STORYFB.COM

DEAR JOHN






CHAPTER 3




“Felfel vawiin chu ka chawl dâwna, kan picnic dâwn em ni? I u Cindy lah a hman silo" u John-an a rawn tihchuan ka en ha mai, ni e u Cindy chu a chhuak leh daih tawh. U John-a nen inhau fo mahse a chhuak lui ṭang ṭang zêl, mak ka ti ṭhin. Ka biak tam loh phah viau, mipa dang a kawp tih ka hriat phei kha chuan u John-a hi ka khawngaih tlat, a nupui ngeiin a bum a nia.







“Um...Puipuii pawh in len chhuah a châk ang, ka va insiam lawk ange" tiin ka lo chhâng vata, “Tuichen na tur kha keng tel la, i cheng ve duh ang" a tihchuan ka phur ngei mai, tho vatin ka room lam chu ka pana, a niin Puipuii chu a lo pawm thunga. Ka roomah chuan lutin tui chenna tur chi chu la in inthlâkna tur nen ka kenga, ka bag ah chuan ka khung mawlh mawlh bawk.







Ka chhuah rual chuan Puipuii hnek tur bakah a inthlakna tur chu ka lâksak bawka, ani pawh room lamah lutin reiloteah a rawn chhuak leh thuaia, “Kal ang ule," a tih chuan Puipuii pawm chung chuan ka zui chhuaka, a niin kan bag chu a khai thung. Step-ah chuan chhovin a Bolero chu a la chhuaka, kan zâwna a rawn din rual chuan Puipuii chu ṭhut luh pui vatin ka sam chu ka ṭawn mawlh mawlha.







“Khawiah nge kan kal ang u John" ka tihchuan a nui suka, a hmel chu ka en reng. A hmelṭhat tehlul nen u Cindy khan engtin nge a phatsan theih zawk le tihchu ka ngaihtuah neuh neuha, chutah ka lam a rawn hawi thut avang chuan phu zawkin hmalam chu ka en daiha.







“Ka ennawm viau em ni?" a rawn tihchuan a lam hawi tawh lo mah ila ka zak lutuk chu ka sa up up thei mai “Chutiang pawh a nilo, khawiah chuan nge kan kal dâwn" ka tihleh chuan a nui haka “Elswhere picnic spot ah aw," tiin a tlân chhuak zuia.







“In khaw lamah teh ṭhian ho in in chhuak ngai em?" a rawn tihchuan ka lu ka thing nar nara “Sunday tlai vêl hian inkhawm bânah kan lêng ve ṭhina, chuan Christmas behbawm hi a ni leh deuh ber mai, i hriat angin kan khuaah chuan kut hnathawk mi vek kan nia, nitin kan feha. Chumi a nih loh leh hlo thlawh âwl apiangin thing tuah tur kan phur leha, hunawl a awm hman em em lo, bakah keimah tak phei chu ka vak chhuak vak lo, ka nu leh ka unaute nen kan awm deuh tawpa a nimai" tiin ka nui haka.








“Hna i thawk nasa tih i hmel leh taksa aṭang a hriat a lawm" a tihchuan ka ngawi daiha, a thusawi danah chuan ka vun vel hi ani ngei ang. Ni e, ka vun hi an ni lam angin a ngo in a no ve lo va, a uk kharh bawk. Ka kut lah ka hnathawh nan a thapa, a no nalh ve hek lo, chu chu sawi a tum ni berin ka hria.







“Nia kan ei hmuh ve nan nitin nisa ah kan awm miau a lawm, mahse ka vun hi ka zahpui lo, mi angin a ngo in a no nalh ve lo pawh a nimaithei. Mahse ka zahpui ngai lovang" ka tihchuan a rawn nui haka “I thinrim em ni? Ka hmuhsit vang che a nilo, i ngaihsânawm a lawm, tunangah chuan kan nula te hian hmai hnawih mai duhtawk lovin taksa mawina tur in thil chi hrang hrang an in hnawiha, an ei bawka. An nalh reng theih nan an inseng nasa hle a sin, nang erawh chutiang i ngaihtuah vak hmel loh, a ni lawm ni?" tiin min rawn melh leh zawka.









“Tûnang lai te chuan mipa pawh nise nalh loh hlau tak vek an ni tawh maia, nang erawh chu i dang ka tihna mai a nia. Kan inah i rawn awm a chin hi len emaw han inchei vak hi i nei lova" a rawn tih tâkah chuan ka thaw huai mai, ni e tunangah chuan mipa pawhin ngona te eiin nalh duhin an in enkawl tawh miaua, a ngaihdan chu a dik tho mai.







Kei erawh ka vun hi eng han hnawih hi ka nei lem lo, ka inhnawih chhun pawh thlasikah Lotion a ni leh tawp mai. Kan retheih em avang khan inchei lam pawh nise ka ngaihsak vak ngailo a, kha kha ngaiah ka neih ni berin ka hria, pawi pawh ka ti chuang lo. Ka vun leh hmêl avanga min iai dawn a nihchuan tu mipa mah ngaihven ka tum bik der lo.







“Aaa inchei ve vak hi ka thiamlo. Kan khuaah pawh nuthlawi i ang min ti mai zel alâwm" tiin ka nui hak haka, a ni pawh a rawn nui ve hawk hawk mai. Ei tur leiin kan chawl zawka, Puipuii chuan ice cream an zawrh chu a lo ngên ve bawk nen u John-a chuan a lei ve a, a zuar tunu lahin nupa emaw min la tizui, huatah pawh a kal theilo, kan nui hak haka.







Kan tlan chhuah leh hnu chuan u John-a chuan fiamthu te thawhin kan nui dûn a, a tira nelawm loh lutuk anga ka lo ngai kha hetia an ina awm rei tâkah chuan ka ngaihdan a dik loh zia ka hre ve zêl bawk, fiamthu duh tak leh zaidam tak a ni a. A dawhthei hle bawk, kei ngei pawh an awm pui ai mahin an chhungkaw zinga mi ang chiaha min enna te hian min ngaihsan tîr zual.




AN PICNIC NA TUR HI KA LA KAL BIK LOVA, GOOGLE AṬANGIN A AWMDAN KA HMUH ANG IN KA ZIAK TAWP DAWN AW

A hmun kan thlen rual chuan Puipuii pawm chhuakin ka kal puia, kan hnungah kan bag nen min rawn zui ve bawk. Kal an tam vak lo a nih hmel, a kawng vela pangpar an phun te chu enin ka nui var vara, hetiang hmunah ka kal kal ngai loh vang nge ka tan chuan thil thar vek a ni bawk.








Hawikualin a hmun hma chu nuam ka ti hle bawk, pool kan thlen chuan a sira ṭhut mutna an siamah chuan Puipuii chu ṭhutpuiin ka lawm paha, a ni pawhin kan kalna chu nuam a tinge a rak ve chul mai “Va inthlak la kan cheng ho dâwn a nia" a tihchuan naute chu pe in a sira inah chuan ka lut zuia, a lo awm te hnênah chuan inthlâkna tur chu ka zawt zuia, min lo kawhhmuh nghal vat bawk.








Ka chhuah leh chuan an pafa chuan an lo chêng der tawh. Puipuii chuan ka rin ai tui angam daih, an bula ka va kal rualin u John-a chuan min lo en chata, tshirt leh kekawrbul nên ka awm tlawnga. A aia bul chu ka ha ngam ṭhak lo, hmeichhe awm ve ṭhenkhat chu an no in ka lakah chuan nalh tak an ni, a zam awm rum rum mai.







Chutia in kil tawih zeta ka din lai chuan “Lo lût ve la" u John-an a rawn tih takah chuan muangchangin tui chhungah chuan ka luta, “I hleuh thiam em?" a tihchuan ka lu ka thing nawk nawk mai, a thuk lo hlauha chu ti nilose ka lut ngam teuhlo. “I va mak ve" tiin a nui hawka, a beisei ka anglo lutuk chu a nuih a za tih hriat reng, ni e hetiang lam thil party leh picnic tih vel hi ka ti ve ngai hauh lo. Tuichen pawh nise ka zir ngai hek lo.









“A thûk chuang lo a, bakah hleuh thiam kher angai hleinem. Tihian ka hleuh a nimai" ka tihchuan a bu nghata, Puipuii chu a tlak loh nan swimming tube tetakte ama leng tawkah chuan kan dah bawka, a ni pawh hlauh lam ai mahin a nuam ti chu a rak nasa viau mai.







Puipuii hlim rak vel nui var vara ka lo en lai chuan tui chuan min rawn theh thuta, ka phu nghal zawk chu u John-a chuan min rawn nuih haka, alam hawiin tui chu ka ben per ve a, min rawn theh leh ngat chu tilêt ve in tui a infiam chuan kan rak chûl mai, nui uar uarin tuichhungah chuan ka tlan chhia a, a sawt lo em em mai lehnghâl.






Chutah min rawn man thutin min chawikang nawlh a, ka rak nghal chûl bawk. Kan pahniha nui hawk hawkin min dahthlak rual chuan ka hmaia tui kai chu ka tuai faia,nui chunga ka hawi u John-a chuan min lo en reng mai. A mitmeng chu a thûk raiha, ka khawng nghal awt mai, a nilah chuan ka hmaifang vêl chu ngun lutukin a en reng bawk si, ka khur dar dar mai.







Lalpa leh! Ka ngaihtuahna a thil rawn lut chu duh lo lutukin a ruk chuan ka in hau mawlh mawlha, u John-a lah in thawmhnaw a ha lova, a awm pharh darh leh a abs te chu an lang vek bawk. Kei chang nilo chulaia hmeichhe awmte chuan an en duh zia lah ka hailo, mi pasal tihchu in hrilh mawlh mawlh in ka aw ka thian kharha.








“Ka lo va chhuak tawh ange, Puipuii pawhin vawt a ti tawh ang" tiin lai zet chuan ka kalsawna, engvanga ngaihtuahna ṭhalo lutuk kha nei nge ka nih le. Ka va han mâwl tak, u John-a chuan min en zui reng tih ka hre thei, Puipuii chu pawmin tui pawn lamah chuan ka chhuahpuia, bag chu la in ahma a ka inthlâkna room chu ka panpuia.







“Ama" a mi koh dân avang chuan ka hamhaihin mak ti zetin ka ena, a nilahin min lo melh ve kar bawk. “Puipui khatianga min koh loh tur aw, tirawh le inthlak ang" tiin roomah chuan ka luhpuia, a mi koh dan u Cindy-in hria se a lawm hauh lovang. Inthlak mawlh mawlh in Puipuii pawh chu a sam fel hru hulin ka thlak zui thuaia.








A hnute pek pah chuan pâwnlamah chuan ka chhuah pui leha, u John-a pawh tuichhungah chuan a lo hleuh kual vela, pool sira ṭhutthlengah chuan ṭhu in mi infiam leh chekual vel chu ka thlir renga, “Haw i duh tawh em?" u Johna chu ka hmaah tak a rawn dinga, engtik lai khân nge a rawn chhuah hman ni?








“Ka hrelo, i thu thu animai" tih ringawt in ka lo chhânga. Keiin thuneihna nei hek lo, ka duh duh sawi chi ka nilo miaua, “A nih chuan kan haw tawh mai dâwn em ni? Haw pahin kan bazar dâwn ania" a tihchuan ka hnial lêm lo. Insiam hlawmin kan haw zuia, thawmhnaw dawra min luhpui chuan mak ka ti ngei mai.








A thawmhnaw tur lei a tum ania'ng. Puipuii pawm chung chuan ngawi rengin ka zui ve zela, “Le! I duh thlang rawh, ka lei ang che" a rawn tihchuan phawk zet chuan ka ena, tunah khan thawmhnaw min lei tur thu a sawi em ni? Awihlo zeta ka en chuan ka luah a rawn chul zauha “Nau i awm hahin i duat bawk nen i phu a lawm, thlang la " a rawn tih leh sup takah chuan ka lu ka thing nawk nawka.








“Aih angailo, ka lawm lutuk thawmhnaw chu ka lei ve thei a lawm. A ngai reng reng lo" tiin ka lo hnial ve a “Felfel thlang rawh, ka lei duh che a lawm. Hah takin hna i thawka, i chanchin ka hre vek lo nangin hei tal chu thilpekah min ngaihsak la thlang rawh" a tileha, dik tak chuan kan awmna dawr chu thawmhnaw to tak tak vek zawrhna a ni tih ka hria.








Bank Manager meuh chuan sum a ngah ang tihchu ka hria a, mahse ka inthlahrung lo theilo. Ka ngawih reng avang nge amah chuan a duh chu a thlang ta hmiaha, ka taksa ah chuan rawn teh zêlin panga vel lai a lak hnu chuan ka lo dang lui ta tlata. Alak sa ho zawng chu min lei lui ta hmiah mai, hnial pawhin awmzia a nei bawk silo. A nghaktuten an rawn pack tâkah chuan lak loh theih hek loh, a mah bawk chuan khaiin a chhuak zuia.









A hnungah chuan zuiin inthlahrung tak chuan ka awma, Puipuii a muhil bawk nen a reh tlawk tlawk mai. “U John a ngai kher lo asin, a to hlawm si va dah lêt rawh" ka tihchuan a ner saka “Ka duh a ka lei che a lawm, i hnathawh nasat ngaihtuah chuan heiai ṭha pawh i la phu,haw phawt ang u le" tiin ka thusawi ngai pawimawh duh tawhlo chuan a tlanchhuak zuia, engmah ka sawi tawh biklo.









Dik tak chuan ka hlawh hian thawmhnaw emaw ka la lei lo hrim hrima, ka mamawh leina tur tlem dahin a dang ka nute ka thawn vek a nih kha. Chutia u John-an min lei chu lâwm viau mahila ka inthlahrung lo theilo, a ni lahin min be tawh lo in ngawi reng chuan Motor chu a khalh mawp mawpa.








In kan thlen chuan u Cindy ala haw miah lo, ka roomah chuan ka thawmhnaw thar nen chuan lûtin Puipuii chu khumah ka muta, rawngbawl tur chuan ka chhuak nghal zat bawk. U John-a pawh chu choka lamah rawn awm ve in rawngbâwl chu min lo puia, ka rinai rawngbawl a la hnensawh zui lehnghâl.







Mipa mak tak chu a tling ve in ka hria, ka rin loh dân hlir mizia a nei ka timai, “Ka lawm e thawmhnaw avang khan" tiin ka chawhmeh chan lai chu ka chan zawm mawlh mawlha, a ni erawh chuan min chhâng lem lo thung.




ZAWMNA



“Aiah!" ka chawhmeh channa chuan ka kut ka zai tel palha, a thip nghal zawk mai. U John-a chu rang zetin ka bulah a rawn kala, ka kut chu la kangin a hmuama, mak tizetin ka lo en thung. Ka hamhaih lutuk chuan enge sawi tûr pawh ka hrelo, engvanga tianga rawn che thut nge a nih ang.







“Ka ṭha a lawm" ka kut chu la sawnin tui chu herh haw in ka khawh tira, min lo en reng mai. “A na viau em lo awm mai rawh, ka lo chan mai ange" tiin min kaiin min kalsawn puia, ṭhutthlengah chuan min ṭhut tirin a kalsawn a, a rawn let leh chuan bandaid rawn kengin, ka hmaah chuan a ṭhingṭhi a, ka kut chu dim tak chuan tuamin a chhem pah hauh hauh bawk.







A hmel chu ngun takin ka lo en renga, a hmelṭha takzet. Hetiang rilru mi pasal chunga ka pu hi ka duh miah lo, thawk la ham hamin ka hawisana “A tâwk, ana lutuk hleinem. Ka bâwl zawm thei mai ang" tiin ka tho chhuaka, a ni pawh chu a rawn ding chhuak ruai ruaia, a san zia ka hriatbelh leh phah. A awm chen lek ka nih chu!







Min en reng anga ka hriat avang chuan dâk chhuakin ka en chho ha a, min lo en reng tak tak. Chutah rawn kun hniam thutin ka hmuiah chuan a rawn fâwp ta siah mai, ka hamhaih bakah ka lung chu phu dup dupin chetsawn maina chang pawh ka hrelo, a kut chuan min tawk miah silo in a hmui lam chu duhthawh zet hian a chet tîr tawn tawna, ka mit ka khap fak fak mai.








Hetiang lamah hian experience ka la neilo nangin, a mi fawh-na chuan engtin emaw min awm tir tih erawh ka hrechiang viau thung. In ngaihtuah harh tum tak chuan ka namsawna, “U John eng thil nge i tih kha? Khatiang a diklo, nilo nang chu mi pasal i nih hi" tiin kalsawn mai ka tuma, ka bânah chuan a rawn vuan leh chat mai.







Ka phu zuk lehnghâl, ka hlauthâwng nge pawh ka hrelo ka lung phu chu a rang zual sauha “Ka tihpalh, ka ngaihtuahna a buai deuha" a tihchuan ka bu nghata, ni e an nupa boruak nen a âwm ve tho. Eng mah sawi tawh lo chuan choka lamah bawk chuan ka phei san leha, mahse ka ngaihtuahnaah eng dang mah a awm theilo, a mi fawh-na te chu ka hmui chu a la lum ham ham ten ka hria.








Lu thing nawk nawkin in thin harh ka tuma, mahse a har lutuk tlat, ka hmui chu ka khawih leh ṭhin. Hetiang feelings hi neih ka duhlo takzet, mahse ka rilru leh thinlung hi ka thunun thei silo, mahse engmah tilang lo va he rilru hi paih bo ka tum tur a ni. A ni chu mî pa, mi pasal, nupui fanau nei tawh a ni a, an chhûngkua tichhia a ti keh darh tu nih ka duhlo.






Miin min rêl dan tur nen lam ka ngaihtuah ngam lo zawk, thawk la ham hamin rawng chu ka bâwl zawm mawlh mawlha, u John-a khan eng rilru pu a min fawp nge maw anih le?