CHAPTER 21
“In be lawk ang" school bang haw lamah u Sangpuia nen kan intawk hlawl mai, en zawkin “Eng nge sawi i duha? Ka hmanhmawh a nia" tiin ka kut ka kuangkuaha, a awmdân chu ka en ran bawk, engtak chu sawi tum nimaw?
“Bul ṭan leh ang" a tihchuan mak ti lutukin ka en reng ringawt, chu thu chu engvanga sawi ngam nge anih zawk ni? “I â em ni? Nupui neilai i nih kha, bâkah ka duh tawhlo che" tiin kal mai ka tuma, ka kutah a rawn vuan let tlat mai. Inherin rum zet chuan ka ena.
NUNUI PIC
“Ka ṭhen ang, ka chân theilo che, khawngaihin bul ṭan leh ang, Samuela kha i duh tak tak lo tiraw?" a rawn tihchuan ka nuih haka “Min thlah rawh, ka duh emaw duh lo emaw i hriat ve angailo" chutih lai chuan Samuela chu a rawn lang ve ta thut a, ka mengphawk vak mai, u Sangpuian min lo chelh lai a ni bawk nen a thinrim hmêl viau mai.
“Ani ai saw chuan min duh zawk ani lo'm ni?" ning zet chuan ka kut chu ka thing thla a, Samuela lah chu thinrim zetin a kalsawn tawh bawk si, ka umzui vat angai ani. “Duhtawk rawh, ka duh ṭhin che pawh a niang, mahse Samuela nên khan in tehkhin hauh suh, nang ai a ṭhw zawk; chuan ka hmangaih bawk" ka ti ta sak saka, a meng rum nghal ul mai.
Ni e, a ni hi chu ka duhthu kha ka hrilh fo a, ka hmangaih thu erawh ka hrilh ngailo, mahse Sama laka ka awmdan leh rilru put hmang erawh chiang takin ka hre thung. Hmanhmawh zet chuan Samuela chu ka um zuia, an ina a lût ka hmuh chuan rang zetin ka pan nghal hlawk hlawk mai.
Inchhung ka luh chuan tumah ka hmuloa, a pi leh pu an awm lo a ni ngei ang. “Sam" a room-ah chuan ka lût zuia, a lo ding ngawi renga, min hnungchhawn hmak bawk. “Nichin kha" ka tihchuan ka sawi zawm hma hmain a kut a lo vai hluka.
“A tawk i duh zia ka hria, ka lo tibuai cheu pawh ania'ng, a nupui kalsan a duh chuan i duh chuan i nihpui thei a lawm, sawi theih ka neilo" a tihchuan ka thaw haka, a aw ah lah chuan a thinrim zia ka hre reng. “Ka duh a lâwm" ka tihlai chuan thinrim lutuk hian min melha “Chhuak rawh, i duh a nihchuan chhuak rawh, min rawn tibuai tawh suh" tinghutin thawk a la hawka, a thinrim chu insum a tum hle tih ka hria.
“Mahse nang chu ka hmangaih che" tisapin ka hnaiha, a thinrim inhum ruh chu va vuanin amah chu ka en chhoa “Ka hmangaih che Samuel Malsawmkim" ka tih leh tâkah chuan a rawn inthlah dul ruai ruaia, ka hriat theih loh tura phun supin alamah chuan min pawt hnai dawrha, rawn kûn hniamin ka hmuiah chuan a rawn fawp nghal zat bawk.
Lo chhâng lêt ve vatin a zak hnuaiah kut rawlh lût chuan ka kuaha, a hmui leh lei chu zei zeta tiche in ka kuah nghet sauh sauha, “Keipawhin ka hmangaih che misualnu" a tihchuan ka nuih ver vera, a âwmah chuan ka bei chial bawk, ka biang tawn tawnah rawn vuanin min kuai dâk leha, muang raih leh phût lêt nei tih hriat tak hian min fawp a, ka khur der der thei nia.
Min pawm nawlhin khumah chuan min muttira, min rawn delh betin a kawr chu a phelha, a piannalh zet chu a lang chiang viau bawk. A abs ah chuan chûl sakin ka chil ka lem khawlha, ka bula rawn mu chuan a chungah min pawt kai zat bawk.
“A châng hi chuan insum theiloa chêt mai ka duh ṭhin, ka mamawh lutuk che hi ka thi dâwn in ka hria" tiin ka kawrchhanah ka hnute chu a hmer salha “I kut la teh, chhuak ang haw ka duh, haw tlang tum ka nia nangmah avângin helaiah ka awm leh phah a nia, nu Chhingi ten min lo ngaihtuah tawh ang, vawiinah an fanu naupang ber a lo haw dâwn a" tiin ka hrilh siam siama.
Min kuah nghet sauhin “I engkim hi ka ta a nih hi hre reng rawh. Kha mipa kha hnaih tawh lo turin ka duh bawk che, natna pe tu che bula i awm kha ka rem ti tawhlo. Ka tuam dam thei lo che a nihchuan ka inthiar fihlim san ang che" a tihchuan a awma khabe nghat chuan a hnute hmur tereuhte chu ka hmehsak neuh neuha.
“Mipa hi in hnute hi ûm ve ta se in mak âwm" ka tihchuan a rawn nui hak mai, “A ṭhing lutukin min duh leh silo ange, min khawih reng suh ka insûm theihna hi a pan teh ania, a hun hma in ka mutpui mai ang che" a tihchuan fiam ka châk ta tlat “I insum thei tak tak ang maw? Khawih lui zêl ta che ila engtin nge min tih ang" nuihza zet chuan ka ena.
A hmui liak zauhin “I duh a nihchuan ka in peih reng, tûnah pawh. Naute lo siam sa ila a ṭha daih zâwk alâwm" a tihchuan a awmah chuan ka bawh hnaka “Ngailo mai rawh se, kumin te hi han liam sela, nakum kum tâwp lamah emaw Pathianin rem a tihchuan kan la innei ve ang chu, i duh chuan" ka ti zauh chu a rum nghut mai.
“Ka duh ka duh, theih phei se tuna inneih nghal hi a nia ka duh ni, palai ka lo tîr mai dâwn emawnile?" tiin min kuah nghet sauha, ka nui hak mai “Ilo tîr mai dâwn em ni? Mahse tûnah chuan a chi rihlo, zânah lo lêng rawh aw kan haw phawt ange" tiin a hmuiah chuan ka fawhsak zauha, a lâwm hmel vur vur viau mai.
Pawn thleng min rawn thlahin kan in vai liama, in ka thlen hnu lawkah tualah sumo rawn dingin nu Chhingi fanu chu a rawn thleng a nih hmel.Kan lo hmuak ṭhapa, keimah nên chuan inhmelhriatna te neiin inchhûng lamah kan in zui lût hlawma, khawpui awm tih takah a no pawh ano hle, a ṭawng duh viau bawk, a rawn thlen hlim aṭangin a kâ a la châwl lo tih theih a ni.
Midang chuan chhang lem lo in kan ngai thla ṭhap ringawt, zân lamah chuan Sama te ho pawh chu an rawn leng ta ngeia. “Min lo hmuak dâwn em ni Sam" Huni bawk chuan a lo tileha “Rawn hmuak che a nih hi, kha i va nalh tawh sur sur ve, helamah i awm hlen tawh dâwn em?" Valpuia chuan a lo ti vata.
“Ka tum chu ania, tu emaw hian beiseina te min hmuh ve chuan ka awm hlen lovang tih pawh a sawi theihloh" tiin Samuela chu a ena, ka nu ṭhiannu fanu mahnise ka mil dâwn hauh lo, a mitmengah chuan Samuela chu a duh tih a chiang reng mai, lo ner nakin Samuela bulah chuan ka ṭhu a, nu Chhingi te erawh an mu lût leh daih tawh.
Huni pawh chu kan bulah rawn ṭhu in a dân ngai te bawkin a ṭawng leh par para, a motor chuang chu a chau vak lo a nih hmel, a thusawi paha a hawi zuk zuk leh Sama a en kher ṭhin chu ka lo hmu mawh viau mai, a khawpui awm chanchin bialpa a neih ve zuai thu leh a chhiat loh thu vêl te chu a sawi zut zuta, a ṭawng dan leh a che vel te chuan a vun no leh a khawpui awm chu a chhuang hle tih a hriat.
“Ngaiah neih i ngai dâwn a nia, kan lo hriat ṭhan tawh khawpui awmberi a nih hi, mi ai hian khawpui hi a awm bik a, he khua aṭanga khawpui awm dang te chu a lakah chuan awm ve lo ang mai an ni" Rengpuia chuan ka bengbulah a rawn ti su su a, ka nui hak mai. Min rawn en tâk ṭhapah chuan insum vatin ka ngawi zui leha.
“Awi ha kan College te chu a nuam a sin aw, ṭhiante ka ngah bawk si, chuan hei milâr te pawh ka hmu nuala, a nuam a nia aw" a tihleh lai chuan “Aw chûngte chu Nunui hi a khua zâwk ania, a hria in a kawm nual zawk mai thei a sin, a hmuna piang zâwk pawh hei a ngawi reng chu a nih hi, a hmu ve tho ang chu. Bâkah milâr an nih avanga han ngaihsân vak hi ka peih ve lo, an hlawhtlinna ah chuan an ngaihsânawm lutuk, mahse over uchuaka han duhhluak te hi ka ten, a bikin hmeichhia te hi a over zual hi in nia, mipa chuan duh kan neih pawhin kan ngawi mai maia, hmeichhia erawh in mi duh te in insawisel siak hi a ni ringawt" Rengpuia chuan a lo ti ve zata.
Kan lo nui hak thung “I ti mak e a, hmeichhia zawng zawng hian milâr hi kan duh bur bik lo ania" ka lo ti ve vata, Huni pawh a thusawi an lo tih tâwp sak takah chuan a ṭawng zawm mai bik lo “A nia lawm, keichu milar nih te hi a hlauhin ka hlau, Mizo chu kan ngaihsân zâwng chu kan duhin uchuak lutukin kan faka, kan post chamchi a, kan huat zâwng te lah chhe tawpkhawkin kan sawichhia in kan post mualpho leh duha, kan milâr duhzâwng an inan loh phei chuan an mi ngaihsân ten an rawn hre ve dâwn pawh niloah inhnial in kan thih thâ in kan ṭanga, nuho lah bang lo, hmeichhia zêl hi in over, in hmeichhiatpui sawichhiata tihmualpho pawh in ching ber" Rengpuia bawk.
A thusawi chu ka haw lem lo, a dik ve miau. Buaina tam tak hi chu keini hmeichhiate vâng zel hi ani, mi kan duh leh a sar hu laiah over takin kan pak huam huama, a rei a kan theihnghilh leha, hmingchhiatna rawn nei leh se duhtawkin a sawichhe duh duhah kan ṭang leha, social media ah kan post mualpho leh zut zut duh si a nih hi.
“A dik khawp mai, mahse mipa pawh hi in ni ve tho a nia, tunang ah phei chuan mi sawisel peih zâwk hi mipa an ni tlangpui zawk, heng social media a mi han sawisel vak vak ṭhin ho hi chu mi awmawl, hnathawh tur nei lem loa tlawngawl ho hian an ching zual, hnathawk mi tân chuan a buaipui hman tak tak loh, hna thawhna châng hreloa phone khawih kan tam lutuk vang hi a ni ber ang, chulam sawi tawh lo ang u, Rengpui neih tlâk lohah min chhuah vek mai dâwn a lawm" ka tihchuan an nui dar dara.
Titi leh nak nakin an haw dâwn chuan pawn thleng kan thlaha, Huni a awm ve tlat avâng chuan Samuela nen pawh kan in vai liam tawpa.
“Awi hman aṭanga ka duh tawh ania, alo lenga a nuam e, Nunu min tih pui la?" a rawn tihchuan ka en zawka “A tu chu maw?" ka lo tihchuan nui hakin ka bengbulah “Samuela kha" a rawn tihchuan ka phu zawk thei nia.
Amah chu chiang zetin ka ena “Ka duhna a rei tawh lutuka, amah vang ania helama awm pawh ka tum, ASP a ni dâwn te an ti lehnghâl. Pasal hna nei neih te chu a nuam dawn e" a tihchuan ka nui tawi tak ringawt, ka bialpa a nih thu lo sawi kha a mawi chiah bawk silo, an ina awm mai ka ni bawk nen nakum lamah inluah zawn ka tum tho a, kumin atân ka awm ala ngai miau sia, nu Chhingi pawhin a lo hrilh chu ka ring tho a, engmah ka sawi duh lem lo.
“A nihchu" ti ringawtin room lam-ah chuan ka lut zuia “Huni khân lo biak tur che in min chaha, a duh viau che a nih hmel, i chhâng dâwn em?" Samuela chu ka text a, a seen rang viau “Chhang tûrin min duh em ?" a rawn tihchuan a thusawi awmzia ka hre chiang viau mai.
“Duhlo, ka ta i nih kha" ka tihchuan a rawn call zui zata “I thusawi a kha danglam ngai suh se, ka ta i ni a, i ta pawh ka ni bawk, midang an awm thiang lo, keimahin ka lo hrilh mai ang. A hma aṭangin min ngaizawng tawh a lawm" a rawn ti zuia, ka ring Huni pawhin a sawi tak kha mawle, a mipa duh em em nen kan ni tih hria se a lawm hauhin ka ringlo, a mizia ka ngaihtuaha, ngeiawm taka awm vel a thiam dawn hle lehnghâl.
Reife kan in biak hnuah kan daha, mas hla zir an ti ṭan bawk nen keipawh zir ve ngei ka tum bawk. Zîngah hma takah tho in ka in tifaia, nu Chhingi pawh a rawn tho chhuak ve nghala, Huni erawh ala mu a nih hmel, titi mawlh mawlhin eng eng emaw kan sawi kuala.
“Samuela nen hian in nihna a rei tawh em?" a rawn tih thut chuan mak ti zetin ka ena “Rei ve tawh e tinge?" ka tihchuan a nuia “Timah nilo e, i u Huni hian a duh thei lutuka, mahse Samuela zâwk hian a hnar ṭhina, an tleirâwl tirh khan a nia, hnar em em pawh nilo in an nulat tlangvâl hnua in ngaihzâwn a duhzawk thu khan a hnâra" a tihchuan “Anihchu" tihchiah chuan ka chhânga.
Chutiang tleirawl lai thil chu rin tlat tur a ni tih pawh awm lova engvanga ka bula sawi kher nge maw a nih le? A mizia danglam thut nen hian a ranglama inluah hran vat ka ngai a ni, ka lakah rilru chhia an pu palh a nih vaih chuan an ina awm mai ka ni bawk nen ka tân a buaithlâk zual dâwn tih ka hailo.
A fanu a ni a, a rilru chuan a ṭan tûr zia ka hailo, Samuela lah tûnah chuan tu tan pawha makpa atâna awh tham a ni tawh tlat a ni.
“Sama chu ka hre chianga, chutiang chu tleirawl lai mai ania sawi chhuahsak ka tum lem lo, kan tun hun hi a pawimawh ber a lawm, khawinge vawk chaw kan pe tawh ange" tiin ka kalsawn ta daiha, Samuela nên kan nih kha a hrelo hauh lo, Huni a rawn haw a nizân a kan thusawi vêl kha a hria tih a chiang reng, Huni kha a ṭawngring em bawk a ni.
ZAWMNA
Zan lam chu inkhawm turin kan inzui hlawma, zanin aṭangin mas hla zir an ti bawk nen kan ṭhian ho chu kan kim viau mai. Huni pawh kan bulah a kal ve a, Samuela nen kan inkai vêl a hmuh chuan min en haw haw reng mai.
“Nangni pahnih hi enge in awmzia?" a ti ta rêng bawka, “Kan in ngaizawng, in ngaizawng mai nilo in kan innei ṭep tawh" Samuela chuan awlsam zetin a lo tiliam puata, Huni chu a ding dat mai “Ni e han innei vat teh se, keini pawh inneih zung zung angai, ṭhat lai hian chi thlah vat vat tur, fa nei hman lo te hian kan awm ang tih a hlauhawm" Rengpuia chuan a rawn ti a, kan lo nui dar dar mai.
“Nunui pawh chu a hma khân min hrilh ve mai ta che" Hunin a rawn tihchuan ka lo nuih ringawta, ka tân sawi kha a rem miau lo a lawm. “Hei i hriat tawh tho hi, lût ang u chu zai an ṭan tawh chu" tiin Biak inchhûng lamah chuan kan inzui luta, Biak in chhûngah chuan ṭhu hrang hlawmin hmeichhe ho chu kan ṭhu tlânga.
Zai ṭhap ṭhapin Manuni aw chhe lutuk chu kan nuihpui leh ṭhin, nuih rin lah a tihchi siloh, pitar aw chhuak ṭha thei tawh lo hi a ang ber mai.
Khâwm bânah chuan hla zirna tur lamah chuan kan inzui leh ṭham ṭhama, keini erawh dawrah Samuelan kal lawk ang a tih avangin kan peng a “Enge i lei dâwn?" ka tihchuan ka kutah a rawn huma, a kut chu a lum nuam bik takzet, kei erawh thlasik khawvawt avâng chuan a hik thlar mai.
“I kut ava vâwt ve, tikhan min thlah miah suh" tiin a kawrlum iptea chuan a kuta min kai reng chung chuan a dah luta, ka hnial bik lo. Khua a vawt bawk nen ka khur hlak hlak reng mai, zai pawh ka zai ṭha thei dâwn mawni ka ti hial tawh mai, thlasik hi chu tawrh hi a har ve em a ni. Helai phei chu thingtlâng tih takah a la vawt zual lehnghâl.
Dawrah chuan lutin eitur chu a lei mual muala, enga tan nge maw a tih ni, ngawi reng chuan a thil lei chu ka lo en ve reng ringawt “Nang ni pahnih hi chu in ngaizawng reng rawh u, in inhmeh lutuk, in hmelṭha dûn si" dawr nghak tunu in a lo tihchuan Samuela nen chuan in en in kan nui saka, in fak hi chu a dawng tu tân hian a lo nuam emaia, keipawhin mi hi sawisel mai mai ka duh ngailo.
Keimahni chunga thleng tura kan duh loh hi chu mi chungah hian ti biklo ila, in sawisela in rel reng lo hian in fakin kan tlinlohna lai te hi in khuh mawi sak ila tumah hian hmelma kan neiin in hauhna tur kan neih ka ringlo, mi tam takin hmelma kan neiha, huat kan neih tlat chhan hi chu in rêl leh in sawichhiat kan chin vang hi a ni ber mai.
Tumah kan famkim lova, kan ngainat loh mi pawh nise be lo mai ila huat tur a awm lo a nimai.
Dawr aṭanga kan chhuah rual chuan a thil lei ho chu min pe a, ka en nghâl ha mai “Enga tinge min pêk?" a thil lei ho zawng zawng chu ka kutah a dah vek chuan mak min tih tîr lo theilo, ama ei turin a lei emaw tia. “I pum ri kha ka hriat hmaih hleinem, bâkah zanah thil ei rûk i hrat tih i sawi kha, i zân rilṭâm huna i eitur a nihkha, hla zir chhung chu hmun dangah i dah rih dâwn ania, tilo chu an lo dil leh palh ang che" a tihhuan min hmu thei dâwn lo mahse thim karah chuan ka nui ver vera.
Hepa hi ka hrechiang tawlh tawlha, ka duh tulh tulh mai. A ṭawng ve duah ngailoa, mahse ngawi rengin min ngaihtuah em em ṭhin tho si, dingdihlip in a biangah chuan ka fawhsak vang vanga, rawn inher in ka hmuiah chuan a rawn fawpa, mi veivak an awm lo bawk nen a duhthawh viau mai lehnghâl.
“Duhtawk ang, ka thaw a chham dâwn?" tiin ka namsawna, a rawn nui nghal hak mai. “Kal ila" tiin ka kut chu a kawr chhûngah dah lût leh in a thil min pek pawh chu a khai leh riha, hla zirna hmun thlen hma in teah chuan lutin a khai ṭha riha, a chêt dan chu ka lo en reng thung.
Hla zirna hmun kan thlen chuan min lo fiam nak nak bawk nen ka zak chu Samuela hliah ah chuan kalin Manuni te ho chu ka pan vata “Le in ngaihzawn bawrh bawrh tur, in ngaihzâwn laia hla zir dun te phei chu a nuam a nia, bâkah kan miss hmelṭha-i hi lo char beh tur ka tih tawh kha, thianghlim tak hian a in ngaihzawn theiha, midang te pawhin in ngaihzawn hi zah loh tur, inzui ula leng ula, inkhawm dûn rawh u. Fianrial lam pan ai chuan hetia midang hmuh ngeia in awm hian in ngaihzawnna hi a zahawm zual tih hre reng ula, KTP takin tumahin an dem lovang che u, mihring nihphung a ni a, tumah in sawichhe thei kan awm love" conductor in a tihchuan dik ka ti viau.
In ngaihzawnna hi tam tak chuan mi hriat te kan hlaua, mahse an hre leh tho tho. Chu ai chuan Conductor sawi ang ngei khân thianghlim takin mi te hmuhah a inkawp theiha, Pathian nena kal kawp chuan a zahthlak hauh lo, tam tak hi chuan in ngaihzawn avanga a fala awmdun, inhmuh leh len lam lawng lawng kan ngaihtuaha, chu chuan mi hriat hlauhna min neih tir ṭhin, hmeichhia te pawh hian hetiang lam chiah buaipui ṭhin mipa hi chu nihpui lo ngam ila a ṭha ber.
Samuela erawh kohhranah a theih tâwpin a inhmanga, len dun hun chu nei ve bawk mah ila engtik lai mahin sual lam ti turin min nawr lui ngailo, a insum thei hle zawk. Kan lengdun ve fo tih ka zêp lo, mahse mi hmuhah kan inthup lem lo bawk, kan in ngaihzawnna ah hian kan inring duna, kan rinawm bawk. Chuvang te pawh chu aniang tûn thlenga kan la awm theih ni.
Hla chu kan zir ṭan mawp mawpa, beiseiloh lutukin soprano ah min la awm tîr zui, zir nghal mawlh mawlhin a sâng laiah kan la tim bawk nen aw a dik theilo chhe leh ṭhin chu kan nui ho leh ṭhin, mipa ho erawh mahnia solfa enthiam annih a vangin an mahniin an zir thung, ring deuha zai tura min tih avang chuan kan han zai ring deuha, Sawmtei aw rawn ṭek leh ṭhin chuan nuihbawm a hawlh keh lak lawha zai tui theih pawh a nilo.
A rei deuh hnuah erawh ṭha tak chuan kan zai hlawma, chutia soprano lamin kan thiam rual tâkah chuan contralto lamah kalin an zir ve leha, Manuni pawh contralto ah a awm vâng mai. An ni erawh an thiam chak bawk nên rei zirtir an ngai lo.
Mipa ho chu rawn kal khâwmin kan vai chuan kan zai hlawma, a vawikhatna chuan kan ti ṭha hlawm viau mai, dar 9 thleng vel kan zir hnuah kan bang rih hlawma, helamah chuan inkhawm hi a rei lutuk ngailo a, a nuam tawk viau mai.
Samuela nen chuan a eitur dahna lam chu pan dunin a lâk chhung chuan pâwnah ka lo nghak a “Khawi lays leh sting hi ei ang," tiin ka kheh rak raka, a ni erawhin ngawi rengin ka chetdan chu min lo en reng thung.
“Kha le" tiin lays chu ka kut chuan la in a hmui bulah chuan ka han daha, rawn kun hniamin a ka a ang zauha, ka barh nghal vat bawk. Nui ver verin ka ei zuia, in lam pan chuan muang changa inzuiin keimah zâwk chu ka titi char chara, a ni erawh ngawi rengin ka bulah a kal thung.
“Tinge i va ṭawng duh lo ve?" tiin ka en chho a, a ṭawng tam ngailo nangin zanin hi a ngawichawi zual riau mai. “Eng nilo e, ka kalsan hun tur che ka ngaihtuaha, ka huphurh, ka kal lo leh mai dawn emawni. Kalsan che hi ka duhlo" a tihchuan dingin a kutah chuan ka vawn saka.
“Min en teh" ka ti sap bawk, a rawn hawi thlak rual chuan “Engvang mahin i ṭhulh tur a nilo, keichuan ka lo nghâk thei che a lawm, in i sa meka hetiang vang mai bakah i pi leh pu tân, keimah leh kan hmahun atân i tih angai a lawm, han thawk phawt la kan awm hrang reng bik nang, keichuan hetah ka lo nghâk reng dâwn che a lâwm, kan inneih hunah chuan kan awmdun reng tawh dawn a lawm" tiin ka nuiha, a rawn nui ve ta suk mai.
“Ka han ti phawt anga, hma hun hriat ani lova chumi a zir te pawhin kan la bâng leh thut thei" tiin in lamah chuan a kalzui daiha,dik tak chuan keipawhin kan awm hrang tur chu ka huphurh lawk, ring tâwk viau mah ila ka ngai dâwn lutuk hi tun aṭangin ka hrehawm ve ṭun tho.
A hnungah chuan ka zui vata, in ka luh dawn thleng chuan min en in ka kut chu vai zauhin ka luhsan zuia.
MUTTUI U.