STORYFB.COM

LET's LOVE AGAIN


By Ziki nu



Chapter-3



Zingkarah Jacoba tapin min tiharh a, dar 4 a pel awrh chauh bawk nen a tap ri chu a ring viau a ni.



Ka ngaihchan deuh vang vang hnuah pawh a tap chu a ban mai loh avangin ka ngaih a tha bik tawh chiahlo a, khum atanga tho chhuakin ka tlan chho ve nghal thuai a.


U Mazari'n kawngkhar min lo hawnsak lai chuan U Dintei'n Jocoba chu damdawi ei tir a lo tum mek a, "Kan ti harh che em ni Mate? A khawsik reh theilo hi a tap reng a, damdawi lah hi ei luih tir a har thin bawk sia" kawngka khar tha leh sawk sawk pahin U Mazari chuan a lo ti nghal thuai a, a tap nasa tawh hle tih hriat takin Jacoba chu a sen tawn tawn tawh a, a nu malchung atang chuan ka chhan beisei ni awm takin min rawn melh tawk tawk bawk a, a khawngaihthlak reuh viau mai.




"A khawsik chu a sang viau em ni?" tih paha a pang ka dehsak rual chuan "A sang anih hi" ka ti leh hluai a, damdawi chu han pek ve tuma ka thlem ngial pawhin a ei duh ta chuanglo a, a khawsik reng vang chuan damdawi in lama kal ka rawt ta ringawt a, zingkar tak meuh a la nih avangin taxi lak tur lah chu a la awm dawn der silo a, kei lahin scooty chauh ka neih bawk avangin U Mazari mangang chuan U Aldrina a call ta ringawt a, mi tha leh inhawng ngang a ni bawka motora a lo tlan nghal tur Thu a lo sawi hlauh a, rilru a hmanhmawh deuh tawh bawk nen sana en sek a awl khawp mai.


An lo thlen chuan Nunpuia'n a lo zui ve hi a lo nia, kal ve loh chu ni theia ka hriat loh avangin scooty a ka zui ve tur Thu ka hrilh a, motora midang zawng an thutluh hnuah Nunpuia chuan "Sawmi nen in hnungah kan lo tlan ang" a tih vangin an tlan chhuak nghal a, keipawh muangchang lovin ka let thla leh thuai a, kawrlum ha in chabi nen ka chhuak leh nghal mai bawk.





Mipa zawk awm ta nafam chu tiin ka khalh tir a, Jacoba chanchinte chu min zawt ve luam tak na in sawi tur ka hre tam biklo khawp mai.



LRM hospital kan thlen chuan nurse ten an lo buaipui mek tawh a, Jacoba lah chuan nasa lehzuala tap pah hian a nu kawr ban chu a pawt tlat a, a awmdan lainatawm lutuk chu hmuh a hrehawm takzet.




Nurse in injection a pek hnu reilo te ah thawm a reh zui a, a muhil chu nachhawkna pangngaiin an chiu lehnghal a, a tahna avanga a biang tai hlar mai chul chungin U Dintei chuan a thutchilh chawt a, khua pawh a var chiang tawh khawp mai.





Doctor te sawi dan chuan a khawsik chu a sang mah mah a, damdawi a ei duh bawk siloh avangin admit mai a ngaih hmel a, chhun lamah test eng eng emaw neih a tul bawk a ni awm e, zing dar 6 velah midang chu in lam panin kan haw leh ta rih a, U Mazari pawh mamawhte lamkhawm turin U Aldrina nen an haw ve rih a, an ni unau an lo awm hlauh chu U Mazari pawhin a thlamuanpui hle tih ka hria.




"Zingkar karah kan ti buai hrep cheu si a, a zialo ngawt mai" in kan tlen rualin U Mazari chuan a ti chiah reng a, damdawiin lama ken turte chu a siamfel nghal sawk sawk bawk.



"In duh chuan let tawh ula, keimah pawn ka kalpui thei tawh tho alawm" ka tih chuan U Aldrina ngaihdan a nilo nasa mai a, "Nangmah kha school kal i nvai a ni lawm ni? I u Mazari chu keiman ka va hruai leh mai ang, Bawiha nen chuan lo kal duh tawh rih suh u" a ti tlat a, a upa ber bawk si a, U Mazari'n a hnial lem lo bawka tiin Nunpuia nen chuan kan chhuahsan a, thlah ka tum chuan a duhlo ve tlat a,
"Exer a ni mai" nui vur vura a tih hnuah,
"Ka lo bia ang che" ti lehin a kal zui nghal a, nizan lama kan inbiak dante hrechhuakin ka inthiamlo leh ringawt tawh.




Ni a sang tawh bawk nen mu tawh lovin inchhungte chu ka hawl fai thuak thuak a, chaw ka chhum ve thlap bawk, hmanhmawh lo deuh in ka insiam a, thawhhma chu a hahdamthlak zawk fe tih hre mah ila a thawh dawn lai tak hi a harsa thin em a ni.





Nilengin school ah ka awm a, naupang 2nd term a hnaih tawh avangin English bik chu ka partner Sir Thantea nen extra class kalpui kan tum ni tak a ni bawk nen tlai lamah pawh Jacoba chu ka tlawh leh hman ta lo va, Nunpuia hnen atangin chanchin erawh ka hre ve zel a, a ni pawh a u hnen atanga a hriat a nih ka ring.



In ka thlen chuan khua a thim lek lek tawh a, U Mazari te in kawngka chu a inkalh loh avangin ka lut kawi hmasa a, U Lindai nen an tiffin ken tur siamin an lo buai khawp mai.

Ka kal ve theih Thu ka sawi chuan a inthlahrung deuh nge zanriah ei kham lamah muangchanga kal zawk turin min ti a, U Lindai'n scooty a nei tho bawka tiin ka chhuk San leh ta rih.



Zan lamah pawh dar 8 vel thleng chu ka awm ve a, inkan hun oangngai anih loh avangin duh ang pawhin kan awm thei chiahlo zawk a, Jacoba ber ngaihtuahawm lutuk a nilo a, rilru erawh a hahdam ve deuh.




In ka thlen leh chuan ka chau deuh bawk nen ka muhil harlo viau a, zingah pawh ka phone ri in min tiharh thei chauh a ni.




U Mama anih vangin chhang pah chuan ka tho chhuak ve nghal a, ka pa lungphun chungchang bawk rawn sawi lehin Thla thar ni 17 chu ni mai se a rawn ti a, an ruat ang ang chu ka pawm vek mai.




A ngai te in school ah ka nileng leh a, Jacoba pawh a zia zel a, naktuk lamah chuan an lo chhuak leh thei maiin ka ring, thla kim lo va piang anih vang hian a hriselna a pan deuh a, a chhungten an manganpui hma lutuk pawh hi dem ngawt theih an ni chuanglo.




Extra kan kalpui avangin tlai takah bawk in ka thleng leh a, eirawng ka bawl laiin Rinfeli hnen atang call ka dawng a, ka chhang rang viau.



"Zanin ah lo len kan tum asin, I remchang em?" ring ang reng deuh hian a rawn ti lang lang a, a remchan Thu ka sawi hnuah rei pawh inbe zui lovin a dah leh thuai a, kan veng an lo thlen hunah min lo be leh mai dawn a nih ka ring.



Zanriah ei khama ka inbualfai hnu rei vak lo ah ka phone bawk chu a rawn ri leh a, ka thiante chu kawngpuia ka lo nghah tur Thu leh an lo tlanna turte ka hrilh zung zung a, minute 15 vel lai ka nghah hnuah an lo thleng ve chauh a, an rawn bo nasa viau nge mawni.




"Naute in lo hruai nange?" an pa nena en tawn zak zak chunga ka tih chuan "A hritlang a, a pi te bulah kan dah rih, rei tak pawh kan leng hmanlo ang" a lo ti vat a, In chhung lamah kan inzui lut nghal bawk.



Rin ang ngeiin kan Thu fel awrh tihah ka thiannu chuan "Rintea nen chuan in la inbe leh lo tak tak maw?" a ti nghal thawr a, a chungchang bak chu thildang han sawi dun tur kan nei tamlo em bawk a ni.




"Kan tawp dan chu I hriat ve tho kha" a zawhna pawh chhang em em lo chuan ka lo ti sap a, za lo deuh in ka nui hak bawk. Ka thiannu min enna mitmeng chu ka hai hauhlo, mahni inkhawngaih hi ka duh ngai lo a, midang khawngaihna pawh ka beisei heklo, mahse tunah hian lainat leh khawngaih hmel takin min en mek a ni.




Famkima chuan phone call a dawn avangin pawn lamah min chhuahsan a, chu tih rualin ka thiannu chu ka bul hnai te ah a lo tawlh nghal sat sat bawk a.




Uluk deuh hian min en vang vang a, "I la duh reng tih ka hre mai" a tih chuan phawk lek lek hian ka lo en a, min lo nuih var var thung.




Na zetin thawk ka han la hluai a, "I bulah sawi a nei miahlo em ni?" ka tih chuan "I hre duh takzet em?" a lo ti let vat a, min chhang rang viau a ni.



Lu ka buk nghat takah chuan "Kum 1 lai kha in inzui ve hman a, a rilru ah khan I tla na ve lutuk, in inthen hma pawh khan nupuia neih ngei che a tum Thu min hrilh fo alawm" a tih lai chuan ka lo then sak a, a hmel ka mitthla rualin inthiamlohna bawkin min rawn tuam leh a, min hmangaih em emtu mipa kha ka tina a, a suangtuahna zawng zawng tichhia in ka kalsan a, engtinnge tunah hian min ngaih ve ang le....




"Sawmi?"
Min kohna ka hriat rual chuan ka phu zawk a, Rinfeli'n hrilhhai hmel fe a min lo en chuan tawi te hian ka nuih ringawt a, thawk a lo la leh halh thin.




A sawi zel danin kan inthen hnu khan a mizia a hloh vek a, tlangval fel leh zuanzang em em thin khan nelawmna reng reng a nei ta lo va, a chhungte leh thiante lak atanga inla hrangin a duh danin a khawsa a, pawi ka tihber erawh ruihtheihthil a ti thin chu a ni.
Kan inzui chhung khan ruihhlo engmah a ti ngailo a, ka duhloh dan anga awm kha a hlau hle thin.




Ka mittui tla chu rang zetin ka tuai hul a, mahse ka bul lawka Thu min en chik em emtu chuan a hmuh hmaih dawn hauhlo tih erawh ka hria.


A sawi zawm zel a, a awmdan vanga a chhungte manganzia leh rilru hahzia a sawi laite chuan mahni indem ngawt ngawt bak tihtheih ka neilo a, siamthat theih nise ka ti a ni.



Thla khat hnu velah ama duhthlanna ngeiin USA ah a putea hnena awm ve turin a kal a, chutatang chuan vawi khat mah a rawn leh leh tawhlo.



Ka thaw chhuak ham ham a, Famkima a la rawn lut lo bawk nen insum theih hauhlo in ka thiannu bulah chuan ka tap a, ka thiltih in a nghawng pawi zia leh ka ngaihtuah phak hauhloh thlenga a nghawng nasatzia ka han hrechhuak ve chauhte chuan tilru a tina zual a, min hmangaih em emtu mila kha keichuan ka ring zo tlat silo a, a lak atanga ka inthiarfihlim chhan pawh chu chu a ni!



A ngaihsakna kha ka phut em em thin a, a buai thin hle tih hre chung khan a lakah indah pawimawh ber kha ka tum tlat thin.


A thiam leh theih ang anga min ngaihsak ve nate kha hrelo derin a aia tha ka beisei tlat a, ka hma ka sial luatah mi pakhat, min hmangaih em emtu kha ka tina a ni.




Ngawi rengin Rinfeli chuan min kuah a, ka dara tuai hauh hauh chungin thawk a la leh suai suai thin.


"Min haw ngawt ang" rei fe kan ngawih dun hnu chuan ka ti chhuak sap a, "Chutiang zawngin ngaihtuah lo la, a lo let leh hunah engkim in sawi dun leh dawn nia, thinlunh a inzawm tlat chuan engmahin a then hrang thei tak tak hleinem" a lo ti charh charh a, a thilsawiah chuan a inringtawk hle tih pawh a hriat theih.




Za lo deuha nui sak pahin "Tha taka kan inbiak leh chu ka beisei lo a ni, ih e Rinfel, I unaupa lakah khan beisei ka nei sang thin lutuk a, a tlin leh theih bak kha ka beisei tlat a, khatichung khan a ni chuan inthen emaw, ka laka a lawmlohna te engmah a sawi ve ngailo, min endan ngai rengin min en a, nawmsak ka duh luatah a rilru kha ka tina a ni" sawi zawn thei lovin ka mit ka chhing a, thawk ka lak ham ham laiin kawngkhar lam atang Famkima thawm ka hre zui bawk nen ka intuai hul ve thuai bawk.





An nupa chuan eng eng emaw an sawi dun a, an naute a tap duh viau a ni awm e.



"Kan haw phawt mai ang aw Sawm, remchang hmasa berah kan Inkawm leh dawn nia" tiin min thlah thlap a, an tlan liam lai chu ka enzui vang vang bawk.
An awhawm ka ti, induh leh inthlahlel em em in an innei thei bik a, thenkhatin nulat tlangval khamlo tih tawngkam te hi an hmang fo a, keichuan nulat leh tlangvalna chu kham chi ah ka ngai ve lo, mi pahnih an induh tawn a, thinlung an inpe tawn anih chuan an inkarah thildang a leng ve tawhlo a, a hranpaa rinawm tum kher pawh a ngai tawhlo, an inhmangaihna ah chuan engkim a awm tawh a, rinawmna te, ngaihsakna leh, inrintawnna pawh.




Rilru ah thildang a lenglo a, hun rei tak chhung ka ngaihtuah duhloh 'hmangaihna' chuan ka rilru a luah tlat a, keimah ah Rintea zunzamte kha a rawn zam thar leh a ni.





Khang hun liam taah te khan ka theihnghilh ngailo a, amah hriatchhuah theihna tur thil zawng zawng kha ka hlat lui mai zawk a ni, 'a ni pawh a reh hmak thei alawm' tiin ka inhnem a, tawpna siamtu zawk ka nih vang chauh pawh khan a laka tlawm leh kha ka hlau ngawih ngawih a, ngaiin thlahlel viau mah ila a laka ka beiseina zawng zawngte kha ka beidawnpui tak vek avangin beisei ka nei ngam tawhlo a, thinlung inhliamsak tawnin keimahni kawng ve ve ah kan kalhrang ta a nih hi.




Muhil thei lovin khumah chuan ka inlet sek a, thil tam tak ngaihtuah kual zut mah ila awmzia erawh a awm vaklo. Inthiamlohna in ka khat a, a laka ngaihdam ka dil theih dan awmchhun nia ka hriat angin mipa dang ka ngaihsak duh ngailo a, inhnem nana hman phei chu ka duhlo nasa.


Keimah vangin khatiang khawp khan a lo tuar nasa a, hlim taka chu awm ka phu bikin ka hrelo a ni.



Khawvar rualin ka tho a, zing lamah Jacoba te an lo chhuah dawn avangin eirawng pawh ka bawl uluk deuh a, vawksa rem ka chhun chu ken chhoh mai theih tur in ka suak sa thlap bawk.



Ka mut that loh avangin ka buh deuh lûk a, ka intihfai zawh chuan dar 8 a lo ri chiah a, inchung lamah pawh thawm a lo awm ve chiah bawk.



School kal ka ngaih avangin rei tak ka awm ve leh hman lo a, ka chawhmeh suahsak chu an lo lawm thiam khawp mai.


U Aldrina pawh a lo la awm a, chaw ei ve nghal turin an lo chelh lui ve tlat bawk, a buaipuitu ber a ni bawka a fel tak tak a ni.


Kartluanin ka hun hman dan chu a ngai pût reng a, boruak danglam thleng a awm lemlo.


Zanti Nunpuia'n min lo be ziah a, ka huat thu sawilo ta nafam chu keipawhin tha takin ka chhang ve thin a, thian kawm thiam ngang a ni bawk a, a u ang chiaha nelawm a ni.




Pathianni ah pawh an in lamah kan inzui phei leh hlawm a, kalkawnga tlangval thenkhatin Nunpuia nena min lo demfiam chu ka zah ruk viau laiin ka bula mi erawh a nui ringawt a, thian anga kawm chu hnial hauhlo mah ila ka lakah hian rilru dang pulo zawk se la ka duh a ni.




Zan inkhawm banah pawh min thlah chho a, hnial ve viau thin mah ila U Mazari te berin min lo tihluih ve tlat hi chuan ka tan tak pawh han inlak hran vak hi a nuam thinlo.




"Lo thu rawh aw, ka inthlak rei lo ang" In chhung kan luh rual chuan pindan lam ka pansan nghal a, ka chhuah phei leh lai chuan vai tawngin Tu emaw hi a lo be mek a, choka lamah thingpui chhuangin ka kal tlang a, ka vil zui nghal bawk.



Rei vaklo hnuah choka lamah chuan a rawn phei ve a, ka bul hnai te ah rawn dingin a thianpa accident thu leh a hmuna a boral nghal thute chu min hrilh a, a landan ah pawh a thian satliah mai ni lovin a thian tha tak a ni tih a hriat theih mai bawk.




"A van zialo e aw.. Khawi damdawiin ah nge a? I kal ve nghal dawn em?" ka lo ti hlut a, a lu thing nghutin "Mizo a nilo a, ka inkhelhpui thin Surash-a" a ti sup a, lei lam a bih ngur bawk nen a rilru a buai ve hle a nih ka ring.




Kan ngawi dun rauh rauh a, han sawi mai tur ka hre bik lo chuan ka thingpui siam lai chu muangchangin ka chawk a, "Sawmi" zawi ruiha a lo tih chuan amah chu ka en vat a, min la en lo fo mai.



"Zanin chu rei deuh len i phal em?" a ti mauh mai a, a boruak tawnin a zirlo bawk nen keipawh ka rilru a tibuai ve deuh a, "I duh chen chen i leng thei alawm" nui chunga ka tih chuan a ni pawh a nui ve suk a, thildang sawi tawh lovin ka thingpui siam lai chu min laksak a, a kal zui nul nul chu ka zui ve nghal thuai bawk.










Cont..


In ngaihdante comment ah min lo sawisak ve zel rawh u aw... Ads click leh comment mawlh hian min tiphur ve thin a
Show post links
Top