THE SICILIAN (Book I &II) By Mario Puzo (Completed)

[Loma hmar]

Chapter 10c


Dawhthei taka a chhanna nghaktu, Duchess chu chu tlangval naupang tak hmelthatna leh pa hrak mai chuan a deng deuh dawt a. Room chhung mawina chuan a hip hle tih a hmu a, a ma hmelthatna hre lo ang maia a awm chu a lungni lo deuh hle. A ma hriat ho chhunga awm a ni lo leh loneitu satliah mai a ni chu a pawi mange, tiin a ngaihtuah a; han chhaih fiam deuh zauh pawh a pawi lem lo ang chu. a hma aia nem leh no zawkin, “Tlangval, a pawi ka ti khawp mai, in leh lo lam thil avanga lo kal in nih chuan nidanga in lo kal leh a ngai ang, ka pasal Inah a awm tlat lo.”

Guilianno chuan a han en a. Chutia hmeichhe hausa takin a hausakna leh vantlang thila a nihna avanga a thuneihna a lantir dan avang chuan a khingpui en deuh nghal run a. a kuta zungbun mitla tak a bun tih hre ran chungin hawihawm takina han bu zauh a. Inngaitlawm der tak hian, “Nangmah avanga lo kal ka ni e, ka hming chu Guilianno a ni.”

mahse chu inngaihtlawm derna chu Duchess lakah chuan engmah lo mai a ni, chhiahhlawh chhawr thang tih takah, tihdan tur rengah a ngai mai a. Hnam zia chhawm mi tak a niin, rimawi leh lehkhabu a ngaina a, Sicily ram nitin nun lam a ngaihtuah vak lo. Nitin chanchinbu a chhiar ngai lova, thu inziak te nunrawnthlakah a ngai mai. hawihawm takin, “Inhriat chu a lawmawm ngawt ang chu, Palermoah kan inhmu tawh em? Nge rimawi tumna hmunah zawk?”

Nuihzat rilru taka ngawi renga lo thlirtu Aspanu pisciotta chu lo nui chhuak hawkin, tukverh lamah chuan chhiahhlawh rawn tibuaitu an awm takin tiin a phei ta daih a.

Guilianno chu Aspanu-an a lo nuih avang chuan a thinur ru deuh viau a, Duchess thil hriat lohna chuan a hip deuh bawk si, nghet charhin, “Duchess duhtak, kan la inhmu ngai love, ka hming pum chu Salvatore Guilianno a ni a, Sicily venghimtuah ka inngai a ni, vawiina ka lo kal nachhan chu, i tlereuh te miretheite tana thilthlawnpeka pe tur che a ngen tur chein a ni a, Krismas niah Isua pianna champha hlim leh lawm takin an lawm ve thei dawn a ni.” a ti a.

Duchess chu awih lo zetin a nui a, he tlangval, a hmel leh a taksaina amaha riltamna maktak kaihthawhsaktu hian a tina theiin a ring lo. Hlauhawm thlentu tur anga a lang chu a ngaihna a hre lo hle. Palermoa party-naah an chanchin sawi ngei tur a nih hi. Nui seih chungin, “Ka tlereuh zawng zawng chu Palermo-a bank pindan awmkhauhah a awm vek alawm, he ina pawisa awm ang ang chu i nei thei ang.” Tumahin a thusawi an la awih lo ngai lo. Hmeichhe naupang a nih lai atang tawhin dawt a sawi ngai lo a, tun hi a vawikhatna a ni.

Guilianno chuan a lunghlu thi awrh chu a han en a, dawt a sawi tih a hre mai, mahse a tih nei tur chu a ti hreh hle. Chutah Pisciotta lam hawi chuan a han bu nghat a, ani chuan chang vawithum a han tum a, reiloteah Passatempo-a hmel bumro pui chu tukverhah chuan a lo lang ta a, a landanah chuan ennawm chhuahnaa tel awm tak zawk a ni a. Gorrila-te pawh a ang thei lek lek. Duchess a hmuh chuan a ha eng thut mai lang thu chuan a han nuih a.

Suamhmang pathumna lo lang chuan Duchess chu a tihlau ta nge nge a. A thi chu phelhin Guilianno chu a pe a, “Kha khan a tilungawi zo che em?” a ti a.

“Aih,” Guilianno chuan tiin, “Ka pi duhtak, Thinnel tak ka ni a, mahse ka thiante hian duh dan dang an nei asin. Ka thianpa Aspanu hi, hmeltha viau mahse, a hmuihmul tereuhte nena mi rilru a tihnat zat zeta nunrawng a ni a. Passatempo hi, ka thuhnuaia awm a ni chung hian mumang tha lo min man tir fo thin. Chettir tur chuan min tilui lul suh, Huanah khuan mupui angin an thlir vel ang a, naupangte khu tlang lamah an hruai daih palh ang e. I lunghlu dangte chu min han lak teh le.”

Duchess chu mut pindan lamah tlan lutin reiloteah tlereuh bawm nen a rawn chhuak leh nghal a. tlereuh tlem chu a thukru then hman tho a ni. bawm chu Guilianno chu a pe a. Ani chuan lawmthu hrilh pahin, Pisciotta lam chu a han hawi a, “Aspanu, Kan pi hian theihnghilh a nei mial maithei asin, a tihchian nan mut pindan lam va en chhin teh,” a ti a. Pisciotta chuan tlereuh thuhruk chu a va hmuchhuak nghal mai a, Guilianno chu a rawn pe a.

Guilianno chuan bawm chu a han hawng a, thil hlu tak tak a han hmuh chuan lawm avangin a au chhuak lo chauh a ni. Montelepre khua thlakhat lai chawmna daih zan tur a ni. A hnathawktuten thlantui far zawih zawiha an hlawh chhuah pawisa hmanga Duke-in a lei a nih avang chuan a lawmna a zual hle bawk. Duchess-in a kut a tih chet zawnga a lunghlu zungbun lo lang chu a zu hmu leh a.

“Ka pi duhtak, i thil hlu thupa min bum tum khawpa eng vanga a em em nge i nih le? Khatiang kha nangni ang mahni rohlu bawiha tang ten an tih ka rin i ring lo em ni? tlereuh pahnih khat vang leka i nunna leh i fate nunna i dahkham tak mai le, i pasal Duke an a lukhum a ngaihtuah ang lek bakin i ngaihtuah awm der si lo a. Tunah phili buai hlek lovin, i kuta zungbun kha min han pe teh le.” Guilianno chuan a ti a.

Duchess chuan mittui tla zawih zawihin, “Tlangval, hei chu min laksak lul teh suh, a hlutna ang tawk pawisa chu ka lo thawn mai ang che. Hei hi chu ka pasalin inhualna thilpeka min pek a ni a, a tel lo chuan ka awm thei lovang, ka keh chhe vek a ni mai.” a ti a.

Aspanu chu tilui tih hriat deuhin a lo nui leh hak a. A ngenna avangin a nem ang a, zungbun chu a la lo mai ang tih a lo hlau a ni. Chu emerald zungbun chu a hlu ber a ni si a.

Turi-an duchess bana man a, a kuzungtang khur beuh beuh atanga zungbn a pawh chhuah sak hrawk laia a mitmeng chu Pisciotta chuan a hrereng tawh ang. Turi chuan zungbun chu a kutzungteah a bun ta daih a.

Turi chuan Duchess hmel ngui tak leh a miita mittui a hmuh chuan a nem leh ta deuh a, “I hriatrengna zahna lantir nan he zungbun hi ka hralh lovang, keiman ka bun thung ang.” a ti a. Duchess chuan tihelna hmel a han beisei deuh a, mahse chutiang reng a lang lo.

Chu lai hun tawiteah chuan Guilianno chuan danglamna mak tak a lo tawng thung a. Chutia a kuta zungbun a han bun chiah chuan thiltihtheihna nei ta riai riaiin a inhria a. Chu zungbun hmang chuan a tana khuanu ruat chanvo nen inkutsuih ta ni maiin a inhria. Mihausate khawvel atanga a hlawhchhuah thuneihna chu. Chu zungbun hring thim nghalh mai, rangkachaka luan kual raih chu, kum tam tak chhung thlamuang taka lo buntu rimtui inhnawih rim a nam chak a, a ta ni nai lo tur nun ze ril zawk chu a tem ta a ni.

Don Croce chuan ngawi rengin a lo ngaithla a.

Duke of Alcamo chuan a vuina thu chu a mah ngeiin Don Croce hnenah a thlen a ni. friends of friends hnenah chuan ‘humhimna man’ a pe lo em ni? rukru eng chi pawh lakah a himna an pe thei lo maw? Hmanah kha chuan hetiang thil hi tu man an ti ngai lo. Engtinnge Don Croce hian tlereuh te chu lak let a tum dan? he rukrukna hi thuneitu te hnenah Duke chuan a thlen tho a, chu chuan Don chu a tilawm lo ang tih a hlau deuh. Mahse Insurance lak tur a awm tlat a ni. Rome chuan Guilianno chu an ngaih thutak phah maithei asin.

Don Croce pawh chuan Guilianno chu ngaih thutak a hun tawh hlein a ngai a. Duke hnenah chuan, “I tlereuh chu la let leh thei ta ila, a hlutna hmun lia thena hmun khat i pe duh ang em?”

Duke chu a thinrim kher mai, “Kei leh ka bungruate himna atan ‘humhimna man’ ka pe che a ni lo’mni? I tih tur i tih loh hnuah tlanna sum pe turin min beisei leh a maw? Hetianga i sumdawnna i kalpui chuan engtinnge a dawrtu che zahna i hmuh theih ang?”

Don Croce chu a bu nghat a, “I ti dik e, mahse hetiang zawng hian ngaihtuah teh, Guilianno kha khuarel chhiatna lo ni ta se, emaw Pathian hremna te lo ni ta se? Friends of friends chu lirnghing, tlangkang leh tuilian laka hum tur che chuan i beisei lo ang ti raw? A hunah chuan Guilianno chu thunun a ni ngei ang, ka tiam a che. Mahse ngaihtuah teh, ka ruahmanna angin tlanna sum chu i pe ang a, kum nga chhungin humhimna man tel lovin venhim i ni ang a, inremna tha tak nen Guilianno chuan a tibuai leh ngai tawh lo ang che. Mahse engatine a mah leh kei hian chutiang thil hlute chu Palermoa banka pindan awmkhauha awm tura kan ngaih tlat ni? Hmeichhiate hi chu an mawlmang lutuk a, mipa ten he khawvela thil hlute hi itna leh duhamnain kan khat tih an hre zo thin lo.” A han chawl hlek a, “Kum nga chhunga inhumhimna man i pek tur te i chhut chuan tuna vanduaina avang hian tlemte chauh i hloh tih i hre thei ang.”

Duke chuan a ngaihtuah tehmeuh mai. Don Croce chu a dik a ni, a hma lamah hun khirh tak a hmachhawn thei tlat. Tlereuh tlannaah chuan Kumnga chhung ‘humhimna man’ awl dawn pawh nise ‘tlemte’ aia tam deuh chu a hloh ngei dawn tih a hria. Chu kum nga thleng chu Don Croce chu a la dam ang emaw Guilianno chu a thunun reng thei ang tih tunge sawi thei? Mahse duhthlan tur tha ber chu a ni si. Tlereuh dang duh belh zelna lakah Duchess chu a insum deuh maithei a chu chu pawisa khawlna tha elkhen a ni dawn bawk si. A ram thenkhat hralh leh a ngai dawn a ni, ram zau tak a la nei tho a. Duke chuan a remti ta a.

Don Croce chuan Hector Adonis a ko ta a. A tukah chuan Hector chu a Godson tlawh turin a kal ta a. A kalna vel chu sawifiahin, tlang takin a sawi a, “Palermo-a rukru hnena tlereuhte hi i hralh a nih pawhin hei aia man man zawk chuan i hralh thei chuang lo ang.” a ti a, “Hun a duh reiin i beisei angin krismas hma chuan pawisa i dawng lo ngei bawk ang a. Chubakah i tana pawimawh em em Don Croce-a duhsakna i dawng bawk dawn a ni; a zahawmna i tihchhiat sak nasa tawh a, chungte pawh chu a ngaidam vek dawn che a ni.”

Guilianno chuan a Godfather chu a nuih a, Doncroce-a duhsakna chu enga tan mah a ti lem lo. Mahse Palermoah tlereuhte chu lei turin zawngin mi a tir tawh a, hun a duh reiin thil tih ngai tam tak a awm tih a hria. Chu indawrna chu a remti ta a, mahse emerald zungbun chu a pe let duh lova.

A kal hma chuan Hector Adonis chuan thawnthu lungkuai lam Guilianno a zirtir thin chu a bansan ta nge nge a, a vawikhatna atan Sicily ram dinhmun dik tak chu a sawi ve ta a ni. “Ka fapa, i theihna te kei aia dahsang hi an tam pui lovang, tum sang tak i nei tih ka hria. Mahse nun khawchhuahna lam kan sawi a ngai a ni. friends of friends hneh chu i beisei thei lovang, tun kum sangkhat liam ta chhung khan Maimawm tam tak ang maiin sicily hmun tinah hian ril zamin an inzarpharh vek a, tunah chuan Don Croce chu a lai takah a awm a ni. A ngaihsak em em che a, i thian nih a duhin amah anga hausa ni turin a duh che a ni. A chang chuan a duh anga i awm a ngai ve dawn a ni. I lal ram hi i nei reng ang a, mahse Don Croce-a huam chhungah a ni thung ang. Thil chiang tak awm ta chu - Don Croce hi i khingpui en ngawt thei lo, chutiang a nih chuan nangmah a ti chhe vek ang che tih tunhma chanchin chhui pawhin a hriat theih a ni.”

Tichuan tlereuhte chu Duke hnena pek kir a ni ta a. Guilianno chuan a man chanve chu Pisciotta, Passatempo leh Terranova te insem tlan turin a dah hrang a, a kutzungtea Emrald zungbun chu hmu reng mahse engmah an sawi lo, a chhan chu tlereuh hralhna man chu engmah a la ve lo a ni.

A chanve dang chu mihausa ho beram vengtu te, hmeithai te leh fahrah te bakah mirethei zawng zawngte hnena sem tura tih a ni.

Pawisa tam zawk chu midang tirin a sem chhuak a. Mahse ni khat chu pawisa tam tham tak kengin , Montelepre leh Piani Dei Creci inkara khaw awmte fang tur chuan a chhuak a, Terranova-an a zui bawk a.

Khaw pakhatah chuan Pitar pathum, chhuan chham lek lek tawh te an va hmu a, an vai chuan pawisa tel a pe theuh a, lawm avanga tap zawih zawihin a kut an fawp ngawih ngawih a ni. Khaw pakhat dangah ve thung chuan dahkhamna sum a pek theih loh avanga a ram leh lo hloh mai tur mi pakhat an va hmu a. Dakhamna pek vek theihna khawp sum hnutchhiahin an kal san leh ta a.

Khaw pakhat dangah pawh chu khawchhunga chhang siamtu chhang zawng zawng chu lei sakin khaw mipui zawng zawng chu a hrai bawk a.

Chu khaw piahah chuan naupang damlo nu leh pate hnenah pawisa pein chumi hmang chuan Palermo Hospitala kal theihna tur leh an khaw doctor an rawn man pek tur an nei thei dawn a ni. Inneihnaah a tel bawk a, thuam chhawm tur thahnem tak a tum sak bawk.

Mahse nuam a tih ber mai chu naupan berh tak tak, kawtthlera vak vel ho hnena pawisa pek chu a ni, sicily khaw hmun tin deuh thawah an awm a ni. Thenkhat chuan Guilianno chu an lo hria a. A bulah chuan lo kal khawmin Guilianno chuan pawisa a lo sem a, an nu leh pate hnena pe turin a hrilh hlawm a. Hlim taka an in lam pana an kal chu a thlir reng a.

Pawisa tel tlemte chauh a nei tawh a, khaw thim hmaa a nu tlawh zawk chu a tum ta a. An in hnunga huana a kal lai chuan mipa leh hmeichhe naupang lo tap keuh keuh hi a hmu a, an nu leh paten an kawl tir pawisa chu carabinieri ten an laksak tih an lo hrilh a. Pawisa pein an nu leh pate pek tur dang pawh a la pek belh ta cheu a ni.

Chung naupangte nu leh pa chauh chu an hlim lo, Borgetto, Corleon, Particino, Monreal leh Piani Dei Creci khaw mipuite chuan an lawmna lan tir nan, ‘King of Montelepre’ tiin an ko ta a ni.

Duke lak atanga kum nga chhung ‘venhimna man’ a hloh tur chung pawhin Don Croce chu a hlim hle. Adonis hnenah Duke chuan tlereuh hlutna atanga zaa sawmhnih a pek thu a hrilh a. mahse Duke hnen atang chuan zaa sawmhnih panga lain, zaa panga chu a ipteah a thun hmak a ni.

A lawmna ber zawk erawh chu chutianga hmaa Guilianno a hre hma leh dik taka a awm dan a teh thei chu a ni. Mipa tling tak a ni. Naupangte ni siin thil a hmu thiam a, a fingin, thil hre zawk leh upate thu a ngaithla thiam tlat. A duhzawng tih nan rilru fim tak a hmang thin bawk, chu chuan Don Croce a tilawm hle., tunge amah ang thawhpui tura a a duh ang? Turi chu a thachhang dawltu atan a beisei hle a, a fapa ang mai a a en tur chu.

Guilianno chuan chung thilte chu a hmuh hmaih bik lo. A godfather chu a thil tih a ngaihsak hle tih a hria a, mahse a upa zawkte thu a ring pumhlum tihna a ni chuang lo. Friends of friends ho bei tur chuan a la chak tawk lo tih chu a hria a, an puihna a la mamawh zawk a ni, mahse rei tak erawh a tum chuang lo. Hector Adonis thu a ngaithla a nih chuan Don Croce zara nung mai mai a ni dawn tihna a ni a, chu erawh a duh miah loh thil a ni tlat. Hun erawh a la duh deuh dawn a ni.