Thinlung BY Kimkimi tlau (Completed)

[ngaia]

Thawm dim turin in hrilh reng mahila ṭhian ho awmkhawm kannih bakah mipa hi chuan thawm hi an dim tak tak theilo a, an ṭawng velahin an ṭawng zawih poh leh athum in abengchheng zawka, an han nui ve phei hi chu keini kan nuih pangngai mai laiin anni chu annui hum hum zela, an palen loh tehlul nen hian Englo pawr aw hi an nei ṭha zeka, Eng ang pawn englo pawr aw neiṭha mahse, kan khua ang ah chuan Zaipawl Bass atan bak an tlak loh.

Kan bengchheng ve deuh bawk nen Duati chu kanti harh ta ngeia, U Nguri'n alo pawm chho a, Naute anti harh tih an hriat chuan an tim ve deuh nain an tim rei chuang lem hleilo a, "Khawi kalo pawm ang" Vena'n ati a, U Nguri pawn pe ve maiin an in pawm thei zeka, Duati lah in duhloh ala hre tak taklo a, tunlai phei chu azia athlak ve a, a fel viau bawka, zanah pawh asual tawh ngailo.


A changa inhnial a, achang a nui ho leh dar dar ṭhin in nileng hun chu kan hmang ho ve a, nileng hun ninawm deuh tur kha ṭhiante avangin ka hmang nuam viau a, ka lawm tak tak ani. Midang an haw hnuah Angaihi ala awm khawmuanga, Duati chu paw mu in U Nguri nen an titi siam siam a, keiin an titi kalo ngaithla thung. Sawi tur anhria in achang chuan an inhnial leh lek lek zela an sir aṭangin kalo nuih kar kar zel, " Mawii chu alo haw tawh maw" Ti a U Nguri'n a zawh chuan " Haw tawh e, tun ṭum chu alo danglam haw lutuk a, alawmawm tak tak ani, kanu nen pawh an in ngeih a, kanu nen buaina an neih loh chuan chhungkua ahlim animai " Angaihi'n nui hak hak chungin ati a, U Nguri hi chu aring ve a, Kei min hrilh ang em em hi chu hrilh ve kherlo mahse, thil tam zawk hi ahrilh ve a, U Nguri pawn a rinzia hrethiamin midang bulah asawi chhuak ngailo.

" Mo fel nih hi a harlo a, chu aia harlo leh zual chu Mo Sual nih hi ani, Nangni pawh nakin lawka pasal la nei ve tur inni a, Mo ṭha leh fel tak ni tur chuan Nangmahni in pawimawh rualin in lawina tur chhungkua an pawimawh a. Pasal neih fuh a pawimawh bawk, ṭhat naa hneh theih loh mihring hi an vang a, eng emaw hleka vui nghal zel te hi aṭha ngailo, Mo nih chuan tuar chhel angai ania aw, keichu ka vannei a, Ka pasal unaute hrawn an hahthlak lo a, kanu leh pa lah an fel em em bawka " Ti duahin minlo en khera, " Hmm..Kimi awm vang maia " Angaihi'n atih chuan U Nguri chu za zetin anui a, " Kimi awm vang pawh anilo " ati pah bawka, Angaihi lah chuan insawi hliau hliau pahin " Ani reng " ala ti hram a, U Nguri chuan achhang tawhlo, thil dang sawiin an titi leh mawlh mawlha, eng topic pawh tui taka an sawi thei zel chu an fakawm kati.


Tlai rawngbawl hun velah U Faki leh a pawlte anlo lang ve hlawla, anlo riak dawn aniang Bawihtei leh Matt chuan an thawmhnaw ni awm tak hi bag lian vaklo in an hnungah an ak ve ve a, " Lokal ru, inlo riak dawn mi? " katih chuan "Riak dawn anihhi, an ngai che a " U Faki'n ati barh barh a, Bawihtei te unau bag ah lai chu alaksak a, room ah alut tlang a. " Anu Angaih, ilo leng ve alaw " Ka bula lo ṭhut pahin Bawihtei chuan ati hliai a, ka meng phar nasa mai. "Anu Angaih a ! " kati hluai a, Angaihi chu ka en pah bawka, ani pawh a meng phawk ve ngang mai. Mak tih vanga meng phawk ni lovin hlauhthawn vanga meng phawk a ang mah zawk a, ka ngaihbel pawh ani maithei.

" Ani Angaihi ka tihna " Bawihtei'n rang fe a alo tih leh chuan " Nia, min ko sual anihkha " Angaihi'n ati ve vata, zalo zetin min nuih bawka, akut pawh a che leh sek tawh. Ka naute pawm laiin thawm aneih takah chuan engmah ka sawi chhunzawm lo a, Angaihi che sek erawh ka mit sirin ka hmu renga, engvanga chutia awm chu nge maw anih le.


Matthewa chuan Angaihi chu a pan hnai tih kahria a, Duati'n ṭah atum tlat avangin ka ngaihven theilo thunga, "U Ngur hnute lo pe lawk la, A thawh aṭangin hnute ala hnelo " katih chuan choka aṭangin U Nguri alo chhuaka, ka bulah Bawihtei ṭhut lohna lamah lo ṭhu in Naute chu ala a, Duhthawh leh tui ti zeta hnute a hne dawk dawk laichu Bawihtei chuan a en dauh dauh a. keichuan Angaihi leh Matthewa ṭhu dun chu ka en thung a, Matthewa chuan ahmui ti pawrh tarhin Angaihi chu thil ahrilh ve a, Angaihi pawh abu nghat nghata, Matthewa'n kan lam alo kawh va chuan alo hawi a, kei lahin kalo en reng bawk nen " I mawl ami? " ati chiama, ka nuih ringawt.

" Baby Matthewa hian nanau kha athik a " Ti hluaiin amalchunga lawn mek Matthewa chu a pawm ṭha sat sata, Matthewa lah chuan ahmui ti pawrh tarhin naute tih angin thawm achhuah kual ve a, Angaihi'n 'Naute hi hau su' atihte chuan ake chu aleng ve bat bata, alandan duhawm lutuk chu nuihpui loh atan chuan a uihawm; Duati hi athik tlata, kan in a alo kala Duati ṭap kan han buaipui velte hi a thik ṭhin a, A-pu emaw a patea te bulah kalin avui ve nasa ṭhin a, A Patea te lahin naute chei taka lo chei ve in, ahma pawha a inlak naute tawh tehlul nen tunah phei chuan over tawh tak ani. Ṭawng zuah zuah thei tawh siin 'Naute' tih hlek tawh chuan a ṭawng thiamlo der leh vel ṭhina, Bawihtei hian melh ram ram zelin "Matthew i over thei e' ati nang nang zela, an unau in tawng kual velhi keini'n kan nuih dar dara, Bawihtei tak hi chuan Duati hi a atchilh a, alokal tawh chuan a paw ngei ngei ṭhin.


" Zep nei i ang " A haw tur ka thlah pah chuan kati a, Angaihi erawh aner nanga " Enge maw zep se min tih le, zep nei ila chuan i hre leh daih tawh ang, thil zep leh dawtsawi ka thiamlo tih i hriat kha " Min tih chuan chik fe a melh ngar chungin " A dik alawm, zep i neiin ka hre bawka; mahse, ka zawt lui dawnlo che " kati a, ka lungawilo hranlo, ṭhianṭha tak niin engkim in share ṭhin mahila eng emaw mimal thil lutuk tuma hriat duh loh hi mitinin kan nei veka, keipawn ka nei bawk, chuvang chuan zawh luih ka tumlo.

" I ti anglo e a, ka kal dawn aw, kanu alo bauh leh hmaa kan in ka thlen hman angai, alo bauh leh tawh hial maithei ani " Tiin aban min vai zeuha keipawn nui var vara ka kut chu vai letin " Zanin Section fehchhuah kha kal ve ang aw " kati a, ani pawn uar zeta alu bu nghauh nghauhin " Lutuk e, Section fehchhuah te chu anuam alawm, ee taka! I phone kha fridge chungah ka dah ania " ti lawng lawngin ka chhanlet hma chuan akal liam a, aleng nileng chiang sia Nu Hlimi chu alakah zaidam lo tawp ang.


In chhunga ka luh leh chuan Bawihtei'n Duati alo pua a, U Faki lahin a chetsual hlau in Bawihtei nau pua chu alo veng bawka, Matt erawh akut kuangkuah at a lo ṭhu in ahmui ati pawrh leh vuau tawha, alandan chuan nuih ati za reuh lutuk. U Nguri'n eirawng abawl tho avangin Matthewa lam chu kapan a, "Ka Naute" A bula ṭhut paha katih chuan minlo hnaih sawt sawtin "Ani, min duat rawh" Ati a, duat loh phal chi anilo hrim hrim, ka pawm a, inti no zetin ka awmah a bei hlana, Au Bawihtei chu melh pahin " Au, Ani in min duat " ati reuh a, U Faki nen chuan kan in en a kannui tawp.



Zanriah kan eikham a, kan chaw ei boruak pawh anuam phian a, anuam famkim lo thung, Kanu'n a tute a enliam thei lutuk leh 'Inlo leng alaw' tih ṭawngkam khat te mah achhakchhuak lo chu rapthlak kati a, sawi ngaihna pawh ka hrelo zawk. Rilru hah hmel zet hian a thaw leh hak zela, a chaw eite chu nidang a anglo a, a phi chung ti ila ka sawifiah ber karing. Kapa erawh chuan a tute chu a ngaihsak em em a, zu anghei aṭangin ataksa aṭha sawta, a vun pawh alo eng ve ṭan tawh bawka, hmuh anuamin keiphei chuan ka hmu tlangval sawta, A fapa te pahnih pawn a khat tawkin an fiam leh hlut zel, kanu hi danglam vehlek se, hei ai hian a chhungkua hi min ngaihlu ve deuh sela chuan tun ai hian kan chhungkua hian hma kan sawn anga kan hlim deuh thei bawk ang.

Kanu chiah hi insiamṭhat ngai awmchhun ani ka tilo a, keini pawn in siamṭhatna tur chu kannei vek a, chutih rualin kanu erawh in siamṭhat angai zual takzet a, kan tana ahlutna hi hria se, chhungkuaa Nu pawimawhna te hi hre thar se, chhungkua hi min hui khawmin min kuah khawm se, chu chu kan duhdan ani. Kan chhungkua ah hian kanu'n a pawimawhna ahriat miau loh avangin kan tlabal a, kapa'n a theihtawkin chhungkua huikhawmin kuah khawm ve mahse, Nu mawhphurhna zawng zawng ahlen thei biklo a, kan phui viau emaw inti ṭhin mahila kua hi a awm leh fo a, heihian chhungkua ati famkim theilo ṭhin a, Pa pawimawhna aiin chhungkua ah chuan Nu hian pawimawhna leh mawhphurhna an ngah zawk miau a, chuvang chuan kantan hian kanu hi a pawimawh ani.


Thianga ten Section fehchhuah naa kal turin minlo sawm a, ka in peih sa avangin nghah ka ngailo hlauh a Thianga phun thawm ka ngaihthlak a ngai lo tur chu lawm tak kani. "Vawiin nilengin kan inhmu a kaning tlat che u " Erica'n ati seka, chhan pawh kan chhang buai peihlo, kawngkal biak tur an hresia, kan khua a avak zau leh langsar pawl anni bawk nen kan khua ah hian hriat loh leh an mahni hrelo tak tak pawh ka ringlo. Fehchhuahna a kal tur an sawm deuh sek hlawma, 'In kal dawn loh pawn 50 chu'anti tel zela, 150 lai chu an hmu tawh, " Inva han zaklo tak " ka tih lahin "Section tan ṭhahnem kan ngai " anti a, anla uang em em zui a, an mahni ṭan lo zawngin thil sawi leh ngat ila chuan min khawng thlu tawp duh ang.


Angaihi kan sawm kawi hnuah kan fehchhuahna tur hmun chu kan pan a, In awm khat deuh naah pawh street light a awm ve fur a, kawtlai chu athim hranlo. " Min pawm kang a min virpui tur leh Bottle tih pawp chiah ka mamawh tawh " Street light kan kalpel apiangin Angaihi'n ati a, atirah chuan kan ngaihsaklo a, a sawi nawn sek takah chuan Erica'n "I ninawm eng nge i sawi sek " ati hluka. "Vedeo kha inla en velo ami? Street light hnuaiah a bialpa in a pawm vir a, bottle aṭangin tui a pik chhuah tir kha " Hlim sarhin Angaihi chuan ati a, "Awi awi, i va han khawngaihthlak tak, i theihtawp hi chuan romantic te hi i tum ve ṭhin a, lungngai suh i ṭhianpa ka awm alawm, bottle chu ti pawp la keiman ka pawm vir dawn che ania" Thianga'n Angaihi hnunga ben dat dat pahin ati a, "Awi ka duhlo che, i pian aṭhing emai Amosa kaduh zawk" ṭeu hlarin ati a, Thianga'n a hnungah dimlo zetin a bensak pawp a, Angaihi a eu zawk mai.


A hmun kan thlen chuan midang pawh anlo thleng ve tawh a, Ṭhutna awl ah chuan ṭhu tharh in ka bulah Angaihi alo ṭhu ve a, Section hi chu YMA ni tho mahse, Branch huap ang anilo bawk nen kan zalen viau a, Section hruaitute pawh anla naupang a, kan section bik hi kan pachhe ve deuh hrim hrim bawk; Mahse, kan inlungrual phian a, section dangte hi kan awt biklo a, hnatlang leh inhlawh velah pawh kan ṭangrual ṭhin a, tam lua nilo mahila anuam ve ṭhin lutuk.


" Kan tlem thei sia in nghak khawm deuh ang u aw " U Jeromea'n atih chuan kan pawm tlang viau a, " Ṭawngṭai zawha thingpui in hnuah ban ani maia, a harsa lo emai " Erica'n ati ve bawka, midang pawn anlo sawi belh nak naka, Mipa an tam zawk miau avangin aṭawng tam zawkah an ṭang a, thupui fun lo deuh deuh an sawi leh hlawm bawka, an ri leh ham ham zela zahmawh rawngkai lek lek an sawi chuan kan lo ner khum vak a, an ngai pawimawh chuang lemlo.


" Makpa zang kang hi chu rim chhe viau lo sela chuan YMA Park ah te khian awm vese aṭha ania, a par a mawi si, a par hnuaia bialnu te ṭhutpui pawh a chakawm " U Remmawia'n nui huk huk chung hian ati a, "Dik chiah, a par hi chu a mawi thlawt; Mahse, a rim leh ahming hian minti tui theilo a " Angaihi'n ati ve a, keipawn ka pawmpui khawp mai, Makpa zang kang ani khera, bakah a rah hnua arim hi a chhe lutuk a, atla nasa thei si, arah ahun tawh chuan abul hnaia awm emaw kal vel hi a chakawm hlawl loh.

" Makpa Hm hmm hnuaia ṭhut chu a romantic dan ava uih awm ve " Midangin anti ve bawka, " Hmeichhia te hi chu an tuarchhela, A par amawi tho bawk nen antuar theih leh mai karing " Thianga'n atih chuan kan nui dar dara. Thildang dangah pakai chho in " U Jerome, i bialnu te ṭhenawm putar chu anghal ṭhin viau alaw? In chance alo tibuai ṭhin che u in kahria, a sawi nasat kha " Antih chuan U Jeromea chu aphun hlaka. " Kan ṭhu dun ringawt alawm" ati a, mipa ho chuan an nuih el kual vela Thianga a over leh ber.

" Chance neih laia lukawh deuh alo vei chhen chuan hmui insual tir pawh anuam vaklo ang a " ati vela, athilsawi pehhel kual veldan chu keini'n kanlo lawm a, " Thianga hi chu " tiin U Jeromea pawh anui ve tho a, " Min tihbuai atum ve hrim hrim niin kahria, alo tei sek zela, engmah pawh atih theih loh, 'Lo ṭhu ve mairawh' tih maite hi a chakawm zawk ṭhin " Atih chuan kan nui uar sauh hlawma, kan nawi leh viau tawh. Kan kim tlan hnuah kan ṭana Hruaitu lahin 'Pathian thu tawite ka chhiar anga' ati a achhiar a. 'Tawite in kalo ṭawngṭai ange ' tiin rei deuh aṭawngṭai bawka, Eitur leh chawhmeh te lilam tura kan thawh khawm nise 'Tawite in lo lilam se' ati leh bawka, zanin kan thupui chu 'Tawite in' tih anih mai hi.

.
.

Mathewa nen Ka phone a youtube kan en mial mial laiin kawngka anlo kik a, hawi pawh hawi chhuak lemlo in "Lo lut rawh " kati satliaha, Nilenga U Mafela'n ka msg a reply loh avangin ka mood aṭha chiahlo a, Matthewa te hi awmlo sela chuan kamu daih tawh ang. " Lo leng rawh Mafel " Kapa'n ati ri ah chuan ka hawichhuaka, U Mafela nen kan mit a in tawng chata, ka lawm viau dawn na in nilengin minlo belo tih ka hrechhuaka nuih pawh ka nuih duhlo. " I dam maw kapu" Tiin ka bulah alo ṭhu a, "Damṭha e, iva fel ve " Kapa pawn ṭha deuhin alo chhang ve a, keichuan ka ngaihven duhlo, abuai tih chu hre tho mahila msg vawikhat min reply kha ahar lo lutuk, a kut zungṭang atliak vek anih chuan thuhran nise.


" I hmel a diklo riau in kahria, hna i thawk rim deuh nge " Atih leh chuan Ṭhutthlenga kapa muzal chu alo tho a, "Nia mawle, kan upa veta deuha hnathawh hi kan tlin ta vaklo anihhi, bakah ka zu in ṭhin khan ka tha hi ati chhe vedeuh a, ka zu in lai ai khan katha hi achhe zawka ka in leh mai dawn mawni" Kapa chu ka melh nghal kawka anui vur vur tih ka hmuh chuan afiamthu tih kahria a, "I va sual tak" katih hlak chuan U Mafela nen an nui dun hak haka, kapa nen inpawh taka an titi leh an nui dun thei chuan minti hahdam huai huai mai.

Kapa hi chuan eng mipa pawh nise an retheih leh hausak lam athlirlo tih kahria a, an fel leh fel loh hi a ngaihven zawk tlangpuia, ngaihzawng lamah kher hi chuan a strict lemlo, 'In duh inthlang a, an ṭhalo tiin ka dang dawnlo che u, puitling in inti a, ṭha tawka in ngaih inthlang a, in thlan fuh loh leh in tuar vedeuh anga, in nupui pasal turah chuan inrawlh ka duhlo, in duhtak leh lungsi taka inthlan chu innei mai tur ani' ati hmiaha, thu ṭha erawh min hrilh ve fo a, kanu'n min enliam tawp laiin kapa erqwh chuan a phaktawkin a fate hi min fuih in min zilh a, 'In ngaizawngte chuan tih tur chin annei a, Bialpa te laka in pumpek nghal vek hi hmeichhe tihtur anilo, in bialpa te hi in pasal tur anni kher ngailo a, chuvang chuan Pasal in neih hunah chiah in inpumpek chauh tur ani' tiin min hrilh ṭhin a, kapa thu min hrilhte hi ka theihnghilh ngailo.


" Min va hrelo thei ve " Ka bengbula alo tih chuan ka phu uih a, alam hawi ka tum chuan a lu in minlo danga, tilui tih hriat fe in ka nghawng chu athawk khum lum hak a, ka ip chaih chaih mai. Thil hrechhuak thutin kapa ṭhutna lam chu kava hawia alo awm tawh miahlo a, engtik laiin nge a kalsawn pawh ka hrelo reng reng, U Mafela lah chuan minlo nghengchial renga, " Mi anlo lut ang e " Ti a ka namsawn chuan aṭhu ṭha vemai a, ka lungawi loh deuh avangin biak vak pawh ka tum chuanglo

" Tumaw ilo ngaih a " A aw rikdan ngeiawm deuh avang chuan ka en vata, ani erawh alo tum hmuk thunga, "Eng nge i sawi awmzia " katih chuan aner naka zanin a awmdan chu angeiawm ve lutuk, keilah lungawilo sa deuh kani bawk nen ka ter deuh at a, ngeiawm deuhin min chiang leh ngat sela chuan asam ah ka kek chiang khawp ang. " Mi bialpa chu tutak ni ang maw? Mi bialpa ngai tur khawpin eng nge tihsual kaneih " A aw ki chu aring lek lek a, thingrim vanga ter at tawh si kha athusawi in min ṭhawng lutuka sawi maitur ka hrelo reng reng.

" Eng..enge i sawi awmzia " bah naka katih chuan " I Status ngei pawh i hrelo der dawn emni? " ati hluka, ka bo tulh tulh, " Eng ka status maw? Vawiin ah status ka up lo reng reng" kati a, U Mafela mitmeng danglam zawk chu ka hmu a; mahse, in siamrem leh thuaiin ameng rum leh nghal ul a, awmdan tur pawh minti thiamlo e a. " Matt, thil kalo en lawk ang " tiin Matthewa phone enlai chu ka laksak a, "Naaa..A-ni chu " Ui zeta Mathewa'n ati nang nang pawh chu ka ngaihven hmanlo, "Bawiha ka phone hi lo en rawh " U Mafela'n kei min biakna anglo takin dam dap hian Matthewa chu abia a, Matthewa pawn hlim zeta khek raih pahin apan a, kei erawh in ka phone ngawt chu ka en thunga, Whatsapp ah lutin status ah ka lut leh a, ka thil hmuh chuan min barakhaih ngei mai.

A tawpah chuan nui chhuak hawkin " Vanlalkhawngaihi tih anihhi " kati hliai a, U Mafela chu a che eihlo a, ṭhutthleng hnung nghengin aṭhu awn duai a, " Angaihi tih nihhi, ka tih anilo tak tak ania " Ṭhut hnaih sawt sawtin kati zung zunga, hei vang chiah anih dawn hi nilenga minlo biak duh miah loh; Ka phone ah Angaihi'n status alo update a uangthuang zetin 'Mi bialpa kangai' tih alo hmanga. Ka phone aṭanga atih miau avangin U Mafela hian a thinrim pui anihhi, nilenga minlo biak loh phah nan ahmang bawka, ka lungawi loh vena te chu tihlan ve ngamna chi ani tawhlo hrim hrim.

" U Mafel " Tiin akutah chuan ka chelh a, min danglo nain minla en duh chuanglo, " Ka tih anilo tak tak alawm, Nakinah Angaihi kan hau dawn nia, vawiin ah anlo leng a, ka phone a khawiha, nang lahin minlo be silo a, phone ka khawih tak taklo a, khatiang kha alo ti tih ka hrelo reng reng " Tiin a khabe hnuai aṭang chuan ka melh chho kara, ka thiam ang tawkin ka inla cute ve bawk a; Mahse, cute minti chuanglo maithei ani, A awm a ka khawih leh takah chuan min en veta nge nge a, " Ka hmuh tirha ka thinrimzia ngaihtuah chuan thin hrep che ka chak ania" ti hmukin min melh khui a, " Duatpui " min melh rumna haiderin kati leh a, min melh kurin min chhang duh chuanglo a, ka ngei leh lek lek tawh." Min chhang vela, ka tih anilo katih kha" Ka ke ka per dat data, ka tum bur tawh bawk.

" Rei deuh Min thlem ve seuh seuh te hi ka phut a, i dawhthei lo si " Ti nghutin anui suka, " Nui bawk suh, i mak emai " ti hlaka ka inla hrang tur chu ka kawngah min kuahin kan in hnaih tawh tehlul nen min pawt hnai leh salh a, a taksa lumna chuan min ur ham hama, Tun ang thlasikah chuan nuam tak ani. " Titau let daih lo teh, Kha status ka hmuh tirh khan ka bulah chuan awmla ka hmeichhe hmangaih ini tih haiderin ka thing nek ang che" Thum chhaka tiin ka chhipah a hmui anawr vang vanga, kanui hak thung. Thik thu hi anei chhe lutuk a, achhia tih piahlamin achhia, Rochhara ka kalpui te, Rochhara msg ka reply te hi athik ṭhin a, Palianpui si hi atitau ve bur bur zela, duhawm thei tak ani.


An in a chaw ka ei hnu khan Inneih chungchang hi kan sawichhuak zeuh zeuh a, kan ti ila amah hian asawichhuak hmasa ṭhin, ka kum ka ngaihtuaha pasal neilo rual chu kani tawh biklo tih ka inhria; mahse, Pi Zothani ka ngaihtuah chhuaklo theilo a, an in a kan inhmuh hnuah khan engthil danglam mah athlenglo a, U Mafela pawn 'Keini lam chu kan inpeih tawh' ati fo a, kei erawh ka inpeih tak tak theilo, chutih rualin reitak in nghah tir erawh ka duh biklo a, kapa pawh sawipui katum ve ṭana, hmeichhiate hmabak chu Pasal neih a chhungkaw din anih miau avangin U Mafela ang mipa ṭha hi chu ka chhuah phal biklo a, vawitam in ngaihtuahin Pi Zothani avangin hnual leh rawih rawih ṭhin mahila ka pasal nitur chuan U Mafela baka duh leh thlan ka nei thei chuanglo.


" Keipawh ka lungawilo a, nilenga min lo belo khan minti hreawm " Katih chuan thaw hawkin "Keipawn hreawm kati, i msg kha kahmu a, i status teh hrep avang khan ka lawmlo em a, ka reply duhlo che anihkha " ati bul bula, ka kut chu la kangin ahmui ah anawr si vang vanga, ka kut vawt thler chu alum nghal ham hamin kahria. " Char lamah chance va nei lawk teh ang, ka suffer mai dawn" Atih chuan ka melh kawka, thutak zet hian min melh let ve kur bawka, " Iti anglo emai, Matthewa a awm vereng hi " Min ngaihsaklo zeta phone en mial mial Ka vahpa chu ka thlek zeuha, " Min ngaihven chuang hleinem, hmun dangah kan kal daih dawn pawh anilo a, Mawh Bawihi" Ngenngawl zeta atih leh chuan ka aw leh ta nge nge a, a thilsawi leh min dil te hi hnial ahar kati ṭhin, mitmeng dam thlap leh cool zeta min melh chunga "Ka ngai che, ka hmangaih che " atih chang phei hi chuan khawvel hi apar chuai chuai nite hian ka hria.


Min ngaihsaklo zeta phone en mek Matthewa chu ṭha deuha awm tura ka tih hnuah Char lamah chuan kan inzui chhuak a, Light kan chhit avangin a thim hranlo a; Mahse, light pakhat chiah kan chhi a, ṭhutna kan hunna lai kan pelh chuan a thim vedeuh a, Char a kan awm apiangin athim lai deuhah hian kan awm ṭhin a, achhan pawh Ka bialpa hian infawh a uar em a, mi anlo kal thut pawha min phawk loh nan ani.


A thim chin deuh kan thlen hnuah chuan ka aw thian kharh in " Thingpui i inchak tawh..." ka sawi zo hmanlo, banga min nawr betin min fawp nghal bawrh bawrha, in rinlawkna hun ka nei lo hrim hrim. In awm bosan vang vang hnua in hmu leh chiah ang maiin aduhthawh a, nghet zetin ka kawngah avuan bawka, a duhthawh lutuk chu ka zo lo lek lek ani, ka thaw achham mai dawn.

Inla hrang hlekin a chal leh ka chal chu ati si a, athaw chhuak nghal ham ham bawk a, keipawh ka bang bik lo, akut atih chet rual chuan phu zawkin ka meng kawka, Engtik laiin nge ka kawr chhung a zen luh hman ka hrelo reng reng, tunah chuan inti neitu zetin ka hnute a khawiha, keiin kawr chhanah kalo man bet ve thunga, ka man beh rualin a hrawm na sauha ka ang pham mai. " Ka ruk daih che i duh loh chuan minlo dang suh " Ti hmukin a chetzawma, minti danglam hneh takzet ani, Ka awmdan chu a hrethiam nge a kiai suka, amitmeng tuar har zeta min melh ngurin athaw hawka, ka kawr chhunga akut dah chu hreh zeta la chhuakin ka darah ahmai alo phuma, "Innei tawh mai ang Bawihi, ka nghak thei che a; mahse, harsa kati ani "ati hrawka a taksa ṭang at chu ka feel pui a, a in thunun nasa tih hria in ka khawngaih hle bawk.


" Aw le, kapa pawh kalo sawipui ang; mahse, Christmass ahnai chho a, tunah tut tut chuan atheih rih dawnlo tih i hriat kha, kapa erawh kalo sawipui anga, Kum thar lam kan tin zawn maidawn mi? " Ka sawi zawh rualin am zetin boruak ka hip lut a, Asam chu tuaisak neuh neuhin a bekah chuan ka fawp bawka, bahlah miahlo a ka thilduh ka sawichhuak thei chu ka lawm takzet ani.

Ka thusawi chuan aṭhawng aniang min thlek vung vunga, thilsawi tumin ang zuau ṭhin mahse, sawilo bawkin a ka achip leh hmak zela, ka nuih ati za reuh lutuk, Hetiang tiatpui si kum lamah nise kei aia upa daih zawk ani a, ka thusawi tlemte avanga adanglam vek chu amak kati a, ahmel buai nuai Erawh chuan ati lang duhawm hle thung. " I nu..englo I nu hian minla duhlo viau anih chuan sawi chiangla kaduh a " Engmah sawilo a min en reng avang chuan kati leh a, Pi Zothani thawm reh viau mahse, min duh ta tihna anilo a, hei hian minti buai ani, U Mafela hi Pasala neih hnial lo hle mahila Pi Zothani'n min pawm loh chuan kan hlim tak tak theih ka ringlo a, min zahpah miahlo tih ka hrechiang bawk nen ka hlauthawng lo theilo ani.

" Kanu chu ngaihtuah buai suh, Kapa thu ahnial dawn hleinem, tlemin i dawhtheih vedeuh angai dawna, chu erawh iti thei dawn tih kahria, Kanu hi arilru a chhelo a, i zir phawt chuan afanu te ai mahin aduat ang che " inringtawk zet hian ati a, a in rintawk chu thuhran min ringtawk tel ve lutuk chuan keipawh minti confi ve sawt a, nui var varin " Ka hria e" kati a, khi ve sakin ka hmui bulah chuan alo fawp a, " Bawiha khan minlo zawng palh ang " ti supin ui hmel zet hian a inla hranga, aphun pah hluk bawka, atum zui bur laiin kei erawh kanui vur vura, kan landan chu in anglo tak ani.

.
.

Zingah chuan kanu leh U Faki inhau thawmin minti harh a, nidang anga inhau satliah anni lo tlata ka hriat avangin thawh phan pawh awm lovin ka tho nghal sawk sawka, Ka bula mu Matthewa pawh alo awm tawhlo. Ka chapal bun in ka sam chul mam thuak thuak pahin room aṭang chuan ka chhuaka. Ṭhutkhawmnaah chuan ka chhungte chu anlo kim ṭhap a, Kanu chu ding hluaiin U Faki chu a dinchilh a, amitmeng aṭang rengin a thinrim tih hairual anilo.

" Sawn pai mai mai tur hian ka enkawl che emni? " Kanu'n vin ṭhaka atih chuan ka ding khawng lah a, ka mang nghal vekin kahria. U Faki chu a kun chal a, Kapa pawh chu a rilru ana tih ahriat ngawih ngawih, U Hlua erawh khawng at a ṭhu in Mampuia chuan U Faki chu aṭhutpui thung a, U Faki kutah a vawnsak tih pawh kahmu. " Khatia au chiam chiam kha angailo, kan inti mualpho mai mai " U Hlua'n atih chuan " Nakin lawkah a pum hi alo puar anga nilo tunah pawh a puar tawha, kan mualpho dawn tih te chu ahriatsa vek alawm, lehkha pawh thiamlo, eizawnna mumal pawh nei hleilo hian engtin nge nau i pai ngam zawk " Kanu hi a rapthlak tih chu kahria; Mahse, heti taka rapthlak ani tih erawh ka hre hauhlo. Ṭhutkhawmna lam chu ka pan ve chhet chhet a, an thusawi dan hmangah U Faki arai tih ka hai biklo a, ka awmdan hi ka hrethiam chiahlo, min ṭhawng lutuka ka a huih niin kahria.


" Pa ber ka awm laiin engvangin nge i duh duh isawi maile, ṭhu rawh " Kapa'n chang faka atih chuan ṭawng tuma ang leh zuau tawh kanu pawh chuan a ka achip leh hmaka, kapa hi chu a hlau thiam vereng. " Naute pa hi tunge" Kapa'n nem lemlo taka atih laiin keipawn an bul chu ka thleng ve tawha, " Ka..kapa ka hrelo " Bah nawka U Faki'n atih chuwn kanu chu ache thut a, U Faki chu a khawih dawnin kahria, ṭe ṭhatin ka mit ka chhing tawp a, U Faki insut hlawp hlawp leh kanu ṭe chiam in azui a, ka mit menga thil thlen dan ka hmuh chuan ka ṭhu sawp hnawka, tinge kan chhungkua hi kan buai bik reng le kati. U Faki sam chu a hnawk nuai a, kanu'n a khawih hman tih hai rual anilo, U Hlua'n kanu chu a man beta, Mampuia'n U Faki a kuah bawk.

" Lalparmawi, inrawlh suh kati anilawm ni kut i thlak avang khan i fanu hian nau a pai loh phah dawn emni? " Kapa'n ati khur khura, a aw chu akhur deuh dar dar a, a thinrim vang nge arilru nat vang tih erawh ka hrelo. " Ka lungawi theilo, Lalfakzual engvangin nge hetiang hian i awm, i chhungte min tih mualpho ai chuan titla maita che, a pa pawh i hriat loh naute chu engtin nge i pai theih " Khur hlawk hlawkin kanu chuan ati a, a sawi zawh rualin Mampuia leh U Hlua 'n 'Kanu' anti rual ṭhawta, U Faki pawh aṭhutna aṭangin ading hluai bawk, a taksa chu akhur dar dara, " Nang lehzel chu tihian awm suh " Mampuia chu engtik laiin nge ka bul alo thlen pawh ka hrelo, min kaitho in U Faki dinna ah chuan min hruaia. ka chiai lutuk pawh chu tlemin azia tawh.

" Mualpho na leh zahna patlang tur chuan ka huaisen a; Mahse, ka pum chhunga naute ti tla tur erawh chuan ka huaisen tawk lo. Ka dam anga min buaipui loh pawn keimahin ka enkawl vethei em em ang, keichu nang anglo takin Nu ṭha tak kani anga, ka fa lo piang tur hi ngaihsakna leh hmangaihna zawng zawng ka pe bawk ang. Min pek ngai loh thilṭha tam tak Nu in atih tur zawng zawng chu nang ang lo takin keichuan kafa tan kati vek ang " U Faki chu a khur ta hlawk hlawka, a ṭawng pawh hriat ahar lek lek a; Mahse, a thusawi erawh ka hrechiang a, kanu ngaihsakna leh hmangaihna dawng anga kalo hriat U Faki'n chuti taka kanu aṭawngkhum chu amak kati a, kalo ngaih ang khan anlo in pawh bik hauhlo tih ka hre chiah bawk. Katan Nu ṭha tak nilo mahse, U Faki tan chuan Nu ṭha tak anih karing kha ania, alo ni bik chuanglo anih hi.

U Faki chu ka chelh a, " Insum rawh " ti sepin ka vuan nghet sauh a, U Faki thusawi chuan ati hamhaih ve aniang kanu pawh engmah sawi lovin ading khawng laha, "Engmah kan sawifel thei rih dawnlo anihhi, Mate i u kha room ah hruai la, Pari minlo zui teh " Tiin kapa chuan an room lam apan a, kanu chuan chet mai nachang pawh ala hre chuanglo, ka laka a awmdan te avangin kanu hi tihnat ve ka chak ṭhina; mahse, hrilhhai zeta a awm lai thlir erawh anuam kati chuanglo. U Faki chu Mampuia nen room ah kan hruai a, zingkar aṭang a kan boruak tawn tehreng chuan minti chau takzet ani.


Cont..
Show post links
Top