THINGTLANG MISTIRI LEH KEI S2 BY KENNELLY BAWITLUNG (Completed)

[ngaia]

THINGTLANG MISTIRI LEB KEI


BUNG-13 NA
ZIAKTU: KENNELLY BAWITLUNG




Zanah chuan ṭhenawm hnaite leh Pialrala ṭhiante ho amah kan turin a lo leng lut ṭak ṭak hlawm a. An ṭhianho chu puitlingho zilhna ṭawngkam ngaithla turin an lo lengkhawm hi a ni ringawt.
A lo lut thar apiangin a lo leng hmasa te sawi hnu bawk chu an rawn sawi leh ta ṭhin a, Pialrala phei chuan alo phun pui sup sup thei tawh.A chang leh ning hmel deuh hian a rukin an ner leh nang nang ṭhin. Mimi-i nen thingpui lumin a khat tawkin kan sem reng a, chokaah chuan kan tap chawt a ni ber.




Thingpuino ka seng khawm laiin Hmangaihi pawh Taaza bur pawm ṭat ṭat chunghian alo lut ve a. "Anu in pe rawh tia," tih pahin Pialrala ṭhu chu a pe a. "I nu hming i rawn hmang mai mai te hi a nilo maw...?" Tiin Pialrala ṭhianpa pakhat chuan alo fiam zeuhva, nuiza insum hmel zet hian a ṭhianpa chu a nghawk zeuh bawk. "Ka in ngailo naa chu a petu a zirin thil hi chu a hluin a hlu lova, ka dah ṭha tlat dawn," tiin taaza bur chu Pialrala chuan a pawm bet deuh kher a. A ṭhianteho chu an lo nui ruh ruh mai.




"I over em mai a, a nu pek che anih kha i duh leh dah chhe ṭhak rawh," a tih laiin, "I lo van chho har, au Leen inhnuaiah kan awm dawn a nia aw," tiin Thlengthlengi chuan a ṭhiannu banah chuan a rawn kai tharh a. An chhuak zui nghal mai bawk.




Ka no khawm chu sil in naktuk a siam tur chawhmeh then ngaite kan thian leh a, "Inchhung chet leh ei rawngbawl te hi chu lo tibuai ve duh suh ka hnehsawh lutuk alawm. Chet vel i harsat tawh bawk sia i inti hreawm mai mai," Mimi-i chuan a ti charh charh a, "Engmah pawh ka tih ngailoh hi min awl hneh lutuk a, hetiang tal te chu ka tih ve lovin ka nuamsa lutuka ka thatchhe zo dawn," ka lo ti ve vat a.




Khawpuia mi hausa chhungkuaa lawi hmeichhe tam tak te aia ka nawmsakloh bikna sawi tur ka hre reng reng lo. Thingtlanga pasal nei ro roah pawh a nuamsa pawl tak chu ka ni ngei ang.
Pasalte farnu nena buaina neuh neuh kan nei ve ngai bawk si lo, neih a hnekin laizawn tak tak ang maiin kan in en thei lai tak te hi ka vannneihna a ni a.Kan chunga rilru ṭha pu na reng reng chu huat ngawt thu lah awm suh, inngeih tlang taka kan awm theih chhanah hian a tu a te pawh hi kan lo pawimawh vek mai alo ni.




"Ka kawng a kham lutuk,anih Mimi ka chhuk san mai dawn che aw in leng a tlem tawh tho bawk a," kan thil then lai kan zawh chuan ding chhuak ṭawih ṭawih chung hian ka ti a. "Aw, aw aw zuk mu hahdam daih rawh heng hi chu ka lo ti fel dawn nia," lo ti sawk sawkin kut ka sil hnuah ka kalsan a.




"E kan Leen-i pawhin a nei ve ṭep tawh bawka a phurawm tawh ngei mai a," ṭhutkhawmnaa ka phei laiin pu Thangsuleuleua'n alo ti nui hui a. "Ni e, kan nu hian 'Ramtea te naute lo piang tur khi hmuh a chakawm tawh em mai an nupain an sar vuah a an lian dun bawk si' a ti a tia. Tunlai nuho titi tam ber a nia aw," pu Lawma'n alo ti ve bawk a. Nei ṭha em em tur hian min ngai vek mai si a, an rin ang he hu hi ka hring chhuak lovang tihte min ti hlau rum rum zel.




"Tikhan lo leng reng rawh u aw ka'n chhuk san mai teh ang cheu," ka tihchuan, "Kan leng reng dawn in pa hi chu hetah kan lo kawl ve rih ang nge nupui a neih tak hnuhian han kawmna hun ṭhate hi a vang em mai," pu Thangsuleuleua chuan lo tiin eng eng emaw sawi chuan an nui fawn hawk hawk hlawm a. Chhuk mai tura Ramdinan min mitmei chuan ka chhuk san ta a.




Inhnuai ka luh chuan Pialrala-te ṭhianho an lo ṭhu teh ṭhap a, games an khel a ni ngei ang phone an hum far mai. "Engtik laiin nge in lo in chhawm thlak hman a..?" ka tih thuphung chuan,
"Inhnuai lam hip hi a na thut a," an ṭhian zinga pakhat chuan awmze nei zet hian alo ti var a. An chhuk chhan ber lah a ṭhiannu nen pindanah an tawm daih a, an ho reuh mai mai mang e. Mahni naute rual an hel an hel a nuihte lam lam an tiza.




"U Leen noodles tui deuhva siam dan i thiam em?" Tea'n alo tih chuan ka pindan lut tur chu ka lehhawi a, "A..thiam em em hran pawh ka hrelo tinge?" Ka tihchuan noodles chhum tur an lei ṭeuh thu min hrilh a. "Noodles hi chu ka ei nasa lova ka siam thiam vak lo, kha Thlengthlengi-te ṭhiandun khan an thiam ngawt ang chu siam tir ula," tia Thlengthlengi pindan lam ka thlek zeuh chuan Pialrala an melh deuh ṭhap a.




"Nge keichu min en ṭhup a...," pakhat lahin alo ti he haw thung a, aman ko turin an duh tihna nge mawni. Thaw chhuak deuh hawkin, "Lalramthleng, in ṭhiandun khan noodles hi rawn chhum teh u!" Tiin a naute chu a auva. Keichuan pindanah ka luh san hlawm a,
mut nan chuan ala hma tho bawka tiin kawr pahnih khat chu ka zai/chep leh ṭalh a. Ramdina hian a phal vak tawhlo nain ṭan a na ve ṭhin bawk si a, a hmuh loh hian pahnih thum tal chu ka zo hman ṭhin.




Zanin chu ka kawng a kham em a pakhat chiah ka zo tiah khumah chuan ka ṭhu awn diai a, a chang chuan neih vat vat a zangkhai deuhva awm ve te ka chak ṭhin viau a, mahse nau vei a a han na turte, Doctor hmaa han kar suah maite chu ka ngaihtuah chang hian ka zakin ka huphurh em em lawi a, duhthlan thiam pawh a har viau mai. Duhlo mah ila a hunah chuan ip luih pawh tum sateh mah ila ka la sang chhuak dawn tho tho a, ngaihtuah lawk vak vakloh hi alo hahdamthlak ber zawk a nih hi.




Phone ka thai kual mai mai laiin number hriatloh aṭangin whatsapp-ah message ka dawng nawlh mai a. "Dam maw Leen?" Tih te mai hi a nia, a dp a hmuh theih bawk siloh ka hming a hriat danah ka hmelhriat ve tho em ni dawn le ti rilru neuh neuh chungin, "Tunge aw?" Tiin ka zawt ta a. Rei vak lo hnuah min rawn chhangin, "Michael-a, ka numher hi lo save rawh," a rawn ti nghal zat a. Engtin nge maw ka number te alo neih theih zawk ni.




"E awle," tih tea reply-in a number chu ka save sak ve ta thova. Min rawn be zui tawh lovang chu tih nak alaiin, "I dam ṭha maw i naupai te chu eng nge a an a?" Tiin min lo zawt ve a. Han chhanloh ngawt thu lah awm suh, "Umm kan ṭhat lai tak a ni," ka ti leh ringawt a, biak zui vak ka theihloh nan ka chhang tawi thei tek tawk khawp mai.




"A ṭhat chu lo ṭha zel rawh u, hetah ka awm ve reng tawh dawn a, i lo zin leh te anih chuan remchangah thingpuite la in dun ila," a rawn tih leh chuan ka seen ringawt a, chhan dan tur pawh ka hrelo mawi hawiah "Nia" te chu ka ti thla rawk a. Min rawn biak zawm leh ka hlauh deuh avangin ka offline zui nghal daih bawk.




Thlengthlengin an noodles siam ei turin min lo ko ve chiah bawk nen ka tho chhuak a. Dawhkan lai takah a bel chuan chhawpin thlengkum an lo keng far a, "Mahnia in suah mai tur," an ti a.
Tui nei chep chepin an kang a, rin ai tak chuan ka ei tui zek a, ka ṭhutchilh run mai.




"Thanpuii ka'n video call ang nge aw," tia Tea'n a phone a phawrh chuan, "Sawtah va be rawh," Pialrala'n alo ti deuh nghut a. "I ho e i kena te hi kan hrilh ve dawn alawm," ti maiin Tea lah chuan a call tak tak em mawni a ring nghal ral ral a. "Aw eng nge a?" a ring tawp rual chuan Thanpuii ngei mai chuan a lo ti var a. Tea chuan phur tak hian kan thil ei ho lai te chu a rawn la kual vel a, "Awi kan raipuar nu chuan a pum bilh lo chauh ani kha in ei puar ve hman lo ang nge," nui kar kar chunghian alo ti hlut a.




"Enrawh hei kan Pialrala pawh vawiinah a accident-a a intuam var luk mai," tia Pialrala ke en tira a hmai zawna phone a dah chhoh chuan lehlama mi chu alo chek tlat tlat a.
"Khai khai khai...." Thanpuii'n a ti hman chauh, "Ka hria,engah nge chak tak taka in tlan fua fua ṭhin ni kha kha ani reng dawn asin chak tak taka tlan hian thil ṭha mah a thlen lo cheu...i sawi tur ka hre vek sawi buailo mai rawh," Pialrala chuan alo ti thum bul bul a, hre peih tawh thlawt lo ania nge. Nichinah a sawi pui zuah zuah thei tawh ka tih reng kha...



"Hre zul si zawm tum mang si lo, i na viau em?" Thanpuii chuan alo ti leh a.
"Na viau lo," a ti tawi tak ringawt. A phone a en san tak daihah chuan Tea'n be lehin midangho pawh chu a kar lakah an lo ṭawng ve leh zeuh ṭhin.
"U, i ke tuamnaah hian thil ka lo ziak," Thlengthlengi'n a tihchuan, "A ṭullo," alo ti liam puat a. "Kan movie enah pawh an ziak rang ṭhin a a nalh thei lutuk," Angaihi'n alo tih ve sep chuan Pialrala chu a rawn hawi chhuak zawk a, a aw thian deuh kharhin, "Pen va la la," a ti thum dut a. A nau chu a phur ngei mai.




Marker leh pen rawng chi hrang hrang hi a rawn la a, "Lem ziah i tum a mi?" Pialrala chuan alo ti teh thlawt a, a rawnin chhawp chhuak nasa bawk em a tin ni. "Lungngai suh nalh deuh deuh alawm ka ziah dawn," lo ti varin marker chuan a ziak rang ṭan a. Kan thil eina vel chu mipa pahnih chuan an ti fel a, keichu engmah ti lovin ka puar ber tho.




Pindana mahni chauhva tawk reng ai chuan tiin an bulah chuan ka ṭhu ve ta reng a, Thlengthlengi chuan a u ke tuamna ziah ran chu a tlei pui khawp a, an sirah lehkha puanah Angaihin kawr lem te lo ziakin a tui chilh khawp mai.




"A tawk tawh hmui lem te kha ziah a ngai a mi kha kha laia mi tekha eng lem nge Bawkbawn a mi?" Tiin Pialrala chuan a nau thil ziak chu a khap a khap a. "I lo che reng a ka ziah sual phah, tikhan lo awm rawh ka inthiar lawk anga ka rawn ziak leh dawn," tiin Thlengthlengi chu hmanhmawh deuhvin bathroom-ah a tlan lut nghal a.




Angaihin chhuata Thlengthlengi marker sen dah lak a tum lai tak chuan a hmaah Pialrala chuan a ke alo dah a, "I ziak ve dawn lo a mi?" Alo ti sup a, Angaihi chuan lu alo thing mai a, marker lak mai a tum leh chuan, "Ziak rawh," pakhat lahin a ti leh tawp a. Angaihi pawhin a ziak chak ve tho aniang chu uluk fe hian a ṭhutchilh a.




"U Leen, Ludo i khel thiam em khel i la?" Tea'n alo tih chuan, "Ka khelh thiam ber alawm min cho a mi?" Ka tihchuan a phur khawp a. Mipa pathumin games an khelh laiin Tea nen a phone-ah ludo kan khel ve thung a, a khat tawkin Angaihi te thil in ziah ran sak pawh chu ka va melh leh zeuh ṭhin a.




Ṭum khat ka va melh lai takin uluk fea Angaihi thil ziak lai a ruka Pialralan a phone a thla lak tuma a tin chu ka hmu fuh hlauh mai a. Thlalak tuma a hmet chiah erawh chuan flashlight a rawn phe nghal zeuhva, rang fahran hian Angaihi lah chu a hawi chho nghal vat a.
"Hey...," a ti hman chauh, "I hmuh fiah theih loh takin ka tia ka rawn en che a nih kha," tiin rang lutuk hian a phone flashlight chu a on nghal a. Awih loh hmel zet hian Angaihi chuan ala melh ram a, "Ziak rawh ziak rawh," tiin Pialrala chuan alo tur a. Ka nuih pui ruh ruh ringawt.




Thlengthlengi pawh lo chhuak tawhin a u ke chu chei rang hneh tak an ni. "Nuam in va ti ve a," Ramdina ṭhiante ho pawh an haw darh tawh aniang a rawn lang ve hlawl mai. "U Ramte in nu hian Ludo a khel thiam rapthlak min la dah zero char char," Tea'n lo tih chuan kan lampanin alo phei nghal chhat chhag a, phone chu rawn bih vein, "Ludo te mai mai inhurpawh pawh a thiam lutuk," a rawn ti a nih chu!




Tea leh a hnunga an ṭhiante pathum games khel pawh an rawn nui chhuak hawk a. Ka melh rum ve na te chu engah mah zuk han ngai lova...ka ngei a nia. "In zo ṭep tawh em in u Leen-i hi ka lo kawl ve tawh ang chu," a tihchuan "Hei kan zo a ni mai," tiin Tea chuan a phone chu ala daih a. Kan khelh tirh aṭangin ka la chak char char a, nuam a ti vak tawh lo a niang.




Pindanah an ṭhianho chuan kan luh san a, "Tlangval tuai tir ho bula awm hi nuam i ti riau mai," a tihchuan, "Kawm an nuam ber alawm," ka lo ti nghal zat a. "Kawm ka nuam daih zawk ang," a tih leh chuan za lo zetin ka nui hak a. "Nangte chu i kawm ve theih tak tak ami ah i fiamthu zel alawm," ka ti a. Amah pawh a nui tawp, "Keichu rai puar hi ka ning tawh e...," ka kawr thlak paha ka tih hap chuan, "Keipawh..." alo ti ve nghal zat a.




In herin ka melh vang vang a, "Eng nge ilo ning ve ringawt?" no lo zet hian ka ti a. A hreawmna chanve pawh hi a hrethiam ngut dawn em mawni. Khuma ṭhu thla te tein a kutpahnih chu suih zawmin a tukkhum lamah a dah a, "Raipuar ho hi in lo vawih uih thei em a...," thutak fahran hian a ti thum dut a, min en chiang bawk si zah vangin ka hmai chu a sa nghal pup pup thei nia mawle!




"Awihawmloh e i ninawm dawt dawt hi sawi suh!" Zak bawk si chuan ka ti seh chilh rap a, inherin mutkawr chu ka ha nghal sawk sawk bawk. "Ania lawm, hmangaihna nen ka hip hram hram a. Mahse kan nei ṭep tawh alawm tiraw," a tih leh lek phei chuan ka inher lawk a, khum lama pen phei hlawk hlawkin ka lukham chuan ka vawm deuh ṭhuai!




Amah lah chu a nui chhuak hawk hawk a, "Hmangaihtu hnarah chuan eng rim pawh nise nangmah aṭanga chhuak anih phawt chuan hmangaihna nen kan hip zel mai aniang chu. Tawrh harsa a awm hleinem," tiin a thutak si, thu ṭha tak sawi ang mai hian a hmel chu a tak run mai bawk a, ṭah chhuah tawp mai te ka duh tawh.




"Chuti maw, anih chuan insum buai a ngai tawh dawnlo bawka zanin pawh ka lo inthlah dul deuh anihchuan hmangaihna nen i lo tuar zel mai aniang chu," ka ti ve ta ngat a. Kan thukhel ho zia chu mi chuan hria se ho min ti nupa ve viau ang.



Mahse chutia ka han ṭawng chhuah takah chuan a huphurh ve leh deuh aniang nge a mitmeng a dang nghal zawk a, "Hmangaihna in tuar thei mah ila tawrh zawhloh chin te pawh a awm ve a nia," a ti leh hnuhnawh a, keilah mu ṭha sauh suahvin, 'Ka insum dawnlo reng reng' ka ti rilru mawlh mawlh tawh.




A tukah dawr kan hawn chuan Mafelin a pangpar khawi chhe rem rum a han hmu mai chu tu tih nge tiin a sa khawp mai a. U Cki nen chuan kan inmelh hrek hrek a, tuna a rawnin lan anih vaih chuan ka sawi ang tak takin a sam chu a mal malin a pawt thlak sak loh nakah. Phun hlak hlak chungin nakina pot hrana khawi turin pangpar chu a dah ṭha a. Puan ṭhui lai pawh chuan a khat tawkin a sawi reng a, a par vul lai tak ani bawk nen a ui thlu ngang mai.




Chhunah Sangkimi a rawn leng lut nawlh a, kan vai ta turin hmaihnawih leh hnawihsen min lo hawn a. "Ka ṭhiannuin a zuar a an offer lai a nia ka rawn lei kep cheu anih hi," a ti mai a. A quality a ṭha hlawm bawk nen Mafeli mood chhe lutuk pawh a rawn tlak sak hlauhva, a lawmawm phian mai.




Ei tur te ei hovin kan titi pah reng a, ṭhu pahin kawr ka lo chei thung a. Karhnih chhung a chawl dawn a, apa Aizawl zin tur a zui thla ve dawn a ni awm e. Sangkimi chhuah hnulawkah kan pangpar su chhe tu pawh ham bui bui chungin a rawn lut ve a, tawnzau thlawl hnelh hnawlh leh kekawrbul hi a ha a, lui kan kal dawn te kha a ti vela a hmelah chuan a tho chiaha a rawn chhuak nghal tih hriat reng reng.




"I va rawn kal har em em ve kan thian fai vek tawh. Kan thingpui in na no ho hi ṭhenawm thingpui dawrah sawn va dah la, lassi bur hnih rawn la ang che," thupe aw zetin u Cki chuan alo ti nghal zat zat a. Chupa pawh chu ner nang chung hian a kal ve mai bawk a, "Tirh lah chu a hnial lo zek a," u Cki chuan a tizui sup.




"Tunge kha kha?" Mafeli leh u Ṭhakimi chuan an ti deuh hu thung a. Nimina kan pangpar su chhetu tih kan han hrilh mai chu Mafeli thinrim dai tawh kan chhem alh leh hi a ni ringawt. Chupa lo let leh chu a lo zilh nghal hlak hlak a, pakhat lah ham bui bui chungin kawisawi zet hian chair-ah a ṭhu awn duai a, a muthlu lo chauh ani ber.
Lungtum hauh ang char char a ni mai.
A tawpah Mafeli beidawng pawh a ang peih tawhlo lassi vawt chu a inkhawlh khawlh a puan ṭhui lai chu ava chhunzawm san leh ta daih.




"Eng nge i hming ni a?" Tia ka bul lawka thatchhe zeta ṭhupa ka zawh chuan peihloh hmel zet hian min lo melh a, "Malsawmdawngzuala," a ti a, a ham nghal bui bui. "Va haw tawh rawh i meng hleitheilo chu anih ber kha," ka ti ta ringawt a. "Yes!" Tiin a ding hluai a, a rang a rangin a phit chhuak nghal. U Cki pawhin, "Phakar reuh bei bui mang e," chek tlat tlat chunghian alo ti ve a.
Chupa mai mai chu a ti der lek a ni maw?




Tlaia ina ka haw chuan Ramdina te thawm a reh tawh ema an bang tawh anih ringin inchhungah ka lut tlang a.
Ṭhutthlengseiah chuan lo ṭhuin, "Vawiim chu in va bang hma ve," tiin ka pan hnaia, ka biak chu a hrelo nge mawni a kuta phone ringawt chu a bih ngur a. Ka hnaih deuh ta maw tiah chuan a phone ken chu ka ta ani tih ka hmu ve thei ta chiah.




"Eng nge i en a?" Tia a bulah ka va ṭhutthlak rual chuan, "Hepa hian engvangin nge a rawn biak che a?" Tih nghut pahin phone chu ka malah a rawn dah a. Ka han en chuan nizana Michael-a min lo biakna kha lo ni a, message thar alo awm bawk. "Vawiin eng nge i tih?" Tih te mai hi a ni a, minute 5 vel liam ta ami chauh a ni.




Phone ka keng lova, ka lock hranlo bawk nen message tone a hriatin Ramdina hian alo en a ni ngei ang. A hmel chu ka en leh vat a, a thinrim em pawh a hmelah chuan ka hrethiamlo a ngawi ngul ringawt.





"Engtin nge ka number a neih pawh ka hrelo min lo be ve ringawt a," ka tihchuan hmalam enin ala ngawi ngul a,
"I thinrim mi?" Tia ka nek salh chuan alo hawi ve ta chauhva, chik zetin ka lo melh ran thung. "Rim love, mahse be ṭha suh," a ti leh tawp a. Chutia amah berin ka thinrim lo a tihchuan ka awih hmiah mai, "Be ṭha lo i hmuh vek hi hei, kei anga hmeichhe rinawm chu i tawng leh taw lovang ka tih kha, min ring hmiah rawh," ka ti charh charh a. A mitmeng fiah zeta min melh ve ran chung hian,
"Kei anga hmangaihtu che hi i tawng leh tawh kher lovang, chuvang chuan ka hmangaih ber ni chunga ka huat ber inih loh nan engthil mah ti suh aw," a tihchuan min rinloh vang pawh niin ka hrelo, min chan hlau hmel ngawih ngawih a pu miau a tin ni.




Hmalam leh hnunglam aṭangin a darah chuan ka kuah liam a, a hmel chu thlek chho hain kan in en hnai set sawt tawh khawp mai. "Ka mipa hmangaih ber huat ber nih chu khawvela ka thil hlauh ber ani ngei ang, he zungbun hian i ta ka ni tih a entir a, hei hian ka ta i nih a entir bawk a. Pathian leh Kohhran mipui hmaah thu kan tiam dun tawh kha. Nang i rinawm chhung chuan keichuan ka damchhungin ka thlah leh tawh lovang che," ka ti nghet charh charh a.




Ka thusawi chu ngun takin a ngaithla tih ka hria a, ka sawi liam mai mai lo tih chu a hai bik lovang. A hmela thlamuanna leh a mitmenga hlimna lo lang chhuakte chu ka tan chuan thil mawi leh ka ennin theih ngailoh tur an ni. "Hei vang hian alawm ka hmangaih che," tia a hnara ka hnar a rawn nul thuakin inlak hran lehnghal mai a tum chuan pawt hnai leh deuhvin keimah zawk chuan ka fawp hmasa a.




"Hmangaihtlak ka nia lawm tiraw?" Nui ver ver chung a ka tihchuan ngaihawm zeta nui chung hian, "Umm hmangaih hluah hluah tlak i ni," a ti zangkhai vah thei tawh. "Enchian i lo dawl ber ani hi...en hnaih poh che leh i ṭha tual tual emaw tih mai tur a nia, engti zawng pawhin en che ila i ṭhatna a bo phahlo reng reng," tia a hnuilam aṭangtea a hmel ka en chhoh chuan alo nui ve vur vur a.




"Khaw'maw ka la bal asin min thlah tawh la," tia a aw thian kharhin nuih te chu a insum ṭha leh vel a. A lai tih ka hrethiam ve reng sia, "Bal mai mai ang hmiang i hnathawh thuamhnaw nen hian alawm ka duh ber che," tia a bianga ka fawh chuan min rawn melh zawk a, ka lo nuih seih bawk nen hnuailam bihin a kun nghal daih a, a ṭha. Lalramdinmawia ti lai theitu awmchhun chu kei a nupui chiah hi ka ni tur a ni.




"Vawiin tlai chu ka lo inbualpui dawn che mi i duh em?" Tia ka thlek ha chuan min lo melh rang teh e. Keilahin chiang kelh khawlhin ka lo melh reng thung a, a lai alawm a lai chhe hneh lutuk ringawt. Rei pawh min en ngam lovin hmalam chu a en daih a, "A..ngailo mai rawh se a buaithlak mai mai khawi ka va inbual vat zawk ang," tia thawh mai a tumte chuan, "Ala hma alawm la ṭhu ve rih rawh," tiin ka pawt bet tlat a.




"Tak takin tinge nangmahah hian engmah sawiselna lai tur a awm ve miah loh le?" Ka tihchuan, "Mi bawl ilo hnehsawh phian dawn hi a," alo ti thum dut a. Ka bawl emaw a ti chiang mai, "Mi ka bawl ve ngailo, mi pawh hetiangin ka fak ve luam ngailo. Hetia hmaichhana ka hrilh fak fak tawh che chuan ka lung i dum hle tihna a ni mai," ka ti a. Hetia han fak vel te, ka duhzia thu hrilhte hi nuam a ti tih ka hria a,
hmaichhan meuh a ka han hrilh tak tak mai chu hei mipa naupang lianpui ang chauh mai alawm anih le.




Ka duhtawka ka fak hnuah inbual tur chuan ka kal tir ve ta hram a, a mood pawh a ṭha cher cher tawh viau ang. Michael-a message chu ka chhang ta lova, hetia ka pasal ber lungawilohna anih dawn ai chuan tiin ka block hmiah mai. Chutiangin a hranpa takin ka huat turin thil ti sual nilo mahse min rawn biak dan khan ngaih a ti ṭhalo ve hrim hrim bawk a, naupangchhiat thlak tak angin lang mahse ka pasal nena kan inhmuh thiamloh phahna anih dawn ai chuan mipa khat huat nih chu ka thlang zawk.




Zanah u Cki alo leng a, Ar hi an vulh hnem bawka Pialrala kan nan pawh artui a rawn ken sak ṭeuhva, "A hel te khan hip pawp pawp rawh i dam vat mai ang," a ti a, kawr chei tur rawn kengin kan chei dun a. Andrew-a leh Stacy-i an rawnin zui lut ve hlawl mai a.
Andrew-a hi chuan rawn kan pahin Pialrala ke a dressing dawn a, a eng ti tia Stacy-i chu lo kal ve nge anih pawh hriat va nih suh a nuisang lehnghal. U Cki nen chuan an in melh ṭek nasa leh tawh mai.




Pialrala ke Andrew-an a dressing sak lai chuan keini hmeichhe pathumte chu kan ṭhu ngawi kar a, keilah mi biangbiak thiamlo chi, u Cki lah lungtum ang mai Andrew-a te lo luh tirh aṭang a ṭhu ngawi ngat a, kei talin ka biakloh chuan a mawi love ka tih rilruk laiin, "Leen tunlai ṭhui tur in ngah em?" Stacy-i zawk chuan a rawn ti ta hlauh a.




"Pathian zarah kan ngah lai tak ani. A hlawma readymade la duh hi an awm nual a," ka lo ti ṭha ve mai a, bu ve nghat nghatin min biak chhunzawm tawh lem lovin Pialrala chu eng nge a an te a zawt ve a. "I dam veleh in ṭhianhovin rawn leng leh ula arte kan kang ho leh dawn nia," Stacy-i chuan a ti siam siam a.
Pialrala pawh alo bu nghut ringawt. Zanin chu Angaihi alo dik dak lo tlat a, a mood a fuh thei tlat lo.




Dressing zawh chuan zakdawh pakhat hmangin Pialrala chu a pindanah a lut nghal daih a, ngawi renga u Cki kawr chei mawlh mawlh bulah Andrew-a chu va ṭhuin, "Vawiin i inṭhui hnem em?" A ti a, "Ṭhui hnem," tihzawngin u Cki chuan alo chhang a. "I chau em?" A tih leh pawh chuan, "Chau lo," alo ti leh tawp a. Stacy-i nen an rawnin zui chu a lungawilo tih a hriat reng mai.




Titi vawrh tur kan hrelo vek a, Ramdina ka ngai rum rum mai tlai chaw ei khamah pa Chhuana'n a rawn ko chhova rawn haw vat vat se ka ti ngei mai. Ka call haw tawp mai dawn mawni ka ti hman tawh Stacy-i chuan, "Andrew hei tih tur ka nei thut a haw chhoh nghal ka va ngai ve kan chho tawh mai dawn mi?" A tihchuan Andrew-an, "Lo han chho hmasa mai la, ka'n ṭhu ve rih ang nge," alo ti var a. Mahse, "Mahni te chuan ka chho peih hleinem zan dangah pawh i leng leh thei tho a, ka pa pawh min en sak zuai loh techuan," tia ṭangin a tello chuan kal a tumlo deuh bur niin a lang. A ngen ngawl bawk si keimah zawk hi ka lo hah thei.




Chutia a pa ber a sawi lan takah chuan Andrew-a Doctor ve meuh tan chuan han hnial ṭang ṭang lah a tiha mawi ani bawk si lo, inthiamlo hmel zetin u Cki chu a en ren rawn a, "Ka lo bia ang che," tiin a tho ta nge nge a. "Kal vat vat ang a hmanhmawh thlak tawh a u Cki te chu a rilru a zau alawm a hrethiam em em ang," techu ala ti ang ham ham a, ka raino lai chu nise ka kek bu lawp duh maithei a ni.



An inzui chhuah hnuchuan u Cki nen kan in en nghal vat a, "Saw mihring ka ngei zia saw chu aw apa damlo lah hi chhuanlam atan a hmang fo mai a ka dawhtheihloh chinah chuan ka ṭim hrep ang," a ti zui ta hmarh hmarh a, nichin khan alo insum ve nasa hle ni tur a ni.
"Ni ngawt mai mi kara lo tlakzeh tum phet ṭhinho hian eng rilru hi nge maw an put ṭhin le ka ti? Mi inngaizawng ṭha hle hle lai inkar chawhbuai tum tlat te, lo tlakzeh tum phette hian eng hlawkna nge tel se an intih ṭhin ni ang le? Mi huat leh sawichhiat bak an hlawh chhuak tawp si lova, an peih mai mai ka ti," ka ti ve deuh duah a, mak hi ka ti em a ni.




Siamtu hian a tu a te tan pawh an kawppui tur hi chu a ruat sak ṭheuhin ka ring a, mahse mahni ta tur pawh nghak chhuak zo lova midang ta chuhpui tlat ṭhinho hi chu ka tum ngial pawhin chhete mahin ka hrethiam theilo. Ṭha te tein an tana ruat chu lo nghak ve mai sela, mi in hmangaihte inkara buaina chingchivet thlentu an nilo mai tur. An duh chu lo nei thei ta tehreng pawh ni sela, hlimna tluantling an nei thei chuangin ka ring lo.




Zingkar aṭangin ruah a tla cherh cherh reng a, muttui a awl si nilenga mut maite chu ka chak a, ani thei em em bawk silo. Inphih faiin ṭhutthlengseia Pialrala lo ṭhu chu a tum deuh bur ni mai hian ka hria a, a phone chu a sik mual mual bawk.




"A pite vawiin kan birthday a nia a piin cake a siam tir dawn a," tiin inchung ka chhoh chuan phur zetin Sangsanga'n min lo hrilh a, "Ehe chutia law!" Ka ti hliai a, ka lo hre ve reng reng hleinem. Engmah pek tur pawh ka la lei ve silo ngaihtuah vat a ngai dawn anih hi.




"Api cake chu chhawng sarih in siam tir rawh aw kum 7 chiah chiah kan ni dawn bawk a," tiin Dawngdawnga chuan ka nu chu alo ṭhutchilh ran a, "Khaia, pawisa hi thingkunga rah emaw i tia mi ka fapa," Mimi-i chuan alo ti deuh thlawt a. Dawngdawnga lahin, "Ani lo mi a pute te an thingkung aṭangin pawisa an siam ṭhin a tia," pawisawilo hmel zet hian a ti a.
"Hahthlak," Sangsanga chuan thawk halh pah hian alo ti ve ngei.




"Vawksa leh arsa kan siam anga in ṭhiante chaw eiah insawm dawn nia," ka pu chuan alo ti a. "Papawr kan tur pawh a awm a theitui nen kan sem mai dawn nia," Mimi-i pawhin alo ti ve bawk a. Angaihi school kal turin Thlengthlengi a rawn sawm chhova, ruah ala tlak deuh cherh cherh avangin nihliap nen an chho dun hnak hnak a.




"Mate vawiin dawrah i chho dawn em?" Ka nu'n a tihchuan, "Khua a chhe em mai vawiin chu ka chho ve lo mai ang," ka lo ti a. Thingpui kan in a, Ramdina pawh lo chhoin Dawngdawnga chuan an birthday chu ala hria em alo zawt vat a. "Engtin nge maw ka han theihnghilh ang le ka hming ka hriat chian tlukin ka hrechiang alawm," a ti a.




Chaw ei kham lamah chuan ruah chu a han fel ti tih tawh a, van pawh thiang kakin engkim mai chu a lang thar sar(h)
tawh. Lei leh thinghnah rimte, ruah rimte chu ka hrethei vek mai a, hah a damin awm a ti nuam veng veng thei.




Nileng chuan kan phir unaute piancham lawmnan kan inbuatsaih ve a tih theih awm e. Kan inchhunga naupang awmchhunte an ni ve a, kum khatah vawikhat chiah anih bakah dam taka an hmang thleng theite hi a lawmawmin an phur dun bawk si a han phur puih loh chi zia zang an nilo.




Chawhnu herah Ar talh tur leh vawksa te chu ka nu leh Mimi-in an zuk lei a,
ka nu'n huan aṭangin thlai hnah leh rah ala bawk a. Naupangte kan nih nawk dawn avangin ei tlai lutuk a chi dawn lova, Ar talh te chu ka nuin a han hnehsawh khawp a keilahin thisen chhuak zawih zawih hi ka hmu thei ṭhak lova. A hmul pawh chu vawikhat ka pawt ve a, a ar taka ka khawih fuh changte chuan ka mur chum chum mai a ka inrawlh buai duh ta lo law law mai.




Tlaia Thlengthlengi te school bangin birthday lawmnaa lo kal turin ṭhenawm khawvengte an ina kalin an va sawm hlawm a. Ei rawngbawl kan bawl zo ti tihah chuan intifai ve turin inhnuaiah ka chhuk a. Ramdina te chu an laklawh deuh ni ngei tur ani khawl ri hriat tur ala awm tlat. Inbual faiin ka in hah nghal sawk sawk a, phir unaute ṭawng ri ka hriat chuan ka chhuak a. Ṭhutthlengah chips leh theituite nen lo inchhawpin anu phone an lo en dun a.




"Tuin nge leisak cheu a?" Ka tihchuan Sangsanga zawkin, "Apa alo kal a," a ti ta reuhva. A hriat sual em mawni ka ti hman a, mahse Thlengthlengi lo chhuk thla ka lo zawh chuan Mimi-i pasal hlui lo kal thu chu a sawi ta mai a, "A Aizawl zin turin a rawn tlawh kawi anih hi, an piancham tih te chu alo la hre ve aniang," a ti liam satliah a. Ka hmu ve chak tho bawk si nen inchungah chuan ka han chhova, ṭhutthlenga lo ṭhu mipa ka hmuh chuan phir unau te pa tih chu ka hre thei nghal mai bawk.




A palian lutuk hran lova, a hmel pawh a chhe hranlo. Mimi-i chuan tilang lo mahse a lawm vaklo tih ka hrethiam thei mai a, chutiang bawkin ka nu pawhin. Mahse mi puitling tih takah pangngai tak chuan an lo chhawn a, ka pu chuan a chaw ei ve nghal turte chuam a sawm ve a. Mahse amah tak pawh chuan nuam a tilo tih a hmelah a hriat theih a, "An unau ka hmu tawh bawka ka kal leh vat zawk ang nge.
Mimi, Dawngdawnga-te unau chu ka thil leisak hi min lo pek sak dawn nia," tiin a kal hma chuan paper bag hi dawhkanah chuan a dah a.




A inkhalh chhuak tur chu pawn thleng ava zui chhuak ve ta thova, a tlan liam chiah tih ah car pakhat hi a rawn tlan chho ve leh a. Kawngkapui zawna ka din avang chuan Mimi-i inlam pan chu ka lo nghak a, mahse car lo tlan chuan horn vawihnih a rawn pek takah chuan hawi letin keipawh chuan ka lo en kar a, kan inkawtah chuan a ding ta chat mai.




Tunge ni ang le ka tih laiin driver seat lam aṭangin u Ruatfela alo chhuak ve chiah a. Kan lam chu lo hawiin a nui suk mai. A car seat hnunglam chu hawngin eng eng emaw hi a rawn khai chhuak ṭeuhva, Mimi-i chuan alo en reng ringawt. "Happy birthday," Mimi-i bul a rawn thlen phei chuan a ti thum dut a. Sawisual a inti leh deuh nge ni, "Ka tih i fapa te zawk," a ti ṭha leh a.




A zah hlauvin keichu ka lut ta daih a, a rawn zin leh vang vang chu a ni sia aw...
"Ehe apu Ruatfela anih hi!" ka luh hnulawka mipa naupang aw chu Sangsanga niin ka hria.




U Cki, Mafeli leh u Ṭhakimi te pawh an rawnin zui thla ve ta ṭham ṭham a, ka pek ve tur t-shirt leh mutkawr suit u Cki ka chah chu ka lo ngaihven vat a, a rawm thlang nalh khawp mai. Cake chu zana cut kan ti a, u Ruatfela lo thleng pawh ka pu leh ka nuten chaw ei turin an ti ve tlat a. Ramdina lo chho nen chuan an inkawm a, naupangho lo thleng khawm ṭak ṭakin chaw kan ei hmasak tir a, ka ri chel chul mai a ni.




Naupangho ei fel dawn tawh lamah puitlingho an lo thleng ve leh chiah a, Pa Chhuana-te chhungkua pawh an rawn tel thei a, Angaihi leh anu pawh rawn kalin kan ri nak nak hlawm a. "Naupangho kha chaw in ei kham tawh chuan kawtah sawn lova infiam rawh u aw," tiin naupangho chu hrilh nawn pawh ngai tawhlo hian an tlan chhuak nghal zung zung hlawm a.




"Hmangaihdawngkim hei 'Kawlvalenchham...thinlung sen tereuhte chuk chhuak lai lem' tih hian a rawn be leh tawh che a nia ava ninawm ve rawn en teh," nu Matluangi chuan mit zim meuhva a phone en paha Angahi a koh chuan rang lutukin phone chu a rawn la a, pawnah chuan a tlan chhuah pui nghal daih bawk. Nu matluangi chuan flying kiss emoji a sawina ni ngei tur ani sawi dangdai thiam thei ṭhin a nia emoji pawh Mizoṭawngin a let leh thei bik tlat.




Buffet-in chaw chu kan ei ve a, ka nu leh pute hovin dawhkan an kil thung a, keini nupa pawh kil ve tura min tih tlat avangin kan kil ve ta nge nge a. U Ruatfela pawh an kawm bawrh bawrh a nuam a tih ve hmel khawp mai. Nichina a thil rawn khai bawr ṭeuh kha Dawngdawnga-te unau thuamhnaw, pheikhawk leh toys bakah ei turte alo ni hlawm a, amah tawp hi Lalphalzaua ka tih tawh Mimi-i tan pawh hand-bag original ṭha lutuk mai a rawn leisak a.
Ṭawngtam vak lo mahse a ngaihsakna a lan tir ve danah ka ngaihsak deuh tawp tawh.




Chaw ei khamah pawh Mafeli te ho mawng a zang bawka keichu min nutling ṭhut fel tir than a. Inchung hi chu puitlingho chan ani bawka keini ho chu inhnuaiah kan inzui thla ta dial a. Mimi-i chuan mikhual pawimawh a nei bawk nen chance pek ve deuh kha a ngai ve hranpa hrim hrim. Tihian puar te han tla fel phawt sela cake zai chu ala hmanhmawh thlak love an tia lawm.




Inhnuaiah pawh chuan kan khat hneh khawp a, Christmas kumhlui thlah zan vela ṭhianhova thil tikhawm tur kan ang ka ti ber mai. "Tinge a zanin hi iva cool ve? I mood a uih hmel bawk si," tia ka ṭhutna hnung lawka Pialrala-te ṭhiandun ṭawng thawm chu ka hre thei a.




"Min ṭhen," Pialrala chuan a ti bung nghut a, a aw aṭang ringawt pawh chuan a lungawiloh zia a hriat theih hial a ni. "Khai...tinge? Chet ila ṭan chauh emaw tia in lo inṭhen leh hman a mak thei e..," a ṭhianpa chuan beidawng aw zet hian a ti teh thlawt a. Pialrala thung chuan, "Ka ṭhen ve lo aman alawm min ṭhen," a ti leh a, chuvang alo ni maw nizanah leh tukin zinga a mood alo chhiat em em ni.




"A...iva han ho ber, chutia ṭhen mai mai theihtea i awm a i la zei tawklo anih chu. Engvangin nge a ṭhen reng reng che a?" Ka rilru hria ni awm hrimin a ṭhianpa chuan a ṭhen chhan a rawn zawt ta hlauhva, ka lo lawm ruk zia chuah ka inzahpui zawk!




"Hre lo e a mi i fiam phei si ka ning a tia min ṭhen ringawt," tiin a aw aṭang pawh chuan a ngaihna a hriat hmel bik tehchiamloh. Kei tak pawh ka nui chhuak hawk lo chauh a ni ber. Tapchhak lama ṭhu Hmangaihi lah a thawveng hmel bik em em mai a, phone enin an ṭhiandun chuan an nui kar kar mai bawk.




"Au Ral, hotspot lo on lawk teh nu Matluangi net hi a kal theilo reng reng," tapchhak a ṭhu Thlengthlengi'n a rawn tih chuan keini ho chuan card khelh tumin dawhkan chu kan kil bial laih a, u Ckin hnehsawh zetin a shuffle zaih zaih bawk.




"Ka on tawh," Pialrala'n a tihchuan Thlengthlengi te ṭhutna lam chu ka va en a, Hmangaihi chuan tur fe hian ka hnunga mi chu a rawn melh ram ram a.
Ka hnunga mi nuihza insum pawh chu ka hre thei. Eng nge tih hriat ve tuma ka phone phawrh ruin wifi pawh tur ho ka en chuan a hmasa bera ka thil hmuh vang chu ani ngei ang Angaihi rawn meng thip em em chhan chu.




'Min la duh em?' tih hi alo chuang kalh mai a, kun ngur chungin mahniin ka nui dir char char tawh. A zat sa nak alaiin Pialrala lah chuan, "A password chu 'Aw duh e' tih kha a ni mai," ala rawn ti zui a. Engtin nge hetiang tih nachangte a hriat zawk le ka nuih aza bawk si insum harsa bawk si ka ṭang nasa luta zun te lam lam ka cheh lo chauh tawh.




Angaihi chuan a pawt ta nge ni, "Tikhan ṭha ni mai lawm," ti fuh inti aw zeta Pialrala'n a rawn tih takah chuan a ṭhianpa pawh a nui kur kur a. "Ava mak ngur ngur ve Leen kha i card kha rem ve vat ta che kan ṭan san mai dawn che nia," ka sira u Ṭhakimi ṭhuin min rawn nghawk zeuh takah chuan ka in thing harh a, nuihza insum hi chu hreawm duh ngar ngar tak a ni.




Kan tih nek nek chhungin cake zai tawh ang u an tih avangin kan inzui chho leh dial a. Papawr kangin theitui kan sem tel bawk a, nuam ve dar dar tak a ni.




Pathian zarah kan dam a, ni te chu liam zung zungin kan tlangval kena pawh a dam fel chu a ni der tawh. Kar hnih ṭha ngawt hna a chawlhsan tawh avangin ani pawh a phei leh tawh dawn a, Angaihi nen chuan an ṭha leh ta em pawh ka hre zui ta lo. La ni ve mai mai sela hmuh an nuam ka tih reuh nen. An inṭhen chhan lah kha naupang inkawm intihtauh khumna thu ang lek chauh ani si, Pialrala tak pawh a hawihaih viau kha mawle.




Ṭumkhat Ramdina nen an inbiak lai ka hre fuh a, "Angaihi hi tleirawl rilru thianghlim mai ala ni a, Thlengthlengi anga i en theilo anih pawhin chheih kual mai mai suh ang che," tiin a u chuan a hrilh charh charh a. "Ka chheih kual mai mai lo," chu a ti ve ngei a. Ramdina'n, "Chuti anih ro ro chuan a kum zat ngaihtuahin nula pangngai zia pu tur chuan phut lo la. Hmeichhia chu dawm thiam an ngai a, eng chhungkua aṭang pawha lo chawr chhuakin eng mi pawh ni sela,kan kawppuite chu kan zahin an zahawmna pawh kan humhim sak tlat tur a ni a. Chanchin a chhia a ṭha an thlen ngamna leh an hahdamna, engtik lai pawha an tana ding ngam tur leh innghahna tlak nih kan tum tur a ni," tiin Ramdina chuan a hrilh charh charh a. An unau thu ṭha inhrilh chu ngaihnawm ka lo ti khawp.




"Chuan thil ho te te vanga thinrim laia inṭhen sawi chhuah nghal ringawt te hi a puitlin loh thlak a, a upa zawk leh mipa zawk inih na angin a duapkai zawka ṭan hi tlawma lak reng rengloh tur," a tih leh chuan Pialrala chuan, "Ka hriatlohten min lo ṭhen a alo len huna lo hrilh ve zawk teh," a ti let daih a. A tum deuh buau mai bawk si nen Ramdina tak pawh chu a nui chhuak hawk ringawt.




Khami ni a an unaua an inkawm hnulawkah Pialrala chu a hna zawm turin a Nite khawlamah a phei leh tawh a. Angaihi lo leng lah chanchin loh zawh ngawt chi ni thei hek lo hrechak ve viau mah ila ngawihbo pui a ngai tlat si a, bengverh zawng tak ani bawk nen a chang chuan engmah ti si lo hian ka lo inrawlh ve mah mah em aw te ka tia. Mahse engmah a takin ka tia engmah ka sawi chhuak pawh ni hleilo ka beng hi alo var fal deuh ani maia tiin mahni inthiamna tur chu ka hre leh nghal zung zung zel.




Fur a inṭan tawh a, ina awm a mut mai mai theihloh hi chuan ruahsur hian nunphung leh hnathawh a ti khailak tlat zel. Kan tan hian hlu viau mahse a sur nasat deuh changa sawisello chu tumah kan awm ka ring bik lo.




Vawiin pawh dawra kal lovin khumah puan sin hlun chunga movie en pahin thil ka ei mai mai a. Ruah hi a sur nasat lutuk loh chuan current hi kan nei ṭha thei viau a, Ramdina chu a hnathawhna kan kawt lawk ani bawk nen an buai phah ve lo. Ka movie en ka lo mutthluk san diar diar tawh tihah ka phone ringtone ri ral ral vang chuan ka harh zawk a, chilthli ka lo thlauh hman ṭep alawm le.




Tunge min lo call tu ka en chuan Zaii ani ve teh mial a, a number ka nei tih tunah ka hre ve leh ta chiah. Kan inbe ngailo tluk a nia mak ti ang reng tak chung chuan ka chhang ta a. "Aw Zai, min rawn be ve tehmial a eng nge ni ta?" Ti varin lehlama mi chuan ka buai lai ani em te min lo zawt hmasa te te a.
Ka buailoh thu hrilhin thil pawimawh a awm leh awmloh ka zawt a, a hma zawka min be ngai si lo in tuna taka min rawn biak thut chuan chhan eng emaw ṭha tak a nei ngei anih ka ring.




"Ih..englo a nia i nu leh pa chu engmah ka la hrilh lova nangmah hrilh hmasak ve phawt che ṭhain ka hria a," a tihchuan ka ṭhu ngil nghal vat a, "Ka ngaithla e," ka tih takah chuan a thaw chhuak hak a, "Nizana midang zawng mu tura an luh hnuah chokaa bawlhhlawh bawm kha ka ruak a, pawna ka dah chhuakin gate-a Kimtei chhuak lai hi ka va hmu hman a. En chiang turin ka va kal hnaia, ṭhenawmte in thlen hmaa a thim lai deuhva pa pakhat, bawrchhawr deuh tak mai nen pawisa chhah ṭha zet an inpe lai hi ka va hmu a, an din hlat deuh avangin an thusawi chu ka hre pha lova, a mipa hmel pawh chu ka hmuchiang theilo naa chu a pa hrawn kha a ni angem aw ka ti deuhva, midang tumah ka hrilh hmain ka lo hrilh hmasa ber che anih hi," a tihchuan kan haw hmaa a phone call hmangte kha ka ngaihtuah chhuak uar uar a.




"Engtin nge ni ang i nute hi ka hrilh duh angem?" Tia min rawn zawh takah chuan ka inthing harh vat a, "Zaii, engmah lo la sawi chhuak rih suh aw.
Ka nu a dam fel awrh chauh ani a a rilru hahna tur eng thu mah hre rih lo se ka duh. Mahse thil pakhat min tih sak la ka duh a, Kimtei kha min lo en thlithlai sak deuh dawn nia. I thei angem?" Ka tihchuan theihtawp alo chhuah tur thuin min chhang a.




Kan inbiakna kan tihtawp hnuchuan ngaihtuahna a vak kual nghal ruai a, Zaii rin ang deuh khan a pawisa pek pa chu apa hrawn a ni thei mai angem? Ani hian pawisa a rawn dil ṭhin tihna em ni ang? Vawi engzat nge an lo inpek tawh anga engzata tam nge ni ang tih thleng chuan riruah alo lut zut zut a. Zanah a ruk a rala an in pek danah ka pa in a hriat pui lo tih a chiang reng a, pawisa te chu khawilai aṭanga a neih nge ni ta ang?




Ngaihtuah tur a tamin rilru a buai nuai mai a, Zaii ka hrilh tawh ang khan ka nu chuan hre rih lo se ka duh ber a. Ka pa zawk hian engtin tak ngai ang maw? Mize zawi leh fel tak ni khan ka hria a, ka pa ngainat zawng tak ani bawk nen Kimtei tan chuan khawngaihna a ngah dawn tih chu hrilh nawn ngai lovin ka chiang lutuk tlat. Heta ṭang chuan tih theih vak ka nei dawn silo Zaii hi ka innghahna awm chhun chu a ni mai.




Ramdina alo haw a a intihfai hnuchuan rilrua pai runa ippik deuhva ngaihtuah tluk tluk ai chuan tiin ka hrilh ve ta rawih a. A ni hi chu ka ringin a bulah hi chuan engkim ka sawi ngam a, ka thawl phah hawk ṭhin bawk. Ka thil hrilh pawh chu ngun tak hian alo ngaithla a, "Apa hrawn kha zu ngawl vei anih chuan Kimtei hi a rawn tibuai a, mi khawsa thei tak chhungkua a mi ani tih a hriat takah chuan hlawkna tel dan a ngaihtuah ve a ni mahna. I pate engmah a hrilh lo anih chuan chhan eng emaw vangte pawh a ni ve thei tho bawk a. A chinchin a hrilh zawng zawng che kha thudik vek anih chuan apa hrawn chu aman a pawh hmasa duh teuh lovang," Ramdina'n a tih charh charh chuan dik ka ti ve viau a.




Kimtein a chanchin min hrilh ṭum khan ka en chik viau a, dawtsawi hmel a pu lo. Ka chanah ka dah chhin hian khatiang pa kha nei ve ta ila, min hringtu ka pa tak tak anilo tih han hre zui leh phei ilang chuan hmuh nawn leh chu sawiloh theihnghilh vang vang ka duh ngei ang. Ramdina sawi ang khan apa hrawn chuan a vo te pawh ani maithei a, thil ni thei tam lutuk hian lu a ti hai zo takngial dawn!




"Ngaihtuah tluk tluk lo la, Zaii chu han ngaichang phawt ila ngaihdan siam te pawh a awl zawk ang. Ka sawi chu aw ngaihtuah tluk tluk loh tur, i rilruah keimah leh kan naute aia dah len nei rih suh," a tih tel zeuh chuan ka nui hak a.
"A ṭha, kha kha alawm ka hmuh duh chu, tikhan nui reng rawh. I nui hmel aia mawi tih khawvelah hian ka nei lo," tiin min lo fawp zeuhva, ka rilru hahna a ni hnena thlen hi chuan lakbo ang huai ani nghal ṭhin.




Zanah pawh ka bula awm chu ṭha ati aniang inkhawm lovin ka bulah a awm tlat a, "Ka ṭha ka rilruah pawh a awm tawh rih lo han inkhawm rawh a tlai hma hian," tia ka nawr pawh chuan,
"Ka ngai che alawm mawle min ning zawk anilo maw min va nawr nasa ve?" Alo ti let erh a, kan hanin hnial leh deh bap bap a. A chang leh min chheih renga kan inthinrim khum leh a, chang leh ka tihtauh khum a. "I fel e nangchu i ti tau te hi thlem i nuam si, 'Bawihte,' ka tih tawh che hi chuan i nem nghal diai diai zel tiraw?" Tiin min kheuh zeuh zeuhva. "A awihawmloh em mai a ka titau rei duh ngailo mai mai alawm. Ka tih tauh tak tak chuan e nangmah zawk hi i buai leh dawn sia ka khawngaih che alawm," ka ti ve charh charh a.




Awihloh hmel fea lo nui chunghian, "I ti tauh peih chhung chu ka thlem peih che," a ti vel ham ham a. Mut dawnah tih tauh khum ila 'Leenbawih' a ti leh duan duan awm tho si vel hian a!




Chutia kan pindana kan hlim dun viau lai chuan information-ah chhiat tawh thu an rawn puang ta dap dap a. Zan dar 8 a pel tawh a, vengchhak ami pi Hluni boral thu ani. Ramdina chu insiam nghalin a kal hma chuan, "Min lo nghak duh suh aw," tiin min chah a, han chhuak vak thei ni ila kal ve tepawh chu ka duh ve reng mai.





A tukah pawh chuan dawr kan hawng ta lova, Ramdina pawh zingah thlan lai turin a chhuak tawh a. Mitthi ina kal tur chuan u Cki'n Mimi-i a rawn sawm a, Ramdina pawh a chho ve leh nghal a.
Keichu zing aṭanga ka awm a nawm vak loh avangin ka kal peih ta ngang lova, Ka pu leh Dawngdawnga-te unau nen in kan lo nghak thung.




Mahse chawhnu herah Aizawl lama kan curtomer hlun readymade a hlawma la ṭhin tuin min lo bia in kan thawn tlak tur kawrte chu thlalaka thawn turin min lo ti a, ka nuam sam vak si lo nen nidanga a theih mai angem ka tih lahin a hmanhmawhthlak thu a sawi tlat mai bawk si. Min rawn ngen nasat em avang chuan han hnial pawh chu ka hreh khawp a, ka puanṭhuite lah mitthi inah an kal vek a tumah tirh tur an awm bawk si lo peihlo zet chuan ka chho ṭuih ṭuih a.




Mitthi ina kal ve mang si lova khawlaia chhuah pawh chu nuam duhlo tak ani.
Dawr ka thlen phei chuan ka hawng lawk lovin thawk ka la ham ham phawt a, ka infit loh zia chu tar chhe deuh ang mai alawm ka nih le...



Chet pawh chu ka che hmanhmawh thei lova, kan thuamhnaw khai ho chu thla la zung zungin ṭhu hahdam chungchuan ka thawn a. Ruah a sur dawn tih hriat takin thli a thaw ri deuh vuk vuk a, khua a dur nghal khup khup bawk.
A sur tak tak hmaa in thlen thlak a ngai dawn a, nihliap ken nachang pawh ka hre silo ṭah a chhuak ṭun mai.



Chutia ka thawn zo ta tia ka ṭhutna aṭanga ka din rual chuan ka pum chu a rawn na zawk mai a, din pawh ding ngil thei lovin dawhkan chu bawhin ka kun deuh vang vang a. Ka kea eng emaw tuiril luang thla ka hriat chuan thei leh thei lo hian ka han en a, a fim vek a. Ka thinphu chu rang ṭha zaih zaih tawh tak a ni!




Ka pumna lah chu a zual zel a, tumah hmuh tur an awm hnai bawk silo ka hlauthawng tawhin dawr pawnah chuan engtin tin emaw hian ka chhuak thei hram a. Ka hawikual a, ruah a hnai tawh bawk nen mi hmuh tur pawh an awmlo kan bul dawr vel pawh mitthi awm vangin an inkhar ve vek a.




Chutah ka pum chu rawn na leh vakin ka sira current ban dawm chuan kun chungin ka ṭhen deuh thlawk thlawk.
"Hey raipuar nu eng nge i tih a?" titu aw ka hriatna lam chu rang zetin ka hawi a,
"Hey...lo kal teh," tiin ka ṭawng rin theihloh avang chuan ka kutin ka hui a, a lollipop ken lai hmuam chungchuan alo phei ve mai bawk.




"Ehe! Zun i cheh elo?" ka ke a rawn hmuh chuan a ti deuh hlut a. Keia pumna tawh bawk si chuan, "Ka tui bawm a keh anih hi mawle Mawla! Tu emaw ko teh anih loh pawhin Damdawiinah min hruai vat teh!" Ka ti ṭeu hlar a, awi ana tawh lutuk chu current ban vuanin ka kun thlawk thlawk a.



"Tumah koh tur pawh an awm hnai lo, lo kal rawh," tiin ka sirah chuan a ṭhu hniam a, "I a mi puak chi ka nihloh hi!" Tiin a hnungah chuan ka beng ri thlawp a, "Ni tak e, awi engtin nge ni dawn? Bike-ah i chuang thei angem?" Tia rilru buai hmel zeta a a lu a tuai vut chuan ka ṭah a chhuak ngawih ngawih tawh! Mi zawng zawng zingah tinge hepa ber kher hi a rawn kal le?!




"Damdawiin thleng thleng chu ka pawm phei zo lovang che tikhan lo la ip ṭang ṭang rawh,"



"Ek cheh tur emaw min ti mi rak rak lo khan min pui thei tur va zawng vat rawh!" Ṭeng zetin ka lo ti hlar a. "Lo kal sawn miah suh ka rei lovang," tiin a kut chuan ka dinna chu ka kawk a, duh mah ila ka che sawn thei tawhlo hrim hrim. Hmanhmawh deuhva a tlan chu ka dinna hmun aṭang chuan thei leh theilo hian ka en zui ṭawk ṭawk a, ka innghahna neihchhun ani si ka rilru chuan 'Lo let leh vat rawh' ka ti mawlh mawlh a, Ramdina ka ngai nghal vawng vawng bawk.



**************
Show post links
Top