STORYFB.COM

REMRUATKIMA


CHAPTER 25



“Ehe hei Sangha” u Kima fridge va hawngin sangha bawk a va phawrh leh avâng chuan ka uak leh ṭhawt a, u Remruata chuan dahsawn vat turin alo ti ve bawk. Toilet-ah chuan tlân lutin ka va luak bawrh bawrha, a rim ka hip fuh bawk nên ka ni nghal nghulh mai.



Ka pum hi a let but but nimaiin ka hria, u Remruata chuan ka hnungah a rawn chûl heuh heuha, tui in tur min pêk chu ka in nghal khawlh khawlha. A reh ta deuh huai chu ka thaw chhuak nghal suai suai mai, toilet aṭanga kan chhuah rual chuan u Kima chuan inthlahrun hmêl tak hian min lo ena.



“I hua tih ka lo hre loa, tihpalh liau liau anih kha” a ti chu ka inthlahrung letling zâwk “Ngaihdam dil i ngailo, rai lai hi chuan hmeichhia hi chuan huat kan ngah a lawm. Inthiamlo miah suh, ka rai lian deuh anga a reh ve vat mai ang, rai tirhah hi chuan huat kan ngaha, ka pasal ka haw tlat ang tihte hi a hlauhawma, haw vaih ila chuan a buaithlâk dâwn em a sin” ka ti chu kan nui tlâng dar dara.




U Kima thaw huai hmêl ka hmuh tâkah chuan a awmdân tur ka ngaihruat thiam mai, mipa nupui la neilo an ni a. An tân chuan hriatthiam chi a ni dâwn lova, khatia mangang taka lo awm chauh loh kha chu hriatthiam theihna tur a vâng bawk êm ani.




“A ṭhat hlauh chu, naute i chhiat ang tih ka hlau a lawm, i pasal hian min ngei nghal dâwn si a. Chutianga ilo awm thei hlauh chu a ṭha a nihchu, naute kha hmuh zung zung kan chak bawk si a” a tihchuan ka nuih var vara.


“Pathian zara dama ka pai tluan thei a nihchuan thlan 9 hnu ah chuan patea te in ni vek tawh dâwn alawm, thla a ral chak êm hi a rawn piang vat mai ang. In duat viau angai ang” ka ti chu phûr zet hian an sawi zui sap sapa, an ṭhianpa fa a nihna ang pawhin an hmangaih in an duat dâwn tih ka hria.




“Keini pawh hi nupui tur zawn ve ṭan chu kan ngai tawh a ni, hetiang chuan kan duh ai kan upa lutuk dâwn e, upat a hnu lama fate châwm kha chu a peihawm chiah siloa, zawn zung zung chu a ngai a ni. Puia ang hian thil pêk hmanga bem thlûk theih mai mai tur te hi awmsela” ti a u Puia an fiam chu ani lah chuan a lo haw nasa mai.



“Ngawi hmak teha, ka bem rei zia in hre vek. Thilpêk hmanga thlêm lungawi theih a nilo aw, rei tak ka bei a sin” a ti zuia, a thutak tâk riauah chuan a ṭhiante pawh chuan an fiam chhunzawm duh ta bik lo lo va.




Zanlamah pawh kan vai chuan khawhar in lamah lêng leh in kan zai ho dap dapa, kei erawh zân hmasa lama ka thil hmuh vâng nge kawmkar leh tukverh bâkah mi hnunglam te chu ka en ngunin u Pianga thla hmuh thut ka hlau a ni ber mai, a thihna nên kan inhnaih si a ka hmuh ka hlau nên ngaihtuah duh tawhlo in u Remruata ban chu ka hmer deuh ṭawng ṭawng a.



“Hahdam rawh, ka awm hi ngaihtuah tawh suh” a rawn tihchuan ka bu nghat nghata, mahsela thil hi kan ngaihtuah duh loh pauh leh kan ngaihtuah nasa ting nimaiin ka hria. Kei chang nilo in midang pawh chu an ni ve tho tih an hawiher aṭang a hriata, mahsela Mizo tlawmngaihna nên tumah a lang apaua han ti lang erawh an awm lo thung.



Bân rual chuan in lam kan pan vata, u Puia te ho pawh an awmdânah vawiinah khân u Remruata khân a hrilh ta ngei a nih ka ring.



In thlen rual chuan kan mu nghal ṭhap a, an ni pawh an rawn zinna lamah an chau ve dâwn bawk nên tumah han mengrei peih pawh an awm lo. Kei erawh mut thilh mai ka harsat avâng chuan kan nupa in movie enin kan la meng dûn a, min kuah deuh rûn reng bawk avâng chuan chutiangin ka hlau tawh lêm lo.



Zanreiah harh tawh lo ila ka duh ber, dar 10 kan thleng chho a, thâwm chu a reh ta viau bawk nên lung a phu dap dap renga.



“Mutthilh tum rawh, hlauhawm a awm lo ka tih tawh kha. Ka awm hi, ka awm chhûng chuan engthil mahin an tina ngai lovang che, ka vêng tlat che tih i hriat kha muhil tawh rawh” a tih leh tâkah chuan mutthilh luih tumin ka chhing luia.



Chutia tum ta na na na chu rei pawh harh lo in ka muhil zuia, ka vânnei nge zankhua chuan ka harh ta lêm lova, zînga ka thu hriat erawh chuan min ti awm nuam huai mai.



Nizânah khân u Pianga nu leh pa khân a thlânah kal chilhin midangte tibuai lo leh rik rap zawnga che tawh lo turin an lo ti a nih hmela, a thla vâk kual vêl kha an sawi nasa bawk nên a chhûngte tân pawh hriat loh chi a nilo reng a ni.




“Vawiin chu enge kan tih ang aw” ti a u Remruata phun bul bul chu enin “Tih tur a awm rih lêm lo, tihian nilêngin kan awm ang” ka ti chu a nui deuh vur vura “Kan mu nileng ang i tihna mi?” midang hriat loh tur a a rawn tihchuan a âwmah chuan ka beng deuh taiha, a ngaihtuahna hmul thei lutuk hi a.




“I ngaihtuahna khân vanram lam hawi rih rawh se, i ṭhiante an awm ve reng saw” ka ti deuh sar sara, amah vêk chuan min rawn hnaihin “Ka insûm rei tawh viau ania, zaninah tal” a ti chu a lu ah ka thlengkum ken lai chuan ka tuk ta lawlha, a in nuai nghal vut vut mai.




“Ninawm Remruatkim, nau ka pai hi khatiang ringawt kha ngaihtuah mai. Va lêng rawh u” ka ti chu u Puia chuan phur zet hian “Vawiin chu Dorothyi kha a awm dawna, ka va lêng leh teh ang. Makpa interview hunlai tak. An makpa atân te hian min lo iai riau riau ange, ṭan ka lâk hle angai” a tih mawlh mawlh lai chuan ka ṭhiante pahnih chu an rawn lût thuta.




U Puia thusawi laklawh lutuk chutia a sawia rawn lang leh si che lai kual chuan a bawp a khai vak vaka, a lei a chhuah zuk zuk bawk nên a ṭhiante chuan an nuih uar uar mai.



“Tinge? Nunu, saw second hand thin tur a awm, va kal ang u. Dawr te hi in nei ve tho bawk sia, lâk ve tur che ania, tûn angah chuan a hlawma lâk hian a tlâwm bawk si a, i hlep ṭha dâwn a sin le” Ruthi chuan a rawn tinghal bawrh bawrha, kan chhiat tawh avângin kan dâwr pawh kan khar rih kha ania, vawiin lamah chuan ka naute pawhin an rawn nghâk thei tawh ang chu.




“I duh leh va en ve la, i hâk duh zâwng a awm chuan rawn lei ṭeuh rawh” ka pasal lah chuan a lo ti awlsam thên a, chutia a phal tâkah chuan keipawhin ka hnial buai lo chiang hle. Thawmhnaw ka ngah lo bawk nên va en chhin hrim hrim chu angai.




Kan ṭhian thum chuan in zui chhuakin kan titi phei nak naka “Tu lâk nge ni reng renga?” ka ti chu “Zodinin a la a, tshirt leh kekawr ania an ṭha hlawm lutuk, pakhat 200 a tia a tlawm bawk sia a thar to deuha lei ai chuan a ṭha hrim hrim, ka lo en tawha. Ka rawn sâwm ve cheu a nih hi” tiin thawveng zet chuan a hawi zui vah vaha.


“Ehe Nunhlui te chu enge in tih ve dâwn a, kha in va nui nasa bawk ve, in bialpate an rawn zin leh tawh si a nuam in ti hle mai maw?” Tharpuii te ṭhian dûn kan tawh ruala a rawn ṭawng dân avâng chuan ka ṭhiante pahnih chu an ding nghal chata.




“Engmaw i sawia? I va risk huai deuh ve” Ruthi chuan lâwm vak lo hian a ti a “Bialpa khawpui mi in neia, nuam in ti riau mai. In hmuh chhun an niang maw?” Tharpuii bawk chuan a rawn ti leha “Nia, ig a in phelh ruak deuh thaw a in post ngai tur khawpin bialpa kan vân ve lo tihna a nih hi” Ruthi chuan a rawn ti leha.




Ka lo nui ru sak mai, ka ṭhiannu hi chu a duh loh kawngah hi chuan a ṭawng thei ve zêk ania, Tharpuii a ngeih loh sa nên a rawn ṭawng duh dân kha a ngeiawm ve bawk êm ani.


Mipa mit lâk tuma ig a taksa show vak vak ho zîngah a lo tel ve anih hmêl, an mahni lah chuan mipa mit lâk tum an nilo an intia, chuti nilo sela sexy tak taka in post chhan tur a awm lo tlat, followers neih tam te hi an châk êm êm a, enge maw a ṭangkaina vak ni, followers ngah hi in tih theih nân tak hian an hmang hlawma, an chhûngkua leh an nunna atân erawh a tangkai chuang silo.


Hmeichhia chu kan incheina leh kan nungchang hian kan zahawmna a kenga, social media hi kan nun kan intehna ber a nih tawh avâng hian hman thiam hi a ngai reng a ni, kan mizia ni hauh lo pawh social media a kan thlalâk post aṭang mai mai pawhin mi hian min lo teh tawh si a, kan nundan ni miahlo pawh mite hmuh ah chuan ni kan ni tawh ṭhin a, fimkhur hi a ngai reng ani.




“Nang nu hi zak theilo lutuk, khatiang khân bialpa hmu zo lo min ti ringawt suh aw” ti a Tharpuii rawn hnai chu kan lo nam sawn vata “I ṭawngkam a mawilo hmasa tih i hriat kha, tin, mi an inngaizawng ngei em tih i hriat loh chuan sawi ve ngawt tawh suh. Tin, an in ngaizawng a nih pawhin enge pawi? Mawilo taka an awm i hmu em? Kan ṭawngkam hman ni fimkhur tur a ni rêng a sin, i ṭawngkam a mawiloh chuan a rawn chhâng lêt tu che ṭawngkam mawilo kha enga tinge i ngaih theihloh em em ni?” ka lo ti ve fak faka.




U Remruata WhatsApp ah a lo be ṭhin bawk nên ka ngeih vak bik siloa, chutia han hnialna hun ṭha ka nei thei chu remchângah ka la ani ber mai.



“Vannunhlu lo inrawlh hauh suh aw, i pasalte an hausak mai avâng hian ilo in ti thei zâwk nge, i pasal kha maw kan College kal lai pawha min lên chhuahpui ziah tu a nih kha, ka duh chuan ka chhuhsak thei che” a ti chu kan ṭhian thum chuan in enin kan nui vak vaka, a va han zak theilo tak.



“A lo nimaw? Ka pasal chuan ka hnar chung chunga min ûm zui tu a ti che a sin, ilo duh ṭhin viau tih pawh ka hria ania, min duh lo deuhtu kan duh deuh ni si te hi chu an hriat phâk loh lamah chuan kan hnar hnu an ni duh phian ania. Ka pasal ka lo zâwt ange, a duh viau ṭhin che em tihchu a mahin a hre ber ang” ka ti chu a sawi sual a ti deuh nge a hawi zak zaka.




“I mâwl kha a nihchu, tunge chutiang hmeichhe buaina ah mipa pun ngai” a rawn ti leh daih a nihchu, zahthlâk hiana.



“A nihchuan khatiang dawt puarpawleng lutuk kha sawi leh tawh suh ang che. Mi nunah inrawlh lutuk hi a ṭha lo ania, kal ang u, kan tlai dâwn” tiin ka kalsan zui ta daiha, khatiang mi hnial reng nân hun ka neilo.




Kan kalna tur thlen tâkah chuan Zodini chuan min lo be nghal sawk sawka, a thawmhnaw en kan tum thu kan sawi rual chuan ṭhutthleng lam chu kawkin “Saw ka dah chhuah sa saw ania, va en tawp rawh u. A than an ṭha teh ania” a tinghal zung zunga, panhnaiin ka duh zâwng chu ka thlang mawlh mawlha.




U Remruata ta tur tshirt leh kekawr chu ka la ve bawk, mipa lên nuam ti tak e tilo hian thawmhnaw hi a uar lo lutuka, a neih chhun erawh an nalh thei viau thunga, pahnih ve ve chuan laksakin pawisa ka pe zuia.



A lâwm bawk aniang mi a fak nghal luama, ka ṭhiante pahnih pawh chuan an duh la ve in kan inzui haw leh ta dam dama.
ZAWMNA...



“U Remruat lo kal teh” in kan thlen rual chuan ka pasal chu ka au nghal lâng lâng a, khawiah nge a lo awm leh hman ni. A ṭhiante erawh chu games an lo khêl leh tawha, an bengchheng leh viau tawh mai.



“Ehe! I lei ve elo?” u Puia chuan Dorothyi a hmuh rualin a lo ti vata, ka ṭhiannu pawh a bu nghat mai “Khatiangte i duhte chuan sawi vat ta che, keimah ka rawn kal mai tur ania, hetiang te chu ka lei ṭeuh mai dawn che alawm a nalh phian lehnghâl, mipa hâk te a awm ve lo em ni?” a ti zuia.




“Awm e, a awm ṭeuh mai. Second hand hi an ṭha teh ania aw, a thar to tak tak ai chuan an ṭha ka ti fe zâwk, an than te hi a ṭha tih a hriat reng. Va en ve rawh u, a tlâwm si” Ruthi chuan a lo ti nghal bawrh bawrh a, he nu hi chu ama zawrh loh pawhin tute thil zawrh pawh hi fak chi, zawrh pui phûr êm êm reng ania, a rilru a chhe hauh lo tih hi a hriat ṭhin.




“Va kal leh ang u, an in pawh kan hre ve nâng he mite pahnih chu tihian chance lo nei rawh se. Zîngah an in hrilh rûk sur sur kha” u B-a chuan a rawn ti chu midang chu an nui nghal vak vaka, kei erawh ka zak ngei mai, u Remruata thusawi kha an lo hre pha a ni hrim hrim ang.




An inzui chhuak leh dam dama, ṭhianṭha tak tak hi chu an lo hlu a, lungngaih leh hlimah pawh itsikna leh erna tel hauh lo a min lawmpui a min tawrh pui ṭhin ṭhian neih tluka hlu hi an awm bik lovang. Thisen zawm ni siloa min hmangaihtu dik tak chu kan ṭhianṭha te hi an ni an lo tih fo kha kan ṭhiante ve ve ah hian an chiang in ka hria, u Remruata nên kan tân hian thih pawh an hreh dâwn lo tih ka hria.




“Nangmah vâng vek, i lerh de daw lutuka ṭhiante awm lai leh zêl chuan insûm ve ta che kha an hriat phâk vek kha” ti a ka pasal ka en chu a dâr kân ukin a thawmhnaw tur ka hawn ve chu a bânah a bat hnawka “Tirawh an rawn lêt mai lovang, chance chu lo nei ang hmiang, nupui neih bik man a nih hi” a ti a nihchu!



Awi! He mihring hi a zak lo tual tual hian a nia ka hriat “I rapthlâk lutuk aw Remruatkim tinge i rilru a hmul sâwt em em a?” ka ti deuh hlara, raino thinchhia nên lo thinchhe sa nên ka ngei deuh lek lek mai.



“Hmm ka khawih che pawh i duhloa, ka nghei rei zia hi min ngaihtuah pui ve miahlo anih kha, a ṭha lawm ka khawih miah lo ang che” tiin a thawmhnaw nên chuan room lamah a lût tau nghawng nghawng mai, keimah zâwk titau tur ka nih laiin a mipa zâwk a tau leh ta, tûnlai mipa hi chu hmeichhia ai an rilru hi a naupang chhia tlângpui a nih hi a.



Han hrilh ila hmeichhia hmeichhia hi an ti leha, in sawi fihlimna tur an dap nghal chung zel lehnghâl.



Room-a ka va lût ve chu a lo ṭhu tûm bûr a, mi a seh ang tih hlauhawm khawpin a hmêl chu a rum, huiham. Nupa nih tawh chuan ka hrethiam lutuk tlat, mahsela a ṭhiante an awm ve lâi akara lo in duat hliau hliau ang te kha tihchi a ni bawk silo.




A bulah chuan va ṭhu in ka en renga, min en duh ṭhak lo. “Aw le, i duh chuan kan ti thei alawm, chhûnah chuan insûm ṭha a ka hriat vâng mai ania” ka ti sepa, ka pasal lungawi loh chuan ka awm a nuam bik lo a, a duh tihpuitlinsak loh pawh hrehawm ka ti ṭhin.




Ka kûn reng chu min rawn kuahin ka chalah chuan a rawn fâwp vang vanga. “Ka fiam che a nih kha, ka insûm thei a lawm. Tisa thil chauh hi ka neih chhan che a nilo, kan inneih hma pawhin ka sawi tawh kha, mahsela keimah zâwkin ka thutiam bawhchhia in ka hmangaih si che a, min nuihzat ngawt lo maw?” a ti chu a âwmah chuan ka bêng deuh taiha.




“I sual emai aw, keipawhin duh leh hmangaih che ka tum bik miah loh kha, a rawn thleng tawp chu a nih hi. Kan pahnih hian kan hma hun kan hriat loh dun zia hi, inhaw em em si khân tûnah lah heti hian kan chhuak leh daih bawk si a, khuanu ruat kan ni pawh a ni ang” ka ti chu a nui haka.



Ka sawi dik chu a ti ve tho ang, induhlo deuhin kan innei a, tûnah kan in ngai hlum leh dawna. Hetiang hian kan awm dâwn tih kan hre lo dûn lutuka, kan lo insawi chhe vak vak kha ania, tûn hnua ngaihtuah lêt hian nuih a za ṭhin.



“Khuanu ruat ngei chu kan ni alawm, khuanu ruat loh ka ti phallo, khuanu in a ruat loh ngang pawhin keichuan a ruat ngei ngei theih nân ka bei zel ang. Khuanu ruat loh hi ka pawm thei dâwn lo, kan inhmangaih tawn tak tak a nihchuan harsatna zawng zawng chu kan paltlang dûn thei tur ani, khuanu ruat loh in tih hi ka duh ve lo, an inhmangaih chuan khuanu ruat an ni ngei ngei tur ani tawp” a rawn ti deuh duaha.




Keipawhin chu chu ka ngaihdan a ni, a nilo khuanu ruat loh hi a awm theih an ti ṭhin a, a dik ve tho. Mahsela kan inhmangaih tawn ve ve si chuan awm dun theih nân chuan engkim kan chân ngam ve tur ani ka ti ve tlat, khuanu ruat loh in ti tam tak hi chu an nghah peih loh vâng te, an huaisen tâwk loh avâng te a nih ka ring, venthawn ngah hi chuan huaisen hi a har ṭhin rêng ani.




“I sawi dik alawm, thawmhnaw hi ka va su nghal ange, tikhan lo awm rawh” ti a kalsawn mai ka tum chu a phal leh ta tlat lo, min chelh bet deuh ṭunga, eng hi nge aw a hriat ṭhin dâwn ni




“U Remruat” ka ti chu ka kâwngah a kut suihin a malah min pawt ṭhu hnawka “Suk angailo, nakinah an rawn in lei haw leh nual ang, hmeichhe hmuha in show off vel kha nuam an tia, a rualin kan su zâwk dawn ania. Thawmhnaw lei tur an hmuha an zawrh phawt chuan an lei zel thei, second hand thin nuam an tihzia i la hrelo anih kha” a ti chu ka nui deuh hak haka.




“Mu ang, hahdam deuhin awm ṭhin rawh ka tihkha. Nau pai i nih hi, i coconut tui te kha i in leh tawh em?” a ti chu ka lu ka thing nghal nar nara, ka chalah a rawn pen nghal khauh mai.



“Tinge zîng, chhûn leh tlâiah in ṭhin rawh ka tih che kha, thusawi âwih lo thei lutuk mai. Hetiang chuan i buaithlâk dâwn tlat, naute hrisêl leh hmelṭha deuh nei â mi zawng zawngin min ngaia, chhe deuh i neih leh si chuan a chi loh lutuk, ei tur ṭha leina tur neilo pawh kan nilo, a ei tur mah a awm chuan ei peih loh kha lo nei vêl suh aw. Ka tuk lawlh zâwk dawn che nge mawni” a rawn ti par par chu chhân ngaihna hrelo chuan ka en deuh ang ren rawna.





“I mak e, kan thu pawh a ni hleinem. Pathianin a ruangâm a siam sa a, a duh angin a rawn piangchhuak mai ang, khatiangin fate hmêl tur an buaipui nghal chûk ngailo, eng ang hmêl pawh rawn pu se keichuan ka hmangaih ber dâwn tho tho” ka ti chu a dik a ti deuh aniang engmah han sawi buai emaw pawh a tum tawh lêm lo.




A thusawi a dik ka ti ve tho bawk nên pâwnah chuan chhuakin coconut tui chu ka in leha, balhla chu ka ei nghal bawka, in ei thau kûng kûng ila a nimai. Ka pasal berin min iai loh phawt a hnu thau luah ila a nimai.



“Dingnghal rawh Puiek khatiang te a min tih le?” ti a rawn au ri rawn chhuah rualin kawngkhâr chu a rawn inhawng rawka, u Puia a rawn nui lût hawk hawk chu u B-a chuan a rawn ûm zuia, an in khawih ringhal awk awk mai.



Hetiang bur bur hi an la ni bawk sia, an rilru hi an kum hian a ṭhan san a nih ber hi.


“A mak thei rum rum emai, khatiangin awm suh u. U Pui in lian tawh emai, khatianga in tibuai reng rual pawh in ni tawh lo” Dorothyin a lo tihchuan an ni pahnih lah chu thuawih ber âwm ang zia zang chuan an tho chhuak sawk sawka.



“Khawi in thawmhnaw lei kha va su ang u, in va lei tam reng reng ve. Dorothyi teh chu kha i lei belh elo?” ka ti chu midang rawn lût chuan “A bialpa in a lei sak a nihkha, in ngaizawng em em te hi, kan nilo te hi an han inti mawi ve a, an lang chiang ropui sia an tenawm ania. Inngaizawng siloa inzui reng thei, ṭhiante hmuh loha in kai ru ṭut ṭut tho si hi” u Kima chuan a rawn ti bawrh bawrha.





An ni pahnih lai hmêl chu an kâwk ang zuk zuka, tihluih hi chu an peih ve bawk ani. U Remruata rawn chhuak chuan an thawmhnaw chu la khawmin a mah chuan machine ah ava thlâk zuia, tui chawi chawp ngailoa pipe kan fit bawk nên insuk anuam phian mai.



“Tikhan a tleuh hunah leh a spin hunah chuan nangmahniin ti ang che u, kan nu hi duat angaia. A indim thiam pauh leh naute a him a nimai” a rawn chhuah pah chuan a la rawn tizui, a ṭhiante pawh chuan hnial chu khawilamah an tih tur thu in an lo chhâng ang sap sapa, ka nau pai meuh chu an ni ṭhianho hian awmngaihna an hrelo ber a nih hi.




A pawilo, ka âwl a nimai ka ti tawp tawha. Lo tih luih ang kha ka tum lêm lo, an phal leh dâwn chuang loa “Kan va haw phei phawt ange, kan awm rei tawh lutuk kan chhungte'n mi an lo ngaihtuah tawh ang, mi an lo hauh leh hrep hma hian haw vat angai” Ruthi chuan tiin Dorothyi nên chuan an inzui chhuak zuia.




“Taka kar leh kha kan buh zai  kan tuma, rawn tel ve ngei ngei ru aw, theihnghilh a thiang lo ania” tiin ka au zui chu an rawn feh ngei tur thu sawiin an kal liam zuia




“I bem thlu ta em ni?” ti a u Puia ka en chu a tukkhum hiah nauh nauh pahin “Min duh tak tak loh chuan sawi la nghah khawtlai reng ka peihlo ka tia, a aw ve tawp” a ti chu ka nui chhuak huka, leh si chuan. An va han inbem awlsam bawk ve mawle.



Nui deuh sângin ka bu nghat nghata “A ṭhat hlauh chu, mahsela tina hauh suh ang che. I tina a nih vaih chuan keiaia tawrhhlelhawm tur an awm lovang, a chanchin engkim i hria a, i tih nat leh vaih chuan” tiin ka melh rum deuh kha kha a.




“Ka tina dâwn lo, ka duh tih ka chiang tawh alawm. Chân leh mai mai ka tum hleinem, a tâna a hlimna thlen tu nih ka duh, a hmêl ngui riau ṭhin ka hmuhte hian tih hlim ka châk zâwk a sin, hetianga ka hmeichhe duh hi ka la tawng ngailo“ a tihchuan tlêm chuan awm a nuam ta deuh, an ṭhianho mizia ka hre chianga, mipa lerh tak chu a nih bik ka ring lo.



U Kima leh u B-a chu bathroom lamah insuk vilin an lût a, u Remruata erawh chuan phone a en leh mial mial tawh. Tûnlai chu games khelh a tui chilh thar leha, a hahthlâk tak tak ṭhin ania.