STORYFB.COM

LET's LOVE AGAIN



By Ziki nu


Chapter-25



Pathian zarah harsatna em em tawk lovin kum thar kan chuangkai a, Aizawla ka let leh ni chuan kan khaw sumo counter ah Rintea'n min lo hmuak a, kan han inhmu chu lai deuhin kan innuih leh ringawt thin a, kan kum zat ngaihtuaha chutia kan han lai chhe leh lek lek thin chu a zia lo lam deuh a ni.


"Ka rin aiin in lo thleng hma a, in tifai la, kan in lamah chaw I rawn ei phei dawn nia aw" a tih chuan ka hnial zet na in "Ka nu in eirawng ka bawl kep dawn a ti vek tawh, I chau awm si a, vawiin tlai chu rawn ei mai rawh" a ti deuh tlat a, han hnial luih tlat theih pawh a ni chiah lo.




Bungrua nena ka in chhung kan han lut chu thaw a veng ve huai a, hmabak ah tihtur tam viau mah se dam taka kum thar kan han thleng leh chu thil lawmawm tak leh kan phu loh malsawmna a niin ka hria.



"I ril a tam em? Ei tur ka siamsak dawn che em ni?" tiin Rintea chu a che zung zung a, ka thuamhnawte pindan lama a dah zawhah thingpui min lumsak a, choka lama a tap chawt chu "Min va ngailo ve" tiin ka au fiam a, a rawn phei rang khawp mai.



Ka bulah rawn thu in ka kut a rawn hum hnan vang vang a, "Ka ngai lutuk che hi awmngaihna ka hrelo lek lek zawk a ni" ti supin ka kut chu a fawp zui vang vang bawk a, inngai leh inthlahlel deuha kan inkuah hnuah awm hahdam pahin thingpuite kan in dun leh te te a, min nghah law law pawi a tihloh avangin ka inbualsan leh lawp lawp bawk a, a awm chu hah a dam ngang mai.



Khaw thim dawnah an in lamah chuan kan let phei thei chauh a, Nu Nutei pawhin min lo lawm thiam khawp mai.


Rinfeli te nufa pawh an lo awm ve a, an awm dawn tih ka hriat lawk loh vangin naute lawm tur thil pawh engmah ka lei si lo a, a inthlahrunawm lek lek a ni.



Nu Nutei chuan krismas ka hman nawm leh nawmloh te min zawtin ka chhungte chanchin nen min be siam siam reng a, Rintea inbual turin a kal hrang rih ta bawk nen choka ah kan ti ti dun a, "Lo zin ve hman an tum tehlul nen hun an nei thei nganglo alawm mawle" a tih chuan "Nia,, remchang dang a awm leh mai ang" ka lo ti ve mai a.



Min en vang vangin "I nu leh pate kha an boral tawh tiraw Sawmte?" a ti zawi deuh sap a, tawi te a nui chungin lu ka bu nghat a, a hmelah pawi min tihpui ve zia a lang reng mai.


"A zia lo ngawt mai, thihna chungah hi chuan thu kan nei lo em a, mahse hei tunah chuan keini kan awm a, nu leh pa neilo angah te khan inngai duh miahlo la, I nu leh pate tho kan nih hi aw" a tih chuan thinlung takin a sawi em hre lo mah ila thla a muang ve sawng sawng thei.



Eirawng bawlpui ka tum chuan a duh leh tlat lo pek a, Rinfeli'n a fapa lo en sak lawk turin min ti ve bawk nen sitting room lamah ka thu phei leh a, an naute lah chuan min duh tha mang hauhlo leh nghal a, min en vung vung hnuah tah a tum zel mai a, a chhan pawh ka hre bik lo. Ka insiam chhiat khum pawh a ni silo a, min Haw ve hrim hrim ni berin ka hria.


Zanriah ei lai pawh chuan min be seuh seuh reng a, ka tana hriat nuamlo tur zawng tawngkam an nei lo ringawt pawh chu a lawmawm lutuk a, a hma ang taka kan inpawh leh theih chuan a nuam lehzual viau in ka ring.



Ka chau ve deuh bawk nen rei awm lovin min thlah leh thuai a, khumah mu dunin kan titi melh melh a, min thlahlel ve tawh ngang a nih ka ring ka lak atangin a kut chu a la sawn thei meuh lo a, min pawm bet reng chu ka tan lo hnar phal chi a ni bik bawk lo a, in ngai leh inthlahlel em em in kan inpawm vawng vawng reng a ni ber mai.



"Thil dang tih tum i la nei em?" tia min zawh chuan "Ngatinge?" ka lo ti let ha a, "Tunah chuan zirtirtu i ni tawh a, a aia sang nih tumna emaw, thil dang eng emaw tih tum dangte..?" a tih leh takah chuan hrethiam in "Nei hran tawhlo, nu leh pa ka nei tawh lo a, ka hna hi chawlhsan thei pawh ka ni tawh chiahlo, ka u in chhungkua a nei tawh bawk nen keimah leh keimah ka inenkawl ve theih hi ka duh ber a" ka tih chuan ngaihtuah mûk hmel deuh hian a ngawi zui vung vung a,

"Ngatinge min zawh?" ka tih chuan min rawn en in "Engtikah nge pasal neih i duh ang?" a ti mauh mai a, inneih chungchang chu sawi fo mah ila hetiang zawng hi chuan min la zawt ngai lo.


"Ka hre lo" ti hapin inchung chu ka melh vang vang a, a chang chuan pasal fanau neiha chhungkua han din ve pawh ka ngaihtuah thin a, mahse tuna ka dinhmun nen hi chuan a la in rem theiin ka hre ngang si lo a.


"I nu boralna kum khat êm pawh a la tling lo a, ka nawr lutuk che chu ka hlau viau na in" ti supin a ngawi leh daih a, a sawi tum erawh ka hrethiam tho chuan ka hria.



"I hmanhmawh tawh viau em ni?" ka tih chuan "Ka nghak thei ang che, mahse nghah thlawn che chu ka duh lo ang" a lo ti leh sup a, min rawn enin mawi deuhin a kiai suk bawk nen keipawh ka nui ve hak a, sawi zawm tawh lo mah ila keipawhin rilru siamfel vat chu a tulin ka hria.




Hriat loh karin ni kan hmang liam zung zung a, Rintea nen pawh kan hna ve ve ah buaiin theih tawpin inkhawl kan tum a, pawisa pawh kan ren dun rih viau a ni.

Kan inkar a tha a, a chhungte nena kan inkar a tha bawk a, buaina em em nei lova hun kan hmang liam ve zel chu malsawmna a ni.



U Mazari te lam nen erawh kan la inbe mumal leh ta lo va, ka in chung pawh tuma luah lohin a ruak ta reng a, inkhawmnaah kan inhmu leh zauh thin tihloh chu U Mazari pawh ka hmuh khât a, inngeihlo ru deuha awm chu nuam vaklo mah se pasal a nei hman hlauh chu a tihzia tak tak a ni.




February thla kan chuankai chuan boruak dangin min chîm a, beisei loh deuhin Richarda bialnu Lawmtei rai thu Rintea hnen atangin ka hre ve a, Lawmtei lah chu zirlai a la nih bakah thla thar maia board exam tur a ni zui a, an rilru hah chu zanah ka inah Rintea leh Richarda an rawn kal a, engtia tih tur nge pawh ka hrethiam ve chiahlo.





Lawmtei lah chu an exam a hnaih tawh avangin a chhungte an strict zual hle bawk nen, kan thianpa pawh a rilru a buai hmel khawp mai.



"Lawmtei chuan pai tlang a duh ve reng reng em?" tia ak zawh chuan bu nghut nghutin "Kan duh ve ve" a lo ti sup a, "Anih chuan rûk a ngai a ni mai" Rintea'n a ti chu kan en rual zawtin ka ring.



"I ngamlo em ni a?" a thianpa melh run paha a tih leh chuan "Ngam te chu ngam e, mahse phone an laksak eh tawh a, in hmuh chu sawiloh, inbiak a harsa lutuk" a ti nuah nuah a, a rilru a buai hmel takzet tawhin ka hria.





"Tihdan ngaihtuah vat a ngai a nih chu, naute chu thla a tling tawh em?" ka tih chuan banga calendar intar chu thlek vung vungin "December thla tawp lam kha a nia" a ti sup a, Rintea'n "Christmas hmang na deuh ho rawn lan chhuah hun tak a nia" a lo ti zauh chu a melh rum khawp mai.



"Beer ka in pui alawm, ka rui ve tho bawk sia" a ti zawi sup a, a inthlahrung hmel chu ka khawngaih ve tho, tum lawk miah loh pawh hian mihringte hi chu kan peng leh zauh thin a, rui lo se hetiang thil hi an tawk miahlo ang maw le.



"Engpawh ni se i chhungte hrilh phawt rawh, a nih tur ang ang nih tir vat hi a hahdamthlak zawk" ka bul ami in a tih leh takah chuan "Nia chu chu a tha ber ang" a lo ti ve sup a, Lawmtei rilru hah lutuk tur chu ka lo khawngaih ve ngang mai bawk.




Richarda min chhuahsan hnu chuan "Nau pai la chuan kan innei ve mai tur" a ti pek a, ka melhrum viau laiin thutak deuh hian min en run thung a, ka sawi zawm pui duh lo.




A tuk tlaia Richarda'n min rawn biak leh chuan "Zanin ah kan ru dawn a, in inah kan lo kal mai dawn" a rawn ti a, lo phalloh chi niin ka hrelo a chutih rualin lo awm tir ringawt pawh chu a tih chi ber ang em ka hre thiam lo.


"Kalna tur dang in hre thlawtlo em ni a?" ka tih chuan "Rinsangzuala te in chu a chi loh, Lawmtei pa in a rawn hmu vat ang" a ti tlat si a, tih ngaihna dang hre bik heklo, aw ka han pawh ve ta ngawt chu a nia.


Zanriah ei khama Rintea'n min rawn biak chuan Lawmtei te in lam an pan mek thu a rawn sawi a, an ni pahnih nupui ru tur chu an ropui vakin ka ringlo.


"Zanrei ah an ru thin emaw ka tia" ka tih chuan "Zanreiah kan nula hi a chhuak thei lo hrim hrim a, thim hlimah hian thil tih a awlsam zawk ang" a ti leh mai a, tha an tih ang chuan han che phawt teh se.




Dar 9 rik hma hretin kawngkhar chu an rawn kik ta dat dat a, rin lawk ang ngeiin ka thiante chu an rawn lut a, Lawmtei chu a puan sin laia a lu leh hmai a khuh vek avangin a hmel pawh ka hmu chiang theilo.



Richarda chu a nui keh hui reng a, a thianpa bulah "Nupui kan ru ve ta ringawt chu a nia" a ti leh thin a, a thutak lo hmel lutuk chu ka lo huatpui lek lek Mai.



Chumi zan chuan ka in luahah an riak a, midang ang tho in an inruk hnu chuan thil a fel Mai turah kan ngai kha a ni a, mahse tum loh danin thil a kal tlat.




Lawmtei pa chu an sawi ka hriat thin ai maha pa hlauhawm a lo nia, hlauhawm tih chu a mawi chiahlo thei tho na in, pa nelawm loh tak leh a fanu hauhna tak mi niin ka hria.




Zingkarah hma deuhah Richarda phone a rawn ri a, Rintea te in lamah Lawmtei pa chuan a lo va kalchilh ni âwm tak a ni.


"Ka fanu chu ka la let dawn, nau a pai a nih pawhin kan enkawl mai ang, pasal nei rual a la nilo, nakinah a la inchhir dawn" a lo ti a, Lawmtei lah chuan let leh chu a hlauhin a hlau a ni ber bawk a, kan mangang tlang khawp mai.



Zinga Rintea rawn thlen ve hnu chuan tihdan tur kan han ngaihtuah leh a, "Engpawh ti dawn se haw tui chu ka tum tawhlo, ka fa a pai a, ka enkawl thei bawk a" Richarda'n a tih chuan kan lo bu ve nghat nghat a,
"Haw leh chu i duh em?" tia Lawmtei a zawh chuan rang deuha lu lo thingin "Ka haw duh tawhlo" a ti tiau a, tap hreh viau siin a tah erawh a chhuah hmel takzet a, an dinhmun harsa lutuk chu ka khawngaih hle ringawt.



"Pathian zarah engkim a tha leh mai ang, hlauthawng lutuk lo ula" tiin lo hnem tum ve bawk mah ila a sawt vaklo, "Kan in lamah haw phei phawt ang, Lawmtei pa te chu an rawn kal ngei anga, mahse tlanchhiat reng theih a ni dawnlo" Richarda'n a tih chuan kan pawm tlang a, school kal ka ngai bawk nen eirawng ka bawl zawhah ka insiamsan mawlh mawlh a, Rintea pawh let Mai thei a la ni biklo, a thiante chu kawng engkimah a puih an ngai tih a hre ve reng a, a inpekna chu hmuh nuam ka lo ti ve em em Mai bawk.



School ah pawh rilru a bet hlei thei meuh lo a, Rintea chu chanchin min lo hrilh ve zel turin ka ti a, mahse an la buai deuh nge mawni chawhnu lam thleng chuan thawm an la rawn nei lo.




Tlai ban dawnah min rawn be ve ta hram a, Lawmtei chhungte chuan an lo umzui ta ngei a, hruai haw chu tum viau mah se an fanu in a duh miau loh chuan tihngaihna an hre bik vaklo a niang, "I nei lui a nih chuan kan tuithlar ang che" an lo ti ni âwm tak a ni.



Mahse nau hial an keng tawh a, Lawmtei tan han haw leh pawh ni se nuthlawi nih chauh a hmabak tawh a, chu aisa chuan a nau paina mipa, amah hmangaih em emtu chu a thlannahawm zawk lo thei bik lo.



Zanah Rintea amahin a rawn leng a, vawiin lamah nilengin a hna a buaipui thei lo a, zanin pawh a rawn kal hman ka rinloh laiin a rawn lang hlawl a, thutthlenga ka thu chu ka malchungah a lu rawn nghatin a mu zui der der a, ka hnar duh biklo.



Kan pahnih chuan Lawmtei te chanchin sawiin kan ti ti melh melh a, "An tuithlar duh tak tak i ring em?" tia ka zawh chuan "Ring e, a pa hmelah khan uang hmel a lang hleinem" a lo ti ve sup a, rilru ah an awm reng si a, nuih var var pawh a har ve talh mai.


"Anmahni anga buai ve hi mi engzat tak awm ang maw, induh loh vang ni miahloa nupa ni thei lo te, chhungte vanga inthenna te hi a tam ngawtin ka ring" ka ti leh sap sap a, rawn thu chhuakin ka darah nghet deuhin min kuah a,
"Ngaihtuah ve mah teh, kan thiante thil rawn mek hi a khirh em em a, mahse an invawn tlat chuan engmahin a then hrang lo ang, i rilru ti hrehawm lo la, an inhmangaih phawt chuan an tuar chhuak thei dawn alawm" a ti ve sup a, mahse thil ka ngaihtuah nasa lutuk a, rilru a nuam thei chuanglo.



"Hmangaihna vanduai an tih hi hetiang hi a ni ve tho ang em? Kan ngaihzawng ten min duh lo emaw, min kalsan hian hmangaihna vanduai kan ti a, mahse inhmangaih tawn em em chunga innei theilo leh awmdun theilo te hi an vanduai daih zawk ang tiraw? Chu baka hmangaihna vanduai chu a awm bik chuang em mawni le?"




"Bawihte.. "

Ka melh vat a, a mitmeng dam thlup leh hahdam tura min enna vang chuan tawi te in ka han nui ve sak a, "Ka lakah chuan heng hmangaihna vanduai tih vel vang hian buai suh, Pathian ruat kan nih chuan hun tha kan nei ang, ni lo, kan nei daih tawh zawk" a tih chuan hrethiam lo fe in "Engnge i sawi awmzia?" Ka lo ti vat a.




"Kum 4 liam ta khan kan inhmangaih tawh a, mahse kan inthen leh a nih kha, Pathianin min veng tawn a, inhmangaih nawn lehna hun min pe hi inkawp tura min ruat vang a nih loh chuan na nawn leh tura min duh vang a ni thei dawn em ni?" a ti a, a thil sawi zet chu aw...




Ka biang rawn lum thla pap chu rang lutukin ka tuai hul a, engtik laiin nge ka mittui chu a rawn tlak pawh ka hre lo.


"Ka hmangaih che Malsawm, eng vang mahin hmangaihna vanduai I tawn hi ka phal lo, ka dam chhungin ka hmangaih ang che" tiin min kuah a, tahnuih hak chungin ka lo pawm bet ve rawk rawk bawk a, amah ka tawng hi vannei ka inti takzet.





Karkhat zet a liam leh hnu chuan Lawmtei te chhung lam pawhin thawm an rawn nei ta lo va, a tirah kha chuan thinrim deuh chungin a pa kha a va kal chhen a, mipa lamin pangngai taka inneih an sawipui pawhin an hmin thei ngang si lo a, tihian an fanu chu an tuithlar zui a ni ber a, a zialo tak tak a ni.


Richarda chuan "A la rai lian chuanglo a, aman a duh phawt chuan pawl 12 hi chu exam hrim hrim se a tha" a ti a, Lawmtei lahin a lo duh em em bawk nen mo thar e tilo chuan lehkha a zir ngawrh viau a, Richarda chhunbge lam an felin an hawi zau bawk a, Lawmtei tan pawh nuamlo tihna chhan tur vak a awmin ka hre lo.


Ka phone rawn êng zak zak chu ka kut hru hul sawk sawkin ka ban vat a, U Mama hming ka hmuh rual chuan tunlai kan inbiak khât zia ka hre chhuak zuk a, ka rin lawk dan ang chiahin ka chhan rual chuan "I va reh ve" a rawn ti nghal zat mai.



Kan thiante chanchin tlangpui chu ka hrilh ve a, "Ka lo biak chhan tak che chu i U Hlimi hi a nia, tunlai chu a insawisel reng a, kha lamah rawn inentir se ka ti deuh mawle" a tih chuan sawi zawm zelin a natna te chu ka zawt a, hmeichhe lampang ni âwm tak a ni.




"Tunkar chu a tawp leh tep rawh si a, karleh lamah lo chhuk se la a tha ang, midang hnena thlen ai chuan i bula rawn thlen mai kha a ni pawhin a duh zawk dawn hrim hrim a" a tih chuan ka hniallo nasa khawp mai.



Kan inbiak zawhah intifaiin chaw ka ei sawk sawk a, naupang zirlai en tur ka ngah bawk nen zanah pawh ka mengrei leh pek khawp mai.



Ni a liam zel a, U Hlimi rawn thlen tlai chuan Rintea'n chaw a rawn ei ve nghal a, ka u Hlimi chu tawng duh ngang a ni bawka a ri bawrh bawrh reng a, Rintea nen pawh an inkawm thei khawp mai.



Zana thei kan bawl lai chuan "Engtikah nge in inneih ve ang?" ka u Hlimi chuan a ti zauh pek a, min melh zawkin ka bul ami chuan "Kan innei ve tep tawh" a lo ti ve mai bawk a, "In inneih hunah pawh Sawmi hi chu kan la rawn pawt buai chhen dawn a nia, ka nu te an awm tawh si lo a, ka fate nî neih chhun hi chu chuti maiin kan pe phal billo che u" a ti leh phawr phawr a, han nuihpui tawp bak chu tih theih vak pawh kan nei lo.




A motor chuan naah a chau deuh nge mawni min mutsan hma khawp mai a, inneih chungchang a sawi zauh vang khan ka bialpa lah chu a rilru a thar emaw tih mai turin "Richarda pawh pa a ni tep tawh" a tih loh leh "Kan inneih har lutuk chuan fa kan nei tam hman lo ang" te a tia, a uang ve tho tih ka hriat vang erawh chuan ka ngai haw duh lem lo.


Mihring nun hi tuifawn ang mai niin ka hria, a chang chuan chu tuifawn chuan vau kamah thil hlu tak tak, tuipui thûk tak atangte in a rawn len chhuak thin a, mahse a chang erawh chuan tuifawn hlauhawm leh tihbaiawm tak, a chhunga awmte lem zo vek thei khawpa rapthlak a ni leh thin.



Mihring nun pawh hi chutiang chiah chu a ni, kan beisei loh lam atangin thil tha leh malsawmna tam tak kan dawng thin a, nun nuam leh hlimawm tak kan hmen mek laiin beisi loh lam atangin thu thinthawng takin min lo hmuak leh a.



U Hlimi result chu Pathian zarah a lo tha a, damdawi leh eng ilo doctor in min chawhte chu kan nei a, a ni pawh rei cham lovin ni thum hnuah a haw ve leh mai bawk.


Mahse rin lawk loh deuhin Rintea nu Nu Nutei chu a chhul a cancer tih kan han hre zui leh a, ngaihtuahna a mangin rilru a buai duh takzet.









Cont....
Show post links
Top