STORYFB.COM

THINGTLANG MISTIRI LEH KEI

BUNG-33 NA (LAST)
ZIAKTU: KENNELLY BAWITLUNG


Nu Matluangite ina kal tur chuan kan insiam a, a thleng hmasa pawl niin chanchin hriain khawmihote pawh an rawn kal khawm ṭak ṭak a. Angaihi ruang an rawn zawn luh lai chuan a thihchhan hre ve lemlo ho chuan hmuhnawm thlir taka thlir chunghian an lo thlek deuh zuk zuk reng a.


A hriat lai reng leh hmuh lai ngei pawha diriam tak taka ṭawngkhum ṭhinte pawh an rawn lang ve leh nuk tho a. Phun ser ser thawm atam em avang chuan zai kan ṭan nghal vat a. Nu Matluangi nikhua hrelova mu ta erawh kha chu ala rawn harh lova, tikhan reilote chhungtal pawh a mut theih chuan mu sela. Nakina a rawn hmachhawn tur hi Nu tan zawng tawrh thiam a har dawn em asin.


Ruthi-i, Zopuii leh uckiteho eng eng emaw buaipuia an phet buai reng avangin Angaihi ruang, ṭahtu neilova mureng bulah chuan ka va ṭhu a. I hringnun hun chhung tawite pawh hlimtakin i hmangtluan ve thei ta si lova, ngai i awh huna hlimtaka i nuih leh theih hun beiseina nen lo thlirtu i nu pawh i ti hrilhhai lutuk a ni e.


Angaih, ka hmuh hmasak ber ni che a i nuihmel duhawm leh ngainatawm tak kha tunthleng hian chiangtakin ka la mitthla let thei asin. I mizia harhvang leh hmuhnuam takte, i rilru ṭha leh thianghlimte kha tu hian nge ngaina lo ang? Ṭhianṭha nih i tlin a, fanu nih i tlin bawk a. Ka laizawn ang maia ka en leh duhsak i ni ve asin. I chunga hetiang thil rapthlak a thleng ta mai hi Siamtu pawh ka dem lek lek ta mai.
Kan tana ruat erawh keini lei mi pumpelh leh thlak danglam theih rual a ni ve tawh si lova. Tunah chuan chawl la...chhumzinna piahlam ram, i dikna rahbeh a a awm tawhlohna hmun, diriamna leh mite sêlna ṭawngka tinreng i dawn tawh ngailohna tur hmunah chuan hahdam takin han chawl la...nangmah ngaia i sakruang piallei thima an zalh mai tur ngaia chelh tumtute erawh hi zawng, min han hre ve reng ṭhin ang che.


Mittui chu dan rualloh hian a dir thla zung zung a, Ramdinan Thlengthlengi a rawn kuah lut a, ka bula a rawn ṭhutthlak rual chuan a insut ri lehnghal hlawp hlawp a.
Enteh hei, i ṭhiannu pawh i tello chuan a mal dawn em asin...tih dun tur tam tak in nei a, inhmalam hun ngaihtuahin duhthusam tam tak hlen dun tur inneihte kha nangchuan i hlenpui thei tawh dawn si lo, i tih chak zawng leh duhzawngte amah chauhva ti turin i kalsan a, in bawm thuruk hawng hmasatu ni turin nangchuan i liamsan hma ta lutuk a ni e.


Reivaklo hnuah nu Matluangi chu an rawn kai lut a, a hmel a dang vek a, a mit chuan a fanu chu a rawn zawng kual nghal ruai a. Ka nu leh Thangtea nuin an rawn ṭhutpui a.
"Ka naute hian tihsual a neilo asin...tu pawi mah a sawi ngai heklo. Nitin ka hau a, a duhzawng leh it zawng takngial pawh ka leisak ngailo. Chutichung chuan, 'Nu, pawl 12 ka pass hunah chuan Nurse ka training anga, ka hlawh tam hunah kan pahnih chenna tur in nuam deuh ka la saksak che anga, dawr nghak paha nilenga kuhvarah i thel pawh a ngai tawh lovang.' A ti ṭhin asin. Ka neihchhun te meuh hi engatinge min laksak tak mai le...?" Tia nu Matluangi ṭah hla chuan lung a tichhe zual ting mai a.



A fanu ruang kianga mu chu lainat takin ka thlir reng a. "Bawihte, tun bak chu heti hian ka kuah lum thei tawh dawn si lo che a, nangmah chauhva lei hnuai vawt leh thimtaka i mu tur chu ka va han lainat tak che em...theih chang se i ruala kal ve daih tluka chak engdang mah ka neilo...ipa nen thih hnu piahlam ramah chuan in hanin hmu leh bik anga, i ngaih ṭhin zia i sawi fo kha...nuam i ti tawh dawn si a keichu min rawn hrechang ve tawh lo ang a...," tia phun sap sapin nu Matluangi chuan a fanu taksa vawt thler tawh chu tihlum tumin puan a sin ṭhat tur sauh sauhva. A ṭap lova, eng eng emaw sawiin Angaihi chu muhil biak ang mai hian a biak chhunzawm leh a.


U Ckiteho pawn rawn kil vein romawl pawhin kan mittui chu a hru hul senglo a ni ber e. Pialrala chu hmuh tur ala awm lova,
a ruang a rawn hmu anih chuan a tawp tih a chiang dawn em a a rawn kal ngamlo anih ka ring...


Khawvar hma deuhin Champhai lama nu Matluangi nuṭapate chhungkua leh laizawnnute an rawn thleng hlawm a, an unaunu awmdan an rawn hmuhchuan an ṭap nghal hawm hawm a. Nu Matluangi nuṭa, an unau zinga upa ber ni bawk pu Liana chuan kan lo buaipui vek avangin lawmthute chu min han hrilh hmasate te hlawm a.


Zingdar 6 velah pindana Bawihpuiate unau ka muttir chu Mimi-i nen kan va la a, loh theihlohna avang chauhvin kan haw chho ta rih a. Ramdina erawh engkim buaipuitu anih avangin a rawn haw ve hman kher lovang.


Ka ṭap nasa ang renga ka mit a thip hlur a, ka lu a na deuh bur mai bawk a. Taksa a zawi nghulh a, chakna reng reng ka nei tawh lo. Engkim chu a reh thlawk tlawk hi a ni ber mai.


Ka inphih harh hnulawkah Thanpuiin min lo call a, ka chhan chuan Pialralte chanchin min lo zawt a. Angaihi thihthu ka han hrilh chuan sawi tur mai pawh a hrelo a ṭhawng ve hle aniang. Engmah ka la hrilh ve bawk si lova atan chuan a ni teh thut a tiin zawhna tam tak pawh a nei ang tih ka hria, mahse tunah chuan chhang turin chakna ka nei thlawt lo a ni e.


"Nakinah tlailamah emaw ka lo be ṭha leh dawn che nia aw," ka ti ta ringawt a. "Awle awle chawlh hahdamte i duh ang. Angaihite chu aw...ava lainat awm ve. Nu Matluangi pawh ka lo ṭawngṭaipui ve dawn nia." min hrethiam tak chuan lo ti vein a dah ta nghal a. Nau ka hraipuar vek hnuah reilote mut hahdam tumin khumah ka tlu zal a, mitthlaah Angaihi alo lang zel a, muthilh pawh a har ṭalh mai a ni.


Chaw pawh tih tham kan ei hlawm lo, Pialrala awmna kan hre lova, Mimi-in biak tuma a call nawn tluk tluk pawhin a tlang thei lova. Ani hi Aizawl lamah alo zu chhuk thla leh daih em ni dawn le...mahse a bike kawtah a awm tho bawk sia...Harsa viau dawn mahse a tun bak chu a hmu leh thei tawh dawn si lova awm ve ngei se ka duhpui tehreng nen. Angaihi pawn Pialrala thlahliam chu a duh ngei awm si a.


Chaw ei khamah kan hanin tifel zung zung a, chhangchhe viau mahila a hun tawp thleng chu awm ve ngei ka duh.


Pa Chhuana leh nu Mapuiite nufa an rawn chhuk a, mi pawh an rawn kal khawm leh ṭan tawh a. Nu Matluangi chu a tho sawn duh lova, eng emaw tal han ei tura ka nuten an thlem ngial pawhin, "Ka naute hian vawt a ti palh ang," tiin a thohsan duh tlat lova. Ala ngai dawn ema tuman laksawn tinah pawh kan tin tawhlo. Lainat taka thlir reng bakloh chu tihtheih kan nei lo a ni e.


Pa Piangate chhungkua pawh an rawn lang ve ngei a, eng rilru nge an put ve ang tihte pawh hriat a chakawm viau mai.


Inchhunga ṭhut reng chuan nu Matluangi, nu lainat awm lutuk chu ka thlir lo thei ṭhin si lova hrawk hi a tawt ṭun mai a, zai pawh ka zai ve theilo. Ka ṭhu ngawi reng a, intih harh pahin pawnah chuan ka han tei chhuak a. Pawna Angaihi thlalak leh a hnuaia thu inziak an tar chu ka en vang vang a, 'Hmangaihdawngkimi, Kum-17, Thihni April ni 20' hetih hunlaite hian hetiang mai hian khawvel a chhuahsan ang tih a inring awm bik tawp si lova.
Hetianga hlimtaka a nui lai hmelte hi hmuh tura awm tawh dawnlo chu a ni mai si a, mitthlaah chauh kan hmu anga, rilru leh thinlungah a châm ve reng tawh ang. Ni e, kan hmangaihna dawngkimtu, keini chuan heleia kan damchhung zawngin kan theihnghilh leh tawh ngai lovang che.


"Khawnge Pialrala hi nizanah pawh a hmel hmuh tur a awm tawhlo, a chanchin i hria em?" Ramdina'n a rawn tihchuan chhanna mumal pek tur pawh ka neilo. "Inah a awm pawh ka hrelo, Tea teho zawh tur a ni a awmna an hriat tak mialin," ka lo tihchuan a hawi kual nghal thuak thuak a.


"Nakinah a inchhir tur chu amah tho a nia a tlai hma hian rawnin lan vat tur asin mawle...," a tizui bul bul a. "I chau lutuk ange aw a theih chuan reilote chhin sek kha a pawilo ang. Bawihpuiate unau an tlei em?" Tiin thudang a rawn sawi a. "Ruthiteho an awma ka chang manglo, kan han haw chhoh khan ka mu ve zawka rin ai takin ka ṭha, nizan ilo haw si lova hanin phih harhte i duh lo em ni? Saw an buai hmel vak chuanglova han haw chho lawk mai la," ka tihchuan, "Nia hanin bual harh zawk pawh a pawilo ang. Haw chho lovin Thangteate inah ka ti mai ang, inhaw chhoh chuan thuamhnaw min lo ken thlaksak ula, mahse tunah tut tut chuan angai kherlo a nia." tiin a mei zuk zawha Remateho bulah min pheisan leh ta a.


Thangteate inkawt maiah Kuang an siam a, Ramdina kutchhuakah ngeia an zalh tur chu amah Ramdina ngei pawhin a rin phak hi ka ring bik lo.


Ka va luh leh chuan Thlengthlengi ṭap chau pawh pindanah mu rih turin u Ckin alo hruai lut tawh a, nu Matluangi erawh nizana a awm ang khan a awm nileng a, Angaihi chu minung biak tak te hian a be sap sap reng a.


Ramdina inthlakna tur lak paha han haw chhoh lawk chu ka tum a, Mimi-i leh Ruthi-in min zui ve bawk a."Zingah chaw kan ei mumal bawk si lova chaw bar lawk ka duh," Mimi-i'n atihchuan, "Keipawh ka kua a ruak lutuk, insum a har sia ka lu te hi a na ber bur mai." Tiin naupawm chungin chokaah chuan an phei a. Bawihpuia chu an bulah ka dah tawpa, mahnia tal hrang thei tawh a ni bawka a chesual tur ven deuh kha a nimai.


Inhnuaiah Ramdina inthlakna tur la tur chuan ka chhuk nghal vat a. A tlai ve deuh tawh avangin vawiin khua a dur deuh bawk nen nizana ka kawr chunghak zangkhai ber chu ka ha a. Zunram thiara ka inphih fai hnua chhuah nghal mai ka tum chuan thawm ri rak hi ka hre ta tlat a.


Ding meuhvin ka ngaithla ren rawn a, pindanah chuan tu emaw an awm ni ngeiin ka hria. Pialrala pindan kawngkhar kik pah chuan ka ko bawk a, min chhang lova, kawngkhar chu a inkalh loh avangin mi an awm ngei em tih chian nan hrim hrim tiin ka hawng a. Khum mawnga chhuata lo ṭhu ngawireng ka hmuhrual chuan ka thaw chhuak deuh hawk. Hetah hian alo awm char char a maw...?


A hmaah chuan va dingin ka ṭhu hniam a, min en lova, ka awm ve tihpawh a ngaihsak heklo. Zu rim a nam lova, mahse rilru fim pu erawh a ang chuanglo. "Tinge ilo kal ve loh a...? I u pawn a ngaihtuah tawh che asin," ka ti sap a. A ngawireng a,
a sira a rose par var dah chu a vuai ṭan tawh a, hetia awmtir ringawt chu diktheiin ka hre bawk silova, nawr luih chi ni pawhin ka hre chuang bawk silo. Awmdan tur tak pawh min ti haihchham a ni hawt e.


"Ka mumang mai mai a ni tih min hrilh teh." tiin a rawn ṭawngchhuak ve ta hram a.
Keipawhin mumang mai nise ka ti ve takzet tho a, chu erawh duhthusam mai chauh a ni tawh. "Pawm thiam kan zir angai tlang anih hi. Anih tur ang chu a ni zo vek ṭawh a, thlamuangtaka a chawlh theihnan tal pawh i rawn thlahliam ve ngei ngei chu angai a nia aw," ka tihchuan alo nui hul deuh hak a.


"Heti khawpa hreawm a min siam hnuah thlamuangtakin chawlh a tum bik a...a tawp thlengin mahni hma ala sial reng anih hi. Mi pahnih awmdun theihnan hian hmangaihna chauh hi alo tawk zo lo a nia nge. Theihtawp chhuah mahila atawpah chuan kan hma hun ngei pawh chunglama mi duh ang leh ruat ang zel chauhvin a thleng chu anih si hi." Tiin a ṭawngkam chhuaka beidawnnate, thinrimna leh natna inpawlhte chu ka hrethiam ve vek a.


"Ni lo e, kan tun hun hi kan hmahun tur atana zinkawng pawimawh tak a ni a, vawikhat duh i thlan sual tawh chuan Siamtuin i hmahun atana alo ruat tepawh i thlakdanglam thei a. Angaihi pawh he duhthlanna a siam kher hi chu ka dem ve lek lek ṭhin. Mahse atan chuan thihna kha hahdamna a chang ta si a, a duhthlanna hi zah sakin Hmangaihtu ang tal pawhin i thlahliam thei mai lo em ni...?" Tiin a ngen hian ka ngen ti tih tawh a. Hetia indawm kun reng tur chuan khuareiah ala inchhir thuai anga, a inchhir anga rilru hreawm reng rengin a hringnun a hmang ang tih ka hlau a ni.


Kun chungin a ngawi ngul a, ka kawrlum hak ipte chu zenin a kut chu ka la a. "A hun tawp dawn ṭepah pawh a hrereng ṭhin che asin." tiin bracelet pahnih chu ka pe a. Nghet taka hum chungin thawk ala vang vang a.


"A hun a thleng ṭep tawh a, i hmel hmuh kan lo beisei reng dawn a nia." Tiin ka chhuahsan ta a. A inchhir lehna turin duhthlanna a siamloh hram ka beisei.


Mimi-iten thingpui an lo lum chu chaw ka chak vakloh avangin ka in ve ta zawk a. Bawihpuia pawh chhang nen ka chiar sak a, a duh puk puk ngei mai. "Hei Ramdina inthlakna tur hi pek angai sia chhuk nghal mai ang u," kan intihfel zawh chuan chhuk ka rawt ta nghal a, "Nia hei thlalakte pawh a hun dawn tawh," tiin kan inzui thla ta hlawm a.


Kuang chu an lo peih fel tawh a, Thangteate inah Ramdina chu alo inbual mek a, inthlakna turte pein kan nghak ve rih a. An ṭhianho chu an ṭangkai ngei mai engkim an buaipui zung zung a. Kuang an va zawn luh rual chuan kawngka bul aṭangin kan lo thlir reng a.


Angaihi ruang kuanga an muttir dawn lai chuan ṭap thawm chu a ring zual sauhva, nu Matluangi mawlh chuan hnuk a ti ulh leh ṭhin. A kuahna aṭanga an han lak hran rual chuan a ṭap rawng rawng a, a laizawnte pahnihin lo chelh betin anni pawh an insum thei bik lo.


An muttir fel hnuchuan an han ṭah leh rih a, thlalakna hunte neiin keini chhungkua pawhin kan lakpuia, Pialrala rawnin lan ve talo erawh ka hnual rawih rawih thei. Alo kal ka lo beisei sang deuh a ni e.


Thlanmual lama zawn thlak a hun ta a, Ramdina leh Reman hma hruaiin zirlai mipa pahnih Angaihite rualpui tur tak hian kuang chu an zawn ve bawk a. Tlanmual lampana kan inzui thlak lai chuan kawngsirah Angaihi zirlai puite chuan an sûnna lan tir nan puan dum awrh chungin kawngsir tawn tawnah chuan an lo ding tlar ṭhap a.


Kan Pastor-in thusawina te a han nei hmasa a, nu Matluangi chu thu han sawi thei rual anih miau loh avangin a aiawhin a nuṭa, pu Liana chuan thusawinan hun tawite a hmang ve ta thung a.


An phum hmain a tawp nan kuangchhin chu an han hawng leh a, "Bawihi pa, hei i fanu pawh i kiangah an zalh dawn ta...lo hmuak ang che aw...keizawng, nu nih ka tlin lo em mai a, i kiangah chuan a hlim zawk ngei ang," a tihlaia kan piah lawka thlan a en vang vang chuan Angaihi pa thlan alo ni reng a. An pafain an hanin tawng leh anga, lei hreawmna hi chu an rawn hre ve tawh lovang.


An chhin hma tak tak chuan Thlengthlengi pawhin a ṭhiannu kut hit thler tawh chu a zu chelh sak ve a. "Ka lo kal ve hunah pawh min lo la hrereng ang che aw...Khawi hmunah pawh awmin eng ang pawhin inhlat mahila, ṭhian kan nihn chu a bo chuang lovang." tiin a ṭap zawih zawih a.


A thil ngaihhlut leh ngainat zual an dah tel zinga ka designing book hmana ka pek kha a tel ve tih ka hmuh rual chuan hnuk ulh ṭeuh chungin a hmel dang bel tawh chu ka thlir ngawt ngawt a.


"Kal tawh rawh ka fanu, pa angchhungah chuan han chawl la...heleia i zinkawng, hreawm tinreng i tawrhte kha han thlen la. Hmangaihna nen a ang chhunga lo pawmtu che chuan a diriam ve ngai dawn si lo che a...i dam ta ka naute...," tiin a chalah chuan a fawh sak vawng vawng a.


Chutih laia ka ṭap tur insum hawisawn chuan kan piah hla deuh hlek, thingkung hlim hnuaia Pialrala ding reng chu ka va hmu fuh ta a. Kan awmna lam chu alo thlir vang vang a, kuang chu an chhin ta.


Chatuan atan mangṭha tih thu chu lungkimlo tak chunga sawi angai a, a chûnnu lungchhe awrawl meuh pawhina a auh eih zawh tawh ruallohvin piallei vawt leh thimah chuan rawpral tura zalh alo ni ve ta.


Kan pangpar kente chu kan theh thla sap sap a, nu Matluangi chu a chau tawh takzet a, motor-a tlan haw puiin midangte pawh an ṭin darh ṭan ta. Nopuii leh Notei chu Ruthi leh Mimi-in an kal hmasak pui a,
ka nute pawh an haw ve nghal a, ni tla tur chuan kan awmna lai chu a rawn ên sen deuh phût mai a. Nilenga khua dur khup si tuna taka mawi zeta Ni tla mai turin ênna a rawn pek chhuah chuan thu tamtak a rawn sawi ni mai ka hria.


"Ka nau, mangṭha aw...engtikah emaw chuan damtakin kan la inhmu leh ngei ang," tiin Ramdina pawh a phun sup sup a.
Ani zawng, a insum thei a, a rilru chu na viau mahse a mittui erawh a tla ve lo thung.


"Bawihpui, anutei hi mangṭha tirawh le...," tiin Bawihpuia chu ka rose par ken pakhat chu ka pe a. "Bye bye..." fiah angreng tak hian a tive a, a rose ken chu a theh thla nghal a.


Vawitam mangṭha tih thu hi sawi nawn awn awn tawh mah ila thinlung hian i awm ve tawh dawnlo tih hi a pawmthiam theilo a ni e. I hminglam changa chhawntu awm tawh ngailo turte, i chanchin sawi changa mitthlaah chauh i lang turte hi mumang ang mai a ni.


Rilruin thu tamtak ka sawi a, tunah chuan a dam ta tih bakloh chu inhnemna dang reng a awm lo.


Vawi hnih thum vel Ramdina chuan suahdurin Angaihi kuang chu leiin a zuk vur a. A tawp rawn khar turin Zuala, Tea leh Samson-a bakah mipa pahnih an awm bawk a. Haw kan tum laiin Pialrala pawh a rawn thleng phei ve ta hram a.


"In ṭhahnem tho bawka kan haw san mai ang cheu aw." Tiin Ramdinan Tea a mitmei zauhva, hrethiam takin alo bu ve nghat a.


Bawihpuia pawmin Ramdina chu a kal hmasa a, a rose par var bawr ken chu a vuai deuh vek tawh. "Hei hi i theihnghilh," tiin a hoodie ipte aṭang chuan bracelet kha a rawn phawrh a. A en vang vang hnuah 'P' tih inziahna zawk kha a thehthla a. 'H' awmna zawk kha chu a kawl ṭha ta thung a.


"Hmangaihnain chelh thei che ni ila tun aia nasa hian ka hmangaih ngei ang che...Kei aia i thlan zawk chu thihna meuh pawh nise, i hlimna tur anih phawt chuan engtik Ni-ah emaw pawmthiam hun ka la nei ve mahna." Tiin a rose par ken chu a en vang vang a. "Hlim taka ilo dawng tur mitthla chungin ka lo hawnsak che a, i thil duh ka tihsak theih hnuhnungber che a ni dawn tih hria ila i kiangah khan ka awm tlat tur," tiin a nui hul hak a. A ṭap lova, a tawrhna erawh thlirtu mitah a chiang viau thung.


A tawpa tawpah chu pangpar chuan a neitu tur diktak bul a thleng ve ta. Chu pangpar keng chunga Angaihi hlimtaka nui lai hmel chu keipawhin ka lo mitthla thei hial a...a mawi asin.


Pialrala chuan Samson-a suahdur ken chu a ban a, amah ngeiin a hmangaih chu a thlahliam ve dawn ta. Ni chu a her liam riai riai a, chutihrualin kan Hmangaihi pawh a liam ve tak tak ta.


Dak chungin thlifim lo thaw chu ka hip lut vang vang a. I awmna hmun aṭanga min lo thlir anih chuan hmangaihtu i nei tih hi rawn hmuh hmaihlo la, awm tawhlo mahla kan thinglungah i nung reng dawn tih hi han hrereng bawk la. Ka nau Angaih, kan inhriat chhung ava reilo em...mahse ka ngaina che. Ka hmangaih bawk che a, i hlimna chu ka duhpui ber bawk che. Nang zawng khawvel hreawmna leh suahsualnain a zem buai phak tawhlohna ramah chatuan atan i chawl tawh dawn tih ka hria a, ka lungngai reng renglo. I hreawm laia hreawmpui che a, i ṭahlaia ṭahpui ṭhintu che hian i hlim hunah pawh ka hlimpui zel ang che. Mangṭha aw ka nau. Engtik ni ah emaw chuan damtakin kan la intawk khawm leh ngei ang. Chutih hunah chuan hlimtaka i nui lai hmel kan hmu leh anga, chu aia mawi eng nge awm chuang ang?


Kawngpuiah Ramdinate pafa in min lo nghak a, ka han hawilet leh vang vang a.
"Teate an awma an rawn buaipui vek mai ang," tiin Pialrala chu ngaihtuahawm anih loh thuin min hrilh a. Kan pathum chuan kan inzui haw ta a.


Nu Matluangi chu Andrew-an alo chiau mu deuh tawp a, drip an khai bawka. Chiau mut tawp loh chuan engtikah mah a muhil thei dawn si lova a pawi hranlo. A unaute pathum an awm bawka keini chhungkua chu kan haw rih ta phawt.


Thlengthlengi pawh thingrem bawm lian vaklo pawm chunghian alo haw a. A mit a bui lak a, chaw pawh a ei duhlo. A pindanah a tawm ngat ngat a, a ṭhiannu chu ala sûn dawn chauh niin a lang. Kan lainat si a, tih theih kan nei chuang bawk silo lai tak chu a ni min ti hreawm zual ṭhintu chu. Zanah pawh ka pu thlengin khawhar ina zu len leh chu kan tum a.


Ina lo awm mai tura min tih ngial pawhin reilote tal chu zu lan ve hrim hrim ka duh ve tlat a. Min hrethiam takin ka chhungte pawn an remti ta a. Thlengthlengi erawh a inbual harh a, "Ka lo nghak ang lo zu kal hmasa mai rawh u," Mimi-in a tih avang chuan midang zawng kan chhuk hmasa ta a.


Mi an la tam lutuk lova, Thangtea te inah Ramdina nen kan kawi lut zawk a. Ka pu leh ka nute erawh an tlang thla nghal a.
Ka sawi hmaih chu Zopuii hian an fa hmasa ber tur kha hmanni deuh khan a chhiat palh hlauh mai a. Kan thiltawn leh boruak zawng zawng nen lenna hun pawh kan neilo kha a nia, an tawrh ve dawn tehreng nen hnêmnan hun takngial pawh kan han neilo chu a inthlahrunawm duh khawp mai.


Mahse Zopuii chu a fel a, nu Matluangite inah pawh a zuanzang leh che rang ber a ni thei zel a. Ama tawrhna te chu a dah ṭha rih ti ila a dik ber ang. An la upa vak biklo bawka Pathian zarah an pai leh vat thei turah ngai tawp mai ang.


"Matluangi chu aw...an pain a boralsan tawha a fanu naupangtê kha amaha a enkawl seilen hnuah hetiang vanduaina rapthlak lutuk hi a tawng leha. A thiltawn hi a rapthlakin tawrh thiam a har dawn em asin, in ṭawngṭainaah te khan theihnghilh ngailo ula. A fanu lah naupangtêin khawtlang mite sawichhiatna thu dengkhawng tinreng tuar zo loin a heti ta chu a ni sia...ka lainat tak tak a ni." Thangtea nu chuan a ti charh charh a.


"A rukthlak asin a boral dan hi. A dikna êm pawh hailanin a awm thei talo chu a nia, keichu ka na vawng vawng mai." Ruthi-i chuan alo ti a. Ni e, a dikna chanvo em pawh pekin a awm lo anih kha.


"Vic-a leh a chhungte saw an ṭang na si a, khawtlang mite rin an hlawh bawk nen apain thil alo ti thei lehzel a. Kan Mizoram ngei pawh hi mi awmthei deuhte in lulingna ram alo ni ve der tawh a. Keini angte hi chuan kan dikna chanvo ngei ngei pawh kan hmu thei ṭhin lo. Thudik hi rah behin a awm ta fo a, Angaihi anga kan rama ṭhalai leh hmeichhiate hi engzat tak boral tawh ang maw? Ngaihtuah tham fe chu a ni. Mitinin dikna chanvo kan nei ṭheuhva, nunna hi a hlu a. Hetiang mai maia in chân hi chu a runthlak ṭhin em mai." Thangtea nu bawk chuan a ti leh ta charh charh a, dik ka lo ti viau mai.


Mipuite tana thawk tur leh ding tlat tur Police te ngei pawh sum avanga harsatna tawkte an hawisan ṭhin hi chu mimal tak pawhin ka vei ve ṭhin viau a ni. Kan thlamuanpui turte ber pawh an hetih zel chuan kan ram hi tun aṭanga hun reiloteah hian engtiang takin rapthlak chho ang maw? Mi dik leh ṭha, rorelna dik duhtlat mi, tham lungawi ve mai mai theihloh tur mi hi kan ram hian kan mamawh takzet tawh anih hi.


Thangteate nupa leh anu ho chuan khawhar inlam chu kan pan phei ta a. Inchhunglamah chuan an zai ṭan dup dup tawh a, pawnah mei zua ding khawmuang an awm bawk a. Nu Matluangi ber chu drip an khai avangin ala mu rih a, a harh ve tak naa a meng â ruai mai. Ka nu leh Thangtea nute ho in an ṭhutpui tho bawka keini chu midang zai zawm turin an chhuak phei ve ta thung a.


Minute 20 erh awrh kan ṭhut hnuah Notei ṭah tumin a tal a tal a. Inchhung boruak chu a ning tawh aniang ti rilru chungin Ramdina hnenah, "Pawnah ka va chhuah harhpui lawk ang nge," tiin ka chhuahsan a.


Kawtah chuan hnute pe pahin ka awi a, pawna thingpui lum ṭhalaiho titi chuan ka beng a verh ang reng hle bawk.


"Ka khawngaih reuh tak tak a ni heti hian a thi chu a ni mai sia. Victor-a kha dawtin puh lo chu nisela a nunna em a chan biklo tur," hmeichhe pakhatin a tihchuan, "Mahni intihlum lehnghal! rapthlak e...a khawngaihthlak tho bawk sia. Ṭha te te khan awm sela a hmelṭhat reuh nen mipa ṭha takte chu a tawng ngei ngei ang. Sum hi chuan mihringte hi min lo ti danglam hneh em anih hi." An zinga mi tho chuan alo ti ve bawk a.


"Mahni intihlum a ni reng renglo!" Ka hnunglam aṭanga rawn ti ṭhattu chu Thlengthlengi alo ni. Pawna awmho zawng zawng chu an rawn hawi ṭhap a. Thinrim hmel zeta ka hmaa rawn dingin thingpui lumho chu a melh ren rawn a.


"Ka ṭhiannu kha mahni intithlum a nilo. Nangni ho hian in nawr lui a ni. Tualthattu diktak chu inzavai hian in ni vek! Engmah thuchiang hre lovin a chhe thei angberin inchhuah a, khawlai chhuak ngamlo khawpa nasain insawi chhe bawk a. A chhuah ve chhunah pawh hmaichhanah ngei khang inṭawngkam bawlhhlawh leh mitmei khan indiriam leh zel a. A tuartu chu amah asin! A dinhmunah khan vawikhatte pawh in indah chhin ngai em? Khatianga dem tur leh hmusit taka en tur khan eng nge in nih bik a tu ni ah nge in inhriat fa kova?! In thin hrik a, inṭawngkamte avang khan a damlai reng pawhin a chhungril kha a thi asin. A chanchin hi sawi ngam tur pawh inni hek lo, a thlarau tal chu zah ve em em ula. Mi nunna in la tih inlo hrereng dawn nia. Engtik ni ah emaw chuan thudik hi alo lang anga, in la inchhir ve ang." A ti ta piap piap mai a. A thinrim leh rilru na, a ṭhiannu sûn hlim hlawt nen a khur deuh dar dar a. A aw erawh kha chu a fiah ṭha viau thung.


Inchhunglam aṭanga lo hre pha tawk ho chu an lo hawi deuh ṭhap a, tuman an chhang ngam tawhlo. An kun zum duk ringawt tawh. A chhan chu Thlengthlengi khan sawi dikloh a neilo miau a tin ni.


"Tirawh Thlengthleng, Angaihi thlarau tal chu hahdam taka a chawlh theihnan zanin chauh chu hanin bengdai hram teh khai," tiin inchhunglamah a ka hruai lut ta a.


Ka puanṭhuite pawh an kim ṭhap a, Pialrala kha tlaiah ala rawn haw miah lova, thingpui in chawlh laia Ramdinan Tea a biak chuan, "Haw pui ka tuma a duhlo tlat a, hei ka haw san ta mai a tlai tawh sia intihfaia chaw ei phawt ka duh bawk nen tunah thlanmualah ala awma ka chhuk leh mai ang," alo ti a. Kan naua chu aw...a luhlul bawk nen a awm zankhua duhṭhak maithei a ni.


"Thingpui inzawhah hian ka zu kal ang nge," Ramdina chuan a ti ta nge nge a. Ni e, amah chauhva awmtir reng chu a chi ber lovang. An rawnin hruai haw thei talo anih pawhin Tea tal chuan a awmpui theih hmel a, a zia tak ala awm.


Ramdina kal hnulawkah zai kan ṭan leh a, dar 10 velah chuan Bawihpuia pawh Mimi-in a pawm thle lup lup tawh a. Ramdina chu nghah chi nge mawni dawn le engmah chanchin ala rawn sawi bawk si lo.


Pawnah chhuakin ka call tawp a, a chhang dawnlo emaw ka tih hnuah a rawn chhang ta hram a. "Ka kalsan dawnlo. Amah chuan a khua a har dawn asin!" titu avang chuan ka ṭawng tum ang zuau tawh chu ka ṭhulh leh rih a. A ri deuh rawk rawk a, "Ṭhiana hetiang chuan awmlo teh...Angaihi pawn hetianga i awm hi a duh miah lovang. Haw la i rilru fim hunah kan kal leh zawk dawn nia. A tlai tawh mut hahdam i mamawh anih kha." Titu chu Tea niin ka hria.


"Hei kan la inhruai haw thei dawn rihlo anih hmel, min lo nghak lo mai rawh u. Naupangho an mut tawh chuan haw chho tawh mah ula a pawi lovang." Ramdina chuan a rawn ti ta a.


"Ka kalsan dawnlo, amahin chauhva awm turin ka kalsan tawh dawnlo!" Tiin Pialrala chu a au chiam chiam a, a rui lungpuam niin ka hria.


"Anih kan haw chho mai ang aw, Bawihpuia pawh a mu tawh a. Pialrala chu tilui lo mai rawh u, a awm awm khan awmtir tawp ula a dam ve leh mai ang," ka ti a. "Nia hei a kam nam deuhva, tih luih chi pawh a nilo a hro hram a na rih lutuk. Tihian Tea nen kan awmpui rih phawt ang," a rawn ti ta a. Kan inbiakna ti tawpin inchhungah chuan ka va lut a, kan haw hma nu Matluangi chu ka va en leh zuai a, alo muhil leh tawh a, a theih anga tam muhil rihse a ṭha ang.


Thlengthlengi chu ala haw ve duhloh avangin kan haw san a, ka mut luh meuh chuan dar 11 a pel thui tawh viau mai.
Ka han mu ve tak naa mut erawh a chhuak thei derlo mai a, rilru a harh kur reng a. Ngaihtuahnaah engdang mah a leng lo.


Phone ka hawng a, Thanpuii lo online va va ka hmuhchuan, "Ila meng em ni?" Tiin message ka va thawn a. Biak lai a nei biklo aniang chu "Meng e" tiin min rawn chhang rang viau mai. Ka call hmain min rawn call nghal zat a, message type hi chu kan peihlo dun a ni.


"Eng nge in chanchin? A hmain engmah ka hrelawk ve bawk si lova min ṭhawng ang reng khawp mai. Kan kawta Vic-a leh Pialrala rawnin sual ringawt dante kha ka hrethiamlo," tiin a bangbo rih viau a. Ka muhil thei chuanglo bawka a chepakai aṭang chuan thil nih dan leh chinchangte chu ka han hrilh ve ta malh malh a.


Victor-a chungchang ka han hrilh zawh chuan a chek tlak tlak a, "Alo va mak ve chutianga tleirawl thianghlim khawihchhe duh tur khawp a rilru chhe pu mi anih em chu ka lo ring lova...ka ring pha lo zawk mawle. Angaihi chu aw...han tuar chhuak thei se ka va duhpui tak. Anih tur ang lah chu a ni zo vek tawh lawi si a, a nu ka khawngaih hle mai." Alo ti ve vawng vawng a.


"Victor-a i hmu ngai em? Khalamah eng thuthang mah a awmlo em ni?" Ka tihchuan, "A chhuak tur leh zan tlai deuh deuha a haw lai hi chu ka hmu fuh ve zauh zauh a, chutiang eng thuthang mah helamah chuan a awmlo. Keichu ka ṭih e...kan ṭhenawm chiaha a awm bawk sia ka haw nghal hlur tawh." Tiin a ngei zia te chu a sawi luam a.


Titi chhunzawm zelin a school thawhnaah chuan a bang ta a ni awm a, Vivi-a ang deuhin ani pawn make-up leh kuttin chei vel zir ve daih a tum leh hnuhnawh anih hmel a. Senior dawn lama chutiang zir te zawng a dawhtheihnain a tlin ngût ange maw chu.


Darkar khat kan inbiak hnuchuan mut pawh a chhuak ve ta deuh nge ni ka ham ka ham tawh a. "I mut a chhuak tawh anih kha mu rawh. In boruak nen i theih phawt chuan mu char char rawh fa pathum lai enkawl tur nei inih kha damlo hman i ni velo," a rawn tihchuan ka nui hak a. Min sawi chhangchhe hneh e...


"Umm nangpawh tinge iva meng rei reng reng ve a?" Ka tihchuan a nui kur kur a.
"Chânloh khâna lo chhuak tur ka châng," a rawn ti mauh mai a. Ava chauh thuba rawh ṭhin ve.


"I chân reng chu chu...ṭawngkamte lah hi i bei mak thei si. Chanloh khana lo chhuak tur chu han chang leh phawt mai teh," tiin ka mutsan ta a. Thanpuii nge nge rilru kal bing lutuk tur pawh a rawn hnawt kiang leh ta vek mai.


Nau nen chuan ka chau tawngkhawng ve tawh bawk aniang ka muhil ta thuai a, zinglam khawvar hma hretin Ramdina lo haw thawm ka hria a, ka tho peih nganglo.
A inthlak hnuah a rawn mu lut ve mai bawk a.


Zinga ka thawhchuan a chau ve bawk aniang ala mutui khawp a. Bathroom aṭangin Pialrala lo chhuak hlawl a, a u rual khan a rawn haw ve a ni maithei. A inbual anih hmel a, engmah sawi lovin a pindanah a lut nghal daih a. Inphih faiin kan fateho ka va buaipui zung zung a.


Bawihpuia hi zawng,mut hi a duh thlurh thlurh bawka apa mut chen chen hi a mu ve thei roh a. Apa bulah muttirin an rawnin chhawm chho ve tawh mai aniang chu.
Ka fanute pahnih pawm chungin ka chho a, kan chau tlang aniang tukin chu chaw ei pawh kan hman tlai deuh.


Thlengthlengi chu nizanah a rawn haw lova, nu Matluangite inah chaw pawh a ei nghal dawn anih hmel, tukinah ka nu'n a chanchin a zu zawt a. Pu Liana'n a ngaihtuahawmloh thu alo sawi a ni awm e.


A sarhu lai a ni bawk nen tumahin hma kan sawn thei nghal tut tut bik lova. Thihna hi chu tawrh thiam a har a, hei baka tawp chiang hi mihring nunah eng nge adang awm chuang? Zawi muangin hmalam kan pan anga, kan natnate chu chunglama mi khian hun leh ni liam rualin min la thawi damsak ve mai ang tih hi a tu a te tan pawh ka ring tlat a ni.


Pialrala chuan kan rualin chaw a kil ve peih hlauh mai a, ka pu leh ka nuin an hnem mawlh mawlh reng a. Tihtham pawh a ei chuanglo. A kham veleh a chhuak nghal daih a. Beidawng taka thlir mai loh chu ṭawngṭai sak chiah tih theih kan nei.


Vawiin chu nu Matluangi pawh a tho harh peih ve tawh a ni awm a, chawte pawh an in eitir ve thei ta a. A harh hlimah Angaihi a zawng tih mai loh chu zan thleng pawhin a ṭha ve viau a. Chhunlamah Angaihi thlanah kalin ava ṭap fo a, mittuiin hul ni reng reng a nei hleithei meuhlo.


Pialrala erawh chhunlamah a pindanah a tawm reng a, ni a tlak rualin thlanmual lamah a liam thla ziah thung a. Zankhuain ava awm a, zing ni chhuah hmain alo haw leh ṭhin. Chutiang chuan kar khat chuang kan awm ta. Thlengthlengi pawn hma a sawn hleithei lova.


Tlaikhat Tlaizawng ṭawi ṭan tir pot-a mi pawm chungin Cocacola leh chips sarang khat ṭana khai tel chung hian school tlang lam a pan chho a. Angaihin a pianchama a thil tihduh leh ei chak zawng a sawi kha han tih puitlin sak ngei chu a tum anih hmel...Thingrem bawm Angaihi ta pawh a pawm tel a, rilru na tak chungin a kal lai chu ka thlir liam a.


Tunah hian la awm ve nila chuan vawiin ni i piancham hi i ṭhiannu hnen i tihchak zawng i sawite kha inti dun thei tur hi a nia...in hlim dun leh dawn si a. A pawi a ni i kal ta chu. Kan ngai che a, kan thlah hleitheilo che chu anih hi.


Tlaiah keini pawh Angaihi thlan tlawh turin kan zu kal ve a, Dawngdawngate unauin Derhken para an par ṭhi siam chu thlan chungah chuan an dah a. Mimi-i nen a bul velah Rose leh hnahsinte kan phun sak a.
Nu Matluangi pawh an lo insut faih faih reng a, "Hmanni lawk kha chuan vawiin ni lo thlen hun tur hi phur takin i sawi anih kha tiraw...Ka ngai che em mai Bawihte...in kianga awm baka thlakhleh hi ka neilo. Keimah chauhva awmturin min kalsan a, mal taka ka awm tur hi i dâwn ve lo em ni le...?" tiin a phun pah sap sap a.


Ei rawngbawl sa a kal kan ni bawka Ni tlak fel hnuah kan haw ta chauh a. Pialrala pawh a dan ngaitein haw kawngah kan tawk a, "Angaihi vanneihzia hi aw...an khawhar hlauva zantin awmpui ṭhintu a nei tih hi alo hmu ve anih chuan a hlim viau ang," tiin nu Matluangi chuan Pialrala chu a en zui vung vung a.


Kar tharah nu Matluangi unaute paw'n an hawsan tawh dawn hlawm a. Thlengthlengi hian a awmchilh deuh tawp a, nu Matluangi hian awm ve tura a duh vang a ni pakhat.


Dawr kan hawng ṭan a, Ramdinan hna a ṭan leh tawh bawk a. Mite pawh an nitin hun hman dan angin an nung leh mawp mawp tawh a.


Thu thar pakhat hriat kan nei a, Victor-a leh a nu leh pate kan khuaah an rawn zin leh tih chu a ni. Kan hriatni tlai la la chuan nu Mawii feh hawng an inah pawh inghat hmasa talo chuan kan inah a rawn tlang nghal daih a.


"Ekhai khu, Matluangi chu mi â ang maiin Piangate in kawtah zing aṭang khan an ding reng e an tia...'Ka fanu hnenah ngaihdam dil rawh,' te a tia a ṭhatloh hmel khawp mai. Nangni chhungkuain in ngaihsak ṭhin bawka inla hriat loh takin ka rawn hrilh nghal cheu anih hi." A ti zung zung a, tui ina a ṭhut khawmuan zet hnuah a haw phei ta a.


Ka nu huanah a awm nileng a, kei leh Mimi-i inchhunglamah kan buai thung a. Ramdinan hna a thawh bakah vawiin chu Pialrala pawh a lengchhuak ve teh tlat a, tuman kan la hrelo.


"Leen, chuti ringawt chu ava zia lo dawn ve...ka nu hi ko ila kan zu chhuk ve mai dawn em ni ang?" Mimi-i'n a tihchuan keipawhin kal chu ṭhain ka hria. "Ni e, zu kal rawh u. Keiin in ka lo nghak mai ang," ka tihchuan ka nu a kova, an inzui thla ta nghal a.


Engtin nge an zu awm ang aw tih ringawt chuan rilru a luah a, Ramdina lo haw pawhin, "Ava reh teh ṭhuap ve...," a rawn ti lut bul bul a. Nu Matluangi chungchang chu ka lo hrilh ve a, "An hmel pawh an la rawn lan ngam zawk elo." Ramdina chuan a ti changfak a. A hmel chu a rum nghal ul mai.


"Eng rilru pua anu leh pa te thlenga rawn kal nge an nih ang le?"ka tih sap chuan, "Engvang vak nge ni ang? Nu Matluangi ṭhatchhuah hmaa a ka hupsak tumin hmalak an rawn tum tih a hriat reng alawm." tiin a lungawiloh hmel khawp a.
A ṭawng bung ṭha nghut nghut bawk nen keimah zawk chuan ka hlau lek lek zawk a ni.


"Nangtal chu insum thei rawh aw...kan innghatna inih kha," ka ti ringwt a. Chutia ka han sawi takah chuan min rawn melh zawk a. "Kan dawhrei tawk tawh," a ti ringawt a. Inbual turin a chhuk zui a, buaina engmah awm tawhlo se ka tihrualin Angaihi ber awm tawhlo mahse a dikna chanvo tal chu pekin awmse, miten mi dukdaklo tak anga an hmuhdante hi thlakin awm bawk se tih chu ka duh ber a ni ve tho a. Hmatlir pawh ka nei thui thiam meuh lo.


Ramdina inbual hlanin ka nu leh Mimi-i an lo haw a, Ni pawh a tla fel der tawh. "Nu Matluangi chu eng nge a an?" Ka lo ti nghal vat a. "Inah kan inhruai haw thei hlauhva, ṭhatlam a pan ve ṭan chauhva Vic-a te chhung lo lang leh hian a ti su kuk zo leh ta vek a ni ber." Ka nuin a ti hap laiin, "Keichu ka mittui pawh ka dang hleitheilo. Kan zu thlen thlak chuan pa Piangate inkawtah nu Matluangi chu alo ding a, hnuk ulh ṭeuh chung leh ṭawng pawh ṭawng ṭha theilo chunghian, 'Pathian pawh i hlau lo em ni? Vawikhat tal chu ka fanu thlanah kalin i thiltih avang khan ngaihdam va dil rawh. Keini zawng heti mai hi kan ni a, nangni ang cho phak tur chuan hmeithai ka ni ka hria, mahse chhete pawhin inthiamlohna emaw inchhirna in nei ve miah lo em ni? A thlarau tal chu zah la, thlamuang taka a chawlh theinan thupha va chawi rawh.' alo ti a, an ṭhenawmte pawn an hmu ve reng a, Vic-a te chhung chu dah pawh an rawn dak chhuak eih lo.
Nu Matluangi ala chakvaklo bawk nen kan thlem ngial hnuah kan hruai haw thei ta hram a, Thlengthlengi nen chauhva awm reng tur chuan an ngaihtuahawm hi ka tia.
Khulai a fanu nunna tihchhiatsaktu hmel han hmuh reng pawh atan chuan a hreawm dawn em a, helamahte rawn awm chho rih mai se," a ti zung zung a.


"Ni e, a ṭha tak ang. Kan inah awm ve rih sela, in bawihsawmte pawh kan tan a awlsam zawk dawn a. Keini lo belh tur dang a nei silo. An inah chuan Angaihi sulhnu nen hma a sawn hleithei lovang, a rilru hmin ka lo tum anga, kan hruai haw rih dawn nia." Ka nu pawh chuan a tive ta charh charh a. Ka pu pawhin alo pawmpui viau a, kan duh dan chu a in ang tlang hle.


"Ramte, i nau hi hetiang renga awmtir chu a fuh ber lovang. Kan rualin chaw a ei ngai bawk silo, ina a awmin pindanah a tawm reng a, thlanmualah zankhuaa ava awm ṭhinte saw keizawng ka ngaihtuah ṭhin teh a nia. Tlangval zurui hawklakho lah hian tualchai nan tak an hmang ṭhin lehnghal a, buainaahte hian alo va in ham tang ang tih ka hlau a nia," chaw ei laia ka nu'n a tih charh charh chuan Ramdina pawhin, "A sarhu lai a nia, a luhlul zia chu inhriat kha. Enliam rih mai mai ula, a ṭhianten a khat tawkin an va thli thlai ṭhin alawm. A hunah chuan hmalam ala pan ve mai ang," alo ti mai a.


Han hnem dawna kawm harh tum pawh hian amah a inkhar khip tlat a, a ṭawng ngai mang lo bawk a. Tih ngaihna vak a awmlo. A hmel hmuh hian ka lainat a, hreawm ka ti vawng vawng zel. A tuar hle a, lan chhuahtir dan a thiam lova. A ngawi a, mahniin a tuar tlawk tlawk mai a ni.


Zanah pu Thangsuleuleua a rawn leng a, ka pu leh ka nuhoin titi an vawrh a. Zopuiite rawn lengchho bawkin vaihlo then tur a rawn keng tel bawk a. Ka han tihpui ve tak naa a rim chu ka ti hleithei lova, "Lo ti ve duh tawh suh," atih avang chuan ka hnial lo kher mai. Mimi-i nen an thian a, an nau chhiat chungchangte chu sawiin engmah tluk sual leh ei sual a neih vang em em pawh ni lovin a chhiat deuh thut a ni awm a. An vanduai ve hrim hrim a, an neih hun kan nghahhelh tlang tehreng nen a pawi tak tak a ni.


"U Cki pawh rai a haw deuh aniang hmanni dawra kan inhmu chu alo tla ve kuang mai a, a thinchhe zualpui pawh a reh deuh tawh anih hmel," Zopuii'n a tihchuan Mimi-i'n alo sawi zawm ve nghal zat a.


"Andrew-a a fel bawka u Cki khi chu a hreawmlo tawp ang. Andrew-a hi hmundanga an post hun tur ka huphurh ngawt mai. U Cki pawh a kal tel ve zel a ngai tawh dawn bawk sia, an awmloh chuan lung an ti leng dawn riau hian ka hria," a ti a. "Nangni teh Mimi in la ṭha zel maw?" Zopuiin a tihchuan, "Aaa aw..ṭha ve zel rih e. Ani a buaia kei ka buai bawka kar hla aṭang phei chuan a hahthlak ṭhin khawp mai. Amah u Ruatfela hi a dawhthei hlauh zawk a, biaknan hun ka nei ngailo chung pawhin mi a hrethiam zel thei a, ka inthlahrung ve lek lek zel." A tizui luam a, anni pawh hi innei ve daih tawh sela a ṭha ang u Ruatfelan an nufa thum hian a pawm tih kan hre chhungkua tawh tho bawk alawm le. Mahse Mimi-i berin pasal min neihbo san daih chuan ka hun hman dan tur hi ka ngaihtuah ngamlo zawk.


"I tawng fuh sia chhuah miah suh aw...kan chhungte Aizawla awm pawh u Ruatfelate ṭhenawm lawka awm an nia, a fel zia bak sawi tur an hrelo. An inneituten an fanu tan an melh an melh tawh lehnghal a ni awm a, keichu ka duhpui lutuk chea a ruk hian ka lo ṭang thei lutuk." Zopuii'n a tihchuan kan nui ho hak hak a.


"Pasal neia han awmbo tur em hi chuan ka la huphurh ve deuh a ni e. Hei leh chen kan chengho tawh a, Bawihpuiate unaute, ka pute, ka ngai dawn lutuk hian ka hria. Ka tel lo chuan Leen-i a buai dawn bawk nen min duha min hmangaih tak tak anih chuan min nghak thei mai tur a nia, Nopuiite unau leikan deuh hnuah rilru thar nen kan la ngaihtuah leh ang chu," a ti ta a. Ka buai dan tur thlenga a ngaihtuah avanga ama nawmsakna tur leh thlakhlel ve em em mipa ala innghahtir thei zel chu ka fakin puitling ka ti takzet a ni.


"Sawi leh sawi hnu nangni chhungkua hi chu in inngeih bawk si, mo leh pasalte farnu inbakkaih tih ang reng te hi innei ve ngailo em mawni le...? Engtin nge heti taka inngeiha inkhawsak reng thei zawk?" Zopuii chuan a ti teh khawl khawl a.


"Leen-i hi a fel a, amah lo midang rawn mo sela chuan inlungrual takin kan khawsa ho reng thei angem pawh hriat va ni suh. Pasalte a ruka a fuiha indan rawt reng ang hmeichhiate ang kha a ni ve lova, ama ṭhat ṭhat hian a ṭha ve a. Kan Ramdinmawia pawn a duh hliau hliau em hi," Mimi-i'n a tihchuan ka lo lai deuh ṭut a, hetia miin ka hriat lai renga min fakte hian ka laichhe ve tlat zel a...a nawm dan a hreawm.


Zanin boruak zet chu zan dang anglo takin a zangkhaiin nuihte pawh kan nui hawk hawk hlawm a, kan inlengte'n an zir bawk a
tin ni.


Chutia kan inkawmho dar dar lai chuan nu Mawii bawk a rawn chek lut tlat tlat a, engtak chu thleng leh ni ang maw? A hmui tih dan vel aṭang sawn sawi tur a nei tih hriat reng reng.


"Lo leng rawh khai, nang leh nanglo anga i rawn tei luh ve leh teh nawlh a, eng thli chhia in nge rawn chhem lut che?" Pu Thangsuleuleua chuan alo ti chuarh chuarh a. Nu Mawii chu a han ṭhu thla hmasa te te phawt a.


"Pi Ṭhuamite ina ka leng turin kuhva lei pahin ka tia Matluangite in bula Saii kuhva siam ṭhin kha ka va dawr teh ang ka tia, Matluangi in ka kal pelh dawn lai khan eng emaw ri deuh bur hi ka hre ta a. Beng ka han dawh vang vang a, chutah tihian Matluangi chu a rawn au chhuak ta piap piap a, 'Ka fanu nunna hialin a tawrh phah a tenawm taka insum lakluh hian a nunna chu a hen phak inring em ni?! Tenawm hlawm lutuk! Sum vang mai maia mahni fate dikna chanvo haider thei Nu angah min ngai chu inti sual khawp mai.Thil inti thei a, eng anga ropui leh hausa pawh ni rawh u. Thudik chu a tawpah a ding chang leh nge nge ṭhin, kan nufa chunga inthiltih avang hian chunglamin ala hrem mawlh ang cheu.' Alo tia, khatiang em ema Matluangi thinrim awrawl kha ka la hre ngai si lova inah chuan ka va tlan lut ve rawih a. Vic-a nu leh pa hi nu Matluangi hmaa ṭhutthlengseiah chuan an lo ṭhu ve reng a, thil ri bur kha chu an chair kha Matluangin bang den nan a hmang anih hmel. Ka va luh chuan Vic pa, Pu Dinga chuan, 'Chutianga i fanu dikna chanvo
ngaihthah tur chea pawisa hi pek che tum kan ni lova, nunna hial kan inchan takah chuan kan fapa ber a hming alo lang ve luklak tawh bawk nen kan thiamloh ni miah loah pawh tihian i nun harsat tur zia hriain tlem tala kan puih ve theihnan che leh i mamawh phuhruk nan pek che kan tum mai zawk a ni. A diklo zawngin ila a tin ni, i sawi ang engmah kha kan rilruah a awmlo." Zawldawh hmel tak hian alo ti ve thung a. Tunge rina rinloh tur zawk pawh ka zu hre lova, ka chhuak leh ta daih alawm." a tih zawh chuan kan ngawi ṭhap a.


A ṭawng chhung zawng khan tumah kan che sawn eih lo. Thingpui alam zui ham ham a, a hnuah a kuhva lai pu Thangsuleuleua'n a dil chuan, "Aaa khawnge ka dah pawh ka hre tawhlo Saii te inah khan ka theihnghilh ta daih aniang." Tiin a riat nawi ta vel mai mai a. Kuhva lei tura a kal tak tak kha ka ringlo rengah. Nu Mawii tak hi chu aw...a ṭha tho e. A zarah kan hre ve zel a.


"Thanga, nangpui hi tunlai i rawn lengthla zing riau mai Hlutei hi u rawn rim ve deuh ṭhin tihna nge..?" Nu Mawii chuan a ti mauh mai a. Ka nu nuih aza kher mai. "A khai a. Mawii mai mai ṭhin hi chu tehthla rawk che chuan. Hluiteite chu tlangval lai aṭanga kan kawm reng reng kha a nia, ani hi chuan a hmei apa hian a kawm thei zel a, thu diklo pui puite kha ilo han thutak khukpui leh chiam roh ange." Pu Thangsuleuleua chuan a ti nghal a.


Ka nu leh pu Thangsuleuleua chu an chheih chhunzawm a, tumloh deuhin zanin pu Thangsuleuleua rawn leng chu a lai a lai mai alawm.


Inleng an haw fel ta maw tiha ka nu chuan, "Tirawh Ramte, i nu Matluangi chu a ṭhat hi ka ring tawhlo reng reng. Zanin hian hruai haw mai teh ang. Ngaihtuah a na ve si a, a buaithlak." Tiin a shawl a bat ṭha mawlh mawlh a. "Ni e, a ṭha tak ang," tiin an nufa chuan an inzui chhuak ta a.


An kal hnu rei vak loah rui inhnuaiah ka chhuk a, naupangho an muhil diam tawh a. Kawrchei tur khawihin ka ṭhu chhuak thung a. Beiseiloh deuhin Pialrala alo haw a, a rui em em lehnghal. Inchhung chu a mitmeng vai ruai hian a enkual thuak thuak a. Rawn pen phei chhut chhutin a pindan kawngkhar a hawng tur ringawtte chu a bei rei khawp mai.


A luh hnuah ka thil tih lai ka tihzawm lehnghal mai a, reivaklo chu a reh vung vung a. A hnulawkah a rawn ri deuh bur a, bungrua a suasam nge ni darthlalang keh ri te ka hre zui a. Pindanah chuan ka va tlan lut a, Pialrala bang hnek chu ka tha tawp hian ka va dang ve a, "A tawk a tawk Naua, alo let tawh dawn lo i pawmthiam angai," ka tihchuan a tawp chawt a, pindan chhung chu a hnawk rum a, darthlalangte pawh a keh vek.


A mitmenga tawrhna thuk tak awm nen chuan ka mitah tak min rawn en a, "Alo let tawh dawn lo maw?" A ti sup a. A tawrhna phena beiseina tlemte awm chu engtia han tih chi nge pawh ka hrelo, "Ummm, a lo let thei tawh hleinem. Ani chu engmahin a tihnat theih tawh ngailohna tur hmunah a awm tawh a, hetianga i awm tih a rawn hmuh chuan hreawm a ti dawn em asin. Keini pawn pawm har kan ti a, lo let leh se kan ti. Mahse thil thleng ngailo tur a nia, hmalam pan kan zir angai." Ka tichhuak ve thei ta hram a.


A ngawi vang vanga, chutah min lo kuah thawkin zawi zet hian ka darah a lu a nghat a, "U...a na...," a tihrual chuan a hnungah ka lo ben sak thak thak a. "Ka hria, ka hre vek alawm. I tuar chhuak thei em em ang. Angaihi chu kan thinlungah a nung reng tawh dawn a, mahse hmalam kan pan angai. Ani chu ngaihtuahawm a ni tawh lova, atan pawh hmalam i pan a ngai, i thei ang tiraw?" Zawldawh tak chuan ka ti sap sap a.


"Ka kiangah a awm reng a, ka hmuh theihloh leh khawih theih si loh. Ka mamawh em em boruak ang mai hian ka chhehvelah a zâm kual reng ṭhin. A awmlai hun kha ka ngai ber a, khatih hun lai kha engtin nge hmalam ka pan san theih ang?"
Tiin a aw a beidawnna lo lang chhuakte chu ka hriat hmaih bik lo.


"Keipawhin hun hi her let leh theih se ka ti...mahse chung zawng kan duhthusam a tak ram changthei ngailo tur mai chauh a ni. Ani chu nitin hunin a ala liampui anga, hetiang hian i na reng bik lovang. Amah hrereng chung siin hmalam ila pan ve ang," ka tihchuan min kuahna thlahin khum mawnga chhuatah chuan a ṭhu thla a.


"Ni engzat nge chumi hun thleng tur chuan ka nghah ngai ang..?" A bracelet tuai roh roh paha a tihchuan, "Ka hrelo le, nangmah i pawimawh ber a, i thei em em ang." Ka ti a. Ramdina alo lut hlawl a, "Mahnia awm ka duh," Pialralan a tih zui takah chuan kan inzui chhuak a.


Ramdina chuan a nau chu a ngaihtuah hmel hle a, mahnia awm kha a duh miau si a. A harhfim huna be turin ka ti ta mai. "Hliam a nei em?" A tihchuan, "A bang hnekna bak kha chu neilo," ka lo ti mai a. Nu Matluangi chu an rawn hruai haw thei a, hetah rawn hruai thlain ka nuhoin kan ṭhu khawm a.


"Nichin deuh khan Mawii ka aṭangin Dingate nupa lo kal dante kan lo hre ve a, engvang chiaha lo kal nge annih? Mawii sawi kha rin vek tur a ni em pawh kan lo hrethiam chiah lova," ka nu'in a han ti tak dap dapah chuan nu Matluangi pawh a thaw chhuak hawk a.


"An rawn len luh kha chuan ṭha taka ngaihdam min dila thupha rawn chawi turah ka lo ngai a, ka be chhe hranlo. Mahse khatia kan han ṭhut ho a an ṭawngdan aṭang khan ka man thiam ta chiah a. Envelope-a pawisa tam tham tak an rawn phawrh phei kha chuan ka thinrim lutuk insum zo lo ka puak keh ta anih ber kha. Mawii sawi chu a dik ang, a rawn lut a, thiam takin mi hmu ah chuan an pha mar
thei zel alawm. Ṭhenawmte pawn an hmuh ṭhat leh duam tawh kha," a ti ta a. Victor-a nu leh pate chu ka la hmu lo a, mahse chutia an fapa thiltih sual a tuartu pawisa hmanga tih lungawi an tum chu rapthlak ka ti. An inrawlh ve tih pawh a chiang ta viau a, Ramdina sawi kha alo dik chiah anih hi. An rawn kal chhan chu a hriat reng mai.


Pialrala hi chu kan bula a awm tam loh avang hian Vic-a te chhungkaw lo kal chungchang hi a hre ve lem lova, a hriatloh hi a ṭhat zawkna chin pawh a awm ngei ang.


Nu Matluangi chuan Thlengthlengi pindan a luah rih dawn a, dawr pawh kan khar sak ta rih mai. A taksa bakah rilru thlenga chawlh a mamawh em a, tihian ka nu nen inkawm harh se, keinin kan ngaihsak ṭhat theih bawk chuan a ṭha chhuak leh vat turah ka ngai.


A tuk chhun chu Zuala leh Tea an lo leng a, Tumbu khawrh puiah an rawn sawm a, an ṭhianpa hetia awm reng chu hruai harha kawm harhte an rawn tum ve ngial a. An insawm hlawhtling em ang chu maw. "Zuala, Rdi hi a chhuk leh tawh em ni?" Mimi-in alo tihchuan a bu nghut a.
"Inni ve deuh tak tak em ni a? A chhuk hma khan in inzui ngun riau mai," mitko san euh euh paha Mimi-i bawkin a tih leh chuan, "Aa..ni ve niang," a ti duh lek chauh a. A hmelah a hriat vek sia sawi ṭhat ve mai awm.


Reivaklo hnuah Tea leh Pialrala pawh an rawnin zui chho a, an in sawm hlawhtling ta anih hmel. Ava insiam a, Coco-an zui ve a tum tlat avangin a te a tein an inchhawm thla ta hnak hnak a. An insawm chhuak thei hlauh chu ka nu a lawm ngei mai.


Nu Matluangi leh ka nu an inkawm melh melh a, Thlengthlengin 'Nu' tia ka nu a rawn koh chang chuan nu Matluangi chu alo hawi ve leh zawk ṭhin a, Angaihi turah angai ṭhin tepawh a ni mahna.


"Ka nu, inah in awm vek tho bawka kawr dah pah hian dawrah ka han chho lawk ang nge aw," ka tihchuan, "Ee kal rawh kal rawh hei nau awm tur kan tam alawm," alo ti var a. Mahniin ka chho a, nu Dami ka la tawk zui. Mahse ka hmulo der a, ani pawn min be bik chuanglo.


"An tluang kha ka ringlo reng alawm. Chhantei pawh a khawngaihthlak zawk, tuilo zeta a fate vang chauhva aneih leh hram hram angai dawn sia. Keichu ni ila inṭhen hlen hmak a ni mai." Mafeli'n ka luh lai chuan alo ti hmarh hmarh a. "Tute maw inṭhen ang?" Ka va tihchuan, "E, ilo kal a nimaw. Hei nu Dami pasal um Maroate chungchang kan lo sawi a, Maroa'n nu Dami a hnawtchhuak a an nu a ko leh anih hmel." U Ṭhakimi'n alo ti zung zung a.


"Ka rawn kal lamah ka rawn hmu a," ka tihchuan, "Khawvel hi chu a ngam a ni. A zahthlak dawn tehlul nen hian a chhuah te hi ala chhuak ngam zawk alawm le...," chek tlat tlat pahin Tluangi chuan alo ti ve bawk a.


Rei awm lovin ka haw san leh vat hlawm a. Beiseiloh lutuk maiin inleng kan lo nei a, chupawh pu Dingate nupa lo ni rengin.
Ka nute hmel pawh a thutak ran tawh a, Ramdina pawh alo ṭhu ve reng tawh.


Chokaah ka phei tlang a, Mimi-i chuan, "Eng nge kan inahte an rawn tih ve le? Nizan maiah nu Matluangi ka hup nan pawisa pek an tum tawh a, kan chhungkua pawh hi nu Matluangi ang chiah khan min rawn tih ve an tum anih ka ring," alo ti deuh sar sar a, a lungawiloh hmel angreng khawp mai.


"In chanchinte kan lo hria a pawi kan tihpui khawp mai che u. Nizan kan thu lah a inhmu fuh vak si lova. Piangate nupa hnen aṭangin nangni chhungkua hian inlo chhawmdawl nasa ṭhin a ni awm a, kan fapa ber hming a tel ve miau si avangin nuam kan ti bik chiah lova. Kan puihtheihna laiah cheu chuan kan inhuam reng tih min lo hriat sak ula. In naupangber pawh college kal mai tur niin kan lo hria a, a duhna hmun taka a kal theihnan kan pui thei reng cheu a, a zir leh zelna tur senso pawh induh phawt chuan kan tumsak thei cheu nia." Pu Dinga'n a tihchuan Mimi-i chu alo chek tlat tlat a.


"Ngawiteh pu Ding, in inhuam thui a kan lawm. Ama'rawhchu hnathawk thei vek kan ni a, kan chhungkaw mamawh tawk leh kham khawp chu kan la lut ve bawk alawm. In fapa berin engmah inhnamhnawihna leh tihsual a neilo chung pawha heti taka in rawnin huam thui hi keichuan ka hrethiamlo lek lek a ni." Ramdina chuan alo ti let khauhva. Ni e, amak a ni. An fapa berin tihsual a neihloh te chuan thinrima mi pawh khinglet tur annih laia mi tlawn lungawi tum ang fahrana keini chhungkua, nu Matluangi belhte ber min rawn kalchilh hian an fapa thiamlohzia a lan chian tir na mai mai zawk a ni tih an hre der si lova.


"Kan sawi tawh ang khan a tuartu te lam meuhvin keini min puh miau si a, kan fapa nun pawlawhzia pawh a hrechiangtu kan ni a. A thlavang han hauh bur pawh ni theiin kan hre lova, chuvanga in fapa pawh tan tir lova chhuah tir leh ka ni nghe nghe.
A kawi zawngin thil hi la lo hram ula kan ti a, chhungkaw intihthiamloh pawh kan duh heklo. Ṭha taka inremna siam kan duh vang chauhva helai thlenga kan nupa a lo kal ta pawh kan ni. A ṭul anih chuan kan fapa pawhin inhnenah thupha chu rawn chawi sela, inrem tlang taka awm kan duh a ni ber e." Pu Dinga chuan a ti dam leh thluam a, pa fel tak te pawh a ang viau a. Rin ngawt erawh kan theilo chhungkua a ni e.


"Ngaihdam dil chu intihtheih sang ber a ni. In fapa ngei rawn kal sela, mahse ka damchhung chuan ka ngaidam thei kher lovang. A thiltih avangin ka neih hlu ber ka chan a. Fanu innei ve tho tih ka hria a, ka fanu chunga thleng ang hi in fanu chungah tho khan thleng turin an chan chhin ula, tuna min hmu tura inlo kal hi ka ngaihdan inhrethiam mai ang. Nu tan chuan a na asin," tiin nu Matluangi chuan pu Dinga nupui chu rilru nat hmel zet hian a en a. Nu ve tho anih naah pawh a hriatthiam ve a beisei anih ka ring.


"Ka tawrhpui takzet che a, hetiang vanduaina hi chu tu fanu mahin an phulo. Ama'rawhchu kan fapa hi eng anga sual leh thuawihlo pawh nisela tleirawl thianghlim khawihchhe duh tur em chu anih ka ring theilo a ni. Nu vek kan ni bawka kan fate chu eng anga sual pawh nise hetiang thil em ti duh tur chuan kan ringphal lo ṭheuh ang. Ka dinhmun aṭang pawhin min hriatthiampui ve ka beisei," pu Dinga nupui chuan alo ti thung a, mahni thlir dan aṭang chuan dik kan inti ṭheuhva,
engmah pawh kan sawi kaw hleithei meuhlo zawng a ni.


An haw hnu chuan nu Matluangi rilru chu a na thar leh a, ka nu nen pindanah an inṭhutchilh a. Pialrala chu chaw kan ei san a, nu Matluangi chuan tih tham pawh a ei ve lo.


Chaw ei kham hlim kan ṭhutkhawm laiin Victor-a a rawn tei lut nawlh a, kan boruak chu a ṭang nghal at mai a ni. Nu Matluangi hmel pawh a dang hlawk thei a, thinrimnate, natnate bakah huatnate alang tel nawk tawh bawk.


"Engti turin nge ilo kal?" Ramdina'n alo tihchuan a ṭhu thla hmasa te te phawt a.
"Rawn len luhlohna pawh a rei tawh khawp mai a, inlo damtlang em?" engmah thlenglo ang mai hian Victor-a chuan a ti zangkhai vah a. A hmelte chu a huat hian ka haw hlur tawh!


"Kan chhungkua chuan kan lawm farhanlo tawh khawp chea, sawi duh i nei anih chuan sawila inthiarfihlim leh vat zawk la a ṭha ang." Ramdina bawk chuan alo ti changfak a. Ṭha taka lo biaka zah der kha a ngaiin keipawhin ka hre bik ṭhak lo.


"Ka nu leh pate min ngenna angin ngaihdam dil turin ka lo kal anih hi. Chu chu induh ber a ni lawm ni? Tunah nu Matluangi leh inchhungkaw hnenah hian ngaihdam chu ka dil cheu anga kan boruak hi reh tawh se ṭha kan ti tlang em?" Tia kan chhungkua leh nu Matluangi a enkual lai chuan mihrang hlak ang mai a ni a, kan zinga tala kan kawm ṭhin Victor-a kha a ni tawh hauhlo. A inthlak danglam nge hei hi anihna diktak chu alo ni reng zawk?


Ramdina inhumruh ṭang ṭang chu ka va hmuchiang hle a, chutiang bawkin nu Matluangi pawh. "I inchhir dan a zir aniang chu." Ramdina'n atihchuan kan ngawi ṭhap tawh a. Nu Matluangi en chungchuan, "Angaihi thihna avang khan pawi ka ti, mahse mahni intihlum a nia a thihnaah tak kha chuan mawhphurhna ka nei pawhin ka hrelo. Mahse ka ngaihdam dilna in phut tlat si anih chuan...min ngaidam dawn nia."
a tihrualin a kawr awmah Ramdina chuan a ṭham tho lawp a.


"Inhnamhnawihna ka neilo a?! Chhete pawhin inthiamlohna i nei eih nange? Kha tleirawl khan a engkim a chan asin, a zahawmna, a thianghlimna bakah a nunna thlengin. Nangmah vang vek anih hi. Tualthattu diktak chu nangmah i ni!" tiin Ramdina chu ala insum nasa khawp mai a, a aw pawh a chang ṭha bawl bawl tawh khawp mai.


"Hetahte i hmel ila rawn lan ngam zawk elo zawnga!" Tia Pialrala rawn lut chu Tea leh Zualan an rawn zui lut nghal vat a.
A chem ken chu a rang a rang hian an rawn laksak a, pawnah an thehchhuak nghal daih a, kawngka bulah Zuala a ding nghal daih bawk.


"Nang mi tenawm! I pawikhawih vangin nunna kan chan tih i hria em? Khaw eng hmu ngam tur pawh hi i nilo zawngchhepa!" tiin dim baksaklo hian a kawr awmah chuan a rawn ṭham nghal bawrh bawrh a. "Ka sawi tawh kha, Angaihi chu nau angin ka en a. Engvangin nge khatiang kha a chungah ka tih duha inrin?
Ka hmangaih ve tho alawm." A tihchuan Pialrala erawh a nui hul hak thung a.


"Hmangaih a..? Hmangaihna awmzia pawh hrelo hian hmangaih tih thu chu sawi velo mai teh. Mahni hmangaihte nun tunge tihchhiat sak ngai? Lo ngai tak rawh, i phu tawk hremna chu ka la pe ang che. I theih chen chen chu nuamsa leh zalen takin lo awm rawh. I thiltih vang hian a ni telin ka la inchhir tir che anga, mahni nunna hial lak chak khawpa hreawm ka la tawrh tir ve ang che. Hrereng rawh." Pialrala chuan a ti ta charh charh a, ka rinaiin zanin chu a insum thei a, a ṭawngkam chhuak tin chu tih hlawhtlin ngei a tum tih ka hre thei bawk.


A kawr a ṭhamna chu phih thla sawkin, "Chhuak rawh. Vawikhat pawh i hmel hi ka hmuha i rawn lan leh anih chuan pawisak ka nei tawh lo ang." A ti zui nghut a.
Victor-a chuan a jacket hak laite chu a han bengfai hmasa thuak thuak a. Ṭha te tein a chhuak ve mai dawn emaw tih laiin Pialrala a kal pelh dawn lai chuan a ding deuh dat a, "Ka hmeichhia anih lai reng pawhin mittui tla chungin i hming alam ṭhin asin...," a ti ta sup a. Chu thu ka hriat rual chuan ka lo mur sung sung thei hial a ni.


Ka din hnaih deuh avangin ka hrechiang viau a, midang chuan an hre velo anih hmel.


Pialrala bek pawng ṭawlh ṭawlh chu chiangtakin ka hmu thei a, a chhuak tur veranda a thlen rual chuan ava umzui a. Engkhaw sawi set set lovin lei charah chuan an innawr bet a, "Nang mi tenawmpa! Ka that dawn che! Zanin la la hian i nunna hi ka kut ngeiin ka ti tawp dawn!" Tiin Pialrala chu a au zui a. Pawnah kan tlanchhuak dual a, Victor-a chu ala nui cheu nia mawle!


Tunah tak chuan Victor-a mizia chu ka rap a, ka thauah min man tlat tawh. Angaihi lo hlauh ṭhin tur ziate ka ngaihtuah let a, hetiang anga mihring rapthlak hi kan bulah khan alo awm ve reng ṭhin chu a ni si a. Bumin kan lo awm rei hle mai.


Leiah chuan dimlo zet hian an insual zui a, Pialrala insum rei tawh lutuk chu Victor-a chuan a hnehlo kher mai. Chutah nichina Tea vawm chhuah chempui kha Pialrala chuan ava ban fuh a, a sat tur chiah chu Victor-a alo tawlh sawn hman deuh a, ka nu leh Mimi-ite au rual ṭhawtin mit ka chhing nghal sawk a. Ka men leh chuan Ramdina leh Tea'n Pialrala chu an lo man bet tawh a, engmah chhia leh ṭha a hrereng tawhlo. Thinrim takin ala inhrosa kuk kuk a, a tha chu an chelh hnehlo lek lek a, Zuala'n va chelh beh puiin ṭhenawm khawvengte kan thawm hriain an lo tlan khawm a.


Victor-a ban aṭanga thisen put chhuak zur zur chu rawn bawihsawmin keini chuan kan lo en reng ringawt a, ka ke chu a khawng ta tlat ni ber hian ka hria. Ka nu leh nu Matluangi bakah Mimi-i pawh ka awm ang tho chuan an awm ve a, thilthleng chuan min ṭhawng teh thut lutuk a tin ni.


"Ekhai damdawi Inah tlan chhohpui vat chi anih hi a hliam hi a thuk emai. Pu Dingate pawh a thei remchang khan lo hrilh hria ula. Kan han tlanchhoh pui ange." Pa pakhat chuan tiin kan motor bawk chu an hmang leh a. Lo phalloh lah kha ni thei hek lo. Ṭhenawmho chuan Pialrala chu rapthlak tih hmel zet hian an melh hrek hrek a, an phun sar sar bawk.


"Inhnuaiah hruai thla rawh u," Ramdina'n a tihchuan a ṭhiante pahnihin an chhukpui a.
Ala in bengdai hleithei lova, kha kher kher kha chu Victor-a cho chhuah a ni a. Pialrala dawhtheihna leh insum theihna pan tawh tak kha a rawn ṭhiat darh a, kha thu kha tawi viau mahse a rapthlak em a ni.


Victor-a kha lo che sawn hmanlo sela chuan kha aia pawi kha a thleng ngei ang. Dam ve reng chu a phulo ti viau mahila Pialrala kuta thi tur chuan ka duh lova. Ka duh ber chu rei tak damin a damchhung hun inchhir leh hreawm ti reng rengin hmang se tihchu a ni.


Reivaklo hnuah kan VCP leh YMA hruaitu tih ang reng an rawn leng lut nawlh a. Chanchin kha thuptheih ni heklo le...
"Tunṭum in nau chetdan zet zawng namnul mai mai a har ta khawp mai. A pawi thuilo hlauhva in vannei mai pawh a. Ama'rawhchu pu Dingate lam an lungawi vak lova, a hma pawhin in nau hian vawihnih lai na tak takin kut alo thlak tawh a. Defamation Case thehluh mai an tum a. Hetiang ringawt chuan thlamuangin an awm thei dawnlo niin alang. Keini tan tak pawh heti lutuka kan khawchhunga mi hro hram na leh pawisakneilo kawl reng hi a hmingin VCP-te ka lo nih ve naah khawmite himna tur ka dawn thuilo thei lova. Chuvang chuan pu Dingate case file tum pawh kan pawmpui tlang a. Mahse hei, an mi ngen angin Matluangi fanu thihnaah an fapa inpuh ve tlat bawk nen han khing let em cheu chu tiin an ngaihtuah nawn leh hnuah zanina inpawikhawih nen inremna siam mai an rawt ta zawk a. In vannei a nia. Defamation Case an file vaih chuan in inla chhuak leh mai mai thei tawh lovang. Chuvang chuan inremna siam chu ti mai ula, inhnukdawk zawk ta mai ula keini pawhin in tlangval chu kan enliam rih phawt anga, kan en thlithlai hnuah a khawsak dan a zirin YMA lamte pawhin hma kan lak chhunzawm ang." pu Nghinglova chuan a rawn ti ta duah a, tha chu a na duh ngei mai.


"Ni e, ka fapa chuan a ti diklo alawm. Mahse ka dem hauhlo. A chhan chu maw, kha tleirawl khan a dikna chanvo em pawh a hmu thei lova, pawikhawihtu tawrhte zawng nunna em pawh a chan lova engmah thamah pawh ka ngailo. VCP i nihna anga i khawmite i ngaipawimawh anih chuan zanin hian ka han zawt teh ang che. Khawnge ṭanpui kan ngaih lai khan i awm? Kha tleirawl khan nangniho zinga mi pakhat tal lamṭang amamawh a, tuman in ring lova, kan khawtlang hruai tur kan thlan ni khan 'nakin hunah harsatna kan tawh palh pawhin ani hi chu kan mamawh hunah pawh kan tan a ding zel thei ang' tiin kan thlang che a. Mahse zanin hian kan chhungkaw rinna chu nangmah ngeiin i tichhia a ni. Min ti beidawng khawp mai." Ka nu chuan a rawn ti ta fak fak a. A ngaihdan a pel ve thawkhat tawh bawk a nia nge.


Pu Nghinglova chuan sawi tur reng reng a hre tawhlo, "Engpawh chu nise hei keini pawhin inchhungkaw zahawmna duhpui cheuin in zai kan rawn ngai hmasa ve phawt chu a nia, jail bang em inzut tir ai chuan kan ṭhat tlanna tur i ngaihtuah zawk ila, in tlangval phei chu ala naupang a, jail-a luh ngai hial tawh hi chu an hma hunah pawh an thiltihna kawng engkimah, sumdawnna pawh nise mi rin an hlawh mawh khawp a. A ṭhatna tur kan duhpui ve tho avanga uluk taka han ngaihtuah hmasa phawt tura duh cheu pawh kan ni e." Kan YMA Hruaitu zawk chuan alo ti thung a.


"Min hrethiam ula Angaihi boral chhan leh nu Matluangi tawrhna zawng zawngte hi han ngaihtuah ve ula, chumi maia ngaidama theihnghilh zui tur chuan inti mah mah lo maw...," lungawi vaklo chunga Ramdina'n alo tihchuan, "A pawilo Ramte, an duh ang chuan ni rawhse. Kan buaina hi ka ning tawk tawh. Ka hahpui tawh lutuka, hahdam taka awm ve ka duh. Ni e tikhan kan inrem nisela, Pialrala chungah pawh
eng thubuaimah theh lut lo sela, keini chu kan ngawi a nimai." Nu Matluangi chuan a rawn ti ta mai a.


"Nu Matluang...chutiang ringawt te chu...," Mimi-i'n a tih pawh chuan, "Keimahni vanga in buai reng hi ka duh tawhlo. Kan tana ṭha ber tura ka rin angin thutlukna ka siam tawh a, min pawmpui thei ṭheuh anih chuan keipawh lungmuang takin ka awm ve thei tawh ang," a ti leh ta zel a.


A harsa dawn tihchu kan hailo tlang a, mahse kan chhungkua a ngaihtuah vang tih kan hrethiam ṭheuh thung a. Amah berin thutlukna a siam ta si a, kan inlengte pawh chanchin hrilh turin an chhuak leh ta a.


Kan nguai ruih hlawm a, chuti maia Angaihi dikna chanvo a thamral tur chu hreawm ka ti takzet a ni.


A tlai tawh a, nu Matluangi pawh mu turin a chhuk tawh a. Pialrala pawh intifaiin a ṭhiante pahnihin an bengdaih hnuah an haw san ta a. Inchunga kan awmchhung zawng khan an lo awmpui char char a, ṭhian nih hi chu an tlin ṭhin tak tak a ni.


Mut hmunah pawh Ramdina nen chuan kan la sawidun ta zel a, "Victor-a lo kalin ṭawngkam a rawn neih dan vel aṭang khan min tih thinrim tum a ang ka tireng a. Hetiang zawnga thil kalpui an tum vang chu lo ni rengin, kan naua insum zo talo kha a pawi deuh chu a ni. Nu Matluangi tan a harsat dawn tehreng nen," tiin a vei zui khawp mai a. A chhuak turin Pialrala thin tisa phat thei tur thu kher a sawi khan awmzia pawh a nei ṭha ta viau mai. Tunah chuan huatna tur chauh ka hre tawh. A nu leh pate thleng pawhin, an chhungkua sawn ka ngaidam thei kher hian ka inringlo.


A tlai tawh bawk nen keichu ka muhil mai a, zanlai pelh tawh hnua ka harh chuan tukverh bula mei zu chunga Ramdina ṭhu ngawireng chu ka va hmu a. Tho chhuakin a hnunglam aṭang chuan zawi zetin ka va kuah a, a darah beiin ka chhing nghal vang vang bawk.


"Tinge i rawn thawh duh a va mu leh rawh,"
Alo ti thum dut a, "Ka bula i mut loh chuan ka muttui theilo alawm...," phak zet hian ka ti a. Alo nui nghawr dat a, "A chhuak ngawih ngawih viau si chu anih kha mawle...," a tihchuan kuah nghet sauhin ka muhil lehnghal mai dawnin ka inhria...


"Ka zu zo ṭep lova mu rawh," a tihpawh chuan, "Ka lo nghak ang che...," meng mang hleilo hian ka ti ve tlat a. Amah chauhva inngaihtuah bing ngut ngut tur chuan awmtir ka duh bik lova, a bula awm ve tlat ka duh.


"Iva luhlul reuh e aw...," a ti leh bul bul a.


"Nupui, i mal hlau tak, engtik lai pawha i kianga awmreng ṭhin i nei tih hriattir che ka duh alawm," ka tihchuan ka banreka chelhin a malah chuan min pawt ṭhu a.
"Ka hria alawm, ka nuna thilthleng duhawm ber i ni." ti supin ka nghawng zawnah chuan a rawn thaw lum ham ham a, ka mutchhuak pawh min ti harh zo vek!


"I zuk zawh tawh chuan mu tawh ang," tia thawh ka tum chuan min pawt ṭhu leh lawi a. "Tihian awm rih ang, fian rial hun kan neih khat em hi." A ti teh tlat a. Kan pindan chhungah na na na hi chuan amah aia thuneitu awm heklo pa berin a tih tlat te chu ṭhu reng ila a nimai alawm.


Sawi tur a neih vang aniang tih rilruk laiin engmah phei chu a sawi chuang lem hlei lova, ka ban a zut a zut a, a ngawi reng ringawt. Tukverh aṭanga zan thla engin a hmel a rawn chhun chuan zûn a nei riau a, hmangaihnaa ka tluk luh chhan ngei chu a hma leh tun thlengin amah tho hi a ni. A danglam ngai lova, a hma ang thoin ka lungphu pawh ala chawk buai thei fo mai.


Ka en vung vung a, ka inrin hman hmain a hmuiah chuan ka han fawp ngawt pek a. A beisei bik vaklo aniang hamhaih angreng hmel tak hian min lo melh nghal a. Ka lai leh ringawtte chu ho ka va hanin ti mai mai tak! Fa pathum lai neih tawh hnua min en vang maia han laih leh theih mai chuh...Ka duh viau teh pawh a ni mahna...


"I lai elo?" Ka Khabe dawm chunga a lo tihchuan, "Teuhlo!" Ka lo ti nghal vat a. A awihlo tih chu a nuihsuk danah a hriat tawh reng tho. "Ka thlir dan aṭang che hian hanin hmu ve theila ka hmangaihzia che hi ka sawi ngailoin i hrethiam vek mai tur..," a tihchuan kun ngar chungin ka nui sen sen a.


Min kuai dak deuhin dam dap hian ka hmuiah chuan alo fawp vawng vawng a, engmah hi a danglam lo. Amah nen chuan engmah hi a hlui lova, engmah ka ning ngailo. A awm tawhna phawt chu khawi hmun pawh ni rawhse kal ka huam a, a pen ruala pen tur leh a damchhunga a hringnun zingkawnga tel ve reng tawh tur hian ka inpeih reng a, ani nen chuan hmachhawn ngamloh reng ka neilo.


Ka nghawnga a nul dan dan lai chuan, "Tukverh hi khar tawh ang thli a thaw em mai naupangho an hritlang ang," ka han ti leh rih a. Min bengkhawn duh eihlo. Rem leh remlo hian ka pawt khar a, ka khar zawh rual deuh thawin min pawm kang lawp a, "Khua a var ṭep tawh tho zân i vui liam law law teh ang," tia nui vur vur chungin khum lam min pan pui a.
"Awle pa-a," tia a nghawnga kuah chunga ka nuih ver ver chuan a phur hmel tawh khawp lehnghal, ka cho sual ang tih ka hlau leh deuh.


Zing chu thawh ka hai chiang khawp mai. Dar 8 tlangah ka harh a, Ramdina lah chuan min lo thawhsn daih tawh lehnghal. Nopuii leh Noteii an pawm chho tawh anih hmel a, Bawihpuia erawh ka bulah a toys nen alo inchhawp hnawk rem rum mai.


Ka inbual dawnah Thlengthlengi alo chhuk a, hruai chho nghal tura chahin ka va inbual sawk sawk a. Pialralan chaw alo la eilo hlauhva, a fapa chaw a siam hlanin kan chaw ei tur ka lo siam thung a.


"Min kaihthawh ve nghal tur che a nia...," Nopuii pawm chunga Ramdina lo lut bula tum bur chunga ka lo tihchuan, "I chauh ka ring deuh mawle..chau vak nange i tum lian thei em mai," a ti nui vur vur a. "I over em mai ah!" ti hlakin Pialrala ka ko a, kan chaw ei hlanin ṭhutkhawmnaah a fate pathum alo awm a. An han bawr laih laih hi chu a hmuhnawm ṭhin teh a nia. Bawihpuia lahin ṭawng a zir nasa tawh a, biakte hi a hre vek tawh a. Mite pawhin pangngai taka ala ṭawngtheih vat an rinthu an sawi fo mai.


Kan chaw einate ka sengfel zung zung a. Mimi-i leh Thlengthlengi chu ka nu chhawkin huan tifai turin an chhuk a, Ramdina pawh a insiam ṭep tawh ang.


Nizana pu Nghinglovate rawn kal chungchang leh nu Matluangi thutlukna Pialralan a han hriat chuan a lungawilo khawp mai a.


"A ṭul chuan ka tang mai ang pawi ka ti reng renglo. An thil tum chu a hriatreng alawm Angaihi dikna chu kan hai lang ngei ngei tur a ni." A ti ve tlat a. Mahse nu Matluangi erawhin, "Angaihi chu alo let tawh dawn lo, atana i inhuam thui zia pawh ka hriaa nang a nei che hi ka lawm teh asin. I nun chhe tel ve zel tur chu ka tuar zo lovang, khawngaihtakin ka duhthlanna hi min zah sak rawh aw. Ka fapa ang maiin ka en ve che a, i tawrhna pawh hi tawp tawh rawh se. Hmalam pan kan zir anga, Angaihi zawng, min ngai lovin Pa hnenah a chawl tawh tih kan hriat kha.
Nangpawhin hma hun engtak i nei a, dawrte hawngin nun bul i ṭan thar anga, hmeichhe ṭha tak ila tawng ngei ang. Angaihi chu hun liam tawha hnutchhiah la, i hmalam hun engtak pana ke i pen a ngai tawh. Lo let tawh ngailo tur ka fanu ngaia i indawm kun reng ka duh lova, hmalam i pan hi Angaihi duhdan pawh a ni dawn tih chu kan hriat kha," zaidam tak hian a ti a. Pialrala chu a ngawi reng ringawt.


Nu Matluangi duhthlanna chu harsa viau mahse kan zah sak a ngai si a, lungsi zan lo chungin kan pawmtlang ta a. Pu Dingate nupa chuan kan mamawh anih phawt chuan be hrehlo turin an haw dawn thlengin mi chah a, Victor-a hliam pawh a te thamlo bawka a ser lian ve khat ang.


Pawl 12 result a chhuah ni chuan Angaihi result kan han en ve a, a ruka a tuar char char chhung pawh khan theihtawp chhuahin alo zir ve ṭang ṭang ṭhin tih chu First a a pass phak danah a hriat theih mai a. "Aww...han awm ve sela chuan a hlim dawn tehreng nen...," nu Matluangi chuan a mittui hruk pah hian a ti sap sap a. Tlaiah a thlan tlawh turin kan va kal a, nakum lama lungphun a ti deuh a, a sir vela kan pangpar phunte pawh a rawn chawr thar a, a kal remchang apiangin tui kan pea a nung ṭha khawp mai.


Thla tawp lamah Pialrala pawhin a dawr chu a hawng thei ve ta a. Kan khuaa workshop hmasa ber a ni bawka siamtur pawh an nei nghal nual a, ama tawka a buai ve ṭhin khawpa a sarhu lai ang em em kha chu a ni tawh lova hmuh pawh a nuam sawt tawh viau mai.


Thlengthlengi zir zawm tur chungchang chu kan ngaihtuah a, Nurse training kha a tum ber chu a nia, ka nu leh Nuteiin, "Keini kan tlem si nula pawh kan neilo Training Centre kan hnaih alawm kan bulah lo awm rawhse," tiin an rawn sawm ngawrh khawp mai a. Thlengthlengi chu a hranpaten an lo be thul..


"Chuti taka awmpui che an chak leh i zu awm poh aniang chu, i hreh em?" Ka nu'n a tihchuan alo hnial bik lova. Hetah chuan hriatchhuah tur a lawi a tam si a, Aizawlahte zu awm thawveng sela, ṭhian thar ṭha tak chhar bawk sela hlim takin awm se ka duh.


Nuteiin admission form vel alo laksak a, ka nuin a zu thlah dawna, Ramdinan lo tiam tawh angin phone leina tur an ni pe a.
Sumo a ka nu nen an chuan dawn chuan Dawngdawngate unauin lo haw leh vat turin an chah mawlh mawlh a, Bawihpuia pawn, "Ani, Ani" a ti ve reng a. Angaihi bawm pek kha a keng tel zel a, ala hawnglo niin ka hria. An tlan liam thleng chuan kan thlir zui a, min ti hnim ve ruih thei alawm.


Thlengthlengi awm talo chu a Tlaizawng kung phun kha tui pe turin tumah kan kal hman ṭhin si lova kawtchhuah ṭhian pali pawl zirlai ho school kal tur hi ka chah ṭhin a, school banah hian an rawn report kawi leh ṭhap ṭhina, pocket money turte hi ka lo pea thu an awih thei khawp mai fuih pawrh pawh an nuam.


Nu Matluangi pawhin dawr a hawng leh tawh a, hma a sawn ve zel a, amahin an in pawh a luah lum leh thei ta a. Kan zu len thlak changa an inbanga Angaihi thlalak lian leh fiah taka a tar ka hmuh chang chuan rilruah hian a thar leh vawng vawng zel. A sir lawkah a pasal thlalak nen, mahnia a han khawsa rek rek hmuh chang hi chuan hnuk hi a ulh ṭeuh zel.


Champhai lama a unauten an bula cheng tawh tura an rawn sawm ngawrh viau pawh hian, "Ka pasal leh ka fanu lu nghahna chu ka lu nghahna tur ve tho a ni a, ka damchhungin he in hi ka chhuahsan dawn lo," a ti hmiah mai a. An unau nuin a rilru a thlak dawnlo tih chu an chiang ve tawh bawk aniang an reh zui ve mai bawk a.


U Cki pawh a puar ve alh tawh a, a raino lai ang em em kha chuan a chhe tawhlo. Tun chu a rawn thau ve leuh deuh tawh a, dawrahte hian a rawn kal a. Ṭhut mai mai pahin kawr pahnih khat te hi min rawn chei zawh saka, ṭha hnem hi min ngaihpui ve ṭhin si a a ti lawmawm ṭhin teh a nia.


Tluangi pawn min chawlhsan ṭep tawh a, ṭan ala ve ṭhin khawp mai. Pa Chhuana pawh damtea awmchuan kum hnih hnu maiah a pension ve tawh dawn a, an serthlum huan enkawl bakah dawnfawh chin a rilruk thute a lo len ṭum chuan a sawi ve luam a. Sangkimite chhungkua pawh mas hmang tura rawn zin an tum a ni awm a, an fanu Daisy pawh hmuh a chakawm tawh alawm le. Bawihpuia aiin a thlain a nau hret chauh a, a lian ve tawh ngawt ang.


Thlengthlengi chuan alo tum tawh angin Nurse chu a training ṭan ta ngei a, ka nute chuan a zu awm chu nuam an ti khawp lehnghal a. Ka pi khawhar pawh a hnem ṭhin viau anih hmel...


Thangtea te pawn nau an pai leh hlauh mai a, kan Thangvara han lawm vur vur zia chu aw...indim a ngaih avangin Zopuii pawh a han duat laileng khawp a. Lalruthi-i sawi uar phei chuan, "Khuma a lawn tur leh chhuk tur pawh hi a hlâng thlap thlap." A tia fiamthu nge phei chu ka hrelo a sawi uar thei ṭhin khawp mai.


"Khatin mi ti mi ti suh Lalruthi, i bialpa Rahul-a hnenah ka sawi a nimai," Thangtean a tihchuan kan nui dar dar hlawm a. "I ninawm sawi ve ziah suh! Ka rap reuh tak tak a nia! A khup a dum reuh si!" Ruthi-i chuan a tih deuh pang pang a.


Damdawi in khi a tharin an sa dawna chumi atana JCB Driver vai Rahul-a Mizo ṭawng thiam zet hian Lalruthi-i hi alo melh tai ve deuh a ni awm a. Pakhat lah hian a ṭih tak te hian a ṭih lehnghal a, ṭhiantehoin fiam nan tak an hmang zuia kan nuihpui nasa ṭhin teh asin.


Damdawiin sak dan rawn ruahman tur Engineer leh Interior Designer unau pahnih mikhual kan han nei phei chu kan khaw nula ho khawlai chhuak pawh an paw phek zel mai a, a ṭhen mai tai ang hlar annih laiin a ṭhen an vam ham reng mai a.
Engineer zawk chu a nau zawk niin Jaden-a a ni a, a u zawk Interior Designer erawh Tetea an ti mai a, khawpui tlangval tih takah hmuh an nuamin an fresh vang a, an hmel lah chu a sar vuah mai lehnghal a. An sa a ṭhat bakah an san dan pawh a tawk chiah a. Hmeichheho duhzawng tur tak anni.


Zanlaiah call kan dawnga, Andrew-a hnen aṭangin a ni. U Cki nau a vei mek a ni awm a, kan han tlanchho ve nghal a. A Doctor bera chu a awm hle hle thei lova, a nihna leh engkim chu a theihnghilh vek a ni ber va luh te a tum leh rum rum zel.


"Sawtiang sawn ka nau vei laiin i awm ve ngai em?" Ramdina bula ka tihchuan, "Andrew-a awmdante saw chu awmlo ang vel...min hmu la chuan i nau vei lai pawh kha min hnem turin i rawn tlanchhuak duh hial maithei a ni." a ti vela a over leh pek khawp mai.


Darkar khat dawn kan nghah hnuah u Cki chuan fapa a hring ve ta. Amah pawh a ṭhaa Andrew-a chu a lawm vur vur khawp a, anu te pawh chanchin a hrilh nghal zung zung a. Naute chuan Andrew-a a chhun deuh zawkin ka hria. Ti ila mahni fa anih loh vang nge ka la hmuthiam chiahlo.
Tun aṭang chuan an buai ve tawh khawp ang chu.


Nu leh pate kan nih tawh laiin ṭhenkhat erawh an la leng hah hah reng a. Zothanpuii pawh a bang chuanglo. Vivi-a nen an inzui reng a, make-up te chu ka zir e a tia a star pa bialnuin in chei tir turin alo la dawr zui a ni awm a, a chhuah pangngai em ang chu.


Hunpui chu Sangkimi te chhungkua an rawn zin a, an fanu te chu a duhawmin a hmelṭha reuh hle a, Bawihpuia nen an inkawm tawk phian a mahse hepa pui hi a inla pa ve deuh nge ni a kawm ṭha duh ṭhaklo nia mawle! A farnute a lawm viau laiin a mak ve reuh tak tak a ni.


Kum thar hmang turin Thlengthengi pawh alo hawng a, Aizawl a ngeih deuh nge ni a rawn ṭhan belh nasa a, a vun pawh a no surh mai.


Alo haw ni tlai la laah School tlangah a han kal a, a Tlaizawng kung phun pawh ka mi chhawr ten tui an pe ṭha bawka alo duah ve hluah tawh nghe nghe a. Chulai hmunah ngei mai chuan kan kum duhawmlo ber mai Ni hnuhnungber thlir liam tur chuan kan ding ṭhap a.


Fam changta te thinlungah an thar a, nunhlui lo thar lehin engkim chu mitthlaah chiangtakin alo lang nawn uarh uarh a.
Harsatna leh natna kara chakna min pe a, hmalam pan thei tura min khai dingtu kan kianga an lo awm tlat ṭhin, kan tana mi hlu leh pawimawh takte avang hian eng anga hun khirhkhan leh harsa pawh kan lo hmachhawn thei zel a. Khang hun harsa tak takte kha tunah chuan 'Nunhlui' tiin a hming kan vuah tawh anga, hmangaihte nen Ni tharin kum thar alo her chhuahpui leh hunah nun bul thar kan ṭan ṭha leh ang.


Ni chu a liam ta, kumhlui ngaih hla an play dap dap a, a Tlaizawng kung phun bula ṭhu chunghian Thlengthlengi chuan, "I tello va kum hlui ka thlahna hmasa ber a nia, heti tak hian kumhlui hi ka ngai ang tih ka lo ring pha ngailo. A leh peka i awm ve tawhlo tur hi awih harsa ka la ti fan mai...," tiin ral lehlam chu a thlir vang vang a.


'Fam ngaih zûnlêng tuar chuan chin lem a ei love' hlaah pawh an tih kha maw...Nghilh ni reng i awmdawnlo anih hi Angaih.


Thlengthlengi Aizawlah a chhuk thla leh tawh a, hnalamah kan bur leh ṭan a. Kum a han thar chu Bawihpuia te unau pawh an nula tlangval ve leh sawt a, Nopuiite unau pawh an hrisel ṭhat lai tak a ni a ka hlim kher mai. An nuṭa erawh duh ai chuan a ninhlei mah mah ṭhin chu a ni.


Ka dressing table-a ka incheinate hi alo hai hnawk vek loh leh lisptick te hi a naute hmaiah alo va tat thul...Zawng nen awmdun tir ila a Zawng a zawk pawhin ṭhu mai mai pahin a en tawp ang tih tur vel a harh a ni. Apa nausen lai a chhun a ni hrim hrim! Heti em em ka nih awm pawh ka hre ngailo.


Coco-pawh a ham pawr zo vek tawh a, a bulah pawh a awm ṭha duh ngailo.


Chutiang reng reng chuan hun kan hmang a, Tluangi pawhin school-ah min thawhsan ta a. Puanṭhui tur ka mamawh belh ta khawp mai a. Ka rin zawng lah hi an vang hrep lehnghal. U Ṭhakimi leh Mafeli tlawng an ni a, Thanpuii bawk ka be leha henu pui lah hi rawn tlak a ni chei silo. Kan buai lutuk a zia tawh tho bawka ka hmanhmawh talo mai.


Pialrala pawh a dawr chu a kaltluang rih viau a, tlailamah hi chuan a rawn thim haw ngei ngei zel a. A thawhnain a zir bawka a rawn bal haw nian nuan zel a, Bawihpuia leh Coco-an an lo ngai tawh ṭhin si a kan phi buai sek zel mai a ni.


Zanah puan zaiin ka mengrei deuhva, mu tura ka in tintuah meuh chuan dar 11 a pel thui tawh viau mai. Kan fate an muhil ṭhap tawh a, Ramdina'n min lo la nghak ngat ngat thung a. Engmah tiloin khum aṭang chuan min lo en reng ringawt a, min en laih a tum deuh nge mawni.


Ka mutthlak rual chuan min lo kuah a, "Vawiin chu ka ngai lutuk che...," a ti leh tawh. "Min ngai reng mai," ka tih nuih hak chuan, "Ngai reng e, i ngaihawm alawm.
Nimin khan ka ngai che a, vawiinah ka ngai bawk che a, naktukah pawh ka ngai zel ang che. Kan hringnun thawnthu hi ziak dawn ta la a thupuiah eng nge i hman ang?" A tihchuan ka ngawi vang vang a,
"Ummm Thingtlang Mistiri leh Kei ka ti ang," ka tihrual chuan ka hnarah alo piai zauhva.


"Kan inhmuh hmasak ber ni kha ila hria em?" Ka tihchuan, "Engtin nge ka theihnghilh theih ang i hmel aiin i awmbawr ka hmuchiang zawk," a tihchuan ka nghawk deuh sawk a. A nui huk huk duh chauh.


"Siamtu khian alo ruat thiam ngawt mai, keini pahnih min intawn tir dan hi beiseiloh lam daih aṭangin a nia...Thingtlangah Mistiri pasalah neiin fa pathum kan nei anga dawr te ka hawng ang tih hi vawikhat tê mah ka la ngaihtuah chhin ngailo. Mihringte hian kan hma hun kan lo hrelo ngawt mai. A chhia emaw a ṭha zawng pawhin nise...tunah chuan keimah chauh ka ni tawh lova, 'Kei' ka awm hmain ka hmaah 'Thingtlang Mistiri' i awm zel tawh a. Ka hringnuna a hmasa ber leh hma hruaitu i ni a, i tello chuan kei hian thawnthu ngaihnawm tak sawi tur ka nei hauh lovang. A bul ṭanna chu nangmah i ni a, a tawp kharna pawh nangmah tho i ni dawn a, ka hringnun thawnthu awmtheih chhan leh engkim bul ṭanna chu nangmah vek i ni," ka ti deuh duah a, zanin chu ka khat liam ve tlat a tin ni.


Ka biangah alo chul heuh heuhva, "Nang tel lovin kei ka awm lova, chutiang bawkin ka tello in i awm theilo. Inkawp rem tura khuanu duan zinga kan pahnih kan tel hi chu Khuanu hian a duan thiam ka ti...," a ti rilraih a.


Vawitam hetiang hian min kuah nawn mahsela kham ni reng ka nei thei dawnlo.
A thlazar hnuaiah ka hlim a, ka chhungkua ka chan lai pawha chunglamin ka kianga awm tlat tura min pek hi engtikah mah ka thlah lovang. Tawp chin nei lovin ka hmangaih anga, ka damchhung hun hi kan fate enkawlin ka hmangral ang.


Ka muttui lai ka ṭhangharh hlawl a, ka sira mi chu a muttui khawp mai. Min kuahna chu dimtea la sawnin zung turin ka thova, bathrioom aṭanga ka chhuah chuan banga sana intar chu ka han en a, zinglam dar 2:10 vel a ni.


Pindana luh ka tum lai takin kawt kai maia guitar perh ri ni awm tak ka hriat chu va enchian tumin kawngkhar aṭang chuan ka va dak chhuak a.


"Liampui tak ang maw
Hun leh Ni-te hian,
I sulhnu leh hlimthla,
Hmangaihtu thinlunga cham reng ṭhin hi.
I thawm ri rehin, i nuihmel mawi thlir tur awm tawh lovin, an sawi Pialralah chuan leng tawh mahla.
Hmangaihtu thinlung thuk berah i nung reng si...
Hmangaih tello Hmangaihtu chan i dawn lo em ni?
I zûn ngaiin nau ang ka ṭap,
Pialleia parmawi ber pawn chuai ni a nei,
Nang erawh tawp chin nei lovin i vul reng tawh ang, Pialralah."


Tiin vanlam thlir chungchuan lungrun tak hian alo zai a. Vawiin hi April ni 20 a ni tak e. Nikum tun hunah chiah chiah hian kan ngaih em em chuan min liam san ta anih kha...


"Pialral awmdan min zawh kha ila hria em? Tunah chuan ka rin thu ni lovin nangmah ngeiin i han hmu tawh ngei anga, a nuam viau aniang maw i reh zui tak hmak hi." Tiin a phun sup sup a.


A bracelet chu tuai roh rohin thawk a la hawk a, "Lo thlir reng rawh pawikhawihtu chu keimah ngeiin hremna ka pe anga, hreawm takin a damchhung hun ka hman tir ang. Chu chauh chu itana ka tih theih awmchhun a ni tawh a, ka tihlawhtling ngei bawk ang." Tiin vanlam bawk chu a thlir leh a. Ka luh san ta a.


Hringnunah hian thawnthu angin tawpna hlimawm tak a awmtheiin ka ring lova, tumahin kan dan theihloh leh pumpelh theihloh thihna chuan kan chungah thla ala rawn zar ṭheuh anga. Chumi hma chu kan tun huna kan hmangaihte nen am taka hun kan hman hova, second tin mai ngaihlut nachang kan hriat hi alo pawimawhber a. Engtikah nge kan hmangaih tak, kan kianga awm te hi kan chan dawn kan hrelo. Chuvang chuan hriatreng tlaka kan hun tawite hi hman ral ka duh a. Tihian kan thawnthu pawh ala in ṭan dawn chauh a, engtik ni ah nge engtik hunah nge a tawp ang ka hrelo...Mahse, kan thawnthu hi chu Pialral thlenga chhunzawm ka la duh a, miten min hriatpui lo mahse, aman a theihnghilh loh phawt chuan chu chu ka tan a tawk a, A phek hmasa ber ka ziah dunpui Thingtlang Mistiri nen hian thawnthu tawp thei ngailo tur ziah dun zel ka duh a ni.



A TAWP TA.
Show post links
Top