STORYFB.COM

KA LALPA





CHAPTER 3





“I va rawn thleng har em em ve?" a rawn tih nghal hluk avang chuan sana chu ka melh zauha, nidangah pawh heiai tlaiah ka kal pawhin ka tlai ngai tawp silo. Kal hma ve pawhin a lo phun peih tho chu ka ngei lek lek mai “A hun chiah zâwk a lawm, hna ṭan hun pawh ala nilo a, i kal hma vâng maia" tihmakin ka chairah chuan ka ṭhu thla a.







“Min hnial ziah suh" ti hlukin ka bulah chuan a rawn kal pheia, ka lo en kar mai. A bula ka awm tawh hi chuan hlauthâwng ni chiah silo hian ka lung hi a phu dawt dawt reng mai chu a nih hi “Enge i tih dâwn? Rawn .....rawn kal hnai tawh suh" tiin thawh chhuah ka tuma, chuveleh rang zet a min rawn man in ka kawngah chuan a kuah rana.







“Nizan kha chuan ka hming lam chungin i au chhuak a nih kha tiraw?" tiin ka biang vel chu a rawn nul thuak thuaka, midang an rawn luh ka hlau bawk nen ka namsawn vata “Khatiang sawi ziah suh, sawi nawn kher pawh a ngailo. Tûn aṭang chuan thlen nawn tîr ka tum tawh lo, hnathawk turin helaiah hian ka rawn kala, nang nena infiam nan hun ka neilo" tiin dawhkan bawh chuan ka ṭhua.








“Ka bialnu i ni tawh ka tih kha, min hnial reng lo teh. Engvanga ngeiawm em em nge maw i nih ni" tiin dawhkan chu a rawn beng ri thlawpa, a va han thin chhe tak. Doctor bula in entir chi chu anih hi, a mâwl deuh nge maw ni? Mahse mâwl chu nise hetiang dinhmun hi a thleng lo ang, a fing lutuk zawk tihna.







Huiham! Engpawh chu nise hnaih loh hi ka himna tur a nih hi “Bialpa neih ka tumlo, bâkah nang ngat phei chu ka duhzâwng pawh i nilo, min rawn tibuai tawh lo teh. Hna thawk tawh ang, hlawh ka nei ve si a hna ka thawh ṭhat loh chuan nangmah tho in a nia mi sawisêl dâwn ni" tiin ka kut ṭang chu ka thliak ri khep khepa.








Lungawi lo zeta a kalsawn chu melh zawkin ka thaw huai thung, a chhelo ropui sia. Ka hnar theih loh ka hlau, a hausa bawk nen hnaih ka duhlo, kan inthlau bawk si. Bakah mipa hmelṭha leh hausa deuh chu an lerh duh tih ka hre ve tlat, bialnu hausa ve tho an neih loh phei chuan an in duhtawk thiam bawk si.







Mipa hmelṭha leh chhelo deuh hi han chik mah ila, an hmelhriatte lakah a nih loh chuan biak leh kawm an har faka, bâkah an hmelṭha tih inhria in an chapo ar zel mai a ni. Chuvang chuan Lalthanpuia pawh hi hnaih loh law law a ṭha zawk, bakah ka taksa a duh vâng mai mai bak a ni lo ang.






Keiai a ṭha a hmu ṭeuh dawna, engvângin nge chung ho hnawla kei mi ṭhing lutuk leh sam bawr chhawr zet hi min thlan tehlul ang, reilote nawmna chenpui atân bak min ti lova nge.





Hna chu ngawi rengin kan khawih duna, a chângin sum la chhuak duh an awmin min chhuahsan leh ṭhin bawka. A buai tâk avâng chuan inbiakna hun pawh kan nei ta vak lo va, ka thaw huai mai. A lerh ve bawk sia, biak tam vak ka duhlo.







“Miriam chhun chaw kan ei tawh dâwn em ni? I hman em?" ka ṭhiannu chuan min rawn texta, boss room-a ka awm tâk avang hian min au lovin a rawn text mai zela, ni e, rawn lût ringawt dawn se pakhat pa hian engtin nge a tih ang tih pawh hriat a ni silo.






Ka hna chu a laklawh lem lo bawk a, sana ka en chuan chhun chaw ei alo hun ve tawh bawk nen ka pawi ti lemlo “Sir, lunch ei turin ka kal tawh dâwn a sin, ka ṭhiannu in min lo nghâk tawh a" tiin ka va be hmasa a.



(COMMENT MIN TAIMAK SAK ULA AW)


Mi pawh en lem lo chuan “Kan ei rual dâwn a nia, tikhan lo awm rawh" a ti leh tawh. Tinge tinge, naa ka ning lutuk, mi thlah fal hi a hlau ni berin ka hria “A ngailo, restaurant thil i ei ngaihloh kha. Bâkah tiffin i pai a ni lo'm ni? Kan lo va kal mai ang" ti a kal luih ka tum chu “Ding rawh" a rawn tinghal hrawka.





Ka ding chiang khawp mai, a aw a khauh fer fur bawka kal luih ngam chi pawh a nilo. “Ka hnuaia thawk i ni a, ka thu chu i pawm mai tur a ni. Kan eidun ang ka ti a ni lo'm ni?" tiin a rawn tho chhuaka, ka chhâng ngam tawh lo, amah chu nghakin ka ding ngawi kar mai.





“Kal ang" tiin a chhuak zuia, a hnungah chuan ka zui ve zel ringawt. A hnunglam aṭanga melh bak tih theih ka neilo, biak hrep ka chak a, mahse kan pu a ni bawk si; Dodoin min lo hmuh chuan a hmui phunin thil awmzia min lo zawta “Kan bulah ei ve a tum a nih hi, kal phawt ang" a bengbulah chuan ti sa sain Thanpuia chu kan zui vata.







“Tinge i rawn hruai? Awi kan ei ṭha ngam dâwn em ni?" ka ṭhiannu lah chu a lâwm lo nasa mai, lâwmna chi ni nghal lo chuan ni e, hepa bula awm hi chu a nuam lo ve thlawt alâwm. “A mahin a duh tlat sia lawm, kal ve zel phawt ang" tiin a hnung lam aṭang chuan kan in be pah char chara.








“A duh che a ni hrim hrim, chu lo nise nidangah pawh a office ah a ei ziah kha. In ni em ni?" a tihchuan ka lu ka thing nghal nawk nawka, engvanga tûn ataka kan bula ei duh tlat nge a nih tih hi keipawhin ka hrelo.





“Sawi suh, kan nilo nasa lutuk, saw a lût tawh zui vat ang" tiin Thanpuia chu kan um hlawk hlawka, a ngal a chak bawk si. Engtin nge alo va thlen hman ni, a leh lamah chuan ka ṭhiannu nen kan in biak theih phah a, a ṭha zawk. A ni a awm ve run chuan a lo hre palh ang tih pawh a hlauhawm.






A thinchhe ve sia, a chungchang kan sawi tih hria se min pawt phar dawr dawr duh ang chu.





“Ehe! Pu Thanpui i lo châwl ve dâwn em ni?" dawr neitupa chuan a lo chhâwn vata, mi pawimawh chin hi chu an hriat ṭhin “A nih hi, ṭhutna min lo kawh hmuh dâwn em ni? An ni pahnih tel hian" tiin keichu min rawn ena, ka kutah vuanin alamah min pawt hnai bawk.








Mi karah a mawilo tih ka hriat avangin ka awmsawn duh lem lo, engvanga hetianga awm tlat nge maw a nih le? Ka ṭhiannu lah chuan min en haw lehnghala, a bulah kan in ngaihzâwn loh thu ka sawi tawh bawk nen min rinhlelh loh hrâm ka beisei.







“Helamah hian lo kal rawh u, enge in ei duh ang?" tiin min zâwt zuia “Sawhchiar kha a nimai keichu" ka lo tihchuan an ni pahnih pawh chuan ka chah ang chu an chah ve nghala. Hmm, ka ei ang ei kher a ngai emaw ni, engmah sawi tawh lem lo chuan ṭhutna tur min kawh hmuhah chuan ṭhu thla in châwl ve dangte inkawm khawm chu ka en mai maia.








A ṭhen chu in ngaizawng te an nih hmel, restaurant chawl ve ziah mah ila ei tur vak ka hre ngailo, chu ai chuan in lama mahni duhzâwng tak siam hi ka duh daih zawk. A hlawk zawk bawk, thil tlem te te to deuh deuha leichu a hlawk lo ve em a ni, an siam tui lêm loh phei chuan sum a uiawm ka ti.







“Intur induh tel em?" Thanpuia chuan min en chungin a rawn tileha, mi kâra mi a biak dânah chuan mi a care ve hmêl viau mai. Keilahin hnaih mai mai ka tum der silo, ka lu chu bu nghatin phone chu ka en san daiha.







“Bia la, keichu engmah ka sawi ve ngam miah lo ania. Nangmahin be zêl rawh, keichuan ka be ngam lo" Dodoi chu ka bengbulah a rawn phun sar sar mai, engvanga ṭawng ri ngam miah lo nge maw a nih ni? Ka tilui hrep zawk dâwn emaw ni.







Thanpuia chu ka en renga, a ṭhu fel thlupa, a phone enin thil a type mual mual mai. Biak tur te hi a ngah awm ka ti, englai pawh hian thil hi a type mual mual reng mai “Ka mut a chhuak lutuk," tiin ka ham zui bai baia, chutih laia a rawn nui suk pawh ka hmu thei.







Kan thil order chu an rawn chhawp zung zunga “A duat vêl che e, ka thik e a, keichu bialpa pawh ka la nei thei lo chu ania" henu lah hi, mi hmeh bel phet a tum reng mai.






Chhâng duh lo chuan sawhchiar chu ka ei nghal zung zunga, intur an rawn chhawp chu ka lo tem pah bawk. An ni pahnih erawh an ei muang dûn viau, an ril a ṭam lo emaw ni? Dodoi chu a zâm vang tih ka hre mai.







“Ei zung zung ila lêt phei vat ang, helaia awm reng chu a ninawm" tiin ka ei zawm mawlh mawlha, chutia ka tih tâkah chuan an ni pahnih pawh an ei chak dûn ta phian mai. A rûk chuan ka nuih duna, an va han hlau awm ve mawle, phone ringawt kha an en ka duh lo miau a lawm.









“Ka kham ta" tiin intur zâwk an rawn chhawp chu ka in zui khalh khalha “I duh belh em?" Thanpuian a rawn tihchuan ka lu ka lo thing nar nar thung, chhûnah hi chuan thil ka ei thei vak lo. Thei thur hi ka heh em em ringawt.







Kan ei zawh chuan ei man pek kan tum chu Thanpuia chuan phallo in amahin a pe veka, ka ṭhiannu lahin a lâwm thu leh kei min kawm chu a vanneih thu a lo sawi ve sek lehnghâl. Kan nilo ka tih pawhin a awih duh heklo “In mu dun hial tawha, in inkarah engmah awm lo ang chuan min hrilh duh lo mai rawh" ti ve tlat, a buaithlak a nih ber hi.







Engmah ka sawifiah peih tawh lo, a awih dâwn chuang lo bawka. “Awi saw theihai ka ei chak lutuk" tiin kawngsira an theihai zai lêp sa pitar pakhatin a lo zawrh chu ka pan dawna, Thanpuia chuan min lo dang leh tlat tawh “A tenawm, hrisel pawh a hrisel lo ang" a tihchuan ka melh ngheka.







“A tenawm bawk lo, min thlah teh. Ka ei châk ania, keiin ka ten hleinem" tiin ka kut chu thingthla in 100 man chuan ka la sa a, chi thak nen a awmsa bawka ka ei nghal char char, thei thur lam hi chu ka ngaina ve thlawt alâwm.




ZAWMNA...





“Kha ei ve rawh u" ka ṭhiannu hi chuan a ngaina lo tih ka hre phawt, thur lam hi ei ve zeuh zeuh mahse a nazawng chuan a ei duh hauh lo, rin ang ngeiin Dodoi chuan a lu a lo thing nur nur mai. Nui hakin ka ei hmarh hmarha.








“Boss, kha ei ve rawh" Thanpuia hmui bulah chuan ka daha, alo tum hmuk mai “Theithur ei rual niin min hmu em ni?" a rawn ti hluk mai, em em hiana. “Theithur eiah kum bi thliah a awm em ni? I mak kha a nih chu in duh loh leh ka ei vek thei" tiin ka keih tau hmawk hmawka.






Bank lama kan lêt leh chuan min lo en hlawm ha ha mai, mak an ti pawh a niang. Hepa pui hi pawnlamah thil ei chhuak ngai heklo, ka ṭhiannu nen chuan inthlahin office chhûngah chuan ka zui luta, kawngkhar ka khar fel chiah tihin ka hmuiah ka thil ei lai lai chuan a rawn fawpa, mahse reiloteah a awm sawn nghal, a ner nasa lutuk chu ka nuih uar uara.








Ka theihai ei a lem tih hriat takin a thur ti chu a ner nawng nawng mai. “I van chawh tak, enge mi in rin hma a i fawh ziah, kha hei pawh hi ei ve law law rawh" tiin ka theihai ken chu ka pe a, “I ei loh chuan min tawk tawh hauh suh" ka tinghal zat bawk.







Chuveleh a kâ rawn ângin ka lamah a rawn kûn hniama, ka lo barh nghal vat. A hma ang em em chuan a ner duh tawh hauh lo, a ṭhial nuap nuap mai, ner leh se ka tih nen, pawilo a ei tho va; a ṭha mai.




Duhtâwk rihin ka bagah chuan ka la ei loh ho chu ka dah ṭha a, ka chet mawlh mawlh lai chuan ka biangah chuan a rawn fawpa, ka lu chu herin ka mit ka sân zauh mai. “Min bialnu chei tawh suh ka tih kha; ka tan a nuam miah lo a nia aw" ti nâng nângin amah chu ka ena, miin min sawi duh leh dâwn si mi hausa deuh duh chu sum duh chhuahin min chhuah leh anga ka duh ve lo.







Hausa ve chu ni ila a âwma; mahsela ka hausa ve miau silo. “Engvang chuan maw i tân a nawm loh a? Kei hi ka ṭha lo viau em ni?" a rawn tih hmuk chuan ka lu ka thing nar nar mai “Chutiang pawh a nilo, i hausa a kei ka retheia, kan inmil theilo vang, nakinah nangpawhin min la iai phah thei, ka duhlo" tisapin ka ngaihdan dik tak chu ka hrilha.







A kut zungchal chu dawhkanah a tlir dat data, a awm danah chuan ka thusawi chu a ngai holam hle tih ka hre mai. “Chu chu maw i buaina? Hausa rawh ka ti hleinem che, ka tân chuan ka hmeichhia chu a hausak leh retheih a pawimawh lo, ka tan awm sela. Ka duhzawnga a awm phawt chuan a dang chu keiin ka ti thei alâwm, hmeichhe châwm tur hmuhin min hmu em ni?" tiin ka hmui bulah chuan a rawn phun a.








A thaw lum ham ham te chu ka hrechiang viau mai, “Min hrilh teh, hna neilo hmuhin min hmu em? Hmeichhia zawk in châwm tîr ka duhin i ring reng reng em?" ka hmui chu a rawn hrut thuak thuaka “Hre reng rawh ka bialnu i ni tawh tih kha, thil dang sawi angailo, tûn aṭang chuan ka duhdana awm tum ang che" tiin min pawm nawlhin a chair ah chuan min ṭhut thlakpuia.







Lo talsawn lam pawh ka tumlo, a mi tih ang ang chuan awmin ka nui var var ringawt, ka chau bawk nen tûnah rih chuan ka chawlh hahdam theih nân ka tlawn a ngai tlat “Duhtak, nizân kha kan mu ṭha lo bawk sia ka muhil mai dawn asin" tiin a awmah chuan ka chûl sak riak riaka, a rawn thaw hak mai.







“I kut kha awm tir hle hle rawh, i mi tawhna hi a danglam bik tih hria la. Office ah ka tih i duh te a nih loh chuan khati khân ti che zet zet suh" a tihchuan rang zetin ka kut chu ka dahthla a, a rawn nui nghawr dat mai. Engvanga kei hi min duh ta êm êm nge a nih pawh ka hrelo e a, ka tân chuan a sâng mah mahin ka hria.







“Tinge min duh? Ka bawr chhawr i ti lo em ni?" ka tihchuan nui sukin ka chalah chuan a rawn fawpa, vawiina a awmdân hi a dang riau, mi angaihsak bawk si. Bâkah a cool dân hi hmeichhe rilru hneh chi tak a ni, hetiang hian awm reng se a zûnah hian ka uai hneh viau ang, heti pawh hian a ruk tak chuan ka duh em em chu a nisia, chuti nilo se a lakah ka in phal teuhlo.






Hmeichhia pawh hi kan duh te lakah lo chuan kan in phal bik lova, mi awm ṭha duh lo tak te an nih loh chuan kan mipa duhzâwng tak tan lo chuan kan inphal ngailo an lo tih fo kha.






“I hmelṭha a lawm, chuan i taksa hi a nem in deh anuam em em bawk. Bawr chhawr in tilo la, i chhelo lutuk tih hi in pawm tawp rawh, muhil la keiin hna ka lo thawk ang" a tihchuan awmsawn tumin ka che a, a lo phal leh siloh avâng chuan mak ti deuh tak hian ka ena “Enga tinge? Mu rawh iti bawk sia" ti ha in a kut chu laksawn ka tuma.









“Tihian muhil rawh, i taksa chêr zet hian min ti buai phalo, bakah ka hlata awm turin ka duh lo che." tiin laptop chu ala zuia, a dawhkân a len ang aiin computer vel nên chuan a hnawk ve viau mai. Awmsawn duh bik ta lo chuan a malah chuan amah kuahin a âwmah chuan ka bei chiala, ka thaw chhuak suai suai mai.







Ka mengrei bawka ka mitte hi a sa ut utin ka hria, a ni pawh ka mut nawm theih nan a insiam rema, a ṭhu mu deuh bawk nen ka tân chuan a hrehawm vak loh “A hrehawm i ti ange aw? Hrehawm i tihchuan ka insawn thei ania" tiin inthlahrung tak chuan ka zawta.







“Muhil phawt rawh, haw a hun mai ang. I chau i ti a ni lo'm ni? Muhîl vat mai teh" a rawn tihleh tâkah chuan ka hnial buai tawh biklo, ka mit chu chhing thuaiin ka thaw zui ta sak saka.







A rim tui tak te, a taksa lum ham ham leh amah a awm pharh hlai hlap mai te chuan min hneh ngawih ngawih tawh. A ban tha chak tak min kuah bet tu te chen chuan ka hrechiang viau mai.






“Mira" chu aw chuan ka bengbulah ngei a ni min rawn koh ni, mengchhuak riai riai in Thanpuia nen chuan kan in en ta chata. Ṭum dang ang lo takin a mitmeng chu a dam dapa, mi duat hmel hliah hliah hi a pu bawk. “Engtin nge min koh kha?" ka hrelo pawh a nilo, mahse khatiangin tumahin min ko ngai lova, mak ka ti mai mai.







“I hre duh takzet amaw?" a tihchuan ka bu nghauh nghauha, a dangdai ka tiin mawi ka ti bawk. Miriam tih hian miin min ko tam bera, ka ṭhenawmte ho erawhin Sangsang min ti daih thung. Mahsela, Thanpuia min koh dan chu a mawi ka ti riau mai “Mira ka ti che, i duh lo em ni?" ka hmui vel chu arawn tuai thuak thuaka.









A mal chungah ka la ṭhu ta reng bawk, hepa hian zawi zawiin min hneh telh telh nimaiin ka hria. A zûnah hian a ni telin ka uai ani ber tawh, mahsela engmah sawi ka tum lem lo.






“Than i awm em?" hmeichhe pakhat leh mipa pahnih an rawn luh thut avâng chuan in siamṭhat hman a ni tawhlo. Kan inpawm dân ang ang chuan min rawn hmu zuia, ka lo ner deuh sak mai, a va hun lo tak. Chu hmeichhia in min rawn hmuh lah chuan a hmel chu thinrimna in a rawn khat nghal tih a lang reng bawk.







“Tunge he nu hi?" tiin keichu min rawn kawka, mipa pahnih erawh an lo nui suk suk thung. “Ka bialnu a nih hi" Thanpuia lah chuan en pawh en ngut lo hian a lo ti a, chunu chu a ngai pawimawh lêm lo hle tih a hriat, keichu ka lo nui sak thung. Min hmu tawh ta rau rau chu awmsawn pawh ka tum lemlo, bakah Thanpuia hian min namsawn a tum tlat lo.






A awm danah chunu chu a mil lêm lo hle tih ka hre mai “Duat ka chau riau ka tih kha, tirawh haw tawh ila, haw a hun tawh hrim hrim a nih hi" tiin a nghâwngah chuan ka kuaha, min rawn nuihin kan tho chhuak zuia.







“Hetiang hmeichhe sam buk lutuk hi engtin nge keiai i thlan theih zawk?" a thusawi duh dan chu ka eilo lutuk tlat. “Ka sam chu a kîr vang ania, ka hmêl chhe hek lo le. Ka sam chu lo buk mahse nangai chuan ka hmelṭha zâwk hrim hrim" mipa pathum chu an lo nui phuh ṭhawta, chunu lah chu a thinrim hmêl sauh thung.









“I va han zak thei lo ve, nang mi ṭhing lutuk" tiin min rawn kawk khur hlawk hlawka, a ṭawngkam hi ka ngeih loh chi a ni bawk nen ngawih mai mai ka tum lo “Ka ṭhing nân mahse i mipa duh hi ka ta a ni tlat, chhuak teh. Helaiah awm pawh a ngailo" tiin ka nawr chhuak dawr dawra, a lo ṭang ve tak nangin min hneh teuhlo mai.








Thinrim zeta a chhuak tau vawk vawk en chuan ka nui var vara “Wow ṭhiana, i va hmu ṭha piap piap ve le, pui lutuk. Bialnu huaisen zet i nei a nih hi, kan mihausa nu pawh a um tlân ṭhak thei a nia" mipa pahnih te chu an lo nui leh ṭhaw tawh mai, enge maw an hriat dâwn ni.









“I lo huaisen hle mai a, tirawh le haw tawh ang hmiang. Enge nang ni pahnih kha rawn tih in tum?" tiin a ṭhiante lam chu a ena, an ni pahnih chu an lo la nui reng mai. An va nui peih tak “Kan rawn kan mai mai che, taka naktuk zân kha ka pa Birthday tih i hriat kha, rawn kal ve la. Nangpawh lo tel ve rawh aw, ka duh riau mai che" pakhat zawkin min rawn ben thuk thuk paha a tihchuan Thanpuia chuan a lamah min pawt hnai nghal thuaia.








A ṭhiante chuan mit san uk ukin an nuih ringawt bawk. Hepa hi a thikthu a pe chhia emaw ni, rapthlak hian “Kal vat ang u, ka ṭhiannu nen haw rual kan tum ania" tiin kal mai ka tuma, Thanpuia chuan min man betin “Ka rualin i haw ang, tirawh u chhuak ang u; rawn kal kan tum dawn a nia" tiin a office aṭang chuan kan inzui chhuak hlawma.







Dodoi chu Thanpuia ruala ka haw tur thu ka hrilh chuan a lungngai viau dâwn emaw tihlaiin a lo hlim em em zâwk lehnghâl. A ṭhiannu hi min ngaihtuah thlawt lo, mipa te hnungah chuan muangchangin kan kala, ka phur lo takzet.







“Lut rawh le, i hmanhmawh kha" Thanpuian a tihchuan ka ṭhiannu chu mangṭha in a car chhungah chuan ka lut zuia, a ṭhiante pahnih pawh in car an rawn keng a nih hmel. Pakhatina Dodoi a thlah tur thu a sawi chuan ka lo thaw huai mai, ka ngaihtuah ve ṭhin. An in a hla ve bawk si a, a tlai deuh phei chuan mahnia kal fal hi chu hetiang khawpui angah hi chuan a him lo ve riau zêl bawk si.









“Ka inah i rawn riak dâwn em ni? Naktuk chu kan pahnihin kan chawl mai ang chu, party naah hruai ngei che ka duh si a" a tihchuan ka en pheia, car steering her kual tîr pah chuan min rawn melh zawka.








“Ka duhlo, hmelhriat pawh ka neilo a, engah nge hna chawlh kher chu. Ka hmelhriat pawh nilo Birthday partyah ka kal duh teuhlo" tiin ka kut chu ka kuangkuaha, engvanga min hruai pawh chu duh tlat nge maw a nih le? Nge ni a mi hmaah a bialnu ka nihzia lantîr a tum zawk?






“Min hnial reng lo teh Mira, ka ning ania. Thu awih tak hian awm ve teh, hetiang reng chuan a buaithlâk, ka inah riak la tichuan chhûnah i incheina tur kan en ang" a tihchuan chhan buai pawh ka peih tawhlo, min tilui leh dâwn tho. Chu ai chuan tlân bosan nal nal ila a ṭha ber ang.

NAKTUK ZAN KA CHÂWL AW