KA HMANGAIH THINGTLANGPA BY MAWITEI BAWITLUNG (Completed)

[mawitei bawihtlung]

KA HMANGAIH THINGTLANGPA






CHAPTER 24





“Khatah rem suh u, helamah zâwk hian" ka almerah chu kawngka bula dah an tum avangin ka lo au vata, ka room lamah chuan dah turin ka hrilh chu Kimbawiha chuan a la na ngei mai “Ṭangkai lo si, i bungrua ni mahse nangmahin engmah i tilo, i la duhtui em em zui; nangmahin kan zâwn tîr mai tur che asin, phun chiar lutuk" a rawn ti hluk hluka, ka lo nuih hak hak ringawt.







Huatah ka la duh lem lo, tihian an phun anga an lungawi veleh mai zel bawk. Bâkah an rilru tak tak a nilo tih ka hre chiang bawk nên ka hlimpui mah zawk, “Kha le kurtai tui tak leh thingpui sen tui tak ka rawn pe a che u, min puihna lamah in chau si a" tiin an hmaah chuan kurtai chu va dahin thingpui chu ka sem kuala.







“Phakar zek zuk mange, ka bialnu i nilo hi chu ka vânnei thlawt" Rengpuian a rawn tihchuan Sama chu a lo nui suk mai,an ṭhianzaho hian an ngeiawm hluah hluah mai “I bialnu ka nilo hi chu ka vânnei hluah hluah, chuti lo zawng kan â buang anga, Pathianin nang nilo a Samuela min lo tawn tîr hi chu ka lâwm em em e" ka ti ve chu a rawn meng rum ngei mai.








“Tin, i bialnu ka ni ngai dawn siloa, ngaihtuah pawh ngaihtuah suh" tiin Sama malah chuan a runluih nan ka ṭhu khera, min hnial a tum chu sawi tûr a hre tawh lo nge a âng zuau zuau mai. Midang chu lo nui khur char charin Rengpuia chu an kawka, anilahin a ṭhiante chu a chhir nghal zawt zawt mai lehnghala.






“Malsawmkim i bialnu kha ṭhen nghal teh, khatiang a ṭawngthei si" rawn ti lehin keichu min en run runa, ka nuih a tiza deuh deuh lehnghâl. “Ṭhen mai mai ka tum hleinem, ani in nilo in keimah zâwkin ka duha, harsa taka ka neih hi ṭhen mai mai ka tum lo, min duh lo tu zâwk ania, keiin ka âtchilh bur hmeichhia hi kalsan mai lo e a, Manuni i kalsan theih bik loh kha" Sama chuan a lo ti ve khauha.






Rengpuia pawhin sawi tûr a hre tawh der lo, “Inhnial tawh lo teh ang u, tlailamah chaw eikhâwm kan tum kha, broiler lei tur lo ngaihtuah ula pawisa chu ka lo tum ang. Leina tur ka hre ve der lo ania, Sama nen keiniin in hi kan lo tifai ange" ka tihchuan min hnial lêm lo, kum a rawn thar anga, kan awm dûn thei tawh dâwn lo tih an hre ve miau sia.






An chhuah dam dam hnu chuan Sama nen chuan che dun mawlh mawlhin kan infiam pah zauh zauha, ka nui leh uar uar ṭhin. Hepa hi chu a engkim mai hi ka lâwm ṭhin, thu tam pui pui sawi lo mahse a thusawi chhun hian min tihlim viau lawi si.






“A hma aṭang khân ka zûnah i uai tawh tih hi ka hria a, mahse i haider lui mai a nihkha. Tûnah chuan i hrechiang tawh ang chu maw" a rawn tihkher avâng chuan ner nâng nângin “I chhe emaia, sawi ve ziah suh. Khatih laia ka lo at zia kha tun hnua ka ngaihtuah hian mâwl ka inti hluah hluah ania" tiin ka mu thla hnaka.







“Awi ka rawl ṭhem ṭhum mai, ka tliak dâwnin ka hria. Tirawh lo chawl ve rawh, Rengpuia te ho an rawn kal leh chuan kan bengchheng leh dâwn ania" tiin a kutah chuan ka pawta, a rawn ṭhu thla ve mai bawk.






“Sam, mihring hi a danglam theih hle mai tiraw? A tîr khân hetiang khawpin ka hmangaih dâwn che tih hria ila chuan ka lo thlang law law tur che, mahse nangmah pawh kha i inthup hrim hrima, kan lo â dûn hle mai" tiin a bânah chuan ka chûl sak heuh heuha, mi ṭhenkhat chuan hmeichhe le lo min lo ti pawh a niang, ni e u Sangpuia ka ṭhen hnu lawkah Sama hi ka nihpui leha, min sawichhe duh tân chuan sawichhiatna remchang tak a ni.








Mahse hei hi Pathianin ka tân a lo ruat lâwk te pawh a nimahna, engkim hi ruatsa zêlin a thlenga. Mihring rilru leh thinlung a in ang theilova, mit a inang hek lo. Kan tawn hmasak hi kan ta tur an ni kher lova, hun inher hian a rawn herchhuah pui zêl ami. Kan hmangaih emaw kan lo tih ṭhinte pawh hi kan hriatsual ve fo theia, hmangaihna hrethiam tak tak hauh lovin ṭhenkhat chuan kan ngaihzâwng te hi kan hmangaih nghâl mai thei zela, mahse a tlo ngai lem lo.







Sama ka tawn aṭang hian ka hrechianga, u Sangpuia erawh kha chu hmangaihna ka hriatthiam theihna tûra ka zirna kailawn a nimaiin ka hria.






“Tunah chuan ka ta i ni tawha, tumah dang ka mamawh tawh lem lo. Lo rinawm la, ka tân chauh lo awm reng la chu chu a tawk, Min mamawh hunah min rawn be hreh suh ka tih fo kha, i bialpa ka nih hma pawhin min bia a, tûn hunah phei chuan eng buaina pawh tâwk la i pun hmasak ber tur ka ni tih hi hre reng ang che. Kan inkar hi thu lêng vak vang mai maiin chhelo sela ka duh bawk" tihpahin ka kutah chuan a rawn huma, ka lo bu nghat bawk.









Pâwnlamah chuan naupang ho thawm a rawn awm leh nak nak ṭhina, ramhnuai a hnaih deuh avâng hian sava veh tur an ni ngei ang. “Ka rawn hrilh ziah ang che; mahse, min pui pha awm silo va" ka tihchuan a ner saka “Ka taksa in theilo mahse ka rilru leh thinlung, ka kâ aṭanga thuchhuakte hian an thei thung alâwm, min hnial reng zel lo teh, in hnial ka peihlo ka tih ṭhin kha" tiin a awmah chuan min kuah bei hle hle a.









Valpuiate ho an rawn lêt leh meuh chuan engkim chu kan lo tifel tawha, an ni pawhin an ar lei chu talhin an puah nghal zung zunga, an bialnute sâwm ve tura ka tih erawh an chhûngte hovin an phal chiah lo nge an rawn kal hlawm lova, Manuni erawhin tlai deuh hleka a rawn kal tûr thu a sawi thung, ani hi Sama nen kan nih hnua ka kawm nasat êm avang hian keipawhin engkim hrilhin ka ṭhianṭha tak angah ka ngai tawh.








Ar chu puah mawlh mawlhin kan kang zuia, bahkhawr leh sawhthing, ral leng tih vel chu rawtin kan ri ve laih laih reng mai, zanin hi kumhlui thlah zân ani tawh bawk nên zaikhawm ve lêm lova ṭhian ho a hman kan tuma, sawisel kan kai lutuk lo ang chu maw. Naktukah chuan kum a thar tawh anga, Sama pawh a chhuh vat angai tawh dawn bawk si.








Khua rawn thimin zanriah eikhamah chuan ka in pawnah phul hmunah chuan mei kan chhema, midang chu an ṭhu chhuak vek bawk, kei erawh inchhungah awmin ka in ngaihtuaha, ka ngawi ngar mai. Tlai lama ka hlimnate kha an bo duak nimaiin ka hria, ka ngawi renga, ka room bul tukverhah chuan pâwnlam enin ka ṭhu reng bawk.







“I lo chhuak ve duh lo em ni? Eng nge dik lo awm?" Samuela chu ka bulah a rawn ṭhu thla a, ka chhâng lo. Ka chhâng theilo a nimah zawk, “Duati" a rawn tih leh chuan alam ka ena, ka mittui a tling pam bawk. Insûm tum viau mah ila ka theilo, keimah zâwkin a hna hmuh kha pawma kal tûrin ka ti a; mahse a hun a thlen dâwn meuh chuan ka huphurh leh si.









“Enga tinge i ṭah? Engthil nge dik lo min hrilh teh" a tihchuan lu thing nawk nawkin a mah chu ka kuaha, a awmah chuan hmai nawrin ka ṭap khur dar dar mai. “Duati min chhâng la, hetianga i awm tlat chuan ka awm i ti nuam lo" a tihchuan ka mittui chu hru hulin amah chu ka en chho a “Engmah diklo a awm lo, kan dama kumthar te kan chuangkai anih chuan nang chu ka hmuh phâk lohah i bo thuai anga, ka ngaihtuaha ka lung a chhe mai mai mawle, mahse ṭhulh turin ka duh hauh lo che a nia" tiin ka hrilh zuia.








A ngawi deuh vung vung mai, a kut erawh ka bianga ka mittui luang hru chuan a ti che reng thung. “I huphurh viau chuan ka kal lo mai dâwn em ni? Hetia kan awm hian kan hlim tho a lawm, Sawrkar hnathawh kher angai hleinem, heta awm turin min duh em?" a tihchuan ka lu ka thing nawk nawka, nakina ka inthiamloh rengna tur thil ka ti duh lo.








“Nilo, kal rawh. Hna ṭha takin i thawk anga, chuan kan innei vat dâwn alâwm, ilo ti tawh ta sa sa i hun ṭha hi i bawlhpelh thiang tawhlo, a hma in i nu leh pa avângin ilo ti thei lo tawha, keimah avâng lehzêl chuan ṭhulh tawh suh, i hma hun tih chhiatsak che ka duh lo, keichuan ka nghâk reng thei che alâwm" tiin ka kuaha, thaw huaiin a awmah chuan min pawm bet thlapa.









“Aw le, mahse i ṭah zêl chuan ka awm i ti nuam miah lo a nia. Hlim taka min thlah a nih loh chuan ka kal lovang" tiin min kuai dâk leha, ka nuih ta sak mai. “Ka hlim a lawm, bialpa Police ka nei tur hi ka lawm lutuk, tun chu kumhlui thlah zân te a nisia ka lung a lêng tela, kan nunhlui zawng zawng kha a liam tel pui leh dawn chu a nimai sia, kumthar hian kan nunah enge a rawn herchhuah pui ang tih kan hre der silo, tirawh chhuak tawh ang" tiin ka ding chhuak zuia.








A kuta kai chuan kan ṭhiante awmna lamah chuan kalin an bulah kan va ṭhu vea, an lo infiam bengchheng leh tawh hle. Naupang bula awm ang reng hi kan nimaiin ka hria, hetiang em em a an thawveng hlawm mai hi a mak.



ZAWMNA...





Ṭhiante zaina kârah chuan ngawi rengin Sama min kuah ang ang chuan ka ṭhu a, ka ṭawng tui tam peih ta meuhlo. Naktûkah hian kumthar a rawn inher chhuak anga, kan inṭhenna tur a rawn hnai nghal dawn tih ka hre chiang si a, ka hlim thei meuhlo a ni e.








“I va cool ve? I lung a lêng lâwk animaw? Lungngai suh, a rawn haw ziahin ania ka rin ni. Chhuanlam siam a thiam dawn lutuk, in awmdun ve dâwn chauha in awmbosan in thlang leh miau sia, in tawrh ve hlek chu a ngai dâwn a nih kha. Mahsela thingtlâng lama an rawn dah chuan i tân vanneihna a nimai, helamah pawh Police station te chu a tam alâwm" Rengpuia chuan a rawn ti a.








A sawi chu dik tho mahse an rawn post chu ka ring lo khawp mai, thawk la ham hamin Sama chu ka ngheng hnai sauha, engmah sawi pawh ka tum chuang lo. Râlkhat aṭang chuan kohhran in a an kumhlui thlah programme an hman mêk chu a hriat theiha, an nuih dar darna kârah chuan kei erawh hlim taka nuih a har thung si.








“Kan haw phawt ange, Samuel i haw ve dâwn em?" tiin Sama chu an en ṭhapa, a ni erawhin min kuah run chung hian “Lo va haw mai rawh u, ka riak hial mai thei. A awmna a fal si a, ka ngaihtuah deuh tlat, lo va haw phawt mai rawh u" a tihchuan midang pawh chuan an hnial em em lo, ka lo hnial duh lemlo, a awm bo thuai tawh dawna, ka thlahlel lutuk tlat.







Midang kal kian hnu chuan min kuahna chu tinghet salhin ka dulah chuan a chûl hauh hauha “Ka sawi tawh kha, hlim hmêl taka min thlah a nih loh chuan ka kalsan dâwn lo che a nia, i rilru dik tak min hrilh rawh. Ka awm bo i phal nge phallo?" a rawn tihchuan ka en ha a.








“Kan pahnih hma hun atân a ni tih i hriat kha, fate kan nei ve ngai a nihchuan rual awt reng renga an awm i phal in ka ringlo, hrehawm kan tuar hi a ṭul rih pawh a ni ang. I lo lêt leh veleh palai i rawn tir tawh mai dâwn em ni? Chuan kan awm tlâng ve thei tawh mai thei a sin"ti a inherin a nghâwngah chuan ka kuaha. Khaw vâwt kara a taksa lumna chu nghêng hnai ṭalh ṭalhin hahdam tak chuan ka thaw chhuak suai suai bawk.








“Ka rilru leh lamah chuan ka hmuh phâk lohva i awm ka phallo va, lehlam erawh chuan kan pahnih tân a ni tih hria in kal tir tur che in min hrilh thung. I tân ka tân a ni tih hre reng rawh, i tum dâl ka tum ngai lovang. Sam ka hmangaih che a, ka lo nghak thei che alâwm" tisapin a biangah chuan ka hmui in ka nawr vang vanga.









“Keipawhin ka hmangaih che Nuntluangpui, mu tawh ang a tlai tawh riau mai" tiin kan meichhem chu a thai darha, inchhûng lamah chuan min kai luta “Riah ve chu i tum tak tak em ni? Miin an hria ange aw" ka tihchuan a kut a vaia “A ho lutuk, thilsual kan ti dâwn pawh a nilo, nangmahin i awma ka riahpui mai dâwn che a nia, engmah an sawilo ang. Midang pawh an inriah pui fo alâwm, chungin an ṭawng theilo" tiin min rawn kuah thuka.








“Mu lum vat vat ang, a vawt riau tawh mai" tiin ka khumah chuan min mutthlak puia, light chu a off hmak bawk. Thim karah chuan kan phun dun sap sapa “Fa kan neih hunah chuan hna kal tawh lovin ka bulah in awm vek tawh ang, hetah chuan ka pi leh pu hi patea te nen awm tlâng sela, in sak zawh veleh an ni pawhin an luah lut ang chu. Kei lah heti hi ka ni leh si a, khuaah ka awm hman tawh dâwn lo nen ka pi leh pu hian awm pui tu an neih loh chuan ka ngaihtuah riau mai si a" a tihchuan ka lo bu nghat nghat mai.









Ni e an upa ve tawh bawk nen an mahni pahnih chauha kalsan chu an khua a har dawn emai. “Keipawhin ka lo ngai viau ang che, i haw theih apiangin lo haw tum rawh aw. I awm loh phei chuan kawm tur takngial pawh ka nei tawh awm silo, mahse hna i hmu hi ka lawmpui em em tho che si" tiin a zak hnuaiah chuan ka kut rawlh lûtin nghet zet chuan ka kuaha, a perfume rim tui tak chu ka hip vang vang bawk.









“Lo haw chu ka tum ang, Christmas erawh helamah hman ngei ngei ka duh ṭhin dawna, rawn haw ziah ka tum ang. Ka rawn haw hmasak berah palai rawn tîr ta ila min hnar angem?" a rawn tihchuan ka nuih haka “Ka nu leh pa thu thu a nimai ang chu, keichuan ka hnar dâwn lo chiang sa che a" tiin ka seh zauhva, min rawn hmer nghal chat mai.









Ka hmuiah chuan rawn fawp zuiin ka chungah chuan a bawk rana, ka kawr chu a hlim chho nghal bawk. A kut lian zet chu hleizet hian a chet kual tira, thaw ham hamin a hnungah chuan ka ṭham tawn tawn mai, ka insum theilo mai dâwn in ka hria, ka hmangaiha alakah ui ka neilo, ka rilru leh lamah chuan engmah ngaihtuah loa a tâna in pêk ka duha, lehlamah erawh hlauhthâwnna ka nei tel tho bawk si.









A ni lahin tâwp a tum lova, a duhthawh sauh sauh bawk si, “Sam kan tâwp a ngai" ka kâwng hnuailam a khawih avâng chuan ka rum haka, “Ka insum ang, inneih hunah kan tih kha ka hria alâwm; mahse a tâwp thleng kher lovin nawmna pêk che ka duh, min ring rawh. I phalna thlap lo chuan i thianghlimna hi ka lâksak ngai lovang che" a tih tâkah chuan ka tha chu ka thlah dula.








Chuveleh min rawn fawp lehin hnuailama a kut chu a tiche zui nghal bawk, au chhuak deuh ṭhatin ka hmui chu ka hup vata; ka thawk mumal lo lutuk avâng chuan amah chu hmerin ka ṭham tawn tawn a, ka taksa rawn lum chhuak pup pup chu ka hailo, insûm har ka ti lutuk chuan a darah ka seh sak vak ringawt.








“Sam" ka thaw hlawp hlawpa, ka taksa chu ka er ngawng nghawng mai. Ka thaw ham hama, ka khur dat dat bawk. A kut erawh ala dahsawn hauh lo “Ka tina che em?" a rawn tihchuan “Aih" tih pahin nghet zet chuan ka kuaha, ka thawk a la pangngai thei hek lo.







Ka sirah chuan rawn muthla in min kuah bet rana “Mu tawh rawh le" tiin ka hnungah chuan a chûl hliau hliau bawk. Nghet zeta kuah chung chuan thawk pângngai tumin ka bei fat fata, a mi khawihna nên chuan ka mut chu chhuak zualin ka chhing nghal riai riai bawk.