STORYFB.COM

REMRUATKIMA



CHAPTER 24



“Nunu, in awm em? Awi nizân lam chu thâwm hria an va tam hmêl ve” Ruthi rawn lût chuan a rawn ti nghal bawrh bawrha, Dorothyin a rawn zui ve bawk. Chaw kan ei kham tawha, u Puia te pawh an rawn thleng ṭêp tih ka hria.



“A mak e, a hrâng tak tak em ni le? Nizân chu kei thâwm ka hre ve miahloa, mahsela an sawi aṭang hian min ti hlau zo vek, zanin chu ka naute ka bulah ka mut tir ang, thla lam hi ka ngaina miahlo. Hmuh pawh ka duh hek lo” Ruthi bawk chuan a rawn ti leha.




Ka lo nui mai thung, u Remruata ka va en chu a dâr a lo sân ak a, vawiin chu thlân dawlna lamah a kal dawna. Kan ṭhian thum chiahin kan awm dâwn a nih hmêl, “Ka kal dawn ania aw, lo in enkawl ṭha la. Kan zawh veleh ka rawn haw nghal ang, hey pharvarnu in ṭhiannu hi lo sawi ṭhaih miah suh ang che u, in lo ti hlauthâwng a nihchuan ka thing phar nasa ang che u” tiin ka chalah chuan a rawn fâwp vang vanga.




Ka ṭhiante pahnih ner nasa lutuk chu ka hmu reng, “Ka lo haw vat ang, thil lo ngaihtuah vak vak lo la” a tihchuan a thusawi awmzia ka hre chiang viau mai.


“Ka ṭha alawm, lo haw vat tum la a nimai, va fimkhur la aw” ka tihchuan bu nghatin a chhuak zuia, “In pa hi chu a pa mawle, a ngaihsak dan che te hi keipawh hetiang pasal mi ngaihsaka duat em em tu hi tawng ve ila ka ti, an vâng nasa sia e. Pasal hi chu i nei fuh ani, a hmelṭha si. A duat bawk che sia, chutah ala pa em em zui, awi a keichu mipa ṭha deuh a ni ka duh ve ni” Ruthi chuan a ti zui bawrh bawrha.




Ka pasal an fakna hriat hi chuan ka lo hlim ve ṭhin a, ka chhuang hle bawk. Mahsela in tihtheih nana hman erawh ka duh chuang lo “Nizan chu an hre tam tak ania'ng, u Zairema te pawh khân an rawn sawi tlat ania aw, an ina riak ho chuan an hre deuh vek a nih hmêl, u Pianga chu a thlarau a hahdam lo hle a nih ka ring” Dorothyi chuan a rawn ti ve hlawla.




Ka la ngawi kar thung “Thla te hian lungawi lohna an neih te hian an hrâng duh an tia, an thih dâna an lungawi loh hian ṭanpuitu an mamawh ve an tia. Tak tak nimaw? Keichu ka rap e, hre ve chiah ila chuan ka thidang tawp theiin ka ring” Ruthiin a tihchuan ka lo nui deuh haka, ka hriat ve thu chu sawi chi ani angem tih ka ngaihtuah a, ka ṭhiante an ni a sawi chhuah ka duh lo tih an hriat chuan an sawi chhuak lêm in ka ring lo.




“Keipawhin ka hria a lawm” ka ti chu phâwk zeta rawn mengin min rawn hnaih nghal ruaka, “Eng maw? I hre ve amaw?” an rawn ti rual deuh ṭhawt a, “Sawi chhuak hauh suh u, ka hria alawm. An sawi nasa si a, kan lo sawi veleh chuan an chhûngte rilru te kan hliam palh thei, in hrethiam em? In sawi chhuah vaih chuan ka lâwm lo viau ang” ka tihchuan an bu nghat nghata.




An hmêl aṭang chuan ka thusawi chu an pawm tih ka hrethiam mai, hei chen kan lo inkâwm ve tawha. An ṭhiannu in ka rem tih loh chu an sawi chhuah ka ring bik lo “Dar 1 vêlah khân a nia, a thawmin min ti harha, harsa ti deuh hian a thaw hrawih hrawiha, ana tih thu te kha a sawia” ka ti chu ka ṭhiante pahnih hlau chu an in kuah nghal hluna.

(thawnthu hi STORYFB lam hi hnamdangin an la enkawl bawk sia, approve an harsat bawk nên fb lam ai WhatsApp lamah hian kan tam tawh zâwk dawn a, hetah chuan dah chhuak tho mah ila a thei theiin WhatsApp group fb a link dah chhuahah sawn join ila, left leh tur tân erawh join lo law law ang aw


Hlau deuh si in an hre châk ve bawk si hmêl chuan nuih a ti za lek lek zâwk “Chuan amah i hmu em?” Ruthi chuan zawi te hian a rawn ti leha, an hmêlah pawh an hlau tih a hriat reng mai.


“Hmu lo e, a thâwm chiah kha ka hria a, a tîrah kha chuan ka hlau lutuka, mahsela u Remruata khân a thlarau vâkvai puitu mamawh a niang a tia ka khawngaih leh zawk, u Remruata khân min kuah tlat bawk nên hlauh lamah pawh a kal tawhlo. Ka khawngaih lutuka, Ramthansanga avângin a duh dân ni miahlo in a nun a chân phah si a” ka ti chu an ni pawh an bu nghat nghata.




“In pa chuan a hlau ve miah lo em ni?” an tihchuan ka nui haka “Ka hre bik lo, hlau hmêl pawh a pulo. Min thlamuan char char zâwk a, keipawhin mak ka ti, mipa ṭhenkhat chuan ramhuai lam hi an hlau viau zel ania, Pangang leh rûl kha a hlau hle si a, mahsela nizânah kha chuan a hlau hmêl ka hmulo, a pângngai thlup reng mai” ka tihchuan an in en deuh haw mai.




“A thlamuanpui awm dâwn a nihchu, nangmah ai a lo chi ai ang tihkha a hlauhawm sia, chutia a awm thei chu amak zâwk alawm. Pasal ṭha tak a nih dâwn chu, hmangaih hle rawh, hetiang mipa hi an vâng tawh ania, insual rawn hrât leh chhûngte thawh chhuah sa hmanga lo in la lian em em an tam tawh laia, hetianga mahni ngeia thawh ve tum mipa hi an vâng tawh teh ania aw. Tûnlaiah hmeichhia zâwk pawisa dîl hreh lo mipa an tam tawh viau laia hetianga nangmah duat em em tu che leh a phâk tâwk a hnathawk ve ṭauh ṭauh mi pasal i nei hi lâwm viau rawh” an rawn ti duaha.




“Nia, nang ni pawh hi zawng vat teh u, hetiang te chuan engtikah nge pasal in neih theih ang ni? In naupang tawh hauh lo ania aw, upat hnuah chuan nau neih a har tawh an tihkha, ṭhat lai hian san chhuah zung zung tur. Doro nang pawh u Puia a rawn kal leh dâwn kha, khulamah pawh hmeichhia a hnaih hauh lo ania, in induh tawn tih ka hria, chance te pêk ve te pawh tum la” ka ti chu a sen ang ṭawn ṭawn lehnghal.



Huiham! He nu ngaihzâwng lama kawngbo lutuk hi lehkhabu hawh meuha zir angai hial tawhin ka hria. Ka duh sak ve bawk si, a nulât rei chuan a rethei rei dâwn tih ka hria, an chhungkaw dinhmun a chhungte'n an enkawl dân zawng zawn hriat ve chuan pasal a mah hmangaih tak tu hi nei sela ka duh sak a ni ber mai.




Kawta thâwm a rawn awm avâng chuan kan ngaihven nghal ṭhapa, bike rawn ding ri rawn chhuak sap sap avâng chuan kan ṭhiante ho an nih ka ring nghal maia, ka ṭhiante pahnih chu ka mitmei zauh zauh mai. Kan ṭhiante pahnih hmun danga awm ta erawh in ngaihtuahna an luah ve ṭhin, awm kim ve vek ila nuam kan ti ngeiin ka ring.




“Kan rawn thleng e, min va rawn hmuak lo ve” u Kima chuan a rawn ti nghal lung lunga, a au ring thei bawk sia maw. “I thâwm kha ti zawi rawh, ṭhenawmah sawn chhiat tâwk an awm ania” ka tih tâkah chuan an han ngawi ang diaka, chutah “Khawiah nge unaupa hi?” u B-an a rawn ti ve thunga.




“Thlan dâwlna lamah a kal a nih kha, a rawn haw ṭep ang. In rawn tluang maw?” tiin ka tho chhuak zuia, thingpui chu ka va thli nghal sawk sawk bawk. U Puia erawhin ka ṭhiannu ngawt chu a lo en leh tawha “Kha hei hi ka lo hawn chea” ti a bâwm lian deuh taka a pack chu pe in Dorothyi lah chuan mak tih hmêl tak hian a ena.




“Eng thil nge hawng nghal ang” Ruthi chuan a lo ti leh nghal chunga “Hey nang nu hi ka hawn ve lo che a nia aw, ilo chuh leh thawt thawt ange i nghal ropui si, neih tum ve hauh suh. I duh leh bialpa nei ve mai rawh” u Puia chuan Ruthi melh rûn rûn pah chuan a rawn tinghal hluk hluka.



“Awi engah nge a ta tur chu ka lo chuh ve ngawt anga? Ka duh chuan ka lei ve thei, uikawm ṭet ṭût lutuk mai, ka ṭhiannu a nia duh suh ka tih che chuan maw i nasa lo khawp ang, ngeiawm lutuk mai” Ruthi chuan a tinghal bawrh bawrha, midang chu kan lo nui hak hak thung.




U Puia thil rawn hawn sak chu kan en puia, bag te, tshirt leh kekawr vêl bâkah kawrfual nalh zet zet leh pheikhawk vêl a lo awm nuala, thil mawi a hre phian lehnghâl. Ka ṭhiannu pawh a hmêlah chuan a hlim tih a hriat, a nui var vara “Heng zawng zawng hi ka ta tur maw?” a aw aṭang chuan a hnuk a ulh deuh tih ka hre thei.




“Immm nia, ih i duhzâwng an ni em? Hmeichhe thil ka lei ngailoa, ka farnute ka zâwt tawpa. I duh leh duh loh pawh hre lo in hawn ve ngei che ka duh sia ka lo lei ringawt a nih kha” u Puia chu a lâi deuh tih ka hria, ka nuih a za tak tak a ni. An va han duhawm dûn tak êm.




Dorothyi chuan a kuah chawta “Ka lawm e aw, ka lâwm lutuk. Ka ṭhiante tih loh ah chuan thil pêk min pe hmasa ber tu i ni, hetiang hi ka neih ve phâk pawh ka ring lo a sin, an mawi takzet. I inseng nasa viau ang tiraw?” tiin mittui tling deuh pam chuan a ena, chu chuan u Puia chu a tibuai tih hriat takin pui turin min rawn en kual hlawma.



“Ih i duh lo em ni? Tinge i ṭah a? Thil dang i duh em ni?” a tihchuan Dorothyi chu a ṭah nuih deuh haka “Ka duh lutuk, ka tân chuan an hlu hle bawk ang. Hetiang thil hi tumahin min la tihsak ngai lova, ka ṭhiante hi an ni mai. Ka tân hetiang i ti tih ka hmuh hian ka lâwm êm a ni” tiin a phun leh sap sapa, ṭhian vek kan ni bawka.



An awm dân chu kan hriatthiam pui bâkah tumahin hmêl hmuh nuam lo kan hmuh lêm lo, u B-a leh u Kima pawh hian kan ṭhiante pahnih chungchâng an hre tawh bawka, engmah an lo sawi bik lo.



“I lawm chuan keipawh ka hlim, nui reng rawh. I kiangah ka awm zêl ang, thil mamawh i neih chuan sawi hreh lo la, ka tihsak theih che a awm chuan ka tihsak zêl ang che ka tih kha” u Puia chuan a ti ve sup supa, an awm dân chu an hmuhnawm letling phian mai.




“Eh! Teh ṭhap cheu chuan, mi pahnih inhmangaihna in lo en hlawm a nimaw? In rawn thlenna a rei tawh em? Ka nupui lah hi mi inngaizawng hmuhnawm ti ber berah hian a ṭang reng mai, khatiang i duh ve chuan nakinah ka lei ve ang che, chaw te in ei tawh em?” u Remruata rawn haw thut chuan a rawn ti lût nghal bawrh bawrha.




“La eilo, kan rawn thleng fel chiah a ni. Ṭhianpa bialnu nei meuh chu che romantic thiam khawp mai, bialnu neih ve duh chuan apply chi a ni, nang Ruthi ka bialnu lo nimai la?” u Kiman a tihchuan Ruthi chu a ner nasa mai “Teuhlo emaia, bialpa ka nei reng a lawm le, engah nge ka duh ngawt ang che” a tinghal hlak chu midang kan lo nui dar dara.




“Chaw chu in ei mai dâwn em ni? Chawhmeh kan ti lum leh lawk ange” tiin choka lamah chuan ka phei zuia, an ṭhianho chuan ka naupai chungchangte chu sawiin mipa ngei an duhthu te chu an sawi nasa maia, u Remruata erawh hi chuan a enga pawh rawn piang sela ka fa a ni dâwn thoa, ka duh ve ve a ti a nihkha.




Chawhmeh ka chhuanlum leh hnu chuan chaw ei siam sak zung zungin an kil lai chuan ka ṭhiante pahnih pawh an haw ta riha, Dorothyi hlim hmêl chuan keipawh min tihlim takzet, an chhûngkaw khawsak a harsa ve bawk si a, hetianga mipa amah ngaihtuahtu a hmu hi ka lawmpui êm a ni.



“I inbual dawn lo em ni?” ti a ka pasal ka en chu a ṭhiante lam hawi pah chuan “Tikhan lo ei ula ka va inbual lawk ange, nakinah Vawk in khu hung belh ka duha, thing tuai min put pui ula a ṭha ang, kan kawmthlang a mi khu kan la mai dawn ania, thing an la ṭha a, kan ngah har lovang” tiin pindanah chuan inthlâk turin a lût zuia.



Towel veng chunga a rawn chhuak chu a piannalh zet chu ka lo en leha, tûn thleng hian a insawizawi ṭha bawka. Dul kiar ang pawh hi a la neilo, mipa ṭhenkhat te chu nupui an neih tawh chuan an in uluk peihlo nghala, an dul a kiar ang luah zel lehnghâla, ka pasal erawh kan inneih hnu thlengin a tlangvâl lai ang chiahin a ni a pian ala nalh ni.
“I mit a tla ange, zânah ka duat dâwn che ania. Tûnah rihchuan kan ṭhiante'n min hmuh hma in i mitmeng kha thlâk vat rawh” ka bengbula a rawn tih sar sar avâng chuan ka phu deuh zuka, a thusawi chuan min ti sa nghal ap ap mai.




Nui ri hakin bathroom lamah chuan a lût zuia “I thei ei tur vêl ipah kan rawn khung khâwm la, lo phawrh la ei châk te i neilo em ni? Naupai lai chuan ei tur ei ṭhat hi a pawimawh ania, in duat hle rawh. Mamawh in neih chuan sawi hreh lo ula, khulamah awm ula chuan ei in a ṭha deuh dâwn a sin mawle. Helamah in awma, ei tur ṭha a vâng bawk si a, i hrisêl loh hi a hlauhawm” u Puia chuan a rawn ti dap dapa.




Min ngaihtuah avânga sawi an ni tih ka hria a, chu chuan min tihlim viau zâwk. “Kan ṭha dâwn alawm, Aizawl chu tûnlaiah phei chuan ka thla a muang meuhlo, a khât tâwkin buaina a awm reng si a, buaina hre pha lo a awm te hi a ṭha a nia. Bâkah nakum lamah kan rawn in sawn hmêl si a, tihian kumin chu awm phawt ila a ṭha, kan Vawk pawh kan pa in buh vuak ni a talh a nih kha a sawi ni” ka ti chu an phûr nghal hlea.




An nghahhlelh thu mawlh a ni an sawi ni, lâwm rawih tur zawn ngei erawh angai ang. An ni chauh chuan engmah thiam an nei dâwn lova, vawikhat mah buh la seng lo leh vaw ngai lo an ni bawk nên ka ṭhiante pahnih pawh an tluk ka ringlo, an u mipa te sâwm tel ila a ṭhat ka ring.



An thil min rawn hawn ka en chu ka phur hle, theibuhfai te, balhhla leh carrot tih vêl serthlum lam nên a awm nual mai, an rawn lei tam em em lehnghala, fridge kan lo nei hlauh chu a vânneihthlâk. Chuti nilo sela chuan ka ei zawh hma in an chhe hman vek dâwn tih a hriat.



Coconut tui lah an rawn hâwn tam na rawh, nau an fai duh an ti bawk nên chutia min lo hawn ta rau rau chu in nghek ila a ṭha ang. Ka pum chu ka khawih zauha “I patea te ho chuan an duat nghal hle mai che tiraw? Tûn aṭangin i hriselna tur an dah pawimawh nghal em em ania” tiin ka nui var vara.



Theibuhfai leh serthlum chu la in ka ei zui mial miala, helamah chuan Serthlum te hi ei tur a awm tawh hauh lova, chutia an rawn hâwn chu a tui zual bik riau te hian ka hria.



“Ka lawm e aw, naute pawhin a ngeih ngei ngei ang. Hetiang rawn leina châng te engtin nge in hriat zâwk a, naupai laia ei tur atâna hrisêl an sawi ang zawng zawng lehnghâl” ka ti chu an pathum chuan in enin an nui ruh ruha.



“Kan ngaihtuah cheu a lawm, chubâkah kan ṭhianpa fa ania. Rawn piang zung zung sela kan duh, in inneih chinah hian duh ang pawhin kan lêng thei tawh siloa, in fa tal erawhin khawvêl hi a hrut hneh hle tur ani” an la ti  zuia, mipa a nih an rin em em lai hian a rawn piang lo ang tih a hlauhawm zâwk, an hnuai nghal rawih theiin ka ring.



“A rawn piang vat turah ngai ang, nghah rei angai tawh nâng. Engtikah emaw chuan apa apa, a rawn la ti vek ang che u” ka ti chu an nui ang kur kura, nuam hi chu an ti bawk ani.




Chaw an ei kham rual chuan thleng chu sengin ka sil lehnghâl sawk sawka, an ni pawhin min lo pui ve bawk. Ka pasal inbual rei thei lutuk chu ka aua, engtin em em hian nge a inbual bik ṭhin ni.


A rawn chhuah rual chuan min rawn nuih tlawn leh phawta, a sam a rawn huh chhuak dapa. A taksa ah chuan an far thla keuh keuh bawk nên chu chuan a ti lang sexy zual “Va inthlâk vat rawh, i inbual rei thei em em lutuk. Hetiang te chuan i ṭhiante pawh inbual ve an duh ang chu” ka lo ti sawk sawka.




“A la hmanhmawh thlâk loh, Vawk in kan zauhna tur chu zu la phawt ang u, hun ala tam hi. Kan intihfai leh laklawh chuan balh kan huphurh leh mai mai dawn, chuvang chuan zu ti zo vat zâwk ang u” an tih tâkah chuan u Remruata pawh ava inthlâk zui ta thuaia.




An chhuak dawn chuan “Lo hlau lo la, auh phâk rengah kan awm dâwn ania. Kan rawn lêt har lovang” a tihchuan ka bu nghat nghat ringawt, inhnuai lamah chuan inzui thla in an inkâwm thla bawrh bawrha, a ṭhiante an awm hi chuan amah pawh hi a hlim tih ka hria, hetah ṭhian fumfe pawh a la nei siloa, amal lutuk hi a châng chuan ka khawngaih ṭhin.



Thleng vêl chu silin in chu ka ti fai leh sawk sawka, thlan ṭhut naa kal ho chu a ṭhen an rawn lêng lût zeuh zeuha, rei erawh an awm ngai lêm lo.



An thei rawh hawn chu fridge-ah chuan a ṭhen dah ṭha in a ṭhen ka eia, keimah te pawh chuan ka buai tâwk ve em em ringawt.



“Hetah hian rawn dah mai rawh u, bawihi tui vâwt kha rawn keng thla teh aw” ti a ka pasal au ri avâng chuan rang taka fridge lam chu panin tui um pakhat chu ka chhuakin inhnuai lamah chuan ka chhuk zuia, kan Vawk pawh a lian ve tawh ngei mai.



Tûnah chuan talh pawh ni ila a man lêt fe chu kan la lût thei tawhin ka ring, ka thlen thlâk rual chuan tui chu lo in nghal khawlh khawlh hlawmin Vawk in chhe deuh lai tawh chu kawkin a siamdan tur chu an ruahman zung zunga, heti hi chuan thingtlâng pa an ang ve tak tak lutuk.



Tubauh leh ara nên, perek leh chem nên chuan an in  chhawp ve ang thliaha, an thiam tak tak ange maw. Ngawi reng chuan an chevel chu ka ena, u Remruata chuan a duhdân sawiin amah chuan a siam zui nghal mawlh mawlh a, a awmdân chuan mit hi a tlung em em zel mai ani.




A ṭhiante ring hauh lovin amah in hma a hruai mai zela, a ṭhiante hian a tihdân enin an zui leh tial ṭhin. Ṭhian in ngaina leh in hmangaih tak an ni in ka hria, an ṭhianhoa an awm khâwm hi chu hmuh an nuam ka ti ṭhin.



An bulah chuan lo ṭhu ve in a tihdân tur te chu ka lo hrilh mawlh mawlha, thu âwih tak chuan an ti ve zel mai bawk. An hriat loh in tih hriat phêt tum lo in keimah min zâwt thlap thlap zela, hmeichhia ka nihna avânga ngaihnepna ang kha an hmêlah hmuh tur a awm ve hek lo.




“A va hautak bawk ve mawle, a sa tal hi tui rawh se. Rawn zin apiangin buaipui a ngai ziah mai” u B-a chuan a ti deuh hluk hluka “Aw a tui dâwn alawm, a thau em kha. A tuilo thei nâng, buh vuak ni ah i ei nghek dâwn ania” ka ti chu a phur leh viau tawh mai.



“I chau ang, lo ding ve reng suh. Lo han mu la ka rawn chho har lovang” u Remruata chuan min rawn hnaih pahin a ti a, tinge maw ka nau pai pawh chu mu tur a min tih sek ni “I mak e, ka enpui ve duh cheu a ni mai a lawm, ka mu peih rihlo ka mut pawh a chhuak lo” ka ti chu a kut a rawn vai puata.




“Naute khân mut a duh ang, mut tam tur Doctor pawhin a tihkha. Exer la ṭha la, mu tam thung la i tâna ṭha tur vek a nihchu” a rawn ti leh hrama, ka kal duh mai lo bawk nên min rawn kaiin “Tikhan lo tihzawm mai rawh u, ka nupui luhlul zet hi ka han ti mu phawt ange, taka in la hriat loh takin tûna kan mitthi hi a hrâng nasa viau a ni âwm e” a ti chu kan ṭhiante hmêl chu a danglam nghal vek a tih theiha.



An mengphawk hru a, keichu a dik em tih melh hian min rawn melha, a inthlahrunawm zâwk. Remruatkima ngeiawm lutuk hi chu la zilh deuh chu an ngai ani, sawi chhuah kher pawh a ngailo mawle. A ṭhiante dawih zia hria in a sawi lui leh tih a chiang reng.



“Kal mai mai teh a, thil âwm leh mawi deuhte hi zawng ve la, khatianga sawi phawng phawng zel mai, nizânah khân engtin nge i sawi kha” ka ti chu a ngawi hmaka, in chhûng kan luh rual chuan pindan lamah min kai lutin “Kha tihian lo mu rawh, nizân i mut ṭhat theihloh kha, zaninah pawh a aia ṭha lo zawk pawhin i awm thei, chhûnah hian mu tam rawh a pawilo” a ti chu a sawi tum ka hrethiam.



Nizâna kan thil tawn vel nên thla hi a muang lo ve êm bawk ani, mahsela tûnah chuan ka hlauh em em pawh ka hrelo.



Thawk la ham hamin ka mu ta tho a, mut a phal miau chuan muhil thlarh thlarh ila a nimai, ka bulah chuan rawn mu ve in min kuaha.




“Hahdam taka i awm hi i tâna ṭha tur zâwk leh i chetsualna tur laka vêng tu zawng che a ni a, thinrim lo in ka thu hi âwih rawh aw. Chân che Heti ka duh hauhloa, kan naute pawh chân ka duh hek lo” a tihchuan ka bu nghat nghata, hnial pawh ka tum lêm lo.



Chutia min chûl heuh heuh reng tâkah chuan ka mut chhuak chuan min rawn zemin rei pawh meng lo chuan ka muhil zuia.




Tlai lamah an ṭhianho titi nak nak chuan min ti harha, an chhungte'n helamah kristmas rawn hman an tum chu an lo phal vak lo a nih hmela. An ni erawh Krismas hma chuan an haw ka ring lo bur, u Remruata hi an ngai thei bawk nên a awm na lam lam hi an âwn a ni ber mai.




Room aṭanga ka chhuah chuan a ṭhenin rawng lo bawlin a ṭhen in chhuat an lo nawta, ka hmu thut bawk nên ka nui lo theilo. Mi âwl ve an tum tih ka hria a, a hlimawm rualin an hmuhnawm bawk nên tilo tura hrilh erawh chu ka tum lêm lo, an bulah chuan va ṭhu in ka pasal Zikhlum changchawr thian mawlh mawlh chu ka puia, rawngbawl a thiam ta lutuk erawh tûn thlengin mak ka la ti, kan inneih tirh vela a rawngbawl ṭhin kha chu a tui tihchi pawh anilo, tûnah erawh ka ngainat ber ber an ni tawh thunga.