Thinlung BY Kimkimi tlau (Completed)

[ngaia]

A ṭhutdan siamremin Bike chu a tinung a, lawn ve nghal mai ka tum lai chuan "Lawk aw"tiin a jacket chu a hlip sawt sawt a, min hak tir atum a, "Angailo " ti hluai a ka tawlh hnung tur chu ka kutah lo chelh hmanin " A tlai dai tawh alawm, thlasik lai chuan tun ang hun hi a hrisello a, hritlan a awl. I thawmhnaw inbel a alum silo a " ati thum dut a, min pawt hnai hret in, ka bag ah lai chu min laksak a, jacket chu min haktir in sawibuai lovin keipawh chu kalo insiamrem vemaia, katan chuan a jacket chu alian lam hret ani.

" Vawiin chu kan lai deuh tlatin kahria adik em? Keimah hi ka hmelṭha zual nge " Jacket hma zih phui pah a tiin amit chu min siai pah zeuh a, min chhaih leh pah tih hriain ka lei chu ka chhuah vak a, U Mafela chu anui hawk hawk mai. "Khawi ka bag, kal vat vat teh ang, ei dawn te a thlen kha katan anuam miahlo ania" Ti hlakin ka bag aken chu chhuh mai ka tuma, ka khawih fuh hma chuan keng kang daihin min nuih vur vura. " Chuang rawh le, heichu ngaihtuah suh " Ti supin bag chu a hawnga, "Hey..hawng suh " hlauthawng fe a kalo tih chuan min melh run runin ahawng lui tho a, a phone chu khungin "Ka hmuh ve phalloh i nei emni? " Tiin bag chu a nghawngah a awrh daih a, thawpui kala vak ringawt.


" Kal ang " Ti hlarin bike ah chuan ka chuang a, a che chimawm thei lutuk chu ka ngei ve deuh bawk nen ka ṭhutdan siamrem pahin asam chu ka keh sak pah khera, "ka ziat kawlh khawp ang " ati hluk ri chu hre mahila ka chhanglet tawhlo a, nui tet tetin "Kal tawh ila ka duatpui" a dara ben thek pah chuan abeng bulah ka phun sar sara, "Duhawm lutuk nu, kha bak kha chuan duhawm beh tawh suh " ti hrawkin ka mal chu alo hmer salh a. A chetdan chu kalo beisei lo bawk nen ka phu zawka, U Mafela erawh nui hawk hawkin atlanchhuak nghal vuk a, ngei viau e tilo chuan akawngah ka kuah nghal chial a, ka hlau ṭhin tih hria in atir a atlan vuk tih loh chu U Mafela pawh a tlanchak zuilo.


An in kan thleng a, gate chhunga kan tlan luh laite chuan ka zam leh et et tawha, An chhungkhua lah Jonathana tih loh chu an kim lai tak ani a, engtin nge ka hmachhawn dawn ka hrethiam hlawllo ani. Bike a hunṭhat lai chuan kawngka bulah kalo ding zum zut a, a inpeih hnuah ka bulah chuan lo kal hnaiin " Bawihi, inthlahdul rawh, i kiangah ka awmzel dawn alawm " ati dam dapa, ka kutah chelhin ahmer vang vanga, tlem chuan ka inthlahdul ve in kahria; Ni e, ramhuai puk ah ka kal dawn pawh ani hleinem, U Mafela hi ka pasal atana ka duh anih chuan heihi chu ka paltlang ve ngei ngei tur ani. " Ka hmangaih che " Hmui phuna ka tih chuan ahrethiam aniang anui a, lo kun hniamin ka hmuiah alo tawk zeuha, ka hawikual tur chu min dangin " Tumah an awmlo " ati sup a, ka nui tawp.

Door bell chu a hmeta, hriat tham loh hian a phun pah hluka, aṭawng ka hriat theih loh avangin ka uksak lemlo, kawngka anlo hawn hun kan nghah lai chuan thil kaltawh ka ngaihtuah mai maia, helaia ka kal tawp ber kha chuan U Mafela thawmhnaw bal suk tur la khan ka kala, kha bak kha chu an in ah hian ka kal awm ka hre tawhlo hrim hrim. Kal chhan tur avan bakah kal loh hram hram kha ka duh ṭhin a, ka kal ngailo reng bawk. Tunah erawh U Mafela bialnu ni tawhin chaw ei turin ka kal chu ani a, a boruak hi ka sawithiamlo, thil thleng hi amak a; a thawmhnaw ka suk sak lai kha chuan amah duhna ka neih awm ka hrelo a, tunah erawh he mipa hi ka hmangaih hial tawh a, hun hi akal chak ngawt mai. Ka kal hmasak zawkte kha chuan door bell hmeh nachang pawh ka hrelo a, tim daiin kawngka hi ka kik ve ngat ngat kha ania, U Cindy in min hau hrep bawk a, ala reilo viau emaw tih laiin ngaihtuah let takah chuan kha thil thleng pawh kha arei veleh ta fu mai.


An nula in kawngka minlo hawnsak a, kan lut mai dawn emaw ka tih laiin minla dinpui renga, " Kawngka hi khar phui suh u katih fo kha " An nula en kur pah chuan Ati khur khura, U Mafela chu ka melh chho dawrh mai, nichin khan alungawi loh awm reng reng ka hrelo a, engvanga an nula chu vin khur nge maw anih le. " Ka..ka hrelo, Pi khan khar nghet turin minti a " Nula chuan bah niai hian ati a, alandan chu a khawngaihthlak ngawih ngawih, U Mafel chu arukin ka sik ta zeuha, min lo en vut rual chuan rum zet hian kalo melh a, ahrethiam ta nge " I tihlai va tih zawm rawh " dam deuh zawk hian ati ta a. " Tinge i vin khur khur khera " Nula kalsawn hnuah chuan lawm vaklo hian kati a, " Ka thusawi an zawm duh ngailo kha ka thinrim alawm " atih chuan " Ama thiam loh pawh anih loh kha " kati sep a, ka ṭawng ring hranlo. Min chhang tawh lovin ka darah alo kuaha in chhungah chuan min luhpui a.

" Min inthlakpui lawk la " In chung chhohna kailawn bulah min dinpui a, " Aih, azahthlak bakah anuamlo " kati chul a, "A ho emai Bawihi, ka room pawh min hmuhpui ve ang chu" Dam dapa tiin min en ngura, " Han inthlak la, in nula kha kalo pui zawk ang " Hawikual thuak pahin kati a, a chhungte tumah hmuhtur an awm miahlo chu amak kati a, chu chu ahrethiam aniang ka dara a vawnna chu thlahin ka kawngah a vuan a, alamah min pawt hnai hretin " Ka chhungte chu vengthawng suh, kan nula pawh puih angailo " Tisup in kailawn ah chuan min chhohpui a, hnialna hun ka nei tawhlo hrim hrim, atana ka thil leisak pekna hun atan aṭhat ringin ka hnial ṭung duh ta biklo a, ka inthladul deuh tih chu hrethiam thuaiin ani pawn ka kawnga avawnna chu a thlahdul veta deuha, "Hmelṭhanu" atih chuan anakah ka piai sak a, a eu ve zawk mai.

Kailawn kan zawh chhuah rualin ṭhutkhawmna lian vaklo hi alo awm a, sofa set nalh zet a in hung bawka, ṭhutkhawmna bul ah chuan room pahnih a in dawta lo awm in chu chu kan kal pel a, ka hmuh chin ringawt pawh chuan thawk ati chham lek lek ani. U Mafela chuan min kalpui zel a; Nitin a hmuh leh akalpelh mai mai ngaia aneih tawh thil anih avangin ani chuan danglamna anei tawhlo tih ahriat a, kei erawh ka thil hmuh changkang leh ropui lutuk te chuan minti danglam ani, bungrua in hung leh a cheina hrim hrim te chu a to dawn tih ahriat ngawih ngawiha, nuam tihna pakhat mah ka neilo tih kan sawi lang ang e, kan dinhmun inthlauh zia min hriat nawn tir leh awn awn a, ka te chem chem in kahria. Room fal ber kan thlen chuan min dinpui datin kawngka ahawng a, "Welcome Ka nupui hual " Ti cool ruih in ka bekah afawp zeuh a, ka mit chu nghet zetin kalo chhing vang vang.

Ka kawnga a chelhna athlah a, a dinsawn deuh takah chuan lut hmasa turin min duh tih ka hrethiam ve a, U Mafela chu melh zeuhin room ah chuan ka pen lut a, a room chhung ka hmuh rual chuan ka meng kawk a, Mi pakhat room atan chuan azau ve lulai em ani, a room chu a fai sar a, engkim chu a awmna hmunah felfai deuhin a awm veka, hnawk leh bal hmuh tur a awmlo hrim hrim. 'Hei hi chu heta awm tur zawk anih hi' ti a sawisel tur pakhat mah a awmlo a, afelfai dan em em chu mipa room nilo a mawi ani.

Room chhung uluk deuha ka enkual laia ka hnunglam aṭanga U Mafela'n minlo kuah avang chuan ka phu zawka, ka beng bula lo nui sukin ka pumah chuan akut chu a suihbet a, ahmui a ka beng bul vel anul thuak thuak avanga ka za ti chu ka tawm chawih chawiha, "Haw tawh lo maila " Tiin ka tukhumah ahmai aphum vang vanga, kan awmdan chu anuam kati a, a hahdamthlak hle in kahre bawk.

" Khawiah nge ka bag kha i dah " Thil hrechhuak thutin kati hluaia, ka puma akut a suih beh mek phelhsak ka tum chuan alo phallo a, ti lui tih hriat zetin min kuah nghet vak a, meng kawkin ka tal chiama ka tal chhuak thei chuanglo. " Thil pek tur che ka nei ania min thlah lawk teh " ka tih takah chuan "Dawt i sawi vaih " ti chungin min thlah a, ka kalsawn mai hlau ang hrimin minla veng run tho.


" Ka bag chu " Hmai thal ha a en chunga ka tih nawn leh chuan min chhang lovin min nawr kal dat data, a lehkha chhiarna dawhkan bula min dinpui rualin ka bag chu ka hmu nghal a, la kang vatin " I mit chhing teh " inher pah chuan kati a, thuawih deuh chuan amit chu a chhing vemaia, "Meng dere miah suh " ka tih leh ṭalh chuan anui hawka, "Okey" tiin amit chu a chhing nghet ve sauha, theih se alandan duhawm zet chu thlir reng mai kaduh.


Ka bag chu hawng in bawm lian vaklo uluk taka ka tuam mawi ve chu ka phawrh a, a hmai zawna ka lek kan va rualin " I meng thei tawh ang " kati sep a, amit alo men rual chuan " Piancham chibai " kalo ti a, a awmdan chu uluk zetin ka enreng bawk a, engmah chu hmuh hmaih ka tumlo, a hmai zawna ka thil ken ahmuh chuan a chiai vedeuh a, a mitmeng erawh a nung sarh a, "Ka beisei miahlo Bawihi, ka lawm takzet" ti chhhuak supin ka thilpek chu ala a, "I bialnu hi ka hausa lo tih ihre tho ang a, ka thla hnih hlawha ka leisak che anihkha aw " Nui pat pat chungin kati a, ani pawh anui ve hawk hawk.

" I thinlung min pe tawha thil pek dang chu ka beiseilo asin, hah deuha i thawhchhuah ani a, i tan hmang zawk ta che " ka khabeah dawmin amah en tur chuan min kuai dak deuha, " Hah taka ka thawhchhuah itana ka hman phal avang hian zuang tawr tawr zawk ta che, hahtakin thawkchhuak mahila mipa chhelo leh hmelṭha tak tan ka hmang tho a keichu kalawm " ti a ka fiam chuan akiai suk a, lai hmel a pu deuhin kahria. lo kun hniamin ka hmuiah a fawp zeuh a, a inlakhran pah chuan " Inla zei suh " a ti hmuk a, minti hrilhhai lek lek ani. " Eng nge "a awma ka kut dah pah chuan kati a, "Minti lai ṭep" ati leh dut a, ka melh hau ringawt. " Laihna tham engmah ka sawi loh kha" ka tih chuan " I sawi chiang khawp " ti hlukin a inla hrang deuh a, chair chu nawr tawlhin ṭhu turin minti sup a, ka ṭhu vemai bawk.


" Ava mawi ve Bawihi " necktie chu alo keng langin hlim tih hriat zet hian anui var vara, " Hei pawh " ti leh in bracelet atan liau liaua ka siamtir chu alo la chhuak leh a, a melh vung vung mai, engmah asawi tak lo ah chuan " Kalo bun tir dawn che ami? I bun duh angem? I ngainat loh pawn i dahṭha mai dawnnia, i duhzawng ka hre silo a " A ngaina chiahlo anih ringin kati zung zunga, ka awm anuam lo leh viau tawh. Engmah sawi lo chuan minlo hnaih vuta akut pahniha ka biangah dawmin min fawp a, a chetdan teh thut avang chuan min fawhna pawh chu chhanlet mai nachang hre lovin ka dawh mawl tawp ringawt a. A inlakhran dawnah ka hmui hnuai ala seh zeuh zui a, a awm ah ka nam sawk mai.

" I laka ṭang chhuak reng reng chu ka ngaina vek " Ti supin Bracelet chu min pe a, bun tir rem zetin aban alo dawh nghal zat bawka, ka nuih ati za reuh lutuk. a en vung vung avang khan aduh vaklo anih ka ring hman kha ania, min tih hlauhthawn hi chu athiam ve ngawt mai. Bracelet hi ka ṭhian pakhat ka siamtir a, special deuh ka duh ve avangin ahming ka dah tel tira Mafela tih tawpah love te a dai dangin K ka tih tel tir hram kha ania, bracelet chu bun tirin " Ka hming tlemte atel ve hi i lawmlo em " Ka tih chuan naupangchhia minti deuh nge anui hawka "Ka hming tello hian i hming zawk dah se kati asin " ati a, " Over mah mah" ti hlakin ka ner nanga, lungawi zet hian akuta bracelet chu a en dauh dauha, chutianga ka thilpek manto tak pawh nilo lungawi leh lawm taka min pawmsak chu hmuh anuam kati a, thil ṭha tita viau ah in ngaiin ka hahdam sawng sawng thei.


Thilpek chu a man atlawm leh a to lam anilo, miin duhsak taka thil min pek chu eng anga man tlawm leh kan lei ve theih reng thil pawh ni mahse, a pe tu min duhsakna leh thinlung avang zawk khan kan hlutin kan lawm em em ṭhin a. Thil pek man to tak leh hlut awm em em pawh hi a pe tu azir in alo hlu leh thei chuang miahlo bawka, Thilpek man to tak ai chuan a petu thinlung zawk hian adawngtu rilru hi alo kaihruai zawka, a pe tu rilru adik phawt chuan adawngtu tan chuan engthil pawh nise thilpek hlu tak ani ṭhin ani.

" Chhuk tawh ila, kan awmrei tawh emai " Inlak hran hlek paha katih chuan " Reilote " Ti supin min pawm kang lawpa, in thunun hmanlo ila chuan ka rak chhuak chiang viau ang. Rum zeta U Mafela chu melh in "I a emai " kati hlara, min thlauh thut hlau in ka tal ngamlo thung. " I hmuiah pawh fawp lovin ka room aṭang hian i chhuah ka phal iring ami? Chance kan neih khat em hi " Ti sur surin khum bulah chuan min nghat a, " A fala hun kan hman tam chuan sual kan hnaih mai mai alawm " katih chuan "Sual te chuan min chenchilh reng alawm " tih leh min fawh chu aruala, kalo hnar biklo nasa mai.

A fala awm changte chu kan nei ve tho a, U Mama in a ka awm lai phei kha chuan kan zalen zuala, in fawh te chu kan duhthawh ve nasa ṭhin a; Mahse, U Mafela hi mipa fair tak ani a, vawikhat erawh kan kal thui ve lek leka, keilah experiance neilo tih takah U Mafela min tawhna te khan ka rilru atibuai zo vek ṭhin a, dan tumna ka nei tawh ngai miah loh laiin amah zawk hi rilru fim pu hmasa zawkah aṭanga, mitmeng danglam leh insum tum taka thawk alak vang vang hnuah " I thianghlimna hlu tak hi Pathian hriatpuina leh remtihna tello chuan ka chen ngamlo, Pathian hi a zahawm emai" tiin min hrilh a. Ahnu aṭang chuan duhthawh viau ṭhin tho mahse, tawp hun ahria a, min nawr nat deuh hlek chang erawh chuan keiman ka bengdai ve ṭhin, thinrimah ala ngailo a, lawmthu min hrilh zawk fo a, Ani ang hi mipa zawng zawng nise Hmeichhe vanduai leh sawn pai te hi tun ang em em hian kan tam kher ka ringlo. Mahse, khawvel ani miau a, Original a awm rualin duplicate a awm venghal zela, Thil lem tam tak karah thil tak tak ka tawn fuh avang erawh chuan vannei ka inti.

Duhthawh zetin min fawp a, atukhum a dawm in keipawn ka lo chhanglet vezela, ka rilru buai nuai nuai leh ka ngaihtuahna tawi tup chu U Mafela chetdan vang ani tih ka hailo. Khumah chuan dimtea min mutin ka chungah rem zetin minlo bawh nghal zata, thilsawi tuma ka an zuau lai chuan ka dang dawn tih ahria nge ka hmui alo khar leh hmak anihchu! a kut ahlei ṭan hle tih pawh chu kahria a, ka awm bawr pawh duh aiin a hrawm na tawh. A duhthawh zel dawna hria in ka inti fim lui a, a darah chuan beng datin a awm ah chuan kanam nghal ṭung a, chutia ka tih takah chuan keipawh ahma aiin ka fim tawh a, kan kalthui leh hman hle tih chu kahria, ka ṭang nghal ṭeuh a, inla hranga ka bulah alo lehthlak rual chuan ka thaw huai thei.

Amut ngaia mu reng chung chuan amit chhingin thawk ala halh halh a, a beka thisenzam pawng ṭalh ṭalh pawh ala rehlo, kei erawh ka ṭhu tawh thung a, ka danglam ve hman tho avangin thawk chu kala la ve ham ham reng a, U Mafela chuan a mutdan chu siamremin ka malah alu alo nghat a, Mitmeng dam leh ril zeta min melh in " Ka lawm e Bawihi " atih chuan kalo nuih var vara, "Kei hi alawm i laka lawm tur zawk chu " kati let ve sep a, asam chu ka khawihsak pah neuh neuh bawk, asam ka khawihsak reng lai chuan alo ṭhu chhuak hluaia, ka sam chu min chul mam sak in " Ka intleuh thuak anga kan chhuk dawn nia " ati Dam dapa, rang zeta kalu kalo thin chuan ka awmdan chu a hrethiamlo nge chal chuar tap hian min en a, mak ti hmel a pu in kahria.

" Heta awmreng chu anuamlo alawm, lo intleuh la inhnuai ah kalo zu chhuk ang, engmah tih loh chu anuamlo" Tiin asam phir sung chu ka tuaisak a, " Ka tello a chhuk chu i duh maw " min ngaihtuah zeta atih chuan in sangmar luiin kabu nghat a, ka nui lui pah var var bawk. " In nula ka zu puiang, intleuh reilo la " tiin ka thiam ang tawka no chuan ka melh ve sawr sawr a, " Ka nula Duhawmte, nupa kan ang iti ve em? " atih daih avang chuan insum hman lovin kanui chhuak haka, ani pawh alo nui ve hawk tho.

" Aṭha e, ka reilo ang, i thil min dil tih sak loh che hi hreawm kati si a, in hnuaiah chuan ilo zu chhuk dawnnia; mahse, i chhuk hmain ka thawmhnaw hak tur minlo dahchhuak sakla " Mit min siai zeuhin khum aṭang chuan atho a, "Sawlai saw ka thawmhnaw bawm " tiin towel aban a, bathroom a aluh hma chuan ka chhip ah afawp leh vang vanga, "Hnungchhawn che hi ahar kava han ti em!" Ati kual vela, a chetdan over lutuk chu keiin kalo ner khum nang nang thung.

Thawmhnaw chu rin aiin angah hranlo a, hak duh bik aneih vang nimaw a thawmhnaw ah chuan a in ang lek lek atam viau a, rawng dum atam hle bawk. awm hmun thawmhnaw deuh adahna chu hawng in hak nuam ber tur chu ka lakchhuahsak a, bathroom a arik sur sur laiin room aṭang chuan ka chhuak a, A nau te tawh palh hlau zetin hmanhmawh deuh chuan ka pen hlawk hlawka vanneihthlak takin inhnuaia ka chhuk thleng chuan tumah katawk lo a, Pi Zothani pawh ka hmulo hrim hrim.


Choka lam chu ka pan ding ve tawp a, chutah bak kalna tur dang ka hrelo, Choka ka luh chuan alo rimtui khawp a, An nula pawh alo che buai angreng a, "Mamawh i nei emni? " Min hmuh rual chuan min nuih var vara. a thil min zawh chuan minti lai hu mai. "Aih, neilo e, puih i ngaih kalo ring zawka " katih chuan "Ka tithei alawm aharsa lo lutuk, lo ṭhu mai mai rawh " ati sawk sawka. "aaa..ṭhut mai mai chu anuam ka tilo alawm, tih tur min hrilh la kalo pui ang che " kati ṭalh a, eng emaw tal ka tihpui loh chuan ka awm anawm theih pawh ka ringlo a, chetpui ve bawrh bawrh ila ka ṭi lutuk te pawh hi a ziaawm deuh ka beisei.


" Chutiang anih te chuan " Tiin tihtur te chu min hrilh a, eirawngbawl chu ka thiam zawng tak ani ve bawka, ka huphurh hranlo. Nula chu aṭawng duh phiana, kei aiin a naupang hret tih kan sawitel ang e, min be bawrh bawrhin zawhna te min zawt ve luama, keipawn ṭha deuha chhang vezel in akhat tawka anui leh har har ṭhinte chuan helai hmun reh lutuk chu ati zia a, phur deuha atihtur ati mawlh mawlh laite chu ka tih tur tih ṭhulh ṭhakin ka thlir leh dauh dauh ṭhin.

Ziki hi kan khaw ṭhenawm ami ani a, anu leh pa te chu kut hnathawk niin an unau an rual si a, an unau ah amah hi a upa aawl ani ve a, an khawsak a harsa bawk nen tihian mi inah a awm angai ta anihhi. A ṭawng duh a, a chanchin min hrilh ve siam siam a, " Ka naute pahnih hian lehkha hi zir sang vese kan duha, ka unau dangte pawh Aizawl ah mi in ah an awm vetho " tiin min hrilh a. Ziki te dinhmun ka han hriat takah chuan rethei ve viau mahila kan vanneih zia ka hre thara, Mahni in lum thlahlel hlei thei lova naupangtea mi in ah an awm angaite chu an khawngaihthlak kati. kan harsa ber emaw kan hreawm ber emaw inti ṭhin mahila keini aia harsa leh rethei zawk te, kan tawrh aia tuar nasa zawk hi anlo awm zela, mihring hi vui tur kanlo ni hauhlo. Vui duh nise keini aiin Ziki te hian vui chhan tur an neiṭha zawk dawna, lungawi loh na tur zawng duh nise Ziki hian kei ai mahin lungawi lohna tur chhan anei ṭha zawk ang, chuti chung chuan ahlim sarh renga, a chunga thil thleng chu a pawmthiam tih ahriat ngawih ngawih bawk.

Chan tawka lungawi thei te apiang hian khawvelah leh Pathianah hlimna an changin annei ṭhin a, chantawka lungawi duhlo leh lungawi theilo te chuan khawvel ah leh Pathian ah dem tur leh vuina tur an hria in an zawng reng a, an nun a hahdam ngailo.

Ziki nen titi paha eirawng kan bawl mial mial lai chuan Pi Zothani choka ah alo lut hlawl a, min hmu chu amitmeng danglam deuh zawk mahse, a insiamrem leh vat a, min hmuh kan hmakin fridge chu ahawng a, tui bottle la chhuakin a in nghal khalh khalh. Ṭhutkhawmna lamah chuan thawm a awm a, midang pawh anlo haw tawh anih karing a, ka rinna ti chiang turin " Linda, tui i induh em? " Pi Zothani chuan ati lang langa, keichu ka in sangmar leh at tawha, U Mafela lo chhuk thuai thuai se kati takzet. Lindai leh Viviani chu choka ah anlo lut ve thuaia, Choka a kalo awm ve chu mak ti hmel pawh an pulo a, ka awmdawn tih anhre sa te pawh aniang.

Eng atan mah min ngailo tih hriat takin an pathum chuan an inbia a, kei leh Ziki chu awm velo ang maiin min ngai kati mai, " Mafela tan hi chuan nang baka ṭha hi an awmlo mawle " Pi Zothani'n atih chuan ka sa chhuak deuh pap a, chutiang reng renga min thamlo tu chu kala tawng ngailo hrim hrim, kanu'n 'Kal suh' min tihlai te chu ka hrechhuaka, kanu thusawi ka zawmlo chu avawikhat nan ka inchhir ani.

" Kimi, Mama thawmhnaw suk tur ilo la dawn ami? " Ka lam lo hawi paha atih chuan ka phawk deuh hra a, ka inthunun hman thlwt lo, athil min zawh chu ka beisei lo em a, chhan mai dantur ka hriat loh bakah ka zak lutuk chu tuna tan chuan lei hnuaia pil vang vang ka chak bera, Viviani leh Lindai nui hmel te chuan minti tawt up up a, chutiang reng renga zak leh hreawm chuan ka awm ngailo. " Ka..ka englo..chutiang anilo " kati bah nawk nawka, fiah takin kakal chhan sawi ka duh a; Mahse, ka lei hi phuar beh ang mai hian a awm a, ka ti che ṭha thei miahlo anihchu.


" Pi, U Mafela'n alo hruai a, hetah chaw an ei dawn " Ziki'n ṭi dai a alo tih chuan harsa zet hian thawk kalo la a, "Nangkha Zawhna ka zawt lo che " Chang faka Pi Zothani'n atih chuan " Mi in a chaw ei te chu azahthlak e " Viviani'n min ti el zetin alo ti ve bawka. Sawi ve tur reng reng ka hre tawhlo a, he in aṭanga tlanchhuah vang vang tluka chak ka nei tawhlo, theih nise ka dinna lei hian min dawlh daih se kati a, chu erawh thil thleng ngailo tur ani si.

" Ka fapa hi ka chhuanga mipa hlawhtling leh smart tak ani a, Kimi, ahranpa takin ka haw lo che; mahse, ka fapa nupui atan chuan beisei leh duh kanei a, ka fapa, ka pum a ka pai leh harsa tak chunga ka hrin chhuah engkimah a ṭha ber ber pe a ka enkawl anihna angin atan hian ngaihzawng leh thildangah pawh aṭha ber ka duhsak a, ka duhtak lo chu nupui a aneih ka remti lo bawk, Lindai hian ka mit atlung em em a, tichuan i hrethiam maiang tiraw? " Pi Zothani ṭawngkam tin mai chuan min deng dawt dawt a, hetah hian ka inṭap mualpho thei mai dawnin kahria, chu chu ka duhlo a, he in zau takah hian ka leng ve hlawllo tih chu ka hriatchian belh ta viau bawk.

" Mafela pawn thawmhnaw suk tur anei leh tawh ang, i haw dawnah i hawn dawn nia.." " Kanu i duhtawk thei em?" Pi Zothani ṭawng laklawh laiin U Mafela'n chang bawl hian alo ti a, rang zeta ka hawichhuah rualin ka bulah U Mafela chu alo ding ran tawh a, engtik laiin nge choka ah alo luh ve hman ka hrelo. Pi Zothani min ṭawngkhum dan khan minti zak ngawih ngawih a, Ka hawichhuah apianga Viviani leh Lindai te nui hmel ka hmuh avang khan ka kun ta ngawt kha ania.

" Iṭha em? " Min ngaihtuah zeta tiin ka kut ah a chelh a, thinrim insum tih hriat zetin a bek a pawng ṭalh ṭalha, a hmai vun chu a sen ṭawh ṭawlh bawk " In lo va mak ve " Ti chhuak ṭhawtin chair chu a tlawh zawt a, ka phut dawrh avang chuan ka kawngah kuah vatin ataksa ah min kuah bei nghal hmiaha; U Mafela hmel ka hmuh tak avang leh ka thlavang ahauh avang chu nge ka rilru a no thara, ka mittui ka dan ve hram hram te pawn rinchhan tur ka nei tih hrethiam ve ang hrimin ka biangah alo lum thla pap pap a. " Remruatfel, bungrua ah ṭuan reng reng suh " Vin zeta Pi Zothani'n atih chuan "Hrilh lawk lo che ka nilo, ka rin i lo anglo hlemai kanu, hetiang hian i sual i chhuah duh kalo ring miahlo asin " a aw chu avin tawhlo a, mahse ala khauh fak tho.

" In chetdan chuan Minti zak in minti na hlemai " Ti chhuak leh halhin keichu min pensawn pui a, choka aṭanga kan chhuah rual chuan ka mittui chu ka hru hul nghal sawk sawka, " Ka..ka haw duh " Kailawna min chhohpui leh mai atum lai chuan kati bah nawka, ka ṭan tlat avangin min chhoh luih pui biklo. " Bawihi, ka room ah reilo te hahdam rawh..ummm, hetianga ka haw tir che chuan keihi mipa ti a chhiar tlak pawh kani dawn emni? " A aw ah chuan natna ari tel ve a, chu chuan minti na tel veleh tho a, a landan chiai ve ruai aṭangin thil thleng chu a beisei bik hauhlo tih ka hrethiam ve bawka, ka awmdan chu a laklawh takzet ani.

Ka ngawih reng takah chuan ka hniallo tih a hrethiam aniang kailawn ah chuan min chhohpui leh a, ka zawiin ka chau hluah hluah a, min tih ang ang chuan ka awm ve tawp mai ani. Ka mang duk a, chutih rualin ka buai nuai nuai lawi a, ngaihtuahna khat mup siin ngaihtuah ber tur ka hrelo thunga, ka awmdan chu ka sawifiah thiamlo, rawng chi hrang hrang in mix khawm ang mai hi kani a, rawng hrang hrang in mix khawm hian rawng mumal tak aneilo ang chiahin tunah hian keipawh hian mumal ka neilo.

Pi Zothani min ṭawngkhumna zawng zawngte khan min deng nawn sawk sawka, ka mitthla ah Nurse Lindai nui hmelte, min hmuhsit hmel zeta aner kual laite kha alo lang zut zuta. ka tawt lutuk chu ka thaw te achham dawn hialin kahria a, An in ah chaw ei turin ka kal tih chiang taka ahre chung pawha 'Ka fapa thawmhnaw bal i lo la dawn emni?' minla ti ṭalh te kha asual thiam kati ve ngawih ngawih. Hetiang mihring hi film leh thawnthu velah te chuan an awm ṭhin tih chu ka hria a, atakah aerawh an awm ka ring ngailo hrim hrim a; Mahse, hei tunah keimah ngeiin ka tawng chu anih hi.

Ka mit deuh sulh a, ka khaw hmuh a thim mup rual chuan ka zawi deuh hnawka, U Mafela ban tha chak zetin min dawm hman avangin tluk erawh ka tlu lo a, " Bawihi, i ṭha em? " Hlauthawng zetin ati a, a aw chu a khur telin kahria, ka mit thim mup avanga hlauthawng zetin ka lu chu ka thing vaka, reilo ah ka khaw hmuh chu alo fiah veleh maia ka taksa zawi erawh ka thunun hmanlo. Phun hlukin U Mafela chuan min pawm kang lawp a, tunah chuan keimaha awm a, ṭah vak vak emaw au chiam ka chak a, chu chu ti ila ka ipik lutuk hi azia deuh karing.


Ka hnungin khum dup nuam deuha adeh rual chuan kamit kameng a, hnai taka min lo bih ngur tu U Mafela nen chuan kan in en hnai viau a, amit a thinrimna leh hreawm tihna lang chu hmuh kan tum mahila ka hmuh kan thei hauhlo. " Min ngaidam rawh Bawihi, khatiang thil kha athlen ka.." ahmui chu ka hup saka, athiam loh ni miahlo a ngaihdam min dil turin ka duhlo a, a nu tana ngaihdam min dil turin ka duh bawk heklo.

" I thiamloh anilo, ngaihdam min dil suh " Kati sep a, zalo fahrana ka nuih var var laiin ani erawh athutak run a, ka biang chu tuai hauh hauhin akhat tawkin ka chal leh ka hnar te, ka mit leh ka biangah te chuan a fawp chhen a, thil sawi tur nei ṭeuh sawi chhuah dan thiam silo hmel hi a pu a, ka inthlahdul tawh viau laiin ani erawh ala in sangmar at reng a, a inthlah dul theih deuh beisei a ka mutdan siamremin ka awm a ka kuah bei chial hnuah a chhipah ka fawp vang vanga, " Inthlahdul rawh Duata, kan ṭha ania aw " ka tih pawh chuan thaw chhuak huai mahse, ala in thlahdul thei vaklo a, a awmdan chu a remlo ati deuh nge a awmdan chu siamrem sat satin ka lungphu zawnah chuan a beng chu adawh rema, chutia rei vaklo a awm hnuah chuan zawi zawia inthlahdul ve hret hretin "Bawihi, i mipa nih hi ka phu lo takzet " ati chhuak hrawka, sawi tur ka hre hlawllo, hnem kaduh a, hnem dan ka thiam chuang silo.


" U Mafel, ka haw maiang " Minute20 dawn room a kan awmdun hnuah chuan kati a, " Aih, chaw chu room ah kan ei dawn nia " Ati bur a, thawk kala hluai ringawt; tun atan chuan Pi Zothani hmachhawn ka peih tawh ruhlo a, U Mafela bula sawi chhuah kher erawh aṭul ka tilo thung, Anau leh nurse nu te nena chaw eidun phei chu chak lo tak kani. " Chutiangte chu a tih chi lovang, min thlah zawk la " Kati leh sep a, " Aih ka tihchu, i ei loh chuan keipawn ka ei lovang, i chunga thil thleng avang khan ka in dem hle asin, lungawi lovin min hawsan tala engtin nge awm se mintih " Ati bul bula, a thinrim leh lek lekin kahria. " Lungawi loh na kanei hleinem, lungawi lo ila chuan tunah hian i room ah, i khum ah, i kiangah hian ka awm miah lovang " A kut khalhsak neuh neuh pah chuan kati a, " Chupawh nise, vawiin hi ka piancham thleng tawh zawng zawng zinga nangmah vang liau liau a ka hman nawm leh hlim ber ṭum ani a; mahse, kanu avangin boruak a chhe vek a " Ati rum ul a.

"I nu pawh a demawm hleinem, a fapa tan hmeichhe ṭha tak aduh animaia " A rilru nawm deuh theih nan thil thleng chu a zau zawnga lak katum a, harsa erawh kati takzet, "Ka phu lo che tih ahriatthiam hunah chuan a fapa i neih loh hi a hlau viau zawk ang mawle " ati a, chu erawh a thlen ka ringlo thung.

Cont..
Show post links
Top