ALL THE WRONG PLACES 17 ONGOING

[B.laltlanhlui]

Chapter 4

"Nu, en teh ka note bu thar hi" Jared a'n a bag aṭang a rawn phawrh chhuak a "Pate Jin a'n min pe a" chhuan hmel zetin a ti sar sar a

Julianne chuan nui sen sen in lemziahna bu chu a han keu a, a phek ṭhenkhat chu a lo ṭial tawh a, a lemziah leh cheimawi vel chu mawi a tihsak ve viau mai

"I fapa hian thiam thil a nei ṭha tlat. Artist a la nih ka ring tlat" Adrienne-i'n a ti a

"Ni chiah mai. Kum ruk chauh a la ni a, a chei dan vel han en hi chuan hma hi a sawn riau a ni" Justin a'n a lo ti ve bawk

Julianne chuan a phek a keu zel a, a fapa chu a chhuang ve takzet. Hmasawn nan hun ṭha a la ngah bawk a, artist ṭha tak chu a la ni ngei ang. A pa Jas Mathieu ang bawk khan

"Ka chhungte hian Jared hi an chhuang ve lutuk a, ka unaupa Jin phei chuan lemziahna hmanrua a lei sak ṭeuh mai" Adrienne-i'n a ti a

"Tak tak em ni? Adrienne! A va ti ropui ve. I chhungte hi chu an fel e"

"Engmah a nih loh kha, Ian. I fapa hi an hmangaih alawm"

"Bawihte ka lem min lo ziah sak la" Julianne-i'n Jared chu a zawt a

Jared chuan nui chungin "I fiamthu a mi?" a ti a

"Fiamthu love. I ti thei tih ka hria alawm"

"Nakinah aw, Pate Jin hnenah ka zir leh phawt a ngai"

"Lem a ziak ve ṭhin maw?"

"Aw! A thiam lutuk alawm" Jared chu a phur sur sur khawp mai

Adrienne chu a lo nui ker ker a "Pathian in kan chhungkuaa talent min pek hi ka unaupa hnenah a in chhung khawm vek aniang" a ti a

"Min lo hrethiam la, ka hnial che a ngai tlat" Justin chu a rawn inrawlh vat a "Nang pawh i bang chuang bik hleinem. New York a lehkhabu hralh hnem ber te zinga hming vawi nga lang thei kha tunge?"

"Jamila McBride maw?" Adrienne-i'n uang deuhin a lo zawt let a

Justin chu a ṭhen suk a "Jamila McBride kha chu ka la hrechiang khawp mai" Adrienne lam hawiin engemaw hriatchhuah tir tum ni awm tak hian a nui a, a ni lah chu a biang a lo tai hlur mai

Jamila McBride chu Adrienne-i hming inphuah a ni. Justin leh Adrienne chauhin an hriat dun thil a ni

"I sawi dik ve tho mai. Jin hian rawng chei leh thai ran vel ah thiam thil a nei ṭha a, kei erawh a thumal zawngin thiamna ka nei ve thung" Adrienne-i'n inchhuang takin a ti ve a

"Khawiah nge ka rawng chei na?" Jared chuan amah awm tu lam panin bag chu a la a, a han hawn chuan designer case, color pencil, crayons, paint brush leh watercolors a kim vek

"En teh nu, a vaiin a kim vek a nih hi!"

"Lalpa le! Za vel chu a ni lo maw? I ta vek em ni?"

"Aw, ni e! Ka lawm lutuk" Jared chu a nui var var a

Julianne chuan a kawm a han en a, brand hming a han chhiar a, designer brand ngei a ni

"Adrienne, hei chu a ti mah mah deuh a ni. Italy ah heng pencil te hi ka en a, a man a to asin"

"A man zat pawh ka hre ve lo. Jin a lei sak vek a nih kha"

"Dollar sangthum man daih alawm" A fapa thil tihsak tur a ziah lai kha a ngaihtuah chhuak a, khatih lai khan hna a nei lova, pawisa a nei lo bawk. Mahse engtikah emaw Jared tan engemaw tihsak ngei a intiam a, chu pawh a tihhlawhtlin hma hauh in a la hmuh ngai miah loh Adrienne-i nau in a rawn lehthal zak a nih hi

"Sangthum a?" Adrienne chu a ka hau a "Ka unaupa hi chuan sum hi a ren vak lova, ka hrilh tawh che kha i fapa hi a ngaina tlat alawm"

"A wallet a phai phah lo vang" Justin a'n a lo ti ve leh a "Chhungkaw thil ah chuan sum a ngaihtuah ve lem lo"

"Mahse Jared hi...."

"Ho mai mai a, ka fapa ang tho alawm a nih! Nuam lo i tih viau chuan Jin hi ka rul leh mai ang"

"Ka unaupa chuan a pawm duh lo ang. Ka hrilh tawh che kha, Jared hi kan fate ang chiah a ni. I rilru ti hah lutuk suh" Adrienne-i'n a lo hnial ve a

"A nih chuan i unaupa chu lawmthu min lo hrilh sak dawn nia. Hetiang em em a, Jared a hlim hi ka la hre lo" Julianne rilru chu a no lek lek zawk. Jared hian a tet deuh aṭang khalh tur a tlachham ngai lova, pa anga a en pawh an tam

A pian hlim in Mason, Gian, Jordan leh Justin te a tan an awm a, mahse Julianne chuan Jared hian zawn a la nei tlatin a hre ṭhin

"I lawm loh hmel riau in ka hria" Justin a'n a rawn ti a. Julianne chuan a mittui a lo tling reng tih a inhre ve chiah

"Ka lawm vang zawk a nih hi. Jared hian duhsaktu a ngah zia hi ka lo ngaihtuah mai mai a, mahse pa anga en tak tak tur hi a la zawngin ka hria"

"A pa diktak kha i zawng chhuak thei reng alawm. Kum sarih a liam hnu hian a lo puitling ta sawt em tih te kan en thlithlai ang chu" Justin a'n a lo ti deuh hluk a "Gian nen hnek kan la chak reng tih i lo hre ve mai mai dawn nia"

"Justin!" Adrienne-i'n a pasal a rawn piai hlak a, Julianne lam a hawi a "Kha pa kha chu theihnghilh hmak rawh. Kum sarih hnu a enthlak tur i mamawh hleinem. A tlai tawh lutuk. Ian, tuna i mamawh chu ngaihzawng thar neih a ni"

Julianne chu Adrienne thusawi vang in a meng phar dawr dawr

"Aih, Adrienne. Ka thei lo tih i hriat kha. Ka fapa tan hun pawh ka nei hman mang lo ania. I pasal hi hna atchilh lutuk a nih hi"

"Eng maw? Hna atchilh lutuk chu ka ni bik lo ania aw. Hun awl ah i duh apiang i ti thei reng alawm. Ka beisei i rawn pha chho lutuk a, ka thiam loh pawh a ni em em lo e"

"Chawlh i mamawh a ni Ian. Paris kan rualin i kal ve ang. I hna thawh laklawh lai te kha dah bo vek rih rawh. Ṭhian thar siam a, hun nuam tak i hman ngei a ngai aw" Adrienne-i'n a ti a

"I theihnghilh tawh em ni? Paris a hun nuam tak ka hman hmasak khan ka rai pawng kha" Julianne-i'n a ti ve a

"Tun ṭum chu Jared a pahrawn tur leh i pasal tur i zawng ve thung ang a" Adrienne-i'n a lo fiam ve a

"Ngawi teh chuti vut vut chu ni bik lo e, muangchanga kal ka lo intiam tawh a, a lehpek a awm leh te a nih chuan ka tihna ania"

"Jared a pa zuna i lo uai chu i inchhir tawh tihna a ni maw? Mi nep tak a lo ni reng a nih chu a" Justin a'n a rawn ti hluk a

"Justin! Tunge a nih i hriat tawp loh kha! Eng thawnthu nge kan neih pawh i hre miah lo. Tikhan lo ṭawng huai viau suh" Julianne-i'n a vin let hrep a

"Ka hriat kher a ngai hleinem. Naute nen a kalsan che u a, Jared pian hlim ah pawh a rawn zawng miah lo che u ania. Chu chuan a mizia a lan chian tir viau mai. Kei hi chuan ka fate ka thlahthlam ngai dawn lo hrim hrim"

Justin a thinrimzia chu Julianne-i'n a hre thei. Khang kum chhung khan Justin, Gian, Jordan leh Mason hian Jared a pa han hre ngat se chu an sawp hrep duh dawn tih a chiang. Kha mipa hmelṭha tak tan khan a fair miah lo. A naupai thu hrilhna hun a neih loh mai bakah kha zan hun danglam tak kha theihnghilh theih a inring tawh lo a ni

"A ni kha kan mamawh hleinem. Jared a'n tlakchham a neih loh nan hna ka thawk nasa alawm. A cousin te angin thil a ngah vak lo a ni maithei. Mahse nghei kan nei bik lo" Julianne-i'n a sawi zawh rual chuan amah a intiam nawn leh a

A pa'n a hnawhchhuah aṭang khan trust funds, credit card, bank account leh a chhungkua thlengin a chan vek. Chuta chin chu harsa takin hun a hmang chho a, Jared nena an mamawh chiah a lei ṭhin

A unaupa leh a cousin te hnen aṭanga a thil dawn ho hi Jared a zirna atan leh a hma hun atan a dah ṭha zel a

Engtikah emaw chuan an la inchawm zo ve ngei ang a, in hran te an luah ve ngei bawk ang. Jared pawh university ṭha deuh ah a lut anga hna te pawh a la thawk ve mahna le

"Jared a'n pa a nei lo a ni maithei. Mahse kan vai hian min nei alawm" Adrienne-i'n a pasal kawngah kuah in a lo ti a, a mood fuh lo laklawh thlem a tum a ni ber e, Julianne lam a hawi leh a "I tan kan awm reng ania, tumah i mamawh bik lo"

Justin chu rawn thaw halh in Adrienne chal ah a fawp a

"I sawi dik alawm. Jared-a chhungte kan ni"

"Kan chhungkua hian kan lo lawm thlap ania. Jin a thinlung pawh a nei thlap" Adrienne-i'n a ti a

"Tinge chutia i sawi a?"

"Jin hi tun ang a nih hma hian mi hipna a ngah in a zei em em ṭhin. Mahse tun hnu hian eng nge a chhan pawh ka hre lo. A thinlung hi a khar deuh tlat mai. Entirnan ah hmeichhia hi lo hmang ta ila, hma hun neih pui hi a tum lo tawp. A kawp vel mai mai a ni"

Justin pawh a tawn hma che chuan amah ang tho a nih kha. Tunah chuan fa pathum in nei tawh a, kum tam a liam hnu pawhin a la ning thei lo che a nih hi" tiin Julianne-i'n a lo chhaih a

"Kei te chuan chhan ṭha tak ka nei alawm. Nupui hual ka nei tih ka hriat lawk vang khan hmeichhe dang hmangaih lo turin ka invawng char char a" A nupui chu duat hmel takin a han melh a "Mahse hmangaihna chuan min rawn zawng hmu a, Adrienne ka tawn khan a zunah ka uai nghet hle dawn tih ka inhre nghal a"

"I nupui hual ka lo ni kher bawk kha a lawmawm tiraw? Chu ti ni lo se, i chhungte'n an hnawtchhuak che ang a, Italy ah kan inbengbel ngei awm si a"

"Chu pawh chu a pawi em em loh chu a, Mason pawh an hnawtchhuak a, nuam an tih em hi" Justin a'n a lo ti a

"A ni ve leh tho mai. Mahse Jin a chungchang ah chuan let leh lawk ila, a ni chu a dan a dang alawm. A duh apiang a hmangaih theiin nupui pawh a duhzawng tak thlang turin a zalen a, mahse chu a hun ṭha chu lak a tum miah lo ania''

"Nupui hual a nei i ti a ni lawm ni?"

"Aw ni e, mahse a hmangaih vang a ni hleinem. Sumdawnna vek a ni e. Hmangaih neih hi a tum lo bur niin a lang. A thinlung a sak vek ka tih kha. A hmangaih tak nupui a neih ai chuan a hmangaih miah lo pawh hlawkna tur a nih chuan neih pawi a ti lo zawk"

"Tumah hi hmangaihna in a kan thei bik hleinem" Julianne-i'n a lo hnial a

"Jin hi chu a kan aniang. A case hi a tak deuh bik tlat, tihpalh duhtak" Justin a'n a nupui chu lainat hmel deuhin a nuih a

"A chhia leh ṭha hre turin a upa ve tawh alawm. Ka pahrawn pawhin tupa emaw tunu a duh thu a hrilh chamchi a, chuvang a ni maithei nupui neih hi a hmanhmawh em em. Fa duhawm deuh neih a, sumdawnna enkawl chho zel tu tur thlan a duh aniang"

"I nau chu ka khawngaih reuh khawp mai. Kan hmangaih tak te nena fa neih hlut zia han hre ve hlauh se aw. Adam's Industries pawh hi kum hmasa lam ngaihtuah chuan kan ṭhang nasa asin. Ka hmangaih tak ka neih vang hi ania" Justin a'n a ti a

"Thla hmasa khan Jin hi hrilhfiah ka tum alawm. Mahse a rilru a siam fel tawh a, a hmangaih lo tih a chiang em em chungin Vanessa kha neih a tum tlat alawm" Adrienne-i'n a ti hmuk a

"A nih chuan Vanessa Bernard chu a khawngaihthlak dawn hle a nih chu" Julianne-i a nui hak a "An in pawm dam thei em ang chu" a tih zui leh a

"Jin zawk hi a khawngaihthlak dawn lutuk" Justin a'n a han ti ṭan a "Ka hriat danin Vanessa chu a sual thiam reuh lutuk an ti a"

"Chu chu keipawh ka hriat dan ve tho a ni. A duh apiang a nei thei bawk si a, a awm ve viau tho mai" Adrienne-i'n rilru hah hmel zetin a lo ti deuh hluai a

"Hey, keipawh tlakchham ka neih bik loh kha. Mahse min duat sual ve lo aniang. Ka luhlul ve deuh pawh hi pawi ka ti lem lo. Tunah hian min han en ula, hnawhchhuah ka tawk a, ro chan tur pawh ka neih tawh loh hi" Julianne-i'n a ti a

"I ti ṭha lutuk ania cuz" Justin a'n chhuan hmel deuhin Julianne chu a rawn nuih a "Engtikah emaw Pate Edward hian a la hmu thiam mai ang"

"Mason an hnawhchhuah laia i beiseina a awm reng ang deuh khan em ni?" Julianne-i'n mitko sanin a lo zawt a

"Mason khan ngaihdam a dil reng reng hleinem" Justin a'n a ti a

"Keipawhin ngaihdam ka dil dawn lo. A hmaa dil ka tum pawhin min ngaithla duh lova, Jared hi a pi leh pu te hian an pawm duh loh vang hian ka lawm lo teh mai ania"

"Jared an hmuh hun chuan an ngaina dawn lutuk" Adrienne-i'n a lo fuih ve leh a

Julianne chuan lu a thing a "Lo ngaina lo ta se, Jared a lam hi hawi duh tlat lo ta se, engtin nge ka fapa chu ka hrilhfiah tak ang le?"

"Muangchangin mawle. Pen khat in hma kan sawn chho zel ang. Jared hian i tawrh ang kha tawng ve lo se ka duh" Justin a'n a ti a

"Ka la ngaihtuah ang chu. Engpawh nise nangni fa dang neih leh te in tum em?"

Adrienne chu a lai ngei mai. Justin a'n rawn kuah in a nui huah huah a

"I rin aiin a hnai ang. Phir han nei leh hlauh ila aw" Justin a'n a ti a

Adrienne chuan meng zau kawkin a pasal a han melh a "Phir i ti em ni?"

Justin chuan sam et hian "Kan chhungkua hian phir kan nei thei riau mai a, phir neih leh a chakawm alawm le. Chhungkaw lian tak nih ka duh alawm. A khawharthlak lo zawk" a ti a

"Engtia lian nge i sawi tak chu ni a?" Adrienne-i'n zam ru deuh takin a zawt a

"A lo berah panga vel" Justin a'n ngenngawl deuhin a han melh ve bawk a

"Panga pawh nei ula, in chawm zo vek tho ang. Lungngai lutuk suh Adrienne. Justin hian a trust fund neih zat a hrilh che em?"

Justin chu a lo nui kur kur a "Eng trust fund maw? Nupui ka neih khan ka hloh vek tawh alawm" a ti a

"Eng nge i sawi awmzia chu?" Julianne chu a meng phawk hra a, Justin a'n chutianga hloh vek tham a hman a ring thei lo a ni

"Ka sawi awmzia chu maw Adrienne ka hlan chhawng vek tihna a nih chu" Justin a'n a nupui chu duat takin a han melh leh a

Justin a'n Adrienne-i a hmangaih zia a hriat chuan engtikah emaw amah hmangaih em em tu a tawn ve theih a in beisei a ni

"I lo hriat ve atan Mister Adams. Khang pawisa te kha kan hmang miah lo ania. Car chi hrang hrang lei i tum ka venna che a nih kha"

"Car te chu kan fate la rochun tur ania. Ka lo khalh lawk mai mai alawm"

"Mipa te lirthei han lawm zia hi chu" Julianne-i'n a lu a thing a, Jared chhuata a lemziahna thar lo phawrh darh mek chu a zuk en pah a

"I fapa hi lemziak turin fuih nasa rawh, Ian. Theihna a nei ania. Naupang nazawng hian a kum rual ang ah an thiam vek lo ania" Justin a'n Jared chu a lo en ve a

"A pa chu lemziah thiam a ni tiraw?" Adrienne-i'n Julianne chu muang mar at in a zawt a

"Hmm...French pa lemziah a eizawng maw?" Justin chuan lu bu deuh nghut in Jared a pa nihna awmang chu a lo chhinchhiah ve zel a

"Awm ve mai mai teh Justin. Ka hrilh dawn chuang lo che. I tih tum a chiang em mai. I kuta thisen kai tir ka duh lo" Julianne-i'n a ti a

"Ka lo ngaihtuah a" Justin chuan a lu a thing a "Tu in nge he naute duhawm lutuk, themthiam bawk leh hmelṭha em em pa hi nih duh lo ang le?" a ti a

"Justin hian a sawi dik a ni. Ka unaupa pawhin fa a lak hial a duh in ka hria" Adrienne-i'n a ti a

Jeffrey chu room ah a rawn dak dek dek a, Jared ko in an pahnih chuan huanah infiam turin an chhuak a

Julianne thinlung chu a na leh ngut ngut tawh. Jared a pa kha a la hmangaih a ni. Tun thleng pawhin a hmangaihna a la reh lo. Kumkhua pawhin a dai tawh lo maithei. Fa a pai thu a hrilh lo te kha a inthiam thei lo. A chhungte'n an lo teh fo tur pawh hi a ni lo. Mahse engtin nge a hrilhfiah theih tawh ang le?

Phone lo ri chuan a ngaihtuahna aṭang a rawn kai harh a, Jared a phone a lo ni. Paris a kal dawn khan phone a lei sak ve a nih kha

"Kei tih loh tu in nge rawn bia ang le?" Julianne-i'n Adrienne a zawt a, hriat loh hmel zetin a lu a lo thing a, phone chu a chhang a

"Naute, eng nge i tih?" Line lehlam a mi chuan a rawn zawt a

"Min lo hrethiam la, tunge i nih aw?"

"Oops, Ian i ni ang maw?" Chu pa chuan a ti a

"Chuan nang chu?"

"Jin Starck ka nia, Adrienne-i unaupa"

"Aw a ni maw? Jared a nu ka nia. Ka fapa thil i lo leisak ṭeuh a, a to awm si a, ka lo rul leh dawn che nia"

"A ngai reng reng lo. Ka pek hlim a, a lawmzia chu hmu la i hrethiam ve mai ang. I fapa hian mi a ti hlim thei riau a"

"A nih chuan ka lawm lutuk ania aw"

"A ho lutuk a"

Julianne chuan Jin Starck hmel tur awmang mitthla a tum a, Adrienne khan an inan deuh thu a sawi a, mahse Adrienne mipa hmel tur chu a man thiam leh chuang lo

"Jared chu a cousin te nen huanah an infiam a, i rawn bia tih hi ka lo hrilh dawn nia"

"Khawngaihin lo hrilh ngei ngei rawh aw. Jeffrey leh phir unau te ka ngaihven ang bawkin ka ngaihven ve tur thu ka hrilh a"

"I fel hle mai. Ka lawm e"

"Engmah a ni hleinem. Kan in be thei chu a lawmawm e, Ian"

An inbiak zawh chuan Julianne-i'n Adrienne a va melh a

"I unaupa'n ka fapa a rawn bia a"

"Kan haw hma khan Jared a'n Jin hnenah call ve tho turin a rawn intiam tir a, Jeffrey leh a unau te pawh a be ziah ṭhin a"

"I unaupa chu i sawi ang em em a sual hmel chu a nih chiah loh kha"

"Chhungkua bik ah chiah khatiang kha a lantir ṭhin"

"Keimah ang chiah a nih chu. Keipawh chhungkaw tan eng pawh ka huam" Justin a'n a nupui a han melh leh a "Nang leh kan fate tan hian tih theih loh ka nei lo ania duhtak"

"Ka hria alawm" Adrienne-i'n a hmuiah a fawh sak a

"I unaupa chu French a ni emaw ka ti a" Julianne-i'n a rawn sawi nawn leh a

"French chu a ni alawm"

"French awphawi a nei lo reng reng"

"A chang chuan a nei ve tho. A tlangpui thu in nei lo ang vel a ni. English hi a hmang ngun ber a, ṭawng a thiam hnem lutuk. Zin kual ngun chuan hloh a awl aniang"

"I chhungte chu hmuh ka chak khawp mai"

"I hmu ṭep tawh alawm. I chungchang hi an hre hneh tawh. I fapa hian a sawi ṭhin che a"

Julianne chu a nui ker ker a "Ka chungchang a ṭha zawnga a sawi hram ka beisei"

"Sawi chiang e a, hmeichhe hmelṭha ber i nih thu a sawi alawm" Justin chu a rawn nui huah huah a

"Nuihzatthlak a awm em ni?" Julianne chu lawm loh hmel deuhin a awm der vel a

"Tihpalh thil hriatchhuah ka nei alawm mawle. Jeffrey hian Jin bulah pawh i hmelṭhat zia thu a hrilh a, naupang ka aṭanga chhuak a nih vang khan a ni pawh kha a zak lek lek zawk alawm mawle"

"A va ti lawmawm ve mahse duhtu hi ka neih ka ring love a"

Justin chuan mitko a rawn san a "Eng nge i sawi awmzia chu? I hmelṭha reng alawm Ian, indah hniam lutuk suh"

"Ka hmuh hmasak ber che kha i la hria em Ian? Justin nen zan hun in hmang dun emaw ka tih kha?" Adrienne-i'n a rawn zawt a

"Engtin nge ka theihnghilh theih ang?" Julianne chu a nui ker ker a, Adrienne leh Justin an inṭhen phah a ni a, Cousin an ni tih kha a hre ve si lova. Kha kha Justin a'n hmeichhia a atchilh ve tak tak tih Julianne i'n a hriat hmasak berna a ni

"I hmelṭha kha ka ti lutuk a, barbie ang mai i ni. I aw pawh kha a mawi lutuk. Mipa tu pawh i zunah an uai thei hrim hrim ang. Tunah pawh hian i la hmelṭha lutuk ania" Adrienne-i'n a ti a

"Tinge duhtu hmu lo tur anga i inngaih tlat mai le?" Justin a'n awih loh hmel zetin a rawn zawt a

"Ka unaupa nen hian kan duhpui dawn viau che a, mahse a nun dan a thlak phawt loh chuan a phu lo che. Mipa diktak i zuna uai hnap tur leh khawvel tawp thleng pawha zui zel tu tur che i phu a ni. I fel in i thinlung a thianghlim em a, a lo melh tai ve che a nih chuan ka sawp hrep ang"

"Chutiang pawh a ni lo, Yen" Julianne chu a zak ve det "Nu ka ni tawh a, tlangval te hian ka fapa an pawm thei dawn em ni? Hetiang hi ka hmu tawh alawm. Jared rilru ka tihnat sak thei lo vang. Ka fapa min hmangaih pui thei tu tur ngei an ni tur a ni. Ṭhen hran theih kan ni lo"

"Mipa ṭha tak i la tawng ngei ang. I fapa pawh a hmangaih pui thei em em ang che"

"Ka hmuh loh pawhin a pawi chuang lo. Jared a hma khua ka ngai ber a, a pawimawh ka ti ber bawk"

"Inkharkhip vek chuang suh Ian. Tu in nge hria, i mamawh tak chu a lo awm hnai viau maithei ania. I rin aia hma in i tawng thei bawk"

Julianne chu Adrienne melhin a nui lui a, a eng lam a thlir tlatna hi a ngaisang reuh. Mahse ngaihtuahna hran daih a nei ve a, Adrienne thusawi chu dik a ti tho bawk si

****

End of 4