"Ti teh, hmanhmawh rawh. Minute sawmthum ah kan kal dawn nia" Kim chu Troy nen kawngka bulah an ding a
"Ka inpeih e" Adrienne chu a mut a la chhuak lutuk
A hma zanah mut a kham lo nen Troy ṭhen dan tur a ngaihtuah zankhuaa. A rilru ang a put ve chuan pawi a ti miah lo vang. Mahse a lo hmangaih a nih chuan a rilru a tihnat sak hle dawn a ni. Justin a ngaihtuah chhuah apiangin a rilru a na ve bawk a
Tara Lambert te hi elevator ah a tawk mai lo maw le? A khum laizawl a ṭawm pui tawh ang em le? Nge ni ang a, amah a ngaihven ang khan Tara hi a ngaihven zawk ang? A in hmangaih tir thei ang em le?
Tara emaw hmeichhe dang pawh amah ai chuan Justin a an phu zawk ang. An ring zawk ang a, Justin pawh a hahdam thei zawk ang
Resort panna kawngah Taxi an hmang a, Troy chuan thil engkim a tifel a, a chhungte erawh an la lo thleng lo
"I chhungte nen tlai ah an rawn thleng ang" Troy a'n a tih zawh chuan Kim lam a hawi a "Room 204 ah i awm dawn aw" Andrienne bulah a ding leh a "Adrienne, room 313 ah kan awm ang" a ti a
Eng a? Adrienne chu a che buai vek
Thleng thei a ni lo a ti rilru a
"Aih, Troy. Kim nen room khatah kan awm ang"
"Tinge?" A ti chang fak a
"Tinge kan awm loh zawk ang?" A ti let ve hmak
Troy chuan mitko sanin thinrim deuh hian a rawn hrilh ru a "I bialpa ka nia, Adrienne. I tihtur chu ka bula awm a ni mai"
A dak chho vah a "Aih, Troy. Nangmah vengtu che ka ni lo!"
Troy chuan a ban a phar a
"Awle. I duh ang chuan awm ta che. Ka dang thei hleinem che"
A meng kual ralh a, Kim chu a va melh
Kim room chu a te deuh a, Khum pahnih leh ṭhutthleng dup lian tak a nei
"Ṭhutthleng ah pawh ka mu thei tho ania, ka tibuai lo ang che" Kim chu a hrilh a "Troy beisei loh dan a nih hmel"
"Eng nge i buaina chu Yenny? Nula thianghlim ang maia i la awm! I hria ang a, i la single lai khan nuam i chen ṭhin la, mipa te chu i mutpui kual dun a ni lawm ni? Chuan i mizia i thlak daih a nih kha!"
Kim hnen aṭang chung thu a han hria chu awih har a ti lutuk. Invawng felfai thei deuh kha a ni sia. Ni e, a hria alawm. A bialpa pawh a mut pui thei ngei mai. A bialpa ni lo deuh pawh a mutpui. Hmangaih a nei bawk a, tunah hian a thinlung a kehchhe mek. Kimberly hian mi hriat ah a zilh a ngai miah lo
Adrienne chuan Kim chu a melh vang vang. A kutah engemaw lo keng se chuan a vawm thlawrh duh maithei a ni
"I lo hriat mai mai atan Kim. High school leh college ah tumah ka mutpui lo. Kan inbe khat em a, ka chungchang engmah hriat i nei lo a nih hi. A pawi khawp mai. Nangmah zawkin mutpui i ngah tawh a, kawng min kawhhmuh zawk ta che" a vawikhatna atan Kimberly chu thudik takin a chhang let a
A rin loh lutukin Kimberly chu a nui mai mai "Ti teh Yenny, Hahdam rawh. Ka nu i'n a duat loh vang mai che hian a thu apiang i zawm kher a ngai hleinem. A hmuh duh ang tur kha hmuh tir mai la, a hmuh loh veleh che i duhdan takin zalen takin i nung mai dawn alawm. Dan zawm thlap thlap a ngai lo"
"Hma i sial hle mai!" Adrienne chuan a ti hmak "Troy nena room khata awm ka duh loh chhan hi ka nu vang a ni lo. Keiman ka duh lo. Duhthlanna chu ka siam tur alawm"
"A nih chuan Troy chu i chelh rei thei dawn lo a nih chu. Kum thum chhung in lo ni thei hi a mak zawk ngawt mai"
"Amah zawk hian min thlah duh lo alawm" Adrienne chuan a ti a
Kim chu a meng kual ralh a, a hawisawn daih
Adrienne phone chu a rawn ri a
"Kan rawn thleng ania" Yuan a'n a ti a "Kan room tur ah kan chho"
"Awle kan inhmu vat dawn nia" Kim lam a hawi a "Ka va inthlak ang e. Ka ṭhiante hmu turin ka chhuak dawn ania"
Ps: A hnuaia model ka rawn dah tur ang hian a inthuam a
"Ka rawn let leh ang" tih leh chhuah a rual a
Elevator a nghah mek laiin Kimberly thusawi chuan a tibuai ve angreng. Eng thil nge a tih le? A nu hmuh laiin fel deuh angin a lang a, a hmuh theih loh ve leh a saparang tal tihna em ni?
Mahse Kim kha Damdawi zirna school ah i ti ṭha si a, awmzia a nei tawh lem lo. Thil kal tawh chu kal tawh a ni. A naupan deuh lai khan lo hre tawh se ṭha tur. Eng pawh ni se, chhungkua duat loh bik a nih miau avangin a thlak danglam vak dawn chuang lo. A tih tum ber tawh chu hlawhchham loh a ni tawp mai
Elevator a rawn inhawng a, Justin a hmuh chuan a phu chiang ngei mai
Eng thil nge a rawn tih ve le?
Sunglass chhah deuh a vuah a, a rawn ve em tih pawh a hre lo. A chuang lut ve a, va deh fuh a, kuah thlawp mai chu a chak. A nunah a la pawimawh reng tih te chu hriattir a chak ngawih ngawih. A mumang mai a ni ang tih a hlau rum rum
'Khawngaihin ṭawngkam khat lek pawh rawn sawi la, ka rawn kuah nghal ang che' a ti rilru a
Elevator a rawn inhawng a, Justin chuan thu kamkhat mah sawi lovin a chhuak daih. Hre lo ang hmakin a awm a ni
A mittui rawn luang thla ngiai ngai chu a hru zeuh a, a ṭhiante room a pan nghal
"Troy i be tawh em?" Yuan a'n a lo zawt a
"Ṭhiani, ka thurawn che i ngaithla duh em?" Jill chuan a rawn sawi ṭan a "I ṭhen vat khan i thawveng zawk ang. I inthiamloh hma leh i chhungte rawn thlen hmain chuti lo chu i nu i hmuh hunah nuam i ti thei lo vang"
"Justin Adams a lo kal ve ania" Yuan a'n a rawn ti deuh hluai a
'Tinge hmuh a inrin lohna hmunah a rawn lan leh si le?'
Awm se a tihna hmunah a hmu lova, a beisei loh veleh a hmu bawk si. An titi apiangin an tel ve zel bawk a
"Nia, kei pawhin chhawng hnuai berah ka hmu. Kan thlen hun a inrual aniang. Zingah khan Blush ah kan intawk a, kan chawlh hmanna tur hi ka hrilh a, a fel reuh lutuk. Min hmuh apiangin min nuih ziah. Ka interview vang kha aniang"
"I va vannei tak!" Yuan chuan a fiam a "Mahse maw taksa lang tam thei deuh hnute bu chhah pui pui i elpui dawn asin"
"Justin Adams hi ka phu loh vangin chutiang zawngin ka en lo. Mahse ka awm ve tih a hriat vang erawh chuan ka lawm"
Adrienne chu an titi chhung zawng a ngawi reng a, a ruka a mutpui ngei pa chungchang a ṭhiante hian an sawi reng bawk si a, a lo hmangaih tawh vang nge maw ni har a ti takzet. A mawl vang liau liauvin a chân bawk si a
"Hmeichhe dang emaw Tara nen em ni i hmuh?" Yuan a'n a lo zawt a
"Ka hre lo" Jill chuan a ti ve mai "Hmeichhia chu a kalpui lo. Mipa ho nen an titi a, Tara pawh ka hmu lo. A awm tih a hriat chuan Tara pawh a rawn lang thuai mai ang. A zui zel duh ka ring. A nawmsak ve na tur a ni tlat"
"Nia, mahse Justin Adams hian bialnu nghet chu a neih theih ka ring chuang lo. Thla khat hnuah a kalsan leh daih mai ang. A thinlung pawh a na ve deuh ang a, mahse ngaiah a nei leh vat mai ang"
Adrienne chuan a chil a lem khawlh a, Justin chungchang an sawi chuan a lung a dum thei lo. Mihring ve tho a ni a, an chhuah chhe deuh mah mah
Jill leh Yuan nen chuan chaw chhun an ei a, Kim leh Troy a eipui lo chu nuam lo a ti ve deuh. Mahse chiang taka ngaihtuahna fim a hman phawt a ngai. Troy a hmuh leh hunah pawh ṭhen turin a inpuahchah thei zawk ang
Jill khan a lo sawi dik a ni. A hmat pauh leh a zo hma ting a ni mai
Chhun thil a ei zawh chuan a hun a thleng ta tih hria in Troy a zawng a, thusawi tur ziah chawp a ngai lo. A duh zawng chu a sawi tawh mai dawn a ni. A lo hnial deuh a nih pawhin tlang takin a kalpui rawt ang
Kawngka a kik a, chhanna a dawng lo. Minute nga a kik hnu pawh chuan a awm lo ang mai a ni. Kkmberly nen chaw chhun an fak a nih a ring
'Tinge thil an tih harsat zual zel le?'
A room ah a let san a, kawngka a hawng chiah. A thil hmuh chuan a ṭhawng takzet
Kimberly chu ruak ngal ngatin a ke kar suahin Troy a chungah a lo ṭhu run a, Troy chuan a kawngah a lo kuah bawk
Chil a lem khawlh a, thinrim tak leh zak takin a thlir reng ringawt. A luak an pawt hial mai
A hma ang kha chu nise hmu lo der hmakin a tlan chhuak daih ang. Mahse chu chu a tum lo. A chak tawk ve tawh alawm. A tawp a thlen pui law law tur a ni. An rawn hmuh hun nghakin a thlir reng a
Troy chuan a ding reng chu a rawn hmu ta
"Lalpa le!" a phun sup a, Kimberly chu nam sawn nghal in a ding kawh luau a, a thil zawng zawng a lang vek
An inṭhen hma in a thil a hmuh sak tal alawm le
'Troy hi chuan Justin a'n min tih hlim ang hian min tihlim ve thei dawn lo a nih hi' a ti rilru a
Mei nei deuhin a nui a
"Thil pawimawh sawipui che ka tum lai tak ania. I rilru a nat ka lo hlau lutuk a, mahse kha i lo buai hle mai" Adrienne chuan dam dup hian a ti a "Ṭhen che pawh a awlsam sawt mai Troy. Kan inṭhen chiang e Mangṭha!" Kimberly lam a hawi ve leh a, blanket a lo sin hlun a "Ka nu chu a lawm ngawt ang. A fanu duat lai leh a makpa awh tak an lo insprengtengiau a, tu bialpa zawk nge tih ah a buai dawn si lova"
Room chu a chhuahsan nghal nal nal
Elevator a nghah lai chuan a khur dar dar. Kawngka a rawn inhawng chiah Justin nen chuan an inhmu leh a
'A va hun lo tak' a ti rilru a
Ṭah loh chu a tum lutuk. Yuan leh Jill awmna room a hmet a, Justin a hmuh chuan engkim hrilh vek a, kuah hi a chak ngawih ngawih. Mahse engmah a tih hma chuan Justin a phone a rawn ri a
"Tu nge aw?" Line lehlam a mi chu a hriat loh hmel ngei mai "Tara a? Tara Lambert maw?"
"Aw ka ṭha e...ka" A thusawi lehzel tur chu a hriat zawm thei tawh ngang lo. Elevator a rawn inhawng a, a tlan chhuak nghal
Yuan a'n kawngka a rawn hawn chuan a biangah mittui a luang zawih zawih. A thinrimin a zak bawk a, bakah a thinlung a na bawk
A thinlung chu a kehchhe lo, mahse phatsan niin a inhria. Troy lakah chuan engmah a beisei lo. Mahse Kimberly hnen aṭang zawk phatsan a tawk a ni
Unaunu te chunga tih miah loh tur hi a awm ve alawm
An naupan lai ang mai kha a ni. A thil neih engpawh a hlimpui theih apiang hi Kimberly i'n a chhuhsak hmak mai ṭhin. A nu'n a lo ṭan zel bawk sia
"Awih le!" Yuan chuan a ti hluai a "Ṭhen dan tur i ngaihtuah reng laiin chhan ṭha deuh a rawn pe che a nih chu. Mahse Kimberly chu ka lo beisei lo asin. I unaunu hi e, a lo sual em a ni. Tu in nge chutiang ti duh ang?"
Adrienne chu a inngaihtuah nasa mai. Room a let leh a duh tawh lo. A rilru a na lutuk...Justin, Troy leh Kim chuan a ngaihtuahna an tibuai zo
"Ka thinrim ang nge ka hlim ang tih ka hrethiam lo. An thil lo tihruk ṭhin dan aṭang khan min dah hniam hle tih a hriat, ka thinrim lutuk. Ka hlim tho bawk a chhan chu ṭhen chhan tur ka zawn reng lai ania, ka phurrit a kiang sawt"
"Kimberly blackmail nan hmang zak ta che" Jill chuan chimawm zetin a lo ti a
Adrienne chu a nui hul hak "Engpawh ti ila, ka nu chuan Kim a hmangaih dawn tho tho. Blackmail tur khawp chuan a thil tihsual a lian lo em mai"
"Engemaw tal an sawi em?"
"An hamhaih vek niin ka hria" Adrienne chuan a ti a "An la harh chiang lo aniang. Minute khat vel an chetla lai ka thlir a, tenawm lutuk"
Jill chu a nui a "Ni love, ṭhiani. I la virgin vangin i ngai tenawm mai mai a nih kha. Mipa diktak i tawn hunah chuan e, nuam i ti dawn lutuk"
Adrienne chuan a hre daih daih. Justin nen khan an inmil lutuk. Mahse Troy leh Kim kha chuan a luak an ti chhuak
"Troy chuan eng nge a duh reng reng? Han en la, i hmelṭha in i fing a, i chhelo bawk. Mahni ke a ding thei ngat i nia, eng nge a zawn reng reng? Kimberly pawh hian a tluk lo lutuk ringawt che" Yuan chu a la lawm thei lo
"Ṭhiante u, ṭhen ka tum tih kha theihnghilh lo vang u" Adrienne chuan a ti a
"Aw, mahse a ni khan a hre ve hleinem. Chhan awm lovin a mit a len a ni ber mai" Jill i'n a lo ti ve bawk
"Vaukam ah kalin boruak i hip duh em?" Yuan a'n a rawn zawt a
Adrienne chuan a lu a thing a "Mutthilh lawk ka duh. Ka harh hunah chuan ka thil hmuh kha ka hrereng tawh lo mai ang. Ka luak a la pawt tlat" a thaw halh a "Lo hmu hma deuh ila chuan pangngai taka inṭhen a chakawm zawk asin le"
"Nia, chuan i unaunu nen pawh duh tawkin an che thei zawk ang a" Jill chuan mei nei deuhin a ti a
Adrienne chu Jill khumah a mu a, message a dawng hlauh
Jin: Ka rawn be mai mai che. I ṭha maw?
Adrienne: Ṭha tih ah chuan Ka bialpa leh ka unaunu khum laizawl ah an lo che dun ka hmu a, kan inṭhen ta. Engkim hi a pangngai leh vek tawh e
Jin chuan rei deuh hnuah a rawn chhang a :Mi that ṭhin rawih tur ka hria ania. Ka koh sak dawn che em ni?
A nui seih a, chhanna a ziak nghal: Ngai lo mai. An phu lo
Jin: A ruka i bialpa chu?
A thaw halh a, chhanna a ziak bawk: Vanduaithlak takin kan la inrem lo
Jin: Hey, Adrienne muangchangin pen det det rawh. Nui zeuh zeuh bawk la. Hma lam hun chu i nei ṭha daih zawk ania
Adrienne: I sawi dik ngei ka beisei. Ka lawm e
Jin a thusawi chuan a ti hahdam huai mai. Jin Starck nen hian hetiang hian an inkawm ang tih pawh a ring lo kha ania. A thurawn pek ah khan a thutak hle tih a hriat bawk. Tihhlim a duh hle niin a lang
Darkar thum a mut hnu chuan a harh a, Jill leh Yuan chuan bathlar ah cigarette an lo zu a, a inthiamlo khawp mai. Kar tawp hun nuam nuam tak an hmanna tur a dal niin a inngai
"Ka buaina ah ka hnuk lut che u a, pawi ka ti"
Jill i'n a rawn kuah a "Ṭhiani, chu chu i tana kan awm chhan zawk alawm. I mamawh hun chuan kan rawn lang zel ang"
"Chuan, ni tla tur thlirin chhuak tawh ang u" Yuan a'n a rawn ti ve bawk
Adrienne chu lo nui sen sen in a bu nghat a. A nu te an rawn thleng tawh ang em tih leh a hmachhawn thei ang em? tih vel a ngaihtuah a
Ni tla tur a thlir a, a ṭhiante erawh tui an hleuh ziai ziai mai. Adrienne chuan engkim a ṭha leh vek dawn tih a beisei tlat. Thil pakhat a zir chhuah tak chu. Amah a inhmangaih hmasak phawt a ngai tih a ni. A inringtawk ang a, chhelo takin huaisen, chak tak bawk siin a thil tawn apiang a hmachhawn thei tawh ang
****
CHHUNZAWM LEH TUR