We Belong Together BY Becca Lnz (Completed)

[Rebec Nunziri]

Chapter-3



Grace Lalthazuali POV



"A tha alawm, i duh lo a nihchuan I u hnenah kan pahnih inkar a thil thleng te kha ka sawi mai a ngai a nihchu, amah vangin i thianghlim na i hloh tih hre ta se engtin chiah nge a awm tih pawh hriat a chakawm alawm" pawi sak nei miah lo chuan a ti leh, hepa hi mihring pawh a nilo ramhuai a nih hi, "Ka u natna i hriat kha, i sawi a nihchuan a nun na in a tawrh phah thei, khawngaihin hetiang hi tilo hram rawh" haw viau mahila ngen loh chu tih theih ka nei silo.




"A nih si chuan ka thil offer che kha i pawm thei alawm, i pawm a nih phawt chuan i u hnenah engmah ka sawi lovang" tiin a nui leh suk a, ka ngawi reng, ka u ka ngaihtuah a, a hre chhuak a nih chuan thil pawi zawk a thlen phah thei tih ka hai lo, mahse he mipa rapthlak lutuk laka in ham tan hi ka duh bawk silo, ka rilru a buai takzet a ni, "Oh.. duhlai in ngaihtuah vak a ngai em ni, ka offer chu a tha tawk viau lovem ni, I u pawh ka enkawl sak dawn che alawm, chuan i mamawh engkim ka pe bawk ang che" a rawn ti leh sup a.




Ka ngawi reng, ka beidawng hluah hluah a ni, a offer pawm hi ka duhdan a ni silo, mahse duhthlan tur ka nei chuang bawk silo, hepa hian kawng engkim ah min dang chep vek a nih hi, nimin lamah khan chuan a chungah ka lawm hman em em a, a laka that chhuah ka tum ve tawh tehreng nen tun minutes reilo te chhung hian ka thil tum leh amah ka ngaihdan zawng zawng hi a ti chhe ta vek a nih hi, mihring pawh a nilo ka tan chuan ka nun ti hreawm tura hremhmun atanga rawn kal ang mai ah ka ngai hmiah tawh.




"Chuan enge i chhan na, tunah chhan na ka duh nghal tih i hriatthiam ka ring" tiin min rawn din hnaih leh sauh a, ka thaw chhuak hak, hnuai lam chu ka bih reng a, "A tha alawm, i offer chu ka pawm e, mahse heihi hria ang che hethil ka pawm na chhan chu i mi vo na avang chauh a ni, chuan ka u hnenah engmah i sawi tur a nilo, a hriat chhuah ni la la in kan inkar tenawm tak hi a tawp nghal bawk ang" ka sawi zawh rual chuan ka kawng ah rawn man in a taksa si chet chuan min pawm bet a.




"Lungngai suh, a hrechhuak ngai lovang, heihi hre reng ang che, tun atang chuan ka bialnu i ni tawh, mipa dang hnaih hauh suh ang che, ka thusawi i zawm lo a nihchuan i rin phak baka rapthlak in ka che thei tih i hriat chian ngei tawh ka beisei" a tih leh chuan ka awih nghal hmiah, he mipa hi a rapthlak em bawk a ni, ka bu nghat a, a nui ri leh suk, "A nihchuan ka bialnu i nih lawm nan min kiss dawn lo em ni?" tia a rawn awm hnai chuan ka lo thle sawn vat a.




"I suangtuah na a nihchu, min thlah rawh" tiin tal sawn ka tum a, mahse ka theilo, a kut pakhat chuan ka sam chu a rawn tham a, chumi rual chuan ka hmui a rawn khar chilh nghal hmak bawk, ka lo ding mawl tawp a, tal sawn pawn ka tum lo, ka chhang let lo na chungin duhthawh tak chuan min kiss buan buan a, ka mit chu chhing in ka in hum ruh ngawt ngawt ringawt, "Hre reng rawh ka ta keima ta chauh i ni tawh" a in lak hran rual chuan a ti leh sup.




Ka thil khawih laiah pawh chuan ka rilru ka pe theilo, ka ngaihtuah na chu ka kawm char char a, ka thaw leh hap thin, ka hlauthawng takzet a ni, engthil ah nge keihi ka tal awh tak ni, he mipa kher kher hi engvangin nge kha zan khan ka lo tawn kher le, a ni hi lo tawng lo ni ila chu hetiang buai na hi ka nei awm chai silo a, ka thiltih avang khan ka in chhir takzet a ni, mahse ka u tana ka tih a ni si a, hlauthawng reng reng a nun hman a ngai dawn a nih hi.




Hepa hian a thu ka hnial a nihchuan ka u lakah engkim a sawi duh mai dawn tih ka hai bawk silo, "Duhlai i ril a tam tawh ang, thil kan ei dawn tawh em niang, heta ei nge pawn lama ei i duh zawk?" ka rilru ka lo kawm nasa bawk nen ka bul hnaia a rawn kal lai pawh ka lo hre hauh lo, ka beng bul chet a a rawn phun sup rual chuan ka phu zawk a, ka chhan na nghal tih hriat takin min en ran bawk a, hmeltha viau mahse a hmel pawh hi rei ka en peih lo, ka haw ngawih ngawih.




"Hetah ei mai ang" ka tih sep chuan a bu nghut a, pawn lama kan ei chuan midangin min en duh leh dawn lutuk, nimin lama thil thleng vang pawh khan hnathawk te hian min sawi neuh neuh tawh tih ka hailo, thil ka ei lai chuan ka taksa chu a zut kual reng a, thil a ei tlem thin hrim hrim nge mawni kei aiin a ei zo hmasa ziah lehnghal a, "Min lo ti buai tawh lo teh, ka ei tha theilo" ka tih deuh hlak chuan a nui suk a, a thiltih lai chu a tawp duh chuang lo hrim hrim.




"Sir" ka ti sep a, "Mike, kan pahnih a kan awm lai chuan Mike tiin min ko thei ang i duh lo a nih chuan duat tih pawh in min ko thei tho bawk" ka ner sak a, teuh lo lutuk, "I mumang a nihchu, khatiang kha chu beisei suh lo law law rawh" ka ti hmak a, a khabe hmul to deuh siar siar chuan ka hmai leh nghawng vel chu a rawn nul kual leh dun dun thin a, nuam pawh ka ti tawh lo, midang an rawn lut thut ang tih te ka hlau a, tang tung in ka awm bawk nen ka thil ei pawh a tui tawh nek love.




"Pawn lamah ka dawhkan hi i sawn thei angem, heta awm reng chu ka tan pawh a nuamlo, midang lah hian ngaihdan diklo tak tak an pu bawk sia, ka rawn thawh na a la reilo a, sawi neuh neuh kai hi ka duh dan a nilo" ka tih chuan a thiltih lai chu a tawp dat a, ka thaw deuh huai mai, min en deuh run chung chuan "Ka bialnu alawm i nih, midang thusawi ah buai suh, boss ber ka nih hi, kei ka awm chhung chuan tumah hian engtin mah an ti ngam lovang che" a ti awlsam then a, eng ang pawn sawi buai mahila awmzia a awm dawn lo tih ka chiang bawk nen ka ngawi ta hmak a.




Hna ban a hun chuan chhuah mai ka tum a, "Ka rual in haw rawh" a rawn ti leh, "Ka thiannu nen kan haw rual mai ang, bakah damdawi in lama tlang nghal ka ngai a" ka tih chuan lungawi loh hmel deuh a min en chung hian "Sawi ngai hi min sawi nawn tur reng lo teh, ka rual in i haw ang" ti hmak in a chhuak nghal nal nal a nih chu, a hnunglam atang chuan rum zetin ka melh zui ram ram a, ka zui chhuak ve nghal vat bawk.




Asangi chuan min lo nghak ran tawh a, "Sir Mike-a rual hian ka haw mai ang aw" ka tih chuan mak a tih hmel deuh na chungin engmah min zawt chiang lo, "Awle, keipawh rawn kal kawi ka duh hrim hrim a, ka lo va kal hmasa mai ang aw" tiin a scooty ah chuan chuang in a tlan chhuak nghal, "Rawn kal la, damdawi in thlen vat i duh chuan" Mike-a chuan a rawn tih sup takah chuan a car dah na lamah chuan kan in zui nghal, hnathawk dang te pawn min hmu leh nual a, min sawi duh leh khawp ang le.




"I u bulah kan chanchin hi sawi i tum em?" A tih chuan lu ka thing a, "Hrelo se ka duh zawk" a rum deuh nghut a, "Hrilh ngei ang che, chuan midang lakah pawh kan in kar hi zep ka tum hauh lo bawk a nia, mi zawng zawng hian nangni ka bialnu i ni tih an hre tur a ni, tu mipa mahin nang hi an hnaih tur che a nilo" a tih chuan ka ner nang a, "Lungngai suh, i ngaih anga luck ka nilo, luck ni ila chu tun thleng hian ka la single lovang" ka ti hmak a, hetiang thil a sawi peih lutuk hi ka ning tawh.




Damdawi in chhung thleng chuan min rawn zui ve zel a, dan duh viau mahila a ti lui tlat sia, ka u hnenah engmah a sawi loh hram ka beisei, ka u awmna cabin chhung ah chuan kan in zui lut a, Asangi te nufa pawh an lo awm a, Nu Mapuii chuan Sir Mike-a chu a lo be vat a, pakhat a lah chuan a lo chhang ve nghut nghut zel bawk, "U vawin lam te enge i an?" tiin ka u bul hnaiah chuan ka va thu a, "Ka tha lutuk, damdawi in atang ka chhuak thei tep tawh ang" a lo tih chuan lungawi lo deuh in ka melh ngar a.




"Chutiang thu chu sawi tawh reng reng suh, a hma pawn ka tha i tia, damdawi in atang kan chhuah hnu lawk ah hetiang hian i awm lehnghal tho hi, tunah chuan i dam chian hma chu damdawi in hi i chhuah san tawh lovang" ka lo ti hmak, "Ni e, damdawi inah hian han awm deuh ren rawn phawt la, doctor in i chhuak thei a tih hma chu chhuah kha tum tawh suh, hetiang reng chuan thil pawi zawk te pawh a thleng ang tih a hlauhawm alawm" tiin Nu Mapuii chu a lo tui hnih ve vat a.




"Nu Mapui ka that tawh em hi, bakah ka nau rilru hah reng reng a dah hi ka duh hleinem, tlem in kan awm hahdam deuh anga, ngai ka awh leh vat mai ang" ka u bawk chuan a lo ti leh zung zung a, engmah sawi tawh lo mahila doctor in a chhuah theih thu a sawi hma loh chu damdawi inah hian a awm reng ang, "Saw saw in boss chu maw?" ka u in Sir Mike-a melh zeuh pah chuan a ti a, "Aw.. nimin lamah khan a rawn kal ve a, hei vawin pawh min rawn zui a nih hi, Sir Mike-a a nih hi aw u" ka ti a.




"A lawmawm hle mai, ka nau hi chu a la puitling tawk lo bawk nen i lo dawh hram hram dawn a nia aw, naupang te nu chung hian keilah hian ka ti buai nasa si a" a ti leh zung zung a, "A fel lutuk alawm, ngaihtuah duh reng reng suh, ka hna pek ang apiang tha takin a thawk thin a nia, nilawm ni?" tiin keichu min rawn en a, ka lo hawi sawn vat, "A nihchu mawle, i ti lawmawm hle mai" ka u chuan a ti leh sap a, doctor a rawn lut a, ka u chu a rawn check leh zuai zuai a, "He damdawi hi zanin atanga a eitur a nia, in lo lei dawn nia" tiin lehkha min pe a.




"Keini pawh kan va haw tawh ange" Nu Mapuii'n a tih chuan "Damdawi lei pah in ka lo thlah ang che u" tiin ka tho chhuak ve nghal vat a, Sir Mike-a chu a thut ngaiin a la thu reng thung, "Nangpawh i haw tawh dawn lo a mi?" ka tih chuan ka u in min lo khap vat, "Ka hmanhmawh lo, in kan theih hun a la zo lo bawk a, ka lo la awm rih ange" a ti a, ngaihtha zan lo chuan ka en a, ka mitmeng ah chuan engkim a hrethiam tih hriat takin a nui suk a, midang hmuh loh tur chuan mit min la siai zeuh zui.




Pawn lamah chuan Asangi te nufa nen kan in zui chhuak a, Nu Mapuii chuan Sir Mike-a chu a fak mawlh mawlh a, Asangi lah chuan a nu hriat lovin min rawn signal leh zeuh zel bawk a, a va han hahthlak mai mai tak aw, pawn thleng chuan Nu Mapuii te chu ka thlah a, damdawi ka lei hnuah hmanhmawh tawk in ka u awm na lam chu ka pan lehnghal, cabin chhung a ka luh chuan ka u in zawhna nei mitmeng hian min en ran a.




"Ka va haw tawh ange, nangni pawh chawl hahdam rawh u, Grace naktuk ah ka rawn lam ang che" tiin Sir Mike-a chu a chhuak nghal nal nal a, a che zia mak ka tih em avang chuan ka en heu ringawt, "Hetah lo kal hnai teh" ka u in a tih chuan zam deuh ti tih hian ka va pan a, Sir Mike-a khan enge a lo hrilh chiah ka hre bawk silo nen ka tim deuh tlat a ni, "In Boss nen khan in chungchang engmah min hrilh silo a, a hma in in lo in hre lawk tawh tihna em ni?" a ti a.




"Enge i sawi awmzia?" ka ti deuh sap, "Mate naupang i ni tawh lova, bialpa nei rual te chu i ni ve tawh alawm, Mike-a khan in in ngaihzawn thu a sawi a, tinge ka lakah i zep reng reng a, mahse mak ka tih zawk tak chu hna i thawh na a la reilo bawk nen engtik atangin nge in in hriat tih zawk hi a ni" a tih leh chuan "A hma in kan in hre tawh alawm, mahse kan boss a ni dawn tih ka hre lawk bik lova" ka tih takah chuan a bu nghat nghat a, ka thusawi chu a awih ve mai a nih hmel.




"Mipa sual a nih ka ringlo, mipa in nghah na tlak tak a nih hmel kha, tun ah chuan ka hahdam ta huai mai, tunlai ah chuan mipa tha hi an vang tawh a nia, chhuah reng reng suh ang che" nui pah a a tih chuan tah khum vak mai ka chak zawk, chhang lovin ka ngawi reng a, damdawi in chaw chu kan ei a, ei tam a har ngar ngar hle, zan mut hmun ah chuan ka ngaihtuah na chu ka kawm mai mai a, ka u erawh a muhil tui hle tawh thung.




Ka phone a rawn rik chuan ka phu zuk a, ka u a harh ang tih hlau lutuk in ka chhang nghal vat a, "Enge zanlai ah te min rawn call a?" zawi te chuan ka ti vin nghal hlar a, "Duati khatiang khan i bialpa te i ve thin em ni?" a rawn ti sup, ka ner sak a, "Ngawi mai teh, bialpa ka nei ngailo tih hre rawh" ka ti hmak a, "Engmaw i sawi?" a rawn tih hmuk rual chuan "Bialpa ka nei ngailo ka ti a nihchu, ka damchhung zawng hian bialpa ka la nei ngailo" ka ti leh a.




"Bialpa i neilo amaw?" a rawn tih leh nghut chuan ka thaw hak a, enge maw chutiang pawh chu min zawh reng ni, "Aw ka nei ngailo, a ninawm enge chupawh chu min zawh nawn reng a?" nin hmel zet chuan ka ti leh, "A nih chuan i tan enge ka nih?" nui sak chungin "Ele ka boss" awlsam te in ka ti a, "Tunah damdawi in kawt ah ka awm mek, ka rawn lut dawn nge i rawn chhuak zawk dawn?" a tih chuan ka phu deuh zuk a, mahse ka in siamtha leh vat, awihawm loh emai, tun ang zanlai dar 12 pelh tawh ah damdawi in kawt ah a awm lul lovang.




"Dawt min hrilh chu tum lo mai teh, tun ang zanlai ah hian damdawi in kawt ah i awm tuman an ring lovang" ka ti leh hram a, "Duati dawt ka sawi lo, helai hmunah hian darkar khat dawn chu ka ding tawh, chuan i rawn chhuak dawn nge ka rawn lut zawk dawn, i duhthlan na a ni e" a nui ri suk chu ka hre reng, a ni hi a awm tak tak amaw ni le, ka ring chiah bawk silo a, "Duati I chhan na ka nghak aw" a rawn ti hnial leh sup a, chil ka lem khawlh.




"Rawn luh an phal dawn chuang lo" ka ti a, a awm tak tak a nih chuan a rawn luh leh theih tho chu ka ring, "Min fish i duh tihna em ni, ka chak zawng tak alawm, tuna atanga reilote ah i hmaah ka ding ang" tiin motor kawngkhar hawng ri chu ka hre zawm zat a, "A ngailo, ka lo chhuak dawn, rawn lut miah suh" ka ti leh hnu hnawh, "A tha alawm, khatiang nia tur kha a ni, min hnial ve tang tang thin hi i sim vat chu a ngai a ni" a tih chuan ka ngei ru hle, mahse in hnial buai leh vel ka peih loh vang chuan phone chu ka off hmak a.




Hmanhmawh takin pawn lamah chuan ka chhuak a, mahse ka hmu miah lo, ka hawi kual vauh vauh lai chuan motor pakhat hian horn a rawn pe vat a, chilam chu ka hawi vat a, motor atang chuan Sir Mike-a a rawn chhuak nghal a, ka lam pana a rawn kal chu ka lo en ran a, "I va han rei em em ve" ka hmazawn a a rawn din rual chuan a ti hmuk a, ka rei awm pawh ka hrelo, "Ka rawn chhuak nghal, engmah ka ti kawi lo, i nghak theilo ve hrim hrim a nihchu" ka lo ti hlak a.




"Duati darkar chuang hetah hian ka nghak tawh che a nia, ka nghak thei i ti zawk ngawt lo maw?" a tih chuan ka ner nang a, "Min nghak rawh ka ti che em, i rawn kal tih pawh ka hre hleinem, bakah enge i rawn tih hrim hrim a, zan a rei tawh tehreng nen" ka tih chuan a rum nghut a, engmah sawi lovin ka kut ah chuan a rawn man a, a motor dah na lamah chuan min kalpui nghal nal nal bawk, a motor hnunglam kawngkhar chu hawng in min la hnawh lut deuh bawk bawk zui a.




"I va han mak thet ṭhawt tak aw, a na ve tho a nia aw" ka tih hlak chuan ka bulah a rawn thu lut ve nghal zat a, "Ka tihpalh" a ka atanga chhuak awm lo tak a rawn chhuah avang chuan ka en hau a, "Engmaw i sawi?" a ka chu a chip deuh hmuk a, sawi leh chu a tum loh hmel ngang mai, "Chuan han sawi leh teh le" a tih chuan a thusawi awmzia ka hriat loh em avang chuan ka en heu a, "Enge sawi tura min duh a?" ka tih chuan ka hmai zawn ah chuan a rawn kun hniam khun a.




"Bialpa i neih loh thu kha han sawi leh teh ka ti a nihchu" ka lei chu ka chhuah tet a, "Sawi rawh le, bialpa chu i neilo amaw?" a tih leh chuan ka ngawi ran a, "Han sawi la, bialpa i neilo a nih chuan keihi i tan enge ka nih, vawin khan kan sawi chiang viau tawh emaw ka tia" a tih leh sup chuan a mitah tak chuan ka en ngar a, a thim bawk nen kan in hmu chiang theilo thung, "Bialpa ka la nei ngailo a, ngaia neih a har alawm, bakah in duh vanga.." ka tih lai mek chuan ka hmui chu a rawn khar chilh a.




Min fawp buan buan a, ka chhang let eih lo thung, a in lak hran hnu chuan ka thaw deuh huai mai, "Hre reng rawh, ka duh vang che in ka bialnu ni turin ka ti che" a ti deuh hmuk a, ka chhang lo, min duh vang a nilo tih ka chiang bawk em a ni, "Min duh vang a nilo tih kan hre ve ve, dawt sawi kher a ngailo a nia" tiin ka thu sawn deuh a, ka banah rawn man in min pawt hnai leh dawrh mai, "Bawihte dawt ka sawi hauh lo, nanghi ka duh che, chuti nilo se ka bula awm turin ka ti hauh lovang che" a ti a.




A thusawi vang chuan ka lai dawn dawn mai alawm mawle, va han zialo tak, tih luih na hmangin a bulah min awm tir a nia, hetianga awm tur ka nilo hrim hrim, ka chunga a thiltih zawng zawng te kha theihnghilh tur ka nilo hrim hrim, a ni hi ka damchhung zawng chuan ka duh tur a nilo hrim hrim, "Ka awih chu ring suh, min duh chu nila tih kya h na hmangin hetiang hian ka chungah i tilo tawp ang" ka ti a, sawi tur a hrelo a niang, a ngawi reng a, ka thusawi kha hnial na tur a neilo reng a ni, thudik a ni miau sia




"Lo kal hnai teh" tin amah hnungchhawn zawng chuan min thut tir in a taksa si chet chuan min pawt hnai nghak salh, "I chunga ka thiltih hi a diklo tih chu ka hria alawm, mahse i thu i duh ve ve ngil ngel em a, hetianga ka tih mai loh te chuan ka bulah engtinge ka awm tir theih ang che ni" a tih chuan "Kei aiin thu i duh zawk a, chuvang alawm tunah pawh I duhdan anga ka awm na chhan" ka ti ve hmak a.




Engmah sawi lovin ka nghawng leh hmai vel chu a nul kual dun dun a, za ka ti chu ka che deuh sek mai, "Awm hle hle rawh" a tih deuh nghut chuan ka ngei hle, "Awm hle hle tura min duh a nihchuan hetiang hian awm tawh suh, a za alawm mawle" ka ti vin hlak a, a chek deuh tlak tlak a, "I thin hi chu a chhe ve a ni, hei vang a nih chiah hi bialpa pawh i neih theih miah loh ni?" a ti khanglang a nih chu, ka tak deuh nawk nawk a.




"Min thlah rawh, ka chhuak dawn" ka tih chuan nui hawk chungin min kuah nghet tha sauh a, "Min thlah rawh ka tih chu, a tlai tawh, naktuk hna kal a la ngai bawk si, meng rei chi ka nilo a nia" ka tih leh chuan "Boss ber ka nih hi, tlai pawh nila ka hrethiam ang che, nangchu" a ti awlsam leh then mai, "Chutiang ngawt pawh a nilo, ka u pawh a lo harh thut thei a, min hmuh loh chuan kak a ti lutuk palh ang, chuvang chuan let vat ka ngai" ka ti leh a, ka rilru tak tak ka sawi bawk.




"A nih chuan min fawp phawt la" a thusawi chu awih lo lutuk in amah chu ka melh mawl tawp ringawt, "A teuh hian a hnai lo ka duh vanga helai hmun a rawn kal pawh ka ni hleinem, min thlah vat rawh" tia talsawn ka tum chuan a phal lo nasa mai, "Min fawh hma chu i kalsawn dawn hauh lo a nia, ka sawi tawh kha min hnial lovin ka thu hi awih mai thin rawh, thil a awlsam zawk tihna a nimai" hepa hi chhut thluk tawp ka va han chak thin tak.




"Ka ning a nia aw, hetiang hian awm reng lo teh, ka ning" ka ti hlak a, "Nin an tur a awmlo, i bialpa ka nih hi, vawikhat chiah min fawh pawh chu a harsa viau em ni?" a tih hluk chuan "Aw harsa" ka lo ti vat a, "A nih chu,em engpawh nise min fawh hma chu i chhuak dawn lo tih hria la, hetia awm tlaivar pawh hi peih tho a nia, ka bialnu thar nen a a dal a hun hman hi ka duh ber a ni reng a ni" a tih chuan ka nui hak a, kan thil duh chu a in ang lo hle mai.


Zawmna



"Sir ka ti tak tak a nia, ka u a lo harh palh ang, ka let leh vat a ngai tih i hriat ve reng kha" ka tal ve nasa lutuk mahse min thlah duh tak mai loh avang chuan tha takin ka ti a, "A nihchuan ka thil duh chu ti hmasa phawt la" tiin a rawn awm hnai a, duh lo eng ang pawh ni ila hepa hian a thil duh ka tih hlawhtlin sak hma loh chu min kal tir mai mai a tum lo tih ka hrechiang tawh hle, hreh ru tak chuan a hmui chu ka en a, ka awm hnai tial tial a, a hmui chu ka va si zawk a, in lak hran lehnghal mai ka tum erawh chuan min lo dang vat thung.




Ka tukhum ah chuan dawm in min fawp deuh ngawng ngawng a, ka chhang let lo, a hma ang bawk in ka lo in dawh mawl leh tawp, in la hrang in hnai zetah chuan kan in melh dun ran a, thim mahse a hmel chu ka hmu chiang thei hle, "Min chhang let ve rawh, Duati min chhang lo chung pawh hian kha i hmui takin zet ngawl kha ka vei tawh, min chhang let turin ka duh che" tiin ka hmui bawk chu a rawn khar chilh leh nghal hmak a, ka hmui a thip zak rual chuan ka ka chhung ah a lei hrawl zet chu a rawn hawl lut nawk nawk a.




Ka lei ka tih chet ve rual chuan a duhthawh zual sauh a, ka thiam ang ang chuan ka fawp let ve ta tan tan mai, hetiang hian hepa lakah ka awm ang tih ka ring pha ngailo, mahse zanin chu min ai kaih tu awm ang maiin a mi fawh na hi nuam ka ti lutuk tlat, ka hnar thei hauh lo bawk, kan in fawh rei tak hnuah phei chuan duhthawh zual sauh sauh in ka kawr chhan ah chuan ka hnute a rawn tham ta salh salh a, ka dang eih lo, mahse ka kawr chhung a a rawn zen lut takah erawh a kut chu ka lo man nghal vat a.




"Duhtawk ang, damdawi in compound chhung a nih hi, midang in min hmu palh ang" dang ro huam chung chuan ka ti a, a ni pawh chuan min ti lui biklo, "In sum a harsa hle mai, heihi hria la, ka in sum rei thei dawn hauh lo a nia" nui suk a tiin ka hmui ah chuan a rawn fawp leh tawk a, "Let tawh rawh, chuan naktuk lamah chuan hmanhmawh a ngailo, ka rawn lam ang che ka tihkha" a tih takah chuan min dang leh ang tih hlau takin kawngka chu ka hawng rawk rawk a, ka chhuak nghal.




Cabin chhunga ka luh chuan ka thaw deuh huai mai, ka u chu mutui tih hriat takin a lo thaw sak sak a, keipawh ka mut na ngaiah chuan ka mu thla ve nghal, mahse ka muhil thei mai lo, nichin a thil thleng zo chiah kha ka ngaihtuah let a, ka hmai te hi a sa hat hat mai, tuman min hmu lo mahse ka lai em em chu a nia, chutih rual in ka in chhir bawk, tih luih na hmangin a bulah min awm tir a, khatianga awm tur kha ka ni miah lo a sin mawle, chutih rual erawh in thiam in chan na lai chin ka nei ve tho bawk.




Zan lamah ka muhil tlai bawk nen ka tho har ngei mai, ka u lahin min lo kai tho duh mai bawk silo a, ka thawh meuh chuan dar 9 a ri tep, hmanhmawh lutuk in ka in tifai a, inah haw na hun ka nei tawh lo bawk nen ka kawr ngai chu ka hak leh mai a ngaih hmel, ka u nen chuan chaw te kan ei dun leh te te a, chawhma chu amah a a lo awm mai a ngaih hmel, Nu Mapuii chhuah na tur a nei bawk nen chawhnu lamah chauh a lo kal thei dawn a, doctor leh nurse te an awm bawk a, ka u chu ka ngaihtuah em em hran lo.




Dar 11 rik dawn ah Sir Mike-a chu a rawn thleng a, ka u reilote a biak hnuah kan in zui chhuak nghal, hotel lama a tlan loh avang chuan mak ti ru zetin a lam chu ka hawi a, "Meeting na tur lam kan pan nghal a nih hi, kan thawhpui thenkhat te nen kan meeting dawn a, kan zawh hnuah hotel lam chu kan pan dawn a nia" s tih tak sup ah chuan engmah ka sawi buai lo, meeting na hmun tur ni a a sawi kan thlen chuan a chhung lamah kan in zui lut vat a, a thawhpui te a ti bawk nen upa lam deuh turah ka ngai kha a nia, mahse a nilo, amah ang rual vel tur vek an lo ni.




An zingah chuan Sir Mike-a chu an boss ber a nih hmel, an hmuh rual rual in an lo chibai a, kei ka kal tel ve chu min lo en duh hlawm hle lehnghal, keimah chiah hmeichhia ka awm bawk nen nuam chu ka ti lem lo hle, meeting chu na tan mawlh mawlh a, engvak mah ka lo ti lo, an thusawi lai chu ngawi rengin ka lo ngaithla a, ka ning lek lek tawh zawk, tinge maw hetiang hmunah hian min hruai ni, hotel lamah lo awm zawk ila ka tangkai daih zawk awm sia.




Meeting an chawlh lawk chhung chuan an in kawm khawm a, a hma ang khan an pui thu em em tawh lo bawk nen tlem in boruak pawh a nuam ta deuh e, "Mike i hmeichhe rawn hruai hi kan va hmu ngailo ve, thawk thar em ni?" Mipa pakhat hmelchhe vak lo chuan a ti a, Sir Mike-a chuan tawngka a chhang lovin a lo buk khum zeuh a, "A va chhelo ve, thiannu keihi Ramsanga ka nia, remchang ah min la chhuah ah pui duh angem?" Chutia zawh na min zawt tawp chu ka beisei loh a ni bawk nen chhan mai nachang pawh ka hrelo.




"Ka tihpalh, bialpa i neilo turah ka ngai ringawt a, ka rin dan hi a dik em?" Tiin min nuih leh suk a, Sir Mike-a ai chuan a nelawm hmel daih zawk, chhan tum a ka ka ka an zuai hman tih ah Sir Mike-a thusawi avang chuan ka chip lehnghal hmak a, "In zavai in hre rawh u, Grace-i hi ka bialnu a ni a, tuman in melh tur a nilo, Ramsang nangpawh tun chauh hi ka hrethiam ang che, a leh pek a awm leh a nih chuan kan thawh ho na hi a tawp nghal angah i ngai thei ang" nelawm mih zet chuan a ti hmuk a.




"Thiana hrethiam rawh, i bialnu a ni tih a hriat loh vang a nihkha, a hrim hrim in i va han in zep thei reng reng ve, bialnu te lah chu i nei chhelo phian a, nanghi chu i mit a fing a ni" an zing a upat ve hmel deuh ber chuan a ti a, tlem in boruak tang deuh ut pawh kha a ziaawm ta deuh, keipawh chu ka in hum ruh nasa hman bawk nen ka hah vek thei alawm, midang pawh chuan Sir Mike-a chu an fiam deuh sap sap a, engah a ngaih vak hmel loh laiin kei erawh in nuam ka tilo em em a, min fak nasa hlawm lutuk chu ka lai vek bawk, ka hnai te hi a sa hut hut a, a tai hlar tawh in ka ring zawk.




Reilote an chawlh leh hnuah meeting chu an chhunzawm leh a, nichin mai a in fiam bawrh bawrh kha chu an ang leh tawh miah lo, Sir Mike-a chu a tawng ve mang lo a, midang thusawi chu a ngaithla a ni ber, keipawh chuan na thusawi te chu ka lo ngaithla ve ran a, an in tawngkam chhuak atang reng reng hian mi fing tak an ni hlawm tih a hria theih loh, an palian in an hmel pawh a chhe lem lo vek a, an mahni tawk ah an luck hlawm ngawt in ka ring, nichin mai kin be tu Ramsanga thusawi lai chu ka ngaithla a, uluk takin a hmel chu ka en dan bawk.




An zingah chuan amah hi a naupang ber maithei a ni, chutih rual erawh in nau ang chhe zawk zawk chu a ni tawh bik lovang, ka thut na a rei tawh bawk nen ka nawng te hi a kham thum tawh mai, Sir Mike-a bulah lo va chhuah ka dil dawn a mawni tia ka ngaihtuah lai chuan a lam chu ka hawi a, keichu uluk lutuk in min lo melh reng chu niin, rang lutuk in ka thu tha a, ka hmalam chu ka en ngar bawk, a hmel atang khan lungawi lohna a nei tih hai rual a ni bawk silo nen chhuah chu dil ngailo chiang tak ka ni, hmalam en a ka thut reng lai chuan Sir Mike-a thil rawn tih avang chuan ka thu khawng nghal awt a.


Cont....


Zankhat dan kan tihkha aw, zawmna nih vangin zaninah ka rawn dah a, naktuk kan awl thung ang..