu panga chauh lo awmin Guilianno chuan pakhat chu thal nghal tawpin midang pali chu an tlan chhe ta a, Guilianno chuan Don Croce awmna suite-ah chuan a tlan lut nghal a, mahse a lo ruak vek a ni. Vengtu pawh an awm miah loa dah a ni kha maka ti hle a ni. Chutih lai chuan a hma lam atanga beitute khan an rawn zawm ve ta nghal a. Pindan zawng zawng leh inkalpawhna zawng zawng chu an zawng vek a, mahse engmah an hmu lo a ni. Don-a taksa lian tak chu ran taka che zung zung thei a ni tlat lo, chuvangin thil pakhat chiang tak a lo lang ta a ni. Michael-a kal hnu lawkah Don chuan hotel chu a chhuahsan nghal a ni. Tunah chuan Guilianno chuan a vawi khatna atan, Don Croce chu a beih tur thu hrilh lawk a ni tih a rilruah chuan a lo lang ta a ni.

A tha lo hle a ni, tiin Guilianno chuan a ngaihtuah a. A hmelma hlauhawm ber a tih bona a nih mai bakah chu a thiltih tawp ber chu thil tih ropui tak a ni dawn asin mawle. Don Croce chu huanah khan lo awm ngat se chuan a sunna hla phuah a ni ngei ang. Mahse remchang dang a la awm ang chu, America-ah a awm kumkhua dawn hlei nem.

A tuk thumnaah chuan Cappuccini puithiam pakhat, a hmel leh taksa chu chulaia ruang dah that ho ang maia cher chuan thu thawn chu a rawn keng ta a, “Charlemagne in lamah” tih chauh a lo inziak a. Guilianno chuan a lo hrethiam nghal a. Zu peppino, Castelvatrano-a tawlai khalhtu te hotu, Don Croce-a truck guilianno-an a suam tuma puitu leh chuta tanga a pawla a ruka tel ta renga chuan tawlai pathum leh sabengtung paruk a nei a. Chung a tawlailirte chu lal ropui hmingthang tak limin a chei vek a, naupang ang maiin turi leh Aspanu chuan a in chu ‘Charlemagne In’ tiin an vuah sak a ni. inhmuh hun tur chu siam fel a ni ta a ni.

Chumi zan, Sicily rama a zan hnuhnung berah chuan Guilianno chuan Castelvatrano kawng chu a zawh a. Palermo khaw pawn maiah chuan a pawl zinga tel ru beram vengtu pakhat chu hruaiin amah vengtu atan a hmang zui a. Castelvetrano lam an panna chu a awlsamin guilianno rilruah chuan rinhlelhna a lo lut nghal a. Khaw chhung chu a lang sar mah mah a ni, amah vengtu chu a kal tir a, a ni chu thim zingah chuan a pil bo ta nghal a. Chutah Guilianno chu Castelvetrano khaw pawn maia lunga sak in tereuhte lam pan chuan a kal ta a. A kawtzawlah chuan tawlailir pathum, miropuite lim hmanga chei chu a ding a, chu chu Zu Peppino In chu a ni.

Zu peppino chuan a lo hmuh chuan mak ti hmel pawh a pawh a pu lo. A tawlai pakhat a cheinna rawnghnawihna chu a dah a, kawngkhar chu khar nghalin, “buaina kan nei a ni, Sabengtung thi ina tho a hip khawm ang bawkin Carabinieri ho i hip a ni.” Chu chuan Guilianno chu a thawng hle, “Colonel Luca-a Special Force te em ni?” a ti a. “Yes,” Peppino chuan a ti a, “Hmuh phak lohah an in hnawh muk tlat a ni, kawtthlera vei vak mai lovin. Hna atanga ka hawin thenkhat lirthei chu ka hmu a ni. tawlai khalhtu thenkhatin an hmuh thu an sawi bawk. I pawlte zinga tu emaw tan thang an kam emaw kan ti a, mahse nang i nih chu kan ring lem lo. Chhim lam hetianga hlaah i awmna tlang chhuahsanin i lo kal ngai si lo va.”

Guilianno chuan Carabinieri ten an RV an hre thei nia lang chu mak a ti hle. Aspanu an chhui zui em ni? Michael Corleone leh a hote chu an fimkhur tawk lo em ni ang? Nge ni a, hrilh rutu an awm zawk? Eng pawh chu ni se, Castelvetrano-ah chuan Pisciotta chu a hmu thei lo vang. RV-a pakhat zawk a inlan loh chuan inhmuhna tur hmun dang an ruat tho a ni.

“Min hrilh avangin ka lawm e,” a ti a, “Pisciotta chu khawchhungah a lo kal leh kal loh lo mitmei la, i lo hrilh mai dawn a nia. Tin, Montelepre-a i tawlai i kal pui hunah ka nu tlawh la, America chu him takin ka thleng tih i lo hrilh dawn a nia.”

Zu Peppino chuan, “Kei putar hian ka kuah che rem ti rawh,” a ti a, Guilianno-a biangah chuan a fawp a, “Sicily i tanpui theih hi ka ring ngai lo va, Garibaldi pawh khan, DuceII-na takngial pawh khan. I duh phawt chuan ka tawlai hmangin i duhna apiangah ka hruai thei ang che.”

Pisciotta nena inhmuh an tiam hun chu zan lai a ni a. Tunah dar sawm chauh a la n a, enfiah hmasak tumin a lo kal hma a ni. Chuan Michaela nena inhmuh hun chu vartianah a ni bawk a. Inhmuhna tur hmun an tiam dang chu a tlem berah chak taka kalin darkar hnih kal lai a ni a. mahse Zu Peppino hman ai chuan kea kal chu a tha zawk a ni. Putara chu lawmthu a hrilh a, zan thim hnuaiah chuan a relh ru bo ta a.

Inhmuhna tur hmun dang an tiam chu hmanlai Greek ho kulh ram tawh, Selinus kulh an tih chu a ni a. Castekvatrano chhim lamah, Mazzara del Vallo khaw bula awm a ni a, tuipui hnaih zawl fianrial taka ding niin, tuipuiin a siam tlang pawngah a tawp a ni. Isua pian hma khan chu kulh chu lirnghingin a phum zo ti tih a, mahse Marble hmanga sak thenkhat chu a la ding tho a ni.

Thlaler thlipui rapthlak zet mai, Scirocco an tih chu nilengin a tleh a. zanah erawh chuan tuipui atangin chhum leivakin a bawh chuai a ni. Guilianno chu a kal hah viau chungin, tupuiin a siam tlang pawng lamah chuan a awm a, ti chuan thlaler phaizawl lam chu a hmu thei dawn a ni.

A awmnaah chuan marble ban 12 lai hi a ding a, chumi bulthutah chuan step hi a indawh thla zu bawk a, Guilianno chu step chung berah chuan a ding a, Marble ban pakhat chu a ngheng a ni. Lupara leh machine pistol a pai chu la thlain a hnuai chiah stepah chuan a dah a. Chhum leivak chuan chu kulh chu a khuh luk a, mahse Guiliano chuan tupawh lung thil chunga an rawn kal chuan a lo hre thei ang a, hmelmaten an hmh hmain a lo hmu hmasa thei dawn a ni. Marble ban ngheng chuan a awm a, a chawl thei ta chu a lawm hle, a chau deuh viau a ni. July thla eng chu tlang pawng karah chuan a liam lek lek tawh a. tuipui lehlam mai chu America a ni a, chu tah chuan Justina leh a fa lo piang mai tur chu an awm a ni. Amah pawh him takin a awm thuai ang a, kum sarih zet suamhmang a lo nihna chu mumang mai a ni tawh ang. Sicily ni lo ram danga hlim taka awm chu a han suangtuah chhin a, a nui sak a. Eng tikah emaw chuan a lo let leh ang a, a la thawng thut hlawm ngei ang.

Chau takin a bu ngaih a, a boot chu phelhin a ke lawng chuan lung vawt thlar chu a han rap a. a ipte chu zenin pear thei pahnih a phawrh a, a han ei chuan harh sawng sawngin a inhria. a bula machine pistol vuan reng chung chuan Aspanu Pisciotta chu a lo nghak ta a.

(Zanin chu a laklawh tlat. a sei thei ngang lo a ni e. Chapter 26 ended)