STORYFB.COM

KA LALPA




CHAPTER 20




“Ka chhûngte hnaih suh ka ti che a niloa, i nat loh nân ka ti zawk tih hre thiam rawh aw. An ṭawngkam avanga i nat zia ka hailo a, khatiang aia nasa pawh kha i tâwk thei, chutiang vanga i rilru na leh i in kil tawih tur ka duhlo, ka bulah hian thlamuang takin awm la. Chhûngte ka nei emaw, neilo emaw ka tân chuan nang leh ka fapa hi in pawimawh ber tih hre reng rawh" a tihchuan ka bu nghat nghata.





Ni e a chhûngte hian tûn thleng pawhin min rawn biak an tum lova, nau kan nei tawh tih pawh an hre ngei ang. Lungleiah awm daih mahse chanchin hrilh tu tur an nei dâwn tih ka hailo, chuvanga sawi chhuak pawh ka ni. Pu nei renga ka fapa in ngaihsaktu chhungkua a neilo tûr hi ka ngaingam ngang lo a ni.




Keimahni chauh pawh hi pawi ka ti chuang lova, mahse a rawn seilen chuan a pu te min zâwt ve ngei ngei dâwn. Chumi huna ka chhan dân tûr ka ngaihtuah hian ka rilru a na a ni.







“Ka hria alâwm, a châng chuan min nei hi i inchhîr angah ka ngai ṭhina; i office kal chhûngte hian ka lo in ngaihtuah hah leh vak zela. Keimah avangin i chhungkua i hlat a ngaih phah hi hrehawm ka tih vâng ania, mutthilh tum tawh ang" tiin ka insiam rem sat sata, a ni pawhin min kuahin min khan leh nghal zat mai.




A ruhrel a len bakah mipa zawk na na na chu a taksa a seiin a ṭha bawk si a, min delh tawh hi chuan ka chau hnawk thei. Mahse hauh emaw pawh ka tum chuang lo, mutthilh hnuah chuan keimah zawk zawk hi delh bet nasa tu ah ka ṭang leh dâwn tih ka hailo, ka mang a chhe ve ropui si.




Bawihtea chu kan sir lamah kan muta, a ni pawh a mutui viau mai. Tê viau e tilo hian a aw rawl a ring em em a, a han ṭap tak tak ṭhin hi chu beng a kiu vawng vawng thei, mahsela a ṭap khât viau thung.





“Indanna ei nghal kan ngai a ni, bawihtea hi kumkhat tal a tlin loh chuan a khawngaihthlak dawn lutuk, ṭhenkhat indanna ei lem lo nau neih hnu maia rai leh te an awma, a ṭhat viau rualin nautê an khawngaih thlâk, hnute kham lo in an awma. Chuvang chuan kei pawh indanna ka ei rih mai angai ang, min lo lei rawh aw. I insûm thei lo ve sia, bawihtea a rethei lutuk palh ang" ka tihchuan ka dulah a rawn ṭhâm salha, a na phian lehnghâl.







“Chu insûm turin min duh tak tak maw? Min mamawh ve miah lo em ni?" tiin ka biangah chuan a rawn fâwp kual dan dana, thinrima sawi a nih lêm loh avangin ka ngai thutak duh lêm lo.






“Lo lei la a nih chu, bawihtea leh kan pahnih hma hun tur atân zawk a nia ṭha dâwn, kan chhang chhiat leh em em lutuk chuan i tâl buai hle mai ang. Ka mamawh lo che tihna a nih loh chu, inveng rih ang ka timai ania" tiin alama inher chuan ka kuaha, a ni pawhin min lo kuah lêtin ka samah chuan a chûl hliau hliaua.






Chu chuan ka mut a tichhuak zual, ka pasal ângchhungah hi chuan ka thla hi a muanga, hlauhthâwn leh rilru hah ka nei ngai meuh lo, a ban mai mai pawh ka thlamuanpui thei nia! A mak zawk, hetiang khawpa hmangaih ka neih leh theih hi ka ring ngai lo.






“Ka lo lei dâwn a nia, buai taka i awm ka duh bik hleinem. Hmun tina kan fate an lo ṭah chuan i rethei lutuk palh ang" tiin a nui ri haka, keipawh chuti tho. Ka ngaihtuah zâwng ringawt pawh hian ka huphurh sa, fa ṭahbelh deuh nei ho ka lo hmu tawha, nu tân chuan hmangaih viau mahse a châng chuan an ninawm tur zia ka hailo, chauhpui hnawk tham khawpa ṭahbelh hi an lo awm ve ṭhin sia.





Nu leh pa dinhmun han chelh hi chu thil namai lo tak aniin ka hria, fate avânga rilru hah leh inhauh châng te a awm lo theilo va, kan fate hma hun tur hrelo mah ila tûnlai khawvel sualna pung chak lutuk kâra fa lo neih pawh hi a lehlam zâwnga ngaihtuah chuan hma hun a tawi tuk mai.





Ruihhlo a hluar tawh si, naupang tê tê in meizial, zu tih vel an han zu in an in far tawh a nia. Chûng ngaihtuah chuan ka fapa pawh hi ka ngaihtuah lo theilo, kan thunun vek thei dawn lova, keiniin hrilh ngun viau mah ila thu an zawm miah loh chuan tih theih kan nei tawi hle dâwn si, engpawh chu nise a têtlai aṭanga ṭha taka enkawl phawt hi kan tum tur a ni.






A bâk chu Pathian kutah ka nghat ve tawp, a ni nen chuan engmah tih theihloh a awm dawn lova, a mahah in nghat ila kan chhûngkaw hma hun chu ṭha a tih angin min ruatsak zel mai ang.





Reilote-ah mutchhuak chuan min rawn zemin ka pasal kuah chial chung chuan ka muhil zuia.





Zanreiah eng emaw thawm chuan min ti harhin tho chhuak mai lovin ka sir lam chu ka ena, ka nui nghal sak mai. Thanpuia chuan thiam leh thiam lo hian bawihtea diaper chu a lo thlâk ve chu niin; a be pah mawlh mawlha, min tih harh a hlau hle tih ka hailo. Thâwm chhuah duh bik lo in ka lo en reng a, engtin tin emaw an inthlâk sak ve thei mai bawk.








Nui sakin ka lam a rawn hawi dâwna ka hriat avang chuan ka mit ka chhing zui thuaia, a tâwpah ka bulah chuan rawn mu lehin ka sam ka chal vela tla chu a huisawna, ka mengchhuak duh lo hrim hrim. Chutah ka chalah chuan rawn fawpin “Ka hmangaih che" a ti zui supa, min kuah leh in a rawn mu leha, kei erawh mit chhing chung chuan ka hlim em em thung.





A thusawi leh ka harh lai niloa a chetdan chuan min hmangaih a ni tih a tilang chiang in ka hria, a lamah inherin ka kuah leha. Ka harh tih a hre chuang lo, keipawh chu reilote-ah ka muhil zui ve leh ta mai bawk.





Zînga ka thawh chuan an lo bo leh daih tawh, choka lamah nu Zari rawngbawlna lamah an awm leh tawh a ni tih ka hre nghâl, an tûk tin tih dan a ni a, ngaiah ka neih tawh. Nu Zari pawhin kan fapa chu a tu ang tak takin a ena, chhûna haw lova helaia awm châng lah a ngah. Chu chuan keipawh ka khawhar lutuk tur bâkah ka chau lutuk tur chu min chhâwk viau mai.




Room aṭanga ka chhuah chuan rin ang tak takin nu Zari chuan naute chu a lo pawma, Thanpuia erawh chuan thingpui a lo in thung. Min lo hmuh rual chuan a nui suka, ka nuih lêt ve sak bawk; an bulah chuan va ṭhu in thingpui chu ka inthlit ve a.




“Bawihtea chu ka lo pawm dâwn em ni? A tui a hal tawhin ka ring mange" ka tihchuan nu Zari chuan min rawn pe in rawng chu a bâwl zawma, bawihtea pawh hnute a hnêk tâkah chuan a duhthawh leh tawh ngei mai. Hnute a heh bawk nên keipawh in ei in lam ka ei ṭhat phah viau.




“I mutui em?" Thanpuian a rawn tihchuan ka bu nghata “Nang zâwk? In va tho hma ve, min kai tho ve mai ṭhin loa" tiin ka thingpui chu ka in paha, a kuta no tlir dat dat phah chuan “I mutui sia ka kai tho duh lo che a nih kha, vawiin chu kan pathum hian in awm mai mai ang u. Hna kal pawh ka peih chiahlo, office a awm leh rawn haw châk rêng rêngin ka awma, ka ning" a tihchuan ka nui hak hak mai.





Hna kal turin ka tilui duh biklo, keipawhin ka thlahlel ve bawka, nikhat chawlh chu a pawi êm bik lo turah ngai ang. “A nih chuan movie en ila, en châk deuh mai ka neia, OUR SECRET tih leh philipines lam film ANG MUTYA NG SECTION E kha ka en châk ve ve a, nilêngin en ila a ṭha ang" ka tihlai chuan a lo ner suk suk mai.




A peih vak lo tih a hriat nghal ngawih ngawih “I en duh zâwng a mak thei emai, nula tlangval en chi a nih kha, khatiang nutling tân en a mawilo" a rawn ti chu ka ngei ngêi mai. Khatianga rawn sawi kher ni, a duhzâwng a nih loh chuan sawi ṭhat ve mai tur ania.




“I sawi theih dânah i en ve ṭhin a nih zâwk kha, en lo la nula tlangvâl en chi a ni tih pawh i hre tawp nâng. Bâkah nutling em em pawh ka nih loh hi, fa pakhat chiah ka la neia, pasal nei laiin a en theih loh tih ziak a awm lo" ti ve zatin bawihtea muhil ṭan chu ka en renga.




A mut ngheh tâkah chuan sofa ah chuan va mut leh te te in ka pasal bulah chuan ka ṭhu phei leha, “Vawiin chu i en ve peih loh leh, duhzâwng ve ve kan en mai ang chu. En tlân kher pawh a ngai chuanglo a" ka va ti leh chu min rawn pen fawka, ana phian lehnghâl.





“Ka tello hian hlim viau suh aw, kan en khawp ang. Mahse a changtupa han fak vaih teh, i châk lo ang" a rawn ti hmuka. Kan thusawi lo ngaithla reng tu nu Zari chu a rawn nui nasa mai, kei erawhin eilo zetin ka hmui ka lo ti sâwi kual vela, a hmu nge mawni a kut zungchala min rawn sawhin “Mipa dang i vei ka phallo tih hria ang che" a rawn ti leh hrâma.





Enge movie mai mai pawh chu a thik nghal em em ni? A takah ka duh pawh ni hleilo, bâkah an awm hla lutuk hrim hrim. Thîk âwm deuh te hi hriat ve tûr a nia, awm hmunah thikthu tichhe em em ringawt “Ka star vek tawh, sawi tûr i nei leu. Ka mit a nia, ka nei dâwn pawh nilo" kan inhnial nghal char char mai.




Nu Zari chuan a ning deuh nge “Duhthawk teh u, in thu khel a ho emai. Chutiang film mai mai, bawiha nangpawh ramdang mi te chu thik tham an awm hleinem, mit bâk in a hmu phalo, an awm hla lutuk. Miriami pawhin a duh tak tak nâng, movie rêng rêng chuan zûn an nei ve a, zûn neilo se tumahin an enin an chang peih lo ang" a rawn tih tâkah chuan Thanpuia pawh lungawi vak lo chuan a ngawi ta hrama.





A rûk chuan ka nuih pût pût mai, chu chu a rawn hmu nge a rum nghuta, keipawh insûm tak chuan nu Zari chu puiin ka che zuia “Hetah chaw ei ve leh rawh aw, i chau thei ngawt ang. Thanpuia hian rem a tih leh nangmah pui tûr che in nula la naupang deuh zawng ila a ṭha ang, mahse thlan fîmkhur angai viau ang, tûnlai ah awmpui fuh lo deuh deuh an awm an tisia" tiin ka sawi pah mawlh mawlha.





Thanpuia pawh chuan a lo tui hnih ve bawk “A ngailo ang; mahse ka ṭhiannu fanu kum 18 ania, school kal paha awmna tûr a duha, thingtlâng lam mi an nia, in rem tihchuan a lawmawm viau ang. Mahse chhûnah inah a awm hman dawn lova, a fel erawh a fel ania" a tihchuan Thanpuia chu ka en zauha.




Thingtlâng lam an nih chuan ka iai vak lo, an che felin tirh vêl pawh an nuama, inchhûng chêt emaw ram lam hna pawh nise an thawk thei vek tih ka hre ve tlat. “Kan lo ngaihtuah dawn ania, tirawh u chaw ei tawh ang u" tiin chawhmeh chu suanin chaw ei chu kan siam zuia.





Chaw ei lai pawh chuan eng eng emaw sawiin kan titi a, nu Zari te nên hian kan inhlat lêm lova, a ṭhiannu fa a tihchu an awmpuina a rei ve tawh a nih hmel. Kum tâwp lam a lo ni tawh nangin a Christmas money tuakna a nimai a lawm tiin naktuk lam aṭanga rawn thawk ve tura kan tihchuan nu Zari pawh a lawm hmêl viau mai.





Chaw eikham chuan thleng silin in chu a tifai leh thuak thuaka, a zawh rual chuan a haw veleh mai bawk. Keini nupa erawh bawihtea pawmin room lamah kan lût zuia “Le ka movie duhzawng ka sawi tawh kha, rawn tichhuak nghal rawh le." tiin bawihtea chu a thênbawm ah mutin khumah chuan ka ṭhu mu ar ara.





A ni pawh engmah sawi tawh lo chuan rawn mu in Laptop ah chuan Our secret chu kan en duna, a changtupa Chen zhe yuan hi ka duh bawk nên a film channa chu ka en theih phawt chuan ka en vek zêl. Amah hi a hmelṭha hi ka ti tawpa, a ṭap te hi a hmelṭha bik ngawih ngawih ka ti, mite chu kan ṭah hmelchhiat theih nên.




“Ka duh reuh e, keipawh naupan lai aṭanga duh bik riau, len hnu thlenga duh tur hi nei ila ka chhuah hauh lo ang" ka ti chu pakhat pa chuan min rawn sik leh hlawk tawh. A kutthlakte lah hi a na mai sia, kut thlâwn tuar duh bik heklo ka seh ve vaka, a ner nasa mai. Engah nge mi a tih hmasak daw daw ni.




“Ngawi reng khân en ve la, mi bialnu an neih pawhin an bialnute thil en an sawisel ngailo, nang ve chu kut min thlâk sawk sawk ringawt mai. Sual lutuk, ngawi reng khân en ve mai mai rawh" tihmakin ka ena.




“Fak sek lo la animai, keimah bak tumah fak suh. Vei pawh an ngailo, an duh ve chuang lo che, a duhtu che hi min duh la i nihlawh a nimai" rawn tiin ngawi reng chuan kan film en lai chu a en leh daiha, keipawhin engmah ka sawi duh tawh bik lo. A thikthu chhiat zia ka hria a, ka ṭawng leh a nih chuan kan in hnial leh mai mai dawna; ka peih lo.






Ngawi reng chuan a âwm pharh darhah chuan va beiin movie chu ka ena, a châng leh ka nuia. A châng leh ka ṭahpui bawk, Thanpuia erawh kan film en chuan a hmel a ti danglam eihlo, englai pawhin a hmêl a pângngai thlup reng mai. A zawh meuh chuan a tlai leh duai tawha, keipawh ka mit a kham urh mai.




“Duhtawk tawh rawh, i mit in a tuar ang" a rawn tihchuan ka lu ka thing nar nara “Short tal en ang, ka mit chu a ngaihtuah awm lovang. Ka mut pawh a chhuak rih lo, ka ṭha i duh leh nangmah kha lo muhil mai rawh" ka tichiah chu a lo châk nasa mai, awmsawn hmakin ka sirah chuan a let thla a, a mit a chhing nghal hmak bawk.





A va han ngeiawm thiam nget nget ṭhin tak em, engtin mah tiduh tawh bik lo chuan ka duhzâwng en chuan ka ṭhu mu a, ka phone rawn ri avâng chuan en lêm lo va la in ka lâk rual erawh chuan ka thaw nghal hak mai, min rawn be tawh lo tur khân ka ti chiang viau si a, engvanga min rawn la be ngam fo nge maw a nih le?





A huaisen mah mah a ni, pasal ka nei tawh a. Fa hial kan nei tawh bawk, eng vanga ka laka rawn lang sek nge maw a nih ni? “Engvanga min rawn be ziah nge maw i nih le? Pasal ka nei tawh, fa ka hrinsak tawh bawk. Ka pasal hi ka hmangaih, min rawn be tawh suh. Remruathlu ka ning ta khawp mai, hmeichhe dang zawng zâwk rawh. I hmu ṭeuh ang, helaia i awm ve leh a min rawn ngaihsak pawh kha ka mamawh lo, nang ai min hmangaihtu ka tawng tawh" ka lo ti ngheka.





“Ka hria a lawm; mahse ka la hmangaih reng che, in bia ang. Khapa kha i duh em ni? Min hmangaih emaw ka tia, i fa nên khân ka pawm vek thei che tih ka sawi tawh kha, i pasal kha kalsan la bul ṭan ang. Ka ti hrehawm ngai hauh lo vang che" a rawn ti leh chu ka nui ro halh ringawt, engtin nge khatiang thu kha a la rawn sawi ngam zâwk?




Zahna hi a hre thlâwt lo, mi hmangaih ber âwm ang hrimin ala awm zui ania. Mihring mak danglam tak chu a ni ve hrim hrim e “Min rawn be tawh suh, ka block phawt ang che. Ka pasal hi ka phatsan dâwn lo" thinrim zeta tiin phone chu ka dah zuia, ka block nghâl hmak bawk.




Ka phone dah ṭha zo Thanpuia lam ka hawi chu min lo en reng mai. A muhîl emaw tia! Engtin nge a lo harh theih ni? In thlahrung deuh taka ka en lai chuan a rawn ṭhu chhuaka, a mitmeng rum lam lek lek ka hmuh phei chuan dek pawh ka ti ngam lo, Ruata nêna kan inbiakna kha a lo hre ve vek âwm si a, a thinrim angem tih ngawt ka ngaihtuah.






Chutia inthlahrung deuh taka ka lo en lai chuan min rawn kuah thutin ka hmuiah chuan a rawn fawpa “Ilo huaisen hle mai, chuan ka tana i hnar na ah ka lawm e, ka lo thlang che hi ka thlang sual lo tih ka hre chiang lehzual. Ka nupui hian min lo hmangaih hle a ni tiraw?" a tihchuan ka bu nghauh nghauha.







“Min rin ngam phawt chuan ka rinawm zia i hmu zêl ang, ka tan chuan i pawimawh ber. Ka fâ pa i ni a, ka pasal i ni bawk. Engtin nge ka phatsan phal tawh tehlul ang che, nangin min duh loh chuan tumahin min duh lo ang. Neih engmah neilo min pawma, min hmangaiha chuti chung chuan engtin nge min kalsan tu umzuia ka kalsan theih ang che" tiin a zak hnuaiah zen lutin ka kuaha.




Ka thaw huai mai, chutia min ring ngam chuan min ti lâwm êm a ni.





“Tun aṭang chuan ka duat leh zual ang che, tumahin an tihnat che pawh ka phallo. Ka tan awm zêl la, keipawh i tân ka awm reng ang, ka hmangaih che a ka hmangaih reng fo ang che, i en zo tawh em ni?" a rawn tihchuan ka lu ka thing nak naka.




“Pakhat zâwk kha la en ka tuma, ka naupang chhia i ti em?" ka ti chu nui hakin ka lu ah a chûl ringawta “En leh rawh, ka lo mu leh ange. Zîng ka harh hma lutuka, ka mut a chhuak riau mai" tiin a ban chu khamin a mu zui leh thuaia.





Nui hakin keipawh chuan ka film en lai chu ka en leha, nu Zari pawh a rawn kal leh tawh tih hriat takin pâwnlam aṭang chuan min rawn au lâng lânga,ka lo chhâwn tâkah chuan a thâwm a reh zui ve mai bawk.





Thanpuia pawh a muhil ta ania'ng a hnar thlarh thlarh mai, an pafa muhil chu ka en tawna. An duhawm hliah hliah mai, heiai hmuhnawm tur dang hi chu a awm bîk lo tawp ang. Ka tân chuan ka damchhan te an ni a, an hlu lo theilo, chhungkua tak tak ka han din ve ta chuan min ti thaw huai mai.







“Nu, pa in duh loha in kalsan hian hmalam ka pan ve meka, ka ngaihtuah chhuak reng bik tawh lo cheu a nia aw. Keichuan ka fate hi midang enkawl tur chuan ka dah mai mai lovanga, fahrah ina awm tur chuan ka hnutchhiah ngai hek lovang, ka hmangaihna zawng zawng nên ka enkawl dawn ani. Min kalsan hi vawikhat tal in la inchhir ve angem le" tiin ka phun chhuak sap sapa.






Ka fapa ka en apianga keimah aṭanga hlimna leh hmangaihna chhuak ṭhin ang hi ka nu leh pa chuan an neilo a ni ngei ang. Ka awmna hmunah khân chiang takin ka nu leh pa kalsan ka nih thu min hrilh avanga hetiang a haw em em pawh hi ka ni, zawn chhuah tumna pawh ka nei chuang lo.






Tûnah chuan ka hlim ve tawha, an ni ka mamawh tawh bik love. An muttui êm avâng chuan ngaihngam takin room aṭang chuan ka chhuahsan a, nu Zari lo che mawlh mawlh chu ka va pui nghal bawk.



“Lo awm mai mai tur che a lawm, hlawh neia in mi chhawr ka nia, min lo pui ziah suh. Ka tân pawh anuam lo" a tihchuan ka nui hak haka “Iti mak e, kan tân chuan nu ang i nia, bakah hêngte chu in puih zêl tur alâwm. Kan fate hi an mahni ke ngeia ding tûrin ka duh dawna, chu mi tur chuan keimah pawhin ka zir angai a lawm, bâkah nu anga ka en che i nia, nangmah a thawh tîr che ka duh hleinem" ka tihlai chuan ka kutah rawn vuanin a hmer vang vanga.





“Nang ang hmeichhia Thanpuian a lo tawng che hi a vân nei ni, nang tih loh hi chu in inneih hma pawh khân hmeichhia zui leh rawn hruai pawh a nei ngai lova, i rawn lan a chin kha engkim i rawn thlâk danglama. A nundan mûk ru lutuk te pawh i tireh vek tawha, tunah pawh a nelawm tawh zia hi i hria em? Nui hmel a pu renga, a nun i thlâk hlawk a ni ber, hengte hi i hmangaihna avang chauh a ni" tiin hlim tak chuan a rawn sawia.





Ka lai lek lek mai, sawi mai tur ka hriat loh avâng chuan ka nui ringawta “I pasal hi hriatthiamna nen en fo la ka duh, a nu in a thihsan aṭang kha chuan a hlim hmêl a bo zo va, a nelawm loh in a hlim hmêl hi ka hmu khât a sin, nang i rawn lan chin hian thinlung taka a nui hmel te, a thikthu chhia te ka hmu leh theia, ka lâwm teh ania. Nangma lakah leh a nu lakah chiah a thikthu pêk chhiat zia ka la hmu" a tihchuan ka lo lâwm ru veng veng mai.






“Nu, heta i thawhna hi a rei tawh ang tiraw? Keipawhin Thanpuia ka tawng hi ka lawm a sin, a ni hi a lo piang lovang tih ka hlau takzet. Chhûngkua min pe tu leh, nu leh pa nihna min hriatchian tîr tu a ni a, ka tan chuan a hlu takzet a sin. I hre tawh tho anga, keiang fahrah mai mai pawh duat tak leh mi iaina nei hauh lovin min hmangaih thei ania, heti chunga ka kalsan a nih chuan mi le lo tak ka ni tihna ania'ng" tiin ka nui chhuak haka.




A ni pawh a hlim hmel viau mai “In hmangaih takin awm zêl teh u, nakinah in fate rawn ṭhanlen hun thlengin. In nunah in faten entawn tur hlir an zawng dâwn a, in nundan pawh in fimkhur a ngai dawn ania, aw khaih" tiin antui chhuan rawn liam ri avâng chuan a kalsawn zui thuaia.





A bula va kalin ka pui ve nghal zung zunga, Thanpuiate pafa pawh an rawn chhuak har lo, phak deuh chual hian an rawn tho a, Thanpuia sam phei chu a phîr si nasa mai, ka lo nuih chu min rawn en vung vungin a mit a sân uka, ka dar lo kân zauhin nu Zari lam chu ka hawi zuia.




“Min thawhsana" a rawn ti chu ka chhâng duh mailo, a fapa chu a kut lianpui chuan pawmin a pawm bo thei hial mai, an inhmeh lutuk tlat. Thlir an nuam ngawih ngawih mai.



“Ka zawhna chu chhâng rawh, engvângin nge min thawhsan" a rawn ti leh chu a lama inherin “Ka mu ve peih hleinem, bawihtea kha lo awi mai mai teh. Rawng ka bâwl a nih hi, inhnial pawh ka peihlo" tiin ka inher san leha, a haw leh mai mai ang chu.