STORYFB.COM

Nun tihlimtu Lalnunhlimi
By CVL.Awmpuii

(Ka zawmna lâi ka chhinchhiah lo aw...zanrei lamah Chapter thar a awm leh bawk ang)

Chapter 21



Zanlai laiah Nunhlimi te in lam pan chuan ka inkhalh chhuak ta nghal a. Khúa a vawt vin tûk a, mahse chutiang ngaihtuah thei paw'n ka khawsa lo. An inkawt chu reilotê ah ka thleng chawpchilh nghal a, pâwn lam aṭangin tala in a lo inkalh ṭha khap mai.



Remi sawi ang khan Apuia nen chuan an la inphur chhuak anih ka ring a. A pa emaw a û te emaw awm loh lai remchângah la in an chhuak dûn a ni mai thei. Ka ngaihtuahna avang ringawt chuan ka sa leh nghal pup pup tawh. Bumna lo tâwk tawh ka ni a, khatiang kha ka chungah a thleng leh ang tih ka hlau a ni. Helen-i chungchangah kha chuan beisei ai hma in ka tuar chhuak hma a. Mahse Nunhlimi chungchângah kher hi chuan ka sawi lâwk thei lo. Ka duh zia leh âtchilh zia hi ka inpawm thlap a. A luhlul poh leh min cho chhuak ṭhin a ni ber.



Bike ri vut vut thâwm ka hriat rual chuan ka hawi chhuak vat a. Nunhlimi leh Apuia te ngei mai chu an rawn inphur phei a. An inkawtah ka lo nghak rân tawh a. Ka bulhnaia dinga min rawn hmuh tâk ah chuan Nunhlimi chu a meng phawk ngang mai a. Min beisei lo tih lah a chiang reng mai. Apuia lah chuan min tham lo fe hian min lo melh leh tawh a. Hepa hi chu ka ngai thei thlawt lo a ni.




"Eng nge i lo tih dâwn?" Nunhlimi chuan a lo ti nghat a, "Ka be duh che" ka lo ti nghut a. Ka thinrimna thunun tum chuan ka inhumruh nghal ṭeuh mai. Apuia lah chu kal ta mai lo chuan a bike-a la ṭhu reng chungin min lo kelh ve run a. Amah hnek châk in ka kut a za leh zek zek tawh mai.



"Sawi dun tur kan nei lo" Nunhlimi chuan zawi si, fiah si hian a lo ti chang fak a. Apuia hriat phâk loh deuha sawi chu a tum ve ngei ni tur a ni. "Keiin sawi tur ka nei alawm" ka lo ti ve nghut a. Rum zet hian min melh ta reng ringawt a. Apuia chu melh veleh in "Min lo thlah a, ka lâwm lutuk e aw" nui var var chung hian a ti zui zat a. Ka laka nui hmêl pu si lo kha Apuia lakah chuan thinrim thei lo ang maiin a nui ṭhaw a. Ka huat thû a chhe viau tih ka inhre thar vawng vawng mai.




"Inchhung thleng thlah i duh em?" Apuia chuan a lo ti sup a. Min runluih ni a ka hriat avang chuan ka ngawi thei ta bîk lo va, ka lo inrawlh ve ta nge nge a. "An inchhungah chuan keiman ka hruai lût mai ang. I lo thlah avangin kan lâwm e" ka lo ti chang bal a. A laka mawhphurhna nei àwm ang taka ka ṭawng chu Nunhlimi chuan a lo ngai thei lo aniang a lo rum nghat a. Apuia erawh in min lo melh rum ve viau mai. "Thlah chu i ngai em?" Nunhlimi bawk chu a be leh daih a. Ṭawng tum a ka àn zuau lai chuan "Ka ṭha ang" Nunhlimi chuan min lo tih khalh sep a. Inhriatthiam hmêl taka Apuia nen an han inbe vêl chu mit an tikham dun kher mai.



Apuia chuan min melh tawn ta sek a, rum theihtawpa rum hian ka lo melh lêt ve fuk a. Nunhlimi chu a ngaihtuah hmêl khawp mai. "Buaina i neih chuan min lo hrilh la" a ti leh hram a, "Naua..." ka lo ti nghut. Nunhlimi'n mitmeng in min rawn khap lo sela chuan ṭawngkam ngeiawm zet ka chhak chhuak chhunzawm ngei ang mawle. "Apui, kal tawh rawh. I haw lehna tur a la hla si, a tlai tawh bawk si" a lo ti ta zung zung a. Ngaihsak hmel taka a ṭawngte chuan ka beng an ti thlep ngawih ngawih.



"Anih ka kal ang, puih i ngaih chuan ka sawi kha aw" ti leh sup in a Bike chu a tinung ta nge nge a. A kal vat lo anih chuan ka hnek duh tak tak in ka ring a, chuvangin a inthiarfihlim hma leh a vannei a ni mai.



"Eng maw i rawn tih dâwn?" Nunhlimi nen chuan kan inhmachhawn ta rân mai. A kutkuangkuah than chung hian min melh kal a, a tawh khirh hmel viau bawk. "Inbe lawk ang" ka lo ti sup a. "Aw sawi ta rêng che ka ngaithla e" a lo ti nghat a. A âw rîk chhuah dân ngeiawm zia chu a tihpalh a ni hauh lo vang. "Inchhungah" ka lo ti hmuk a, a hma anga buaina chingfel chuang si lova phuailuai deuha awm kha ka duh tawh lo a ni.



A ngawih ngal avang chuan "Khawnge i chhungte?" ka ti leh sup a, "A ṭangkai lo" a lo ti hmak tak na in mitko ka san leh tak uk ah chuan "Ka pa chu ka û te veng lamah Krismas a hmang phei a. U Philip-a te nupa chu U Akimi te in lamah an lêng a, an lo la haw lo aniang" a lo ti ṭha veleh mai a. Ka beisei ai dahin a rawn sawi ṭha duh leh lawi a. Lehlam kawng zawng taka ngaihtuah chuan thû hi chu a awih a ni.



"Inchhungah inbia ang" pâwn a kan la din tlat avang chuan ka ti leh sup a, ka âw ah chuan ngenna ri a hre thei ngeiin ka ring. Kan inbiak tàwp ber ṭum khan ka biak dân in a zir lo tih ka hria a. Ka ti thlabar viau ta ve ang. Chuvangin buaina ti punlun zawnga khawsak chu ka duh tawh bîk lo.



Kawngkhar chu a hawng zui ve mai bawk a, kan inzui luh rual chuan "I sawi duh chu sawi la, haw vat rawh. Ka chau, mut hahdam ka duh" a lo ti nghal zung zung a. Ka lo thaw hawk thung a. A tawhkhirh hmêl ta lutuk hi ka thiam lohna chen awm ve tho mah se ka ngaina lo takzet. "Engkim hi sawifel ka duh" ka lo ti sup a. "Eng nge sawifel ngai awm a?" ngèn hmêl zet hian a lo ti ngar a. A hmêl lan dàn ngeiawm zia chu pui tak a ni. "Heti hian awm tawh lo la..." ti a a kut va chelh mai ka tum rual chuan a lo che phat a. "I sawi duh tak chu sawi la, kal lehnghal rawh. Thu awmze nei lo ka ngaithla peih lo ania" lo ti leh hmak in ṭhutkhawmna lamah chuan a phei a, ka lo zui ve nghal vat a. Inhmachhawnin kan ṭhu ta rân mai.




Thinram nasa zawk anih avangin ka tlâwm a ngai tih ka hria a, ka lo lungawi loh vena te chu dah ṭha in "A hmaa kan sawifel tâk loh bawkah khan kir leh a ngai. Chiang takin engkim sawi fai kelh ila ka duh. Ka ṭawngkhum dân che avang khan khawngaihin min ngaidam la, mahse thil nihna dik tak i kâ ngei aṭanga hriat ve ka duh a ni" ka ti dam thluam a. Min kawihsan leh viau ka hlauh lâi chuan "I hriat chin pawh ka hriat si loh" a lo ti chang rãt a. "Remi thil min hrilhte kha..." ka tih leh lai mêk chuan "Khanu hming kha rawn sawi teivet tawh suh, ka haw lutuk " a lo ti kha fak a. A hmaa a ṭhiannu thlavang hauh tlat ṭhin Nunhlimi kha a ang tawh lo.



Zawldawh taka biak reng chu a sâwt dâwn lova ka hriat avangin amah cho zawnga ṭawng chhuah chu ka rilruk ta zawk a. Eng emaw sawi tuma a lo àn leh ziau lâi chuan "I thuruk zawng zawng a sawi chhuah sak che avangin i hua em ni? Thudik ka hriat chu pawi i va ti àwm em em ve" elhsen zet hian ka ti lêt ve ta a. Nunhlimi chu a rawn meng rum nghal al mai, ka ṭawng dân chu a thawk ṭha dâwn riau in ka hria. "Rûlremi ka huatna aiin ka huatna che hi a nasa zawk tih hria ang che" a lo ti fiah fak a, a ṭhiannu hming a phuah dân mai mai chu(h)!




"Thudik ka hriat avangin maw min huat?" ngeiawm zet hian ka lo ti ve khauh a, a ngawih leh tâk tlat avang chuan "A tìr aṭang khan engkim min hrilh ni la hetiang hian kan buai lo tùr " ka ti leh sup a. "A tìr aṭanga hrilh tùr che in kan inkâr nghawng thei tùr khawp thil a nih ka lo beisei hlei nem. Eng dang a ni lo, ka tán chuan i lo ṭha mah mah ania nge?" a tàwp lama a âw rîk chhuah dân chu ngeiawm tak a ni. "Sex hi i lo ngai ho lam àwm hle mai" ka ti ve ta khawl a. A thiltih tawh kha ho lam tak anga a sawi fo mai hi ka ngaina lo. A hmasa zawka kan inhauh ṭum pawh khan ka thinrim zualna kha hei chiah hi a ni rêng a ni.



"I sawi awmzia ka hrelo" a lo ti ta hu a, a bo hmêl tak tak khawp mai, ka insehruh ṭawlh ṭawlh a, ka thusawi chu a la lâp riau in ka hria. "Nunhlim, i hun kal tawh hi ka buaina a ni ber lo va. Eng ang mi pawh i hun kal tawh ah chuan lo ni mah la ka tel ve hma thil a ni a, ka pawm thei vek. Mahse hetiang thil lian tham lutuk ka laka i zêp leh i ngai ho lam lutuk hi ka huat ber chu a ni. Nihna ang tawpa lang ṭhin i nihna hi ka duh zualna che ania. Mahse kan inkâr thil ah zêp i lo nei a, i nihna ang tawpa i awm mai lo hi ka huat tâk ber chu a ni" ka ti dam dap a. Ka âw kâ dam viau mah se ka chhungril erawh a sa bulh bulh thei. Ka beisei ang a ni lo lutuk chu ka la na ni berin ka hria.



"Eng chiah nge Remi chuan a lo hrilh che le? Sawi chiang teh. I sawi awmzia hi ka hrelo teh ania aw. Khatia sawi kual duah lo khan sawifiah teh" a lo ti sawk sawk a. A meng pawng zawr zawr maiin ka hria. "Thianghlimna hi a hlu a, mahse dàipelh leh rahsual palh vanga lo hloh ta te hi ka hmusit hauh lo. Chutiang dinhmunah chuan i lo ding tawh a ni mai thei, tinge ka hnualsuat che hlauva tlang taka engkim min hrilh mai loh?" ka ti leh hrâm a. Chutah Nunhlimi chu a rawn ding ta hluai a, "Remi chuan eng thû nge a lo fah che a? Kan buaina hi khatiang lam kha a ni hauh lo aw" a rawn ti leh hlawl a. A hriatthiam loh hmêl tak tak.



"Enteh U Hluzual, ka hrilh ang che. Hostel kan awm lâi khan ka che phawsawlhin chhuah rûk te kha kan lo chîng viau pawh a ni mai thei. Zêp thû a chêng lo, zu pawh ka in ve nasa hman lutuk. Meizial te pawh ka ti vek, mipa ho nen kan awm luih luih zel bawk a. Mahse i ngaih ang em em a hmeichhe lepchiah kha chu ka ni bîk lo ania. Chhia leh ṭha hriatna nei ka ni a, ka hmang thiam ve bawk ania" a lo ti leh hlawk hlawk a. A mitmengah chuan mak tihna lang tawh lovin inrintawkna ka hmu thei.




Ka rilru a buai ve ta map a, mahse inthup a la tum ve ṭang ṭang ni a ka ngaihna chu a la lian zawk tlat pek a! "Tlang takin engkim sawifel ang" ka lo ti charh a. "Eng nge sawi tur la awm cheu a! Ka duh chin chu ka sawi tawh. Min ring lo anih leh i thû a ni e" a lo ti ve halh mai. "Remi khan a sawi alawm..." ka lo tih leh lai mêk chuan "Remi Remi Remi...a ṭha e, i lo ring vet vet hlê mai ka ti. Mipa pangngai, fing tak, midang ring tawp lova thudik fiah duh mi ni tùrah ka lo ngai ṭhin che a. Mahse bum kual i lo nuam dâwn hle anih hi" a ti ta tàwn tàwn mai. Ka rilru buai zia chu pui tak a ni. Nunhlimi lah a thinrim hmêl nasa tawh mai si.




"Mipat hmeichhiatna lam hawi in i khawsa hauh lo va maw?" la ring ngam chiah lo chuan ka ti leh hrâm a. Min chhâng mai lo chuan min melh ta reng a, ka melh ve reng bawk a. Chutah rawn che chhuak thutin a kawrlum hâk lâi chu a hlip ta tâwk a. A mitmengah chuan thinrimna leh rilru natna a inchawhpawlh nuk mai. A kawr hâk lâi chu hlip leh in "Nunhlim, eng thil nge tih i tum?" ka lo ti ta vat a. Min chhâng lovin mitmeng sen ram hian min melh a, a kekawr phelh leh a tum lai mêk chuan ka lo dang ta vat a. A tal nasa mai.



"Min ring lo a ni lawm ni? Fiah ta che, ka fiah tir ang che" ka hmaizawnah chuan a au tuarh a. Hetiang hian Nunhlimi hi vawikhat mah ka la hmu ngai lo. A ṭap chhuak ta hlawp hlawp a, mahse rilru natna ai mah chuan a thinrim luatah a ni berin ka hria. Ka pawmbet ta chawt a, chak zet hian a lo tãl veleh chiam bawk a. "Fiah rawh, khatiang em em a nasa khan min ngaih ka lo ring hlei nem. Min khawih rawh, ka pawisa reng reng lo. Khatianga in puh ai chuan ka lâwm zawk ang" a ti leh tuarh tuarh a. Ṭap chunga sawi ni mah se a ṭawng chu fiah tak a ni. "Hahdam rawh, ka ring che" ka tih hnù pawh chuan "Ti ta che, fiah rawh" tiin ka biangtawn tawn ah chuan min rawn vuan a. Min rawn fawh a tum rual chuan ka lo thlesawn vat a. "Nunhlim" ka vin ta ṭhawt mai. Za lo tih hriat zet hian a rawn nui chhuak ta hak a. "Mipa tam tak sulhnu han chhui vêl chu min ten deuh em ni? Hri ṭha lo i kai te i hlau em ni? Mi thianghlimpa" a ṭawng ring tawh hran lo. Mahse a thusawi chuan min khei fak fak mai.




"Inha ṭha rawh" tia a kawr pêk ka tum rual chuan ka kut chu a lo bêng per nghal nawlh a. "I lo fel famkim hlê mai. I ngaih ang tak tak kha ka ni ang tih ka hlau, min hmusit dâwn lutuk " a lo ti leh nghat a. "Khatiang zawng khan ngai suh" ka ti sup a, mahse a hmêl aṭang chuan min ngaihdàn tùr ka hrethiam vek. "Fiah la, ka lo thianghlim rêng em tih chu fiah rawh. Khatiang teh hrep a inngaih ai chuan fiah law law la i rilru pawh a nuam zawk ang" mittui tling pam chung chuan a lo ti leh a. Mahse ṭah mai mai a tum tawh lo tih a hmêl aṭang chuan ka hrethiam ve vek.



"Ka ring tawh che" inthiamlo ru deuh chung chuan ka ti ta sup a, a lo nui leh hak a. Min nuihsawh ni maiin ka hria. "A hma khan min lo rin daih tawh tùr che ania. Mahse a pawilo, i nihna dik tak ka hriat phah a, ka lâwm lutuk " a lo ti leh a. Tunah chuan engti kawng mahin kan sawifel thei dâwn lo niin ka hria. Mahse thil nihna dik tak ka hre tawh bawk a, thâwk khat chu a veng huai mai. Ring leh ring lo inkâr a awm kha chu a hrehawm êm ani. Ka hriatchhuah tâk dàn erawh ka duhthusam a ni hauh lo thung. Nunhlimi min ngaihdàn tùr ka ngaihtuah chuan hrehawm ka ti thar khawp mai.




"Û...châw kan ei dâwn" Kimtei âw ka hriat rual chuan chiang lo riai in ka harh a. Ka ngaihtuahna ah Nunhlimi a rawn awm nghal lo thei lo. Nizàn ka haw hma khan ngaihdam ka dìl bâkah kan inkar tàwp lo tùra ka duh thû ka sawi rawih a. Min nuihsawh viau mai. A tán chuan ngaihdam ka har viau in ka ring. Mahse kan inkâr a ṭhat leh thuai theih nan theihtawp ka chhuah leh dâwn a ni.




Rilru harhfim kara han ngaihtuah tâkah chuan Remi ka lo ring kha mãwl ka inti thar ngawih ngawih! Ka laka a rilru puthmang ka hriatchian ve tehlul nen engtin nge ka lo rin mai theih zawk ni? A sarhu lai khan tîm hauh lovin Nunhlimi kha lo sawipui ila chu hetiang dinhmun hi kan thleng lo tùr ania tihte ka ngaihtuah a. Engmah a sâwt tawh dêr si lo.




Krismas leh kumthar vuakvet chu engtin tin emaw kan hmang zo ve ta mai a. Keipawh office ka kal leh ṭan tawh a, kan buai chho leh vut vut tawh khawp mai. Ngaihtuahna ah Nunhlimi a awm lo thei lo va, vawi tam biak ka tum ṭhin. Mahse mahni inthiam lohna a len bâkah amah a lo inhawng lo bawk nen biak lohah ka tlâk zel ta rih a. Ṭhiante dem rawn kan lo hlawh nasa ve laklawh tawh si a, kan inkâr a lo hre hlawm tawh bawk si. Chutia kan inzui leh ta lutuk si lo chu sawi neuh neuh kan kai leh ṭan tawh tih ka hria. Min zâwt tâwk lah an awm veleh nawlh zel a, "In inzui ve emaw ka tia" pehhel deuh a an tihte hian ka lo nuih liam mai zel a. Ka chhàn ṭhat duh vak loh bâk ah chhân ngaihna vak ka hre rih tlat lo a ni.



Ka ṭhian ṭha ber Msa erawh chuan engkim min hriatpui a, min dem khawp mai. "I thiamlo hulhual anih chu" min ti ringawt a. "Tihngaihna tak pawh ka hre tawh lo" ka tih lahin thurawn min pe ṭha duh tawh bawk si lo. Nunhlimi chu chân ka duh lo va, mahse ṭan la leh tùr chuan mahni inthiam lohna nen ka pawh ngam tawh chiah bawk si lo. Ka awm dàn chu a lài vêl vek mai.



"Zanin hla zir anih kha aw..." Msa message ka hmuh rual chuan ka hui nghal pap a. Vêng inang kan nih bâkah kohhran inang kan lo ni lehzel si a. Nunhlimi hi chu mak deuh maiin pangngai takin a awm thei mai a. A mipa zawk si hi hmun khata kan awmho châng hian ka pangngai hlei thei ṭhin lo. Min ti zâm tlat a, ka inrintawkna a la kiang daih zel ni mai hian ka hria. Kha zan aṭang khan a rilru len zia ka hre tawh a. A rilru hneh leh tùr chuan ṭan ka lâk leh fe a ngai ang tih pawh ka hria. Mahse mahni mai chuan a harsa ve êm a ni. A ṭhiannu ve ber Lalnuni lah hian min han ngei hmel em em ṭhin khawp a. Kan inhmuh apiangin min melh rum a tih theih ang. Heihi chu hmeichhe dan a ni a, mak pawh ka ti hran chuang lo.



"Eng hla zir nge?" Msa chu ka zâwt lêt a, "A mak, group te kha en ve la. Bial KṬP inkhawmpuina ami tur " a rawn ti a. Ka hrechhuak chiah, tùn thla tàwp hi Bial KṬP Conference hun a ni leh tawh tak alawm. "Tunlai hna ah kan buai lutuk a, ka hman ange maw" ka va ti dek dek a, "Mipa i nih kha, chhuanlam siam suh" a rawn ti vat a. A sawi tum ka hrethiam lutuk tlat. Mahse "Chutiang lam pawh a ni lo, kan buai êm a" ka ti leh hram a. "Eng emaw ka hrilh ang che" a rawn tih tâkah chuan " Eng lam?" ka va ti vat a. "I hriat duh lam tak kha" a rawn tih leh chuan Nunhlimi chungchâng a ni tih ka hrethiam nghal mai. "Hla chu rawn zir ang che" a rawn tih leh chuan ka chhâng lêt tawh lo. Mahse zir ngei ka tum dâwn tih chu a hrethiam nghal vek ang.




Office-ah nilengin kan buai leh a, Pu Liana khan a hna a rawn zawm leh tawh a. Remi nen pawh kan inhmu tawh ngailo. Thudik pumhlum ka hre tawh tih hi a hria nge ni min rawn dik dak zui ta miah lo va. A zak ve ta te pawh aniang, inthiam lohna a neih erawh ka ring miah lo. A ṭhiannu khati khawp khan a puhchhe duh ania, mi rilru ṭha tak chu a ni lo phawt ang.




Ka ngaihtuahna avang chuan ka thaw hawk a, keipawh ka bâng bîk lo. Nunhlimi ka hrechiang viau ka intih laiin engtin nge maw Remi thusawite kha ka lo rin theih zawk ni? Eng emaw in min ai ve deuh pawh a ni mai thei a ni. Ka ngaihtuah lêt châng apiang hian mãwl ka inti thar ngawih ngawih zel. Nunhlimi aia Remi ka ring tlat lai kha a mak ve êm a ni.



Zanah Msa chuan hla zir tùrin min rawn sàwm a, min rawn kal chilh riap mai. "Ka lo kal dâwn reng alawm, hetia rawn kal kher a ngai hlei nem" ka tih chuan "Ka ring lo che alawm" a lo ti mai a. Ka chhûngte nen an inbiak luam hnù chuan kan inzui chhuak ta a. Kimtei pawh a ṭhiante'n an rawn sâwm a, an inzui chhuak daih tawh.



"Eng nge in chanchin?" Biakin lam panin kan kal mêk a, Msa zawhna avang chuan ka thawk a pik leh ringawt tawh. "Chanchin thar a la awm lo" ka lo ti hmuk a. Msa chu a lo chet hluk mai. "I chhur chhah êm anih kha!" min ti duh lêk chauh a. "Khatia min ti reng lo khan hmalak dàn min hrilh zawk teh" ka lo ti hluk a. Min han nuih hmasa te te a, a duhna ah hi chuan a nghal ve thei ania. "I pà lo emai" min ti leh tawh. Mipa tán chuan pà lo intih sek chu thanat thlâk ve deuh a ni.




"Tihngaihna ka hre tawh hlei nem" ka lo ti bung nghut a, a nuih dàn te chu min nuihsawh riau hian ka hria a, ka thin a tirim tlat. "Ṭang rawh, Apuia nen an inzui ka hmu fo ania aw" a rawn tih chuan ka sa phat mai. "John-a ṭhianpa nen khan maw?" ka tih chuan a lo bu nghut a. Ka inhumruh nghal ṭeuh mai. Msa chuan a lo hre lehpek tawh aniang "Awmhmuna insawh thinrim vak vak kha a ni lo, hetiangah hi chuan pên chhuah a ngai ve ania. Nang chu i hahthlak emai. I dik lo tih i inhre vek a, siamṭhat i tum leh chuang bawk si lo" a lo ti ve nghut nghut a. "Siamṭhat ngaihna ka hrelo anih hi" ka lo ti vin hluk, ka thin te hi a chhe hlur tawh maiin ka hria. Msa chu a lo nui hawk hawk a, ka va han ngei mai mai tak.



Biakin kan va thlen chuan Nunhlimi te ṭhianho bawk kan va hmu hmasa leh ber a. Msa chuan min nuih ruh ruh a, anni ṭhianho lah chuan min lo melh rum nghal ringawt a, mahse min melh rei lo thung. "A nuam miah lo ania aw" ka ṭhianpa bulah chuan ka ti sup a, min nuih leh ringawt tawh.




Kan thlen aṭanga rei vak lovah hla zir chu kan ṭan nghal a. Vanneihthlak takin ka ti dawn nge vanduai thlak takin ka ti dawn pawh ka hrethiam lo, Nunhlimi te ṭhianho ṭhutna hnung chiah ah kan ṭhu fuh pek a. Zài ṭhat a har duh ngang mai. Msa lah hian nghal a lo chhuah ve sek a, Nunhlimi te chu a be leh zeuh ṭhin a. An nui har har hlawm mai. Ka awm ve tih pawh ngaihtuah lo hi an ang ber. Ka lungáwi lo ve ringawt lehnghal a, a zialo tak tak a ni.



Darkar khat vêl kan zir hnù chuan kan bâng ta a. Nunhlimi te ṭhianho titi chu ka hre pha ve reng a, "Thlah i ngai em?" Lalnuni'n a tih chuan "Apuia'n min lo hruai dâwn a" a lo ti vat a. Apuia hming ka hre leh chiah chu ka sa phat mai, tih vak theih erawh ka nei lo. A ṭhiante'n an fiam nak nak na te chu ka hre pha vek a. Ani lah chu a pha duh der si lo, a nui liam mai a. Rãl aṭang chuan ka lo inhumruh ve ṭeuh ringawt a. Chân hlen ka duh lo anih chuan mahni inthiam lohna dahṭha a hmalak vat ka ngai a ni.



Apuia chuan a lo lam tak tak a, midang chuan ngaihven vak lo mah se ka tán chuan hmuh hmaih theih a ni hauh lo. "A na sawk sawk em?" Msa chu ka bulah a rawn ding a, a la nui vur vur lehnghal. Hepa hnek pawp mai ka duh, min hmusit tlat. Ka melh rum vak a, "Khatia awmhmuna insawh nghawng nghawng lo khan ṭan la ta mai la aw..." a lo ti ve hluk a. "Ka dinhmunah hian ding ta la, i awm dàn a lài ve tho ang" ka lo ti ve nghut a. "I dinhmunah hi chuan ka ding ve ngai lo vang, i mãwl angin ka mãwl ve lo" a ti duh lêk chauh a, ka huat tâwk a tling em em tho.



Mahni mai chuan tihngaihna ka hriat loh avangin tlâwm zawkah ka ṭang ta a, Msa hi ka mamawh miau a ni. "Ṭhianpa, min ngaihtuah pui teh" ka ti leh ta ringawt a, a puihna dil reng hi tlâwm ah pawh ka la hlei thei lo. "Nak zanah kan lêng dâwn ania...lungngai lutuk suh" ka dàra bêng thuk chung chuan a lo ti ve ta hram a. Ka thaw huai ringawt anih chu! Ṭhiante lo pawimawh zia hi aw...



"A buaithlak" ka ti leh hluai ringawt a, Nunhlimi rilru len zia ka hrechiang tawh a, ka huphurh nghal ringawt. "Hmeichhia te chu tih thiam an ngai ve alawm. Lungngai lo phawt rawh ka tih tawh kha" ka rilru hahna hrethiam tak chuan a lo ti dam leh thluam a, thlamuanna tùr dang nei lo ta chu min thlamuan ve em em tawp mai a ni.




Mipa, kei ka ni inti ve ṭhin, lu zo tak ni ah ka lo inngai ve ṭhin a. Mahse mipa pawh hi hetiang kawngah a lo pà loh theihin a lo nêp ve theih khawp mai. Hetiang hian ka awm ang tih rin ngaihna pawh ka lo hre ngai lo va. Bum pawh ka lo tâwk tawh a, ka paltlang ve mai anih kha! Mahse Lalnunhlimi chungchangah hi chuan engkim a danglam ani ka ti lo thei lo.




Ka han mu tùr chu ka ngaihtuahna a kal thui khawp mai a. Apuia nen khan eng nge an tih zui ang tih chenin ka ngaihtuah a. Inngaizawng anga an awm tùr ka ngaihtuah zawng ringawt pawh chuan ka sa chhuak vek thei. Ka inrin hma in Nunhlimi number chu ka hmet chhuak a, ka'n call ringawt pek anih kha! Ka beisei loh lutukin a lo la pick up zui! "Hello..." a rawn tih rual chuan ka reh leh daih lawi a. "Hello, ka ṭawng i hre thei em?" a rawn ti leh lang lang a. Min biak dân aṭang chuan tunge ka nih a hrelo niin a lang riau mai.



Khatianga kan awm tâk hnù khan a status hi ka hmu tawh ngai lo va, ka number a delete daih anih ka ring a. Tuna min rawn hriat loh dàn ah hian ka rin dân chu a rawn nem nghet chiahin ka hria. "Hello, tunge aw? Ka ṭawng i hre thei em?" a rawn ti leh lang lang a, ka ring sual hauh lo. A rîk deuh nak nak hnù chuan "Nunhlim" ka ti ta sup a. Min hre nghal mai aniang a reh zui dâk mai. "Keimah" ka ti leh sup a, ka thaw nghal ham ham bawk a. Eng ang takin min ngai ang maw?



"Eng nge ni ta?" a ngawih ren rawn hnu chuan a rawn ti dam ta thlap a, mahse a âw chu nêlawmna pakhatmah a awm lo. "Ka ngai che" ka ti chhuak hawk a, a reh zui leh vang vang mai. "Ka ngai che...engtia rei nge min hrem dâwn?" ka ti zuai leh raih a. Ka be ta sa sa, keimahah huaisenna a rawn awm chho ve ta mawlh mawlh mai. Ka ṭawng leh dâwn lai mêk chuan phone chu a titawp ta daih a. Ka call nawn leh pawhin a la duh tawh lo. A hnù ah phei chuan switch off a inti ta daih a. Ka nuih a zat vang ni hauh lovin ka nui chhuak hawk ringawt a. Min la haw viau anih hmêl. Mahse a pawi lo, amahah nghawng ka la nei ve tho tih ka hriat phah a. A lawmawm lam ni lo mah se ka lâwm tho mai.




Msa nen pawh chuan kan va lêng ta ngei a. A chhûngte chuan pangngai taka min lo bia in min lo be ṭha khawp mai. "I lo lêng khat lutuk a" an tihte chuan kan chungchang an la hrechiang ve miah lo tih ka hrethiam mai a. Kan lèn chhan Nunhlimi ber chuan min be ṭha lêm lo. Mahse zahzel ah a khat mawi tâwk in Msa nen chuan an inbe ve reng a. A chhungte chuan an hrethiam kher lo mai thei.



Kan lèn aṭanga rei vak lovah Apuia leh John-a te ṭhian dûn an rawn inzui lût veleh a. Keini min biak ṭhat loh nen Apuia te chu a lo be nghal sawk sawk a. Tih theih nei si lovin ka lo inhumruh leh vak ringawt a. Apuia lah chuan min nuihsawh ta riau hian ka hre pek a, a hmaa ka hnek chawrh châkna bawk kha a rawn inlet leh tup tup mai.



A chhûngte mut hnú thleng chuan kan lêng a, kan titi a, kan titi tih lêmah an titi ka ngaithla ani mah zawk. Ka lèn tirh lâi vêl boruak te pawh kha a ang lek lek mai. Apuia lah chuan Nunhlimi chu a fiam zuk zuk a, Nunhlimi lahin a lo haw duh der si lo, ka mit an tikham ngawih ngawih. Haw hmasak ka tum miau loh avangin Apuia te zawk chu haw hmasa ah an ṭang a. Nunhlimi chuan pâwn thleng a va thlah a, an ri nak nak mai.



"Inti mi tak deuh khan awm ngul reng lo la, inthlahdul rawh" Msa chuan a rawn ti sup a. "Ka hnek châk zia kha" ka lo ti hluk thung a, a nui huk mai. "A huat belh tùrin khawsa hlek suh ang che" a lo ti churh a, min huat belh ka duh loh vâng ania ka insum hram hram ni. "Lo va haw hmasa rawh aw" ka tih leh chuan min melh vung vung a. "Engtin mah ka ti dawn lo, a fâla titi pui ka duh mai chauh ania. Heti reng chuan hma kan sáwn lovang" ka lo ti leh zung zung a. "I ti khawlo zual ange aw" a tih chuan ka lo phun hluk a. Min ring lo lutuk chu ka ngei lek lek mai. "I zei lo ve sia, thin butut lah hi i nei a, rin zawh i har ve êm alawm" a ti bul bul a. Mahse "Reilotê ka awm leh ang a, ka hawsan ang che" a ti ta tho a. Ka lo thaw huai mai.




A sawi ang tak takin Nunhlimi lo lêt aṭanga rei vak lovah chuan min hawsan ta a. Kan pahnih chauhin kan awm leh ta rân mai.



Ka ṭawng hma chu a ṭawng dâwn lo tih ka hriat avangin ngaihdam dil in bul ka ṭan leh tê tê a. "A hmaa i rilru ka tih natna zawng zawngah khan khawngaihin min ngaidam rawh. Tàwpsan che ka tum lo va, ka beidawng dâwn lo bawk" ka ti zui hmiah a. A hmêl landan aṭang chuan a ngaihtuah tùr àwm ang ka hrethiam lo.



"Khang hunlai khan ka rilru a hrehawm êm a, bumna lo tâwk tawh ka ni bawk nen ka rilru kha a kal thui lo thei lo va. Ka ring lo tawp che tihna erawh a ni hauh lo ania. Ka tihsual zia ka pawm a, khawngaihin min ngaidam rawh" ka ti leh a. A rawn phun sep a, "Insawi thiamna" tiin a lo ner nak mai. "Nunhlim" ka ti leh halh ringawt a, sawi zui tùr vak pawh ka hre tawh chuang lo.

__________*_________*__________*_________
Show post links
Top