TE DOY 15K BY Abbra Reo Ririni Khiangte (Pitartei) (Completed)

[ngaia]

☆TE DOY 15K☆
Chapter 11
By
Abbra Reo Ririni Khiangte(Pitartei)

.
Jayden ţap nasa lutuk leh ka nghawng ah hmai phum chunga ka hming lam rawng rawng paha min kuah nghet ve țang ţang te chuan ka taksa a natna awm zawng zawng aiin min tina a,A mittui in ka nghawng a rawn far huh ve nuai tawh bawk!Ka fapa mangang ţap in ka hming a lam lawm lawm a,Tihtheih neih bawk silo chu nu dinhmun chang tawh chauh in a natzia leh a manganthlak zia min hriatthiam pui ang!

Zico inhrosa thawm lah a hma zawng aiin a ring tulh tulh a,Jayden-a toys dang ho ri pawp pawp leh a au ţhawt ţhawt ri chuan ka thin thleng hian a luhchilh a!Ka mangang a,Chutih rualin ka fapa vang chauh talin mangang a hlau tur ka nilo tiin ka inhrilh a,Ka taksa chhunglam phei chu vacuumcleaner hmanga bawlhhlawh kan hip hlawk hlawk ang chiah hian engemaw hian nasa zet in a rawn hip emaw tih tur khawp in a na thip kual vel vek ani ber!

"Mi h*rnu.." Zico in ka samah a rawn ţham leh bawrh a,Jayden lak aţang hneh lutuk in min phih hrang a,Chhuatah ka let hlawm nghal tawp bawk!

"Tu phiangsen nen nge in lo in*** a?" Min khawih zui a tum leh chu a tawp chawt a,Chil ka lem dawn a,Chu pawh chu ka thei lo! Ka taksa pawnlam sa vek siin ka kawchhung lam chu a hit khawng vek maiin ka hria!

"Mummy.."Jaydena'n amah kuah bet leh tura min koh râwng râwngna pawh ka thinlung hian a hre vek,Mahse ka chesawn thei tawh lo.Ka fapa min mamawh hunah pawh ka kuah thei tawh lo anih chu!

"Mummy.." ka inseh ruh ţeuh a,Ka tai zawnah hian engemaw in min pawt kawm tlat a!

"Mummy!"

"Nang kha lo ngawi rawh.."Zico zawk a vin leh tuarh a,Chhuata let hlawm reng chung chuan Jayden thlabar lutuk taksa sen vek leh a kaih mai ang tih hlauhawm khawp a taksa khur ve hlawk hlawk chu ka hmu phe ruai a! Ka â thei mai dawn in ka hria!

Zico aw vin vang ngawt in a ţap tawp thei bawk silo a,Ka hming a lam chul reng a,Zico kha a kal chhuak lo tih ka hria a,Mahse khawnge a awm tih pawh ka hmu thei lo.

"Mummy.."
A chuan na car lem aţang rawn chhuk a tum ve chu ka melh ţawk ţawk ringawt!

"Nau hi i chhiat chuan ka that ang che.."Zico aw ri rapawm zet ka hriat rual in ka hmaizawnah a rawn kun hniam a! A thawk lak zawnga zu rim nam huam huam te leh a thinrim thawk buai vek te chuan ka thawk hi a tichham thei mai dawn!

Dimlo zet in chhuat aţang min pawm kang nawlh a,Jayden khum ah min nghat a.

"Ka sawi chu i hria em? Nau hi i chhiat chuan ka that ang che.." A aw ri rapawm lutuk chuan min ţham nawk nawk hi ani mai!

Jayden lam ka hawi a,A hmai a sen vek a,hlau tih hriat lutuk hian a car lem phen deuh si ah chuan alo ţhu ve kak a! Ka bulah lokal a,Ka kuah tur thu hrilh ka duh a,Mahse ka ţawng chhuak thei bawk silo a,Amah pawn amah kuah turin min duh lutuk tih hriat zet in min melh ve kiau a!Nu leh fa inpawh na rilzia ka hriat thar phah a,Ka fapa chu țawng chhuak miah lo mahse a taksa chhunga lungphu ve dep dep sawn min ko mawlh mawlh thung si,Chutih ruala laktlak loh zet a ka chesawn thei tawh loh chuan min tina zual ngawih ngawih!

Pindan chhunga Zico vei kual thuak thuak chuan kut a va thlak leh mai ka hlau bawk si!He mihring kawchhungah hian ramhuai chi engzahnge lut tawh ang?A chet ţhin dan hi mihring tan chuan a theih loh hlawm tawp niin ka ngai a,Sual hlawm lianpuiin a ţanpui te a nih ngawt loh chuan tunhnai a a khawsak dah hi mihring rilru pangngai pu tu tan chuan thil theih loh hlawm tawp ani!

"Tunah in ah rawn kal rawh.."
Zico phone hmang thawm a reh hmak rual chuan a hma zawng aiin ka hlauthawng mai,Kawngkhar bulah a ding a,Bing tak in ka fapa bangkila ţhu tawm kak chu a melh run bawk a!

A chet hrut rual chuan ka khek chhuak nghal tuarh a!

"Zico,I kut hmawr pawn va khawih suh.." Engtinnge kha lehkha phek a thil inziak vang mai mai khan a fapa,A thisen ni bawk chu mihran faah angaih daih theih!

"Ka sawi chu i hria em?Ka fapa saw i kut hmawr pawn va khawih suh.."Ka ti a,Ka aw khur nasa lutuk leh ka hrawk a reh beh tlat ang mai a ri chhuak nawk nawk chu kei ngei pawh in ka hre hlei thei lo.

Jayden pan lo in ka mut na lamah a rawn kal a,A hmel landan rapawm lutuk leh harhfim hlawl lo chu thei ngat ila chuan ka that ang! Ni e..Nu hian fate chhannan chuan khawvela thil awihawm loh tak tak hi kan lo ngaihtuah kim vek thei anih hi!

Ka hmaizawnah a rawn inbeng khalh a,Zeng ang chiah hian ka pang tin mai chu a mur chuah chuah a!

"I tha kha i kawchhunga awm venhim nan hmang zawk rawh,I venghim zo lo anih chuan keimah ngei hian ka that ve ang che.."Rapawm zet in ka hmai zawnah a nui suk a,Ka hlau nameuh mai mahse chu ka hlauhna ai mah chuan ka huatna a tam tawh zawk! Ka chunga a chetdan rawng tak tak leh sual herh lutuk vanga hremna ka pek let ve theih hun a la awm ang,Chutih hunah chiah chuan kei hi ka hahdam thei chauh bawk ang!

Pindan chhung chu a reh duk a!Jayden in hnit ri hlawp hlawp chu inchhawng sang taka aw rawl tawp a au chhuak ang chiah a ring in ka hria a,Thei leh theilo in ka va melh a,Kan pahnih chunga thil thleng hi a hrethiam ve thlawt lo tih a lang reng!

"Jay.."A khup a tawm ve kak a,A inhnitna lamah a kut tereuhte chu a che ve ak ak a.

"Jay,Mamma bulah lokal rawh.." Zico kha a la kal chhuak lo tih ka hria a,Nichin khan ka taksa aţang thisen chhuak a hmuh vang chiah a min khawih zuilo ani bawk! Jayden bul mai ah chuan ka taksa aţang thisen chhuak pawh a awm nuaih a.

Tim daia rawn tho chhuak in khum lam chu a rawn pan ve a,ka fapa hlim thei tak leh he inchhungah ngei thlamuang taka tlan kual a,Ri ve tung mai hmel a hlauh ngawih ngawihna awm ka hmuh rual te chuan dam ţhat ver vawr a,Hlau hlawm a siam tu mihring saw ka lungdam hma a sawisak let ve ka chak a,Mahse tunah hi chuan ka pang zeng ang mai a a awm vang in keimah ngei pawh ka chesawn thei bawk silo!A hmel a thlabarna leh hlauhna awm reng chuan min tina vawng vawng mai!

Khumah a rawn mut ve rual in ka awmah hmai a phum ta tlat a,Ka rinthiam phak bak aiin a taksa a khur nasa a.Dimte in a hnungah ka chul a,Kan ep chiah bang ngheng a Zico ding run chu rum zet hian ka melh nghek ringawt a!

'Ka la ti chhe vek ang che!' Tiin ka rilru chuan ka sawi mawlh mawlh bawk.

Kan inneih hma ațang hmeichhe awm ţha duhlo leh mipa dang lo mutpui tawh hial ţhin ni ila chuan tuna a chetdan leh min puhna hi awm tihsak na chen ka nei ang,Mahse kan inneih zanah ngei ka thianghlim zia amah ngeiin a fiah a,Midang ka hnaih ngai loh zia hrechiang turin Jayden ka pai a;Ka pum len hma kha chu kan inzui chawt a,Tunah lem! Kawng engkima amah ang em em tu,Amah ngei pawh in 'ka thisen bik liau liau!' Tia a sawi ngei a chu mihran fa anih a ring ta tlat a,Lisa nen kan inhmuh hmasak ber ţum kha Jayden leh Zico inan loh thu a sawi tawh a,Tunah chu thilsawi tu aţang vek in an pafa DNA a inmillo tih bawk a rawn chhuak leh a,Mahse engmah sawifiah tumna ka nei tawh lo!

A fapa ngei mihran fa ang a ring tlat duh chuan min tina ngei a lawm,Na tak ani! Mahse,Ka lak aţang fapa chiah beisei tu in engtikah mah Jayden hi min chhuhsak thei tawh ngai dawn lo tih ka hriatna chuan min ti lawm a,Ka fapa vangin engkim ka tuar angai tawh dawn lo a,Zico ka beih let theihna turah pawh kawng a awlsam sawt tawh bawk ang.

"Jay.." A insut hlawp hlawp thawm a reh tak hnu chuan a hnung a ka chul chu ka tawp dat a!

"Jay..?" A muhil anih ring in a chhipah ka fawp vang vang a,keipawh ka taksa chu a na in thawk ka lak zawng te hian ka hnungzang a thazam kal chho te chen hian ana a,Thil thlen dan kha a rang in a ni buan buan a,Zicoa'n min sawisak lai pawh khan rilru chiai lutuk in ka awm a,ka taksa na lutuk pawh kha ka hre hlei thei lo ani a,Tunah tak hi chuan ka taksa peng tin nat dan ka hre fiah tawh a,Dimte in ka mal inkar chu kekawr chhan ah ka khawih a,Ka kut chu la chhuak in ka hmai zawnah ka lek kang a! Ka tha a khur dar dar mai!


Ka kut a thisen kai chu rilru na zet hian ka melh reng a,Kut min thlak hma khan ţha takin thil min sawipui thei reng a,Mahse chuthil chu tilo in min sawisa zawm ringawt a,Min sawisakna vang ngeiin thisen a chhuak a,Nau ka chhiat anih chuan keimah min thah tur thu a sawi tel zui leh bawk!

Beidawng lutuk in thawk ka la ham ham a,Zothana'n amah zui haw mai tura min tih lai a ka lo zui daih mai lo kha ka inchhir ta rum rum bawk!

Ka muthilh lai ka hrelo,Nilo ka taksa na lutuk vangin nikhaw hrelo in ka awm ti ila a dik ber a,chianglo zet in mit ka meng a,Pindan chhung chu a lo thim vek tawh a,Hlauhthawnna in min rawn tuam a,Ka bul chu ka dap a,Jayden a lo awm tawh lo a,A hmazawng aiin ka mangang ta mai!

"Jayden!" Ka au nghal tuarh,Chu mi rual vek chuan ka tai bawr ah hian min pawt zawk tu a rawn awm a! Ka chunga thil thleng ka hre fiah tial tial a,Kha ramhuaipa kha ka fapa kha khawnge a dah ang!

"Jayden..?" Mangang zet in ka au chhuak leh tuarh a! Min chhang tu tumah an awm lo a.

Nau kha ka chhiat reng em tih takngial pawh ka hrelo,Thei leh thei lo in ka ţhu chhuak a,Ka fapa mutna hnu chu a lo la lum vat vat a,Hei ai hian lo harhchhuak hma i la chuan ka kuah leh thei ni mai tur!Mahni indem zet hian ka inţham tawk ringawt! Tinge ka lo muthilh san kher ni!

Pindan kawngkhar a rawn in hawn rual in switch a ri khap a,Pindan chhung eng ta ut chuan mit a ti vai lek lek bawk!

Mit ka nuai zawk a,Kawngkhar a Lisa rawn pen lut ka hmuh rual chuan ka taksa hi thinrimna vang in a sa vek!

"Ssshhhiiitttt!" A kutchal a hmui ah nawr siin a meng rang kual vel a!

"Inbengdai teh,i che thei lo hrim hrim bawk!" Amah vek chuan a rawn ti leh a.

"Khawnge Jayden?"

"Chu pawh chu ţul ka tih hunah ka la hrilh ang che.."Ngeiawm lutuk a nui sak pah in a rawn ti a,Zico awmdan ah khan Jayden kha kutthlak mai pawh a hrehlo zek zek a,Ka thinphu chu hlauhthawnna vangin a phu rang kher mai!Kan nufa nun rawn chawk buai vek tu,Mihring na ve thei pawh a min ngailo tu hmeichhia khum lam hnaih a a rawn pen chu lo phih tluk tawp mai ka chak tak zet bawk!

Ka mutna khum tlang chu a rawn nem a,Ka hmaizawnah tak a rawn nui leh sak a.

"Vanneihthlak nge ka tih dawn vanduaithlak zawk! I puma naute chu a him rih a..Mahse i indim viau a ngai ang,Kan fa tur i pai tih kha in hrereng la.."

Ka sawi zawh tir thei lo,Na lua awm lo in a sam ah ka ţham ta ngheng a,Ka chet dan chu a beisei lo ani tawp ang,A ţe chul a,Pindan kawngkhar a rawn inhawng pawp a,Zico rawn tlan lut ve chuan Lisa zawk chu a rawn pawt a,A sam ka ţhamna chu ka thlah duh mai bik silo!

"Zodinpui duh tawk rawh.." ka ban rekah na zet a a rawn man takah chuan ka ang zawk thei mai!

Kut min thlak zawm ve mai hreh loh hmel lutuk a Zico min enna chu rum zet hian ka melh let a,."Thlah rawh.."A ha sehchilh ran in a phun leh a,Ka banruh na zet a a hmer leh takah chuan ka thlah a! Lisa zawk a thaw zui hawk bawk!

"Kut min thlak ngam ve khanglang e law.."Sam pawr phang in Lisa chu a rawn au leh tuar a,Mahse min khawih ve hma in Zico zawk in a nawrsawn ta hlauh a! A na ve khawp ang,ka kut țang karah a sam tam zet a tang nuk mai!

"Khawnge ka fapa?" Zico zawk ka melh a,Ka fapa tih ka lam rual chuan ngeiawm lutuk in a ner ta nawk a!Chu thil chuan min ti hlauthawng zual sauh bawk!

"Zico,I tina anih chuan..."

Ka sawi zawh hma a a rawn țawngdan vang chuan ka sa kher mai!

"Vanneihthlak lutuk in i h*r fa chu a la thi lo!" A ti tâwk a,Lisa chu chairah a nem ţhu a,Chet theih ka chak dan chu rapthlak tak ani ringawt!

"Tu nen a in fa nge anih tih i sawi chhuah hma in thil pakhat i hriat a ngai a,Tuna i fa pai kha mipa a nih loh chuan i h*r fa kha ka that ang!" Ka that hmasa zawk ang che ka ti rilru mawlh mawlh mai!

"In aţang hian i chhuak tawh ngai dawn lo a,I fapa pawh fahrah in a dah lo in ka nu te lam in an enkawl rih mai ang,tuna i tihtur chu i pum chhunga naute kha mipa anih theihnan ţawngţai char char ang che.."Ti hmuk hmuk pah in pindan chhungah chuan a vei kual sek a,Lisa lah in rum zet a min melh in a sam ka ţham thur sak kha a chul mam pah a,An pahnih sawifiahna ţha ber chu Ramhuai hi an ni tawp mai!

Bungraw pakhat,An duh duh dana an pawh kual theih ah min ngai a,Ka fapa an kawl miau avang in engmah lah ka ti thei der mai bawk silo!

"Tinge in pahnih a innei in fa chu in neih mai loh!" Tihtheih ka neilo lutuk chuan mangang zet hian ka ti hlawl a,Zico zawk chuan min melh run bawk!

"Kha lam chu kan duhthlanna ani!" Lisa zawk in a rawn ti hlak a.

"I ching ani em lo maw?" Ka tih rual chuan a ţhutna ațang a rawn ding uaih a,Mahse Zico zawkin a lo man bet a,A ţhutna ah a nem ţhut leh hnu thleng pawh chuan min khawih zui zu han tum tho a mawle! A ching te anih ngawt loh chuan inneiin fa nei ta mai se!

"I ka kha veng țha tawh ang che."Lisa chhan zet a Zico a rawn țawng chhuah rual chuan ka nuih sak ringawt!He hmeichhia hi chu a chhan hlum lo chauh ania,Kei ve chu kut min thlak in țawngkam chhe tak tak in min ankhum reng a!

"Fa neiin ka taksa hi ti chhe duh i la chuan hmanrua ah kan hmang kher lo ang che.."Lisa zawk in a rawn ti ve ta hlak a! Zicoa'n ngawi turin a khap a,Ka thil hriat duh tak an sawi thleng ţep tawh tih ka hria!

"Fa neih i duh loh vang mai mai chuan i mipa hmangaih in hmeichhe dang nupui ah nei in ,Sex a hmanpui pawh i pawi tilo tihna ani maw!" A thinrim laklawh chawh thawh belh ka tum ani ber!

"Hmeli.."A rawn ti tuarh a!

"Oh..ka rindan ka sawi mai mai anis.."

"Zico te sumdawnna enkawl tur hian hmeichhe satliah fahrin kan mamawh hleinem.'" Zicoa'n lo khap a tumna chu rum zet hian a melh a. Engkim sawi law law rawh ka lo ti rilru mawlh mawlh bawk.

"Zico nen hian kan naupan lai a ţang kan inhmangaih tawh." Ka nat ring in min nuih sak a,Ka hriat chhuah tak erawh kei hian Zico hi ka hmangaih ngailo a,ka lo duh zawk mai tih hi ani!

"Ka sawi ang khan fa pai ka duh lo a,mahse kan tleirawl chhuah tirh ațang nupa ang chiah in Delhi lamah kan khawsa tawh thung!Chutih rual in Zico pa hriselna a tlahniam a,A fapate chu nupui nei a,Fapa nei hma zawk zawk hnen ah a rosum tam zawk a pek tur thu a sawi a,Chumi ţum chuan Zico hian inneih a duh tawh a,Ka zirlai ka la zawh loh vang leh fa neih a,Ka taksa tih chhiat ka la duh bawk silo kha remruatna kan siam ta a,Chhungkaw pangngai ţak aţanga seilian kan thlang anih chuan keiin zirna ka zawh hunah ințhen leh fa chan vel pawh a buaithlak thei dawn tih ka hriat vang in nang hi ka thlang ta che a." A ti a,Min hmusit tih hriat zet hian min nuih leh sak a!

"Tichuan,Zico pawh in an chhungkaw sumdawnna ah chan tam zawk chan a duh vang in ka remruatna chu a hnial ta lo a,Mahse hmangaih lo tur che leh in pahnih fa chu nu lak aţang a tal hran theih veleh a ţhen nghal bawk turin thu min tiam bawk a.." a ti leh halh a.Na ngei se,Ţap hial se tih hriat zet hian a hnunga Zico ding chu a ngheng ta ar ar a! Ka ten tehreng nen aw!

A thusawi zawng zawng te chuan min tina tawh lo! Ni e.. Fapa chiah ka lak aţang a beisei thu a sawi aţang khan thil tam tak ka ngaihtuah kual ve a,Mahse Sum duh vang anih erawh vawikhat pawh ka lo ngaihtuah thleng ngai lo!

"Tinge tun thleng hian min la ţhen siloh?" Zico zawk a rum nghut a!

"Mizoram ka rawn let hun kha in inţhen hun tur ani tawh zawk a,Mahse..." Sehchilh zet hian a rawn ti a,A bula Zico ding ngawi ngul chu a chho melh a.

"He mihring tlaw lutuk hian engkim a ti chhe vek a!" Nui hul hak pah in a ding chhuak ta vat a,"In ațang chhuah tir tur che a nih lai khan i hmuh lai ngei te khan min hnial vel a..Nep lutuk!" Tih er pah in a kal chhuak ta nal nal a! Zico chu ka melh zawk a! A ding kun chhul ringawt!

Hmeichhe pakhat in a duh dan dana a nun a chinleh kual sak chu ka khawngaih ru kher mai!

"Jayden chu ka be thei em?" Reife kan ngawih reng hnu chuan ka ti chhuak a,Lu a thing nghut a,Ka țawng leh hma in pindan ațang chuan a kal chhuak ve ta vut a!

Kawngkhar a pawhphui rual chuan ka thawchhuak ve ta ham ham mai! Sum an duh vang ngawt in ka nun min tih chhiat sak a! Fa paia a taksa nalh tak tih zûr a hlauh vang ngawt in kei hmanruaah min hmang a,Mihring pawh an ni hrep lo e!

Thil tam tak ngaihtuah in ka mu meng kar a,Mami pawh a awmlo nge ka hrelo,Nichin khan nurse pakhat a rawn lang hlawl a,Keimah min enkawl tu tur anih thu a rawn sawi a,Chuan kan ramhuai pahnih khan ka phone min laksak bakah Jayden~a room ah min kalh hnan bawk anih chu!

An chetdan nunrawng lutuk leh hlutna nei ve lo ang mai a min ngai chuan min ti thinrim hlur a,Mihring pangngai tih a tan chuan an khawsak dan hi a sual uchuak ani tawp mai!

Jayden ka ngaihtuah a,Tunah te hian engtinnge a awm ang,Zico in kut min thlak lai te kha a hmu ve vek a,Zico a hlau reng tawh dawn tih ka hria a,Chutih rual in tunah te hian thlabar tak a ţap in ka hming a la lam reng angem tih te ka ngaihtuah kual a,Zico nen an danglamna hmuh tur a awmlo tih khawp a ka sawi ţhin ngei kha a pa in a fapa anih a ring ta lo tlat a! Zico thusawi kha a hrethiam ve kher angem ka hrelo,Hrethiam lo law law se a lawmawm zawk rih ang!

Pindan chhung chu ka khawvel ani tawp rih a,Zothana ka ngaihtuah let apiang in a ban lianpuia min kuah ţhinna kha ka thlahlel zual sauh zel a,A nin vawi khat pawh kut min thlak ngailoh laiin thisen chhuah hial in mihran in min sawisa tih hre ve ngat se chuan!

A rawn haw a hun tawh tih ka hria a,Mahse a be pawp thei tawh lo a,Chu mai pawh nilo in pindan chhungah kalh khum ka ni bawk!

Min enkawl tu nurse in damdawi ei a hun a rawn tih rual chuan ka țhu chhuak vat a,Hei pawh Lisa cousin te zinga pakhat anih vang in a lak aţang phone emaw pawn kal chhuah pawh ka beisei ngam lo hrim hrim! Movie vela hmeichhe vanduai ber,An man beh a,A taksa hralhsak ţhintuten sal ang mai a an enkawl hi ka intehkhin ber a,Chung hmeichhia nen a ka danglamna chu ka taksa min la hralhsak ve em lo a,Mahse Pawngsual erawh ka tawk tawh! Ka fa ngei min la laksak dawn bawk a!

"In ah hian tumah an awmlo ami?" Min chhan pawh beisei lo in ka zawt a,Min melh zawk a,Vitamin in min jection zui a.

"Engmah ka sawi thei lo,Muthilh tum rawh." A ti ram hmak!

"Inbual ka duh a,Kan nupa room ah sawn ka mamawh a awm a,Lak lawk ka duh." Ka ti a.Min melh ren rawn a.

"I kal chhuah duh kher ka va ring lo ve.."

"Khawngaih in.." ka ti sep a,A hmanrua chu dahfel mawlh mawlh pahin thawk a la halh a.

"He pindan chhung hi i tan chhuan a nuam ber zawk ang.." Rum zet hian ka chho melh a.

"I kal chhuah duh ţalh chuan kal chhuak la,Inhnuai erawh chhuk thlak tum suh,I chunga thil thleng thei chu i hriat vek kha."A ti liam puat a,Ani pawh hi an thurualpui anih ka ring ta hmak bawk.

Khum aţang ka tho chhuak tur chu min pui a,Nau ka chhiat lo tih ka inhre tawh a,Mahse Zico kut min thlakna khan keimah ah effect ala nei tlat a,Keima duhthu in ka che hlei thei lo a,Chu mai pawh nilo in ka tai bawr ah hian chhung lam aţang kut a duhtawk a ţham beh tlat ang mai hian min ţham tawm tlat a,Kawngkhar thleng tur pawn hun a duh rei kher mai!

"Ka fapa chanchin i hria em?" Ka ti a.Ka tello in Zico te in lamah a awm ngawt a,A chhungten eng zawhna nge an lo neih ang?Tinge ka telloa a awm phei ringawt tih hre tur tal in min ngaihven tu pakhat tal an rawn awm ve angem?

"A ţha ang,Ngaihtuah suh."A ti sep a.

Kan nupa room kawngkhar zawn ka thlen chuan min kaihna chu a thlah a,Min melh ren rawn a!

"Inhnuai ah rawn chhuk suh aw,I taksa kha dim a la ngai ania."A ti leh a,Ka bu zeuh a.

Min kalsan hnu chuan kawngkhar chu dimte in ka vuan a,Ni hnih chhung lek ka lut lo a,Mahse ka ngaihtuahna ah chuan kum 100 chuang ka luh tawh lohna ang hial hian ka ngai a,Ni e..Zico an min sual luihna hmun,A tisa chakna hrikthlakna atan min hmanna pindan kha ani miau a lawm!

Kawngkhar lock chu ka herh hawng a,Ka thil hmuh vang chuan ka meng nghal kawk a! Ka kawchhung hi a hit chhuak nghal zawk bawk!

Zico leh Lisa chu saruak ngal ngat in kan nupa khum ah sex an lo hmang anih chu! Ka bing mup mup a,Engvang ber nge ka hrelo,Ka tha a khur a,Ka thawk a harsa nghal vek bawk! Ramsa ang maiin an rum dun a,Lisa nuam ti rak thawm vel te chuan ka beng a rawn luah khat a! Tlan sawn vang vang tur ka nih laiin ka chesawn thei lo a! Kan nupa khum ah ngei ka awm lai leh zel chuan sex an hman theih ka ring ngailo a.Min shock ani tawp mai!

Min rawn hmuh ve hma in ka tawlh hnung dat dat a! Kawngkhar pawh kharphui lo in ka kut tha khur ru dar dar chuan ka hmai ka hup puat a! Ka lakah khatiang a nunrawng khan che tawh mahse inchhungah ngei ka awm lai reng in khumpuiah sex an hmang dun thei ania...

"I ţha em?" Ka phu nasa lutuk chu ka thlawk lo chauh!

Ka hmaah Zico nu lo ding reng ka hmuh rual chuan chil ka lem dawk a! Min melh ran a!

Ka kawngkhar kharphui loh a țang chhung lama ramhuai te pahnih thawm rawn chhuak vang chuan a hawi ve ta dawrh a! Min en leh a,Ka tlawm lutuk chu ka mittui a tla tawp!

Zico nu zawk chuan rang zet in kawngkhar a kharphui a! Min rawn kuah ta thlawp a,Ka ngawng vek! Engmah ka ngaihtuah zawm thei lo! A tawi tuk vek!

Min hmangaihlo tih a sawi tawh a,An hmanrua mai ka nihzia an sawi vek tawh a,An awmdan eng vang pawh a na tawh tur ka nilo! Mahse..Kan nupa khum ni ţhin ah hmeichhe dang leh i pasal,Kutthlak reng ţhin tu che pawh lo nimahse sex an hmang dun lai meuh i hmuh chuan i na ve tho ang!

"Hahdam tum rawh.." Jayden room ah min hruai lut a,Ka ţap miah lo! Mahse ka taksa chhung hi a tawt tup tup a!

"Nu.."

"Hahdam teh.." a ti leh a.Engemaw tal sawiin min hnem ve se ka ti a,Mahse engmah a ti miah lo anih chu!

Khum tlangah ţhu in chhuat chu ka melh ngawt ngawt a!

"Kan chhungkaw mualpho theihna tur engmah ka duhlo ania.."A ti a,Phawk lutuk hian ka melh a.

"Tuna i thil hmuh chungchang kha ania ka sawi chu!" A hmel landan chu ka en a! Bati alh lai chhem mit hmiah ang chiah hian a lak ațang hnemna dawn ka inbeisei ruk ve kha a bo nghal hmak!

"Nang pawn midang fa i pai tho ani lawm ni?" A rawn ti a.

"Nu!" Ka ti nghal tuarh mai! A nui sak a! Hei pawh an ni ang tho! An ni ho hian an duh duh sawiin chhe tak tak in min puh kual reng thei bik tihna em ni! A fapa ngei in khum puiah hmeichhe dang,A ţhiannu tia min sawi khum ngei sex a hmanpui a! Engmah ngaihtuah belh ka duh tawh lo! Ka â thei mai ang! An thlah ho hi tianga rapthlak vek hi anni vek zawk ang,Engmah an chanchin hriat a lawi ka nei reng reng hleinem!

"Hmeichhia zawk in midang fa i pai theih laia mipa insum theilo zawk an lo chet nat deuh te chu thil awm tak zawk a lawm!" A ti leh ..Sawi tur ka hre tawh lo hrim hrim! A kal chhuak thawm chu ka ngaithla reng a!

Ani bulah Jayden a awm chu ka ngaih a ngam thei tawh der lo bawk! Zico fa anih loh a ring ve tih hriat reng reng! Chumi hre vek chung chuan engtinnge ka fapa chu a bulah khan ka dah theih ang! Step ațanga lum thla ang a sawi in midang hmuh loh laiin ka fapa baihvai zet kha a lo sawisa hreh hauh lo bawk ang!

Ka ngaihtuahna vang chuan ka hlauthawng sauh a! Ka laka an chetdan ngaihtuah chuan an tilo ang tih pawh a sawi theih loh.

Thei leh thei lo in kawngkhar lam chu ka pan rawk rawk a,Kawngkhar aţang ka chhuak tur chiah chu Zico kan nupa room a țang kawr halo in a rawn chhuak ve a,Boxer chiah ha chung in ka lam chu bing lutuk hian a rawn pan nghal pawk pawk a!

"Kal chhuah tum ngai suh ka tih kha."

Pindan chhung lam ah min nawr lut nawk nawk a,Ka theih ang a rang in a kut chu ka paih sawn nawk a,Sex an hman zawhna a la reiloh ang bawk in tuisik lek tal pawn a la intleuh fai lo ang! Ka ngaihtuahna vang chuan ka kawchhung a rawn let kual nawk nawk a!

Washroom lam pan a ka kal chu ka hnungah min rawn zui ve zel a,toilet ah chuan ka uak ta nghek a! Luak chhuah tur pakhatmah ka neilo,Mahse an pahnih a saruak ngal ngat a lo phusa kual vel kha ka mitthla ah a rawn lang zut zut a,Ka kawchhunga thil awm zawng zawng hi rawn chhuah an tum ta ber in ka hria!

"I ţha deuh tawh em?" Ka hnungah a rawn chul a,A ban chu ka nem per nghal nawlh,Chhuatah ka ţhu thla a,Ka thaw hle hle mai!

Zico lah kalsawn tum lo in ka bul maiah a ding ngawi ngul a;A taksa ka hmuh rual te chuan tenna leh huatna in ka khat a!

"Babe,I inenkawl a ngai tak tak a nia." Rum zet hian ka chho melh a.

"Kal bo vat teh. "Ka ti hlak mai,An ni vang hian ka tuar hnem tawk tawh a,Eng zat fakau a natna nge min la pek belh zel dawn tih lah ka hre hek lo!

A rawn kun hniam a,Ka khup hnuai ah a kut a rawn zen a,Min pawm kang ta nawlh a,Mahse ka tha neih zawng zawng sawm khawm in ka tal a,A darah ka chum țawlh țawlh reng bawk.

"Duhtawk rawh.." a au tuarh! Ka thinrim bawk si,Hmeichhe nep tak ang maia min dang chep hneh lutuk bawk si te chu ka haw hlur vek!

"I nunrawng lutuk hi Pathian in a hrem che i hlau ve lo ami?" Ka ti tuarh a! A ţhen suk a.

"I kut hmawr pawn min khawih tawh ngai suh.."

"Oh..Ka la țhen loh chhan che hi i hria em?" Min chawikang in ka hmaizawn ah a rawn ţhen leh suk a!
"Ka itna che hi a reh thei ngai lo ang tih ka sawi kha a dik a lawm.."a nui huk a,Ka inseh ruh ngat ngat a.

"Lehlamah ka hmeichhe hmangaih nen nuam tak in hmangaihna kan chen dun reng thei a..Lehlamah ka nupui ni bawk,Hmeichhe itawm lutuk khawih reng theih ka la nei cheu a.." a lu thing in setana ang chiah mai hian a nui suk a! Setana! Thilsual pakhat tal a tih ruala lawm a nui ţhin..an danglam lo hulhual hi ani tawp mai!

"Lisa hian thik viau che mahse min neih loh a hlau ve tlat a lawm,Keilah in ka thlakhlehna che ala reh fel bawk silo a."Hmui pet sawi zauh chung hian khum ah min nghatthla a "Khawvel hmuh ah ka nupui ila ni bawk a,Tuna a landan phei hi chuan i lang sexy telh telh zel bawk si,ka țhen mai che chu inring hlek suh." Ti hluk pah in kawngkhar lam a pan vut a,Khum bula alarm clock chu ka ban lawk a.

A hnungah ka awm zui a! Rum hawk pah in a rawn inher a! A tukhum ah fuh se ka tih tehreng nen!chhuat laia alarm clock tla keh nuaih a hmuh rual chuan kut a hum ruh ta nghek a! A hnungah nilo a tukhum ah fuh zawk se ni tur!

"Kawlh lutuk suh,I fapa in a tuar phah mai ange!"

Engmah sawi belh tawh lo in a pen chhuak vut a.Kawngkhar lam pan in ka tlan ve vat a,Mahse a pawt khar a,Lock in lock ri ka hriat rual chuan ka theih anga na in kawngkhar chu ka beng zui ta pawp pawp a!

Engtik ah mah an ni ho hi ka ngaidam ngailo ang!..

Ni a ral leh tawh a,ka mihring hmuh chhun chu nurse nu chiah kha ani mai,Ka biak in ka zawhna tak tak bak a chhang ngailo a,Eng vang in nge he pindan ah hian min khung beh tlat tih min zawh ngailoh dan ah Zico te nen inthurual in min enkawl tih ka hrethiam a,Chutih rual in an hmeichhiatpui ngei mai kalhhnan ka ni a,Engah mah ngailo a min enliam thei zel chu mak ka ti a! Nge ni a,An ni mihausa ho hian keini fahrah te hi mihring ang nilo an ran khawi pakhat lek ang in min lo hmu zawk!

Pawn lam a thawm awm hlek ah Zothana emaw,Jayden emaw an nih ring in ka hawi nghal dawrh dawrh zel a,Zothana pawh ka chanchin ngaihven in a buai ngawt ang!

Jayden~a thuamhnaw te chu la chhuak in ka kuah leh vawng vawng ţhin a,Fahrah ka nih vang leh mite khawngaihna ring a nung mai mai ka nih lai khan vawikhat chu Pathian hi ka dem ve tawh a! Tunah pawh he titak a thil mak leh rapthlak ka chunga thleng mek te hmu reng chunga engmah a tih loh vang in ka dem leh bawk a! Engkim ti thei tu ani a,Engkim a hmu vek bawk a! Tinge ka nun hi hetitak a buai hian a siam a,Engkim thleng hi min tih reh sak a tum loh tiin ka inzawt mawlh mawlh reng a!

Zico emaw Lisa emaw hi rawn la bo se,Ka nun an duh dan dan a pawh kual an tumna ațang hian min hruai chhuak se ka duh a! Mahse ka chunga rawng taka an chet lai chu hmuhnawm ti ber tu emaw tih theih tur khawp in a reh hmiah bawk si!

Zan rei tawh hnuah ka mutna kawngkhar a rawn inhawng riai riai a,Pawn lam a eng chuan pindan chhung thim zet chu a rawn chhun eng raih a,Hlauhna leh manganna in min tuam a,Kawngkhar lam chu ka melh a,Hlimthla lianpui hi eng hliah zawng in a lo ding run a! Ka lungphu a rang zual sauh bawk!

Tha khur dar dar in ka ţhu chhuak a,Taksa chu a rawn pen lut a,Bang a switch chu a rawn hmet eng a,Zico rapawm zet a nui suk ka hmuh rual chuan ka hmulthi a ding nghal sung sung thei!

"Zanin chu kan riak dun ang chu ka ti..." tenawm zet a ţhen suk pahin a khabe hmul a tuai zauh a!

Kawngkhar a nem phui rual chuan ka nghilh dup vek!

"Rawn hnai tawh suh.." ka ti tuarh a,Nui huk pahin a kawnghren chu a phelh zui mual mual a,Min sual leh a tum tih ka hriat na chuan hlauhlawp in min siam a,Khum a ţang ka let sawn tur chu rang zet in ka dar tawn tawn ah rawn vuan in min man bet a! Au chhuah enah pawh ka en tawh lo,Ka tha neih ve tlem te te hi amah sual letnan ka la mamawh dawn tih ka inhria a!

"A harsa zawng hian thil kalpui vak zello teh,I pasal ka nih hi,A hma ang bak khan ka khawih dawn chuang lo che.."A ţhensuk a,a mitmeng a tisa chakna lang chhuak te chu thup bo a tum lo reng reng ! "A hma aia nuam pawh khan ka siam thei che ania..I pasal ka ni a,A hma ang chiah khan nawmna pawh ka pe leh thei che.." ka kut a phe zawk a,thinrim tih hriat lutuk in a rum hawk a!

Ka darah man khawm tlat lo se chuan ka beng zawk ang! A hmai chu a tuai zauh a! Thisen a rawn chhuak nghal ţiam ţiam bawk a!

"Zirtirna pek i ngai leh dawn nih hi." Ti hluk pah in khum ah min nawr bet ta nawk a,Ka chungah a rawn ţhut kai hma chu ka ke in ka leng nawk nawk a,A rit bawk si ka che hleithei bawk si lo!

Ka kawr a pawt thler thla duai a,Min nawr behna kut pakhat chu ka vuan bet a,Ka seh sak ta vak a! Ka khaberuh ana chhah mup a,A thlawn dawn maw ka ti tawh zawk!

"Kawlh zet hian khawsa ziah suh,I h*r fa saw a ringruh herhtliah sak turin hun ka hmang rei dawn miah lo ania.."A rawn au tuar a..Jayden!
A mitmeng rapawm zet ah chuan engmah a ti hreh lo ang tih a lang reng,A kut a phe leh fua a,Ka taksa a vawt nghal sung sung a! Ka kawrhnuai hak a rawn nawr tawm chho tawk a! A rawn ţham zui a,Tenawm lutuk hian a rum chhuak zui ta dur dur a! Ka fapa chungah kut a lek ka phallo a! Tih theih ka nei bawk silo.

A rawn kun hniam leh rual chuan mit ka chhing ta sawk a!

Mahse!

Ka taksa chung ațang Zico chu hneh lutuk in a rawn phih thla nawk! A tla thum dawt a! Mittui kar ațang Zothana thinrim inseh ruh ţeuh ka hmuh rual chuan ka ţap chhuak hawk. ka thlaphang hmel a rawn hmun chian chuan na tuar hrep ang mai hian inchung lam hawiin a rum chhuak hrawih bawk.

Vawikhat dang a taksa che awk kawp in thawk ala leh hawk a! Chhuat lai a Zico let hlawm reng chu a melh ngur ta ngur. vawikhatna atan Zothana mitmengah tualthah chakna ka hmu ve ta bawk!