By CVL.Awmpuii
Chapter 23
Vawiin kan office zet chu, Pu Liana chanchinin a luahkhat a ni ber e. Eng emaw hlekah kan sawi chhuak zel a. Pa ṭha leh inngaitlâwm, a hna tlin tak a ni miau a. Kan hnuaia thawk zawk a nihna lâiah keini aiin upa daih mah se mi a zah thiamin kan zai ngai tak hian a che ṭhin a. Chu chuan amah pawh zahawm ah a siam ṭhin ni berin ka hria. Pawlawh leh nawmnah takin tuman kan be ngai lo va. Kan office-ah chuan kan zah tlâng ve viau bawkin ka hria.
Tlãi office bànah chuan kan va tlawh veleh hrâm a, a dinhmun a lo la ngai reng. A nupui chuan kan ngaihsakna ah làwmthu min lo hrilh ve mawlh mawlh a. Kan tih theih ve tâwk ti kan nih thû a chhângin pawisa tlêm azawng kan hlân ve bawk a. An mamawh zawng zawng phuhru thei lo mah se ṭangkaia an lo hman ve atân kan hlân a ni. An lo lâwm thiam em em mai lehnghal a. An chhûngkaw khawsak chuti teh lua ni lo mah se an zahawm khawpin ka hria.
Kan haw dâwn chuan a remchâng ber Remi chuan pâwn thleng min thlah a. Kan office-a a lo kal ve fo tawh avangin ka thawhpui dangte nen chuan an inhre ṭha sa bawk nen an titi zui luam a. Kei erawh ka lo ngáwi ngul thung a. Pu Liana chungchâng hi chu thudang lo ni ta se, Remi hi hnaih leh ka tum tawh lo hrim hrim. Min rawn melh leh ṭhin tih pawh chu ka hre reng a, mahse ka hre lo der hmiah. Kan kal tak tak dâwnah chuan "U Hluzual, anih u aw" a rawn ti kher a, a zak thei lo ka ti dawn nge? Khatiang zozai a ṭhiannu nen kan inkar buaina a siam hnù ah min la be ngam zawkte chu mak ka ti. Hmeichhe huaisar ve tak zawng a ni phawt mai. Ka hriat loh der tâk daih kha!
Zànah chuan Nunhlimi te inah ka va lang veleh râwih a, mahse amah a lo awm hauh lo mai. "In inhrilh vek tùrah ka lo ngai a, a ṭhianpa Apuia nen an inzui chhuak daih alawm. An ṭhianpa piancham ania, an lawm dâwn a ni àwm e" Akimi chuan a lo ti zung zung a, ka sa phat mai. Mahse lan tîr erawh ka duh hauh lo thung. Kan inkâr fel loh zia an la hre si lo va, ka hre sa tùra an lo ngai chu remchângah la in "A lo haw tawh ka ring a..." ka ti ta ringawt a. Nunhlimi chinchâng hrelo lutuk anga lan chu ka duh bîk miah lo. A chhûngte lakah tal hi chuan ka tlâk tlum zêl a ngai tlat.
Philip-a chuan "A lo haw ṭep tawhin ka ring, lo lêng ve rih tho la Hluzual " tiin min lo chhâwn ve vat a. Bet zân lo chuan ka lêng ta tho a, "Lên chhan ber awm si lo va lo lên reng chu awmzia a awm àwm lo mange tiraw U Hluzual " Akimi chuan min lo fiam ve bawrh bawrh a, ka nui suk suk ringawt. Ka che lai kual vêl vek a ni.
Zàn dár 8 a ri tawh a, Nunhlimi chu a lo la haw mai lo. Dik tak chuan ka awm a nuam zân tawh lo. Thinrimna ai mah chuan amah ngaihtuahna in ka khat tawh zawk. A bula awmpa lah kha ka hriatchian tak ni lo mah se mi ṭha a ni dâwn lo tih ka ring nghet hmiah bawk si, ngaih ṭha taka awm chu har tak a ni. "Ka rin ai daihin an rei ta mai" Philip-a pawh chuan a ti ve ta sek a, "Ka'n call chhin ange" ka ti vei rawk, a lâk duh pawh ka ring chuang lo. Mahse Nunhlimi chu ka call ta tho a, ka rin ang chiahin a ring quit ṭhak. A awm dânin min tih làwm loh zia chu pui tak a ni tawh.
Phone call dang ka dawng ta hlauh zawk a, ka thawhpuite hnen aṭangin Pu Liana boral thû ka hre zui nghal zat bawk a. A manganthlak khawp mai. Kal ve ngei a ngai si a, ka lèn chhan Nunhlimi ber chu lo la haw lo mah se a chhûngte chu chanchin ka hrilh ve sawk sawk a. Ka chhuak zui nghal chu a ni deuh mai. "Akim, Nunhlimi chu biak tum chhin teh, rawn haw a hun tawh hrim hrim, a zialo emai" an in aṭanga ka chhuah ruala Philip-an a tih ri chu ka hre pha hrâm a, ko haw mawlh teh se.
Ka chhûngte pawh phone kaltlangin chanchin ka hrilh ve nghal a, ihe lovin Pu Liana te in lam chu ka pan tlang nghal a. Rei a daih kha ring lo sa mah ila engtin emaw kawng záwng tak hian rilru chu a hnîm ve ruih mai.
Ka va thlen chuan an lo insingsa fel diam tawh a, ruang lo nghah tawp aiah tiin damdawiin lamah chuan ka tlang veleh lawi a. An lo ṭap nasa rawng rawng khawp mai. Pu Liana nupui leh Remi te chu inkuah chungin an lo ṭap hawm hawm a, an tuar ve khawp ang. Damdawiina tihfel ngai ang ang an intihfel hnù chuan ruang chu in lamah an phur phei ta a. Ka thawhpui dangte nen kan zui ve thlap a, kan kim ve viau chuan ka hria.
Ruang an indah fel a, zài an ṭan hnù chuan boruak hîp tùrin pâwn lamah ka chhuak ta daih a. Ṭhalai rual tlaivar tùr an lo kal khâwm tawh bâkah Nula hovin ṭhutna an inchan chuang lo bawk a, pâwna lo awm pawh chu a fuh zawkin ka hria. Midangho zial zukna bulah chuan ṭhu ve in ka phone chu ka phawrh a, ka en zuai a. Ka mit la deuh thil ka hmu leh ta. Nunhlimi leh Apuia te thlalak Msa'n min lo thawn chu ka en nawn sek a, "Lo thinrim leh rawh" a rawn ti kher a. Ka va han ngei mai mai tak. Hepa hian min nuihsawh riau alawm. Engtin nge thlalak te hi a neih nawlh nawlh theih zawk ni?
"A haw tawh em?" ka va ti teh ngawt a, Nunhlimi thlalak a nei miau si a, a chinchâng a hre tùrah ka ngai hmiah mai. "Eng nge i sawi awmzia?" a rawn ti hu a. "Awww...Nunhlimi chhuak hi a haw tawh em?" ka va ti ṭha leh, ka zawhna chu min nuihzat ka hlauh avangin Delete ka tum leh hnuhnawh a, mahse a lo hmu hman hrâm. Nui per tuarh tuarh emoji hi min rawn thawn in "I va han chhah mep mep tak e aw...chutiangte chu i hriat tùr zawk alawm ngaihven ve ta che" a rawn ti zek a. "Ka ngaihven a, ka hrelo anih hi" thinrim deuh chuan ka type sawk sawk a, ka insehruh ṭeuh mai. "I hahthlak siah, bansan tawh mai rawh" a rawn tih chuan ka thaw hluai a. Ka ṭhianpa mah nise min tih dàn hi ka thin a rim lek lek tawh. Chhâng duh tawh lovin ka phone chu ka ak ṭha nghal hmak a. Tih tùr ber pawh hre chuang lovin ka tho hluai ringawt a. Ka chêt dàn teh thut chuan ka bula ṭhute chu a ṭhawng aniang min lo melh hru hlawm a. Za lo zeta nuiin "Thosi in min seh alawm le" ka ti ta ringawt a, min ngaihven zui hlawm lo hlauh.
Ka rilru ah thil dang a lût thei hlawl lo va, Pu Liana thlarau pawh ka zah khawp mai. Lumenna a awm ve lêm si ngaihtuahna ka kàwm ta ngut ngut a, Nunhlimi a haw tawh ang em tih ringawt ka ngaihtuah. Apuia nen khan khawlo takin lo awm ta se tiin an thlalak zawng zawngte kha ka mitthla lêt a. Ka dawhtheihna in a tlin ta ngang lo. Tho leh hluai in midang ngaihtuahna tùr pawh dâwn lo chuan ka car dahna lam ka pan ta miah miah a. Ka dawk chhuak nghal zawk mai.
Minute reilotê hnuah chuan Nunhlimi te inkawtah ka ding leh ta rân mai. Ka inngaihtuah kual nasat lutuk chuan che thei lovin ka awm leh dâwn a. Ka rilrua awm ang ang chuan ka che chhuak ta pawp a. An door bell ka hmeh dâwn chuan tlêmin ka tîm ve hman chawih, mahse rilru tipaukhauhin ka hmet lui ta tho a. A vawikhatna ah chuan tuman min rawn chhâwn lo. Ka hmet nawn leh sak a, ka nghah deuh hlek hnù chuan thophang tih hriat zet hian Philip-an a rawn hawng ta a. A hnung deuhah chuan inring deuh hian Akimi a lo ding ve bawk a. Min hmu thut chu an hamhaih dûn ngang mai. Za lo zetin ka lo ṭhen suk ringawt a.
"Ehee...Hluzuala chu..." Philip-a chuan a ti hluai a, pehhel kual lovin "Nunhlimi a lo haw tawh em?" ka ti nghal tawl a. Ngaih ṭhat hmêl zân lo chuan "Haw tawh e" a lo ti ṭha ve mai a. Ka thaw nghal huai mai, Apuia nen an awmdan tur ka ngaihtuah khan ka ngaihtuah thui hman lutuk. "A ṭhat chu, ka kal leh tawh mai ang" lâi zet hian ka ti a. Kal lehnghal mai ka tum lâi chuan "I be duh em ni?" Philip-a chuan a rawn ti leh hlauh a, ka hawi lêt rang khawp mai. "In phal em ni?" ka ti hluai a, ka lâi huih mai, Philip-a pawh chu a nui tawp ringawt. Ka awmdan hi a atthlak tih bâk sawi tùr ka hrelo.
Ka inthlahrun leh deuh avang chuan "Aaa...ngawi rawh, a ngai lo, a mu tawh ang. Naktuk zanah ka lo kal leh zawk dâwn ania. A rawn haw tawh tih ka hre tho a, a ngaih ṭhat thlâk e, a pawilo" ka ti sawk sawk ta zawk a. Biak chu ka duh ngei alawm, mahse a chhûngte hmaizah hi a na ve tlat. "I ti takzet maw?" Philip-a chuan thutak zet hian a lo ti sup a. A inhawng hlê tih ka hrethiam ve mai a, chuti na nâ nâ chu biak loha tlâk ka ui leh deuh bawk si. "In phal chuan biak chh ka be duh a" ka ti leh lawi a, ka awm dân hi nakinah ka la in zahpui dâwn tih ka hrechiang lutuk.
"Akim, Nunhlimi chu va kohsak la, inbe rawh se a pawimawh hmêl emai" a tih leh tâkah chuan ka zâm leh deuh bawk sia. "Aaa...ngawi rawh, a ngai kher lo mai. Min be duh lo vang, chuloah zanlai a ni tawh sia, a mu tawh ang" ka ti leh nawk nawk a. Hmeichhia ang maia ka zakzum kimki vêl lutuk chu ka inten lutuk. Mahse hetianga awm hi mipa tán pawh a lo theih lutuk anih hi ka ti ta! Ka confi thlawt lo anih chu!
Philip-a chu a insûm zo ta ngang lo aniang, ka zahna tùr pawh ngaihtuah zo ta lo chuan a nui chhuak huk a, Akimi pawh a lo nui dir ve tlawk tlawk mai. Ka awmdan hi midang awm dân ni ta se keipaw'n ka nuihzat ve tho ang. Ka dem miah lo. Mahse a tawngtu nih chuan zahthlak duh tak a ni ringawt. Lài deuha ding ngáwi reng chung chuan ka lo ṭhen ve sak sak ringawt a, ka mãwl hmêl ngawtin ka ring.
Chutah Philip-a chuan thutak deuh zawk hian "Hluzual, thil dang ngaihtuah kual lovin i biak duh leh duh loh sawi tlang tawp rawh" a ti leh ta a. Ka pha duai duh bîk ta lo law law "A rem chuan ka be duh khawp mai" ka ti ve ta sup a, ka awmdan pawh a pangngai ve thei chauh a ni. Inchhungah chuan min luh tîr hmasa tê tê a, Philip-a chuan Nunhlimi room kawngkhar chu va kikin "Mate...i mu tawh em?" a va ti a, Akimi erawh an room lamah a lêt leh tawh. Rei vak lovah Nunhlimi chuan a room kawngkhar chu a rawn hawng ri ta khep a, ka ṭhutna aṭang chuan ka lo melh ve reng a. A mutkawr pan thler nen a lo ding tau mai. Min rawn la hmu mai lo lehnghal.
Philip-a chuan "Hluzuala a lo kal a, inbe rawh u" tiin ka ṭhutna lam chu a rawn mitmei a, min beisei lo tih hriat zet hian Nunhlimi chu a lo phâwk ngang mai. A hmêl landan aṭang chuan a la muhil bîk lo tih ka hre thei mai. "Ka mut san ang che u aw, lo inbe rawh u. Mate, kawngkhar kha khãr ṭha leh la aw, pangngai takin in inkawm dâwn ania" ti leh sawk sawk in Philip-a chuan an room-ah min luhsan ta daih a. Nunhlimi chuan min la melh nasa ngang mai. "Eng nge i lo tih?" a ti hu a, a room kawngkhar bulah a la ding reng a, keipawh an ṭhutkhawmna lamah ka lo la ṭhu reng bawk a. Kan awmna chu a inhlat angreng khawp mai.
"Ka be lawk duh che" ka ti a, a mitmeng chu ka chhiar thiam lo "Khawngaihin" ka ti leh sup a, a ngawih vang vang hnù chuan "Lo awm rawh" tiin a room lamah chuan min lêt san leh ta daih a. Rei vak lovah chuan a kawr pangngai nen a rawn chhuak leh ta a. Ka lo thaw huai mai. A hma aiin a hmêl hmuh pawh a nuam ta deuh e.
Ka ep chiahah chuan rawn ṭhu in "Eng nge i hriat a?" a ti nghat a, a làwm lohna chu thup a tum eih lo. Ṭawng tuma ka kâ ka àn zuau lai chuan a phone a rawn ri a, a la hmasa tê tê a. "Aw Apui, ka buai lawk a, ka hman hunah ka lo call back ang che" a tih chuan ka sa phat mai. Phone chu a dah zui nghal a, ka thinrimna chu ka thup hman lo. "Lalnunhlim" zawi si, vin si chuan ka ti sehchilh nawk a, a awmdan aṭang chuan min tham miah lo tih ka hria. "Khapa kha i eng nge a nih?" ka ti fiah fak a, ka âw chu a rum ṭha khawp mai. "I lo buai ve na tùr a awm lo" tiin min nuih sak a, min nuihsawh ni berin ka hria. "Khatiang zawng khan min nawr miah suh" ka ti kha fak a, hetiang zawng khera intih hi chu ka duh miah lo tak tak.
"Ti lo thei lova min nawr lui tu chu nangmah alawm. Ka nun aṭang hian kalbo vang vang la, thil chu a pangngai a ni mai" a lo ti ve nghat a, a làwm bîk miah lo. Kan ngáwi ta vang vang a, kan mitmeng erawh a rum dùn ngang mai. Luhlul leh luhlul kan inbia a ni a, hmasawn a har. Kei erawh ka thiam loh zawk a ni tih hria in vawi tam ngaihdam ka dil tawh a, ka tlâwm ngun tawh viau paw'n ka hria. Mahse amah berin hetia min tih tlat si chuan ka tán pawh chêt lâk a harsa ve êm asin.
"Mipa dang hmanrua a hmangin kei hi min bânsan ang maw?" ka ti ve ta kher a. Heihi a rilru chu ni ta berin ka hria. Apuia hi a duh lo tih ka hrechiang lutuk tlat. Apuia rilru hre ve kher lo phei ila chu an pahnih awm dûn hi engah mah ka ngai lo vang. Mahse a rilru ka hre vek a, thîk lova en liam tawp chu ka thei lo a ni. "Apuia hi ka hmanrua a ni lo" a lo ti ve hlak a, "Pha duh suh, i rilru kha ka hmu tlang vek alawm. 'Ngaihzâwng dang ka neih chuan min tibuai peih tawh lo vang' tih rilru kha tun aṭang chuan paih bo hmak ang che. I laka ka tlàwmna hi ka tán chuan hnehna tùr a ni. Ka thil tihsualte avang khan hei aia tlâwm pawh hian ka la awm thei. Mahse ka hlauh ber zawk chu i rilru len lutuk na lamah hian nangmah zawk hian i tuar ang tih ka hlau mai chauh ania" ka ti duah a. Ka thusawi tîr lam chu khauh viau mah se a tàwp lam erawh a dam dap mai.
Nunhlimi chuan min melh ta ngar a, "Chutiang a ni lo" ti a phat buai chu a tum ve tak na in sawi zui vak ngaihna a hre bîk lo. "Kan inkâr buaina chu kan inkâr ni sela, kan pahnihin chingfel ang" ka ti leh sup a, ka âw a ngenna chu a hai hauh lo vang. "I pawi ka sawi a, i rilru ka tina hlê tih pawh ka hria. Ka dik lo va, ka thiam lo takzet tih hi ka pawm thlap. Thiam thu sawi tùr pakhatmah ka nei lo. Mahse chân che ka duh lo, midang ta tur anga ka ngaihtuah châng che apiangin ka nâ a, thâwk ngaihna ka hrelo ṭhin. Ka tana i hlut zia leh ka duhna che hi duhna satliah anih loh zia fiah tùrin chance vawikhat chiah min pe leh rawh, ka bawhpelh hauh lo vang. Khawngaihin..." ngenngawl zet hian ka ti leh duah a. Tuna ka thusawi hi a pawm lo anih chuan tihngaihna ka hre tawh bîk lo.
Nunhlimi chu a lo thaw halh a, min melh deuh vang vang a, min lainat hmêl ve ta deuhin ka hria. A tàwp a tàwpah chuan "Inngaihtuahna hun min pe rawh" a ti thei ta hrâm a. Chance min pêk leh pêk loh tùr pawh a la ngaihtuah chawp dâwn chu a ni sia, a kawng a va la thui tak. Mahse a pawi lo e, ka thaw huai tho mai. "Ka lâwm e" ka ti sup a, a thinlung kawngkhar tlêm tal pawh ka hawng leh ta chu lâwm lohna chî a ni lo rêng rêng.
"Ka mu duh tawh" a rawn tih tâk sepah chuan ka tho ta hluai a, zàn a rei tawh tak alawm. An kawngkhar thleng min thlah ve ta thlap a, ka kal mai tùr chu thil hrechhuak thut in ka lehhawi leh vut a. A ngaihna hrelo fe a min lo en lâi chuan "Apuia kha i call back dâwn em?" ka ti leh tawl mai. Nichina an inthlah dân kha ka la theihnghilh reng reng hlei nem. "Kha chu ka thû ni rawh se" Nunhlimi chuan a lo ti nghet charh a. Ka melh rûn rûn a, min lo melh ve kal bawk a. Tun atân chuan a lakah hian thuneihna pakhatmah ka nei rih si lo va, tih theih ka nei lo. Mahse "Be tawh kher lo la ka ti" chu ka ti leh hrâm a, ka thîk zia hi ka thup sêng thlawt lo a ni e. A hmui a lo ti sawi duh lêk chauh a, a thin ka tih rim leh hmaa haw vat vat chu a ṭha tawh zawkin ka hria.
Hlim ru zet, ngaih ṭha zan si lo chuan ka haw ta a. A be zui ang em aw tih ringawt in ka ngaihtuahna a luahkhat leh tawh. Ka vei ngang aniang, "Be tawh suh aw" tiin ka va message leh hram a, a seen ringawt. Min reply chu ka ring lo hrim hrim, ka ring sual lo bawk.
Pu Liana thihna avang chuan office kan khãr a, a vuina lamah chuan kokim takin kan kal ve hlawm a. Ka beisei loh zetin Nunhlimi ka hmu ve tlat. Hmeichhia, ka la hriat ngai miah loh nen an lo kal dùn a. Ruang kil ve chiah lo mah se ṭap uar deuh an lo awm apiangin a rawmawl ken lai chuan a lo inhru veleh zeuh ṭhin a. Kha leh chen kha Remi nen ṭhian ṭha tak an lo ni tawh a, Pu Liana hi pa ṭha tak a lo ni bawk nen an innel ve hman viau anih ka ring. A rawn ngaih pawimawh ve tlat dân aṭang hian ngaihdan ka lo siam ve tawp. Remi a ṭhian anih vâng chuan a lo kal lo tawp ang.
An vui thleng chuan an awm ve reng a, mahse thlalak dâwn vêl lai tak chuan an lo petek hman daih. Ka mitmei ve reng kha ania, an lo kalbo hman chu mak ka ti khawp mai. Ka zawng kual ngial a ka hmu zo tawh lo, midangin an hmuh hma in an haw ta daih anih ka ring. Thlalak lai chuan ka la awm ve reng a, keini paw'n kan thawhpui a nihna ah kan lâkpui ve a. Kan office-a thawk chin ho chu kan kal kim viauin ka hria. Thlàna an inphurh liam thleng chuan ka awm ve a, thlànah erawh ka zui ve ta lo law law. Min hmuh apianga Remi inla khawngaihthlâk hmêl kha ka hmu peih tawh thlawt lo a ni.
Mipa tán chuan ei loh leh ngei záwng neih te hi pà lo ka ti ṭhin a. Mahse mihring kan lo nih ve zia chu! Ei loh leh ngei záwng nei thei, ning thei, mood chhe ve thei tak kan lo ni reng a. A lo intih pà viau theih bîk miah lo. Hmeichhe kutthlâk te hi a mâwi lo va, tih sa loha ngaih a ni. Chutihrual chuan mipa kutthlâk cho chhuak zawnga ṭawngkam chheh chîng hmeichhia hi an lo awm ve zel bawk si. Kan hahthlak tlâng a ni e.
Zanah chuan ka va lang veleh hrâm a, khawhar in lêng pangngai ho haw huna haw tum ni si kha min lo chelh ve tlat a, ka tum aia rei ka awm phah. Min lo be duh ve bawrh bawrh hlawm si a, pangngai tak chuan ka chhâng ve hlawm a. "Remi te nen in lo inkawm veleh zel a, kan chhûngkua ah chuan i mikhual lo ania" an tihte chuan ka nui ringawt. Remi hian a chhûngte bulah eng ang chiahin nge min lo sawi ang aw ka ti hial a ni. Amah ber lah chu a zâm map lo, a chhûngte min biak kârlakah chuan min nêl hmêl zet hian min lo be ve sek a. Ka hnê ngawih ngawih a ni tawp mai. A chhûngte chuan inhre ṭha deuh angin min hria se a duh ni berin ka hria.
Dár 9 velah chuan hna thil chhuanlam in haw ka tintuah ta daih a. Remi lah chu a bengvar nasa mai si, ka motor dahna thleng min thlah ta vêl anih chu! "Lo lêng leh rawh aw U Hluzual " a tih leh zet chuan ka ngai thei ta ngang lo va. "Remi, lemchan kha sim teh. I ti mah mah a ni, ka kham khawp mai" ka ti ta khawl a, a chhûngte'n min hmu pha ta lo bawk a, a zahna tùr leh mualphona tùr pawh ka dâwn pui zo tawh lo. "U Hluzual, hun kal tawh chu hun kal tawh a ni a. In tán buaina thlen ka tum tawh hran lo, pangngai takin ka be ve mai che alawm. Rilru kàwi ka pu tawh hauh lo ania" a lo ti zung zung a. Henu hi a zak map lo.
"Tun atana i tih theih ṭha ber chu kan hlat thei ang bera awm hi a ni mai" ka lo ti leh hmiah. Tuna a awmdan vêl pawh hi lemchanna bâk anih ka ring lo. A hma khan ka lo ring sual tawh a, Nunhlimi nen kan pahnih tán a ṭha lo tih hi ring nghet hmiah mai ila. A thang kamah ka in âwk lo ber ang. Ṭawng a tum leh lai mêk chuan ka kut ka lo phar hluai a, "Engmah sawi tawh suh" ka ti a, Motor-ah ka luhsan hmiah. Dèk pawh a tih leh hma in ka dawk chhuak nghal zawt mai. Hmeichhia ah hian zak theilo fe fe an lo tam dâwn anih hi.
Tlãi deuh tawh mah se Nunhlimi te ina kal hrâm chu ka la rilrûk fan a. An inkawtah ka ding chiah tihah chuan ka phone a rawn ri a, Nunhlimi a ni. A engamah hma in a hnen aṭanga phone call ka dawng chu ka lâwm em em tawp mai a ni. Ka lâk rual chuan "Hello" pawh ti hmasa lovin "Aw Nunhlim..." ka ti zâng nghal vah a. Ka rilru hria ni àwm tak chuan "I lo lêng dâwn em?" a rawn ti khauh a, "Ka tum a hei..." ka tih lâi mêk chuan "Zanin chu lo lêng suh, chumi rawn hrilh tùr che chuan ka lo call che" a rawn ti ro halh a. Lêng lo tùra han intih tawl mai chu ka hamhaih letling khawp mai.
"Timaw?" ka lo ti sup a, ka thin a phu dup dup mai. Nizana a inngaihtuah tùr thû a sawi kha a rawn sût leh mai ang tih hlauhna chuan min tuam nghal tup tup mai. "Inah ka awm lo va" a rawn ti sep a, "Khawnge i awm?" rang zet hian ka lo ti ve vat a. Apuia bâk rilruah a awm leh tawh lo. Mahse Nunhlimi chuan "Ka û te in lamah ka riak phei daih a" a rawn ti ṭha ve mai a. Ka thaw huai mai. "Min ti mangang hman alawm le" ka ti ringawt a, Apuia nen an awm dun lo ka lâwm lutuk avang chuan ka ṭhen suk a, ka hahdam ngang mai. "Engvang ngawt chuan maw?" a rawn ti ha a. A hrethiam pha ve tawp nang.
"Tui deuhin mu rawh" tiin phone chu ka dah ta daih a. Ka car seat chu thatchhe zetin ka ngheng nghal vang vang a, ka hlimna hi a va'n ho tak. A chinchâng min rawn hrilh thlap te chu lâwm tak ka ni. Biak zui zel ka châk a, a hun hman dân te zawh a, thu ho deuh deuh sawipui leh tawh ka châk. Mahse chin tâwk ka hriat a ngai. A inngaihtuah chhûng hian atân hnawksak a awm ka duh lo. Mahse ka tel lova awm theih erawh a thiam hauh tùr a ni lo.
Ka ngaihsakna hi a tán ninawm a chan ka hlau a, ka thlah zalenna hian ka tel lova awm theih a zirtir ang tih ka hlau tho bawk si. Hringnunah hian zir tùr a lo va'n tam tak!
"I ta tùr" ka khuma Paper Bag theh thlâk pah chuan a ti a. Kimtei chu ka lo melh hu, ka hnathawh lai chu dahin ka khuma a thil dah chu ka hawng vat a, Tshirt leh mawza a lo awm. "Min leisak maw?" tiin ka ṭhen suk a. Vawiin an college chawlh a ni bawk nen an ṭhianho in an bazar a, thil min lo lei ve ngei anih hmêl. Tshirt chu phawrh chhuakin ka inteh chhin vêl a, ka ha tâwk viau dawnin ka hria. "I va nula ve a, thil te min lo lei ve a" ka tih chuan "Ka leisak che a ni lo" min nuih var var chung hian a lo ti a, intithei deuh hmêl hi a pu. "Mawi i ti em?" a tih leh chuan " Mawi khawp mai, mahse khawi aṭangin nge?" ka tih chuan a lo nui deuh rah rah a. "Thilpêk i dawng anih kha" a ti liam puat a. Tshirt te chu min rawn teh nawn chhin vel a, a lungawi hmêl khawp mai.
"Ha chhin lawk teh, thlalak ka thawn duh" a tih chuan rin dân ka nei deuh. "Nonoi a ni em?" ka ti sup a,"I va'n hre thei, i ngaihtuah ve deuh ani chiang" a lo ti nghal zat a. Ka phun nghal hluk mai, ka thinrim vang pawh a ni chuang lo. Mahse ṭul lo ka ti êm a ni. "Kimte..." ti a thil awmzia sawipui ka tum lai mêk chuan min lo pawt chat nghal a "Ka hria...i sawi tum ka hre vek. Ka hriat hnù bâk i sawi leh dâwn lo. Mahse u, a thilpek tal hi chu pawm sak ve rawh, engmah phût lêt a nei lo. Thilpek pek ve che hi a tumna a rei tawh a, a zak zel a. Mahse vawiin na nâ nâ kha chu a zak duh lo lui ve a. Tshirt te hi a thlang uluk teh ania aw. Thil thlawn pêk hnar chu a malsawm lo, laksak ve mai mai rawh" a lo ti zung zung a. Nonoi buaipui hi a khirhkhan zek mai. Ka naui lah hian a lo sawi awlsam ṭhin mai bawk si a.
"Hak sak chhin lawk teh" tiin min tur sek a, "Beiseina siamsak ka duh lo" ka lo ti ve tlat thung a. "I lakah hian engmah a beisei lo, thilpêk pêk ve hrim hrim che a duhna a rei tawh ka tih kha. Eng nge maw i inlâk ve viau le i sual lutuk. Midang hlimna thlen hi a harsa lo, i hâk sak chuan a lâwm ve dâwn asin. Chuloah, a leisak che ani tih i hriat hma zawng paw'n i lawm em kha" Kimtei chuan a lo ti tán tán a. Ka hnathawh a rawn ti sâwt lo vek, min tur sek bawk si ka hâk sak ta poh a. Thlâ pawh min lâk sak tâk kha, a pawi thui lutuk lo tùrah ka ngai lui hmiah mai.
Pu Liana boral aṭang khan office lamah kan buai leh ta bawk nen Nunhlimi te ina lenna hun mumal pawh ka nei leh thei ta lo va. Phone kaltlang erawh chuan ka be ve reng a, a luhlul a la chhuah ve tlat bawk nen a rùl tâwk bâkin min chhâng ngai lo. Biak zui chiam hi châk ṭhin mah ila a nin chin a thlen hlauvin ka insûm hram hram ṭhin. Apuia nen an boruak pawh a reh ve ta deuhin ka hria a, ka number pawh a Save leh tawh a, ka tán chuan a lawmawm rih viau.
"Eng nge in an tawh?" Lalnuni hnen aṭangin message ka dawng ve teh mial a. Kan chanchin a lo la ngaihven ve reng chu ka lâwm. Nunhlimi nen an lo sawi dûn ve ngei ṭhin bawkin ka ring. "A hma ai chuan a zia, ka lâwm. I lo sawipui rah aniang" ka va ti ve a. Sawipui lo sela chu Nunhlimi hi a la sak ṭalh ṭalh viauin ka ring. Hmeichhia chuan an ṭhiante hi thurawn an lakna tam ber ani tlat a. Mahse ka beisei loh zet hian Lalnuni chuan "Engmah ka sawipui tak tak hman hlei nem. Ka sawipui dâwn dek dek a, 'U Hluzuala chungchang ka sawi peih lo' min tih khalh zel a. Chuvang alawm in chanchin pawh ka lo zawh che" a rawn tih chuan mak ka ti angreng khawp mai.
"Ka message te a lo chhâng ve tawh sia, i lo sawipui tùrah ka lo ngai mai a" a ngaihna hrelo zeta ka va tih leh chuan "A teuhlo mai. Lalnunhlimi hi a thû tê bâkin a kal ngai lo. A rilru ang anih loh chuan eng ang pawhin lo sawipui ila awmzia a awm lo vang. Fîm takin thil a ngaihtuah a, a duh dàn ang hian a che mai zel. A rilru len zia chu " a rawn ti duah a. Anih ka ring, sawipui mai maia kan inkar hi fel thei ni ta se Msa pawh khan min pui ngei ang chu mawle. A mizia a lo hrechiang khawp anih hi. "A...engpawh nise ka lâwm " tiin Lalnuni message chu ka va reply hrâm tho a. Min puih a tumna hrim hrim pawh kha ka lâwm tawh.
Kârtàwpah chuan lenna hun ka nei veleh thei ta hrâm e. "Ka lo kal ve ang" Msa message ka hmuh rual chuan ka chhâng nghal a. "Keimahin ka kal ang" ka ti hmiah, a lo awm ve khan ṭangkaina a nei ngai lo emai. "Eheu, kan va pà sâwt ve" min rawn chhan lêtna nghal zet avang chuan ka phun hluk a. "I ṭangkai lo thei emai" ka va ti kher a. A lâk nat viau ka rin laiin "In inkâr ania, ka ṭangkai ve chhan tùr awm hek lo" a rawn ti duh lêk chauh a. Mahse a sawi tum chu ka hrethiam. Mi pahnih inkâr chu mi pahnihin an chingfel mai tùr ani tih ngaihdan ka neih kha min ṭawmpui niin ka hria.
Nunhlimi te in ka va thlen chuan an lo awm kim leh ṭhap tawh a. Philip-a te nupa chu hman zan aṭang khan pangngai taka ka vawikhat hmuh lehna ani a, ka la lai huih mai. Mahse anmahni zawk chuan an hrethiam aniang min lo be nghal bawrh bawrh a, ka lâi rei lo. Duatpuia'n min lo bawh ve nghal huam huam bawk nen zahzel ah a ṭha phian mai. Kan titi leh bawrh bawrh a, Pa Ṭhaa hriselna lam chu a lo ṭha leh vak tawh lo va. Mahse ngaihtuahawm lutuk erawh a ni lo. A Bp sâng vanga an lo buai lâi a ni a. Ṭhat lam a pan leh deuh tawh zawk a ni àwm e. Nunhlimi be reng si khan an hriselna chungchang ka lo zâwt ngai miah lo va, a lehpekah chuan a nacháng ka hre tawh ang.
"Kha..." ti sup in ka chocolate leisak chu a hmazawna dawhkanah chuan ka theh thlà a. A chhûngte an mu fel vek tawh a, kan pahnih chiahin kan awm leh rân tawh mai. A hma aṭang tawh khan eitur neuh neuh kensak hi ka chîng a. Mahse chocolate tak hi chu ka vawikhat leisakna a ni. Hmeichhe hovin an lawm tih ka hre ve kar a, a hma zawng zawnga leisak nacháng ka lo hre miah lo kha mãwl ka inti hnuhnawh viau. Inngaihzawnna kawngah hian zir tùr ka va'n la ngah tak!
Nunhlimi chuan a lo la ve mai bawk a, "Ka lâwm e" a ti sep a, kan awmdan chu a lài. Kan inṭhen chiah si lo, inngaizawng angin kan awm tawh chuang bawk si lo. A hma anga inhau thinrim a, in titau lah kan ni tawh bawk si lo. Ngampa viau tùrin kan inkâr kan la chingfel lo va, ṭit viau dawnin hmasawnna a awm dâwn chuang bawk si lo. A mipa zawk hi ka chêt a ngai tih ka hai lo. Mahse engtin nge ni ang?
__________*__________*_________*________
(Zanin chu in ngaihdàn hriat a va châkawm ve, comment lama in lo sawi ve liam liam te hian a nuam ve a
)Show post links
Top