STORYFB.COM

LET's LOVE AGAIN



By Ziki nu


Chapter-21




"I tha em?" ka dar a rawn dawm rual chuan ka lo phu leh zawk a, ngaihthat loh hmel taka min lo en tu ka bialpa chu tawi te in ka nuih ringawt.




"Engtinnge i awm a? I pum a nuamlo em ni?" a tih leh chuan lu thingin "Ka tha" ka ti leh tawp a, ka chhang bung a ti deuh aniang mitmeng tizim sun chunga min en in "I lungawi lohna tur thil ka ti em?" a ti leh sup a, min en chîk viau mai.



Chhang lovin dar ka kan ak ringawt a, "Tinge I lo kal ve?" ka tih chuan "I awm dan kha a mak deuh a" a ti mai a, eng emaw ka sawi a la beisei tih a hmelah a hriat reng bawk.


"Engtinmah ka awm lo, coffee I in thei lo kha mak ka ti deuh a ni mai" ti liam puatin bathroom atang chuan ka chhuahsan zui a, mahse thui ka kal hmaa min rawn pawt ding lehin "Marina-i kha I thîk em ni?" a ti leh mauh mai, a va han hunlo tak.


"Thîk chhan tur I nei hauhlo ania, hlim deuha awm tum rawh, Richarda bialnu anga naupangchhia I nih tawh loh hi aw Bawihte" tia kiai sukin ka kut a kai zui a, engmah pawh ka sawi ve hma in min kalpui nghal dawt dawt mai.



Kan thiante kan va pawh leh lai chuan Marina-i chu a lo nui leh har har tawh a, a nu lian bawka a tawng leh nui ri te chu a ring tha khawp mai.


"I bialnu chu zunpui thlap a la ngai a ni maw?" tia min lo melh ralh chu chhang buai duh lovin ka nuih liam mai a, khin let chiam ka tum lo na in ka ngainat zawng a ni lova, ka bialpa pawh hian kawm tam lo se ka duh, vawiin bak chu kan chhuah ho tawhlo ka beisei bawk.



Lawmtei nen kan phone ngawt en in midang titi na karah chuan kan thu ve reng a, a ning ta deuh aniang "U Sawmte" a rawn tih chuan "A mawng a kham tawh aniang, bathlar velah sawn va chhuahpui la Sawmi" Richarda chuan a lo ti nghal zat bawk a, ka pawi tih loh zawng tak a ni.


A tir phat atangin dawr neitu nu hi a la tawng char char a, ka hne ve tawh hrim hrim bawk.



Bathlara kan chhuah rual in ka thiannu chuan thawk a la zui ham ham a, a hmelah kan awmna hmun chu a nin tawhzia a lang reng bawk.



"I ril a tam tawh em?" ka tih chuan a lu thingin "Ka haw chak tawh e" a ti vang vang a, ka khawngaih ve leh chhawng zawk e a


"Dawr neitu nu a nui ring thei lutuk a, mut a ti chhuak vek alawm" ka ti chu a nuih a za ngang mai a, "Khanu dawr kha a ni tih chu hria ila ka kal miah lo ang, ka thiannu hmelhriat a nia, a chapo teh mai ania, mi bialpa chhuhsak a chîng lutuk" a ti bawrh bawrh a, "Mi bialpa a chhuhsak thin maw?" ka lo ti ha mai.



"Ka thiannu nen chuan an Inkawm ve thin a, a bialpa a lo nihpui hmak alawm, tumah a zahpah si lo a, a ngeiawm ania" a ti leh niah niah a, a mizia en mai kha chuan thiante bialpa han chhuhsak duh mai tur chi chu a ni ve tho in ka hria.



Zanriah ei lai pawh chuan a tawng zat zat reng a, sawi tur a hre lutukte chu mak ka ti zawk, Lawmtei nen chuan ngawi rengin kan ei mawlh mawlh a, a ti ti chu kei ni han zawm ve theih chi pawh a ni lo, Richarda leh Rintea te nena USA an awm chanchin ngawt a sawi a, kan awm ve laia han insawi theih vel chu nuam a ti ni berin ka hria.



"I ning tawh em?"
A sawi zawh rual deuh thaw chuan lu ka lo bu nghat a, "A rawn let leh velah kan haw dawn nia, kan inhmu khât tawh a sawi tur a ngah ve a nih kha" a ti leh a, Marina-i chu dessert lam turin in hnuaiah a chhuk thla mek a, sawisel lem lo mah ila nuam ka ti tawhlo khawp mai.

Kan hmaa mite lah chu an in hnial reng a, Lawmtei'n haw a duh tawh thu a sawi laiin kan thiana chuan "A hmanhmawhthlak loh" a ti tlat a, a bialnu rilru leh a rilru inang lo lutuk chu ka lo ngeipui zawk.



Dar 7 pelh hretah haw turin kan inzui chhuak hlawm a, Marina-i chuan kal leh fo turin min chah ve mah se tun bak chu ka kal ka ring tawh lo.



Kan veng lamah kan tlan a, ruah tla tur ang maia khawpui a rik leh dur dur thin avangin kan tlan chak angreng khawp mai. A kawngah nghet deuhin ka kuah a, a hnungzangah ka bei a, kan inbe tam lo.



In kan thlen chuan ruah fang lian pui pui a tla phuar phuar tawh a, in chhung kan luh fel rual deuh thaw in a baw zui hawk bawk.


A kawrlum chu phelh sawk sawkin thutthleng banah chuan a dah a, "I huh nasa lo tiraw?" ka tih chuan lo bu nghutin "Engmah tham a ni lo, nangmah kha I duh chuan inthlak hmasa la" a lo ti vat a, pindan lamah ka lut tlang nghal bawk.



Ka inthlak zawh chuan thutthlengah insi rialin kan thu dun a, Marina-i chungchang leh an inkar chu ka zawt nghal zat bawk.



"Richarda atanga ka hmelhriat ve chauh ania, kei ai chuan kawm pawh an inkawm nasa zawk, ei siam zir tur hrim hrima awm a ni lo a, a tum loh lamah a peng a ni âwm e" a ti mai a, ka rilru ah chuan coffee ngawt kha a la awm.



"Coffee I in theilo maw?" ka ti nawn leh a, a thaw chhuak hawk tak na in tha deuh chuan "Ka taksa hrisel nan a that loh vangin in an phal tawhlo a" a ti mai a, nur nanga ka melh vang chu nge ka dara min kuahna ti nghet salh pah hian "A tul chuan ka in thei tho alawm, USA ah kha chuan insûm tura min tih nasat hunlai a nia" a ti leh sup sup a, a insawi thiam ve nasa khawp mai.



"Keimah aia a hrechiang hmel lutuk che kha ka duh miahlo ania aw" ka ti leh kha kha chu a lo nui chhuak hawk a, "Nang tluka min hrechiang an awm lo" tiin ka chalah a hmui a nawr si zui vang vang a, kan awmdanah chuan ka lungawi leh hle tawh.



Zan rei deuh thlengin a leng a, a haw tur ka thlah chu ka let thlak leh lamah U Dintei pawn lo chhuak nen chuan kan in tawk chiah a, "In mu daih tawh emaw ka tia" ka ti hluai chu min chhang lovin min melh rulh ringawt a, ngawi renga kawngka min khar hnan chu hrethiam lo deuhin ka ding reng ringawt.




Nu Zovi haw atangin kar a liam leh tawh a, ka ngaihtuah ka ngaihtuah hnu ah U Mama'n awmfin lo mai tura min hrilh hnu khan U Dintei min endan hi a dang ta riau in ka hria, ka laka lungawi lohna nei ang maiin tunah pawh min be duh lo a, hetianga inhmuhthiam loh kher hi chu ka duhlo asin mawle aw...


Mut hmunah rei lo te Rintea nen kan inbiak leh hnuah ka muhil zui a, zingkarah thawm ring deuh vangin ka harh hlawl bawk.



Khuma thu chungin thawm chu ka ngaithla leh vang vang a, thleng tla keh ri ni âwm tak ka hriat leh takah chuan tho chhuak vatin in chungah ka tlan chho nghal a, khua pawh a la var chianglo.


Kawngkhar chu han hawn mai ka tum a, chhunglamah a la inkalh tlat bawk nen beng dat dat chung chuan U Dintei chu ka ko chul a, Jacoba tap ri ka hriat leh lek phei chuan ka hlauthawng hle tawh.



"U Dinte lo hawng vat teh" ka tih leh hnu chuan kawngkhar chu a rawn hawng ta ngei a, a hmel ka hmu chu han sawi hmasak ber tur pawh ka hre lo.


"Tinge a?" ka ti hluai a, a biang sen tai hlur leh a mitttui parawl kiangte chuan min ti hrilhhai hle ringawt a, kan indinchilh reng laia Jacoba rawn tap uar leh sauh vang chuan ka tlan lut thuai a, sitting rooma mipa lo awm ve chu a hmaa ka hmuh ngai ka la hre lo.


Chhuatah thu in Jacoba chu a lo tap a, min hmuh ruala min lo ban nghal ruai avang chuan ka pawm kang ve thuai a, "Eng nge thil awmzia ni a U Dinte?" ti chul chungin chupa nen chuan ka melh tawn zak zak a, in chhung lah chu zu rim a nam huam a, tu mahin min chhan an tum si lo chu tih ngaihna pawh ka hre lo.



"U Mazari ka be mai dawn em ni?" ka tih chuan "I lo buai ve a ngai lo" a lo ti hlur a, amah pawh hian zu a ruiin ka hria.



"Ka fapa kha dah la, chhuak rawh" a ti leh chu inti luhlul in "Jacoba hi chu ka hruai thla ang, khua a var tan tawh a, nangni pawh in buaina te sawi fel rawh u" tiin ka chhuahsan a, min dang zui lo chu ka lawm kher mai.




In chhung ka luhpui leh lai te chuan ka nau pawm chu a la insût faih faih reng a, eng thil chiah nge maw thleng ni.



Ka thiam ang tawka thlemin ei tur te ka siam sak a, hlauh nei tih hriat taka min pawm leh chawih chawih thin chuan ka khawngaihna a tizual ting a, tahbelh chi tih takah ka hnuk a ti ulh lek lek a ni.



Rintea'n min lo biak chuan chanchin ka hrilh ve a, "U Mazari ka be mai dawn em ni?" ka tih chuan "A harhfim hunah titi pui phawt rawh, chhungte tibuai lo va chinfel dan a awm chuan a tha zawk" a lo tih vangin ka hrilh ta rih lo a, zing dar 8 a rik pawh chuan a fapa ngaihven tur takngial pawhin a rawn lang lo.



Kei lah chu school kal ka ngai si a, Jacoba a tlei tawh tho a tiin thil ka ei tir hlan chuan in chungah bawk ka chho leh a, kawngka a lo in nem kau sa deuh avangin kik buai lovin ka lut tlang a,
"U Dinte"
Min chhang lo.


Sitting room ka luh phei chuan zu rim leh hmun hnawk zawng zawng kha a lo fel fai vek tawh a, pindan kawngkhar ka hawng tur chiah chu bual in kawngkhar zawk a lo rik rawk vang chuan ka leh hawi vat a, khapa bawk kha a ni.



Inbual zo hlim ni âwm takin hrukpuan a veng a, a sam pawh a la hnawm chap mai.
"Ehe... Khawiah nge U Dintei" ka tih chuan min chhang lovin a inhru hul mawlh mawlh a, "Tunge i nih a?" ka tih leh pawh chuan min la chhang lo fo.



A awm dan chu ka ngei ve ta deuh a, tlangval awmtha duhlo leh ngeng lutuk han buaipui vel hi ka thiam loh lam tak a ni bawk nen, ka dawhthei vak tawh lo.



"Chhuah ka ngai a, a fapa khu rawn lam rawh se" tih leh inher ka rual a, mahse ka chhuak tur leh U Dintei rawn lut tur chiah chu kan in tawk leh si a, dawrah a kal aniang ei tur nep nawi eng eng emaw a pawm bawr luk mai.



A landan pawh zingkar ngawt ai kha chuan hmuh a nuam deuh tawh a, mahse min la melh no lo viau tho mai.



"Eng nge in awmzia ni a? Saw pa saw tunge?" ka tih chuan a ner sak duh chauh a, "I bialpa em ni? Nizanah hetah a riak a ni maw?" ka ti leh chu rum zeta min melh chung hian "I lo buai ve na tur a awm lo" tiin min kal pel a, a fapa a ngaihtuah miah lo em mawni.



"I awmdan hi a mak emai U Dintei, Jacoba pawh ngaihtuah ve la" tiin ka zui lut leh rih a, a thil lei ho dawhkana a dah chu mipa khan ngawi rengin a lo siam zui mawlh mawlh a, sual hmel ka ti lutuk chu en pawh ka en rei duh lo.



"Rawn dah chho rawh" thingpui chhuang pahin a lo ti liam puat a, a khawsak dan chu mak ka ti tulh tulh mai.



"Hepa hian an rawn luh khung che em ni a?" tih paha ka melh zawk lai chuan min lo en ve kur a, ka hawi sawn leh rang khawp mai.



"Jacoba chu rawn dah chho vat la a ni mai, i inrawlh ve ka tur a ni lo ka tih tawh kha" U Dintei chuan a lo ti lh hlak hlak bawk nen lungawi lo deuh chung chuan ka chhuak leh ta chu ania... An ni pahnih bulah khan Jacoba hi dah ngam a ni angem pawh ka chianglo.



Ka mangang chuan Rintea ka be leh ta ringawt a, "Studio lamah ka awm dawn a, ka bulah a awm duh angem aw.. " a ti vang vang a, nileng chuan a awm duh chiah pawhin ka ringlo.



"U Mazari chu ka hrilh mai dawn em mawni, mipa khi a awm chhung chuan ka dah ngamlo, U Dintei khian a hlauh hmel bawk sia" ka ti leh chu min lo hnial tawh bik lo va, "Zanah lo kal ka tum dawn nia" a tih hnuah kan inbiakna chu titawpin U Mazari ka call leh nghal a, a buai deuh nge a chhang lawk lo.



Vawi hnih ka call naah a chhang ve ta hram a, "Aw Mate, in inchungah insuk ka lo pho daih a" a rawn ti lang lang a, a nau te boruak han sawi pawh chu ka hreh ru ang reng.



"Vawiin lam eng nge i tih dawn?" tiin ka zawt hmasa te te a, ina a awm tur thu a sawi chuan thaw deuh huai pahin "Jacoba hi i awm hman ang em?" ka ti tawl mai.


"Engatinge a? Dintei chhuah a ngai em ni?" a lo tih chuan chhang lovin ka ngawi ran ran a, "Mate" a rawn tih leh takah chuan zep theih a ni chuanglo tiin thil thlengte chu ka hrilh a, a thin a rawn rim khawp mai.




"Tunah ka lo chho nghal ang, nangpawh lo la chhuak suh aw" tiin phone chu a dah nghal a, kawng dang a awm miau si loa lo chho se a tha ber.


Keipawh school a tlang nghal mai thei turin ka insiam lawk thlap a, ka inpeih hman tawk tihah Kawngkhar rawn kik in U Mazari chu a rawn lang zui a, thutthlengah mu chunga ka phone lo en mek tu Jacoba chu panin a pawm zui rawk rawk mai.



In chungah kan inzui chho leh a, u Mazari thinrim lutuk chu a insum zawh loh mai ka lo hlau a, keimahin ka lo hrehawm ru ve tun reng mai.



"Laldinmawi"
Pindan lam atanga thawm kan hriat avangin dim lo zet hian u Mazari chuan Kawngkhar a hawng a, khumah mipa nen khan lo mi dunin a u a hmu thut chu mak tih hmel zet hian a rawn hawi phawk hra a, "In va han zaktheilo tak, rawn chhuak teh u" tiin an lo chhuah hun nghak chuan sitting room ah a tei sek a, u Dintei rawn chhuak chiah chu engmah sawi sek sek lo chuan a hmaiah a lo beng thuai a, a thinrim lutuk chu a khur hlawk hlawk thei hial mai.




"Zahpuiawm lutuk, laktlak reng reng lo mai. I vawi khat daisual vangin i inchhir tlawk tlawk tawh ang chu tih laia hetianga lo la khawsak chu a zah pawh i zak lo em ni? Tunge mipa hi?" a ti vin khar khar a, a aw te thleng chuan a khur tawh a, ka tan tak pawh awm ve reng chu a nuam tawh lo.



Jacoba ka kaihna chu ka ti nghet sauh sauh a, pawna lo va chhuahpui daih mai tur em mawni.



"Ka bialpa" tiin U Dintei lah chuan awlsam fe hian a lo chhang a, a vawi hnih nan a u chuan a hmaiah a beng leh ta.




"Nun i daisual tawhna haiderin hmangaihna nen kan enkawl che a, mite nun awt ngawih ngawiha i awm loh nan te, nangmah leh i fapa i chawm theih nan te tiin harsa takin lehkha kan zirtir leh che a, i awmdan hian min ti na lutuk, ka nu leh pa te phei chu hrilh pawh ka hrilh ngam dawn em ni?"


U Mazari chu aw... A aw chher leh khur hlak hlak atang chuan a insum nasat ve zia a hriat theih a, an chhungkaw dinhmun leh khawsak phungte hriatpui vek Tu ka nih ve avangin chuti taka a thinrim pawh chu âwm ka ti.




"Jacoba hi ka hruai haw dawn, I awm awmin awm ang che" U Dintei a ngawih tak tlat avang chuan ti lehin Jacoba chu a pawm kang a, kei takngial pawh min be tawh lovin a chhuak nghal nal nal a, ka zui ve thuai bawk.




Kawngpui kan chhuak chho chu thawk ka la ve huai huai a, "Heiham Mate, vawiin chu ka haw pui phawt anga, ka nu te ka bia anga an nin ro rel an thiam zawk ang, Laldinmawii chu ka thin a va han tirim e aw" a ti leh vang vang a, chhan dan tur a vang thin khawp mai.





School ka thlen chuan ka tlai deuh tawh a, Riny pawh a class ah a lo lut fel der tawh, "I va tlai ve Miss Sawmte?" tiin midang ho chuan min lo zawt sap sap a, chhuanlam tur dang a awm miau loh avangin thawh ka hai thu bawkin ka chhang a, min fiam zui pahin an nui dar dar mai.



Tlaiah U Mama'n min rawn bia a, U Mazari chuan a chhungte a lo han hrilh aniang min rawn zawt chiang a, "Kha vang tak khan ania awmfin chi an nih loh chhan chu, zanlen a zo lo" a tih chuan min hmuh loh lamah ka lo bu ve nghat a, fimkhur nana hmang turin min chah bawk.




U Mazari nena kan inbiak leh hmasak ber chuan Jacoba chu zana rawn hruai chho pahin U Dintei riahpui a tum thu a lo sawi a, "Naktukah ka pa a lo chhuk dawn a, zan chu keiman ka riahpui phawt mai ang" a ti a, a unaunu vanga a zahzia a sawi mawlh mawlh bawk.




Zanah Rintea a rawn leng a, a project khawih lai a zawh chiah thu min hrilh chuan a hlim hmel khawp mai, zaithiam lar ten an pan ve leh nulh thin a, malsawmna dawng tlaka nun hmang zel turin ka lo fuih ve sauh sauh thin.





"Ka pa in inneih lam kha lo sawipui leh rawh a tia" a tih chuan ka thingpui siam lai chawl meuhin ka va thlek a, "Kan sawi fel tawh emaw ka tia" ka ti hap chu dar kan akin "Ka nawr lui lo che" a lo ti leh mai a, awm erawh a tinuamlo rauh rauh mai.



Bathlarah thu chhuakin thla eng hnuaiah thingpui kan in dun a, kan hma hun tur suangtuahin kan titi a, inneih lam chu ngaihtuah ve fo tho mah ila tun ah mai chuan a la rem rih si lo a, min hrethiam se ka duh viau laiin ka innghahtir rei lutuk ang tih ka hlau ve bawk nen, rilru a insual buai nasa khawp mai.



"Engtinnge i pa chuan a sawi?" tia ka zawh chuan "Mo hmel hmuh an chak tawh thu an sawi a,an upat tak tak hmaa Tu hmel hmuh hmante pawh an duh a, bakah ka nu hi a hriselloh vangin inchhung khur chetpui Tu tur a mamawh ve tawh reng reng bawk a, a chhan sawi dawn chuan a tam mai" a lo ti sup sup a, "Anih leh nangmah ve, nupui nei turin i inpeih tawh em ni?" ka tih chuan a ngawi vang vang a, chutah ka rin loh deuhin heti hian min chhang a.

"In peih thlap hnua nupui nei chu an tam ka ringlo, hmasawn tumin ka bei ve mek zel a, hun tha kan nghah chhung hian kan nghah ber hun tha chuan kan hriat loh lamah min lo kalsan thui tawh viau thei a, keipawh ka vei rûk ber Pathian zarah ka tihlawhtling tawh a, nupui pawh nei ila ka thawhchhuah ngeiin ka enkawl ve thei tawh ang" a ti charh charh a, a hmelah a thutak zia a lang thei a, a mitmengah a inrintawk zia ka hmu bawk a, kei akara lo rin ngam loh chu thil tih chi ah pawh ka ngai lo.



"Nupa nun hi engtiang chiah nge ni ang le?" Tia ka zawh leh chuan lo kiai sukin "Nupa nun chuan a huam zau khawp ang Bawihi, kan la dai ngailoh leh tawn ngai loh thil tam tak kan tawng dawn a, eizawnna piah lama ka huphurh ber thil i hre duh em?" a tih chuan ka lo bu nghat nghat a, "Pathian zarah fa te kan nei ve anga, fa enkawl hi tih na mai a ni dawn lo, a harsa viau in ka ring" a ti a, a lo ngaihtuah thui awm hle mai ka ti.




"Pathian râwn chunga ke pen zel pawimawna ania" ka tih chuan a lo bu ve nghut a, chutiang chuan zan rei deuh thlengin kan ti ti a, a haw dawn meuh chuan dar 11 a pel thui hle tawh.




"Lo chhuak chho duh lo mai rawh, ka thlen velah ka lo be dawn che nia" a tih vangin Kawngka thleng chauh ka thlah a, a kal uk tawh chu rawn let lehin nghet deuhin min han kuah leh rih a, "Ka nei chak tawh che" tiin ka beng bulah a rawn phun sup bawk.



"Min la nei dawn alawm" ka tih chuan lo kiai ve sukin ka chalah a fawp a, zanin chu a danglam riau a, thil tam tak a ngaihtuah ve anih ka ring.




.....



"I mawl lutuk a, kan footballer chuan nupui dang a neihsan daih che" school ka thlen ruala Aruata thil lo sawi chuan min thawng khawp mai.



"Nunpuia'n nupui a nei amaw?"ka ti let ha a, "Nei ang chu, ka ngei ania" a lo ti leh hluk chu mak ka ti deuh.


"Ngatinge i ngei?" Nui lek leka ka tih chuan "Vai alawm a neih" a ti leh mauh mai a, leh zel chuan aw...




Riny rawn lut ve chiah chuan "Tu maw vai nei?"a rawn ti lut a, kan bulah a rawn thu hnai ve nghal sawt sawt bawk.



Aruata sawi danin training tura phaia a kal leh kha zan khat a zu ruiin vai nu a hruai haw ringawt a ni âwm a, an coach te pawh an thinrim viau a ni awm e. Beisei loh dan lutuka a nun a han hmang chu keipawhin mak ka ti a, engtia awm zel nge an tum ka zawt nghal bawk.

"Tih ngaihna awm tawh heklo, kan bhabhi lah chu a haw duh tawh tlat lo a, Lalnunpuia phei chuan kan la mu dun lo a ti maw le, an ni ngaihdanah pasal ûm tawha haw leh chu thil tih chi a ni tawh bik silo a, vawiin ah an lo haw dawn" a ti a, chutianga nau pawh an pai silo a nih chuan inneih kher chu a ngai em mawni ka ti deuh.




Riny chuan Urdu ho in nupui pasal neih an lak thutak thu leh nu leh pate rem tihna tello a pasal an ûm chuan tuithlar hial pawh pawi an tih loh thute a sawi sap sap a, kan thiana chu zan khat a zu rui vangin a dam chhungin a buai tawh dawn a nih hmel e.




Tlaia ka haw chuan ka in chungte chu an kawngka a lo inhawng huang tak na in ka lut kawi duhlo a, U Dintei pa Pa Dailova a rawn thleng tawh a nih ka ring.




Inbual hmasa in eirawngte ka bawl ve a, rilru ah Nunpuia te chu an awm ve rauh rauh reng a, an dinhmun lai lutuk ngaihtuah chuan ka khawngaih reuh khawp mai.



"I awm maw mate" tih thawm ka hriat rualin U Mazari rawn lut chu ka hmuh nghal a, "Aw, pa Dailova chu a rawn thleng tawh em ni?"ka lo tih chuan bu nghutin thutthlengah a thu thla zui a, aman engmah a sawi lo anih chuan a zawt tua han tan pawh chu ka hreh ve tum hrang a, kan ngawi dun rauh rauh mai.




" Tunlai chu chhungkua kan buai nuai nuai mai anih hi" a tih takah chuan "Engtinnge ni ta a?"ka lo ti ve thuai a, "Laldinmawii'n then phal heklo, a mipa lah chuan chhungte ka nei lo a ti tlat a, khawlaia vakvai mai mai nge mawni" a ti hlak hlak a, a va han buaithlak leh zel dawn ve.




"Anih chuan hetah an inkawl dawn tihna maw?" ka lo ti leh a, "Anih mai loh chuan han zui haw na tur pawh a nei si lo a, a buaithlak emai mualpho huamin heti hian awm ve nawk nawk se la, inchhir ve rawh se" a ti a, ka chhang zui tawh lo.



Chutah Nunpuia kha hrechhuak zawkin "Nunpuia'n nupui a nei em ni?" ka ti leh hluai a, beidawn hmel lutuka min en in "Sawi pawh hi ka sawi peihlo, tunah i u Aldrina'n airport ah a nghak mek" a ti a, Aruata sawi chu a dik tak tak a nih hmel e.



"Hnam dang maw?" ka tih chuan "Niang chu, a buaithlak a nih hi,kan naute hi zawng" tih leh a sana bun chu en a rual a, "Ka han chho leh phawt ange, kan awm reng thei dawn silo a, nangpawn min lo ngaihven sak deuh a ngai ang, a bialpa lah khian zu a heh hmel nasa mai si a, buaina liantham a chhuak dawn nia i hriat chuan i lo han tlan chho vat zel dawn nia, rei tak pawh an inkawl theiin ka ringlo" a ti mawlh mawlh a, a mangan ve zia ka hriatpui avangin ka lo bu sawk sawk ringawt.


U Mazari chhuah leh hnu chuan eng eng emaw ka ngaihtuah kual a, U Dintei leh Nunpuia te khawsak dan chuan thil tam tak min ngaihtuah tur a. Anmahni hmangaih em emtu an chhungte rilru tinaa hetianga ho lam taka khawsa ta hi mi engzat tak awm ang maw, keini pawh kan felloh teh lul nen, dinhmun harsa zawka an han intat lut thin hi chu a pawi ngawt mai.







Cont....
Ads click leh comment kha aw☺
Show post links
Top