THE SICILIAN (BOOK III-V) By Mario Puzo

[Loma hmar]

CHAPTER 28B

Zan thla eng hnuaiah chuan Greek ho hmanlai khawpui ram tawh chu a tle sur hian a lang a. Chutah chuan Guilianno chu Temple lungrim chim tawh chungah thuin America chu a suangtuah a.

Lunglenna nasa tak chuan a rawn zem a. A suangtuahna hmasa chu a bo tawh a ni. A hma lam hun leh Sicily hma lam hun atan beiseina sang tak a nei a; hneh theih loh nia a inngaihna chuan beiseina a siam thui hle. Mipui tam takin an hmangaih bawk a. An tan malsawmna a ni thin a, tunah chuan amah chu a ngaih dan chuan, an tan anchhia a ni ta zawk a ni. Chhan tam tak avang chuan thlauh thlak der niin a inhria a, mahse Pisciotta a la nei tal alawm. An pahnih chuan chung hmangaihna leh suangtuahna thi tawh chu eng tik niah emaw chuan an la tinung thar leh ngei ang. Chubakah an pahniha tan chuan a bul tanna chauh a ni alawm.

Thla eng chu a lang thei ta lo a, Khawpui chhe tawh pawh chu thim zingah chuan a bo chawpchilh ve nghal a. Kulh ram chu chu zan thimah chuan ruhro lemziak fiah lo ruai ang chauh in a lang ta a ni. Thim zingah chuan lungte thil tla ri ar ar thawm chu a lo lang a, Gulianno chu Marble lung lamah chuan tawlh hnungin a machine pistol chu kah maitheih turin a inring nghal a. Chutah thla chu chhum kar atangin a rawn chhuak leh tawh a, a awmna kulh rawn pawhtu kawtthler zau laia Pisciotta ding chu a hmu ta a.

Pisciotta chuan muangchangin lungte thil tamtak awmna kawng chu a rawn zawh a, a mit chuan a zawng kualin, phun sep sep hian Turi chu a ko reng a. Guilianno, Temple awmna hnunga lo biru chuan a inkal pelh tir zet hnuah chuan a lo chhuak a, “Aspanu, ka chak leh ta,” a ti a. an naupan laia an tih dan hlui angin a lo ti a ni. Hlau leh thlabar taka Pisciotta rawn inher thut a hmuh chuan mak a ti hle mai.

Guilianno chu stepah chuan thuin a silai chu a sirah a dah a. “Lo kal la lo thu chawl teh,” Pisciotta hnenah chuan a ti a, “Tun hun hi kan pahniha kan inbiakna hun hnuhnung ber pawh a ni tawh maithei a nia.”

Pisciotta chuan, “ Mazzara del Vallo-ah kan inbe thei alawm, chutah chuan kan him zawk ang chu.”

Guilianno chuan, “Hun kan la ngah alawm, i chawlh loh chuan thisen i chhak chhuak leh palh ang. Lo kal rawh, ka bulah lo thu rawh.” a ti leh a, Guilianno chu lungrem chung berah chuan a thu a.

Pisciotta chuan a silai a la thla tih a hmu a, a sirah a dah dawn emaw a ti mai a. Dingin Pisciotta lo lawn chho tur kai chho tur chuan a kutin a han ban a. Chutah a thianpa chuan silaiin a tin tih a hmu ta a ni. Kum sarih chhung zet a hriat tawh ngai loh angin, che thei loin a khawng der a ni.

Pisciotta rilru chu an inbiak a Guilianno-an a zawhna a zawh tur hlauhna avangin a keh chhia a ni ber, tihian a zawt ang a, “Aspanu, kan pawla Juda chu tunge ni ta? Aspanu, tunge Don Croce kha lo va hrilh lawk? Aspanu, tuin nge Castelvatrano-ah hian carabinieri ho rawn hruai? Aspanu, engvangin nge Don Croce nen in inhmuh?” Chung zawng zawng ai chuan, hetiang hian a hrilh ang tih a hlau ber, “Aspanu, ka unaupa i ni asin.” A hnuhnung ber avanga a hlauhna chuan silai cheng chu a hmeh per tir ta a ni.

Silaimu tha chakna chuan Guilianno-a kut chu a vawrh dawrh a, a taksa a va deng dawt mai bawk a. Ama thil tih rapthlak ti tak chuang chuan Pisciotta chuan a tluk a nghak a. Mahse Guilianno chu tlu mai ta lo chuan muangchangin stepah chuan a lo chhuk a, a hliam atang chuan thisen a chhuak zur zur mai bawk a. Rapthlak ti em emin Pisciotta chu a inher a, a tlanchhe ta a; Guilianno chuan a rawn um tih a hmu a, chutah Guilianno chu a tlu ta a.

Mahse Guilianno thi tur chuan a la tlan reng emaw a inti a. A thluak timur chhe sawm avang chuan a ngaihtuahna chu a chingchivet nuaih a. Kum sarih hmalamah khan Pisciotta nen tlang a tlan vel angin a ngaihtuah a ni; hmanlai Rome ho tuikhuah atang chuan tui thianghlim tak a lo chik chhuak a, pangpar rim rui tak te, kawngsira maicham awm te chu an tlan pel zel a. Chu zan laiah chuan a au chhuak a, “Aspanu, ka ring a ni.” thian inhmangaihna thuk takah chuan hmalam hun hlimawm tak a awm tih a ring a ni. Chutah thihna ngilneihna chuan phatsan a ni tih inhriatna leh hneha awm tawp ber chu a rawn hriattir ta a. Suangtuahnaa a chen lai rengin a thi ta a ni.s

Aspanu chu a tlan zel a, buh hmun tan tlangin Castelvatrano kawng a pawh a, chutah a special pass chu Colonel Luca leh Inspector Velardi hmuh nan a hmang a. Anmahni chuan, Guilianno chu an thangkamah awkin Captain Perenze an a that ta tih thawnthu kha an vawrhdarh ta a ni.

Maria Lombardo Guilianno chu July ni 5, 1950 zing karah chuan a tho hma hle mai. Kawngkhar kik riin a ti harh a; a pasal chu chhang turin a chhuk thla a ni. A pasal chu bedroomah chuan lo let lehin a chhuah tur thu leh, nileng pawh a thang mai theih tur thu a hrilh a. Ani chuan tukverh atanga a han thlir chuan a pasal chu Zu Pepino tawlailira a lut lai chu a hmu thei a. Guilianno chanchin an hre ta em ni? Americaah chuan a tlan bo thei ta nge ni anga thil dik lo a thleng ta zawk? Kum sarih chhunga a neih fo thin hlauh avanga awm hle hle theih lohna chu a lo chhuak leh ta a. In vel a tihfai zawh a chumi nia ei tur a buatsaih zawh hnu chuan kawngkhar chu hawngin kawtthler lam chu a han thlir a.

Via Bella kawtthler chu a reh hle mai. Naupang infiam an awm lo a, mipa tam tak chu Guilianno a pawl zinga tel nia rinhlelh avangin man an ni a. Nu ho chuan an fate chu pawn lama chhuah pui an ngam lo a ni. Via Bella kawtthler tawp ve veah chuan Carabinieri ho khat an awm ve ve a. Sipai dang pawh kein an vei kual reng bawk. In chung lamah sipai dangte pawh a la hmu cheu. Sipai motorte chu kawngsirah chuan an ding khep khup bawk. Bellampo Barack bul Via bella luhka ber chu armor carin a dang tlat a. Montelepre chhungah hian sipai sanghnih chuang an awm a. Khaw mipuite chu hmelma anga enin hmeichhia an chhaih nawmnah a, naupangte an tihthaihin, tanin a tang ve lo mipa awm chhunte chu an nghaisa fo bawk. Heng sipai zawng zawngte hi a fapa thah tumtu te an ni a, mahse a ni chu America-ah a thlawk daih tawh a, a zalen thuai ang. Hun remchang a awm veleh amah leh a pasal chuan an zawm ve ang a, zalen takin, engmah hlau tawh loin an cheng ho tawh ang.

In chhungah chuan lut lehin hna thawh tur a hmu teuh a. Bathlar hnung lamah chuan chhuakin tlang lam chu a thlir veleh ta thung a.

Chung tlangte chu Guilianno an entlang hmanga an In a thlirna thin hmun kha a ni a, Maria chuan a fapa chu chutah chuan a awm a ni tih hriatna a nei fo thin a; mahse tunah chuan chutiang chu a nei hauh lo, America-ah a kal tawh a ni ngei ngei ang.

Ring taka kawngka kik ri chuan hlauhna avangin a tikhawng zawt a. muangchangin kawngka hawng tur chuan a kal ta a. A hmuh hmasak ber chu Hector adonis a ni a, ani chuan la hmu ngai reng reng lo ni awm takin a lo en a. a inmet fai lo a, a sam chu khuih mam a ni hek lo, nghawng tuamna puan pawh a awrh lo. A jacket hnuaia a kawr hak chu a chuar hle a, a kawrnghawngah chuan bawlhhlawh a kai liai bawk. Mahse Mariain a hmel atanga a hmuh chu a zahawmna leh inchhuanna zawng zawng a bo vek tih chu a ni, lusun beidawnna avangin a hmel a chuar tap a, a rawn en chuan a mitah mittui a tling kang bawk. Maria chu a te chhuak ta tuarh a.

Hector chu Inah chuan lo kalin, “Ni lo, Maria, ka ngen a che.” a ti a. carabinieri lieutenant naupang tak hian a rawn zui bawk a. Maria chuan pawn lam chu a han en a, Car dum pathum hi an In kawtah chuan a ding a, a bulah chuan silai keng engemaw zat an ding thap bawk a ni.

Lieutenant chu a la naupangin a biang pawh a tai hlar a, a lukhum chu phawkin a zakhnuaiah chuan a dah a. “Maria Lombardo Guilianno i ni maw?” tiin hawihhawm takin a zawt a, a aw phawi chu hmar lam, Tuscany lawm aw phawi a ni.

Maria Lombardo chuan a nih thu a hrilh a, a aw chu beidawnna avangin a ro halh a, a kaah chuan chil reng a awm lo.

“Castevatrano lama min rawn zui turin ka duh che a ni. Rem i tih chuan he i thian hian min zui bawk ang a.”

Maria Lombardo chu a meng zau kawk a, awki ring deuh zawkin, “Engvangin? Castelvatrano chungchang engmah ka hre lo, a mi chengte pawh.” a ti nghet charh a.

Lieutenant chuan aw nem deuh zawk, chiai lek lekin, “Mi pakhat tunge a nih rawn ti chiang turin kan duh che a ni. I fapa a nih kan ring a.” a ti a.

“Ka fapa a ni lo, Castelvatrano-ah a kal ngai lo.” Maria chuan a ti a, “A thi em ni?”

“Aw”

Maria Lombardo chu lungngai takin a rum vawng vawng a, a thingthi ta hnawk a, “Ka fapa chu Castelvatrano-ah a kal ngai lo.” Hector Adons chu lo kalin a darah chuan a rawn kuah a.

“I kal tur a ni.” a ti a, “Inbumna a siam dang leh a ni maithei asin, a hma pawhin a tih tawh kha.”

“Ni lo ve.” Maria chuan a ti a, “Ka kal lo vang, ka kal lo vang”

Lieutenant chuan, “I pasal a awm em? Amah chu kan hruai thei tho a.” a ti a.

Maria Lombardo chuan zing hma taka Zu pepino-an a pasal arawn kaihthawh kha a han hre chhuak a. tawlailir a hmuha a thinlung thil hriatlawkna a neih kha a ngaihtuah chhuak bawk a. “Lawk aw,” a ti a. Bedroomah chuan lutin thawmhnaw dumin a inthlak a, puan dumin a lu a khuh bawk a. Lieutenant chuan kawngka lo hawn sakin, kawtthlerah chuan a chhuak ta a. Silai keng sipai an lo tam hle mai a. Via Bella kawtthler chu a han thlir chhuk a, town square thleng mai chuan. chu July thla ni eng dul ruih hnuaiah a mitthlaah chiang takin kum sarih liam ta a Guilianno leh Pisciotta-an Sabengtung inpawl tir tura an khalh lai kha a hmu vang vang a. Tualthattu leh outlaw a nih tan ni kha. A tap ta a, lieutenant chuan a banah kaiin anmahni lo nghak rengtu carah chuan a luh tir ta a. hector Adonis chu a bulah chuan a thu lut ve nghal a. Carabinieri awm thupna karah chuan car chu a che tan ta a. Maria chuan Hectora darah chuan a hmai phumin, a tap tawh lo, mahse an zin kawng tawpa thil lo thleng tur hlauhna chuan a khat ta zawk a ni.

Turi Guilianno ruang chu hulhliapah chuan darkar thum zet a mu tawh a. Muhil mai mai a ang hle, a hmai chuan veilam sir a hawi a, a ke pakhat chu a tawm a, a taksa chu a mu zan a ni. Mahse a kawr var hak chu rawng sen lar zawk emaw tih tur a ni a, a kut chhe lam bulah chuan machine pistol a awm a. Palermo leh Rome atanga lo kal Thlalatu leh Reporter te chu chulaiah chuan an awm reng tawh a. Life megazine tana thlalatu chuan Captain Perenze thla chu a la a, thlalak chu chanchinbuah, Guilianno Ropuia thattu tiin a rawn lang dawn a ni. Thlalaka Captain hmel chu fiah takin a lang a, lungngai leh chiai hmel lek lek a pu bawk. A lukhum khum chuan Police officer aiin hnephnawl zuartu nelawm tak a ti ang zawk mah a ni.

Mahse Guiliannoa thlalak chu a ni khawvel pum chanchinbu luah khattu chu. A kut leh lamah chuan duchess hnen atanga a lak Emerald zungbun kha a bun a. A kawngah chuan kawnghren, sakei leh mupui lem chuang Buckle nei kha a hreng bawk. A taksa hnuaiah chuan thisen a tling lung bawk a ni.

Maria Lombardo lo thlen hma chuan ruang chu mitthi dah lailawkna inah. marble phek chungah hian zalh a ni a. chutah chuan Maria chu hruai niin, lung thutthlengah thut tir a ni a. Colonel leh Captain-in Hotel Selinus-a hnehna chawchhun an fak chu an nghak mek a ni. Maria Lombardo chuan chanchinbu mi tam tak te, mipui dilchhut tak tak leh a khap dai tur carabnieri tam tak a hmuh chuan a tap leh tan ta a. Hector Adonis chuan a thlamuan a.

A tawpah chuan mitthi dahna hmunah chuan an hruai lut ta a, chuta Official lo awmte chuan zawhna an lo zawt hlawm a. A han en a, Turi-a hmel chu a hmu ta a.

Chutiang reng reng chuan a la lang naupang ngai lo. Pisciotta nena an infiamna hmun atanga chau hnepa a lo haw a, a lan dan ang chiah khan a ni a lan ni. A hmaiah chuan eng mah kai a awm lo a, hulhliapa an zalhna hmuna vaivut tlem a kai tih mai loh chu. Thil dik tak a hmuh chuan a tiharh ta hlauh a, fim takin a awm phah ta a. An zawhna chu chhangin, “Aw ni e,” a ti a. “Hei hi ka fapa Turi, kum 27 liam taa ka taksa atanga piang chhuak ka fapa ngei a ni e.” a ti ta a. Official ho chuan an la be reng a, lehkhaah hming ziak tur tein an ti a; mahse engmah a hmu lo a, an sawi a hre hek lo. A bula mipui zi nuaih nuaih te, thlalatu te leh carabinieri innawr te, chanchinbu mi au tuarh tuarh te chu a hmu lo a, an thawm a hre hek lo.

Guilianno chal, marble ang maia dang dai chu a fawp a, chutah a hmui duk thlarah chuan a fawp leh a. chutah a kut, silaimuin a den sawmnuaih lai chu. A thinlung chu lungngaihnain a khat a, “Aw, ka rila rah, ka thisen.” a ti a, “I thih dan hi a va runthlak tehlul em!”

Nikhaw hre loin a awm ta a. Chulaia daktor awmin a chiu zawh chuan nikhua a rawn hre leh ta a, a fapa taksa hmuh a nihna hmun hulhliapa kal a duh ta a. Chutah chuan thingthiin leia thisen kai chu a fawp a.

Montelepre-a an ina a haw leh chuan a pasal chuan a lo nghak reng a. Chutah chuan a ni a fapa thattu chu a hmangaih Aspanu Pisciotta a ni tih a hriat tak ni.