Thinlung BY Kimkimi tlau (Completed)

[ngaia]

Zinga ka harh chuan ni alang ut tawh a, ka hrilhhai lutuk ringawt, ka ṭhu chhuak hluaia, ka lu chu dawmin ka kun vang vanga, ka mit chu chhingin ka ngaihtuahna ka sawr bing deuh a, hriat tak tak pawh kanei chuanglo, Nizanah khan U Mafela nen khan kan inbia a, chubak chu engmah mumal takin ka hre tawhlo reng reng, kan in biak tawp lai pawh ka hrelo a, ka mutsan ani ngei ngei ang. Ka sam chu ṭham ṭawkin ka ke ka leng vaka, ka phone zawngin ka lukham hnuai ka dap nghal rawka rawka kala hmu mailo lehnghal. Ka zawng kual chiam a ka puan sinlai te ka thin phar hrep hnuah ka phone chu ka hmu veta hrama. ka khum bul chhuatah alo let bala, Khumah chuan zawng chiam mahila hmuh ngaihna a awmlo hrim hrim, hmeh en ka tum chuan battery a low aniang a eng theilo a, ka thawh tlai teh lul nen ka harh kawk pawh ka hre chuanglo a, zana ka mutṭhat loh a zinga ka thawh hma leh lai aiin tunah hian ka harh lo zawkin kahria.


Phone chu charger ah ka connect a, rin ang ngeiin alo low tak taka, U Mafela'n ka mutthilh hnuah vcall a off nghal mailo tih chu ahriat maia, zak tak kani. ka mu ang leh phiau awm si a, thawm ka ngahin ka chauh deuh chang phei chuan ka ṭawngvai ziah a, awi! Sawi ngaihna pawh ka hrelo azahthlak ani tawp mai. Harh lo leh phak chualin room aṭangin ka chhuaka, chhungte hmuh pawh a inthlahrunawm mai dawn alawm mawle.

" Ilo tho vethei maw " Mampuia'n min hmuh rualin alo ti vara, Naute chu thiamlo zeta lo pawm ve in alo su ve durh durh a, tunlai chu an exam zo tawh a, in ah a awm tam ve deuh a, School kal angailo hi anuam atih rualin in a aawm tam thei hi keinin nuam kanti ve bawka, eitur siam rek rek a peihin eirawngbawl te hi min chhawk zeuh zeuha, Mampuia awm hi chu hahdamthlak tak ani.

" Ka murei lutuk a " Ti sep in Ṭhutthlengah chuan ka ṭhu dawta, Banga sana intar ka en chuan dar9 alo pel duai tawh a, hetiang em em a tlaiah hian kala tho ngailo reng reng. U Nguri'n minlo nuih vur vura, ani pawh zanah a muṭha aniang nidang aiin hmuh anuam tlat. " Duati aharh miahlo nge keiman ka hrelo " Ham bai bai chungin kati a, ka thilsawi chu a fiahlo ruai lehnghala, U Nguri aner nang mai, " I ham lai chuan ngawi ve maila maw " tiin "nizan chu a muṭha tawp a, Ṭahbelh damdawi kan pek kha aṭha aniang, zingah dar4 velah aharh a, I chau ve si a, kan lo kaitho duhlo che anihkha, i u in a awi durh durh alawm " atih zawm leh bawrh bawrha. Nizanah khan gripe water kan pe a, kan khaw mite hi chuan ṭahbelh damdawi anti maiṭhin a, anih tak tak phei chu ka hrelo " Ka harh phah chuanglo " ka tih ve chuan " Aniang, i mu rei ṭhang silo a, mut rei pawh hian kan harh vak thei chuanglo, zingkar boruak ṭha hip hmana thawh hi ahriselin kan harhvang zawk alawm " Atih chuan thlawp zetin ka bu nghat nghata.


" Tlai lamah monu interview inei dawn animaw " Mampuia'n alo atih ve chuan " Maw! Engvang " kati hu a, min chhang ta mailo chuan U Nguri nen in melh ralh in an in nuih vur vur a, " Eng nge " ka tih hlar takah chuan " I bialpa alokal a, An in a chaw ei Kapa hnenah alo dilsak che alawm " tiin U Nguri zawkin min chhanga " Huiha " kati hluai ringawt a, ka thinphu thlengin a normal lo leh tawhin kahria, ka awm anuamlo nileng dawn anih hi. "Dawt in sawi anilo maw, alokal lai ka hrelo reng reng " Ringhlel zeta an pahniha melh tawn zak zakin kati a, " I mut thlawrh thlawrh lai khan alokal alawm " U Nguri'n atih laiin " Evidence pawh ka nei " Mampuia'n alo ti ve bawka, awih loh chi pawh anilo reng reng, dawt an sawi chu ringlo mahila Ka phone ka charge full hunah U Mafela chu ka zawtfiah veleh tho ang.

Chaw ei tura min tih chuan ka chak loh lutuk avangin ka hniala, Mampuia'n 'I chaw hmeh duh deuh ka siam sak che' ti a min thlem pawn ka hnial lui tho a, ei chakna ka neih loh chu thuhran, tlai lama ka hun hmandan tur ka ngaihtuaha ka awm anuam theilo reng reng. U Mafela biaka 'Kalo ei leh lo maiang ' tih mai ka duh ut ut a, rilru fim tlem azawng pulo ila chuan ka ti duh hrim hrim ang.

Pi Zothani'n min lawm loh zia ka hrechianga, U Mafela u leh nau te lah an pawi ka sawi miahlo chunga min beṭha duhlo tawp tute anni bawka, hahdam tak leh ngaihṭha taka awm chu katan chuan aharsa em asin. Pu Sangkima erawh pa fel leh zaidam tak ani tih kahria a, U Mafela pawn a chhun hle bawk, kan inhmuh fuh changte hian min be hmasa ziaha; kawnga kan in tawh fuh changte hian U Mafela nen kan in ngaizawng tih ahriat hma pawn min be fo ṭhin a, kan inhmuh zen zen loh laiin ka hmingte ahre thlap bawka, engtin tin nge min hriat ve teh hlawl erawh ka hrelo. A fapa nen kan in ngaizawng tih ahriat hnuah phei hi chuan ' Ka monu hual' ti a min fiam zuk zuk aching a, min fiam hmasak ber ni chuan ka zak lutuka ka ṭap lek lek ani.

tih tur em em hrelo chuan ka awm mai maia, in chhung pawh ka tifai peih hlawllo, U Mafela nen a khat tawkin kan inbe zeuh zeuh a, Vawiin chu damlo en tur a ngah deuha kan inbe mumal thei vaklo thunga, inbiak mood ah ka cheng chiahlo bawk nen apawi ka ti lemlo. Zinga alo kal leh kal loh pawh zawtfiah thlapin ' I dil ngam loh ka hlau a kalo kal anih kha, i lungawi loh phah lovang tiraw? ' alo ti a, lungawi loh chu khawi lamah ka lawm daih zawk tih chiam mai kaduh a; Mahse, in sum hramin' Lungawi loh na ka neilo ' tiin ka chhang ta zawk a, Amah lokal lo sela chuan kapa bulah an in a chaw ei dil vel kha ka zak dawna, engmah ka hriat loh laia an lo sawifel chu tihzia tak ani.

Duati'n chhunah chuan minti buai lo khawp a, U Nguri'n hnute a pek puar pang hnuah couch ah kan muttir a, thosilen zar sakin tui zetin amu bawrh bawrh a, minti buai lo lutuk chu kan buai zawk lek lek ani. U Nguri pawh a chau aniang couch pakhat zawkah muzal ar ar chunga a titi mawlh mawh laiin a muthlu ve daih a, Mampuia alen daih avangin a reh lutuka, keilah muhil vethei tawh heklo U Nguri te nufa chu ka veng ani ber e.

U Mafela te in a chaw ka eitur chu ka huphurh tehlul nen ka helhhawlh deuh tlata, ka zun a chhuah loh leh ka ek achhuak seka, bathroom ah la lut zut reng mai ani, Youtube te chu en ve bawk mahila ka rilru ah alut theilo a, thawnthu ngaihthlak ka tum ngial pawn a mood ah ka cheng theilo hrim hrim. A khat tawkin thawpui kala leh halh ṭhin a, a tawp a tawpah chuan Angaihi ka call ta ringawta, tuna tan chuan Angaihi ngaihsamna ka mamawh ani.

" Hello " call a chhan ruala pangngai deuha alo tih avang chuan amah anilo emaw ka ti lek lek a, a aw erawh Angaihi aw ngei ani a, minlo chhang ṭha lutuk chu chibai lawp lawp tlak ani. " Ve ngeia " ka tih chuan alo nui uar uar a, " Ka pangngai ve hmel tawp " tiin amah chu a in sawisa leh vel mai maia, kan nui dun hawk hawk mai. "Vawiin engmah iti lo emni " ka sawi tum tak sawi ta mailo chuan kati leh te te a " Huanah kan kal leh alawm, titau in kan in chhuahsan rih mahila hna thawh erawh ka ṭhulh theilo anih hi " ati nang nanga, hna a thawk nasa bik lutuk hi ka khawngaih ṭhin a, Pa Dika te pawh hi na vaklo in ka dem.

" U Mawii chu alo la haw duhlo emni? " Ka tih chuan thawpui alo la vak a, " U Zosanga hian koh angailo ati tlat a, kanla ngawi anih hi " alo ti a, fa annei tawh si a U Zosanga te inṭhen rih chu pawi ka tihpui ve em em ringawt mai ani; Hmeichhia te hian kan zia kan thup thiam aniang nulat lai leh mo nih hnuah hian zia adanglam thei emai. U Mawii pawh a nulat lai chuan 'Nula fel, nula taima, nula invawng tak ani ve a, mite pawn an fak vereng a mahse, mo anih hnuah erawh azia adang hlawk hlawka, a chenchilh tu nilo tan chuan asualthiam zia hi ahriat theih kher loh a, chuvang ania mite pawn Pa Dika te an dem zawk fo ṭhin, ahma a achhuah pawn Nu Hlimi hrawn hreawm vang leh Angaihi in lulin lutuk vangah an puh hleuh zawk a, anihna takah chuan U Mawii sual kherek lutuk vang ani zawka, chenpui tu nilo ah chuan keimah hian azia chu ka hrechiang ber ang.

" Abuaithlak emai tiraw? Naupang an khawngaihthlak " Ka tih chuan " Chu chu alawm, kapa hian inṭhen hlen chu a phallo a, Sanga te hi nu leh pa kar lova seilen a phallo bur a; Mahse, U Mawii erawh hrem ve rih aduh a, kan ko rih mai lovang " alo ti veleh zung zunga, Huanah chuan a vahte an hruai aniang an hming puma koh lawl lawlin avin hlar a, awmṭha turin a hrilh zing viau bawk.

" Pa Dina(U mawii pa ) ten Mo pahnih annei ve tawha, an mo te lah mifel tak anni biklo a, a nuṭa ten an nupuite an ngam vaklo bawk nen an mahni in pawh nuam ati tawh dawnlo a, kapa'n 'Kan duat zia hi hrechhuak ve ram ram se, sual chhuah ngam tawhlo tur khawpin an mahni in lamah kan tuar ang tuar ve rih phawt rawh se' ati a, kapa hi a rorum rem rem asin " ti lehin alo nui kur kura, Mo pahnih lai annei ve tawh anih chuan nuam ati bik hauh lovang.

An monu chungchang sawm zawm lovin ka rilru kap tlattu chu ka hrilh veta a, rin ang chiahin alo ngai awlsam leh viau a, 'I ngai serious lutuk anihkha, in thlahrung miah lo khan 'Thil dahna vel hi min hrilh chiang ru aw, mo thar tukah ka buai lutuk loh nan ' te iti anga ' alo ti ham hama, ka ner vak ringawt. A sawi ang hian amah pawh hian ati ngam dawnlo hrim hrim tih ka hrechianga, ka sawizui pui peihlo a; mahse, ka awm nuamlo deuh kha chu a reh veta deuhin kahria, Angaihi nge nge a ngaihsamna chuan minti zangkhai vedeuh chu anih hi.


U Mafela chu Status ah kala wish miahlo tih ka hrechhuak a, private ah pawh kala wish lo hrim hrim, A birthday tih pawh ka theihnghilh lek leka, ka hnaisailo tak tak ani, An in a ka chaw ei tur hian min tibuai a, ka ngaihtuahna thlengin ati mang vek tawh anih hi. Lawmpuina leh Duhsakna te pawh Ka lak aṭangin alo phut ve viau maitheia, kei lah ka thawh tlai chu thuhran kan inbiak hnuah pawh kala ngawi tlat a, a lungawilo viau tawh ang. Whatsapp ah lutin status ah ka lut a, Coat suit nen thlapa a lanna chu hmangin 'Happy birthday Remruatfel' tiin caption ka siama, a dawtah kan pahniha kan thlalak chu hmang leh in, thu a caption dah tawh lovin, Love sen leh thla(Moon) emoji ka dah tlawnga, Status a hman parchuai ka tumlo a, bakah a common kati. Thu thiam leh ril tak ka nih loh bakah ṭawngkam ka thiamlo lutuka Happy birthday tih bak chu ziah thui vak tur ka hre hlawllo.

Private ah erawh ' Piancham chibai Ka Duatpui, Khawvel mipa tamtak zingah Hmeichhe hlutna hre miahlo an awm laia, ka hlutna min hriatsak tlat avangin ka lawm e, Ka duhsakna zawng zawng leh ka chhungte duhsakna tlem puk telin Duhsakna ṭha chi ka hlan che a, Dam la, hriselna ṭha neiin Nupui hmelṭha deuh min nei dawn nia ' kati ve duah a, a hmuh huna ahmel landan tur ngaihtuahin keimah chuan ka nui tet teta. Ala buai deuh avangin ka msg erawh ala seen lo a, nichin deuha ka msg pawh ala seen chuanglo, A birthday ka wish tlai bik lutuk te chu nep ka inti ngawih ngawih a, bialnu nep tak ka niin ka inhria a, keimah hi in sawisak ka chak.

Ka msg chu a seen lo vang vanga, a last seen pawh ala ngai reng, damlo serious deuh an awm anih ka ring deuha, chu chu nilo se hetiang arei hi areh ka ringlo. Nidangah pawh abuai ve ṭhin tho a, hetiang em em arei erawh min rehsan ngailo. In chu a reh tawh sa nen U Mafela reh veleh daihte chuan ati reh zuala, U Nguri te nufa lah anla mutui dun si a, Duati tal lo harh se ka rilru la peng se kati.


Darkar changve dawn aliam leh hnuah chuan Duati te nufa pawh an lo harh veta hram a, titi pui tur leh chhaih tur an awm ta bawka awm anuam ta deuha, Nichina areh tlawk tlawk ang kha chu ani tawh lo. Duati te nufa an lo harh hnu reiloah kanu pawh alo haw ve a, "Ka chau lutuk" alo ti lut a, a aw aring si a Duati a phu zawka. "Duati iti phu alawm " katih chuan " Min lo sawisel tei vet zel suh " minti hrep a, ka hrilhhai teh asin, thinrimin ka sawi miahlo a, a thuphungin ka sawi vemai kha ani si a, a thinrim chiam hi ka ring phalo hrim hrim.


" Tlaiah te khan chaw ei chhuah kha i tum tak tak ange, mi ṭawngkam ṭha an um duan duan ngailo " Atih zawma, kanu chu chhanlet dan pawh ka thiamlo, ka rilru chu abuai nuai nuai a, ka chhanlet loh vang chu nge " I ti anglo emai kanu, a huphurh tawh sa nen tikhan sawi pin sak lo la, hetiang te hi in pawhna zel alawm" Ka thlavang hauh takin U Nguri'n alo ti ve a, thinrim emaw lungawi lo chunga sawi anilo a, huat tur a awm miah loh laiin "I nihna hre rawh, Mo mai mai inihkha, ka fanu ka zilhna kawngah chuan lo inrawlh ve suh " Kanu chuan Ati chang faka, U Nguri hreawm ti leh rilru na hmel chu hmuh nuam ava nilo tak.


" Pawna i lungawi loh na hi inchhungah leih baw ziah suh, i mak emai " Kati ve nghata, kanu chu ka melh no teh chiam biklo, a fanu te pawh hi mi in a mo ni ve maitur kan ni a, a chetdan ang leh a ṭawngkam hriam tak hi kei emaw U Faki hian dawng ve ta ila alawm bik hauh lovang; Kanu hi chu a ṭawng puat puata, engmah kan nih loh tehreng nen akhawsak sang lutuk te hi ka zak ru ngawih ngawih zela; A pheikhawk duhzawngte, a bag duhzawng leh athawmhnaw inbel ṭhin hrim hrimte hi a changkangin kan khawsak nen a inmil ṭhin hlawl silo a, a rilru la nula lutuk hian atibuai niin kahria, kanu anih miau avangin miin ahnunglama an relna ka hriat veleh chang hi chuan ka rilru hi ana lo theilo a mahse, amah hian azir bawk silo, minti hah hluah hluah zel.


" Zothanpuii'n mo atan a duhlo che tihte hi i hrelo nge i hrelo der zawk, min hmuhsit em em laiin an fapa ila ngaizawng ta dah a, anni nena inzawm saw ka duh bik ṭhaklo ania " Angawi tawh maidawn emaw tih laiin alo pawr ṭha leh a, " Nitin kan eikhawp ṭawk ṭawk kan thawkchhuak chungin thawmhnaw to tak tak leh pheikhawk changkang tak tak i inbel reng a, chuti chung chuan tu in nge zahawm takin en thei ang che, kan khawsak millo deuh deuha kan khawsa chung hian tu mihring fakau in nge kan chhungkua hi min zah se itih " kati a, ka sawi zawh rual chuan ka mit chhingin thawk kala vang vang a, ka thinrimna chu inhneh tir loh hram ka duha, engmah sawi leh pawh ka duh tawhlo, ngawih ka chuh vat anih loh chuan khang kum liam ta zawng zawnga kani min thlen ka lungawi loh na te, ka thinrimna leh ka hreawmna zawng zawng te kha ka sawichhuak palh ang tih ka hlau a, ka sawichhuak anih chuan ṭawngkam thiamlo tih takah ka ṭawngkhum na dawn si a, khatiang kha ka peihlo ani.


" I bialpa chu i atchilh takzet anih hi, i nu pawh min zahna pakhat mah i nei tawh lo chu ania, i tana ṭha tur hi nang aiin ka hre zawk " atih chuan kanu chu ka melh ngawt ngawta, ka tana ṭha tur chu ahria pawh ani mahna; Mahse, min tihsak erawh ka hre chuanglo. Chhanglet buai tawh lovin Duati chu ka pawm a, " In hnuaiah chhuk ila " Ka tih chuan U Nguri pawn alo 'aw' vemaia, kanu ṭawngkhum dan avang khan arilru ana tih chu a awmdan danglam hlawk danah ahriat a, ka thlavang ahauh na lama khatiang thu kha hria ani si a, ka inthiamlo ru takzet ani.

" Kanu ṭawngkhum dan che avang khan pawi kati, kanu hi chu i hriatthiam hram hram angai anihhi " In hnuaia kan chhuk hnuah chuan kati a, " Ka hrethiam alawm, inthiam lo duh suh " tiin a nui lui ngiala, a nuih aza hlawllo tih erawh ahriat a, " Kanu hi chu amak ngawt mai " Thaw halhin kati a, " A thimrimna ala thunun theilo anihhi,thinrimna thunun hi hara, hriatthiam angai alawm" Dam dapin ati a, chutiang rilru ala pu thei chu amak kati zawk, U Nguri hi misual anilo tih chu ka hria a, asual loh chu thu hran hmeichhe chhel leh puitling tak ani tel bawk anih hi.

Kanu chungchang kalsan in U Mafela chungchang kan sawi kai a, U Mafela sawi takah chuan ka msg ala seen lo tih ka hrechhuak leh a, thawpui kala hap ringawt. "Kan ngaihzawng zawng zawngte hi kan tana ruat anni veklo a, aṭhen chuan ngaihzawng tam tak an neih kual hnuah pawh an tana ruat an tawn loh laiin ṭhenkhat erawh chu ngaihzawng tam tak neih kher ngai lovin an tana ruat chu an tawng mai bawka. kan chunga thil thleng in anglo deuh deuh te hi Pathian in duhsak bik aneih vang ni lovin, min hrechiang em em tu Pathian hian achang chuan kan dawhtheihna te hi min fiah ṭhin a, na taka kan awm chhante hi min hmangaih loh vang anilo a, amah kan hnaih na turin natna te hi min pe ṭhin zawk ani. Achang chuan amaha rinna nghat lo theilo a rilru hreawm leh mangang ten min siam a, engkim hi chhan nei vekin athleng a, kan chunga thil thleng engpawh hian kan nunna kan zir tur leh seng luh tur thil ṭha akengtel tih hria la, harsatna leh buaina eng anga tam pawh tawk mahila chunglamin kan tana aruat tawh chu tuman min neih khalh thei ngai chuanglo " Ati dap dap a, " Awi! Ka sawi tam lutuka ka hah " tih zawm zatin anui hak haka, thil asawi tam bawk nen a dang aro aniang abula tui bottle chu hawng rawk rawkin a in nghal khalh khalh a.

" Mafela chhungte emaw kanu leh pa ten harsatna an siam che u pawn hnual phah lo la, Chhungte duh ang thlap pasal neih hi aṭhat rualin kan thinlungin a duh leh athlan tak mihring chelh tura theihtawp kan chhuah ve hi athiang a. Vawikhat pian ve manah chhungte duhthusam nilo kan duh leh hmangaih tak Pasala kan neih hi kan chanvo ani ve bawk a, chutih rualin thui takin kan ngaihtuahna hi kan hmang ve tur ani. duhna hi hmangaihna emaw tih a awl a, chutah tak chuan keimahni hi kan pawimawh a, a hmasa berah kan ngaihzawngte hi atchilh lo ila chu chuan duhthlanna kan siamna kawngah leh thluthlukna kan siamna kawngah nasa takin min pui thei " Tiin min nuih var vara, kei erawh ka ṭah a chhuak lutuka, ka hnar leh hrawk athip hlur a, ka khaw hmuh pawh a phe vek tawh.


Hetianga zilhna leh thu ṭha te hi kanu hnen aṭangin ka dawn ka inring ve ṭhin a, kei aia dai zau leh thil tam tak hmachhawn tawh anih avangin ka tihsual a, ka dai tleu mai hlau in thu ṭha leh ngaihzawngte laka awmdan turte hi min hrilh ve ka beisei a; Mahse, beisei bo mai chauh ani. Tihian ka u nupui zawkin ka tana ṭha tur ni a ahriatte athiam ang tawkin min hrilh malh malh zawk chu ani si a, U Nguri hian apasal mai nilo a pasal chhungkua thlengin minlo hmangaih anih hi, Pasal ka neih ve hunah chuan U Nguri anga rilru tluang leh hmangaihna ngah tak nih ve hi ka tum ang.


" Ka lawm e, duhsak taka hetiang thu min hrilh avang hian" Ka ti ṭiak a, ṭah ka insum bawk nen ka aw chu a kir veka, a kawikual nuai nimaiin kahria. " Duati ai pawn i ṭahbelh tlat, chutia ka thusawi leh zilhna che i huat dawn loh te chuan kan inzilh malh malh zel anga animai alawm, In ngaihzawnna lamah pawh ka ril teh ania, i u nen hian awlsam te a innei kan nilo a, tawnhriat ka ngah ve alawm" ati a, a tawp lam chu a uang tih kahria a, ṭah chhuak viau e tilo chuan ka nui leh ang hawk hawka.


U Nguri'n U Hlua nen an in ngaihzawn lai asawi chho a, ka u chetchhiatna te sawiin, a sawi thiam si a, kan nui dun leh chiam zela, Duati pawh kan ti mu ṭha theilo. ama chetchhiatna pawh a sawi hmaihlo a, kan nui dun leh kar kar zela, a mood a cheng zeta U Nguri'n an nupa chanchin a sawi leh lai chuan "Helam chu inva hlim bik ve a, khilam chu ṭo haw tur ang maiin a dur khup a " Kawngka a alu lo rawlh luh pahin Mampuia'n ati a; a lungawilo a nuih vel mai mai tih kanu in hria sela chuan achhip buk laiah hian a kek chiam duh ang. "Lo lut rawh " U Nguri'n atih chuan rang zetin alo luta, Naute chu lo ṭhut chilh veeh chatin a en leh dauh dauh tawh a.


" Pawm la " Ka tih chuan " Ka bal emai ka intih fai hunah animai " ati a, " Naupang pawh i ni tawh silo a, tinge i len vehlek hian i balh em em zela " Melh ram ram chung hian kati a, ka ngaihbel nge a lu te chu a paw phuk in kahria. "Len apianga bal ang chuan min puh suh aw, vawiin te chu accident an awm a, kan buaipuina lamah alawm kan balh vek, chanchin engmah in hre veleh nange " Kan pahniha min en tawk zak zakin Mampuia chuan ati hmuka, alu chu a thing nar nar lehnghal.

" Hre nang tute nge accident a, khawiah nge " tiin U Nguri chuan zawhna a zawt mawlh mawlh a, Mampuia pawn ṭha deuha chhang ve zelin "Scooty leh car an insu a, scooty khalh tu kha arui deuha, Car khalhtu lah a side lo lamah atlan bawk a, an thiamlo ve ve. Scooty khalh tu leh a phurh kha an na deuh a, Car a chuangte erawh hliam nei an awmlo, an ṭawngthei mah mah a, an ninawm tak tak ania" ati duah a, chutiang thil thleng a awm tih kanlo hre velo reng reng. Veng thlang lama thil thleng ani a, keini in a tawm chawt leh naute buaipui reng reng tan chuan hriat ahar ve deuh bawk ani, "A van zialo e aw, police anlo kal em? " U Nguri'n ati leh a, " Kal e, an inrem dan chu ka hrelo, Poclie khan an hruai nge pawh ka hre tawhlo, hliam tuar te kha kan buaipui a, an scooty lah Pu Robula te in bul awih ah khan a lum si a, chungte chu kan la chhuak a, Makpa hual pawh abuai khawp mai " tiin amit chu min siai zeuh a, ava han nghal tak.

" Alo kal vemaw " Ka tih hu chuan " Hliam tuar an awm a, an hrilh hriat hmasak ber tur chu Doctor alawm, ahmunah an dinhmun a enchian vek hnuah Aizawl lamah a refer anihkha " Ati zung zunga, Accident an awm vang anih dawn chiah chu ka msg pawh a seen theih reng reng loh, a chhan ka hriat takah chuan ka rilru nuamlo zet kha areh ta a, ka thawveng huai mai.

.
.
.

Dar2 velah ka inbual fai sar a, chaw ei tur chauh ni mahila ṭawphnawk deuha kal chu ka duh bik loh avangin ka thawmhnaw hak tur pawh ka thlang kual nasa a, ka in hailet nasa lutuk ringawt, ka hmaiah chuan ka hmel ti lang fiah deuh turin make up tlem ka inbel a, nasa deuh rawh anilo, ka sam chu ka tukhumah felfai deuha bawk in, ka bawk kim ve theih loh kasam tawi deuh bik ho chu bakilh te in ka kilh bet leh bawka. Duhtawka ka in siam hnuah chuan darthlalangah in en vang vangin ka lungawi ve viau a, mahni tawkah ṭha ka inti ve khawp mai,


Ka inpeih hnuah ka chhungte eitur rawng ka bawl leh te te a, ka kawr hak chu abal palh ang tih hlau in Apron ka hreng tlat bawka, balh ka hlau lutuk chuan Mampuia nuih ati za a, ka eirawngbawl naah lo awm ve in ka hnunglam aṭang chuan min nuih leh kur kur zela, thla te min laksakin kahria. a khat tawkin " U, lo ṭhu hahdam veteh " Nuihchhuah hlau zet hian alo ti ṭhin a, keilah mawnga hawlhtu nei ang maiin kaṭhu rei thei silo a, Mampuia tan fiamthu ka thawhsak hi ani ringawt.


Kanu lah chu nidanga leng ve ziah si kha Sitting room ah chuan aṭhu verenga, U Mafela lokal hunah alo hauh emaw hriat nuam lo deuhin aṭawngkhum kahlau a; Kanu hi nu nasa leh thinchhia ti a an sawi ṭhin ani ve a, a tih tawh loh ah chuan anasa in arapthlak a, tumah hi zah pah vak aneilo a, U Mafela pawh a khak hreh dawnlo tih ka hrechianga, chuvang chuan leng daih se kati.


Dar3 pelh hretah U Mafela alo lang ta nawlh a, ka thin chhunga ka lungphu hi a sawt chhuak mai dawnin kahria, In chhunga alo luh chuan Nidangah pawh lai ngai tawh silo kha tunah erawh ka lai thar leh vela, en pawh ka en ṭha ngam lo a, kava han over vetak. " I hman tawh em? " Tiin min melh kalh a, reilote chu melh let ve in "Hman animai " tih leh hawisawn ka ruala, amah ka hmuh takah chuan ka msg ala reply miahlo tih ka hrechhuak leh a, abuai tih chu kahria, nileng ṭhaka abuai erawh ka ringlo a, rilru nuamlo deuha awmreng ai chuan kan pahniha kan awmdun hunah ka zawtfiah ang.


" Kapi, Kimi hi ka hruai tawh maidawn asin " Atih chuan ka mit ka chhing sawka, kanu chuan asual chhuahlo hram se tiin ka rilru in ka ṭawngṭai mawlh mawlh a, " A leng rei hmanlo ania, Nguri a che thei silo a kan buai ve lutuk " nem fahranlo hian kanu chuan ati a, " Aw le, kalo hrereng ang" Ti dam dapin kanu a enna ata amit chu ala sawn a, ka lam lo hawi leh in " Kal ang hmiang Bawihi " Ati thum chhaka, thu awih deuha lo ding ve vatin pawn lamah kan inzui chhuak a, kanu chuan ṭawngkam khat pawn min thlah lo hrim hrim, ka beisei hranlo bawka, ka ka rilru ana chuanglo.

" Damdawiin aṭangin ilo tlang ami? " Kawngka kan pelh fel rual chuan kati a, ala in thuam ṭup avang chuan Damdawiin aṭangin alo tlang anih chu ka ringa, ka ring suallo bawk ang, ka zawhna chu ṭullo ti viau mahila ka lai lutuk tih reh nana biak ka duh hrim hrim avangin ka zawt ta tho anih hi. "I rilru i thlak leh mai kahlau a, Damdawiin aṭangin bak lengin kalo in khalh haw nghal dawr dawr alawm " Min thlek zeuh chung chuan ati a, nidang zawng aia min en uluk zual ni a kahriat na chuan minti lai tulh tulh a, ka khawr vek in ka inhria.

" Nia, msg i chhang theilo a " ka tih sep hnuah "Taka!" Kati hluaia, ka aw ka dim hman silo a ka duh aia ka ṭawng rin avang chu nge U Mafela kal lai pawh ading chawt a, lo in herin 'Eng nge' ti niawm hrimin a mitko chu ati che zeuha. "Khawnge i phone " ka huaisenna zawng zawng sawm khawmin kati nghal thawr a, reilote chhung a hmel chu abuai ve nak a mahse, areilo. Kiai sukin a kekawr ip te chu azen rak raka, " A low " min pek pah chuan ati a, " Chuvang ami ka msg i chhan theih miah loh, i buai vang emaw katia" Lawmlo deuha katih chuan " Accident chu ka buaipui ngeia, Aizawl lamah ka refer avangin ka buai rei hranlo, chanchin lo hrilh che ka tum khan ka phone kha alo low daih a, vawiinah charger ka keng silo a, ka talbuai khawp mai, ka ngai viau bawk che " ati duah a, hna akal dawn in a charge full ziah a, a charge full loh pawn Power bank akeng ṭhin a, nidangah pawh low ngai hleilo vawiin khera a low chu amak ve hrim hrim.

Ringhlel zeta melh ralh chungin phone pang chu ka hmet vang vanga, " Bawihi le'h " Nuihza insum zeta tiin alu athing nawka, in herin a bike hunna lam apan a, keipawn ka zui ve tho a, ka chetdan chu a naupangchhia tih hre mahila awlsam deuha a phone a low ringawt chu ka ring thei hlawllo ani. phone chu ka en vung vunga, a in swich on zawh chuan " Ka ring reng a " ti sepin " A low miah lo " kati hlaka, Whatsapp msg leh Youtube noti te alo thleng chur chur a, Bike a ṭhu kai mek U Mafela pawh chuan alo ngaihven khawp a, abula ka din rual chuan a phone chu min chhuhin a bih nghal ngur a, " Ava mak ve " ti hlukin eng emaw hi ahmet a, 'Bawihi, I msg pawh ka hmu e ' atih sup chuan rang zetin ka phone ka la chhuak ve nghala. A birthday ka wish naah khan ka uang ve bawk si a, kan awmdun laia a chhiar chuan ka zak dawn lutuk, a chhiar hmaa delete hman ngei ka tumlai chuan " I deleted hman tawh chuanglo " tih leh ka phone min chhuh chu aruala, A chhiar vek tawh tih hria in en pawh ka en ngamlo a, lei lam bih ngarin ka insiam chhe vak ringawt.


" Pathian zarah Ka dam anga Nupui hmelṭha deuh kanei thuai ang che " Nghal zeta atih chuan ka ke kaper data, "Ka fiamthu anihkha " ka tih chiam rual chuan anui hawk hawka, a landan chu anelawmin hmuh anuam a, zak viau mahila ka hawisawn phal chuanglo. " Minti hlim takzet ani Bawihi, hetiang anih chuan kan in kan thlen hunah haw leh ka phal tawhlo ang " Ka kuta lo chelhin ati cool ruih a, lai deuh tak chunga amah chu melh in amitmeng nung sarh leh de sar sar chu ka enreng a, a mitmeng chhiar thiam har tak ṭhin kha tunah tak chuan U Mafela hi mipa langtlang tak ani rih a, a mitmengah chuan lungawina a zam kual vel a, Umm..Ni e, tunah hian He mipa lung hi a awi takzet ani.


Cont..

Kanti tawp tawh mai dawn mawni
Show post links
Top