STORYFB.COM

In hnuaiah chuan kan inzui thla leh a, U Mafela'n ka kutah chelh tlat lo sela chuan ka chhuk thla ngam tawh kher pawn karinglo. " Kapa hmu lawk ang aw " Atih chuan hreh zetin kabu nghata, " Hlauthawng suh, kapa chuan angaina lutuk che alawm " Ti supin min nuih a, Pu Sangkima sualloh zia chu hre mahila Pi Zothani avang khan ka hlauthawng lo theilo a, hmachhawn chu ka huphurh lutuk.

Ṭhutkhawmna lam chu min panpui a, U Mafela in ringtawk lutuk chuan ka awm pawh ati nuam vedeuh a, ka hahdam deuh dawn apiang erawh chuan Pi Zothani ṭawng te kha ka hrechhuak leh ṭhin a. Khati teh tawpa in duh loh kha chu katan hian atlawm thlak a, ka rilru ana in ka damchhungin ka theihnghilh tawh in ka ringlo.

" Kapa " U Mafela'n ati ri ah chuan ka ngaihtuahna aṭangin ka harh zawka, ṭhutkhawmna kanlo thleng fel der tawh alo ni a, kan thlen lai ka hrelo reng reng; Pu Sangkima chu single sofa nalh zetah hian alo ṭhu a, amah a palian si a azahawm khup in kahria. " Eng nge nita, eee..Inlo thleng tawh animaw? " Ati hluai a, a phone en lai chu dahin keini pahnih chu chik deuh hian min en kalh a, ka zam leh viau tawh.

" Kanlo thlenna arei tawh alawm " Ti sup in " Heihi ka bialnu Lalnunkimi ania, Pu Vanṭhuampuia fanu " Atih zawm a, a-pa hmaa zep miahlo a 'ka bialnu' atih avang chuan ka zak lutuka, ka biang mai nilo ka taksa zawng zawng hi asa chhuak vek a, U Mafela erawh zak emaw nuamlo ti hmel a pu velo hrim hrim, hahdam huai hmel hi a pu zawka, a landan hahdam lutuk te chu ka thik zawk e a. " Ka hre tawh alawm, ka duh aiin min hmelhriat tir har a, keimah kalo inbeng var tawh tiraw Kimi" Nelawm zeta nuih huah huah pahin ati a, a ṭhutna aṭanga ding meuhin min chibai bawka, zahawm vetak ani.


" Eng nge awmzia " Bo hu a U Mafela'n atih chuan Awmze nei zet hian Pu Sangkima chuan minlo melh a, lai zetin keipawh kalo nui ve tawp; Khwlaia kan inhmuha 'ka monu hual' ti a min fiam vel kha asawi tih ka hrethiama, U Mafela'n ka hrilhfiah beisei zeta minlo en chuan ka hawisawn daiha, engtin nge tunah ka sawifiah ngam tehlul ang le, min beisei ngam zawk e a. "Kapa eng nge awmzia" ati sek seka, Mipa naupang thil hrechak lutuk phi cheng hi a ang ber. Pu Sangkima chuan thil awmzia chu a hrilhfiah a, "Chu Kapa, Bawihi hi ilo ti zak leh hle dawn tihna animaw" U Mafela'n atih chuan " Ka insum theilo alawm" Tiin anui leh a, kan boruak chu ka rin aiin anuam a, Pu Sangkima chuan boruak athlak ti ila ka sawisual lovang.

" Ding reng lo khan lo ṭhu ve ula, Bawiha i bialnu kha ka eisak miah lovang che " Pu Sangkima'n nuihza insum zetin keini pahnih chu min en a, " Chutiang pawh anilo, i hman chuan chaw ei mai ila kati a, Bawihi hi an in lamah abuai ve a, heta rei tak lo chelh pawh anuamlo " U Mafela'n ati ta hlauh a, ka thaw huai mai. " Chuti tur maw, ka inpeih chu animai, i nu te hi an lengchhuak leh tawh ami? " Tiin a hawikual thuaka, ṭullo zetin kan buaina kha ka ngaihtuah chhuak leh a, thawpui kala hluai ringawt.

" Bawihi, i hreh loh chuan Ziki kha chaw ei va siampui la, kapa nen kanlo kalang " Min en ran pahin ati a, Apa chu thilsawi pui duh anei anih ringin keipawn ka hnial hranlo a, "Aw le, kava kal ang " Ti sep in ka nuih seih a, ka kut a vawnna athlah rual chuan in herin an pafa chu ka kalsan a, "Kapa, kanu te chuan kan rualin kil ve rihlo se kaduh, Bawihi ka thlah hnuah kanu nen biak che u ka duh bawk.." ka kal hlat hmaa an thusawi chu ka hre hmana, ka kal tak zelah erawh ka hre chhunzawm lo a, U Mafela chuan tinge a nu leh pa te chu abiak duh ang tih ka ngaihtuaha, Vawiin thil thleng vang kha anih ring leh siin thil sawt lo lutuka ka ngaihtuahna ka seng vak chu ṭullo ka ti khawp mai. Choka ka lut min hmuh rualin Ziki chuan minlo nuih leh var var tawha, Pi Zothani ṭawngkhum dan kha ana ve thawkhat a, chuti chunga alandan danglam chuang miahlo chu amak kati a, a inthunun thei lutuk chu a fakawm kati, lehlamah erawh ka tawrh ang em a zahthlak leh thu hriat nuamlo a tuarin adawng velo thung a, a tuar vaklo pawh chu a awmlo hranlo.


Thil thleng awmlo ang hmiahin minlo be bawrh bawrha, chaw ei an duh tawh thu ka sawite chuan "Aw, lokal rawh siam ila, min puih i chak kha " tiin min nuih sen sena, min be siam siam bawk nen rilru kawm na hun kanei lo a, a tihzia kati viau, Chaw hmeh chu asiam tam lutuka, dawhkan alen tehlul nen kan inrem lenglo lek lek a, "Tukinah U Mafela'n min bazar tir alawm, atam thei ang ber siam rawh minti si a, ka siam ṭeuh anihhi " Ziki chuan ati a, sawi tur hrelo zetin ka nui mawl tawp. Keimah avanga hetiang em em chaw hmeh siamtir kher chu aṭullo ti mahila min ngaihsakna atih lanna ani tih hria in ka lawm a, thu in ka lawmna hi ka sawifiah zo lovang.

Chaw ei kan siam zawh ah U Mafela te pafa pawh anlo lut ve a, Pu Sangkima chu anelawm kati tawp theilo, Khawlaiah in hmu in min be ve fo mahse, heti taka nelawm anih erawh ka ringlo hrim hrim a; A palian in ahmel hi anelawm loh a, anui ve huah huah ṭhin ang tih ka ring phalo reng reng. Pa rilru chhia leh kherek anilo ang tih chu hre mahila Pa nelawm leh ṭawng duh fiamthu duhtak ani tih erawh ka hre ngai hauhlo a, a zirlai te pawn 'Principal Sangkima chu a strict e, a nelawm loh si ' anti ziah a, tuna ka hmachhawn erawh khawvela pa nelawm ber ani thung.

" Zikbawih, nangpawn min kilpui la tiraw? I u Mafela piancham ani a hlim takin ei ho teh ang u " Ti dam thluamin " Kimi nangpawh inthlahrung lo la, adaih hma hian ei thuai thuai teh ang u " Amah bawk chuan ati leh a. Bu nghata Ka ṭhutna tur chair ka pawhchhuah dawnlai chuan U Mafela'n min lo chet khalh a, mak ti leh hrilhhai fe a ka enlai chuan " Romantic minti em? " Ti supin ṭhu turin min signal zeuh a, a inla zei kual vel lutuk chu ka ei hlawllo. Pu Sangkima leh Ziki an awm vereng laia chutia min duat kual vel chu zahthlak ti viau mahila nui sen sen chungin chair min pawh chhuahsak ah chuan kaṭhu ta tho a, ka ṭhut fel hnuah ani pawh ka bulah alo ṭhu ve nghala, "Ei ṭeuh rawh, i puar loh ka hlau ania " tiin a mit achhing a, aṭawngṭai tih hrilh hranpa ka ngailo, kan in anih loh bakah ka rilru a vak kual nasa lutuka ṭawngṭai pawh ka theihnghilh hman ṭhelh a, U Mafela chu ṭawngṭai lo sela ka theihnghilh hmin hmak ngei ang.


" Kimlo deuh mahila i hrethiam mai aniang chu, leng haw nachang te hi kan hrelo ṭhin a, chhungkaw kim a chaw ei te hi kan nei khat ania; Mahse, i lo awm ve hunah chuan kan danglam deuh turah ngai ila, kan phuisui sawt ngei ang " Ti duahin Antui chu a hawp ri hraih a, Tawite in ka nui ka nui ringawt a, chhanlet dantur avang ve em bawk ani, U Mafela lahin chaw hmeh min suahsak reng a, ka thleng chu a khat hnur tawh mai, ti tawh lo tura ka mitmei lahin ahrethiam lo der tlat a, ruai ṭhet ang mai niin ka inhria.

" I Nu Zothani te awmlo chu nuamlo i ti em? A hmuh duh loh vang che emaw te kha ilo ti ang e " Atih leh chuan "Nia..aaa..chutiang in ka ngai hleinem " Kati nawi niaia, Ka chhan dan bah niai avanga Zah nak laiin U Mafela chu alo nui suk a, ka ngei tak tak ani, kan awmna in zir sela chuan ka chum pawp duh ang. "Kum 30 hnuah ka fapa upa berin a bialnu alo hruai haw veta hram a, tu mawng ben chak reng renga awm tawh tan chuan hei tluka hlimawm hi a awmlo reng reng, ka phur teh ania aw Kimi. Nangpawh in peih harlo la, Bawiha lah a naupang tawh silo a, fa innei tam theilo ang tih ahlauhawm a, innei vat ula asuallo ang, i inpeih hun hunah min hrilh la palai kan lo tir nghal ang, Paaai tur pawh ka befel vek tawh " Chaw ka ei tui ve ṭan chiah tih a Pu Sangkima thusawi chuan minti lai zo leh vek a, ṭullo zetin U Mafela chu ka melh zeuh bawka, ani erawh chuan apa chu thlawp zetin alu abuk pui nghat nghat thunga, chaw eilai chuan chutiang chu sawi tawh lo se kati tak tak ani.

A zahthlak lai chu lo dahṭha ta ila Pu Sangkima'n min iai na anei miahlo leh a fapa bialnu ka nih avanga alawmzia asawi te chuan anupui min ṭawngkhumna avanga ka rilru na te chu thawi dam zolo mahse, a chhawk em em thung a. Mipa te hi chuan engkim an pawmthiam a, an rilru a tluangin in rilru kherek deuh hi an pu ngailo tlangpui a, engkima abuaithlak leh sawisel tur hre tam zawk hi chu hmeichhia hi kanni leh ṭhin anihhi, kan buaithlak asin.

" Fa neih lamah kha chuan Lungngai suh kapa, ka hmantlakna tur kawng tak ani a, ka ngaihtuahawm lovang" U Mafela'n atih chuan insum hman lovin a ke chu ka tlawhsak nawk a, ala phu uih zui! Min lo en rualin rum fe hian kalo melh a, ka melh rum vena chu pawisa lo zetin ala nui mai mai lehnghala, "Mipa nih chuan engkimah a ber nih zel tum tur " Pu Sangkima lah chuan ati leh zela, Ziki pawh nui ring ngam silo in anui ve pat pat renga, vawiin zet zawng U Mafela birthday chauh anilo an pafa day anih zawk hi a.


Zanriah kan eikham a, U Mafela leh Pu Sangkima remti vaklo chung Ziki kapui a, Ziki pawn 'I che ṭhang silo a, i khawr lutuk ang minlo puilo mairawh' ati na in kapui lui tho a, thil tihdan tur vel min hrilh zung zung avangin kabuai chhe lemlo, thleng sil erawh a phallo bur a, keipawn ka chuh lui biklo a. Dawhkan ka tihfel lai chuan U Mafela'n min vil deuh run a, ka inpeih veleh ka kutah lo chelhin "Khua pawh ala tlai chhelo, reilote ṭhu hahdam ila ka thlah ang che " tiin min kaisawn a, ṭhutkhawmna lam min panpui in Pi Zothani te hmuh tur anla awmlo cheu chu amak kati a, an leng nilo in an room ah antawm anih te ka ring hial tawh zawk. Pu Sangkima lahin anupui awmlo chu a ngaihven vaklo a, an chhungkua chu chenchilh kherlo mahila an hausa in an changkang hle tih loh chu anawm bik vakna kahre hauhlo.

Pu Sangkima titi ngaithla in kan ṭhu khawmuang veleh a, sawi tur ahria in a titi chu a sang hranlo a, An ṭhenawmte vawk in note aneih chungchang te mai mai ani asawi, ka hriatthiam loh tur leh ka awm ti nuamlo thei thil engmah sawi aneilo hrim hrim, U Mafela chuan apa thilsawi chu azawm zeuh zeuh a, an thusawi chu hrethiam ve tho mahila ka belhchhah ve lemlo thunga. politics lamte sawi kaiin, kan khua a politics kan lak natzia te an sawi chho a, " Thingtlang ah pawh khaw te(Small) zual apiangah politics hi anla na a, VC inthlan te MLA inthlan te hian an inhmu sakhi em em zel a" Pu Sangkima chuan ati a, chu kher chu ka thlawp viau a, ka lu kalo ka buk pui nghat nghat a, ka inlak mitak ve tehlul nen U Mafela nuih ka tiza viau lawia.

Kan khua ah pawh hian politics la na fal deuh deuh an awm a, midang sawi chhe reng reng a politics khel lah bo lo, inthlan dawn apianga candidate te aṭanga hlawkna lo beisei ziah mihring lah an kat nuka, rinawm deuha in sawi a, an khabe hnuaia nui heuh heuh chungin aruka pawisa tlemte hmanga lei theih mai mihring rinawm lo leh pamham deuh an awm bawka, hengte hian khawvel famkimlo tak hi anti famkim hliah hliah hian ahriat. VC inthlan a awm dawn lahin an hmel kan hriat; Mahse, mi hrang hlak nisi hi kan hmachhawn ṭhin a, ahma pawha min be ṭha duh ngailo te khan kan in ah minlo len chilh meuhin min nuih tlawn seuh seuh a. Ahma a kan hriat ṭhin ang nilo mihrang hlak ani kan hmuh ṭhin, an ka pawh zen ila emaw ṭawngkam chhe deuh pawn ṭawngkhum mahila min thinrim khum lovang tih tur anni a, an thil phalin pawisa min pek maite pawh an hreh ngailo.

Mi khuate chu ka hrelo a, kan khua ah erawh politics ṭhing zet hi anla kalpui a, ala na leh atchilh tawh na laileng te hi chuan an lam ṭang lo deuha an hriat te chu an chhung hnai tak pawh nise an do hmak hmak thei a. Tun hnaiah erawh tlem in boruak azia chho a, ahma anga in hua leh in do inbe duhlo ang kha an awm vak talo a, aruk tak erawh chuan ala tenawm tho, ka ngaihven loh zawng anih avang hian ka hre tamlo a. In thlan dawnah erawh mihring nilo a mawi vantirhkoh ang hiala zaidam leh thil phal kawtlaiah an in sul pel suau suau a, Mi ṭha leh Rinawm, kan khaw hmasawnna tur hlir ngaihtuah an tam tih kan sawi hrim hrim ang e, inthlan a zawh hnuah erawh kan khua hi Piangthar da leh awm khawm kan ang.

Mipui lam pawh hi kan mak ve a, mi rinawm leh khawtlang hmangaihtu kan mamawh ti chamchi siin khawtlang hmangaihtu leh mi rinawm tak tak, tum leh ruahman felfai tak nei te erawh kan hawisan leh ṭhin a, chu ai chuan khawtlang tana tum leh ruahman felfai tak pawh nei phalo te zawk kan thlang tling leh a, achhan pawh Sum vang tho ani, sum in kan in lei tira, hlu ta riau ah kan han in ngaia, anihna takah chuan kan hlu lo a, kan hmuhsitawm hle zawk ani, pawisa hmanga kan vote min leisak tute hian min ngainep a, keini ai chuan an sum a anlei ve theih loh mihring te zawk kha an zahin an ngaisang zawk daih.


" I ngaihven zawng kanlo hre har anih hmel hlemai a " U Mafela'n ati ri ah chuan ka harh leh zawka, ka ngaihtuahna ka hmangkual leh chiam tih inhrethiamin Pu Sangkima chu za lo fe hian kanuih a, " Chutiang anilo " U Mafela en zeuh paha ka tih chuan nuihza hmel hi ala pu renga, " I ngaihven zawng anilo a; mahse, i rilru chu ala peng itihna emni? " Tiin nghal zet hian amit hmul ati kang zeuh a, min fiamkual vel chu ngei zetin a banah ka bensak thlawp a, Pu Sangkima nui ri ka hriat rualin ka ṭhen vak ringawt ka che khir takzet ani.

" Ka...englo ka ngaihven hleinem, Insawi chhuah takah chuan thil thleng tawhte ka ngaihtuah kual mai mai alawm " Ka ban vai meuhin kati hliai a, Politics ngaihven lutuk anga min ngaih chu ka hlau ani ber. An ni pafa lah chu annui dun hawk hawka, tih ngaihna hrelo fe in ka en dun reng a, ka nuihpui duh eih lo thung. Chutia an pafa a min nuih lai chuan Pi Zothani alo haw ve ta hlawl a, chawp leh chilhin ka in sangmar leh nghala, U Mafela'n ka kut lo vuan vat lo sela chuan ka haw nal nal duh ang.


" Khawnge i len bo leh a, i mo nu hual pawh i hmu hmanlo lek lek alawm" Pu Sangkima chuan alo ti zung zunga, Kan boruak ṭhalo zet kha U Mafela'n ala hrilh lo tih ka hrethiama, hrilh kher lo mahse apawi ka tilo, Pi Zothani chu tim daiin ka en a, zalo tih hriat lutuk hian alo nui ve a, a pasal ahlauh avangin min duh loh na ati lang lo mai mai niin kahria, U Mafela te pafa hi awmlo ngat sela chuan thip ram in min melh leh tawh ngei ang, tunah pawh ahmui chu anui a amitmeng erawh ahriam in min huat hmel ngawih ngawih. " Nichinah kalo hmu tawh alawm " Phur hmel deuh hian ati a, a inthunun thei lutuk chu amak kati a, sawi ber tur pawh ka hrelo.

" Pa, atlai chhiat hmain kava thlah ang e " Ti hluaiin U Mafela chu a ding a, a din rualin keipawh min pawt tho ve zat a, Ka awmdan nuamlo ru zet chu aman thiam pawh ani mahna. Pi Zothani lo lan hma kha chuan ka inthlahdul ve viau a, tunah erawh ka in sangmar nasa lutuka ka hah vek tawh. " Haw tawhlo maita che Kimi " Pu Sangkima'n atih thut chuan rang zet hian ka melh nghal a, a fiamthu anih ka rin laiin ani erawh alo thutak viau a, zalo fe a nui hakin Pi Zothani chu ka en zeuha apasal thusawi chuan ani pawh aṭhawng tih ahriattheih. " Kapa i ti tak tak emaw ati ania" Nui hawka U Mafela'n atih takah chuan Pu Sangkima pawh chu anui nghal huah huaha, ka thaw huai mai. Fiamthu athawh te chuan nuih ve tal tur ania minti mangan hman takzet ani.

" Ka fiamthu hlut na a, mo kan mamawh tawh viau tih erawh hrereng rawh aw, ka mit i tlung hle bawk ania, i inpeih hun hunah keini chuan palai kanlo tir nghal ang, tu mawng ben ka chak tawh teh ania " Phur surh hian ati leh suam suam a, "Nia" tih chauhin ka chhang a, chu aia ṭha a chhan chu duh mahila ka ngaihtuah chhuak zo tawhlo. U Mafela chuan min kalpui a, ka bag ka ak tur chu min chhuh in anghawng ah a bat leh daiha, hmeichhe bag mah nise a inhmeh loh na ka hrelo, ka tana atih ani miaua, hmeichhe dang bag chu nise atuai kati maithei.

A hma chuan mipa in hmeichhe bag an kensak kher te hi kalo ngaithei vaklo ṭhin a, Film leh story velah te pawh ani tho; Mahse, hetia ataka kahan tawn ve takah chuan a athlir tu leh a tawng tu dinhmun chu alo in anglo khawp maia, a thlirtu ka nihlai kha chuan a ṭullo ti viau mahila atawngtu ka nih takah chuan thil ṭul leh mipa in hmeichhia a ngaihsakzia atihlanna kawnga thil pawimawh tak aniin kahria. Ṭawngkam hi chuan rilru chu ahneh teh meuh maia, chetzia erawh chuan rilru leh thinlung a hneh thung a, adanglam ani.

Kawngkapui kan pelh fel rualin thawk kala ru huai a, U Mafela'n ahriatthiam erawh kahlau a, Mi a anilo a ahriatthiam loh erawh ka ring chuanglo; Mahse, langsar taka tihlan chu ka duh biklo a, keichuan tihtak zetin anu hi haw thei mahila ani chuan ahuat tak tak theih dawn loh avangin a dinhmun hi a laklawh a, tunah pawh hian arilru abuai ru takzet dawn tih kahria.

" I rilru ti hreawm lo la, Kapa thu chu kanu khan ahnial dawnlo a, engpawh thleng se kan Pahnihin kan paltlang ang aṭha em? " Min thlem titih a atih chuan " Umm, keichu kaṭha alawm, i nu kha thinrim khum chiamlo turin ka duh che " katih chuan muk zet hian min en vung vunga, "Ahriatchian hunah che chuan kanu hian angaina dawn lutuk che " Dam dapa tiin mawi zet hian min nuih a, nuih let veloh theih pawh anilo.

Khua chu a dul ruih tawh a, la thim em lo mahse, a tlai fu tawh tih erawh ahriat a, " Lawk Bawihi" a bike hunna lam kan pan lai chuan ati hluaia, "Eng nge" Ngaihṭha lo zeta ka tih chuan " Senior hri anihhi, ka bike chahbi ka keng chhuaklo " A lu tuai vut pahin ati a, ka inrin hmain ka nui chhuak a, ka insum hmanlo, alandan chu nuih loh ahar ve em bawk ani, tum burin min en thung a, chute hlei hlei chuan kanuih ati za zuala, tihtak zetin ka pum dawm meuhin kanui a, ner nung chunga U Mafela phun hluk pawh chu hre mahila ka nui tawp hleitheilo.

Pi Zothani'n min ṭawngkhum hma kha chuan kanui pangngai maia, min ṭawngkhum hnuah erawh kha chuan amawi ah tiin kanui ve mai mai tawh thunga, Pu Sangkima pawh anelawm viau na in abulah khan kanui lui tak meuh meuh a, ka ipik ve em a, hlim taka nuih kha chu ahar ve bawk ani.

" I nui zo ta bawka inchhungah ka lut dawn ania, min lo nghak rawh " An in lama thle buk pah hian ati hmuka, la ṭhen ṭha chungin "Aw le " kati a, la tum bur mahse, min kalsan dawnah chuan anui suk a, " I nui hmelṭha lutuk " ti supin an in lamah alet leh a, a hnunglam chu thlir zuiin lungawi zetin ka nui leh ṭhin. An in kawta nghah ai chuan tiin gate lam ka pan ta zawka, gate pawna ka chhuah rual chuan " U " tiri ka hria a, aw lo chhuahna lam ka hawi rualin Mampuia ka hmu nghala, hamhaih deuhin "Mampui" kati hluaia, ka hlauthawng nghal ringawt bawk; Mahse, ahmel ah chuan diklo engmah ka hmulo a, amah lah chu ala nui sang zui a, keihi ṭullo ah kalo phili leh mai mai anih hmel.


" U Mama te in ah kal ila, reng rengah chaw i va ei hnem awm ve i rei lutuk " ti zung zungin ka chen turin alo awm hniama ala nui vur vur bawk. Ner sakin " Chaw ei tura kal kania ka eitam ve bawk loh in " katih chuan, a nui lai atawp hmaka, a inla mitak nghal em em bawka, vawi leh khata a awmdan inthlak hlawk chu mak kati a, alandan lah chu nichina nelawm zet kha anilo a, kanau hi hetiang hmel pu hian kala hmu ngailo " Boruak anuam vaklo tih kahria alawm, nakinah kan sawi dun dawnnia " Tiin a ding ṭha a, a thusawi leh chetphung avanga kala bo hu laiin ani erawh anui leh vur vur tawha, zawhna zawh ka tum lai takin U Mafela'n minlo fin a.

" I u ilo ngaihven emni Mampui" Ti varin ka bulah alo ding nghal khup a, " Umm..U Mama te in ah kalpui katum deuha " Mampuia'n atih lai chuan U Mafela chu ka thlek zeuh a, a chal chu lo dawmin ani pawn min lo melh ve chiaha, "Lo thlah ka tum chiah a, chutiang anih chuan bike chu arem silo a, motor in kava thlah ang che u " ti zung zunga kalsawn nghal mai atum lai chuan " Kan ti buai lutuk ang chu U Mafel, ke in kan kal maiang, ka ṭhiante in ah thil lam pah tur kanei a, pawi itih loh chuan " Ka chhan hmain Mampuia'n alo ti leh a," Bawihi " Ngaihṭha lo zeta U Mafela'n atih chuan, khawngaih viau mahila "Kan kal maiang, zanah i duty dawn sia, awm hahdam zawk maila, Mampuia a awm tho hi " kati a "Bike i khalh thiam ani lawmni Mampui, ka bike hi hmang ula " ala ti hrama, min kaltir tawp chu ahreh tih ka hrethiam maia, " Thiam tho na a tunlai chu ka khup hi achianglo lutuk a, U Kimi lah a chuang zei silo a, ka tlukpui palh ang, U Mama te in pawh ahla tawh chuanglo a, I bialnu pawh hi ahah vaklo ang, nuamlo ti duh suh " Mampuia'n nui vur vura atih leh takah chuan U Mafela pawn engmah asawi ta biklo a, ka bag chu min pe in, " Kalo bia ang che" ati sup a, "Nuamlo ti suh aw" ahmel diklo deuh avang chuan kati a, min nuih sukin "Kapa te kha biak kaduh a, chu chu nilo se ka thlah lui tho ang che u" tum ruh zeta atih chuan kanui tawp ringawt.


" I awmdan ava mak ve " Thui fe kan kal hnuah chuan kati ta nge nge a, " Awih awm loh e " tiin min nek salha, tha a ngah si min nek per lawp lo chauh ani. " I va han chhah tak e aw, ka tluk ṭep kha " ka tih chuan " In lo chhuah hma chiah khan Pi Zothani in ah a haw ve chiah a, in rualin chaw a ei velo tih ahriat a, thil thleng thei awm ang pawh ka rin hriat maia, chuvang chu ania U Mafela offer zawng zawng kha ka hnar, hnial char char kha anuam kati bik miahlo ania " Ti duahin min thlek zawka. Nuamlo ati tih chu a hmel ah ahriat vek theih, " Chuan " Sawi belh tur hrelo a ka tih chuan " Pi Vuli te dawr ah khan ka awmreng a, Pi Vuli fapa Sawma nen khan games kan khel a, haw ka tum laiin Pi Zothani kha alokal a. alo phun ṭeuh a, athusawi zawng zawng erawh kha chu apawimawh lo bawk nen, ka hre vek senglo; Mahse, 'Ka fapa tan hi chuan Lindai hi ka duhpui bera' atih avang khan i chungah thil thleng a awm ka ringa, amah kha athinrim si a, haw ta mai lovin kalo nghak che anih hi " ati a, awmdan tur mai pawh ka hrelo, kan khua ah U Mafela nena kan chanchin hria an tam tawh a, Pi Zothani berin Mi bulah chutianga asawi bawl bawl anih chuan katan atlawm thlak zia chu ka ngaihtuah buai peihlo zawk, miin min ngainep ngawt ang le.

" I hmel ngui deuh avang hian engtin emaw ati che tih chu ka hailo a, thil thleng zawh kher che erawh ka tumlo, ka sawi duh tak chu, Nu tling pakhat rilru kalsual vangin mahni insit na i neih ka hlau a, hlu lo leh hniam riauah i in ngaih ka duh bawklo, chuvang chuan i rilru tibuai lo la, dawihzep tak leh anni vau zau mai mai theihin awm suh, U Mafela'n akalsan che anih loh chuan nangpawn thlah bik tum lola, an duh anga i awm chuan an hlim dawna, kan hmelmate hlimna tur hi chu dan chah zel tur " tiin athusawi tawp lam chu ho ati ve deuh nge anui pah hawk hawka, keipawh kanui ve tho, inla puitling deuhin min hnem tum ve mahse, athilsawi danah ala naupan chhiatzia alang kati mai.


" Vah harh i mamawh tih kahria a chuvang anihhi U Mama te inah ka kalpui dawn che, i hmel landan chu dik sela chuan a offer hnuhnung zawk kha ka yess chiang viau ang" ati leh hluaia, a aw aṭang pawn a phurzia chu ahriat a, " I va naupangchhia tak, sawtah kha chuan i inla puitling hle sia " ti a ka fiamna chu a duh vaklo aniang a ner nang a, ' I tan puitling taka ka hmachhawn angai alawm, i thlavang ka hauhna kha ahriatthiam ve angai a, anih loh chuan a palzam ang che tih ahlauhawm, chutiang mi chu anilo tih hre mahila mihring hi chu kan inthlak thut thut a " ati leh niah niaha, sawi zui pui tlak pawh anilo.

Thildang sawiin ṭawng kan in chuh leh nak nak zela, kawngkal biak tur ahre si, an inbe rei thei zek zela, ning deuhin a sir ah kalo dinga, min runluih nge hmeichhe tleirawl abiak chang phei chuan abe rei lui ṭhin a, ben chawrh ka chak lutuk chu ka kut hi a za mer merin kahria. U Mama te in thlen hmain dawrah Naupang lawm thil kan lei a, engmah kensak lo a kut lawng tawpa kal chu thil tih chi anilo, Vahte hian min hmuh chuan beisei hi annei ve ṭhin a, Bawihtei chu azia reng laiin Matt hi abuaithlak a, engmah kan kensak loh chuan aṭap ringawt zel.


" Ehe! Eng nge inlo tih dawn " U Faki'n Mampuia nen min hmu chu ati hlut a, " Yesss..A patea " Ti ṭungin Matt alo tlan ve bawka, Bawihtei pawn nui sen senin min lo kuah ve chial bawka, U Faki zawhna chhanna hun pawh kanla neilo. " Bawihte, chaw in ei tawh em? " A kut a kaiin ka kalsawn pui pah a, " Umm..inla eilo ami? Chaw kan ei bang ṭeuh asin " Ati felfai thlapa, Bawihtei chu akum phu lovin afel a, thil te hi a ngiahtuah kim ṭhin asin.

" I Patea hian a ei duh maithei keichu ka ei tawha " Tiin ṭhuthlengah ka ṭhutpui a, Mampuia nena kan kal thut chu U Mama pawn mak atih hmel viau a, a fate'n minla bawh buai deuh avang aniang engmah min zawt rihlo thung; U Mama hian a nupui uire hi kan rin aiin atuar na lo a, tuar lo hlawm tawp erawh anilo a, duh leh hmangaih taka aneih kha leh chen alo chenpui ani a, a fate nu ani bawk. Tuar chu atuar alawm; mahse, thilsual tih phah nan emaw ataksa ti chhe zawngin a khawsa lo a, Pathian hlat phah nan ahmang heklo, a fate a uap hneh a, a hmel leh taksa pawh ahma ai mahin aṭha zawka, hmeichhe tan pawh ala iai awm lo hrim hrim.


Kan thil kensak te kan pek hnuah chuan Matthewa pawh a thawm azia deuh a, Eitur ei nghal vek atum erawh kan dang hram hrama, U Faki'n 'Naktukah in ei dawnnia ' tiin a thuhruk saka, thil eilai aneih vang nimaw Matt pawn asawi nawi eihlo. Bawihtei erawh ka bulah fel deuhin aṭhu ve a, U Faki che buai vel chu kan thlir ṭhup a, hetiang taka buaia a chelai hi kala hmu ngailo hrim hrim. U Mama hian a chawm ṭha deuh aniang ataksa chu ahma aiin aṭha zawk a, a thau deuhin ka hre hial mai. A dul pawh akiar deuh a, a awm bawr pawh chu ahma aiin a kawh deuhin kahria, kan inhmu khat deuh a, kalo chik ngailo a, zanin erawh a danglamna ka hre nual mai.

" Mafela te inah chaw i ei ami? " U Mama'n atih chuan kabu nghata, "Anuam iti em? " Tiin anui suk a, nghal zetin Mampuia alo nui ve bawk. " Anuam reng, ka khawr deuh tih mai loh chu " boruak ṭhalo vel kha chu sawichhuah ka tumlo a, Mampuia pawn sawichhuah tum hmel a pulo. "Nakin lawka ila chet na tur ani a, an thil dahna te i chhinchhiah ṭha em? " kan bula lo ṭhut ve paha U Faki' n atih chuan " Kaning" kati hlaka, anni pathum erawh annui hawk hawka, kan boruak chu anuam ngei mai, U Hlua chu awm veleh phei sela chuan anuam zual ngawt ang, ani erawh anupui leh a fanu a awmpui angai a, keini kan awm loh vek avangin atan chuan chhuah ngaihna a awm dawnlo hrim hrim.

Naupang pahnih chu TV ah an duhzawng tihsakin kan entir a, keini unau ho erawh titi ve laih laih in kan naupan laite kan sawi a, Kan zinga naupang ber in sawitur angah bera, akhat tawkin 'In tetlai chuan " ati seka, kan awih lo thei lutuk chu ka u te nen in melh kualin kan nui leh chiam zela, Mampuia lahin ngawih mai mai atum silo a, dawt leh thutak chawhpawlhin awih awm deuh deuhin thil asawi a, dawt tih hre mahila Mampuia thilsawi chu kan ngaichang ṭhap tho a, uluk deuha asawi zawh hnuah 'Aaaaa' kanti leh dial hlawma, " I va dawthei tak" U Faki'n ati leh ṭhat zel bawka. Kan boruak chu a hlimawm thlawt ani, Vawiin lam boruak ṭhalo zet te ngaihtuah thleng lo a, ka unaute kianga hlim taka nuih chu anuwm takzet.

" U Mam, kan tet deuh laia Kanu'n bulb lei tura min tirh kha ila hria em? " U Faki'n nui ar ar chung hian ati a, "Hria e mawle" ngaihtuah chhuak thut ang maiin U Mama chuan ati ve hluta, kei leh Mampuia erawh kan ngawi kar thung a, " Eng nge, khatin in pahnih chauh in nui bik suh u" Mampuia'n ati ṭunga, ahre chak a insum zo lo anih hmel. Nui awr awr chung in " Kanu'n U Mama nen hian Bulb min leitir a, khatih lai khan kan la naupang ve a, kan kal dawnah kanu'n alamdan tur min hrilh thlap a. kal kawngah pawh theihnghilh hlau in kan sawi dun reng a; mahse, dawr kan thlen hnuah kan chiang leh ta tlat lo a, dawrah pawh lut mai lovin kan unau khan kan inrawn ve a, U Mama hian "Current ti la, a dik loh chuan keiman Baf kalo ti ang' minti a, sawi buai lovin ka pawm vemai a, dawr nghaktu hnenah chuan 'Kapi Current kanlo lei dawn' kati ta a, Pi Pari kha a hawihai teh asin, " Faki eng nge Current chu' minti a, chu veleh U Mama hian " Baf" alo ti a, kan zah ve tehlul nen minla nuih nghek zui a, Current tih ai thlawt kha chuan Baf tih kha anlo hrethiam zawka, kan lei vethei hram alawm, Bulb pakhat khan thawnthu anei thui asin " ati a, a tawp lam phei chu anui nasa lutuka athusawi hriat ahar lek lek tawha, nui lo tumah kan awmlo, Mampuia phei chu anui over fal leh a chhuat beng meuhin anui leh bik.


" Kha kher kha chu ka theihnghilh thei tawhlo reng reng, naupang thil hriat tih takah ka hrechiang em em a, adang chu ka tetlai hi sawi chhawn tlak ka hre tak taklo " U Faki'n atih leh pawh chuan nuih tur awm tawhlo mahse, kan la nui tho a, engkim chuan nuih ati za tawh ani ber, U Mama leh U Faki te chu ka en ṭhin a, ahunlai nen hmeh belin ka nuih chu aza tulh tulh a, ka pum pawh ana vek tawh.


Cont..
Show post links
Top