THE SICILIAN (BOOK III-V) By Mario Puzo

[Loma hmar]

CHAPTER 27A

Michaela Corleone, Peter Clemenza leh Don Domenico te chuan hma takah zanriah an ei ho a. Inhmuhna tur hun kha vartian a nih chuan, thimhmul atangin inbuatsaih tan a ngai dawn tlat a ni. An ruahmanna te chu an han ennawn leh a, Don chuan a lo pawmpui a. Thil pakhat, Michael-a chuan silai a keng tur a ni lo tih a lo belh bawk a. Thil a thlen dik loh palh a Michaela chuan carabinieri emaw Security police emaw man a a tawk hlauh a nih pawhin a lakah charge engmah an nei thei lo vang a, him takin America lam a pan thei dawn a ni.

Huanah chuan wine inin thei an ei ho leh a, chutah kal a hun ta. Don Domenico chuan a unaupa chu kuahin a biangah a fawp a. Michaela lam chu hawiin a kuah thawk thawk a, “I pa chu duhsakna sang ber ka hlan e,” a ti a, “I hma lam hun atan ka tawngtai a, duhsakna ka hlan a che. Hun lo la kal zelah min mamawhna i nei a nih chuan min han hrilh zel ang che.”

Lawng thlunna hmunah chuan an chhuk a. Michaela leh Clemenza chu motor Boatah chuan an lawn nghal a, silai keng an hote chu an l awm kim vek tawh a ni. Lawng chu a kal tan ta a, Don Domenico chuan mangtha nan a an a rawn vai lauh lauh a. Michaela leh peter Clemenza chu lawng hnuai pindan lamah an lut thla a, Peter-a chu mu turin a kal ta nghal a, chhun lamah a che chau hle a, vartian a nih hma chuan tuipuiah an awm reng dawn bawk a ni.

An ruahhmanna hmasa kha an thlak a. Africa pana an thlawh chhuahna hmun tura an tih Mazzara del Vallo bula Thlawhna kha inbumna mai atana an tih a ni a. Chu ai chuan africa lamah chuan lawngin an kal zawk dawn a ni. Hei hi Clemenza duh dan a ni a, Lawng hmang chuan a mi ten awng tluanin lawng leh kal kawng chu an veng thei a, mahse thlawhna tumhmun tereuhte chu an veng thei tlat lo a ni; thlawhna chu a derthawngin venhimna lam a hau tak riau a, a thlawh chhuah hma zawng chuan thihna thang a ni thei tlat a ni. Kal chak lam chu inbmkualna ang ema pawimawh a ni lo a, boruakah ai chuan tuipuiah bihruk a awlsam zawk a. Chubakah tuipuiah chuan lawn dangah an pakai mai thei a, boruakah erawh chuan a theih ve tlat lo a ni.

Peter Clemenza chu chu mi nileng chuan an inhmuhna tur hmun castelvatrano kawng lamah chuan mi engemawzat leh car te tirin a buai a. Mazzara del Vallo khaw lamah midang eng emaw zat a tir bawk a. Darkar khat danah zel a tir a, enthlatu ten Villa gate vela an mit la tur tak an hmuh a duh lo a ni. Car te chu hawi zawng inang lo tak takin an chhuak hlawm a. Motor lauch chu Sicily chhim thlang lamah kal kualin vartian thleng a lo nghak ang a, chutah Mazzara del Vallo lamah a kal dawn a ni. Chutah chuan car leh an miten an lo hmuak dawn a ni. Chuta tang chuan Castelvatrano kawng lamah hmar lam panin an kal ang a, chutah Trapani kawngah kalin Pisciotta-an chutah chuan a lo tawk dawn a ni.

Michaela chu mut pindan pakhatah chuan a mu a. Clemenza hnar ri bur bur chu a hria a, chutiang huna tui taka a mu thei chu mak a ti hle. Michaela chuan darkar 24 hnuah chuan Tunis-ah a awm anga, a hnu darkar 12 hnuah a chhungte bulah a awm thei tawh dawn a ni tiin a ngaihtuah a. Kum hnih chhung zet a tlan chhiat hnuah zalenna a nei dawn ta a, Police hnen atanga a tlan chhiat a ngai tawh lo ang a, amah vengtute thu ang zela awm pawh a ngai tawh lo ang. A tih duh ang apiang chu a ti tawh mai dawn a ni. Mahse chu chu tun darkar 36 chhunga a pal tlang chauhin a ni ang. America a thlen ni hmasa berah eng nge a tih ang tih ngaihtuah chung leh, boat kal dulh dulh chuan a awi mu a, mang bo thak khawpin a muhil ta a.

Fra Diavalo chu tho leh ngai tawh lo turin a lo muhil ve mek a ni.

Zing lama Trapani-a Professor Hector Adonis lam tura a kal hma chuan, Stefano Andolini chu Palermo lamah a inkhalh hmasa a. Sicilian security police head, Inspector Velardi nena an inhmuh hun a ni a, Chu mi nia Colonel Luca ruahmanna te dawng turin nidanga an nhmuh thin ang bawka hmu tura kal a ni. Chung thute chu Andolini chuan Pisciotta hnenah a hrilh ang a, ani chuan Guilianno hnenah a lo hrilh chhawng leh dawn a ni.

Zing lam chu a mawi kher mai. Kawng sira buhhmun te chu pangparin a bawhkhat vek a, a vul vhuk bawk a. An inhmuhna atan a la hma deuh avangin kawng sira hmun thianghlim an siamnaah chuan sikret zu turin a chawl khawmuang a, St.Rosalia lim awmnaah chuan tawngtaina a hlan a, a tawngtaina chu a tawi tek tawk hle, mithianghlim hnena a hmelmate laka venghim tura dilna a ni mai. chawlni lo awm hmasa leh berah Father Beniamino hnenah sual puanna neiin sakrament a dawng dawn a ni. A ril a rawn tam ta raih raih a, Ispector Velardi nen an inhmuh zawh hunah Palermo-a restaurant tha bera tukthuan ei a intiam nghal mawl mawlh a.

Inspector Federico Velardi, Sicily rama Security Police head, dawhthei taka a lo nghah chakna rim a hre ta a, Pathianin khawvela a thuneihna a rawn hman beisei tlat a ni a, a lawmman chu a dawng dawn ta a ni. Kum khat dawn zet chu Minister Trezza hnen atangin direct order ruk dawngin, Guilianno-an carabinieri leh a hote a tlan san theih nan a lo tanpui tawh a. Tualthah hmang Stefano Andolini, Fra Diavalo nen an inhmu fo va. Chung vel avang chuan kum khat zet chu Don Croce-a hnuaiah a awm ta a ni.

Velardi chu Italy hmar lam, dan leh sawrkar an ngaihpawimawhna hmun leh vantlang thil an zahna leh mitin ten zirna hmanga eng emaw nih an tumna hmun a tanga lo kal a ni a. Sicily rama a awm chhung chuan a rilruah Sicilian mipui a lian a te hmuhsitna leh huatna thuk tak a intuh nghet hle a ni. Mihausate chuan vantlang zahna hnualsuatin miretheite chu Mafia ho nen tangruala an phiarrukna tenawm takin an hnuaichhiah a. Mafia ho, miretheite humtu nia insawi chuan miretheite hnuaichhiah turin mihausate an pi bawk si. Mirethei te lah an chapo em em a, dam chhung lungin tang dawn pawh ni se tualthah chu ropuinaah an ngai tlat bawk.

Mahse tunah chuan thil a danglam dawn ta a ni. Atawpah chuan Inspector kut phuarna chu phelh a ni tain a hote pawh chhuah zalen an ni ta. Mipuite chuan a Security Police leh carabinieri mi tawih ho danglamna chu an hmu leh thei dawn ta a ni.

Velardi mak tih tur tak maiin, Minister Trezza chuan order pe-in red-border pass ministerin a pek zawng zawng, kawng danna paltlangna leh silai ken phalna pass neitu zawng zawng chu hrena tan tir tur an ni ta a. chung phalna lehkha a pek te chu lakkhawm tur a ni a, a bikin Pisciotta leh Andolini te chu.

Velardi chu hnathawk turin a inbuatsaih ta a. Andolini chuan a room hma zawkah a lo nghak reng tawh a. Vawiinah chuan a rin loh tak a tawng dawn a ni. Velardi chuan Captain leh sergeant pali a ko ta a. buaina tawng tura inpeih turin a hrilh a. Amah chuan nidanga office a kal dawna a tih ngai loh takin a kawngah pistol a pai bawk a. Tichuan Andolini chu a hruai luh tir ta a.

Stefano Andolini chuan a sam sen thur chu mam thanin a khuih a. Suit dum a ruka tial leh kawr var a ha a, Nectie rawng thim lam a inbel bawk a. Chubakah Security police head tlawh tur a nih chuan zahna lan tir nana inchei a ngai ve deuh a ni. Ralthuam a pai lova, headquarters luh dawnin uluk taka dap a ni thin tih a hre tawh tlat a ni. Velardi dawhkan hmaah chuan dan pangngaia thut phalna a nghak mek a. Phalna chu pek a ni ta lem lo a, a ding ta reng a, amahah rinhlelhna a rawn lut tan ta a ni.

“I Special pass min entir rawh le,” Inspector chuan a ti a

Andolini chu che loin a ding a. Chu ngenna chu engti hawi zawng nge tih a teh ru neuh neuh a, “Ka keng lo a ni,” tiin dawt a sawi a, “Chubakah thian tlawh tura lo kal ka ni hrim hrim a.” heta ‘thian’ tih hi uar deuh takin a sawi a.

Chu chuan Velardi chu a ti thinur kher mai. Dawhkan hual chuan a kal chhuak a, Andolini hmachhawn chuan a ding a, “Ka thian i ni ngai reng reng lo. Nang ang vawk nena chhang ei ho tur khan thupek ka hmuh vang chauh a ni. Uluk takin lo ngaithla rawh. Man i ni e, thuleh awm hma chu taninah khung i ni ang, leihnuai pindanah cassetta (innghaisakna thingrem) ka nei bawk tih hria ang che. Mahse naktuk zingah nang nen inbiakna kan nei ang a, i fin viau chuan i na vak lo ang.”

A tukah chuan Velardi chuan Minister Trezza hnen atangin phone call a dawng a, chiang zawkin Don Croce hnen atangin a dawng leh bawk a ni. Andolini chu a tanna atang chuan Velardi office-ah chuan an rawn hruai lut a.

rin loh taka man a niha zan lama tanina khawhar taka a awma a inngaihtuahna chuan Andolini chu mihlauhawm takah a siam ta a ni. An luh chuan Velardi chu a roomah chuan a lo vei tuak nghat nghat a, a mitmeng chu a de sawr a, a thinur tih a hriat hle. Stefano Andolini chu vur ang maiin a vawt raih a, engkim a hmu a ni- Captain leh sergeant palite inring tak te, Valerdi kawnga pistolte chu. Inspector chuan a haw hle tih a hria, amah pawhin inspector a huatna chu a nep bik chuang awm lo ve. Velardi chu amah vengtute a kalbo tir theih chuan, amah leh amah a inthah hmain thahna hun a nei thei maithei a ni. “Ka tawng chhuak ang, mahse heng Sbirri te hmaah ni lo hian,” a ti a, Sbirri awmzia chu Security Police te koh elna leh hmuhsitna tawngkam tlanglawn a ni a.

Velardi chuan police palite chu chhuak turin thu a pe a, mahse officer chu awm turin a mitmei thung a. A silai phawi mai theia inring turin a hrilh bawk a ni. Chutah Andolini lam chu a hawi ta a.

“Guilianno ka man theih na atana thil pawimawh hriat ka duh a ni,” a ti a, “Amah leh Pisciotta nena in inhmuh hnuhnun ber hun kha.”

Stefano chu a nui huk huk a, a hmel tihbaiawm tak chu a nuih zawng chuan a inpawtsawi nasa hle.

Fra Diavolo tia an ko chu a mak vak lo e, tiin velardi chuan a ngaihtuah a. Mi hlauhawm tak chu a ni takzet a ni. A hmaa thil lo thleng tur rin rilrukna pawh a nei hauh lo.

Velardi chuan dam thlapin, “Ka zawhna chu chhang rawh chuti a nih loh chuan cassetta-ah ka pawt fan ngei ang che.” a ti a.

Andolini chuan hmusitzetin, “Phatsantu tenawm pa, Minister Trezza leh Don Croce te venhimna hnuaia awm ka nih hi. Min chhuah hunah chuan, i Sbirri-te lung ka phawrh chhuak ngei ang.” a ti a.

Velardi chu hma lamah penin Andolini hmaiah chuan vawi hnih a beng a, a vawikhatna chu a kutphahin a ni a, a vawihnihna chu a kut hnung lamin. Andolini ka atanga thisen rawn chhuak leh a mitmenga thinurna nasa tak awm chu a hmu thei a. Inngaihtuah muk zetin a thutnaa kir leh turin a hawisan a.

Chutihlai tak chuan, nun khaw chhuah tumna chu a thinurnain a hliahkhuh avangin, Andolini chuan Inspector kawnga pistol chu chuhin kah a tum a, mahse chutihlai vek chuan police officer khan a pistol phawiin vawi li lai Andolini taksaah chuan a kap a. Andolini chuan a sir fea bang chu va deng dawtin chhuatah chuan a tla thla tawp a. A kawr var tak chu thisenin a chiah sen nguai a, Velardi chuan chu chu a sam rawng nen inhmeh hlein a hria. Police dang an lo tlan lh mek lai chuan kunin Andolini kut atang chuan pistol chu a la a. Captain hnenah chuan a inrin reng avangin a han fak a. Chutah Captain hmuh lai ngei chuan Andolini an rawn hruai luh hmaa a mu a tih ruah a pistol chu a mu han thun khat a. Andolini thah theihnana bumna a hman ropui zet chu hre lo va Security Head fimkhur lo zet nunna chhan anga Captain chu a inngaih a duh lo a ni.

Chutah a mite hnenah chuan ruang chu dap turin thu a pe a. A rin ang ngeiin red-border pass chu ID- sicilian zawng zawngin an khawi lo kalna hmuna ken an ngaih vek- zingah chuan a hmu ta a. Amah ngeiin Minister Trezza kutah a hlan ang a, a vannei viau a nih chuan Pisciotta-a pass pawh chu a tel maithei a ni.