STORYFB.COM

Nun tihlimtu Lalnunhlimi
By CVL.Awmpuii


Chapter 20


Ka thin phû chu a rawn rang nghal dup dup a,mipa zâm thei tak ang mai ka ni. Nunhlimi chhanna chu ka ngaichâng reng a, mahse a rawn ṭawng chhuak leh tawh lo hrim hrim, phone chu a dah hauh si lo.




"Nunhlim...ka ṭawng i hre thei em?" ka tih leh tâk ah chuan a âw a rawn thian ta kharh a, "Aw hre thei e" a rawn ti ro halh mai. Sawi zui zel chî ani ang em tih ka ngaihtuah a. Ka hriat zui châkna leh hlauhna a inchen thuak mai. Mahse hetiang neuh neuh thil a rilru buai reng mai hi hrehawm ka ti a, ka duh tawh bawk si lo. Tun aia hun ṭha hi ka hmuh tawh pawh ka ring hek lo. Ka sawi chhuak leh ta nge nge a.




"In sneak out ṭhin tiraw? Hostel in awm lai khan?" ka ti leh sup a, "Umm" a rawn ti tàwi tâk ringawt a. Zawh zui zel chakawm loh khawpin min chhâng ban tlat. Chu chuan keimaha hlauhthawnna a rawn ti pung zual sauh bawk a. "Eng nge in sneak out chuan in tih ṭhin a?" ka ti leh a, hriat thawi ka nei tih a hrethiam ve nghal mai aniang "Eng chin nge i hriat?" a rawn ti lêt khauh a. "Ka zawhna chu chhâng la" ka lo ti ve tlat thung a.




Rei fê chu kan ngáwi dùn rauh rauh a, a rawn ṭawng chhuah hma chu ṭawng chhuah ka tum tawh bîk si lo. Ka lo ngaihchàn reng lai chuan kan inbiakna chu a rawn ti tàwp zui ta daih a, ka hrilhai letling khawp mai. Chu chuan keimahah rinhlelh zualna a thlen a, Remi sawi ang mai mai kha a lo ni ang tih ka hlau ta hluah hluah mai.



Ka call nawn leh a, mahse switch off a inti zui ta daih mai. Rilru nuam lo lutukin ka room-ah chuan ka vei tawn sek a. Engkim hriat châkna in ka khat a ni ber mai. Remi va zawh leh mai chî nge tihte ka ngaihtuah thleng hial a. Mahse a tlâwm thlâk ka tih bâk ah Nunhlimi tán pawh a ṭha dâwn lo hlê niin ka bawk si. Min hrilh chin bâk chu va zawh zui vak ka duh ta lo law law.



Krismas a hnai tawh si a, boruak dang inchiahpiah tir ka duh loh tehlul nen ka duh loh dân takin thil a thleng ta chu a ni sia. Nunhlimi chu call ka tum leh ngat ngat a, darkar khat a liam hnú ah pawh a phone chu a la switch off tlat. A rilru ti nuam lo tâwk lekin zawhna ka zâwt em aw tihte chu ka ngaihtuah a, mahse tih sual ka neih àwm rêng rêng ka hre bîk lo. A ngaihzawng ka nihna angin khatiang thil kha chu hriat ve phû ka inti a, min hrilh hun ka nghak ve char char a, ka nghak chhuak zo ta lo va. Ka zawt ve mai ah ka inngai a. A rawn insawifiah ve in ka ring ania, mahse zawhna bawkin min chhâng lêt si.




Zàn ka mu ṭha lo bawk nen zingah chuan ka tho har khawp mai a. Urláwk ni tûk a ni tawh a, hna kal ka ngai tawh lêm lo bawk nen rilru engthâwl takin ka tho chhuak a. Nunhlimi chungchâng in min mawlh zia erawh chu sawifiah thiam phâk bâk a ni. Min mawlh lo sela a mak zawk ngawt ang. Ka lo vei in ka lo duh tawh hlê anih hi!



Tukṭhuan kan ei laiin ka Nu leh Pa te chuan thlàn kal an rawt a, ka lo pawmpui khawp mai. Kan eikham aṭanga rei vak lovah kan insiam zui ta nghal a. Ka Pi leh Pu te thlàn kan va tlawh ang a, thlâ te pawh kan la ve dâwn anih hmêl. An boralna aṭangin kum tam liam ve tawh mah se Krismas dâwn hi chuan kan la chei hnûm ve reng ṭhin a. Thlalak kan hmaih ngai miah lo bawk.




Kan kal hma in Nunhlimi chu ka text hram a, "Good Morning" tih tê mai hi ka va thawn a. Dik taka sawi chuan tukin zing chu ka phûr thlawt lo. Mahse a reh zawk a nih miau avangin a chanchin va ngaihven ve chu ka tih turah ka dah a, chuvanga va be ve mai chauh pawh ka ni. Ka message lah chu a la in deliver thei lo zui a, a phone a la switch off tlat anih te ka ring rum rum tawh.



Thlàn ah chuan rei fê kan va awm ve a, Nunhlimi Nu thlàn pawh kan tlawh ve zuai a, an lo chei nalh kher mai. "Nu tel lova Krismas an hman vawikhatna tur a ni sia, an rilru chu a khingbai ve ngawt ang" ka Nu chuan a lo ti sep a. "Nia" ka lo ti ringawt, han sawi zui vak ngaihna ka hre lo a ni. "Nunhlimi eng nge a an? I bulah a sawi chhuak ve ṭhin tho em?" ka Nu bawk chuan a lo ti leh a, "Sawi chhuak veleh zeuh ṭhin" ka lo ti mai a. Kan inkâr a felhlel rih deuh bawk nen a chanchin sawi chu ka phur tehchiam rih lo a ni.



In kan thlen hnù thleng pawhin Nunhlimi hnen aṭang chuan eng chhanna mah ka la dawng lo cheu a. Ka message chu a in deliver tawh ngei a, mahse hmuh pawh a la hmu lo. A en duh lo lui anih ka ring nghal hmiah mai. "Nunhlim" ka va ti leh hram a, a in deliver nghal a, mahse a lo la en duh chuang lo. A awm dân chu naupangchhia ka ti a, ṭha taka sawifel pui ka tum a. Thiam lohna ka nei miah lovin ka hre bawk. Ṭha taka min sawipui a, min hrilh ve turin ka phût a ni mai a. A engamah hmaa a tlanchhe nghal ringawt chuan ka ngaihdan a pêl kher mai.



Mihring chu nunhlui nei vek kan ni a. In chhui sak reng hi ṭha pawh ka ti lo. Chutiang anih rual chuan kan tun hun leh hmalam hun hriltu chu kan nunhlui tho kha a ni a. A ṭha lam a ni emaw, a chhe lam a ni emaw pawh nise inhriatsak hi ṭha ka ti a. Nunhlimi hi Remi sawi ang tak tak pawh kha lo nise ka pawm thei mai ang. Ka hriatthiam loh erawh chu hetia min pehhel nghal tlat hi a ni. A mizia nen a inhmeh lo va, ka ngaina miah lo bawk.




Zàn inkháwm a awm avangin chhûngkua in kan inkháwm leh ṭhap a. Nunhlimi chu ka inkhawm chhan ni lo mah se hmuh ka inbeisei nghal ringawt a. Biakin chhûng ka luh rual chuan ka hmu nghal ta reng bawk a. Lalnuni nen tlar hma lamah an lo ṭhu dùn a, an zâwn ṭhutna âwl ah chuan ka va ṭhu ve kher a. A mitsir chuan min hmu reng tih ka hria, mahse min lo hmu lo der hmak a. A awm dân hi ka ngaina thlawt lo.




Inkháwm chhûng zawngin inkhawm ah rilru ka pe lo ti ila ka sawi sual hauh lo vang. Ka piaha ṭhu Nunhlimi ringawt chu ka ngaihtuah a, a zialo lampang hret a ni. Inkhawm bân veleh naktuk hla rem tur kan zir leh nghal a. Nunhlimi chu biak falna hun ka la nei leh thei lo. Min pehhel lui ngat ngat a, hun ṭha ka hmuh dâwn apiangin midang bulah a awm nghal zel a. Vawikhat kan inmelh fuh zeuh tih loh chu kan inkarah eng thil danglam mah a thleng lo. Midang nen an inbiak laia lo va inrawlh chu ka hreh si a, uchuak taka inkawp angah min ngai ang tih ka hlau a ni ber. Mi mit tikham zawnga khawsak kan duh ngai miah lo bawk a, kan la fimkhur tluang ve thei zel chuan ka hria.




"Lalnunhlim" zawi si, khauh ru zet si hian ka ti sehchilh nawk a. Hla zir inkhawm kan bâng tawh a, Nunhlimi, amaha haw tur chu ka va nang chîng hman hlauh a. Ka auh rual chuan a kal chak zual sauh a, mahse hmeichhia zawk na nâ nâ chu ka umpha har lo. A bân rêkah chuan va man in ka kuai her sawk a. A tlu tur chu ka lo chelh nghal vat bawk. Kawih her sawk kha ka tum a ni lo va, a lo tal hman bawk nen ka duh aia nâ in a bân pawh ka hmer a ni.




"Khawi maw min thlah teh ka haw duh ania" a lo ti nghal sawk sawk a. Ka melh rûn lai chuan ka mitah pawh min en let ve hauh lo. "Tinge min pehhel tlat a?" ka ti nghal hmuk a. "Awi chutiang pawh a ni lo, khawi maw min thlah teh U Hluzual" a lo ti leh vat a. A bân ka chelhna kut chu min dah sawn sak a la tum ve ngar ngar a, ka mitah min la melh lo cheu! "Min en teh" ka tih rual chuan "Ka haw duh ania, ka hmanhmawh " a lo ti leh daih a. "Lalnunhlim" ka tih leh tâk ṭhawt ah chuan a rawn hawi chhuak ve ta nge nge e. "Eng nge i ninawm" a lo ti pàwr ve hlar a, mahse a mitmeng chu a pha dui mai.




"Min pehhel reng lovin insawifiah ta che" ka lo ti hriam hrawk a. Biakin chhak lawkah kan la awm bawk nen ka duh angin ka ṭawng ring ngam lo. "Insawifiahna tur ka nei lo...min thlah teh" a lo ti leh hram a. "Eng nge i awmzia hi?" ka ti ta hluai a. A bân chu ka thlah zui zat bawk a, thinrim leh dawhtheih loh luatah ka thaw nghal ham ham mai. Nunhlimi chu a kun ngal a, "Engtia awm zel nge i duh a? Tinge min pehhel" ning zet hian ka ti leh hluai a.



Zaikhawm kal tur ho chuan min rawn melh leh hrek hrek ṭhin a. Mahse kan awmna lai hi a thim thawkhat ve a, min rawn en chiang te anih loh chuan keimahni kan ni tih an rawn hre kher lo vang. Nunhlimi chu a hawi kual nghal hrek hrek a, midangin min rawn melh sek chu a zak ve deuh aniang "I aw kî sàn suh" a lo ti sep a. "Anih chuan insawifiah rawh" ka lo ti ve hmuk a. A ngáwi leh nghal daih a, ka thing hrep châk kher mai.



"Sawi ta che" ka ti leh khawl a, zanin ang em em a dawhtheih loh hi ka la nei ngai lo. A tìra ka lo ngaihtuah dân kha chuan pangngai takin, amah hrethiam takin ka sawipui ang ka ti kha ania. Mahse a awm dân chuan min cho chhuak tlat a, ṭha tê tê a sawi pui tum laiin luhlul a chhuah miau a. A nawr a nawr deuh ngai mah se ka pawisa tawh lo. Hetia in pehhel ringawt lo hian thudik hriat ve chu ka phû alawm.



"Sawi tur ka nei lo" a lo ti leh lawi a, ka insum thei tawh thlawt lo. A bân puam lehlam lehlamah chuan hmer tawn in ka thing nawk a, "Insawifiah ta che" ka ti leh nghek a. Ka ṭawng ring thawkhat bawk aniang kawnga kal lai te chu an rawn hawi phâwk nghal hra hlawm mai. Nunhlimi chu a rawn insût ta hraih a, "U Hluzual, duh tâwk teh a zahthlak ania" a rawn ti chhuak ṭiau a. Min melh lovin hnuailam a la bih ngar tho a, a hmai a hup tawp bawk a. A zak tak tak hle ni tur a ni. "Anih chuan thil awmzia hi sawi ta che" ning zet hian ka ti leh a. Ṭah rin hlau tak si hian a rawn ṭap chhuak ta hlap hlap a, tihngaihna tak pawh ka hre tawh bîk lo.




"Lo kal teh" tiin ka kai sawn nghal dàwr dàwr a, midang awm tam lohna hmun a kan kal a ngai a ni. Ka Bike awmna lamah chuan ka kai phei a, ka tih ang ang chuan a lo awm ve tawp mai. "Rawn chuang rawh" ka ti zawi sup a, ka thinrimna te chu thunun ka tum hram hram a ni. A hmai a la hup tlat a, "Nunhlim" ka tih leh tâk sup ah chuan a rawn chuang zui ve mai bawk a. Vung zet hian ka tlan chhuah pui ta nghal a, min kuah nghal chawn chawn mai.



Ka rilrua a lan hmasak ber avangin kan inah ka hruai hmiah a. "Hetah tinge min hruai?" kan inkawt kan thlen rual chuan a lo ti sep a. "Engkim kan sawifel ang" ka lo ti hmuk a, "U Hluzual" hlauhthawn hmel zet hian a lo ti leh sep a. "Ka chhûngte an awm lo, kan chhung dangte tlawh turin inkháwm bân khan an tlang nghal" ka lo ti bung nghut a, ka âw chu a ngainatawm zawk zawk lo viau in ka ring.



Inchhungah chuan ka kai lût nghal hmiah a, a ṭang deuh ṭung nâ in min hnial fithla ṭhak bîk lo. Ṭhutkhawmna lamah chuan kai phei tlang nghal in ṭhutthlengah chuan ka nam ṭhu a. A hma zawna ding chung chuan ka melh ta ngur a, a lo kun lâp mai.



"Sawi rawh" a vawi tam tak nan ka ti leh ta hmuk a, hetiang em em a tawh khirh hian ka la khawsa ngai lo. Nunhlimi chu a lo thaw chhuak hak a, "U Hluzual..." a tih rual chuan " Sawi rawh" ka lo ti leh hmanhmawh a. Khawngaih thlala zet hian min rawn melh chho ta kiau mai. A awm dân chu khawngaih ai mah chuan ka thin a tirim tlat pek a, ka dawhtheihna a ti pan viau bawk. Hetianga nawr tun tun hi ka duh dân ni bîk lo mah se ka dawhtheihna in a tlin tawh thlawt lo a ni.



"Insawifiahna tur ka nei lo" a tih rual chuan ka kehchhe vek ni mai hian ka hria. "Eng maw hostel aṭanga in chhuah rûk chuan in tih ṭhin a!?" elhsen zet hian ka ti hluk a, zà lo lutukin ka nui hul hawk bawk a. Insawifiah a tum miah lo te chuan min ti thinrim zual sauh a, ka sa chhuak pup pup mai. "Khawngaihin ka haw duh" a lo ti leh ṭiau a, a mittui a tling leh ringawt tawh! A mittui tla chu ṭum danga keimaha a thawh dân nen a danglam ta khawp mai. A hma kha chuan ka khawngaih a, duat ka châk hluah hluah ṭhin ania. Tunah erawh thin harh hrep ka chak a, kutthlak mai châkawm khawpin min siam bawk.



"Engmah Insawifiahna tur i nei miah lo a maw?" ka ti ro hulh a, a hmui chu hupin a ṭap khûr ta ngat ngat mai. "Lalnunhlim, engmah sawi tur i nei lo a maw!?" ka ti leh ṭhawt a. A au hian ka au ani ber, kan inchhung pawh a khawk nghal rum rum mai. "U Hluzual, min ngaidam rawh" tih zawng chu ka hlawh chhuah a ni! Chu ṭawngkam tàwi tê chuan min ti na takzet. Ngaihdam min dil chhan lah chu ngaihtuah chhuah pawh ka duh lo hial zawk.




"Tinge pangngai taka min hrilh mai loh? Nizanah pawh ka rawn sawi chhuak a, hun ṭha ka pe che. Tinge khatih hunlai khan pangngai takin min hrilh mai loh? Min pehhel kual a, ka rilru hi infiam nan i hmang a ni tiraw?" ka ti ta mawlh mawlh a. Ka âw chu a la vin ṭha têk têk khawp mai. Nunhlimi chuan a lu a lo thing nawk nawk a, "I rilru infiam nan ka hmang lo, hrilh che pawh ka tum alawm. Mahse ka thei thlawt lo alawm" ṭap chung chuan a lo ti ve mawlh mawlh a. A ṭap hmêl chuan min ti thinrim zual sauh mai.



"Remi kâ aṭanga hriat kha ka in beisei lo asin. Hun rei fê ka lo nghak tawh che, 'Engtikah nge min hrilh ang' tiin ka ngaihtuahna kha a buai ṭhin asin" ka ti chuai ruih a. Thil engkim hian ka thin a tirim thar vek tawh a ni ber. A nuna ka lo lan ve hmaa thil thleng mah nise tlâwm ka inti a. Ka hriat tak tak hma kha chuan awm thei turin rilru ka siam fel vek tawh kha ania. Mahse a taka hriat meuh chuan a dân a dang ta zar mai. Ka hmusit a, ka ngainep ta tihna erawh a ni hauh lo. Nizan leh vawiin boruak te, zanin thleng paw'n aniang chu! Thudik min hrilh pawh tum miah lo va ngawi renga min pehhel a tum tlat hian ka thin a tirim a, ka lungawi lohna ber pawh a ni ta in ka hria.



"Mahse U Hluzual...khatiang kha chu engmah ka ti zui tawh ngai lo. Khang hunlai khan kan zirlai a rilru hahna zawng zawng nen inhrikthlak nan ka hmang ve ṭhin a ni mai. Kan ṭhian dangte tih loh dân pawh a ni bîk lo asin" a rawn tih leh lek phei chuan rapthlak ti zet hian ka melh ta tlawk tlawk ringawt a. A thusawi in min ṭhawn zia chu pui tak ani! Insawifiah turin ka duh a, ka ti ngei bawk a. Mahse a rawn insawifiah ve ta chêng a, ka tana nat zualna bawk tur a rawn sawi chhuak a ni e.




"Chhuak rawh" ka ti ta nghut a, a hruaitu zawk ni mah ila tuna a thusawi aṭang kha chuan ka bul hnaiah awm tawh rih lo sela ka duh ber. Ka thinrim leh tlâwm ka intih luatah kut ka thlak thei mai ang. Ka thusawi chuan a ṭhawng ve deuh aniang a rawn hawi chho vat a. "U Hluzual..." a lo tih leh sep lai chuan "Chhuak rawh" ka lo ti leh nghut a. A mittui tla chu a tuai hul nghal sawk sawk a. "Hetiang hian min dawnsawn ka rin vang ania ka hrilh lawk ngam loh che. Ka ring sual e" ti zawi sepin min chhuahsan zui ta a. A reh zui tlawk tlawk mai.




Darkar khat dâwn ngáwi renga ka awm hnú chuan ka chhûngte pawh an lo haw ve ta a. An rawn ṭawng lût nghal bawrh bawrh a, pangngai taka lo dawnsawn tum mah ila ka hlawhchham chiang khawp mai. Ngawi rengin pâwn ah ka chhuak a, ka Bike chu tinung in pan lam ber tur pawh hre lo chuan ka inkhalh chhuak leh ta ringawt a. Zàn rei deuh tawh mah se Krismas urláwk zan a ni bawk nen vei vak an la tam khawp mai. Kalna tur ber pawh hrelo ta chu vung zetin ka inkhalh kual ta hrep a, Aizawl khwwchhung ka fang chhuak vek ti ila ka sawi sual lo khawp ang. Ka rilru lah chu a fîm thei dêr lo va, rui turin ruihhlo ka mamawh lêm lo khawp mai.




In ka thlen leh meuh chuan zing dár 3 a lo ri thuak tawh a. Krismas a ni tawh tihna anih chu! Mahse ka rilru ah chutiang lam hawi reng reng a awm lo. Khúa a vawh tehlul nen intihharh tumin tui vawt in ka han inbual tehreng anih kha! Vawt chauh ka chang, rilru a fîm phah lo khawp mai.



Zingah chuan lu na burin ka tho chhuak a, darkar hnih khat vêl awrh chu ka chhing ve hman sekin ka hria. Krismas tûk anih tawh avangin inkhawm ve ngei chu a ngai dâwn a. Tun ṭum bâk bâk a inkhawm phùr loh hi ka la nei ngai lo. Mahse a ṭul miau si a, ka inkhawm veleh ta poh a. Ka duh rêng vang ni miah lovin Nunhlimi ka zawng ru reng a, hmuh tur a la awm miah lo zui! A mangang ber ka ni leh lawi a.



Zàn inkháwm thleng chuan a reh zui ta vang vang a. Lalnuni chu ka hmu reng a, a chanchin ngaihven anga awm ka duh chiah loh avangin engmah ka zawt duh lo va. Chuloah kan inti thiam lo tih pawh a lo hre ve kher lo thei a. Sawi chhuak lo law law ila a him berin ka hre rih tlat a ni.



Inkhawm bàn chuan Msa'n zaikhawm ve turin min sàwm a, ka peih lo viau nâ in rilru tih thawven nan pawh tiin ka zaikhawm ve ta lawp lawp a. Ka beisei ai daihin an lo lam hlim a, Nu ho an hlim hi chuan kohhran hi chu kan hlim nghal nimai in ka hria. Taksa chêtna chang ṭhinte hian Pathian thlarau thianghlim hnathawh an entir ve pakhat a. Lam hlimna hi kohhran hlim leh hlim loh tehfung pawimawh tak ani ve tlat.



Engtin tin emaw kumhlui thlah zàn chu kan thleng ve ta mai e, Nunhlimi nen kan la ṭha lo tluang zel. Ka be lo va, min rawn be lo bawk a. Hriatchhuah châng a nei mai ni lovin ka rilru ah a awm ve reng zawk a. Dik taka sawi chuan ka lung a lêng ṭan ti ila ka sawi sual lo vang. Ka inngaihtuah nasat poh leh mahni inthiam lohna in ka khat a. Khami zana ka ṭawngkhum pawp pawp kha ka inchhir ta khawp mai.



"Tunlai in va reh" Msa message ka chhiar zawh rual chuan ka thaw chhuak hawk a. A sawi awmzia ka hrethiam ngang mai. "Kan ṭha vak lo va" ka va ti ve ringawt a. Kan chanchin a ngaihven ru ve reng tih ka hria a, min rawn zawt har tawh ka ti reng a ni. "Va zialo ve, sawi duhte i nei em?" a rawn tih chuan ka inngaihtuah hmasa tê tê a. Ka ṭhianpa ber ni mah se a zawng zawng hrilh chi chu a ni chiahin ka hre si lo. "Hun kal tawh vangin kan buai a" ka va ti ta ringawt a. "Lawk, ka lo lêng ang" a rawn ti vat a, ka chhang zui tawh lo.




A sawi ang tak takin Msa chu a rawn thleng ta vat a. Ka chhungte zawng zawng chu zaikhawm turin an chhuak vek tawh a. Min sâwm ve tak na in ka awm nawm loh chhuanlam in ka zui ve ta lo kha ania. Kumhlui thlah zan ni mah se ka eng tih thâ mah a tho lo a ni.




"Eng eng emaw kan ti ve ang chu ka tia, mahse engmah in rawn sawi hlawm bawk si lo. Biakin lamah kan lo buai tho bawk nen a ṭha lamah ka lo ngai mai a. Zanlai inkhawm kal hma in rawn len chilh che hi ka rilru ah a awm hrim hrim a" a rawn ti lût nghal bawrh bawrh a. Branch hruaitu an lo nihna laiah Msa te hi chu an buai ve reng a. Krismas leh kumthar lawm a, hlim hlawp bâwl rual kan lo ni tawh lo ve bawk nen Biakinah hian kan tap chawt mai ṭhin kha ania. Mahse tun ṭum chu ka hun tawn in a zir lo êm a, inah ka inkhung deuh tawp ani ber.




"Eng tih mah ka rilru ah a awm lo alawm mawle" ka lo ti ve sup a. "Sawi nghal par par teh le" zângkhai zeta a tih rual chuan ka lo nui huk a. "Sawi thui vak tur pawh a awm chuang lo, kan ṭha lo ani deuh tawp mai. Chinfel ngaihna ka hre bawk si lo va" ka lo ti sup a. "Sawi chiang la" a rawn tih chuan ka lo ngawi ren rawn a, "I remtih chin min hrilh la, ka lo ngaihtuah pui thiam nan che. Mahse ka ti lui miah lo che ania" a rawn ti leh zung zung a. Ka zai ngai takin min bia niin ka hria.



"A nunhlui vangin kan buai ani ber. A ṭha lo lam ania, a zawng zawnga hrilh che chu a rem bîk lo va. Urláwk zan khan kan inti thiam lo va, kan reh ta vang vang chu anih hi. Ka thiam loh a awm tih ka hria a, ani pawhin min cho chhuak ve bawk a ni" ka ti luam a. A pawi lo tur chin chu ka hrilh ve ta vek a. A lo bu ve nghut nghut mai. Chutia ka sawi chhuah tâk ah chuan ka thâwl ve deuh hawk mai. A zawng zawnga sawi chhuah chi ni lo mah se inbunruahna tur ka lo mamawh ve êm ani.



Msa chuan "In buaina laimu tak chu hre ve lo mah ila heti hian ka thiam ang tâwk in ka lo khaikhawm sak ang che aw. Nunhlui hi chu tupawn kan nei vek a, ngaihsak tur a ni lo ti mah se nunhlui hian hmalam hun thui tak a hril ve a. Ngaihsak tur a ni, mahse hmalam hun tichhe khawpa nunhlui in nghawng tir erawh chu tih miah loh tur a ni. Nunhlimi chungchângah pawh sawi thui viau tur ka hre lo va, eng ber nge in buaina chu ka hre miau lo va. Mahse hei chauh hi ka sawi ang, i tán chuan a ṭha ka la ti fan. A tun hun hi ngaihtuah la, ani bâk bâk chu an awm bîk lo ania" a ti ta duah a. A thusawi ang hian keipaw'n ka lo ngaihtuah ve tawh tho a. Mahse kan inkar siam ṭhat leh dân hi ka hre tawh lo ani ber.



"Bulṭan leh dân ka hrelo" ka lo ti hul hak a, nêp ka va han inti tak! Msa pawh chu a lo nui ve nghal huk a. "A tal buai zawk turte chu buaina chawh chhuah loh tur alawm mawle" a lo ti sup a. "Ka chawk chhuak kher lo" ka lo ti nghal hmuk mai. Kan buaina chhungril tak hi hria sela engtin tak ngai ang maw? Sawi chhuah erawh ka duh hauh si lo, Nunhlimi mualpho lehna vek tur a ni a. Msa hi ka ring tâwk a, lo hrilh ta pawh ni ila midang bulah a sawi chhuak ngai dâwn lo tih ka hrechiang. Mahse Nunhlimi leh kei min hmuh apianga a hriatna a a lo tel ve zel tawh tur kha ka duh lo a ni.




"In buaina chu phone kaltlang a chinfel mai mai chî a ni lo, lèn chilh rawh" a lo ti hmiah a. "A dam ṭha ang em aw?" ka lo ti daih thung a, tunlai a vâng thar êm a, ngaih a ṭha thei thlawt lo a ni. Msa chuan "Chu te chu i chhui chhuak ve tawh mai aniang chu mawle. Nang paw'n i hriat loh chu engtin nge ka hriat ang a" a lo ti hluai a. Zawhna mawlmang tak ka lo zâwt a ni.




Msa rawn lêng chuan zaikhawm tur leh zanlai inkhawm kal ve turin min sàwm zui zat a. Mahse ka lo hnar ta thung, ka chhungte bulah chhuanlam siamin ka lo kal lo ve laklawh tawh si a. Ka va lan leh chuan sawifel tur ka ngah mai mai palh ang. "Nang hi, i da riau mai. Ngaihzawng neih hi chhiat pui tur ni lovin ṭhat pui zawk tur asin mawle" Msa chuan a ti leh nghut nghut a. Ka lo nuih liam san ringawt mai. A sawi dik miau a ni. Heti em em hian Nunhlimi'n min tibuai lo sela chuan ka hun hman pawh a pangngai zawk ve ngei ang.



Zanlaiah Nunhlimi ṭhiannu Lalnuni hnen aṭangin message ka dawng hlawl a, ka beisei loh lam daih a ni. "U Hluzuala chu ka ngaih ang i lo va ni lo ve. I lo mak hle mai, Nunhlimi i tih dân hi i chungah a la tla ve ngei ang. Ka dem thlawt che" a rawn ti duah a. A ṭhiannu thlavang rawn hauh sak ve in min rawn hau ni berin ka hria. "Chinfel ka duh ania" tih zawngin ka lo chhang lêt a. Ka message chu a hmu rang khawp mai. "I lo mak hi ka nia, tun thlengin i rawn uksak zui ta miah lo ania. I fiam kual mai mai tur a ni hlei nem" a rawn ti leh kher a. Fiam kual tih ṭawngkam an hmang fo chuan ka thin a khei ve ta zak mai.




"Engtik lai mahin Nunhlimi hi ka fiam kual ngai lo. A laka ka rilru puthmang hi thutak a ni, ka ti takzet asin. Eng emaw inhriatthiam lohna kan nei a, chuvanga hun thâwl pe mai chauh alawm ka nih" ka va ti ve ta duah a. Lalnuni hian eng chen nge a hriat ka hre bîk si lo va. Nunhlimi ṭhiannu ve ber ni mah se ka fimkhur hle a ngai.



"Engpawh nise sawifel rawh u. In mak dûn emai, Nunhlimi lah a luhlul bawk si" a rawn ti ṭha ve ta mai a. Lalnuni rawn ṭawng chhuah hlawl dân ah Nunhlimi chuan engti kawng emaw zawng tak chuan a tuar ve tho anih hmêl. A tawrhna avangin ka lâwm tihna lam ni lovin keimah ang thova a lo tal buai ve chuan ka ngaih a ti ṭha hliah hliah.




Ka rilru ka siam fel a, Krismas leh kumthar vuak vet hi zo fel sela. Office kan ṭan tak tak hma in kan boruak hi ka chingfel leh vat ang. Tuna chêt lâk vat chu duh viau mah ila mi zawng zawng kan la buai tlâng rih si a. Nunhlimi tán pawh hun thâwl inngaihtuahna hun ka siamsak tihna a ni dâwn a. A pawi thui lutuk lo turah ngai ang.




Kum thar tûk inkhawmah chuan Nunhlimi pawh la hmu veleh ta e. Midangin a chanchin an lo zawt sup sup hlawm a, khatia a reh tâk daih chhan chu a lo dam sam lo hi a lo nia. Mite kâ aṭangin ka hre chawpchilh ve chauh a ni. A hma ang thovin a awm dân a ngai pat a, a nui var var reng a. Midangho nen pawh an infiam bawrh bawrh a. Kei erawh awm ve lo ang maiin min ngaiin ka hria. Ka mitmei a vêng eih lo va, a awm awm in a awm tawp a ni ber.



Zanah chuan Msa'n min sàwm avangin kan zaikhawm ve a. Ṭhalai chu beisei ai takin kan ṭhahnem. Nunhlimi pawh ka hmu veleh ngei a, mahse a bula John-a leh Apuia an lo awm tel ve kher chuan ka mit an tikham ngei mai. Min tilui ni âwm tak hian an bulah chuan hlim hmêl a pu reng bîk a. Apuia mitmeng lah ka ngai thei dêr lo. Ualau takin ka pawi rawn sawi ngat sela ka hnek chiang viau ang.



"Thingpui lumna lamah kan zuk chhuk ve dâwn em ni ang?" ka bengbulah Msa chuan a rawn ti zawi sup a. Min koh hran a tum dân ah ka awm dân chu a lo hrethiam ve pawh a ni mai thei a ni. Apuia mitmeng ngeiawm zet hmuh reng ai chuan tiin Msa chu ka zui chhuak ve ta daih a. Insum zo lova mawi lo taka chêt ka hlauh vang a ni pakhat. Nunhlimi lah khan min hrelo der thiam ngang mai si a. Ka tán pawh a tlâwm thlâk ve lutuk.



"Apuia hi a nghal zek ang ka ring "Msa'n a rawn tih rual chuan "Ka hnek chak ania" ka lo ti hluk a, a rawn nui huk mai. "In la inbe fel lo cheu em ni a?" a rawn tih leh chuan "Hun a la awm hlei nem" ka lo ti sup a. "I che muang ve e, elpui i nei tih hi inhre ta che. Harsa takin a rilru i hmin ve a, a loh thlawn chuan luan ral tir suh. A ruka thinrim a inhumruh vak te hi a ṭangkai lo. Mipa chu pà taka chêt chhuah mai tur a ni. A chekhnawk thila buai a, rilru buai vêl hi chu hmeichhe tih àwm tâwk lek alawm. In chingfel vat rawh u" a ti ta nghut nghut a. A thusawi chh ka pawmpui ta khawp mai. Apuia lah a rawn huangtau ve sauh si a. Nunhlimi hi a lo inhawng viau zawk nge mawni?





Kan zaikhawm chu dár 11 velah kan bâng a, Nunhlimi te rawn inzui chhuak pawh pâwn lam aṭangin ka lo hmu ve reng a. Che chhuak lo turin ka insûm hram hram a ni. Nunhlimi chuan min rawn melh zawk a, mahse a hawi sawn leh nghal vat a. Nui sâng chungin Apuia chu a be zui leh ta daih a. A khawsak dân ka huat zia chu pui tak ani.



Kan intih thiam loh dân te kha ka ngaihtuah lêt a, kha aia fiah khan insawifiah ve sela ka ti a. Mahse a hunlai khan ka thinrim luatah kan in aṭang khan ka hnawtchhuak a ni hawt mai a. Ka thiam lohna ka hria a, ka pawm thlap bawk. Mahse heti em em a rulh lêt tur chu ka ni bîk lovin ka hria. Thiam thu sawi tur erawh ka vàn viau lawi a, han tih vak ngaihna ka hre lo a ni ber.




"Happy New Year" chu message ka chhiar zawh rual chuan ka ner sawk a. Remi chuan rawn lan hun a hre chat chat ka ti dawn nge, ka rilru buai lai takin a rawn lang ani. Kan zaikhawm bâng, mut tum a ka lo inruahman lai mêk a ni a. Chhàn lêt châkna ka nei miah lo na in "Kum thar chibai le" te chu ka va ti lêt ṭha ve mai a. Chu thû lek chuan a ti phûr zui viau nge ni "Nunhlimi nen eng nge in chanchin?" a rawn ti leh hram a, "Kan ṭha" ka lo ti hmiah. Kan inkar boruak zawng zawng hi a hriat ve chhan tur pakhat mah ka hrelo. A thu min hrilh te kha bengvar thlak viau mah se kan inkar tibuai tu ber a ni zui ta si a. Rawn inrawlh tam lo se a dik a ni mai.




"Ani maw, a va lawmawm ve" a rawn tih lehna chu chhàn pawh ka chhâng zui tawh lo. Mahse a hnù lawkah chuan a message a rawn thleng zui leh zat a. "Tun mai khan kan vengah Apuia nen an inphur lai ka hmù a. In ṭha vak lo emawni ka tia ka rawn zawt ve tawp che anih kha" a rawn tih leh zet chuan ka sa ve ta phat mai. "Nunhlimi hi chu a nunah mipa an tam lutuk a, hriatthiam hi a ngai ṭhin ania. Hrethiam rengtu tur nang a nei hlauh che hi chu a vannei ngawt mai" a rawn ti leh a. A message chu ka chhiar nawn sek a, chhâng lêt ta lo chuan ka che chhuak nghal vut a. Ka chhûngte chu zaikhawm bân aṭang khan an mu fel nghal vek tawh a, an mitmei vèn tur a awm tawh lo vang.




Ka wardrobe chu hawng in ka jacket khai ṭhat zawh chiah chu ka la chhuak lehnghal a. Ka en liam mai mai thei tawh lo. Kum thar boruak reh hun kha ka châng deuh a ni a. Mahse heti reng chuan hmasawn aiin kan inhlat telh telh dâwn in ka hre tlat a ni.


Tunah hian Nunhlimi chu ka hmù ang a, engkim, a bo a bâng awm lovin ka sawifel pui vek tawh ang. Ka thinrimna erawh thunun nasat ka ngai leh dâwn viau mai.



___________*__________*__________*________

PAWIMAWH
Thawhṭanni-a Chapter hnih dah tur anga insawi kha ka ni a, ka sawi anga ka awm lohna ah ngaihdam ka dil e. Zan tîr lam aṭang khan ka phone a chiangkuang lo va, zing dár 2 tlâng ah ka hmang veleh hman chauh a. Chutiang teh nuaih chu a ni, in mi hriatthiamna ka lo dil tak meuh meuh e. Tin, December 7-19 thleng hian kan exam dâwn!!! Exam leh exam lo inkarah kan awm char char a, mahse kan exam hmêl ta riau mai a. Ka regular sa loh tehlul nen ka regular lo lehzual dâwn niin a lang Amaherawhchu, a remchân dân ang apianga rawn dah zel erawh ka tum ang aw. Ṭhahnem min rawn ngaih pui ṭhin na ah te ka lâwm em em ṭhin em em a. In duh dâna ka awm thei lo viau chung pawh a ka tana hriat nuam loh tur comment hmanga min chhut zui ṭhin loh avangin ka lâwm e
Show post links
Top