STORYFB.COM

Nun tihlimtu Lalnunhlimi
By CVL.Awmpuii

(Ka zawmna lâi ka chhinchhiah lo aw...a thui lêm lo bawk. A tàwp note lo chhiar hrâm bawk ula aw)

Chapter 22



Ka rilru chuan Insawifiahna tùr leh insawi thiamna tùr a dap ruai a, mahse ka thiam lo hulhual bawk si. Ka dik lohna ka pawm thlap tawh a, ngaihdam pawh ka dîl tawh. Kan inkâr a ṭhat leh nan chuan amah chauh a pawimawh ta. Min hnar tlat si chuan awmzia a awm tawh dâwn lo tihna anih ber chu!



"Khawngaihin min ngaidam rawh, engkim avang khan" ka ti leh hulh a, ka hmai chu ka tuai zui puat bawk a. Ka hmaa ṭhu, luhlul hmêl zeta min melh ngar tu chuan min ti zâm a ni. "I sawi duh i sawi zawh tawh chuan ka va mu duh tawh ve" a lo ti fak thung a. Kan ṭhat nghal zung zung kha ka beisei lo hrim hrim a. Zar buai chiam ka tum hran lo, mahse rehsan vang vang erawh ka tum tawh ṭhak lo. Elpui ka nei tih ka inhrechiang tawh a, an la in nêl em em zui! An inkârah thil eng emaw a awm hmaa chêt khalh leh zung zung ka ngai a ni.



"Zanin atân chuan ka haw phawt ang, mahse bansan che ka tum hauh lo ania" tiin ka tho chhuak a, hawi lêt leh tawh lovin an in aṭang chuan ka chhuak nghal nul nul bawk a, a hrilhai ve ngawtin ka ring.




Ka sawi ang ngei chuan ka awm zui ta a, mahse Nunhlimi chuan min runluih nge ka hrethiam lo. Apuia bulah chuan a tap chawt ṭhin a, min hmuh kân thiam lutuk tlat. Thinrimin thîk viau ṭhin mah ila han tih lan vak a rem rih si lo. Lungawi lo deuh chung chuan ka la hel ve reng zel chu ania. Hma ka sáwn mawh khawp mai. Msa lah hian "I phû ve rih alawm" min ti duh lêk chauh a, mahni chauh chuan a harsa ṭhin khawp mai.




Office lamah kan buai chho leh mawp mawp a. Vanduai thlak lutukin Pu Liana a damlo lehpek a, tun ṭum chu serious tak a ni. A hma ang khan 'A ṭha chhuak leh ang' tih mai chu a har ṭalh tawh mai. A na deuh thut a, damdawiin an luh nî la la in ICU dah nghal an ni a. Ka thawhpuite paw'n an ngaihtuah ve hlawm khawp mai. Loh theih lohin Remi nen kan inhmuh leh a ngai ta, mahse a hma ang em em khan min pak hluak tawh lo va. Mitmei vawikhatmah ka hmuh loh chu sawi loh awm ve lo ang maiin ka ngai miah miah ṭhin a. Mi pangngaiin tán chuan tlàwm a lâk a, min bansan vang vang na tham a ni.




"Hluzual..." ka Nu min kohna âw ka hriat rual chuan ka chhâwn vat a. Ka room-ah chuan lo lûtin ka khumah chuan a rawn ṭhu zui nghal zat a. A thusawi tùr ngaichâng reng chung chuan computer-a ka hnathawh lai chu ka chhunzawm mawlh mawlh tho a. Ka hnathawh laia rawn luh zeuh a eng emaw rawn sawi hi a tih loh dân pawh a ni lo va, ngaiah ka nei deuh tawh.




"Vawiinah Nunhlimi nen kan inhmu a" a rawn tih tâk ah chuan ka hnathawh lai chu ka chàwl dat a, ka va melh zawk a min lo melh ve ngar mai. "Chuan..." ka lo ti sup, engtin tak lo inhmu ang maw? "Ka bia a, in inkâr a la pangngai reng emaw tiin lêng tùrte khan ka lo sâwm vêl a. Mahse in inṭhen tawh thû min hrilh hem mai a, min ṭhawng khawp mai" ka Nu chuan a lo ti duah a. "Engtin nge a sawi?" ka lo ti vat, ṭum dang zawnga ka chhûngte hmachhawn hreh si kha kan inkâr a fel loh tâkah chuan mi pangngai ang takin a lo hmachhawn tih ka hrethiam mai. "Kan inṭhen daih tawh alawm' tih zawng a sawi a. Han zawh zui viau chî ah ka ngai lo va. Chuloah kan awm dân kha a lai kual vêl vek ta sia, nang lahin engmah i sawi si lo ka hrilhai ania aw" a lo ti vang vang a. "Kan inkâr a ṭha rih chiah lo va" tih ringawt in ka Nu chu ka chhâng. 'Inṭhen' han intih mai hi ka la hreh a, ka ngaihzawngah ka la ngai hmiah mai.




Ka Nu chuan "In inkar buaina chu ka hre ve chiah lo nâ in ngaihzawng nei kual mai mai rual i ni tawh lo tih kha hria la. Mo hmêl kan hmu thuai ang chu tih laiin inṭhen thû te kan hre ta zawk a, a zialo emai. Chuloah Nunhlimi chu a fel ve thar thar viau khan ka hria a. A ni lo chu midang han ngaihven tùr an awm vak bîk chuang lo ania" a ti duah a. Helen-i nen kan inkawp lai khan kan chungchang chu min sawipui ve fo va, mahse Nunhlimi ang em em hi chuan a sawi ve ngai miah lo. Nupui nei rual ka lo nih tawh vang leh ka tihsual leh min hlauh pui vang pawh a ni mai thei a ni.




"Lo lungngai suh, ka siam ṭha thuai dâwn alawm" ka lo ti nghet charh a. Chutia ka chhan ve zel takah chuan a ngampa ve ta deuh aniang. "Engtin nge in intihthiamloh reng reng a?" dilchhut zet hian min zawt ta a. Sawi vek chî a ni ang em ka hrethiam lo. Mahse tih dân kawng a lo hriat tâk mial in tih thil thû ah ka hrilh thawi ta thuak a. "A hun kal tawh chungchângah ania, ngaihdan dik lo tak ka lo siam a. Chu chu a lungawi lo va" ka ti tàwi tâk ringawt a. Ka Nu chu a lo chet hlak mai, "Ka zawt zui zel tawh lovang che. Mahse ka hriat chinah a tán chuan a thinrim thlâk ve bawk dâwn anih chu. Mi rinawm tak tán chuan rinawm lo taka inpuh te hi a na duh ania. Inngaihzawnna chungchangah ngat phei chuan inrintawnna hi a pawimawh khawp a. Rin tlâk kan nih leh nih loh chu kan mizia aṭang hian chhui thiam tùr " a ti ta duah a. Min zilh pah nek mai.




Min chhuahsan hnù chuan ka hnathawh pawh a tui tawh nek lo e. Computer chu off-in ka mu ta daih a, hnathawk hah viau e ti lo chuan ka mut erawh a chhuak hauh lo thung. Ka phone chu ka tuai ka tuai a, Nunhlimi ka be châk. Hna ah ka ṭul êm avangin nizan leh zanin ka lêng lo ta phawt chu ania. Naktip lawk hi kan Bial KṬP Conference ani tawh si a, hnathawh ka ṭul em em chhan pawh a ni pakhat.



"I mu tawh em?" ka message chu a in deliver reng a, mahse a hmu duh ṭhak lo. Ka number Delete mah se keimah ka ni tih a hria anih ka ring. "Ka ngai che, muttui" tih chu ka va thawn leh hram a. A luhlul pauh leh ka duhna te hi a zual sauh emaw tih mai tùr a ni a. Min hlat tial tial a, ka vei tulh tulh a. Chân thei ka nih loh zia leh ka nuna a lo pawimawh zia ka hre thar tulh tulh a. He ka rilru hi in duhna satliah ringawt chu a ni tawh lo. Ka hmangaih ṭan mêk niin ka hria.




Chutia ka inngaihtuah mek lai chuan Msa hnen aṭangin message ka dawng hlawl a, thlalak ani mah zawk. Ka en nak chuan ka sa leh pup pup tawh. Nunhlimi leh Apuia thlalak a ni a, Nunhlimi chuan Apuia banah a chelh hnâp a, an la inmelh kher zui a. Ka kawchhung hi a so bulh bulh maiin ka hria. Msa chu ka va call ringawt a, a sawi ang tak takin thin butut chu ka lo nei chiang anih hi.



"Khawi ami nge? Engtik ami nge?" ka va ti nghal zung zung a, ka mangang nghal vek. "Zanin ami anih kha, Nunhlimi ṭhiannu status " a rawn tih leh lek phei chuan ka insehruh nghal ṭeuh mai. "Eng nge a awmzia?" ka ti sehchilh nawk a, Lalnunhlimi hian mumal lovin min siam a ni. "Ka hre bîk nang, ka hmù a, ka lo thawn che anih kha. Eng nge i an? Hma i sàwn tawh reng reng em?" a rawn ti duah a. "Engmah ka ang lo" ka lo ti hmuk. Ka awmdan chu hrehawm tak a ni. Mipa zeihawi lo lutuk ka lo ni hi chu a pawi ngawt mai.




Msa chu a lo nui huk a, "I va lainatawm tak" min nuihsawh zeta a rawn tih chuan "Ka hnek ang che" ka lo ti hlur a. Tunah hian ka bulhnaiah awm sela chu ka hnek duh tak tak ang mawle. "I nei lêt thei dawn lo anih kha" te chu a la rawn ti ta deuh deuh a, ka va han haw mai mai tak e aw. "Min chhaih suh aw" ka lo ti leh hmuk a. Ka hmuh phâk leh khawih phâka a awm lo chu ka haw tak tak a ni.




Chutah Msa chuan "Tak taka, i kal ngaiin i kal reng a. Lungawi si lovin hmasawn thei lovin i awm anih kha. Che ve pawp pawp rawh, kan duh tak nei tùr chuan huam hauh te hi a ngai ve ania. A nin tùr khawp leh a huat belh tùr che in awm lo la. Thluak hmang takin che rawh" a rawn ti ta luam a. "Engtin nge chutiang chuan ka tih ang?" ka lo ti leh hram a, "I va han hahthlak tak" a rawn ti hluk. Ka dem hran lo, ka hahthlak ve êm bawk a ni. "Hmeichhe thlêm dân leh tih lungawi dân i hre lo anih chuan ti thinrim ve tawh suh. A buaithlak emai, nau awm ang char char alawm ka nih le" a rawn ti hluk hluk a. A phun ve nasa lutuk chu ka nuih a zat rualin ka hmuhsitawm zia ka ngaihtuah chhuah rual chuan ka nuih ngam chuang lo.




"I tih dân tùr lehzel chu ka hrilh thiam bîk tawh lo che. Mahse ngaihtuah la, i thluak kha hmang ve mai rawh. I hna ah ringawt i thluak hi a ṭha a, heihi alawm tlema hmeichhe mi ve deuh hlek nihte hi a ṭul chhan" a rawn ti leh hluk hluk a. A thusawi ah chuan tlêm azawng hlawkna ka chhar tal a, lungawi phawt mai teh ang.




"U Hluzual, i thingpui tùr aw..." ka office-a Remi a rawn luh rual chuan ka lo rum nghut a. "Ṭum dangah chuan bell hmeh nachang hre tawh ang che. Thingpui pawh min rawn pêk a ngai lo vang. Tin, heihi office a ni a, ka hnuaia thawk i nihna angin min nêl tak ang khan min ko thiang miah lo ania. 'Sir' min ti zel tawh ang che" ka lo ti zek a. Ka thusawi avang chuan a hamhaih hmêl khawp mai. A àwm ve tho, khang hun chhûng zawng khan kan chungah phakar chhuah mah se chhuahchhal zawngin vawikhat pawh ka la ṭawng chhuak lo va. Tin, chapo takin ka la ṭawngkhum ngai lo bawk. Mahse tunah chuan a pal mai mai theih a awm hi ka tum tawh lo bur a thangah hian ka âwk mai mai tawh lo vang.




"Ka thusawi chu a chiang em?" a mit taka melh rum ul chung chuan ka ti khauh fak a, "Awle...sir" a lo ti ban charh mai. Ka dawhkana a thingpui ken lai a rawn dah zawh rual chuan chhuah nghal mai a tum a. "Thingpui hi ka duh lo, midangin an rawn dah mai ang. La lêt rawh" ka lo ti leh salh a. Ka awmdan ngeiawm ru zet leh suah sual thlak zet chu keimah leh keimah ngei pawh ka in awih lo hial a ni. Mahse ka mood a fuh lo laklawh êm a, ka pawisa nek lo e. Remi hian a phû tâwk chiah bawkin ka hria.



Inthlahrun hmêl zetin thingpui chu a la lêt a, a chhuak zui nghal bawk a. Thin phar hrep mai ka châk a ni. Hmeichhia chu ni lo sela chu ka khawih hrep duhin ka ring. Ka inngaihtuah thinrim leh zo ta vek mai. Ka hnathawh lai chu dahin ka ding hluai a. Thâwk la ham ham in tukverhah chuan ka dâk a, boruak chu ka kham khawp lo hial a ni.




Ka office bâng in ka thleng chu an lo ri nak nak hlawm a, Kimtei ṭhiante ho an lo lêng chu niin! Hmeichhe awmkhâwm tih takah an lo rãk chèl chûl a. Kan ina tlângnêl sa an ni bawk a, min hmuh rual chuan min lo be ve sap sap hlawm a. Nonoi pawh kha a lo awm ve ngêi a, lài zetin a kut min lo vai khum ve zeuh a, ka bu nghut ringawt. Remi vang hian ka fimkhur zual vek tawh.




Room-a ka luh hnu thleng pawh chuan an thâwm chu ka la hre pha, bengchheng ve tak chu an ni. Ka inbual nghal a, zàn lama ka hun hman dân tùr ngaihtuahin Nunhlimi rilru hneh dân tur ringawt chu ka ngaihtuah a. Tih vak ngaihna erawh ka hre lehpek chuang lo. Ngai kan awh leh thei hlauhte anih chuan ka inhauh pui tawh ngai miah lo vang. A hrehawm emai.




Kimtei chuan a ṭhiante chu chawei ah a lo sâwm aniang chawei tùra min rawn koh chuan an lo la awm kim ṭhap hlawm a. Ka rin lâwk ang ngeiin ka Nu chuan "Châw an lo ei ve nghal hlawm dâwn anih hi. Chawei khamah i va thlah hlawm dâwn ania aw" a lo ti sawk sawk a. Ka lo bu nghat ringawt a, ka ṭawng peih rih lo.



Chhûng inkháwm kan hman zawh chuan chawei an siam nghal a, Kimtei ṭhiante chu an che chak hlawm khawp mai. Dawhkanah kan len vek loh avangin inchawi mai ka tum a. Mahse Kimtei ṭhiante chuan min lo dang vat hlawm a, "U Hluzual, ṭhutkhawmna lamah kan ei vek dâwn. Nang chu tikhan kil rawh" min lo ti sawk sawk a, nuam lo an tih ka hlauh avangin ka lo hnial bîk lo.



Ka beisei ai daihin eirawng chu an bâwl tui zek a, ka rilṭam loh ngaihtuahin ka ei hnem reuh khawp mai. A tihfel lam pawh Kimtei te ṭhianho in an ti leh vek a. Ka Nu chuan a fak ve khawp mai. Chawei kham aṭanga rei vak lovah chuan haw an duh thû an sawi ta a. Motor-ah kan leng chiah chiah a, Kimtei'n min lo zui ve ta lo law law. Pâwn thleng a ṭhiante chu a rawn thlah thung a. Ka lêng dâwn tho bawk a, ka thlah pah hlawm dâwn a ni.



An tilui nge ka hrelo, Nonoi chu a hmaah an ṭhut tir deuh kher a, a inthlahrun hmel khawp mai. Mahse amah hi ṭhiante han hnial kual chiam thiam chi kha a ni si lo va, "Lo ṭhu rawh" ka ti ve ta nge nge a. Beiseina a neih vak erawh ka hlau hnuhnawh khawp mai. Ho tê anga lang ah te hian fîmkhur zual ka ngai.



An in awmna chu an sawi sap sap hlawm a, a tâwpah chuan Nonoi nen chiah kan bâng ta. Kei chuan eng teh ualah ka ngai lo va, mahse a awmdan chuan awm nuam lovin min siam ve det. A zâm hmêl lutuk a, ka tán tak pawh a nuam lo. Mahse biak lumlam vêl erawh ka tum hauh lo thung.



"U Hluzual" an in kan thleng ṭep tawh tihah amah zawk chuan a rawn ti hlawl a. "Umm" ka lo ti ve sup a, min biak miau chuan ngawih reng thû awm hek lo le. "U Nunhlimi nen khan in la ṭha zel em?" a rawn ti hlawl mai. Kimtei hnen aṭangin eng emaw a hria ani tih ka hrethiam nghal ruak mai. "Ṭha zel e" ka lo ti hmiah, beiseina awmze nei lo siamsak ka duh lo ka tih fo tawh kha! A mitmeng buai nak chu ka hmu zui nghal reng bawk a. "A va lawmawm ve" a rawn ti leh sep ringawt a. Sawi zui vak ngaihna a hre bîk lo aniang.




"I lakah beisei engmah ka nei lo ania aw" an in kan thleng tawh a, motor aṭanga a chhuk dâwn chuan a rawn ṭawng chhuak leh hram a. "Beisei neih loh law law kha i tán pawh a ṭha zawk alawm. Kei chu ka beisei awm loh" ka lo ti ve hmiah. Hnem vak ka tum hran lo, thil reng reng chu a nihna ang tak hian sawi chhuak mai ila a lo ṭha ber tih ka hre tawh tlat a ni.



Kan inthlah fel hnù chuan Nunhlimi te in lamah ka inkhalh phei nghal a. Zanin chu Msa'n min lèn pui hman lo va, mahse ṭha tih zawkna riau ka nei. Zalên deuhin ka awm ang a, hmasawn ka tum bur bawk. Nunhlimi min lo dawnsawn dân tur erawh ka ngaihtuah thiam lo.



An in ka va thlen chuan an lo la meng kim ṭhap a, Akimi'n kawngkhar min lo hawn a. Nunhlimi chu a vahpa nen an lo inchhaih rãk chèl chûl a, an thâwm a na khawp mai. Duatpuia'n min rawn hmuh rual chuan min lo pan vat a. Ka thil leisak chu pe in intithei zet hian a nî awmna lamah chuan a lek va va a. Heihi chu a tih fo dân ani a, ngaiah kan nei tawh.



Pa Ṭhaa leh Philip-a te nen chuan thil chi hrang hrang sawiin kan titi tui leh tawh khawp mai a. Nunhlimi chuan choka lamah thingpui min lum sak daih thung a. Ka chungah a lungawi lo viau chung hian an ina ka lèn hi chuan pangngai takin min lo chhâwn ve mai ṭhin hi mak ka ti. Min be ṭha hluak lo na in a awm pangngaiin a awm ve mawp mawp mai a. A awm thiam angreng ṭhin khawp mai.




Ka rilru chuan inleng dang a beisei ve rân a, mahse a chhungte mut hnú thleng pawh chuan Apuia te ṭhian dûn chu an rawn lang zui ta miah lo nia mawle. Zanin chu ka tán hun ṭha min siamsak ni hawtin ka hria. Ka lâwm viau rualin mak ka tih deuh avang chuan Nunhlimi chu ka zâwt chut a. "An hmanlo" tih zawngin min chhâng.



Ka ṭawng leh dâwn lâi mêk chuan "Heti hian engtia rei nge awm i tum?" min lo tih khalh a, ka zawhna ni zawk àwm tak a ni. "Hetia i awm chhûng chu heti hian ka awm zel dâwn" ka lo ti nghet churh a, ka rilru tak tak pawh a ni. "U Hluzual, min bânsan rawh" a tih rual chuan ka nghing ve lawih thei. "Nunhlim..." ka phun sup ringawt a, a mitmeng fiah zet chuan min ti zâm lutuk tlat. "Hetia awm vêl hian keimahah nghawng engmah a nei lo. Chuvangin min bansan rawh, a hma ang khan engmah a awm thei tawh dâwn chuang lo. Inkawp lo tùr kan lo inkawp a, chu zawng chu a ni e" a lo ti leh nghat nghat a. Min hau se, min vin leh bawrh bawrh sela ka tán chuan a nuam zawk ang.




"Ka bansan dâwn lo che, ka beidawng dâwn lo. Ka tihsual leh tihdik loh kha ka pawm thlap. Tunah min ngaidam nghal mai thei lovang tih pawh ka hria, mahse beidawn san che ka tum lo. Ka hnena lo lêt leh ngei turin ka duh che a, chutiang tùr chuan ṭan ka la zel bawk ang" ka lo ti ve churh a. Ka thusawi hi hrethiam se, ka lakah hian nêm ve tawh mai se ka ti takzet. Hetiang lo chuan chêt lâk ngaihna vak ka hre bawk si lo.



"Apuia kha bulṭan pui ka tum" a rawn tih rual chuan ka kawchhung a so bulh mai. "Min runluih nan i duh loh dân chuan awm suh" ka lo ti hmuk a. "Ka duh alawm" a lo ti hmak, chutia awlsam lutuka Apuia a duh thû a sawi chu ka run kher mai. "Lalnunhlim" ka ti sehchilh nawk a, zaidam taka thil sawipui chu a har ṭalh tawh mai. "Apuia chuan min tihlim takzet asin, a bula awm pawh nuam ka ti. Min ring tâwk em em bawk a, ka mizia a zir chiang peih bawk a min hrechiang tawh khawp mai" a ti leh salh salh a. Ka inhumruh nasa kher mai.




"I ngam chuan i inngaihzawn pui dawn ania" ka lo ti hmiah. A ṭul anih chuan Apuia kha sawisak ka hreh miah lo, hetiang rilru hi ka vawikhat putna a ni bawk. Nunhlimi chuan "Engmah tih theih i nei lo. I nunah buai la, ka nunah ka buai ang. Chu chu kan pahnih tán a ṭha ber. Ka tana ṭha tùr chu ka thlang thiang alawm" a lo ti ve salh a. A thusawi chu a dik vei thlap bawk si, mahse Apuia tán erawh a pâr vul ve ngai tùr ani lo. Ka tho ta thurh a, "Midang runluih nana mahni duh loh zawnga awm duh tùr khawpa mãwl i ni lo tih ka hria. I thusawite kha hrelo angin ka lo awm ange" tiin ka chhuahsan nghal hmak.




Apuia chu a duh tak tak ka ring lo, nge ni kei hian ka lo ring phal lo zawk ni? Midang ta tura ka ngaihtuah zawng ringawt pawh chuan ka sa chhuak vek thei. Thinlung kehchhia hi phatsanna ka tawh khan ka lo tawng tawh emaw ka ti a, mahse ṭawngkam ringawta Nunhlimi'n min phatsanna pawh chuan min tina takzet a ni. A taka thleng tur anga ka ngaihtuah zawng ringawt pawh chuan engkim a thim mup mai hian ka hria. Min runluihma ṭawngkam hre zui duh ta lo va haw ta daih pawh kha ka ni rêng a ni.


Zingah office kal tùra ka insiam laiin Kimtei chu a lo lût zal zal a, mitko ka lo san khum uk lai chuan "Bialnu i nei tawh lo tiraw?" a lo ti zâng vah a. "I ṭhiannu kha beiseina lo siam sak tawh suh ang che" ka lo ti hmak thung. Nunhlimi nen kan chungchâng a lo sawi kher kha ka duh lo a ni. "Aaa...chutiangin beiseina pawh ka siam sak chuang lo. Ka Nu in in inṭhen tih a sawi a, chu chu ka lo hrilh ve mai alawm. Chuloah u, Nonoi hi a fel a, i laka a rilru puthmang hi a thutak hle ania aw...a duh.." a tih leh zat zat lai chuan lo pawt chatin "A tâwk tawh viau e, lo inrawlh tawh suh" ka lo ti hmuk a. Hetiang nghet nghut hian Kimtei lakah ka la awm ngai lo. Mahse ka pawiti tehchiam lo.




Min melh rum ve al a, "I mizia hi i thlâk nasa lutuk, i thinchhe si, i dawhthei lo ropui si, mi i ṭawngkhum fek fek a. A hma in hetiang hi i ni ngai lo, i mak emai" Kimtei chuan a lo ti ta hlawk hlawk a. Ka room chu chhuahsan in na zetin kawngkhar chu a khar ri nghal bur bawk a. Ni e, tunlai ka awmdan hi chu a dik zan lo alawm. Ka ṭawng a kaltluangin ka duh loh dànah chuan ka ṭawngkam hi a lo na leh mah mah ṭhin a. Ka pawisawi lêm lo tute lakah erawh ṭhat ka la chhuah thei reng thung. Ka in vèn lutuk vang leh ka fimkhur tâk êm vang hi ni ta berin ka hria.



Bial KṬP Conference chu kâr lovah kan lo thleng ta mai a. Kan bial ah hian Kohhran pali kan awm a, Aizawl khawchhung vêng inhnaih tak vek kan nih avangin chêt a harsa hran lo. Kan kohhranin thleng lo mah ila vêng ṭhenawm lawk te'n an thleng a, mahni remchân dân angin kan kal hlawm mai a, a awlsam angreng.




Kimtei te ṭhianho chu ka ruala kal turin ka Nu te'n an ti a, mahse ka lakah Kimtei a la tau deuh tlat a, a duh bau lo. A ṭhian dangte motor-a an kal tùr thû a sawi a. Ka ṭawngkhum dân avang khan tlem chuan ka inthiamlo ve deuh, mahse ngaihdam dil a thlêm kual vêl ang kha ka tum rih lo. Naupangchhia a ni tawh lo va, a unaupa ka nih avanga a ṭhiannu a lo sawi phur fo kha ka tán a lawmawm bîk loh a ni.




Inkhawmpui kan ṭan dek dek a, ka mit tikham thei thil ka hmu nghal pang mai. Apuia ka hmu ve hlawl mai a, Nunhlimi nen an la ni zui. An ṭhian dangte an lo awm ve neuh neuh bawk a. Inkhawm ṭan hun a la ni lo bawk nen Biakin kawtah chuan an titi a, an ri leh hak ṭhin a. Mit leh beng a kham duh ngang mai.



"Awmhmuna lo inhumruh tawp bâk hi tih theih i nei lo em ni?" nui put put chungin Msa chuan min rawn ti kher a. "Eng nge sawpa sawn a lo tih ve a?" ka lo ti hluk thung a. "Kan inkhawmpuina hi a Pi te vêng alawm, an vêng aiin a awm tam zawk a" a tih chuan "Hneawm ve" ka lo ti hluk a. Msa chuan "Nang pui hi buaina i lo siam roh ange aw" fiamthu ti tak deuh hian a lo ti a. Dár a rawn rîk tâkah chuan lût tùrin min mitmei a, kan hma ami te ka hmuh peih tawh loh avang chuan ka lût zui ve mai bawk a. Eng emaw chêt lâk dân tur ṭha tâwk tak chu ka ngaihtuah vat a ngai a ni.



Inkháwm chhûng zawngin rilru nuam lovin ka awm a tih theih ang. Inthiam loh pawh a na duh khawp mai, mahse ka inthunun thei miau si lo a le. Kan haw dâwna ṭhiante'n min biakna te chu ka chhâng liam puat puat ringawt a. Ka rilru in zawn rûk deuh a nei a, mahse Biakin ka luh hmaa ka hmuh bâk kha chu ka hmu leh tawhlo hrim hrim.



Zunin aṭanga Lalnuni lo chhuak chho ka hmuh rual chuan insûm hman lêk lovin ka va pan nghal pâwk pâwk a, a ṭhiannu awmna chu a hre lutuk ang. A bul ka va thlen rual chuan "Khawnge?" ka va ti ringawt a, a lo hrethiam ve mai aniang "Lo ngaihven suh" a lo ti hmak mai, min la melh rum em em zui a. Hmeichhe ho tak hi chu a! "Nuni..." ka ti hulh ringawt a, Nunhlimi ṭhiannu a nihna laiah henu puihna hi dîl mai ka rilruk rum rum mai.



"Enteh U Hluzual, Nunhlimi hi tibuai tawh suh. A nuna i lo tel ve hma khan a hlim zawk. A awmdan hian en liam ve tawp tawh mai teh. Engmah tawnhriat la nei lo kha bul i ṭan pui a, i tàwp pui dàn lah a tána tlâwm thlâk ngawih ngawih in i siam a. Hetiang hi a phû miah lo asin. Chuvangin a awm ang ang hian enliam tawh la, beiseina nei tawh suh. Chu chu in pahnih tán pawh a ṭha ber ang" a ti ta duah a. A âw ah chuan ngenna te pawh a lang tel hialin ka hria. Nunhlimi ṭhian kawm ve ber a ni a, kan inkâr chu a hrechiang ve khawpin ka ring. Mahse Nunhlimi laka ka rilru puthmang erawh a chhui chhuah thiam phâk bâk a ni thung ang.




"Min pui zawk teh" ka lo ti daih thung a, Nunhlimi ngau ngau chu a rilru a sak êm a. A mimal chuan ka hneh theih ka ring tawh lo a ni. Ka laka a rilru puthmang la ngai reng mah se kei aiin a inthunun hneh zawk dâwn tih hi ka hrechiang lutuk. Ka ngenna vang chuan Lalnuni chu a lo meng deuh âwk a, chutah za lo zeta rawn nui hakin "Mipa ṭha tak a phû" a lo ti kher a. A tána ṭha tâwk lo ang hrima min ṭawngkhum chu ka thin a khei ve zak mai. "Ka nih chiah chu" ka lo ti ve hmiah, min ei loh hmêl ngang mai.



"Ti teh Lalnun, in ṭhiannu tana thil ṭha in duh takzet anih chuan min fiah rawh u. Ka tihsual tawhte kha ka pawm thlap, ngaihdam pawh ka dîl nasa. Min ngaidam tùr erawh chuan ka phût lui hauh lo. Mahse chance min pe leh hram se ka ti mai a ni" ka ti leh thlawt a. Ka mipatpuite hian an hmeichhe duhte avangin an ṭhiante lakah kei ang em em hian tlâwm an chhuah ve pawh ka ring lo. Ka chunga thleng ni lo sela chuan tuna ka awm dân hi nêp ka ti ngawt ang.


Chîk zeta min melhin Lalnuni chu a ngáwi ta vang vang a, ngenngawl zetin ka lo melh ve reng thung a. Nunhlimi ṭhiante hi ka inthurualpui thei hlauh anih chuan ka tán thil a harsa lutuk lo deuh ang. Hmeichhiate hi chuan thil sawiho an peih a, an ṭhiannu rilru hi ka hneh thei ngang lo anih pawhin a ṭhiante puihna tal hian kawng ka zawn a ngai ani.




"Ka lo sawipui dâwn ania" Lalnuni chuan a ti ve ta nge nge a. Eng êm la thleng lo mah se thâwk khat chu a veng ta phawt. "Ka lâwm e" ka tih hluai lâi chuan min lo melh ram ram a, "Khatia phûl hluai pawh kha a ngai chuang lo. I lam ka ṭang ta tihna a ni miah lo ania, Nunhlimi tán veka ngaihtuah ka nih hi. Chance a pe leh che a, a rilru i tihnat sak leh vaih anih chuan ka ngaidam bîk lo ang che" a lo ti fiah fak a. A thusawi avang chuan ka lo lâwm daih mai. Nunhlimi hian a phû ang taka ṭhian ṭha a nei ve ta ni a ka hriatna chuan min tihlim a ni.



"Apuia nen khan eng nge an chanchin?" Lalnuni kalsawn tùr chu ka zâwt leh hram a, ka rilru mawlh ber tu a ni tlat a ni. "Kha chu i lo buaina tùr a ni lo" a lo ti hmak a, ka lo rum nghut mai. Nunhlimi chungchâng anih tawh phawt chuan ka buaina ah ka seng lût hmiah mai. "A thlah leh tiraw?" ka ti leh hrâm a, "Thlah e" a lo ti sam thên. Thinrim viau na hun a ni lo tih hria in ngawih ka chuh ta zawk a. Lungàwi erawh a harsa khawp mai.



Thawhṭanni tûk office ka kal chu ka thawhpuite an lo ri laih laih tawh a, ṭum dang ang lo takin ka kal tlai ber ve teh tlat. "Pu Liana a zual an tia, kan va tlawh ve dâwn emawni le kan lo tia. I lo kal ve nghal duh ang em Hluzual?" an lo ti sawk sawk a. Buai atalangin Pu Liana damlo pawh ka lo ngaihsak ṭha hman lo tih ka hrechhuak chawpchilh nghal a, ka inthiamlo khawp mai.




Ka thawhpuite nen chuan Pu Liana damdawiin awmna lamah chuan kan inzui phei ta nghal a. Kan va thlen chuan chhungkhat laina leh vengchhung ami te an lo awm khawm ṭak ṭak tawh a. Remi chu ṭap tih hriat zet hian mitmeng sen râmin a lo awm ve a, an inlaichinna ṭhat zia ka hria a, mak ka ti hran lo.



Rei awm hman kan nih loh avangin chanchin kan zawh chian aṭanga rei vak lovah office-ah chuan kan phei leh ta dial a. Pu Liana chu ventilator hmangin an lo thâwk tîr char char tawh a. An sawi danah zanin pawh hi a tling tla kher ang em an chiang lo. A mimal tak ang pawhin min ti hamhaih ve khawp mai a. Tun ṭum a damlo chu a hma aiin a nasa zawk tih hre tho mah ila heti em em hi chu kan thlen ka lo beisei lo kha ania. Kan thawhpui tak tak ang hian ka en ve a, ka lainatin ṭha chhuak leh ngei se ka ti ve takzet a ni.

________*_________*_________*__________

(Chapter thar full-a rawn dah tel ka tum kha eng emaw rokhawlhna a awm avangin ka rawn dah leh thei dâwn lo va. Pathian zara dam chuan naktuk zanah sei tâwk kan inhlui mai dâwn ania aw. Hriatthiamngairengi hi min lo hrethiam leh hrâm mai teh u.)
Show post links
Top