STORYFB.COM

LET's LOVE AGAIN


By Ziki nu


Chapter-23




Ni a ral ve bek bek reng a, harsatna lian tham em em tawk lovin December thla kan chuangkai a, mitin mai chu chakkhai zawngin an phe sung sung a, U Mama pawh naupangho thil tur te leiin a rawn zin thla a, kan khaw lama krismas hmang turin a ruala haw ve ka tum bawk.



Tunkar chhung chauh school kan kal tawh dawn a, kan tum dan chuan inrinnni ah kan khaw sumo in kan haw dawn a ni.


"Naupang thuamhnaw bak chu thil dang lei ngai pawh a awmlo, hei hi chu i mamawh lei nan i hmang dawn nia" ka pawisa pek chu en vung vungin a ti a, hei hi ania ka u Mama ka huat thin chhan, a chawm leh enkawl tak meuh meuh ka ni a, ka laka inthlahrung turin ka duhlo.


"Naupangho thuamhnaw man chu ka tumsak ang ka tih kha, tunah chuan hlawh ka nei ve tawh a, ka tihsak ve tur alawm" ka tih pawh chuan a la duh tlat lo a, a ruka eng emaw tihsak mai chu ka rilruk ta zawk.



Zanriah kan ei laiin in chung lamah thawm ri bur kan hria a, U Mama che phut chu lo khap vatin "Ngaichang phawt ang, an tih loh dan pawh a nilo" ka ti a, a ni pawh a rawn thu thla leh riai riai mai.



Thawm chu a reh vung vung hnuah bungbel paih darh thawm ni âwm tak hi a rawn ri leh bur a, kan misuala chu a rui chhe leh tawh hle anih hmel e.



Thawm dang kan hriat zui tak loh avangin kan ngaihven duh ta lo a, ka u Mama chuan zawhna a ngah khawp mai.



"A bialpa nen khan an la inkawl reng a ni maw?" a tih chuan bu nghatin "An rui reng a, tikhian an ruih nasat leh an thawm a ring a ni mai, U Dintei lah khi han titi pui dawn pawhin min do tlat a, min hua a ni ber ang chu, U Mazari takngial pawhin a zilhhau thei tawhlo" ka ti hap a, "Jacoba tan chuan awmna chi a nilo a nih chu, a pawi mang tak e, a chhungten an hmangaih tehlul nen mipa laktlak loh lakah a intichhe zo dawn chu a ni ber a" ka u chuan a ti ve sup sup a, ngaihtuah zui ni âwm takin a ngawi ta vung vung bawk nen ka sawipui zel duh ta lo.


An zu rui thawm a nat thin êm avang hian kan in luah lai neitute pawhin an kam khat fo a, 'kan bengchheng tawhlo ang' an tih hnu lawkah an ri leh bur thin a, an awm rei thei tawh pawhin ka ringlo.




Zanah Rintea leh Richarda te an rawn leng a, Lawmtei te exam lai a nih vangin tunlai chu a thianpa ngawt hi a rawn zui thin a, a lunglen tawh thu hi a sawi ve bul bul zel.



"In khuaah chuan i haw ve dawn ta em ni?" tia Rintea'n min zawh chuan lu ka lo bu nghat a, "Ka nu boral kum a nih bakah kan haw ve theihna hun remchang ania" ka tih chuan a sawi buai lo na in a huphurh deuhin ka hria.


"I lung a leng lawk chiang mai" tia ka fiam chuan a lo kiai l ve suk a, "Ka lung a len viau chuan ka rawn hruai daih ang che" a ti chu ka nerkhum nasa mai.


Richarda chuan kan khaw awmna lam te min zawt ve luam a, kal ve a chak thu a sawi chuan lo zin turin ka lo sawm mawi ve a, a phur leh ta lutuk chu Rintea'n a lo khap leh rih a, kan hahthlak tlang thin khawp mai.




U Mama nen pawh an titi ho thei phian a, thingpui te in ho in dar 9 velah ka u chuan min mutsan a, a mut hnuah pawh rei deuh chu an la leng.





"Naktuk zanah ka thiante nen kan jam dawn asin, I lo kal ve duh em?" Richarda phone hmang melh zawk pahin ka bul ami chuan a ti sup a, "Nangma jam room ah maw?" ka tih chuan bu nghutin "Sawpa pawh saw a lo kal ang" a thianpa thlek zauh chung chuan a ti leh a, zan lam a nih chuan ka hman ve hun a nia, ka hnial lem lo.


Richarda phone hmang zo rawn let chu khi vur vur hian "A pi phone in min rawn be ru lawk a nih kha" a tia, a nui keh hui reng chu keinin kan lo nuihpui ve leh chhawng a, "Naupang ngaihzawn chu" ka bul ami in a lo tih pawh chuan a haw phal tawhlo, "A lawmawm thei ania, a pa in phone a laksak a, an exam zawh hun a nghahhelhawm khawp mai" a ti niah niah a, kan nui kan nui mai.




An haw dawn chuan kawngpui thleng ka thlah leh a, ka let leh lam chuan ka in chungte thawm a nat deuh vangin an kawngka zawnah ka ding leh rih a, thawm chu ka ngaithla uluk viau na in eng nge an sawi ka hre hleithei lo.



Mipa aw thum bul bul chu ka hre ngei mai a, a thusawi hriat tuma hnai lehzuala ka beng ka dawh laiin kan misuala chuan kawngkhar a rawn tlawh hawng bur a, ka inring lo bawk nen ka bek chu a vaw thlawp a, a ri ring viau nge nge.



Ka indawm ngawih ngawih lai chuan thinrim aw khur hluk hluk chungin "Nang pawh hi ngawi rengin i hnawk" tih leh ka banreka min vawn a rual a, ka tang hmanlo. Inchhungah chuan min kai lut dawt dawt a, zu thing rim ka hîp luh rual chuan ka ner zui nang bawk.



Chhuatah min theh thla a, ka hmazawna nikhaw hreloa lo let ngât U Dintei chu sawi harh tumin ka pan hnai a, mahse engmah ka tih hma in misuala bawk chuan ka samah thamin min pawt let dawrh a, U Dintei a biak theih tawh bawk silo a, kan dinhmun chu a chhe viau tih ka hai lo.




Ka kekawr ipte chu ka zen rawk rawk a, ka phone ka keng chhuak lo tih ka hriatchhuah rual in pawi ti lutuk in ka then chiam bawk.



"Min thlah vat rawh misualpa" ti hlakin ka sam a thamna kut chu ka theih anga na in ka sik a, keia kuttin sei hlei lo chu a ni tan engmah a ni lo.


Ka sama la tham reng chung chuan min pawt tho a, ka hmai zawnah hnai deuha min en in min hnim titih a, a hmel leh rimchhe lutuk vang chuan ka luak lo chauh a ni.


"I va rimtui ve hmeltha nu" tih pahin min nuih sawng a, ka ten takzet.



"Min thlah vat rawh" ti lehin ka tal nghek a, chutih laia a hmel rawn inthlak hlawk vang chuan ka che lai ka tawp chiang hle bawk.


A hmel landan chu aw... Thinrim hmel lutukin min melh a, a beka thisen zam rawn pawng tawlh tawlh leh thlan fim rawn bawl tiam tiam atang chuan pawisak a nei dawnlo tih ka hre reng mai bawk si, ka hlauthawng a ni.



"Min thlah rawh"
A hmaa tah chu ka duhlo, Rintea awm se ka ti takzet a, he mihring lak atang hian min chhan chhuak se ka duh.



Ka hmai a rik thlawp rualin chhuatah ka let thla tawp a, ka biang thip lutuk leh sa huam huam vang chuan ka mittui ka dang zo tawh lo chiang hle.



"Ka lakah hian engthil nge i duh a? Engtinnge hetiang em em hian i nunrawn theih?" chhoh melh kar chung chuan ka ti leh tuar a, ka piah lawka let ngât U Dintei lah chu a rawn rum tuah tuah reng a, na a nei nge a rui pentawng pawh ka hre hrep lo.



"I laka ka duh maw?" tih paha min rawn hnaih lai chuan ka lo tawlh let ve rawk rawk a, ka hmaah tak rawn thu hniamin tenawm fe hian ka taksa chu a thlek kual a, "Khatiang khan min en suh" ti hlakin chil ka chhak zui a, a vawi hnih nan a thin ka tirim leh ta in ka hria.




Ka dar tawn tawnah dawmin min tung tho lawp a,engmah sawi lovin ka T-shirt hak lai chu a pawt tet nghal hmiah bawk a, ka rak chhuak chiang hle.



"Min khawih hlek suh" ti chul chungin a âwmah chuan ka nam nawk nawk a, mahse tha ah ka hneh lo em a, ka tang rei thei dawnlo tih ka hriatna chuan ka lung a ti chhe zual a, "Min tanpui teh u" tia ka au chhuak chu a kutphah hlai leh balh hmel em em chuan ka hmui a rawn hup bet hmiah bawk a, a beidawnthlak a ni.


"Aw rawl i chhuah leh chuan ka that ang che"
A mitmengah a thilsawi chu a tiduh tak tak dawn tih a chiang reng a, chuti chunga han au luih chu a finthlak loh hle ang.



"Mi... Min.. Min chhuah rawh" ka aw chu a khur nasa lutuk a, ka tawng chhuak thei meuh tawhlo.


"Ka chhuah dawn che alawm, ka duh min pe la, ka kaltir em em ang che" tiin w nui sawng reng a, Lalpa min pui hram teh.




Kawngkhar ri rawk thawmah chuan kan hawi rual zawt a, U Mama leh Rintea te rawn lan rualin keipawh min thlah hlawk a, chhuata ka thu hnawk chu U Mama'n min rawn pan hnai vat a, Rintea erawh thinrim hmai sen vekin kan misuala chu a rawn pan hnai a, engmah sawi lovin a hmaiah a hnek zui siah bawk.



Chhuatah thut betin a hnek zui mawlh mawlh a, tawngkam khat mah chhak chhuak lo va a chet danah a thinrim hle tih ka hrethiam a, dan tumna ka neilo bawk.






In neitute an rawn lang ve ta bawk a, Rintea chu hruai hrangin "Police hnenah kan pe dawn nia" an ti a, kei chu ka la khur zawih zawih reng mai.



Rintea'n min rawn hnaih ve rualin ka u Mama chu a ding chhuak ve leh a, in neitute nen chuan eng eng emaw an sawi ho a, kan misuala chu an dinchilh ran bawk.


"Hrep chuan leh.. A khawih che em ni?" ka âwm bawr ka bra chauh khuhtu awm chu en in a ti hluk a, chhang lo va ka lo tah vang chuan harsa tih hmel lutuk in a thaw chhuak hawk bawk.



A kawr hak lai chu phelhin min haktir sawk sawi a, ka ding tur te chu keimahin ka ding hleithei lo, ka tha a khur vek a, ka mittui tla reng chu a chhan ka hre lo.



"Ka pawm mai ang che" tih pahin Rintea chuan min pawm kang lawp a, keiin a nghawngah nghet deuhin ka lo kuah ve bawk a, kan chhuah dawn chuan "Lo awmpui tlat ang che" tia U Mama tawng ri chu ka hre hman bawk.



In chhungah lutin pindan lamah min luh tlang pui a, khuma min nghah rualin "Kalsawn suh" ka lo ti nghal thuai a, "Ka kalsawn dawnlo" tiin ka hmaah a rawn thu hniam zui a, ka mitah tak min en lai chuan tah inring rengin ka lo men leh pur tawh.




"Bawihi leh.. " ti hlukin min kuah leh ringawt a, ka tap leh ta.

Vawi leh khatah khatiang thil kha a rawn thleng thut a, ka hlau a, ka haw bawk a, ka thinrim tluk zetin ka rilru a na bawk.




Nghet deuhin min lo kuah let ve a, engmah a sawi lo, rei fe chu ka tah khum a, ka tha khurte a ziaawm deuh hnu chuan inla hrangin thawk ka la suai suai a, ka u Mama chu a la rawn let lo niin ka hria.



"Min hrilh teh, a khawih lo tak tak che tiraw" a tih chuan bu sawk sawkin "Lo thleng har deuh ula chuan... " ka ti a, mit chhingin ka thaw chhuak leh hawk thin, ngaihtuah pawh ka ngaihtuah zui ngam lo.



"Bawihte.. " ti dam thluamin ka biang a rawn dawm a, "Ka venghim tlat tawh ang che, kan innei tawh mai dawn em mawni" a ti chu ka melh vak a, sawi sual a inti leh deuh a niang a lu tuaiin a hawi sawn thuak a, eng nge maw a ngaihtuah ni.



"Innei i la chuan i kiangah ka awm reng thei tawh dawn a, tuman an khawih thei tawhlo ang che" a ti chu ka lo nui ve sak a, a mitmenga a inthiam lohzia ka hmuh avangin keipawhin nuam ka ti biklo.



"I thiamloh a ni miahlo ania aw, ka let leh lam khan thawm ka hria a" tiin thil thlen dan chu ka hrilh vek a, "Zawnga chu" ti hlukin thawh leh mai a tum a, kan han inpawt thu leh rih thin.



"An awm zui theih tawh ka ringlo, U Dintei kha engtinnge a awm le?" tia zawhna mitmenga ka en chuan a lu lo thingin "I u rawn let phawt rawh se" a ti sup a, kan sawi zui ta lo.



Ka thuamhnaw thlakna tur pawh amah vekin min laksak a, min haktir laia a rawn let leh chhan ka lo zawh chuan a lukhum a theihnghilh thu leh inchhunga an awm laia thawm an hriat thu te, U Mama'n ka awm loh thu a sawi vanga rawn tlan chho nghal an nih thute min hrilh ve mawlh mawlh a, a hun taka an rawn thleng chu ka lawm takzet.





U Mama rawn let leh chu a hmelah a thinrim zia a lang thei a, han biak pawh chu huphurhawm zawk tak a ni.



"A khawih na hman che em?" tih paha min rawn pan hnaih lai chuan lu ka lo thing mai a, ka hmai chu en vung vungin a inhum ruh leh ringawt thin, min beng na ve êm a, a sen hlarin ka ring.



"Engtinnge an tih dawn?" tia ka zawh chuan "An chhuak ang" a lo ti nghut a, U Dintei chanchin ka zawh ve chuan "A nu te ka be tawh, Mazari ka bia a, a rawn chho mekin ka ring, zan a rei tawh a, FIR thehluh êm chu tul an ti leh lo deuh a, nangman i duh chuan?" tia min râwn deuhin Rintea nen chuan min en tawn zak zak a, "A... Chutiang em em a ngai chuang lo, an chhuah chuan a tha mai alawm" ka ti chu ka bialpa ngaihdan a ni ve vaklo.



"I tan a himlo zel thei" a ti deuh tlat a, mahse an awm bo theih chuan min tihbuai zui zel ka ring biklo a, keini tan FIR han thehluh chu thil awlsam tak a ni biklo bawk nen tul ka ti lo mai zawk a ni.



"U Dintei kha a hliam na viau em mawni le?" ka ti leh chu ka u ngaihdan a ni vak tawhlo aniang "Ngaihtuah reng suh, na engmah a neilo,a zu rui chatthla a nih kha" ti hlukin min chhuahsan ta daih a, ka tim dai mai.



Ka samah rawn chulin Rintea chuan "Hlau tawh suh aw, engtinmah a ti tawhlo ang che" a ti sup sup a, "Riak ve mai la" ka tih chuan lo nui sukin "I u chu awmlo se ka riak em em ang, mahse I u a awm a, hlauh tur a awm tawhlo" a ti a, ka hnial lui duh biklo.



Zan dar 12 pelh hnuah a ni pawh chu a haw leh ta chauh a, inchungah chuan thawm a la awm nak nak reng tak na in ka u nen chuan kan chho ve duh tawh lem lo a, U Mazari âng hlak hlak pawh chu mut hmunah ka ngaithla reng a, eng nge a sawi hre thei chiahlo mah ila a nau chu a hausala nasa leh viau a nih hmel.



Ka muhil theilo a, ngaihtuahna a vahkual nasat bakah ka biang leh lu chu a na ngut ngut a, ka sam kha a tham nasa em a, min tham na vek ni berin ka hria.


Zing dar thum velah ka va tho chhuak leh a, vur la chhuakin ka biang chu ka han dep vang vang a, a nawmna vak pawh ka hre chuanglo.




Bathlarah chhuakin Aizawl khaw chhung reh ruih chu ka thlir ta reng a, he khawpui ah hian mihring tam tak kan awm a, kan dinhmun leh khawsak dan erawh a inang lo viau hlawm si.


Ngaihtuahna a kal thui a, a hmaa ka lo la ngaihtuah thlen ngai hauh lohte ngaihtuahin ka ding ta reng a.



Thenkhat ten harsa takin an damkhaw chhuahna turin an bei a, hrehawm tak chung pawhin anmahnia din chhuah an tum ve tang tang thin.
Thenkhat erawh hnathawh pawh ngailo khawpa nuamsa in an awm thung a, an chhungte thawhchhuah hmanga duh duh nei theite dinhmun hi eng ang chiaha nuam nge maw a nih ang le..

Thenkhat erawh mahni dinhmun pawh hre changelek lo va khawvel chen tum an awm ve leh thung a, he khawvelah hian damchuak tur chuan kan beih ve a ngai a, engtinnge maw mihring theih theuh mahni mihringpuite hmangaihna nei miahlo mihring hi an awm theih chu le...




Thil diklo tih kan hriat reng pawh kan ti duh zel a, pawisak kan nei lo a, hei hi Pathian min siamdan a nilo, engtinnge maw kan ram hi kan siamthat leh theih ang le? Engtinnge Pathian ram ni tura kan ram chhe tawh tak hi kan siam thar leh theih ang?






Cont....
Ka taksa lam harsatna vangin ka han chawl leh vang vang thin a, min hrethiam hram hram ru aw.. Ka theih chinah regular hi chu ka tum ve viau ania
Show post links
Top