STORYFB.COM

KA LALPA




CHAPTER 22 (LAST)






“Engthil nge tih i tum? Ruata min rawn hnaih miah suh" tiin khum lu lamah chuan ka tawlh chho zêl a, ka sira bawihtea mu chu ka melh zawk a, Ruata mitmeng rum ulah chuan pawisak a nei dâwn lo tih ka hria, nidangah kha chuan hetiang hian a awm ngailo.






Tun ṭum chu a awm dân hi ka hlau takzet, ka khur der der reng mai. A lakah ka invenghim thei tawh lo ang tih ka hlau tak zet, min rawn hnaih zêl bawk si.



“Ka neihloh che chuan tumahin an nei lo ang che" tiin alamah min pawt hnai hrawk in ka hmuiah chuan a rawn fawpa, tâl chhuah tumin ṭan ka la ve fat fat bawk. Mahsela a ni mipa a nih bâkah thinrim tha nên phei chuan ka hneh lo lutuk tlat, ka thawmhnaw te chu a pawt ṭet ṭhawt ṭhawt a, ka hlau lutuk chu ka au pah chul mai.




Kan thâwm ah bawihtea pawh chu rawn harhin uar zet hian a ṭap tuar tuara, Ruata lah chuan tâwp a tum bawk silo. “Ruata khawngaihin duhtâwk rawh. Ka fapa in min mamawh ania, khawngaih takin min kal tîr rawh" tiin ka tal vak vaka, mahsela hrelo ang mai chuan ka kekawr chu pawh thlâk tumin chêt a la zuia.





Chutih lai chu rem châng ah lain a kapah chuan ka khup in ka do ta chawrha, a rak nghâl ṭhawt mai. Chutah hmanhmawh zeta tho chhuakin bawihtea chu ka pawma, chak thei ang ber chuan pâwnlam panin ka tlanpui nghal vat bawk, kawngah chuan ka theih tawpin ka tlân a. Min rawn umzui tih ka hre bawk nen ka hlauthâwng lutuk chu bawihtea ṭap pawh pawisa lovin ka tlân zela.





Chutah ka hmaah chuan Motor rawn lang thutin in vên hman a nih tawh loh avang chuan bawihtea chu pawm nghet sauhin a hnungchhawn zawnga dingin ka mit ka chhing tai tawpa, motor in break ri tuar leh kawngka inhawng ri in a zui nghala.




“Mira" Thanpuia aw ka hriat rual chuan rang zeta mengchhuakin ka pasal min rawn pan tu chu pan in a âwmah chuan ka bei ta thlawpa, ka hahdam nghal huai huai bawk. Ṭap chhuak hawm hawmin a âwmah chuan hmai ka phûm a, bawihtea chu a lo ṭap ve bawk.




Ruata tlanchhiat tum chu Police te chuan silaia an tin tâk avângin a tlân ngam tawh lova. Handcuff chu va bun tirin an Bolero lamah chuan an hruai nghal bawk, “Sh....engkim a ṭha vek e, a tina lo che tiraw? Ka lo zawn hmuh har cheu avangin ka tihpalh" tisup supin nghet zet chuan min kuah leta.






Kei erawh ka ṭap bang thei meuhlo, ka dinhmun der thawn zia chu ngaihtuahin ka la ṭap renga, kan fapa chu car chhûng aṭanga rawn chhuak mek Thanpuia farnu chuan rawn pawmin a awi zui hliau hliaua, mak ti viau mah ila engmah ka la zâwt duhlo.





“Tinge min lo zawn hmuh vat loh, ka hlau takzet asin, chhuanlam ka siam ṭang ṭanga. Chuti nilo se chuan ka tuar ngei tawh ang, tinge ilo lan har em em a?" tiin uar zet chuan ka ṭah khum leha, min kuah nghet sauh in ka bekah chuan a rawn dawma, min kuai dâk pah bawk.




“Ka tihpalh, helaiah huan an nei tih kan hre lawk lova, a chhungte'n an sawi ṭha duh lo nen. Min ngaidam rawh aw, a khawih hman che em?" a tihchuan ka lu ka thing nawk nawka, a thaw huai tih chu ka hmu reng, min khawih hman a ring ani ngei ang.




“Hlau tawh hauh suh aw, i kiangah ka awm reng tawh ang. Tumahin ka lak aṭangin an la bo leh tawh lovang che u,min ngaidam thei angem?" tiin a kut zungpui chuan ka mittui chu a rawn hru a, ka la ṭap reng tho. Ka rilru ana ve êm bawk a ni.






“Ṭap tawh suh le, ka lo thlen vat loh avângin ka tihpalh, ka ngai lutuk che" a tih leh tâkah chuan a nghâwngah kuahin ka kuah a, ka insut leh hlap hlap bawk. “Keipawhin ka ngai lutuk che, i hlatah min dah tawh suh. Khapa khân min khawih hman ṭêp a sin, bawihtea vângin ka tuara ka lo nghâk char char che a, mahse lo lan tih i nei silo, ka hlau ka hlau takzet" tiin ka la ṭap hliam hliama.





Nichina ka hlauhthâwnna te kha an la reh lova, ka lungchhia chu ka ṭap bâng mai thei biklo. Mahsela ka bulah ka mipa hmangaih em em a awm tawh tih ka hriatna chuan min thlamuan ta bawka, a hma ang em em chuan ka awm tawh lo thung.






Min pawm kâng nawlhin car lam chu min panpuia, keipawhin thlah ka tum bik lo. A rim leh a taksa, engkim hi ka ngai veka, ka thlah phallo a ni ber mai,  a ni pawhin min dahthlak a tum biklo, car chhunga min ṭhut luh pui rual chuan a chhûngte zawng zawng an awm ve tih ka hre thei, mak ka ti deuh deuh mai.



Min haw hle khan ka hre si a, tûnah engvanga helaia awm nge an nih ang? Min rawn zawng ve nge ni anga, nge min inṭhen tîr an tum zawk? Hlauthâwng deuh tak chuan Thanpuia pa chu ka ena, a hmêlah chuan engmah ka hre theilo.




“Bawiha in hman tawh chuan kan haw mai dâwn em ni? Stationah khân tlang kan ngaih hmel si a" a rawn tihchuan Thanpuia pawh chu a lo bu nghata, min pawm miau vângin a pa zawk chuan Motor chu a khalha, ka chau bawk nên ka fapa pawh a him tawh tih hria in ka ngaihsak thei rihlo, Thanpuia âwm ah chuan beiin ka thaw hle hle a.




Ka ṭahnan ka taksa chu a la kâng ek ek pawh, ngawi karin ka bei hle hle a, Thanpuia pawhin engmah sawi tawh lovin ka hnungah a chûl hliau hliau renga. Ka pasal lungphu ka hre leh thei chuan min ti hahdam hle bawk, mitchhing diar diarin ka muhil zui ta thuais.




“Mira tho lawk rawh le, thil awmdan ruk chhuah i nih dân leh rûk i nih hnua in awmdan kha Police te hnênah hian i sawi angaia, in ti harh lawk rawh le" Thanpuia aw avâng chuan harhin ka hawikuala, officer hmaah kan lo ṭhu reng tawh chu niin, min lo en ṭhap tih ka hmuh chuan ka zak ru viau mai.




Thanpuia taksa aṭanga awmsawnin Police officer chu ka hmachhawn zuia, chutah thil awmdan chu hmaih neilova sawiin a kâr lakah chuan zawhna min zâwt ve reng bawka. Ṭha takin ka chhâng ve zel bawk, ka sawi zawh rual chuan Thanpuia chu zah taka bia in kan haw theih tawh thu an sawi chuan ka thaw huai mai.





Station aṭang chuan chhuakin pawna bawihtea an lo awm pui ka hmuh chuan ka pan vata, mi hmuh pawh pawisa tawh lem lovin ka hnute chu ka pe vat bawk. A tui a hal tih hriat takin a hne nghal dawk dawk mai, khawngaih zet chuan ka en renga, kum a tlin hma a buaina a tâwk chu ka khawngaih takzet.



“Kal ila Mira, in lamah kan titi dâwn ania" a tihchuan ka bu nghata, chutah chhungkua chuan in zui ṭham ṭhamin a pate pawh chuan engmah an la sawi rih lo.




In kan thlen chuan nu Zari pawh a lo awma, min hmuh rual chuan ṭap chungin min kuaha, min ngaihtuahna chuan keipawh ka mittui a ko chhuak leha, ka hmai vêl chulin min ngaihtuah thu chu a sawi mawlh mawlh bawk. Ka nu ang tak taka ka en a ni bawka, a bula ka awm chu ka hahdam sawng sawng thei.




In chhûngah chuan inzui lutin kan ṭhu khawma, kan in ngeia ka han awm leh theite chu mumang emaw ka ti rum rum mai. Kha inah khân kar khat chuang ka awma, ṭhenkhat tân reilo hle mahse ka tan chuan hrem hmun a awm ang mai ka ni.




“Miriam in biak kan duha, i chungah kan lo sual viau tih kan hria a, i mi ngaihdam kan ngai ani. Kan fapa avanga i tuarna zawng zawng pawh kan hria a, kan chungah lawm lo hle mahse thupha sawi tûr kan hre lo a ni e, i theih chuan min ngaidam la kan duh khawp mai, ka fapa hi ka lo ngai dik loa, mahse nupui a mamawh in a nu anga a hmangaih a tawng thei ang tih ka lo rin loh vâng a ni, a nu ang chiah i lo nih vang a nih hi a kalsan theih miah loh che" a pa in a rawn tihchuan ka en vata.



Ka lâwm lutuk chu sawi mai tur pawh ka hrelo, a thu rawn sawi avâng chuan ka hnuk a ulh ṭun bawk. “Pa" tiin ka phun sapa, chutah min rawn enin inthiam loh naa khat tih hriat tak hian “Ka fanu min ngaidam thei angem? Mo i rawn nih aṭangin pasal chhûngte ngaihsak miah lo tu che i neih avâng hian min ngaidam thei angem?" a tih leh chuan ṭap chhuakin ka pana.




Ka kuah nghal chawt bawk “Pa ka haw reng reng lo cheu ania aw, i fapa avângin keihian hmangaihna te, duatna te leh thlamuantu ka neih phah asin, lo hring lo ula ka nun chu hrehawmna hi ala bâwm reng ang. Engtin nge ka mipa hmangaih ber leh min hmangaihtu ka neih chhun hringtu leh a unaute hi ka huat theih ang cheu, a thisen zawmpui in ni a, ka haw reng reng lo cheu ania" tiin ka ṭawng chhuaka.




A farnu te ho pawhin an mittui an lo hru fap fap bawk, “Ka fanu, i pa hi min ngaidam ang che. Mo i niloa, kan fanu dik tak ini tih hi hre reng ang che, i bo laia i pasal talbuai leh hlauthâwng hmel kha ka hmuh hmaih lova, alak aṭangin lo la bo ta che ila ka fapa hian a at phah hial ang tih ka hria, tûnah chuan ka inhmu chhuak ta e. Eng mipawh nila ka fapa i hmangaih phawt chuan a bâk ka beisei ta love" a tihchuan ka ṭap leh haka.




Lungngaihna kârah lâwmna in min lo hmuah telna chuan ka lung a tichhe zual, hetiang hi ka beisei phâlo. A farnu te ho pawh chuan ngaihdam chu min rawn dil ve a, mahse tumah hi ka hawlo. Ka haw ngai bawk hek lo ang “Pa ka lawm e aw, tûnah chuan chhungkua tak tak ka nei ve ta" tiin ka ṭap ri ta haka.



Thanpuia chuan min rawn kuah ve in a nui sanga “Ka nupui i ni hi ka lâwm e, tûnah chuan i thusawi kha a thleng dik ta. Tumahin min ṭhen hrang leh tawh lo vang, kan dam anga chhungkua duhawm tak leh hlim tak kan din dun zêl ka beisei, i ṭhatna chuan tûnah chuan chhungkua min zawm khâwm ta e" rawn ti ve supin min kuah hlu hlua.





Ka thaw ta huai mai, titi zui nak nakin kan nui ho dar dar renga, mumang ang tih châng ka ngah mai. Ka pa chuan awm ho vek a duh tawha, kan fapa pawh a ni te ho in an in pawm kual chhâwk sek renga, ka chang meuh lo. Ri chulin kan bengchheng hle, ka buaina khan malsâwmna a lo thlen reng zawk a, Pathian hian min ensan loh zia ka hre chiang leh ṭhin.






Ka pasal mit ka en apiangin min hmangaihna leh thlakhlelhna ka hmu thara, chu chuan ngaihṭha takin min awm tîr leh ṭhin, chaw kil ho in kan titi a, kan hun kal tawh sawiin kan nui ho leh ṭhina. A hmaa kan inhuatna te chu tûnah chuan fiamthu a chang ta, ka pasal hmangaihna leh zahngaihna zârah fahrah hmeichhia kha tûnah chuan mite zah niin chhungkua tak tak ka nei ve ta e.




“Ka nupui duh tak" tlai ni tla tur thlira ka lo din vang vang lai chuan ka hnunglam aṭangin ka pasal chuan min rawn kuaha, ka lu ka thlêk zeuh rual chuan ka enna lam chu a en ve a“A mawi hle mai, siamtu thil siam hi chu a ropui ani , chûng zawng zawng zingah chuan i ropui in i mawi lehzual" a rawn tihchuan ka nui haka.




A hnathawh thawmhnaw nen pawh a mawi leh em em tawh mai, “Bawihtea teh ala tlei em?" a pu nên an in awma, a kal ve thei ṭan tawh bawk nen a che sual reng mai. “Tlei mah mah kei hi ka tleilo, min awih ka ngai" a rawn tihchuan ka nui hak mai, a pangchan châk hi tihian a awm ve ziah.




“Tirawh ka lo duat ang che, i chau êm?" Ka tihrual chuan a han awm zawi lui ngeia, a rit ropui si. Chutah rawn ding ṭha in ka dul puar leh ṭan mek chu a khawiha “Kha zan khân ka lo mutpui lovang che tih ka hlau mange, Hetiang khawpa ka hmeichhe vei tur i ni tih hria ila a hma aṭang daih khan ka lo nei tawh tur che, Pathian hi a ṭha a ni, kan tân engkim a lo ruat sa vek a" tiin ral lam tlang dunga ni tla tur sen phut chu a thlira.




A hmêl pa hrak mai leh a hmaifang invuah fuh lutuk chu ka lo en leh veng veng tawh. A ni telin ka veia, a hmangaihna salah ka tân belh zel zawng a nih hi “Ni e Pathian hi a ṭha a ni, a remruat nghâk peih te tan chuan a ṭhatzia leh hmangaihna a ngah zia a lang zel bawk ang" tiin ka kuaha.




“Pathian in min hmangaihna chu tluk lo mahsela a dawt chiaha hmangaihna nasa berin ka hmangaih ang che" tiin ka nuih zui ta sen sena, a hmela lungawina leh min duatna lang chuan min phatsan ngai dâwn lo tih min hriat tîr ani.




A tâwpah chuan têt te aṭanga mi hausa nun leh chhungkua awta, hmangaihtu mamawh em em chuan ka tawng ve ta e, ka duhthusam aia ṭha mah lehnghâl. Pathian chu amah beiseia dila, nghâktute tan chuan a lo ṭha ber reng fo ang, nghak la beisei la, thlir rawh. A lo thleng har deuh anih pawhin tuar la, in fuihla nghâk zêl rawh. A tlai ve ngai silo.



A TÂWP TA. NEXT STORY DUHLAI ZORINPUIA CHU NAKTÛK ZÂN AṬANGIN WHATSAPP LAMAH A AWM ṬAN ANG AW, KA STORY MIN LO HLUT SAK ṬHINTUTE CHUNGAH THINLUNG TAKIN KA LAWM E.