Thinlung BY Kimkimi tlau (Completed)

[ngaia]

" Ka zalenna kalo chen dawn " Pawn aṭangin Thawveng zetin Angaihi'n alo ti lut lang langa, " I zalen ve thei meuh maw" ti a kalo chhan chuan ka bulah alo ṭhu hnawka "Zalen reilo ang " ati a, ka nuih kar kar mai.

Thlasik a ni chho ṭan tak tak tawh a, chhunah pawh avawt ṭhin viau a; Mahse, Thlasik hi chu kum khata hunbi inthlak kual zinga ka ngainat ber hun ani a, chet a peihawm loh ṭhin lutuk tih loh hi chu sawiselna em em ka neilo, Vun erawh a ro duh a, hritlang kan chhar hma bawka hei hi chu Hun in aher chhuahpui ani a, keichuan lawm takin kalo pawm mai ṭhin.

" Biak loh ang hian awm tlat zel suh " Tiin Angaihi chuan akut vawtin min lo dek a, eu nghal zawkin ka melh rum chiama ani erawh anui har hara " I hmel kha " ati a, ala nui awr awr mai. A kut vawt a min deh hi ahrat a, a ti fo ṭhin tih hi chu hre mahila ngaiah ka nei theilo a, ka inring hman ngailo hrim hrim bawk.

" I va hlim ve " Ka ṭhutdan siamremin kati a, ka shawl chu ka bat ṭha mawlh mawlh bawk, " Hlim lemlo, thil hrilh tur che kanei a, msg chuan ka peih silo a, kalo kal anihhi bakah kan inhmu khat hrim hrim a" ti duahin minlo ṭhut hnaih sat sata, tunlai chu an huanah an buai zual a, An resort kha Christmass hma a hawn an duh ve avangin an thawkrim zuala, an hah tlang bawk aniang huana kal ve tak tak ngailo Malsawmi'n " Ka chhungte chu ngaihdam dil hmasa lo chuan biak ngam pawh anni lo, chaw te hi ka bar khalh ngamlo hrim hrim, ka hminga chang deuha min koh tawh phei chuan ka ṭhingṭhi lawk tawp zel' fiamthu in ati a, asawi laiin achhungten an melh no lo teh asin.

" Nia, in buai ve em a, vawiin chu in chawl ami? " Ka tih chuan abu nghata " Kapa'n min khawngaih ve deuh aniang, in ah lo awm rawh, vawiin chu tihtur vak a awmlo minti a " ati a, anui pah var var bawk. " Ava ṭha ve, i hah ve lutuka i hmel pawh adiklo vek alawm " " Chureng, Christmass hma in ka glow up hman tawh lovang, thu deuhin Christmass ka hmang bik dawn anih hi " Ati nui nui a, asawi takah chuan avun hi ahma aiin a thu deuha, alang pawr fap ti ila ka sawisual lovang. " Tunlai chu ka hmel hi ka chhuanglo lutuk, mipa in min biak pawn 'Ka chhungril aṭha' kati zel " tiin anui duai a, a lei leh khabe hi chu an ṭangrual ṭhin ngawt mai.


" I hmelchhe chuang hleinem, i awm hahdam chho anga, Mass hma chuan i glow leh hman hrim hrim " ti a ka hnem chuan " Beiseina diklo min siam suh " ati a, ahawisawn hmak rualin asam a phe ve suau bawka, "I sawi tur chu eng nge " katih chuan minlo en leh vat lawia, amitmeng aṭangin zep eng emaw anei tih kahre nghal vek, Angaihi hi chu ka hrechiang ve thawkhat a, a rilru a awmte, athil vei rukte hi azep thei ngailo. Dawt sawi hi athiam hlawllo a, dawtsawi ngai chi ah chuan Thianga te pawn an thurualpui duh ngailo hrim hrim, achhan pawh Dawt asawi apiang a 'Dawt ka sawilo' tih asawi tel ziah vang leh a kut adah hle hle theih ṭhin loh vang ani. Thildangah chuan ani tluka tulhuruapui tur ṭha leh rintlak hi an awm leh miahlo a, kan ṭhian ho ro ro ah pawh ani hi chu tute pawn kanti buai tam bika, kei aiin mipa lam hian an tibuai tam ṭhin zawk mah.


" Nizanah U Rochana'n minlo bia a " Zawitea in ati a, a ṭawng zawi viau na in hrechiang tak kani, " Chuan " "Englo, kan inbe rei lutuk, thil alo sawi ve nuala " tawite hian min nuih a, J-Hlua chungchang kan sawi apiang hian atim dai zela, J-Hlua ka ngei zia ahriat vang te pawh aniang, amah tak hi chuan enliam thei viau mahse, keimah zawk hian ka enliam theilo a, achhan pawh Angaihi atihdan teh thlawt kha na katih pui ve em ani.

" U Jeromea'n ka ṭawng ri alo hria a, 'Ngaihzawng nei ve tawh suh an ṭhen leh tho ang che, ṭhen hmasa rawh' alo ti sek a, ka ngeizia chu " atih chuan ka nui hawka, J-Hlua nen an in ṭhen hnuah khan Vawikhat chu Angaihi'n ngaihzawng anei veleh a, thla khat an in ngaizawng tling awrh tih ah an in ṭhen leh daih a, 'Kan in millo, ka tuilo' ati mauh a, atuar lo kher asin. U Jeromea erawh in fiam nan tak ahmanga, 'Ngaihzawng nei ve suh, be ṭha deuh tu che pawh ṭhen hmasa tawp zel rawh, ngaihzawng nei chi i nilo anih hi' ati ṭhin a, a chaw ei atui loh lahin 'I tuar thei sia' ati ziah bawka, an unau in an insual lo chauh zel.

" J-Hlua ani tih ahria em? " " Hre nang, kan inbiak zawh lam chiah ahria " tiin a kut chu a khal pah neuh neuha, "Hre tura min duh chu min hrilh la, J-Hlua i ngaizawng leh dawn anih loh chuan engkim ka hrethiam vek " ka tih chuan min en in anui a, " Teuhlo mai, thawnthu ngai chu atawpna hriat sa ani an tih kha " ati a, a mit min siai leh zeuha, ei lo zetin kalo ner nang thung. " Thil hlui alo sawi chhuak nuala, thil hluiah khan ka hriat ngailoh thil tamtak ka hre thar a, chu chuan minti hreawm ve deuh a, amah ka khawngaih bawka abula kir leh lam erawh anilo " min en lovin a mal chunga akut dah chu a melh ngat ngata, a thilsawi lai tihbuai ka duh loh avang chuan ngawi rengin a sawi leh hun chu ka nghak a.


" Atira ka rinhlel ruk em em kha atak tak alo ni a, min hrilh duh loh thil zep anei tak taka, Nizanah chuan engkim alo sawi a, 'Ka kaltir che kha ka inchhir a; Mahse, mihring kani a, hna ṭha tak thaw velo mahila chapo na ka nei ve tho a, kha khan min thunun a, ka thil tih pawizia leh dik lohzia ka hriatchhuah meuh chuan kan inkar kha lei leh van ang maiin alo hla tawh ani ' ati a " tiin za lo fe hian aṭhen saka, "Kapa ten an duh vaklo tih chu i hriat kha, Kapa'n 'Thawhchhuah pawh neilo, Tlangval velem nileng ṭhak ṭhaka in a awm lehnghal, innei ta ula engtin nge a chawm ang che, taima tal sela chuan thuhran ' atih kha engtin tin emaw abeng alo thleng ve aniang, 'Ka hriat tirh kha chuan ka mang veka, ka rilru ana in ka tlawm a, ka zak hle bawk, thla3 chhung chu mumal pawh neilo in ka awma, ṭhen che kha ka ngam loh rualin i hmel ka hmuh khan i pa thusawi kha ka hrechhuak leh ṭhin a, atawpah chuan ka rilru siam felin 'Chuti taka min duhlo tute makpa nih chu ka chak vak bik hleinem' tiin tawpna kha kasiam ta ani. Ka kawp lo che a, i pa te runluih kha ka chak ve em a, kawp ang che a ka lan theih nan Zuali nen thla2 lai in ngaizawng tawh angin kan awm anihkha, anihna takah chuan kan in ngaizawng nghal mai lo a, ngaihzawn pawh ka tum heklo; Mahse, i tuar lai ka hmuh khan kalo biak leh mai che ka hlaua, i lakah khan ka inringtawk hlawllo ani ber e, chuvang chuan Zuali kha ka ngaizawng ta ani' ati a, ka ringhlel lo" Angaihi chuan Am zetin boruak a hip lut a, kei erawh ka ṭhu ngil auh a, sawi tur engmah ka hrelo.

" Mipa tan chuan khatiang teh thlawta in tih kha tuardam ahar a, atuar tu chu ini teh meuh mai; mahse, keipawn ka tuar ve tho a, ka hmeichhe hmangaih in keimah avanga na atuar tih hmuh leh hriat reng kha hreawm kati a, chuvang ania khua ah pawh ka awm tam duhloh. Mi tam zawkin min dem a, ka demawm vereng bawka, ka dikna lah keimah bakin ka hrelo, tuna ka sawi chhuah chhan hi chu ka neih let leh duh vang che anilo a, neih let leh tum che pawh ni ila hmalam i pan tawh tih ka hria a, hmalam i pan tawh tih ka hriat avang zawka hrilh che kani, ka kiangah lo let thei tawhlo mahla mipa Rinawm lo tak anga min hriat reng ka duh loh vang pawh ani pakhat, ahma khan hrilh che ila chuan nang tleirawl lungmawl leh tawnhriat la neilo khan i nu leh pa te kha do in kei kha min chelh i tum dawn tih kahria a, kei vang mai maia i chhungte i do kha ka duh silo a, duhthlanna harsa tak leh ka zawh tawh azawnga kawng hreawm leh harsa ber paltlang kha ka thlang ta ani' tiin min hrilh a, Hmangaihtu chan anga kalo in ngai kha kati dik miahlo, ka tuar ber emaw ka tih laiin ani pawn alo tuar vetho a, Ka ngaihtuah a, khatih lai khan tuna ka thu hriat zawng zawng hi hria ni ila, asawi ang hian ka chhungte hi ka do duh ngei ngei ang" Rit zetin thawk ala a, thudik ka han hria chu keipawh tih tur leh sawi maitur ka hrelo takzet ani.

Ka ṭhiannu avanga ka huat em em mipa khan kawng hreawm tak alo zawh ve a, ka ṭhiannu hmahun tur a dawnpui avangin akalsan zawk ani tih han hriat meuh chuan sawi tur avangin J-Hlua lakah chuan ka inthiamlo veng venga, hmaichhanah leh msg ah pawh engtin mah ka ti ngailo na chungin, alaka rilru ṭhalo tak tak ka put ṭhin miau avangin ka inthiam theilo ani. Ka ngei ṭhin em avangin kei aiin upa zawk daih mahse, U duh lovin J-Hlua kati ngat zela, Angaihi hi chuan U Rochana ala ti reng.


" A van khawngaihthlak ve " ka ti halh a, Angaihi pawn min pawmpui aniang abu nghat nghata, " Nupui neih atum hnai ve tawh a, alawmpui awm lutuk. U Rochan nen hi chuan thawnthu pakhat ziak dun mahila, a changtute kan nilo a, atawp na ahlimawm heklo. U Rochana chu U Zuali thawnthu ah changtupa dinhmun aluah mek a, kei erawh kala bo khawp mai " tiin anui hak haka, amitmengah chuan natna ka hmuhsak tawhlo a, thawveng huai leh hahdam huai hmel hi a pu a, ahmel hmuh pawh anuam.

" Thudik hriat chu dawt ai thlawt chuan a hahdamthlak deuh ang chu tiraw? " " Umm..hahdamthlak lutuk e, Kapa te pawh ka haw hranlo, engkim hi kan ṭhatna tura Pathian min ruatsak vek ani a, ka pawmthiam tawh alawm" ati siam siama, Nichina cool deuh kha ni tawh lovin Ka ṭhiannu harhvang tak kha ani leh tawh. " Kanu leh pa te hi ka hmangaih a, engkawng ah mah sawiselna tur ka hrelo, piang nawn leh dawn pawh ni ila kanu leh pa fanu nih hi kala duh zel ang, mi hausa fanu nih hi ka dream ngailo a, tuna ka nundan mawlmang tak hi anuam kati bawk; mahse, an fate ngaihzawng chungchanga an in rawlh lutuk erawh hriatthiam loh chang ka nei ṭhin a, thu ṭha min hrilh in min zilh suh se ka tihna lam anilo, an duhlo nghal bur ṭhin hi ka hrethiamlo a, min khuahkhirh deuh mah mahin kahria, Malsawmi'n ngaihzawng mumal tak aneih duh loh chhan pawh kanu te avang hi ania, tun thlengin biak nei ve ṭhin mahse, Inzawmna thuk tak tumah asiampui duh ngailo " ati a. " In thlan fuh loh an hlau tihna alawm, hreawm reng renga in awm an phallo tihna ania, an hmangaih vang che u anih hi " ka tih ve chuan abu nghat nghata.

Thildang a sawi zawm mial mial laiin keichuan ka ngaihtuahna ka kawm leh veng veng tawh a, Angaihi thilsawi te chu ari hre mahila a thusawi ber ka hrethei lo a, anuih rualin kanui ve a, ka nuih chhan pawh ka hre chuanglo. Ani chuan piang nawn leh pawh nise anu leh pa te fanu nih leh achak a aduh bawk anihkha, kei erawh ka rilru abuai nak thung a, Angaihi hian ka rilru hria se rapthlak min tih loh vek pawn mak minti khawp ang. Kapa hi chu in ngaihtuah nawn ngai miah lovin kapa nireng turin ka duh a, ka unaute pawh chuti tho; Mahse, kanu erawh hi chuan ka rilru ati buai ani, mite chuan an nute an thlang hmasa zawk fo anih laia keiin ka ngaihtuah nawn angai hi mak ka intih rualin ka indem biklo a, Kanu hi chuan kapa min ngaihsakna zat ve pawh hian min ngaihsak ve ngailo miau a, atawngtu nih chuan zau taka thil thlir hi ahar aniang, piang nawn leh dawn ta ila, Pathian hnenah kan duh dil thei ni ila chuan ṭhingṭhi in Min ngaihsaka min hmangaih takzet tu tur Nu ka dil ngei ang.


" Ti daih ila Amosa'n Damdawi ati ṭhin tih kha i hre ve tawh em? " Ka sam lo khawih paha atih chuan inthing harh vatin phawk hra hian Angaihi chu ka en a, " Amosa maw! Damdawi ati itih na ami? " kati hu a, amak kati em ani. U Joysie vanga kan buai hma kha chuan ka tana ṭhianṭha leh rinawm tak ani ṭhin a, tunah erawh ka hlat pawh ni hauh lovin amah zawk a inla hrang tlata, U Joysie vangin U Mafela a haw tlat bawka, U Mafela chauh nilo kei thlengin min haw tel a, ṭha deuha ka biak chang pawn pangngai taka min chhang mai lovin Ṭawngkam ngeiawm deuha min chhan kual a ching a, khatiang na na na chu keipawn biak emaw kawm luih ṭalh ka tum talo a, a inkhawm khat hle tih hre mahila a chanchin ka ngaihven chuanglo. A ṭhian atan a min ngai tawh lo tu ngaihven reng kha ka tihtur anilo a, thlem heuh heuh kher pawh ka tumlo, ka ti lo reng bawka.

" Umm..mi sawi bakah keiman kahmu alawm, ka rilru ati na reuh lutuk " Ati bawrh bawrha, " Avan mak em em " ka tih chuan " Thianga te sawi danin atihna arei tawh aniang, ahma kha chuan langsar takin atilo a, tunah erawh a inthup thei tawhlo anih hmel " ati leh a, sawi tur hrelo fe in kabu nghat nghat ringawt. " A thinrim awlsam lutuk leh ngeiawm deuh deuha aṭawng ṭhinte kha aruih vang anih hmel kati, ahma in khatiang khan a rilru atet ngai miah loh kha " A tih chhunzawm a, a sawi takah chuan ani thei dawn riau in kahria a, ka ṭhianṭha tak anih miau avangin Damdawi kher kher alo ti ve chuan minti hreawm in ka ngaihtuahna ati kalthui viau a, ahmel ka mitthla a, nakin lawka damdawi in a ei chhe maitur chu apawi kati a, ngaihtuah pawh ka ngaihtuah ṭha ngamlo zawk.


" Awi! Kan hriatpui loh rilru hahna te alo nei reng aniang a, hlim sarh in tuman Damdawi emaw Zu pawh nise an tih duh ka ringlo, tih chhin chak vanga ti hi chu tlemte anni ang. Aaaa..Amosa ngaihtuah chuan tih chhin chak vang hrim hrim chu anih ka ringlo e " kati nawi niai a, Kan chhungkua ah Kapa tih loh in ruihtheih thil anti lo a, hetiang mi hi ka ngaina lo bawka, an dinhmun ka hriatthiam pui lo reng a, an tih chhan ang te hi ka ngaihtuah thiam pui phak ngailo a, hetiang lamah hi chuan ka bo hu mai ani.

" Ka hre biklo, Thianga te pawn an hriat loh chuan keini tan hriat ngaihna a awmlo" tiin akut abeng thaka, "A pawi tih bak sawi theih a awmlo, duhthlanna tel lovin tuman sual kawng an zawh ngailo bawk, a duhthlanna a hmangsual animai " ti lehin " Ṭhian te sawi chhuah takah chuan kan in hmu khawm khat e, kan call chhin ang e, an remchan chuan thil ei khawm mai mai ang u " ti bawrh bawrhin a phone a phawrh nghala, hmet mual mualin phone chu a beng zawnah adah a.

Phone ahman chhung chuan ka phone chu kalo khawih ve neuh neuh a, tih tur leh khawih tur em em pawh ka hrechuang lo a, ka khawih kual vel mai mai ani; U Mafela pawh hna thilah nimin khan Aizawl lam apan a, abuai ve si a kan in be ṭha hman vaklo a, tunah pawh 'Kan meeting lawk dawn a, ka hman veeh kalo bia ang che' tiin msg min hnutchhiah a, ka reply na pawh ahmu leh tawh chuanglo. Kan khaw damdawiin hi alun ve a, nurse chu an in daih theih mai laiin Doctor hi pakhat chuah anih avangin a in daihlo a, Doctor an dil belh niin kahria, Tunlai bik chu U Mafela pawh abuai zuala "Keimah chauh chuan abuaithlak a, Doctor pakhat lo awm leh thei sela chuan Buairenga kani tawh bik lovang" ati a, nakina ama hahdamna tur abuaipui tih hre mahila atalbuai kual vel lutuk hi ka khawngaih tlata, a buai chung chunga minlo be hram hram ṭhinte hian atan ka pawimawh ve tawk tih min hriat tira, inbe tam theilo mahila lungawi lohna ka nei ngailo.


" Anlo kal dawn, anlo thlen hma in dawr ah va kal ila " Atih chuan kalo bu ve nghata, " Pawisa ka nei lo lutuka, Drinks lo lei ve rawh u kati a " tiin a ṭhutna avanga a kekawr chuar vel chu a pawt mar paha, " Thingpui kan in mai dawn alawm, keichu cold drink vel hi ka ngeihlo " Ka tih chuan "Hmmm" ti hmakin akal daiha, a hnungah ka zui nghal dat dat. Kan rei dawn chuanglo a tiin kawngka chu ka nam khar tawp a " Keini'n chhum tur kan lei anga, anni'n engmah an lei veloh te chuan a fair lo alawm, bakah Drinks hi ka ngaina " Ka bana chelh pah chuan ati a, min kalpui dawr dawr bawk.

" I mak sia e " Ner nangin kati a, min kalchak pui si a ka thaw halh halh tawh, " I va han fit lo tak, U Mafela nen in inngaihzawn aṭang hian exer i lak leh tawh pawh ka hrelo e a, Bialpa zawn nana Exer han lak chu " ti kualin min nuih sawh vela, a duh hi chuan ngeiawm thiam tak hi ani. "I zaklo emai aw Lalkhawngaih, Exer lakte chu ka tetlai aṭanga ka chin ṭhan ania, U Mafela alo lan hma aṭangin exer te chu ka la ṭhin hrim hrim. alo awm hnuah mi sawi kan kai hlau in ka tawpsan ringawta, ka chawl veng veng pawh ani chuanglo, akhat tawkin kala in sawizawi tho " kati pang panga, Bialpa zawn nan i hmang minti kher chu kala na em ani, thinrim lo mahila ka lawm hlawllo.

" Ve pang pang che hian a, i naupan laia i ṭawngṭai naah 'Lalpa, zingah ka walk ṭhin anga, katana khuanu ruat chu ka zingkar walk naah min tawn tir rawh' iti aniang " ala ti hrama ahnungah na lua awm lovin ka bensak pawp a, ala nui mai mai zui. Nidang chu nise min melhrum leh tawh viau ang. Dawr kan thlen zui nghal mai avangin engmah kan sawi tawhlo a, Dawr ah chuan lut in a hawikual vual vuala, Dawr neitu Pi Telengi chuan 'Eng nge in duh a, min dawr ṭeuh ru aw Angaih" alo ti bawrh bawrha, anui pawh ar ar bawka, " Aih, 20 bak kan neilo " Angaihi'n atih chuan "I va han rethei e aw " tiin ahma aia uar in anui leh a, pi Telengi hi chu anui duh a, dawr pawh anuam.

" Pi Teleng, Kungfu hi inkawl tawhlo ami? " Hawikual vual vual paha Angaihi'n atih chuan " Ka hrelo, ala awm ang zawngkual chhin teh " tih leh zawnpui chu arual a, kei kalo bo hu thung. " Eng nge kungfu chu " Ti a ka zawh chuan "I ṭhing sia e, a ei duh ber ber kha ini sia " ti hlarin Angaihi chuan a zawn chhunzawm a, dawr bungrua an ngah ve deuh bawk nen ahawikual nasa mai. " Chutiang Kungfu ka hrelo, Samurai ani zawklo ami? " " Nitak! Awi, ava han buaithlak " ti hluaiin achal dawm chung chuan anui hak haka, " Khawngaihi hi chu aw " Pi Telengi pawh chu anui vetho. " Khatin minti bik suh nangpawn i zawn ve tho kha " Angaihi'n atih chuan "A awm ang em alawm " ati veleh maia, an la nuih uar uar laiin Samurai chu kalo la a, Kungfu tikual vel lo sela chuan kan hmuhna arei tawh ang, ka luh hlim aṭangin ka hmu daih tawha, Kungfu atih kher avang khan ka hrethiamlo kha ania, Kan Lalkhawngaihi zet hi chuan thil lam sual leh tihsual hi ahrat ania.


Kan haw lamah chuan U Mafela chungchang bawk min sawipui leh a, kan inkar aṭhat leh ṭhat loh min zawtin, keipawn ṭha deuhin kalo chhang vezela " Viviani hian ala hua che em? Amak e tiraw, apawi i sawi pawh anilo a tinge ahuat ve ringawt che le " ati nang nanga, keipawn ka ngaihtuah ve nasa ṭhin. U Cindy phei chuan msg a minlo vau te a ching a, 'Ka u hi i phulo' mintih bawl changte pawh anei ṭhin. Tumah ka hrilh ngailo a, Angaihi emaw U Mafela pawh ka hrilh lo, buaina atam dawn tih ka hre lawka, U Cindy rilru katih hel belh zel dawn tih hria in ka ngawi a, arei hnuah phei chuan ka Archived daih a, block em chu ka duh biklo ani.

" Kan inhmu khata Biak in a kan inhmuh fuh zeuh chang hi chuan apangngai reng, a hma anga min ngaitheilo deuh ang khan a awm tawhlo a, a awmdan hi ka hrethiam biklo " kati a, Viviani tak hi chu athawm areh a, Inkhawm lai leh kawtlaia kan inhmuh zeuh changte hian min biak hmasak zeuhte aching a, minla hua nge min haw tawhlo pawh ka hrethiamlo, hrethiam tur pawn ka ngaihtuah buai peihlo.

" Engvanga duh lo ngawih ngawih che nge annih hi ka hrethiamlo, an hausa lutuk saw an chapo niin kahria, U Mafela leh Pu Sangkima te an rilru aṭhat a atluan teh lul nen, an hmeichhia te saw anva kherek tak, U Cindy pawh nuthlawi ani ve tho a, in chhuang vak tur ani biklo chiang e, Biak in ah nise Pi Zothani pawh aṭawngṭai ring ring aṭap peih peih alam uar uar ania, mi hmuh leh hriat ah chuan an ṭawngkam aṭha em em a, i chungah erawh an sual em em zel a, an ngei ngawih ngawih bawk che a, an pianthar dante hian thlei bik anei anihhi" ati hlak hlaka, sawi zui pui lovin ka nuih liam maia, sawi zui pui lo mahila kan in thleng aphun tluan parh tho a, Pi Zothani leh U Cindy te a sawichhiat hnehsawh dan chu e arapthlak ani tawp, anni pawh an hahchhiau nasa viau ang.


In kan thleng a kan ṭhu hahdam ṭan tih ah Thianga te anlo kal a, rin loh deuhin Hriati alo tel ve bawka, "Sawm loh in kalo kal a, apawi em? " Inthlahrung taka atih chuan Angaihi nen kan lu kan thing dun nawk nawka, " Teuh nang aw, ilo kal ve hi aṭha lutuk alawm, he mite ringawt hi chu an ninawm lutuk a " Kati zung zunga, Thianga'n 'Khanglanga' ti hlukin ka chalah min nam dawta, aṭhu tau hmak bawk. " Khawi eng nge inlo lei " Angaihi lah in alo ti ve sek a, Erica chuan " ninawm sia e " tih pahin a sarang khai chu Angaihi a pe a, Thianga bulah Thianga si chetin a ṭhu ve than a, Vena erawh nui put putin Hriati bulah aṭhu ve thung a.

" In lo va lei tam thei zawk ve " Sarang aṭanga an thil lo lei phawrhchhuah pahin Angaihi'n ati a, " Vanlalkhawngaih ngawi ve ṭhin teh " Thianga'n pawr deuha atih chuan "Eng nge maw i hriat a, i vin hlur reng maile " Pakhat lahin ngaihsam zet hian alo ti a, " Chhan anei alawm, inlo la hre veleh pek nange " Erica'n atih hluai rualin atukhum ari nghal fawka, "Ana lutuk " Ati nghal ṭhawt bawk. Keini kanlo nui dar dar a, kan bengchheng deuh chu Vena'n minlo khap vatin "Naute inhnuaiah a awm ang, bengchheng vak lo ang u" ati dut dut a. " Nia, bengchheng vak lo ang u" Nui sangin Hriati'n ati ve bawka, Erica leh Thianga erawh anla in melh no lo khawp mai.


" Thianghuaisen, Sap ṭawng thiampa " Erica'n hawisawn pahin ati a, Thianga kha amelh rum ve tehlul nen khan tunah lem anui leh vur vur tawh a, athusawi avangin Thianga lah a meng rum sawta, Vena Erica leh Hriati erawh an nui vur vur thung. An landan in thlau hlawm lutuk chu Angaihi nen mak ti zetin kan en kual chhen a, "Eng nge " Hre chak deuha Angaihi'n atih chuan " I hriat ve angailo " Ati pawr hlara, A thinrim tak taklo tih erawh kan hre vek ang. " Sawi teh u " Kalo tih ve chuan "Thianga Status in enlo emni? " Vena'n ati a, " En nang, tunah kan en ang e " ti a ka phone ka phawrh chuan " A deleted daih tawh, Thianghuaisena sap ṭawng thiam ropui rapthlakzia inhmu ve hmanlo chu apawi hlemai " Erica'n ngeiawm deuha Thianga nuih pahin ati leh vela, "I va han chhe tak e aw " Thianga chu a in lek uai tawh a, Erica lah ding vutin a awm sawn a, tlanchhiat in ring deuh hian Thianga chu a melh ran bawk.

Thianga te buai lai laiin Angaihi lah chuan Hriati alo dawp ve ngar ngara, " Sawi maila " atih chuan "aaa..Thianga ka hlau alawm asual si, min hnek leh pawp ang " Hriati'n ati nang nanga, anlo inbe ru ve nasa mai. " Sawi mai ula, in sawi loh chuan engmah in ei ve lovang" Ring deuh takin Angaihi'n ati a, Hriati a zawt chhuak theilo beidawng anih hmel, " Vawiin hi a bialnu birthday ania, status ah pawh alo hman ve kha; Mahse, In hmuh hma in a deleted leh tawh thung " Hahdam deuha ṭhut pahin Erica chuan ati a, Thianga pawn a dang buai tawhlo.

" Eng nge ahman, a saruak thlalak ami? " Angaihi'n alo ti hmanhmawha, Thianga leh Erica'n an melh rum teh asin, "Thu awm ang deuhte hi sawi ve ṭhin teh anih loh pawn ngaihtuah ve ṭhin rawh " Ti hlukin "Ka sawi chakna pawh iti bo zo dawn " atih zawm bawrh bawrh a. A sawi zawm duh tawh lovang tih hlau in " Eric sawi mai mai rawh " kalo ti thuaia, "Heipawh hi a, thil i hriat chak tawh hi chuan i za chung zela, Hriati ang hian pangngai deuhin awm ve ṭhin ru" Tiin Hriati chu inla zei zet hian amit asiai a, Hriati anui ring ngang mai. " Nang lah hi a, i nui leh chiam zela bengchheng lutuk mai, thluak pawh hi i neih ka ringlo, I nei anih pawn tetakte aniang karing, A siamlai che in Pathiani'n 'Dah loh ai ah dahsak ve ang' ati anga, tetakte bak i neilo ang " Thianga'n uar zet hian ati a, Hriati chuan a haw leh chuang miahlo a, "Karing tih mai maia in nghat rual pawh ini tawhlo Sapa" ati duh leka, Thianga thusawi te chu angai haw lo hrim hrim.


" Thildang sawi teh suh u, ka rilṭam tawh ania Eric sawi thuai la anih loh pawn Vena'n sawi rawh se, in zinga lian fal em em pawh nilo hlaua in ngawih hmak hlawm le, in nep lutuk " Angaihi'n ati bawrh bawrh a, Thianga aner nasa mai. " Vawiin hi abialnu birthday ania, inla pasalṭha deuhin dar 12 ah chiah chiah alo wish a, che ṭha a intih ve tehlul nen abialnu in aṭhen lek lek ani " Tiin Erica chu anui kar kara, " A bialnu thlalak ahmang tih kha view lovin ka hmuthei a, abialnu birthday tih ka hre bawka, caption ah thu thlum over leh ṭhing deuh deuh aziah kual leh duah ringin ka view peihlo a, ka muted daih alawm" Angaihi'n pawi tih hmel deuh hian ati a, Keichuan ka hmulo hrim hrim, zingah ka buai ve a, phone ka khawih hman meuh chuan Thianga status ka hmu tawhlo reng reng.

" I chan ropui anih chu " Ti hmakin " Tuna mi nen chuan anla inzui reilo e, engtin nge a che over dawn tih ihriat theih " Erica chuan ati leh te te a, a thusawi tur taka alut mailo chu ka thinrim lek lek tawh. " Ngaihzawng angah tawh lutuk tih te chu i hre ve tho alawm, a over ṭhin zia hi chu hre tak kani, chuvang chuan sawi mai mai teh " Angaihi'n ati hlar tawha, ani pawn a sawikual rei lutuk chu a ngaithei leh tawhlo tih kahria.


" Zaii(Thianga bialnu) birthday kha a wish ve ngeia, a wish hmasa ber ani nghe nghe, caption ah 'Happy birthday In heaven' ati a, A bialnu in 'thi tawh ah minlo ngai alaw hmela inṭhen ang' alo ti a, a in lak zei ve teh lul nen, a lainatawm lutuk " Erica'n a sawi zo chiah tih ah " Hmela i va han ṭawngthei tak, Miin an chhungte thi tawh birthday wish nan an hmang ziaha, in koh duatna emaw kati alawm, reng rengah keini mizo medium aṭanga chhuak sap ṭawng kawi khat pawh zir ngailo, Thawnthu nise 'Chemtatrawta leh Arpuisen te' tih vel bak hrelo tan chuan Sap ṭawng hi har deuh mai asin. Kan sap ṭawng thu mal hriat ve chhun pawh Yess tih te, No tih leh What tih te chauh ani a, kan hriat thui ve ber lah I don't know tih tlawng ani a, tunah te chuan ṭhiante zarah thumal sei pui pui te pawh kan hre tawha, a hla pawh kan ngaithla ṭhina; Mahse, a awmzia ka hre ngai chuanglo" Thianga'n ati duah a, keini kanlo nui hak hak hlawma, a in sawi thiamna te hlei hlei chuan nuih ati za zawk.

" Dik chiah i demawm loh hrim hrim " Nuihza insum zetin kati a, Thianga pawh chu anuih a za ve tho tih ka hria kan nuih chiam avangin anui ṭha duhlo vel mai mai zawk ani. "Kan hunlaia school leh tuna school te chu inthlau tawh tak ani, Primary aṭangin English word an zir ṭana, tlema khawsak pangngai deuh lahin English medium ah an fate an kaltir bawka, lei leh van ang vela inthlau ani tawh. Keini primary school kal velai te chuan chawlh dilna ziah kha kan thiam ve hrama, chu pawh mizo ṭawngin. School kan kal peih loh apiangin chawlh dilna kan ziak ziah a, school kan kal laia lehkhabu ka heh em em chhan chu Chawlh dilna ka ziah tam vang ania, lehkhabu pakhat kha chu ka pawtthla zo vek thei, hmanhmawh deuh changa hman tur tiin ziah lawk sa ka nei ṭhin bawka " Ati leh a amah pawh chu anui ve vur vur tawh.

" Ziak leh chhiar kan thiam phah tih loh hi chu kanva han ṭangkaipui lo tak, lehkha kan zir ṭha peih silo, exam hall ah kan hawi hru hru a, 'Fail theih loh' tih kha kan uan pui a, kan chhang tak tak lo chung pawh khan kan pass veleh mai zela, khatih lai hun kha hringnuna ahlimawm lai ber niin kahre ṭhin, ṭhiante nena kan nuih ho dar dar laite infiamna chi hrang hrang hmanga school kawt kan mawi ṭhin laite kha, Left turn ni na na na ding lama kan han inher tlatte kha ngaihtuah let chuan alo hlimawm kati " Vena'n alo ti ve a, nunhlui kan ngaihtuah let hlawm aniang ari lo in kan nui a, kan ha alang ṭha hlawm mai.

" Primary ai kha chuan Middle kha chu alo ṭha ve deuha, Chawlh dilna pawh Study leave tih kher angai ta a, Primary ah mizo ṭawnga kan ziah ṭhin kha Middle ah chuan Sap ṭawngin kan ziah angai ta a, aharsa kati hranlo; mahse, natna hming tak kha abuaithlak kati a, ziah awlsam ber Headache kha ka hmang nasa ber zel, ka pum anat emaw ka ke anat pawn Headache kati vek " Erica'n ati thum ve dut dut bawka, amah lah chu a nuihza ber berah aṭanga a, keini tan nuih veloh chu a inthlahrunawm zawk. " Thianga entawn hratzia kha, Vawikhat pawh Sir in a phawka ahau hrep ang chu tih nak laiin 'I va entawn thiam lo ve' tiin sir kha a nui daiha, Sir khan tun hun hi ahmu lawk anga, anung vel mai mai dawn tih hre lawkin a khawngaih niin ka hria " Angaihi'n atih chuan "Vanlalkhawngaih ngawi mai mai teh Tomorrow tuboh itih ve tho kha " Ati hlura, Hepa han thinchhiat bik em em zia hi chu reilote pawh a zaidam ve thei hlawllo.


" Keichu Hindi kha ka kaw hlawllo a, eng ang pawn zir ve mahila ka thiam thei chuanglo, Question te kha alet zawngin ka copy tawp tawp a, Ka Kha Ga pawh tun thlengin 'Ka kha nga' thleng bak kala thiam chuanglo " Kati ve a, Hindi ka thiam loh zia hrechiang em em tu ka ṭhiante chu an han nui uar leh hlawm em em khawpa "Madam pawh khan ' chhang ve tawh lo law law mairawh' ati che ani lawm ni " Erica'n atih chuan " I thaw ve anih chu chutiang chuan minti kherlo " kati hmaka ala nui hawk hawk zui a, " Erica pawh class7 kan nih laiin class6 ami Zonuni kha love letter thawn vengei atum a; Mahse, Sir in ahrechhuak a, Sir nen love letter ziah te an inzirtir leh vel kha inla hria em? " Vena'n atih chuan uar zetin kan lu kanlo bu nghat nghata. School kan kal velai kha chuan kan Zirtirtute kha ṭhian ang maia kan kawm chang atama, an rik ṭhak tawh erawh chuan kan ṭi ve dak zel.

" Primary ah kha chuan Sir Heada kha asual ve e, lehkha kan zir pawh niin ka hrelo kut hnathawh kan zir nimai khan ka hre ṭhin a, Teachers day velah erawh kha chuan anuam em em tho a, a in kawt kantih fai lahin 'Hriau tiat leka bal pawh awmlo tur khan chhar fai ru' min han ti ngei zel bawka, tunah erawh a chalah pawh ben fawk ila min um pha tawh lo tur khawpin a tar ve tawh ania " Angaihi'n ati a, kan thilsawi chuan azir nge nunhlui ka ngaihtuah let ve zut zuta, engthil mahin min tih buai tak tak ngai loh laite, Zanah kan mu a, zingah kan tho a kan leng a, school kan kal a, school kan bang a, kan infiam a, achang leh kan in marble bawka, in rubber thap te kha kan uar ṭhin si, phakar thiam deuh deuh te an awm a, ahunlaia kan ngei ve theihzia kha aw...La upa lua lo mahila ngaihtuah let tur ka ngah ve khawp mai.

" Tunah te chuan Zirna aṭha tawh e, kan hunlai nen chuan tehkhin chi ani tawhlo " " An zirna a ṭha a, an thluak aṭha chuanglo alawm, Bawng sa pawh Cow rice ti thei te Ar Sa pawh KFC ti mai mai tawk anla awm tho, Zirna run leh zirna chu ṭha tawh viau mahse, naupang ho chu kan hunlai nen anla danglam vaklo" Erica'n ati a, kan nui dar dar a, Hriati pawh kan thusawi chuan anuih ati za ve ngang aniang alo nui ve hawk hawk reng a, Thianga'n a hmuh fuh hunah chuan a chhaih buai veleh khawp ang tih ka ngiahtuah mek laiin " Vanhriatrengi ang hian school ṭha ah kal ve ila chuan Sciecetist kani tawh ang" Ati ta renga, Hriati nui lai chu atawp hmaka, ani leh nilo ang in Thianga chu a melh rum ve lutuk.

Cont..

Mi pakhatin comment thui pangai tak in hnutchhiah theuh loh chuan ka titau dawn ania.
Show post links
Top