NUN_TIHLIMTU_LALNUNHLIMI BY By_CVL_Awmpuii (Completed)

[ngaia]

Nun tihlimtu Lalnunhlimi
By CVL.Awmpuii



Chapter 24



Nunhlimi chu a hawi kual ralh ralh a, kei ang chiahin awmdan tùr ber a hrelo ve tho tih ka hria. Ka âw ka then kharh lâi chuan min lo melh vat a, chil a lo lem ve khalh mai. "Kan inkâr hi..." ka tih lâi mêk chuan "Ka la inpeih lo" a lo ti vat a, ka ngáwi chiang kher mai.



"Ka tih awmzia chu, hetia awm hi ka la duh rih. Min dip dâl tu awm lo leh zalên taka awm hi nuam ka la ti rih" a lo ti leh sawk sawk a. "Ka bula i awm khan i zalên lo em ni?" ka lo ti sup thung a. Ka khuahkhirh àwm ka hre ngai si lo va, 'dip dâl' tih ṭawngkam a hmang te chuan min ti tîm deuh. A tána ninawm leh hnawksak nih kha ka hlauh ber ani sia.



"Chutiang lam pawh a ni lo, mahse heti hian ka hahdam rih. Ka rilru a zalên a, ka thawveng bawk a. A hma ang chiah khan enghelh nei lovin ka awm thei a. Chu chu nuam ka ti " a lo ti leh a. Ka inthlahrunna tùra sawi chu a ni êm lovin ka hria. Mahse ka rilru a kàwi deuh tlat a, "Ka ti hrehawm ṭhin che em ni?" ka ti leh hrâm a, "Aih chutiang ka sawi tumna a ni lo " rang zet hian a lo ti vat a. Hma ka sáwn viau tawh emaw ka tih kha a rilru a lo la paukhauh hlê anih hi.



Ṭha deuh chuan kan inthlah ta tho a, hmasawnna em em awm lo mah se kan inbe ve thei ta viau a, lungáwi phawt mai ang. Mahse tih dàn kawng ka dap zel a ngai tih chu ka hria. Elpui ka nei a, min hma khalh hauh tùr a ni lo.




Office pawh pangngai takin kan kal chho ve zel a, ka nunah thil thar em em sawi tùr a awm rih tlat lo. Mahse tunlai tê chu Kimtei hian a ṭhiannu min sawipui sek mai a, "Chance pe ve la" min tih hi a chîng a. Ka rilru puthmang kha a la ngai reng, ka duh loh tùr chu beiseina ka siamsak duh lo law law a ni. Nonoi pawh phût lêt leh beisei lêt ka nei lo ti si Kimtei min tur dàn em em hi a dik lo. An lo sawi dûn ṭhin ani tih ka hai lo.



"I inpeih tawh em?" kan ṭhutkhawmna lama Msa au lauh lauh ka hriat rual chuan ka va chhuak vat a. Zanin hian a ṭhiannu ti mai ila, a bialnu a ni zawk ang chu, damlo kan pui ah min sâwm a. Ka va kalpui ve dâwn a ni. Kan in aṭanga kan chhuah chuan dár 7 pawh a la ri lo va, hun kan ngah viau mai.



"I lêng tùr ka ti khaihlak che em?" a tih chuan fiamthu ti tak deuh hian "Ti khaihlak e, zanin phei chu chêt ropui ka tum vei nen" ka lo ti hlut a, min nuih nasa mai. "A nimaw...naktuk zanah ka lèn pui ve thung ang che" a lo ti ve hluai a. Mahse ṭul ka ti vak lo, tunlai chu keimaha ka lèn khan nuam ka ti zawk tlat ani. "Nge ni a mahni a va kal duk duk kha nuam i ti zawk riauin ka hria" ka rilru hria ni àwm tak chuan a rawn tih zawm leh zat a. Ka lo ṭhen sak ringawt. A hrethiam lutuk tlat.




Zartei te in kan va thleng chu min lo chiauau vat a. Hman aṭang tawh khan Msa vang hian ka lêng lût ve ta fo a. Ka ṭhianpa kawppui a nihna lâiah ka lo chîk ve ṭhin a. A fel thar thar viau in ka hria. Chhûngkaw pangngai tak an ni ve bawk nen ka ṭhianpa tan chuan ka iai lêm lo khawp mai. Nula hmêlṭha tak ti a sawi tùr erawh a ni lo va, mahse a fel lutuk lutuk. Msa nen pawh an inhmeh viau.



Msa'n "A damlo" a tih khan serious ve deuh hlek anih ka lo ring a. Mahse hritlâng âwm na satliah lek hi a lo nia, sawi nêp ka tumna pawh ni chuang lovin ka beisei ai daihin a ṭha. "Ṭhianpa'n 'damlo' a tih che khan khum betin i damlo emaw ka tia" nui chung chuan ka lo ti vat a. Kan inngam tlâk sa bawk a, Zartei hi chu ka fiam ve bawrh bawrh ngam. "Min lo kan har lutuk a, ka dam lam tawh zawk anih hi. Drip te kan khai ve lawp lawp alawm. I ṭhianpa hian min ngaihsak lo leh lutuk a, ka dam hnú lamah chauh min lo kan anih hi" a lo ti ve hlak hlak a. Msa chu a'n melh rum pah kher bawk a. Pakhatpa lah chuan "Ka duat tho che alawm" inla zei zet hian a lo ti khauh a. An pahnih inchhaihna kârah chuan ka lo awm ve reng a. Ṭum danga enliam mai ṭhin kha tun ṭum chu rualawh a na duh ngei mai.




"Hluzual, eng nge in nu nen in chanchin?" Zartei chuan a rawn ti hluai a. Kan inkâr a ṭha vak lo tih chu a hre sa ve thovin ka ring. "Buaithlak lutuk" ka lo ti ringawt a, min nuih hak hak mai. "Tukin khan vêng tawn tirhah mipa pakhat nen an inphur ka hmù ania aw" a tih chuan ka beng a verh zar mai. "Tunge ni ang aw...?" ka lo ti sup a, "A rilru a nuamlo leh vek dâwn anih kha" Msa chuan fiamthu ti tak deuh hlek hian a lo ti ve bawk a. Zartei chuan "Ngaih kawih tùr a awm lo vang, ka hmu fuh êm a, ka lo sawi satliah ve mai anih chu" a lo ti leh zung zung a. Min hmaizah vang zawk anih ka ring.




Nunhlimi chungchâng chu min sawi chhunzawm pui zat a. "Lo innei ta ula, i thaibawih ngawt ang. I ngam miah lo vang" Zartei'n a tih chuan Msa a lo nui huk, keipawh za lo deuhin ka lo ṭhen ve suk ringawt a. Zartei leh Nunhlimi te hi mize inan deuhna an nei a, zêp sit set an nei ve vak lo. Mi rilru tina záwng erawh chuan an ṭawng chhuak ngai hauh lo thung. "Tunah pawh i ngam lo nasa mai sia, nakinah phei chuan a thuhnuaiah i la awm ang mawle" Zartei chuan a lo ti leh zat zat a. "I ngaih ang em em kha chu kan ni bîk lo aw" ka lo ti hluk, a nuih lah chu a'n za em em mai khawp a. "An inngam tawn alawm" Msa chuan min lo chhan ve ngei a. "Nunhlimi a huai zawk tho tho ang" Zartei chuan a lo la ti hram. Tuna kan awm dàn ngaihtuah chuan thaibawih viau tùra min ngai pawh hi ka dem hran lo.




Chutia kan sawi tâk zel ah chuan thutak deuh zawk hian Msa chuan "Nunhlimi chu i nupui han ni ngat sela chu a rîk ang phawr phawr hi a ni hauh lo vang. A zah thiam fu ang che. Hetianga inngaihzawn laia huai deuhte hi mipa in kan tih thiam chuan min zah thiam ṭhin lutuk ania. Chutiang chiah chuan Nunhlimi pawh hi tih thiam chuan a zah ngawt ang che" a lo ti duah a. Ka nupui tùr àwm ang taka an sawi velte chuan engtin emaw riau hian ka awm a. Ka ngaihtuahna a ti kal thui ngang mai. "In inneih hunah chuan..." tiin Zartei pawh chuan a lo chhunzawm ve zat a. Hmalam hun an sawi thui khawp mai.




Kan lêng kan haw hnù chuan ka rilruah Zartei thusawi kha a awmzui ta reng a. "Mipa pakhat nen an inphur ka hmù..." a tih ringawt khan rilru a tibuai leh em em tawh. Nunhlimi chu ka va zâwt leh ta tawl a, rilru nuam lo deuh a awm reng ai chuan zawh mai kha a finthlak zawkin ka hria a ni.



"Tukinah vêng tawn tirhah tu nen nge in inphurh?" ka va ti ringawt a. Minute tam a liam hma in chhanna ka hmu zui ve mai bawk a. Mahse chu chuan min ti lunghnur takzet a ni. "Apuia nen kan inphur" tih zawngin min rawn chhâng a. Ka zawt thui peih tawh lo, min ti hnual leh rawih tawh mai. Mahse amah zawk chuan a rawn sawi zawm leh a, "Ka thil chah ka va lam a, haw kawngah kan intawk a, a remchâng êm a min thlah mai ania" a rawn ti leh a. Insawifiah a tum ve deuh ni a ka hriatna chuan min ti làwm chawpchilh nghal ringawt! Henu min thunun hneh zia hi chu aw...



Chutia ṭha deuha a rawn sawi zui tâkah chuan ka be chhunzawm zat a. Thu pawimawh kan sawi hran lo, zawhna ka zawt a min chhâng a ni deuh mai. Ka ngampa ta deuhin a hria nge ni a lo inveng ve vat a. A hnu ah phei chuan a mut a chhuah thû rawn sawiin kan inbiakna chu a titawp zui ta daih a. Ka ngei ang reng khawp mai. Awm dàn a thiam leh lutuk hi chu awmngaihna min ti hre ṭhin lo anih hi.



"Lo lût rawh" ka office bell ri ka hriat rual chuan ka lo chhâwn vat a. Remi rawn lût ka hmuh rual chuan a engamah hma in ka'n tui lo nghal ringawt pek a, a mipa zia lo ngei mai. Ka mitmeng aṭangin ka awm dàn chu a lo hrethiam aniang "Sir, thil pawimawh ah ka be lawk duh che a" a lo ti sep a. A inthlahrun ve hmêl tak takin ka hria. Mahse lemchan a thiam zia ka hre tawh a, in bum tir mai mai chu ka tum tawh lo. "Eng chungchângah nge?" ka lo ti sup, nêlawm tak anga lan ka duh hauh lo.



"Ka Pa Liana chungchângah ania, ka chhûngte'n min ngên ve nasa si a. Tun Inrinni hian a puala zanriah eiho an rawt a, chutah chuan hemi office-a thawkho zawng zawng hi lo sâwm tùrin min ti a. Kokim taka in lo kal ve theite anih chuan kan lâwm viau ang" a ti felfai than a. A rawn luh tirh a inthlahrun hmêl deuh kha chu a ni tawh lo. Min nuih sen sen a, hmeichhe pawisawi lo zet hi a ang.




"Thawhpui dangte ka lo râwn ange" ka ti ve sup a. Pu Liana chungchâng a lo ni kher kher bawk nen ngaihtuah zui chu a ngai ve deuh ang. Mahse kei kher min rawn bia chu a tih luihah ka ngai hmiah. Ka thawhpui dangte pawh a nêl in a be ve thei reng sia. A lakah hi chuan rilru tluang tak ka pu hlei thei tawh lo chu anih hi. "I hna va chhunzawm leh tawh rawh" ka ti leh sup a, "Awle, kan lo beisei ang che u aw" nui var var chung chuan a lo ti zâng vah a. Khatiang thil zozai a thlen tîr hnù a hetia min la be zel ngam hi mak tih loh chi pawh a ni lo.



Tun atana ka duh ber chu Pu Liana aiawh tùr hna thiam tak hi hmu vat tawh ila ka ti ber. Khatia a boral tâkah khan office kan laklawh si a, duh angin thil a tih zung zung theih loh a. Hnathawk thar lâk hma chu Remi hi lo kal tlang rih mai se tiin thû kan ti tlu ta kha ania. A mizia leh ka chunga a thil lo tih tawhte zawng zawng hi chu lo dah ṭha rih ta ila, hnaah na nâ nâ hi chuan a thawk ṭha ve khawp mai a. A zuan a zângin a ngainatawm em em a. Office dàwra rawn kal te fak pawh a hlawh ve ṭhin khawp mai. Chu chu ka thawhpuite paw'n an hai bîk lo va, an phâk ang tâwk chuan an duhsak ve ṭhinin ka hria. Mahse kei erawh chuan ka hnim hnai duh tawh lo hrim hrim.





Office bân dâwn ṭep ah ka Nu hnen aṭangin phone call ka dawng a, a thil chah a ṭhiante ina lam tùrin min lo ti leh tawh, a ho leh ngawtin ka ring. Mahse ka lam sak tùr thû sawiin kan inbiakna chu kan ti tàwp a. Eng thil emaw tak chu a buaipui leh tawh dâwn aniang. Kan ban veleh ka Nu ṭhiannu te in lamah chuan ka tlang ta nghal a. Parcel lian ve pangngai tak hi a lo nia, inchhung bungrua vêl anih ka ring.



"Hluzual" ka hnunglam aṭanga min lo kotu an awm avang chuan ka hawi vat a. Ka beisei loh lutukin Helen-i ka hmu hlawl mai. Min lo nuih var var a, ka hmuh lohna a rei ve tawh bawk nen ka hmuh hnuhnun ber ai khan a lo chêr tawh a. A hmêl fai veng ṭhin erawh a lo la ngai reng mai. Chutia ka hmuh thut tâkah chuan ka ngaihtuah chhuah khat zia ka hrechhuak thar a, hei pawh hi Nunhlimi vang vek a ni.



"I va inkeng báwr ve" ka bul a rawn thlen rual chuan a ti zâng vah a. "Ka Nu thil tùr" ka lo ti sup ringawt, biak zui chiam ka tum hran lo. "I dam ṭha em?" a ti lehzel a,"Dam alawm" ka ti liam puat. Midangin min lo hmuh hlauvin ka hawi kual thuak a, mahse vai vak an tam loh lai tak a ni hlauh. "Thla lehah hian pasal ka nei dâwn asin" a tih chuan min ṭhawng ve det. Keimahah nghawng thûk tak erawh a nei lêm lo. "Ka lawmpui che" ka ti leh tawp a, kalsawn vat ka duh a ni. "Inneih sawmna rawn dah turin in ina rawn kal chu ka tum tho a. Mahse ka hmuh fuh tâkah che chuan ka hrilh ta law law mai che anih hi. In chhungkua in ka lo beisei ang che u" a ti leh luam a. A ṭawngkam chhuak ah chuan tîmna eih a nei lo. Min hmusit zawk emawni ka ti hial a ni.




Ṭawngkaa chhâng lovin ka bu nghat nghat ringawt a. Mi pangngai tán chuan ka be zui châk vak lo tih a hriatthiam theih reng ang. Mahse Helen-i chuan a haider lui nge ni "Taka, i haw tlang nghal dâwn em?" a ti lehzel a, ka kham tawh takzet. "Aw" ka ti bul vut, "Ka hmanhmawh deuh tawh a, ka kalsan ang che" ti leh in kalsan mai ka tum a. Mahse min lo pawt ding leh ngam anih chu! "Anih chuan remchânna ka lo lei teh ang. Tunah hian sàwmna card ka sem mêk a, in inah chuan ka lo dah pah law law teh ang" a ti leh zung zung a. A chezia mak ka tih lutuk avang chuan ka melh rûn rûn tawp tawh. A zak theilo tih hian a sawifiah zo lo. Tinge maw hmeichhia hian min ngam em em mai le? Dik lohna ka nei emawni ka ti hial tawh.



Ka phur duh vak lo tih chu a hrethiam deuh aniang "Ti teh, kan inkarah engmah a awm tawh chuang hlei nem. Keipawh pasal nei mai tùr ka ni tawh a, i laka ka rilru puthmang ngai reng kha ka pu tawh bîk lo ania. Min phur ve mai mai teh" a ti ta hlak hlak a. Hetiang a mizia hi ka vawikhat hriatna a ni. "A chi dâwn emawni le?" ka ti sup ri chu a lo hre pha hram aniang. "I rilru a la kàwi viau te anih loh chuan ka lo chuan ve chu i remti ngei ang. Ngaih kawih tùr a awm lohte chuan pangngai takin kan awm ve thei alawm" a lo ti leh zung zung a. Hnial enah pawh ka en peih tawh lo. Chuloah ka lo phal loh tlat khan a sawi dàn takah a rilru kawih thlâk a. Ka engmah a ni tawh chuang lo bawk a, a pawi thui lo tùrah ka ngai.



Kan in lam pana kan tlan chhung zawng chuan a pasal tùr nen an intawn dân te chu a sawi mawlh mawlh a. Eng rilru pu a min hrilh reng nge anih pawh ka hre chuang lo. Ka beng lehlam in ka ngaithla a, lehlamah a chhuak lehnghal zel. Ka rilru a luah pha lutuk lo a ni ber e.



In kan thleng a, kan pahnih a min hmu thut chu ka Nu pawh a lo hamhaih khawp mai. A thil min chah chu pe in room-ah ka luhsan nghal daih a. Hmeichhe pahnih chu lo in dàwr mai mai teh se, ka ngaihsak zui peih lo.



"Ka lo kal chhan chu thla leh hian pasal ka nei dâwn a..." Helen-in a tih ri chu ka hriat hnuhnun ber a ni. Ka inbual san ta daih a, zana ka hun hman dân tur te ka ngaihtuah lâwk a. Hna khawih tur pawimawh uchuak ang kha a awm lo bawk a Nunhlimi te inah ka lêng veleh ang chu! Msa pawh sàwm ka rilruk deuh a, mahse Zartei te ina lên veleh a duh ka ring sia, sâwm lo law law mai ang.



"Hluzual, i duh chuan i lo chhuak thei tawh aw, a kal tawh e" ka room kawngkhar bulah ka Nu chuan a rawn ti lang lang a. Helen-i awm vanga chhuak peih rih lo ka ni tih chu sawi ngai lo in a lo hrethiam ve vek aniang. Ka hnathawh lai chu dahin ka va chhuak ve mai bawk a. Ka Nu chuan min lo nuih var var mai. Kimtei pawh a lo awm ve reng tawh a, Helen-i chungchang chu lo sawi nghal in "A zaklo e, mahni bialpa hluite ina inneih sawmna han sem ngam tawp mai chu" a lo ti hlak hlak a. A hmêl aṭang ringawt pawhin Helen-i chu zaklo a ti hle tih a hriat ngawih ngawih.



"Khati taka min rawn sâwm urhsun chu va telpui ve ngei pawh a ṭha ang" ka Nu chuan a lo ti thung a. Nu te hi chu an rilru a puitling leh tlat zel. "A aiin nupui nei hmasa la ka ti asin le" naupangchhia zetin Kimtei chuan a lo ti nang nang a. Kei aia Helen-in pasal a hmu hmasak zawk chu min thanat pui ve niin ka hria. "Inneihna hi chutia tih mai mai chî a ni hlei nem. Ngun taka inngaihtuah a, thuthlukna siam chî ania. Midang runluih duh vanga nupui pasal inneih chi pawh a ni lo" ka Nu chuan thutak zet hian a lo ti ve luam a. A sawi dik chiah, hei vang hi ania neih hun tawh si ka la neih duh bîk miah loh. Mahse Nunhlimi ka tawn tâk hnù hian ka rilru chu a danglam ve hret hret. Nupui neih a chhungkaw din chu ka suangtuah ve ta fo mai.




Kimtei chuan "Nupui nei thuai turin i duh êm kha aw...i tur sek kha" a lo ti uang hluai a. Ka Nu sawi tum kha chu a hrethiam tho ang. "I û ve hi a, ngaihzawng mumal pawh a nei hlei thei tawh lo anih hi. Heti hian a ban tlang daih ang tih chu a hlauhawm khawp mai" a lo ti veleh hluai a. An pahnih chuan min sawisa zui char char a ni ber. Helen-i pasal neih tùr vanga ka Nu leh naute chhaih ka lo hlawh daih chu a lawmawm viau loh.




"Zanin rawn lên i tum em? I tum chuan lo lêng suh aw" Nunhlimi message chuan min tihrilhai khawp mai. An ina lêng tùra ka insiam mêk lai asin mawle. "Timaw?" ka va ti hu a, a message chu ka nghak ren rawn a, min rawn chhâng har khawp mai. Ka lèn dâwn loh ro ro chuan tiin hnathawk turin ka intintuah zui nghal zat a. A message erawh ka châng reng thung. Chhan ṭha tak a nei te anih loh chuan ka lêng lui tho ang ka ti rilru a ni.



Darkar chanve zet a liam hnù chuan min rawn chhâng ta hram a. "Ka û te inah ka riak dâwn " tih tê mai hian min lo chhâng a. "Engatinge?" ka va ti leh hram, ka dilchhut laklawh tlat. "A ṭul a" tih tê mai hian min lo chhâng leh a. Lungawi lohna nei ang mai hian ka hre deuh tlat a, ka call ta nge nge a. Mahse a ring ral ṭhak, a message ka dawng zui zat a. "Ka mu tawh" a rawn ti leh tawp a, min biak châk hmêl hlawl lo.



"I lung tih âwi lohna ka nei em ni?" ka va ti leh ta nge nge a, "Aih" a rawn ti lawi bawk si. Min be châk rih lo ve hrim hrim ah ngaiin "Anih chuan muttui aw" ka va ti ta ringawt a. Min muttui lêt mai lovin kutzungpui teh tlawng hi min rawn thawn a. A awm dân chu ka hrethiam lehpek tawh lo. Rilru nuam zân lo chuan hna chu ka thawk zui ta tho a, rilruah a lût thei dêr lo.




"I lung tih awi lohna ka nei anih chuan sawi rawh aw. Bulṭan ṭhat leh ka duh takzet a, ka kawng dâl thei thilah chuan insiamrem zel ka duh ania. Chutiang tùr chuan ka dik lohna te ka hriat a ngai a, min hrilh zel turin ka beisei che ania. I tán a hma aia ṭha zawk nih ngei tumin ṭan ka la ang" ka mut dâwn chuan ka va ti leh duah a. Ka rilru a nuam thei ngang lo a ni, kan boruak a fuh chho ṭan dâwn chauh a. Buaina awm thei zawng zawng lakah chuan inthiarfihlim nghal zel ka duh tawh a ni.



Ka message chu a seen reng a, mahse a rawn uksak eih lo. Thil dik lo chu a awm ngei anih hi. Min be ṭha hluak turin ka beisei lo va, mahse khati em em a bula min chhan kha chu ka beisei tawh lo. Kan inkar la fel vek lo mah se a rilru ka hmin ṭan mêk tih ka hai bîk lo. Ka laka lungàwi lohna chu a nei chiang alawm. Ka va call leh ngat a, mahse a ring ral leh ṭhak tho. Vawili zet ka call hnù pawh chuan a la duh ṭhak lo va. Whatsapp-a va biak leh mai ka rilruk lai tak chuan status a rawn nei a, ka han en chiah chu ka sa zak mai.



Apuia nen an thlalak rawn hmangin Caption-ah chuan love var tawp hi a dah a. Ka thin chu a so bulh bulh maiin ka hria. Ka insehruh nghal ṭun a, ka lungáwi bîk ta hauh lo mai. A lungáwi lo anih pawhin hetiang zawnga a chêt kher hi chu ka lo beisei ngai miah lo kha ania. A awm dân chuan min ti lawm lo takzet a ni. Heti khawpa ka tlâwm tawh chung pawh a hetianga a la awm tlat hi ka dem ve ta hlê bawk. A hma kha chuan ka thiam loh ani tih pawm in engtin paw'n awm se ka dem ngai lo. Mahse tun ṭum zet chu a dân a dang ta kher mai.



"Hlim mawlh ang che" ka va ti ve ta salh a, a duh dàn tak chuan awm mawlh rawh se. Ka tibuai leh tawh ngai bîk lo vang. Ka chapona leh luhlulna a rawn cho chhuak ve hle tawh. Mipa ka ni a, induh tawkna ka nei ve bawk alawm. Ka duh êm avangin khati khawp khan ka tlâwm tawh a, hrethiam tùr chu a ni ve tawhin ka hria. Ka kuang lo ka lo nawr mah mah te pawh a ni mahna.



Ka inngaihtuah nasat poh leh ka thinrimna chu a zual a, "Ka rawn tibuai leh tawh lo vang che Nunhlim, hlim rawh" ka va ti leh salh a. Eng tak nge ka beisei pawh ka hre chuang lo. Min rawn chhâng lêt ve se, inhau hrep ila ka ti ni berin ka hria. Ṭawngkam na tak taka ànkhum hrep ka châk a, chutiang tùr erawh chuan a reh hmak bawk si. Ka message a seen ringawt te chu ka thinrim hlur mai.



"Pasal ka nei tùr chuan a ṭhawng ve tho che em?" Helen-i message ve thung a ni. Mood fuh loh sa nen ka message dawn ber kher chuan ka thin a ti rim zual sauh a. A pasal neih dâwn vanga thinrim ka ni lo va, a pasal neih tùr avanga keimaha nghawng nei tlat tùra a inngaihna chuan min ti thinrim a ni. "Ṭhawng lo" ka va ti ringawt a. Dik tak chuan min ṭhawng ve ngei alawm, mahse thudik a ka chhan chuan a ngai kàwi emawni kha ania nga, ka peih lo.




"Ka laka i rilru puthmang hi a danglam tawh takzet em ni?" a rawn ti leh hrâm a. Ṭawngkam mawi lo leh a rilru tina zawnga ṭawng palh ka hlauh avangin ka chhâng zui tawh lo. Mahse amah bawk chuan "Pasal neih hi ka duh tak tak lo asin. Ka chhûngte min tih luihna vâng ania khawngaih takin min ṭanpui rawh U Hluzual " a rawn ti leh a. Vawiinah khan an intawn dàn te kha a sawi ve melh melh sia, induh taka innei turah ka lo ngai mai a. Mahse a rawn sawi dàn ah chuan a ni hauh si lo.



"Ṭanpui thei che dinhmunah ka ding hlei nem" ka lo ti satliah ringawt a. Keia ṭanpui phâk rual ni hek lo le. "Ka chhûngte min biak sak hram rawh khawngaihin. Nang chu an ring che a, i biak chuan kawngro a su khawp ang. Min ṭanpui hram teh, kan hun kal tawh vang tal pawh khan" ngen tak tê hian min rawn ngên leh a. Thudik a sawi emaw sawi lo emaw ka lo inrawlhna tùr niin ka hre lo. Helen-i lakah hi chuan kut ka sil thlap tawh a. Ama cho chhuah ngei a ni bawk nen thihna khawp hial harsatna a lo tâwk te anih loh chuan inrawlh ka tum tawh lo bur. Tuna a rawn sawite pawh hi min bumna a ni thei tlat a ni.



"Pasal chu ṭha takin i nei dâwn ania. I chhungte'n ṭha an tih ngei chu a ṭha ang" ka va ti tawp a. Eng pawh rawn sawi mah se ka chhâng zui tawh lo vang. "I lo danglam ta hle mai, ka hriat ṭhin Hluzuala, mite ṭanpui inpeih reng ṭhin kha i ni tawh lo..." a message chu a thui ngang mai. Mahse chhiar lohah ka tlâk hmiah. Ka tán a ṭangkai tawh miau lo a ni. Nunhlimi pawh ngaihtuah zui duh lo lui in ka mu ta daih a. Tunlai ka hun tawn ho hian min tihah takzet a ni.




"I nau ṭhiannu kha tunge a hming khah?" Msa chu ka en vut a, "Star ve deuh tu che kha" a rawn ti leh kher a, ka lo rum nghut. Mahse "Nonoi maw?" ṭha deuh chuan ka lo ti ve mai bawk a. "Aw kha nau kha...nih pui daih rawh" a rawn ti hluai a, ka lo melh hrawk. A hnen aṭang ber kher chuan hetiang ngaihdan hi ka beisei lo asin mawle. "Khatin min melh suh, idea ka nei alawm" tiin ka bân puamah chuan a rawn hnek ṭawk a. "Eng maw?" ka lo ti ve sup, a idea a han sawi chu a hma aia rum mahin ka lo melh leh a. Ti âwm ang lo lutuk. Nunhlimi thîk tùrin ngaizâwng der rawh min ti anih chu! Ngaihtuah chhuak ṭha lah chu a la intih hmêl em em zui a.




"Hmeichhia te hi infiamna an ni hlei nem" ka lo ti hluk. Hetiang záwng kher a chêt lâk hi chu ka duh lo bur. Msa rêng rêng pawh hetiang rilru a lo pu chu mak ka ti khawp mai. "Infiamna an ni ka ti hlei nem. Ngaizâwng tihah khan i la serious lutuk anih kha. A awm tâwkin ti lawm ve la, Nunhlimi beng thleng phâk tùrin. Nonoi tán beiseina siam sak chuang si lohin i awm dâwn alawm" a rawn sawifiah leh zung zung a. Mahse ka lo hnial fithla ṭhak tho. Ka duh ka neih theih nan midangin an tawrh kher a ṭul chhan ka hrelo. Hmeichhe âwm nêm zawk ngat phei chu hmanrua ah ka hmang duh lo.




Msa thusawi awmzia chu hrethiam lo bîk pawh ka ni lo va. A sawi ang chuan awm dâwn ta pawh ni ila Nonoi tana dem theih si loha chêt chu ka thiam ve thovin ka ring. Ka nau ṭhiannu a lo nihna laiah chance pawh a ṭha ngei ang. Mahse a tleirawl rilru thianghlim tak kha beiseina siam sak uk a, beidawnga siam leh ka duh lo. Hmeichhe pakhatin mipa dang a rin leh theih tawh lohna tùr khawpa rilru tihnat saktu mipa nih chu ka duh ngai lo. "Mipa ka ni" inti ve tán chuan chutiang thil lo tih chu a pà lo hlê in ka hlê bawk.





"Anih chuan engtia awm zel nge in tum?" ning zetin Msa chuan a lo ti ve ta hluai a. Nunhlimi nen kan inkar a hre ve ta vek zel chu ania. Mahse ka ṭhian ṭha ber a ni a, ka pawiti hran lo. "Heti hian kan awm tawp ang" ka lo ti liam puat. Khami zân aṭang khan Nunhlimi chu ka la be leh ta miah lo va. Kar khat lai a liam veleh tawh. A status-ah lah hian min runluih nge pawh ka hrelo, Apuia nen an thlalak rawn hman a chîng riau a. Ngaimawh in tlàwm thlâk ti viau mah ila ka thîk thû ka tilang duh tawh bîk lo. Ka chapona a chi chhuak ve tlat tawh a. Va biak hmasak vêl kha ka tum tawh lo. Mahse ho lam deuha kan tàwp erawh ka la hlau fan. Msa pawh hian chu chu min hlauh pui êm a, heti hian zan tin deuh thaw rawn lengin kan sawi dûn ta fo chu ania. Hmeichhe tih àwm tâwk lek kan ti ve ta fo mai.




"Tun ṭum Nunhlimi awm dàn chu keipaw'n ka dem ve khawp mai. Mahse chhan ṭha tâwk tak a neih ka ring tlat pek a. Pangngai takin sawi dùn thei ula chu ka ti. Induh reng chung siin ho lam deuhin in tàwp ang tih ka lo hlauhpui che u. Ṭha deuhin sawi pui tum la ka'n ti dawn a, a be duh bawk si lo che a" a thusawi tir lam chu a thutak ve tehlul nen a tâwp lamah chuan min nuihsawh deuh reuh leh hrâm a. Hepa min tikual peih lutuk hi chu ka hnek chawrh châk ṭhin. "Ka tlâwm tawh àwm bîk lo emai, a awm awmin awm rawh se" ka lo ti ve nghut a. Ka inti pà ve laklawh tlat tawh a. Min biak hmasak hma chu biak ka tum tawh rih lo hrim hrim. Mipa ka ni a, ka thei em em ang.



Msa haw hnù chuan mu tùrin ka intintuah nghal a, naktuk office kal hma ka ngai bawk nen zîng thawh hma ka ngai tlat. Ka mu tùr rizai a ka inthawlh fel chiah tihah chuan ka phone a rawn ri a, Philip-a hnen aṭangin a ni. Tunah dár 10 a ri tawh a, thlasik kan la pêl lo bawk nen hmâ tak ti a sawi tùr chu a ni hran tawh lo.



"Aw Philip" ka lâk rual chuan ka ti sup a. "Hluzual, Nunhlimi nen in awm dun em?" a rawn ti nghal tawl a, "Awm dùn miah lo" ka lo ti ban charh . "Kan hmu zo lo" a rawn tih leh rual chuan nichin lawka rilru tih paukhauh tum hle si kha ka hlauthawng leh nghal vek tawh. Mahse ka rilru in a awmna tùr àwm ang chu tinzawn a nei nghal a. "Thlanmual..." ka tih lâi mêk chuan "Kan en vek tawh, kan hmu lo" a rawn ti hul hawk a. Ka hlauhthawnna a rawn belhchhah chiang kher mai.




"Ka lo phei ang" ka ti leh ta nge nge a, ka tho nghal sawk sawk a, ka thâ te chu a khûr ru hialin ka hria. Philip-a chuan "Kan tibuai fo mai che a min hrethiam teh. Mahse tihngaihna dang kan hre hlawl lo a ni, a mualpho thlak zozai khawp mai" a rawn ti zung zung a. Min hnar miah loh dànah a mangang ve hlê aniang. "Ka rawn phei ang, min lo ngaichâng phawt dâwn ania" ti leh in phone chu dah mai ka tum a. Mahse a thu rawn sawi leh avang chuan ka che lâi chu ka tâwp chawt mai.




"Apuia nen an chhuak dûn kha a rawn haw leh tawh lo va. Kan mangang takzet a ni. Apuia chu kan be tawh a, kan in thleng a rawn thlah thû a sawi bawk si a. Tihngaihna tak pawh kan hre tawh lo anih hi" a rawn ti zuai raih a. Apuia hming a rawn ri chiah chu ka ngaihtuahna ah thil pakhat chiah a rawn awm nghal. Ka ngaihtuah ang hi ni lul suh se. Nunhlimi chu hetiang kawngah chuan ka ring tâwk a, Apuia zawk chu ani ka rilru tibuai tu chu!



Inngaihtuah thui duh tawh lovin Nunhlimi te in lam pan chuan ka inkhalh phei ta nghal vat a. Hetiang em em hi chu in duhna a ni satliah tawh lo. Ka thinlung chuan "I hmangaih anih kha" tiin min rawn hrilh nawn mawlh mawlh mai. Ka pha thei hauh lo bawk ang.



"Lalnunhlim, lo him hram ang che aw" tiin ka inkhalh chak zual sauh a. Ka hmangaihna hi thâm ral mai tùr atân chuan ka phal hauh lovang.

_________*___________*__________*__________
Show post links
Top