STORYFB.COM

KA SUT NGAI LO ANG-7.

Nutei Tuahzo Chhakchhuak.

Sak hmel hmuh lo zun ngai in ka awm a, Hna kal turin tha reng ka nei lo, Hmangaihna hian tiang khawp hian nun a kai hruai in Mihring taksa ah thu a lo nei tak zet ani hi, khawih thei miah si loh, taksa leh ruangam pawh nei lo Hmangaihna chuan nasa takin ka thinlungah hna a thawk, Nelson-a ngaihtuah lo in minutes khat pawh ka awm thei lo a, Hmangaihna in a ken tel lunglen na chuan min zem a, Lungleng reng rengin ka hun leh ni ka chhiar vang in ka thla tin hun bi pawh ka lo ngaihsak lo a, chawlkar khat lai in a pel tawh tih pawh ka lo ngaihtuah pha reng reng lo, A mah Nelson-a chuan ka ngaihtuah na leh suangtuah na zawng zawng pawh a thu nun vek si a ni, keimah lam reng reng hre chang lek lo in Nelson-a zun ka awm a ni si a.

Ka rai chu ka ring chhiah lo na in ka beisei erawh a sang hle a, zun test na Damdawi dawr a tang a ka lei chu bualinah ka luh pui nghal a, ka thin phu a rang zawih zawih bawk, a hnu minutes khat lek ah chuan ka rai ngei ani tih fiah na tur rin sen pa2 in thai thla kal chuan a ti chiang a.pum ni nghul te, luak chhuak tak a ka awm thin vang chu ka pumah Naute a lo awm reng vang ani. Ka hlim lutuk chu zuan vak ka duh a,mahse ka in sum hram hram ani, ka pumah naute a awm si a.hlim takin bualin ka chhuahsan a, Ka hmangaih ber fa ka pai miau a vangin ka hlim lutuk tlat, Nelson'n a hriat ve hunah chuan kei ang bawkin a hlim ka ring, tunah tak hian ka bulah awm se chuan ka lawm a kim tur, eng tikah nge a lo let dawn a min lo biak dawn tih ka hre lo mai pawh a.

Nau ka pai tih ka hriat chhuah a vangin ka hlim a, ka hmangaih chu eng ti kawngmah in tu mah in min lak sak dawn lo a, tu mah in min dal thei ka rin lo a kan in kar suih nghet tu leh min phuar nghet tu tur a nih vangin ka hlim hle ani a, mahse amah Nelson-a ber in min lo be ngai si lo, keimah lo mi dang pawh a lo awm pui tawh reng mai thei bawk, Phone tal pawhin a awmna chin leh e nge ka tih thin te tal min zawh ve chu ka phu ani,ka nau pai chu zep tum eng ang mah ila ka zep thei dawn lo tih ka hria, ka pa in a hre thuai dawn a, tin hna thawk a ni tin ka kal na hmun a mi ten a hre thuai dawn tih ka hre bawk, a mah Nelson-a chu awm se zawng zahawm tak a in nei in kan fa lo piang tur hma hun kan sawi dun mai tur, Chu zawng zawng ka ngaituah chuan ka hlim na te chu a reh rawih rawih a, ka puak keh mai dawn in ka hria, a chin hre lo a lo sakuh ser nghah tlawk tlawk chu ka thei ngang lo, ka pumah naute kan fa a awm tawh bawk si a, tu mah rengin an hriat hma a tih dan kan ngaituah vat angai ani.

Roomah ka vei tawn chhen a, tih hmasak a awm dan tur pawh ka hre chuang lo, ka khum bula phone chu ka la kang vang vang a, Kha hotel kha ka phone mai a ngai ani, kha hmun kha a lo phone emaw a lo let tawh mial takin.
Rei lo teah lehlam a tang a chhanna ka hmu thuai a, Hotel khual chhawn a nih thu hawihhawm takin a sawi par par a,
"Rosemary William ka ni a, Mr, Nelson-a hi hotel a lo let leh tawh em?" Rang ze in ka ti a.
"min hre thiam la pawn lam mi hnenah kan hotel a thlengte chanchin kan sawi ngai lo."in thiam lo tak in leh lam a a tang a min lo be tu chuan a ti a.
"Nelson-a hotel a, a lo let hnuhnun ber ka hre duh mai ani," ka ngen tak zet zet ani.
"Kar 1 liam ta khan zan1 chauh a lo riak, chu zawng chu kan sawi thei a ni e" eng emaw a keu ri chu ka hre thei a,
"Ka lawm e" phone chu ka dah ri chawrh a, Nelson-a chuan min kal san a tum ani, ti nge zan khat chauh pawh riak se, min lo biak loh, ti nge chanchin engmah min hrilh loh, zawhna hlirin ka khat a, ka zawhna chu chhang thei pa1 chiah a awm chu pawh khawiah nge a awm lah ka hre hek lo, ka thinlunga zawhna awm zawng zawng chhang thei tu chu Nelson-a chiah ani.

Khumah ka thu zawi hnawk a, ka lo lawm tawh teh reng nen , ka nau pai a vangin engkim tha zawk turah ka lo dah a, engtin nge a pa ka hrilh ang,ka hnaih tak a awm pawhin min lo be duh lo ani a, ngawi reng a kan in kar tih chhah chu alo tum ru reng em ni le, mi nunrawng te tih ang in engmah sawi lo in min kal san tur chuan a nun rawng in ka hre si lo, rilru in thil tam tak a ngaihtuah a, hah chawlhna reng a awm lo.Chu ti chung pawh chuan beiseina ka la nei lui hram hram a,"ka lo let leh ang" a ti a nih kha, dawt sawi hmang tur chuan ka dah phal lo, mi bum hmang ni turin ka phal thei ngang lo ani. ka mittui erawh ka seng hnem, mit bui luk a ka thawh chang leh tap tih hriat tak a mit sen rum a ka awm chang chuan ka pa hian khawngaih mel takin min en leh ngawih ngawih thin.a ni telin ka tla hniam rawih rawih a, hmuh theih khawpin ka chhe chak ni ber in ka hria.
"I awm dan ka chik hian eng emaw dik lo chu awm tih ka hre mai a, Nelson-a nen in in kar a tha lo em ni" ka pa in zaidam zet a min tih chuan ka lung a ti chhia a, tap lo turin ka in sum hram hram ani.
A fanu lungngai tak a awm reng chu hmuh hreawm a ti hle tih a hriat ngawih ngawih bawk.
"Kan in be ngai lo, ka hnenah lo let leh a in tiam a mahse bum kual mai mai ka ni in ka hria"ka mittui chu dan sen loh in a luang zawih zawih a.
"I duh viau em ni" ka pa chuan a ti charh a
"Ka hmangaih ani, ka mamawh tak zet ani" ni e tun dinhmunah chuan ka mamawh tak zet ani.

Ka pa chu a ngawi deuh vang vang a
"Mipa ani a, mipa hian buaina kan ngah em a, I nghakhlel mah mah ani chu, a lo be em em ang che dawhthei takin lo nghak hram hram rawh"a hnar a phit dat dat a,ngun zetin min en ran a. Ka rihna tla hniam ta viau chu a lungawi vak lo a ni ngei ang.
"Ni lo, ka mamawh ani,min be tur ni se min lo be tawh ang" chuai raih in ka ti a, ka kut in ka hmai ka hup bawk.
"Ka hnen a sawi duh lo I nei tih ka hria, I in bun ruah na ka ni thei a nia"ka pa chuan min rawn ban a, Nu hmangaihna dawng lo ka ni a, a awm zia lah ka hre hek lo,pa hmangaihna erawh ka tan hian a hlu ani.
"Pa tunah hian nau ka pai mek ani, Nelson-a ka mamawh tak zet na chhan chu I hre thiam kher lo ang" ka pa chuan ka darah min dawm a, ngun takin min thlek a.
"I chiang em?"awi lo tih hriat zetin min ka dar chu a sawi nawk nawk a, a mit ah erawh thinrim na ka hmu lo a, ka ngam pa deuh sawt in ka hria.
"Aw," zuai raih in ka ti a, ka sam ah min chul a, thlamuan min duh tak zet tih a lang bawk.
"Ka hre thiam e,I lo duh tak zet a nih dawn chu, Lungngai mah ta che, a lo be em em ang che I pa ka awm hi" min thlamuan viau na in ka chhung ril ber ah erawh hlauhthawn na ka nei a chhan chu engtikah mah a lo let leh ka ring tawh lo ani.

Ka awm dan engkim ka hrilh a, zep engmah ka neih tawh lo a vangin ka thaw veng hawk bawk, ka pa chuan min hau viau dawn emaw ka ti a, mahse ka rilru tih nat a hlau tih ka hria, puitling ka ni tawh a, a fanu hi ka puitling tak zet tawh ani.nau hial ka pai tawh si a.
Ka pa chuan min duat zual sauh a,ei leh in tur tha tin reng min pe a, ka ei thei chuang lo,
"I ei loh chuan I naute a tha thei lo ang, I pumah khan I thisen ringin nunna nei a awm tawh kha ei lui hram rawh"ka pa chuan min tur lui a, ka ei lui hram hram ani, pa a zawng a pa fel tak ka pa a nih vang in ka lawm a, engkim ah min pui tu leh min fuih tu a ni.
"Hna lam pawh chawl rih la a tha ber, nang leh I naute chauh ngaihtuah ang che, Nelson-a pawh in a lo be em em ang che"ka tan hian ka pa hi a hlu chuang ani, ka pa awm lai chuan ka hlim lui ve hram hram a, ngaihtuah erawh a thui duh khawp mai ka fa vang chauh hian ka hlim a ka nung ve hram hram a ni.

Kan phone chu a ri na sa a, kan in a hnathawk chuan a lo chhang thuai bawk.
"Rose, an be duh che" Nelson-a chu ka beisei ngam tawh lo hrim hrim a, office thil a nih ka ring zawk mah.
"Tu nge I zawt em?"
"Zawt lo"
"Rose, I biak a khat hle mai,I aw ka hriat loh na chian pawh ka hre tawh lo"zuai raih in a ti a. A aw chu ka chiang ngam lo zawk ani.
"Ka tha a lawm" ka lu hai muai muai a, ka tlu mai dawn a ka hriat a vangin ka in dawm ding hram hram a.
"I tha lo tih ka chiang mai," aw thawp sat chuan min thu nun vek ni mai hian ka hria sawi tur ka ngah nen sawi hmasak tur pawh ka hre reng reng lo.
"Ka tha lo tak zet ani"
"in in bul mai ah ka awm a, lo kal ta che nge ka lo kal dawn zawk"a aw chu Nelson-a ang ta lo hle in ka hria, min ngaihtuah hmel tak kha tunah chuan mi dang daih ni in ka hre tawh zawk ani.
"Ka lo kal mai ang" a awm na a sawi zung zung a, phone chu ka dah nghal a, rang takin ka in siam nghal a, ka phurna leh huphurhna chu a in zat reng ani.

Nelson-a chu hotel kil khat ah dawhkan mawi tak chung a kut nghat in a lo thu a, eng emaw ngaihtuah tih hriat fe hian a lo in dawm kun a,
"I lo thleng har hle mai, thu rawh" a ep zawngin ka thu a.
"Min biak I tum tawh lo emaw ka ti hial ani" zawi te in ka ti a, a bula ka awm hnaih a piang a ka lungphu rang ta thin hi ani ka hriat thiam loh chu.ka hmuh huna ka sawi tur a ka tih pawh ka sawi thei lo ka ngai tih chauh ani ka hriat chu.
"Chawlh ka nei thei ngang lo ani"
'Chanchin in hrilh tur tal pawh a min biak pawh I theih lo a maw'ka kut dawhkan a mi chu a rawn dawm vat a.nghet takin a hum nghal bawk.
"Ka tum a lawm, thei ila ka lo be em em ang che"nghet charh in a ti a, rang takin ka bukah a rawn in sawn a, mi awm thup pawh zah lo in min rawn kuah a, ka hmui ah a kut dah in tawng lo turin mi ti a.
"Min ngaihtuah reng reng in hun I hmang tih ka hria, I pa in be tur che in min ti ani"ka pa chuan engtin nge a biak tih zawhna chu ka chak a pa nih tlin takin ka biak duh chu biak dan a lo zawng anih chu.
"Ka mamawh che ani..." ka zawi zawh hma in a kutin min zap a, ka hmuiah duh thawk takin min rawn fawp vang vang a.
"Hun ka neih loh a vangin tunah pawh rei tak ka awm hman lo a, Tih tur ka nei a, ka tih zawh a hmuh che ka tum zawk ani, mahse I pa in a sawi nasa si a, rawn hmuh hnasak che hi ka duh leh ta zawk ani"ka kut chu a hmer nghat zual sauh a.
"Hrilh tur che ka ngah lutuk a, hotel te kha ka va phone a, hotelah zan khat I rik kar hmasa khan" ka dem a lawm, mahse a hmel ka hmuh in ka thinrim na leh ka dem na chu a reh leh vek tawh in ka hria,

"Oh nih chu, min hrilh miah hlei nem, ka let leh a ngai si a, ka lo hrilh ta lo che ani,hun ka ngah lo a, meeting dar6 hian ka nei a, ka tlai mai dawn si a, dar9 ah chuan kan zawh theih mai ka ring a, he hmunah hian zanriah kan ei dawn em ni" tun hi nau ka pai tih sawi hun ani lo a, zanriah ei hunah ka sawi tawh mai a ang chu.
"Sawi tur tam tak ka nei ania" ka hlim leh hialh hliah tawh chu kei mah leh kei mah pawh mak ka in ti hial ani.
"Kei pawh ka nei a lawm, I hmel ka hmu a tunah chuan duh tawk hrih phawt a ngai ani" a ding a, min kai tho a, pawn thlengin min thlah a, Uar thei tawp in ka hmuaih a fawp a,mi fawhna chu a na mah mah ani, thaw a chhan loh chauh bawk.
"Kal rawh le, ka lo en liam ang che" zuai raih in a ti a, a hmelah chuan eng emaw tak chu a awm tih ka hria a, kei pawh chik takin min ense ka hmelah eng emaw a lang ngei ang.
"Zanin ah chuan I lo kal ngei ang tih raw" ka chiang ngam lo ani.
"Ka in tiam ngai lo a, ka lo let ang" zuai raih in a ti a, engemaw kam tu lian tak a nei a, chu chuan a kap ve ni ber in ka hria, kei pawh in sawi tur tam tak ka nei ani.
"Ka kal a nge"
"Rose,"a chhing vang vang a.
"Ka lo bia ang che"ka kal tur pawh min thlir zui ta lem lo chuan hotel ah chuan a lut a,rei lo te ah in hmu leh mai tur kan ni a, tah chuan engkim ka hrilh vek tawh ang.a awm dan a tang khan Min ngai ve hle tih pawh ka hre thei ani.

Zan dar kua chu ri har ka ti ber tum ani, sana ka en ngun in dar8 velah ka in peih at a, ka pa erawh ka kal na hrilh tur pawh in ka hmu lo, hna lak lawh a nei anga a lo la haw lo ah ka ngai hmiah bawk, hote lam pan a ka kal lai te chuan ka hlim em a vangin ka hawi her pawh a zang vah a, darkua rik hmain hotel tlai akan thut na ah chuan ka awm vang tawh.
Dar9 a ri a, Nelson-a hmuh tur a awm lo, dar10 ah pawh a la rawn lang lo fo a,
"Miss, William" khual chhawn chu ka bulah alo ding reng a.
"I ta tur"lehkha min pe a.hmanhmawh takin ka en a.
"Zanin ah chuan ka lo let leh hman ka ring tawh lo zawk ani,I pa I lo zawt fiah vek dawn nia, chhanna a pe ang che" tih zawng chu a awm a.mak ka ti ziah chu.ka meng phawk hra bawk.
"Tu nge hei hi pe che"
"Nichin deuh khan mipa pa1 in pe che in min ti ani" ka tho thut a, hman hmawh takin ka tlan chhuak dawr dawr a, Lehkha dah tu chu tu dang ni lo in Nelson-a ngei a ni tih ka ring a, ka hre bawk, A mah hmuh ngei ka duh vangin la um phak mai ka in ring a,step chu ka rap pial thut a, thawk leh khatah ka awm na chu thimmup in ka hria, ka taksa chu step ah chuan a in sawh thla pawp pawp a, din ka duh a, keima thu in ka ding thei si lo.
'Ka naute" ka hik mup a, a thim ruih bawk.eng mah reng ka hre tawh lo...2 be cont..

KA SUT NGAI LO ANG-8.

Nutei Tuahzo Chhakchhuak.

Ka harh chhuah leh meuh chuan ka hriat ngai reng reng loh na khumah ka mu a,
Ka thil hriat leh hmasak ber chu ka bula ka pa awm chu ani, eng vang a he khum a mu nge ka nih ka in hre thei mai lo a, ka awmna chin leh ka mut na chu ka hre hek lo, ka luh lah chu a na ut ut a, a puak keh dawn emaw tih mai tur khawp in a na a, tin engmah reng ngaih tuah thei lo khawp a ka ngaih tuah na a mang leh zel te chu ka hre thiam thei lo, ka mut na vel chu ka hawi kual ruai a, ka kut zung chalah puan kilh beh na ang chi lian leh hrawl tak hian alo in chep bet ran a, ka ding lam ah chuan khawl a tak a ka la hmuh ngai reng reng loh chu a in hung khap bawk, chu khawl chu T.v velah chuan ka hmu fo tawh, mihring thawk dan lungphu en a ngaihthlak na tih ka hai lo, Mahse enga ti nge keimah nen a in thlun zawm tuk si le.

Ka ngaihtuah na a fim tulh tulh a, ka hriat na pawh in ngai a awh leh tial tial bawk. Nelson-a khan kei hi min thlauh thla a, tun din hmunah hian ka ding ta ani, ka hriat hnu hnung ber chu step a ka in sawh thla bawp bawp chu ani,a thim mup a engmah reng ka hre tawh lo anih kha.rang zet in ka pum chu ka zut a, hlauh thawn na leh thlaphan na in ka khat ani.
"Ka naute, eng tin nge a awm, khawi hmun ah nge ka awm" ka aw chu a ri chang chang a, keimah pawh in ka hre lo hial zawk ani, ka aw chu a phui in a thawp a. Tawng chhuah pawh a harsa zawk hial ani.
"Rose, ka chan ta che emaw ka ti asin" ka pa hmel chu a pawr phang a, min ngaihtuah tak zet ani,
"Khawi lai ah nge ka awm, e nge ka tih" tukverh puan zar te chu ka tukverh puan zar nen a in ang lo a, kan in a puan zar nen pawh a in ang chuang lo.
"Damdawiin ani, ka chan loh che a vangin ka lawm hle a ni, ni khawhre lo in I awm rei a, ka chan ta che ah ka ngai ani" ka pa mit meng dul raih chuan min hnem lo a, min thlamuan zo hek lo, ka naute a tha tih ka hriat hma chu
"Ka naute a tha em? Damdawiin ah eng vang awm nge ka nih" damdawiin tih chu ka chiang ani, ka vela khawl maksak tak tak in hung khup chuan a ti chiang leh zual.
"Darkar 9 daw lai ni khaw hre lo in I awm tawh, step ah I lum ani" ka ngaihtuah na chu a hma ai a chiang zawkin ka sawr bing thei a, Mahse ka lu erawh ana tluk tluk thung.

"Ka naute eng tin, keimah chu ka tha"zawi tak in ka ti a, ka naute tha se ka duh ani, a pa Nelson-a nen ka in zawmna min hriat reng tir tu a ni si a, "ni lo, min kal san ani" ka ngaituah na ah a lo lang a, ka hnenah let a in tiam a nih kha, Mahse Mi nunrawng ber te tih angin engmah ka hnen a sawi lo in min kal san a nih kha, a lehkha min hnut chhiah chauh ka chang a, ka umna lam ah ka tlu a, step ah ka lum ani , naute ka cham chuan ka ngaidam ngai lo ang,
"Rose, engkim hi I hriat a tha rih lo e. Tha chhuak leh vat la ka duh ber ani" ka pa chuan ka kut chu a hum na sauh a, a hmel buai nak chuan min chhawk lo.
"Nakin ah hriat aiin tunah hriat ka duh zawk"ka ni nghul a ka chua tak zet ani.
"Naute chu kan chhan hman ta lo ani, step I lumna ah khan I sawh che vek, thisen I hlauh hnem hle bawk"ka pa mit mengah chuan keimah khawngaihna a lang a,a tu a hmuh hman lo vang pawhin pawi ti hmel apu bawk.

Nelson-a lehkha hnut chhiah chu ka mithlaah a lang a, ka naute ka chan a vangin na ka ti bawk, ka pum ka dawm a.a ruak huai in ka hria, ka hnute chu a tang kawh lah bawk a hriat na ka nei a, ka na tak zet ani, a hmel ka hnuh hma hauh a ka fa chan tur a ka in ngaihtuah chuan na ka ti a, ka kawchhungah a tla a, ka na vawn vawng ani.
"Naute chu ka chan thei lo, ka pa, hriat sual a ni, engpawh huam a ka enkawl tur a nih kha, ka chan thei lo, ka tan a hlu lutuk ani, dawt ti raw."tap turin mit tui reng ka nei lo. Ka mang a ang zawk, mihring hi mangan tawp ah chuan kan mittui a lo hul thin a nih dawn hi, ka tah a chhuak a. mittui tla tur reng ka nei der si lo.
"Dawt ni se ka duh,kei pawhin dawt leh hriat sual ni turin ka duh bawk"ka pa chuan engkim min hrilh hreh a, ka tan a tangkai chin chiah min hrilh a duh a,mahse a fanu chak lo tak hian engkim hriat fai vek ka duh lawi si ani.

"Nelson-a nen khan in hriat na in nei tawh reng em? A lehkha ah min kalsan chhan I hriat thu leh chhanna I neih thu a sawi ani"ka mit kham ut ut te, ka lu na in tur ut ut a vang te chuan ka meng hlei thei tawh lo a,ka rilru erawh ala harhfim a, ka na hmangaih kal san chu ka tuar thei mai ang, ka fa nen chuan, mahse chu pawh chu ka tan lak bo ani a, engtin teh lul in nge ka tuar theih ang le, ka fa ka ril a rah ka chan a, a hmeltak ngial pawh ka hmu lo a ni si a, chu chuan min ti na leh zual ani.
"Ka hre thin ngei tih chu ka zep lo, mahse ka fanu in a duh chu ka duh ani, hnialna ka nei lo, in in karah hian in rawlhna ka nei hek lo, ka fanu tan a tha tur chiah ka duh ani.ka tu chu kei hian ka ti hlum thei ngai lo ang"ka pa hmel chu hla tak ang mai in ka hmu a, ka hriat leh ka ngaihtuah na awm chu min kal san tu te pahnih ka fa ka chhiat leh Nelson-a chauh ani, a ruangam leh pian zia hre mah suh ila ka fa ni miau a vangin ka hmangaih a. Tin a pa pawh lak let thei rual lo in ka hmangaih ani.

Ka mit chu mit tui in a bual a, ka pa chu zawh tur tam tak ka nei a, mahse tunah chuan zawt turin ka chakna te chuan min phatsan zo a,Nelson-a a chu ka ngai ani, mahse a ni zawng ka hmuh phak loh ah a awm a, a mah ka mamawh lai in min min thlamuan tur in a awm hek lo, tun a ka pal tlang mek hi hmeichhe in a hmah mai a tuar a tan chuan a na lutuk mah mah ani,fa ka chan a, min hnem turin a pa ka mamawh bawk, mahse a ni chu ka khawih phak leh hmuh phak ah awm lo a, min tanpui turin a hnai hek lo.ka tan a tha tur kan in kar suih a phuar nghet tur ka fa ka chan a, a mah ka um na lam a nikhaw hre lo leh puih ngai a ka awm in ka kiangah awm lo a, min hnem hek lo.min kal san tih chiang takin hre mah ila ka thinlungin a pawm thei si lo, amah chu ka la nghak a,ka la beisei fan ani.

Chu ka beisei na chu boruak ah a tham ral a, damdawiin ka chhuahsan hnu pawhin beisei lo tur beisei nei in ka hman hleh a, nau ka pai tih ka hrilh lo vang a min kalsan ni ah ka pawn lui a,"nau ka pai tih hrilh hman ila a dan a dang ngei a nga min kal san lo ang"ti in ka in hnem chawp a, nitin ka nghak a, thlatin ka beiseina a pung a, kum tin ka thinlungah a lian a nih mai hi maw, beisei lo tur beisei a beidawn thlak zia hre turin ka fing thei mawlh lo anih hi, hmangaih na at thlak nge hmangaih na dik tak pawh hre thiam lo leh thliar hang thiam lo khawp in hmnagiahna bawi ah ka tang nghet a, ni tin min sawp chau a, nasa takin min hngaisa in chin tawk nei lo khawpin min tuk dawl a nih hi. Hmangaina vanduaiah pawm thiam ila ka nun khua a nuam zawk mahna le.beisei lo tur ka beisei a vangin ka in dem chang lah a tam na rawh, hmalam pan turin in ka in fuih ve fo a lawm, mahse hmangaih hmasa tuin nge theihnghilh thei teh lul ang ni, suangtuahna at thlak ka suangtuah thin a vang te hian mi khawngaih thlak ka van ni em!

Ka taksa in atuar em a vangin kum2 dawn chu tah na hun ka hmang a, Nelson-a lo lan a a lo kir leh mai ka ring a nih kha, pa a zawng a pa tha tawp khawk pa ka nei a vangin Pathian hnen ah lawmthu awm rawh se! Min enkawl in engkim min ngaituah sak a, kum khat hial chawlh min pe a, engkim ah ka hnung a dawl si a, Nelson-a lo lan leh emaw min lo biak hun ngai changin phone hlatah ka awm ngai lo a, kum sul a vei hnu pawhin ka la beidawng lo a, beisei na ka la nei hram hram thin,
"Dar kua ah ka lo let ka beisei, thu ka tiam ngai lo a, ka tum ang" ka hnen a let leh in tiam tu chuan engmah sawi lo in min kalsan ngawt ka ring lo, kha lehkha kha tu emaw dah pawh a ni mai thei ka ta lo tur pawh ani thei tih a in hnem chungin ka lo sakuh ser nghah tlawk tlawk a nih hi.

Nelson-a chu kum 4 dawn ka nghak a, mahse nghah chhuah tur reng awm si lo, beidawng lo turin in fuih thin mah ila a mah ka nghah chhuah miau lo a vangin ka bei dawng tak zet tawh, khawvel a mi khawmgaih thlak ber ka van ni teh lul em! Beiseina reng ka nei tawh si lo, ka fa ka ril a rah in khawvel a chhuahsan rual ka khawvel a tawp ve mai lo te chu ka in dem a, tin, Dawt min hrilh a, min bum tu Nelson-a chu ka haw tak zet bawk, A mah vangin engkim ka chan a, ka nun hlim na thleng pawhin, khawvela mi khawngaih thlak bek ka nih tak hi. Nung reng chungin ka thi a, thi mek chungin ka tawih ral si a, Nun na nei tawh lo ang mai in ka bawraw a,pawisak nei lek lo a ka chhua tak hi, mahse ka taksa a, Nelson-a sul hnu hi tu ma chhui leh tih hmel hem ka phal lo, haw viau in a chin hre lo mah ila, min la thunun tlat si a.

Ka beisei ang a a lo let tak loh a chuan ka bei a dawng tak zet a, thih chak hial khawpin ka awm thin. Kum 4 lai liam tawh a ka nun khrih tak kha tunah theihnghilh in Nun thar a nun ka tum tawh mek lai a, engkim a buai zo leh ta vek a ni, ka hua a. Lo let ka beisei tawh lo chu tunah ngei hian ka hmah a ding a, chu pawh a nupui hual ni ngei tur nen, ka mithlaah tun hma chanchin chu a tak ang mai in a lo in lar zut zut a, ka hmangaih na chu huat na in a khat ani,engkim kha a thiam lo vek ani si, tunah chuan Sumdawng mi Ang takin in awm a, sumdawng ho in hmuh khawmna ah mi mit la tur ang berin a in lar leh si.a hma kha chuan A chanchin chhui zawm tur awm lo khan a bo hmak a, Ka hre chiang lo reng a, kan in tawn tan tirhna hotel pawh vawi tam ka lung leng leh khawhar a vangin ka kal a, a chanchin min hrilh thei an awm lo a nih kha,

Midang ka ngaihtuah tum velah ka nunah a in lar leh a, ka hmuh phakah min ti buai tur tingin a lo awm leh a, min hre lo khan awm tlang mai mai se ka tan tawrh a nuam zawk in haider a awl ai deuh tur.
'Rose, kan in hmuh loh na kum 4 lai a ni ta reng mai,"elsen hmel zet a min tih te chuan,
"Bum hmang pa" tih hrep tak mai ka nap a, ka Hmangaina na chu huatna hlir in an khat tawh ani.
"A ni mahna"ka pa in min duh pui leh ka pa sumdawnnna a pui thei tur,Alan-a ka nei tawh tlat.
"I tha zel ang chu maw" a mit meng ver ther na a khat chu hmuh hreawm ka ti a,he hmuna ka lo kal ve ta palh palh chu pawi tak ani,ka hun liam ta zawng zawng ka theinghih ta e maw ka tih chu a lo lang zut zut si a.

"I hriat ka duh lo e" ka kal sawn hmak a, min en zui reng tih erawh hai rual loh in ka hre thei kum tam tak liam tawh mahse min en na ri ngawt pawhin nghawng ka taksa ah a nei hi chu mak ka la ti tawp thei lo.
"Alan, haw ka duh" kum2 vel liam ta ah khan ka pa aiawh in sumdawng ho in hmuh khawmna na ah hian ka te ve zauh zauh a, Nelson-a vang in ka in thlak vek a ni ber mai, tunah chuan Sumdawnna ah ka rilru pawh ka pe tak zet tawh, hmangaih na in mi a tih chhiat theih zia ka hre tawh si a.
"a nuam I ti viau emaw ka ti a',Alan-a chuan Nelson-a aw ve tih reng a hre hauh si lo, Tu nge tih pawh a hre lek lo ang.
"I thianpa khan nuam a la ti a nih kha, I duh chuan ka thlah haw thei tho che a nia" a kut a wine keng chung chuan a ti a, a suit hak dum leh a tie chu a ka lo en chiang lo a, a in chawih hle ani, a ti lang lian leh zual a, sumdawng mi hliah hliah hmel a pu ani.
"Mr Martin. ka lo hmu miah lo che a Alan-a chuan a kut a phar a, Nelson-a ti a ka hriat nen chuan an in chibai leh ta nghal.
"Martin" chu hming chu hriat tawhna ka nei tlat ani, mahse ka hre chhuak zo tawh si lo.
"ROse, Mr Martin-a a nih hi, carnival(lawng lian) neih tu pa" Alan-a chu ka en reng a, Nelson-a chuan khawngaihna nei miah lo in min en kal bawk.
Engkim mai chu chiangta kuar in ka hria, Nelson-a Martin-a ni bawk chu ka hre tawh chiang lutuk, ka nun a a lo luh hma in, Hmanhmawh takin chu party na hmun chu ka chhuah san a ngai, ka pa ka biak vat a tul ani,
" engkim I pa in a hrilh thei ang che, chhan na a pe ang che" tih thu a lehkha hnut chhiah ah a ziak a nih kha, A hun kai khan ka nat luat ah leh a lo kir leh mai ka rin a vangin ka pa ka zawt lo a, ni e, Martin-a ka hriat chu company tlu chhe mai tur ka pa in a lei sak tak tu pa kha Martin-a chu ani, Nelson-a ni lo in,engkim chu a buai nuai in ka hria a,
Alan'n A hming a sawi lai te khan min nuih sawh a nih kha, a mit meng khan deu takin chawh min tih hmel ngawih ngawih bawk tunah pawh ka pa be turin tlan haw mai ka duh a, chu chu Martin-a rin dan pawh a nih hmel, mahse ka ti lo ang, ka pa zawt turin ka haw hek lo ang, a rin ang lo takin a mah ka hmuh vangin party na hi ka chhuahsan lek lo ang, a tawp thleng in ka awm ngei ang, ka pa chu ka haw hunah ka la zawt thei tho.
Naupang a chheih zam ma mai rual ka ni tawh tlat lo, a ni chu ka tan kum4 liam ta khan a thi tawh, ka mamawh laiin min phatsan a, a fa ka pai a ka thih pui tep khan ka tan awm lo a nih kha.

Party na chu nuam ka ti lo tak zet, Nelson-a chuan a kal pui nu chu a hnungzang ruak kang ah te chuan a chul sak a, hmuh lo chu ka duh , ka hmu lo der thei si lo. Ka van ten hluah hluah em!.
"Rose, nuam I tih lo chuan kan haw mai dawn em ni,"Alan-a chuan min ngaihtuah fe hian a ti a, Nelson-a chu kan lam a rawn hawi ve chiah bawk a vangin Alan-a hnaih thei ang berin ka awm lui ve ngat bawk, ka awm dan chu "nelson-a eng tin tak ngai ang maw" tih ngaihtuah na ka la nei fo chu ka in hua ani.
"I duh te chuan awm ila I thu thu" Alan-a chu no takin ka melh bawk.
"Kan nula lam pui hi kan in thlak dawn em ni "Nelson-a mi zakthei lo tawp chuan thuk raih in Alan-a chu a zawt a.
Alan-a chuan min en zauh a.ka awm dan a tangin ka duh lo tih a man thiam ani, Nelson-a nen hian engmah tih dun ka duh tawh lo.
"Ka nula Rose-i hian haw a duh tawh zawk a,haw kan lo tum chiah ani" Nelson-a chuan a hnar a phit dat a, Alan-a kut ah kai in hmanhmawh takin ka chhuah pui nghal dawr dawr a,

Kan in ka pan lai te chuan thil pa1 chauh ka rilruah a awm a vangin Alan-a motor a tang a ka chhuak pawhin ka mangtha mawl tawp a, in ah ka luh san hmak bawk.
"Pa, biak che ka duh"
"Hun In hmang nuam em?"
"pa,, chu lam chu na kinah,Nelson-a a kha Martina a ni em? Company I keisak tak te kha"ka pa chu a meng phar awn awn a.
"Engtin nge I hriat chu ka hre lo na in mi pa1 chu an ni a lawm"
Nelson-a pawh ni lo Martin-a zawk chu a ni thei, ka lakah lem changin min lo bum kual mai mai ani.tih ka ngaihtuah na chu nem nghet in awm a, Mipa1 hming in ang si lo te chuan min hnaih turin rua hmanna a lo siam reng a lo ni..

Next...
http://storyfb.com/viewtopic.php?f=5&t=538